Shrimadbhagavadgita Mulam - Chaturtho'dhyayah

ॐ

ஶ்ரீமத்பகவத்கீதா மூலம் - சதுர்தோऽத்யாயஃ

Gita Vyasa Tamil

ௐ ஶ்ரீ பரமாத்மநே நமஃ

அத சதுர்தோऽத்யாயஃ ।

ஜ்ஞாநயோகஃ

ஶ்ரீபகவாநுவாச

இமம் விவஸ்வதே யோகம் ப்ரோக்தவாநஹமவ்யயம் ।

விவஸ்வாந்மநவே ப்ராஹ மநுரிக்ஷ்வாகவேऽப்ரவீத் ॥ 1 ॥

ஏவம் பரம்பராப்ராப்தமிமம் ராஜர்ஷயோ விதுஃ ।

ஸ காலேநேஹ மஹதா யோகோ நஷ்டஃ பரந்தப ॥ 2 ॥

ஸ ஏவாயம் மயா தேऽத்ய யோகஃ ப்ரோக்தஃ புராதநஃ ।

பக்தோऽஸி மே ஸகா சேதி ரஹஸ்யம் ஹ்யேததுத்தமம் ॥ 3 ॥

அர்ஜுந உவாச

அபரம் பவதோ ஜந்ம பரம் ஜந்ம விவஸ்வதஃ ।

கதமேதத்விஜாநீயாம் த்வமாதௌ ப்ரோக்தவாநிதி ॥ 4 ॥

ஶ்ரீபகவாநுவாச

பஹூநி மே வ்யதீதாநி ஜந்மாநி தவ சார்ஜுந ।

தாந்யஹம் வேத ஸர்வாணி ந த்வம் வேத்த பரந்தப ॥ 5 ॥

அஜோऽபி ஸந்நவ்யயாத்மா பூதாநாமீஶ்வரோऽபி ஸந் ।

ப்ரக்ரு'திம் ஸ்வாமதிஷ்டாய ஸம்பவாம்யாத்மமாயயா ॥ 6 ॥

யதா யதா ஹி தர்மஸ்ய க்லாநிர்பவதி பாரத ।

அப்யுத்தாநமதர்மஸ்ய ததாத்மாநம் ஸ்ரு'ஜாம்யஹம் ॥ 7 ॥

பரித்ராணாய ஸாதூநாம் விநாஶாய ச துஷ்க்ரு'தாம் ।

தர்மஸம்ஸ்தாபநார்தாய ஸம்பவாமி யுகே யுகே ॥ 8 ॥

ஜந்ம கர்ம ச மே திவ்யமேவம் யோ வேத்தி தத்த்வதஃ ।

த்யக்த்வா தேஹம் புநர்ஜந்ம நைதி மாமேதி ஸோऽர்ஜுந ॥ 9 ॥

வீதராகபயக்ரோதா மந்மயா மாமுபாஶ்ரிதாஃ ।

பஹவோ ஜ்ஞாநதபஸா பூதா மத்பாவமாகதாஃ ॥ 10 ॥

யே யதா மாம் ப்ரபத்யந்தே தாம்ஸ்ததைவ பஜாம்யஹம் ।

மம வர்த்மாநுவர்தந்தே மநுஷ்யாஃ பார்த ஸர்வஶஃ ॥ 11 ॥

காங்க்ஷந்தஃ கர்மணாம் ஸித்திம் யஜந்த இஹ தேவதாஃ ।

க்ஷிப்ரம் ஹி மாநுஷே லோகே ஸித்திர்பவதி கர்மஜா ॥ 12 ॥

சாதுர்வர்ண்யம் மயா ஸ்ரு'ஷ்டம் குணகர்மவிபாகஶஃ ।

தஸ்ய கர்தாரமபி மாம் வித்த்யகர்தாரமவ்யயம் ॥ 13 ॥

ந மாம் கர்மாணி லிம்பந்தி ந மே கர்மபலே ஸ்ப்ரு'ஹா ।

இதி மாம் யோऽபிஜாநாதி கர்மபிர்ந ஸ பத்யதே ॥ 14 ॥

ஏவம் ஜ்ஞாத்வா க்ரு'தம் கர்ம பூர்வைரபி முமுக்ஷுபிஃ ।

குரு கர்மைவ தஸ்மாத்த்வம் பூர்வைஃ பூர்வதரம் க்ரு'தம் ॥ 15 ॥

கிம் கர்ம கிமகர்மேதி கவயோऽப்யத்ர மோஹிதாஃ ।

தத்தே கர்ம ப்ரவக்ஷ்யாமி யஜ்ஜ்ஞாத்வா மோக்ஷ்யஸேऽஶுபாத் ॥ 16 ॥

கர்மணோ ஹ்யபி போத்தவ்யம் போத்தவ்யம் ச விகர்மணஃ ।

அகர்மணஶ்ச போத்தவ்யம் கஹநா கர்மணோ கதிஃ ॥ 17 ॥

கர்மண்யகர்ம யஃ பஶ்யேதகர்மணி ச கர்ம யஃ ।

ஸ புத்திமாந்மநுஷ்யேஷு ஸ யுக்தஃ க்ரு'த்ஸ்நகர்மக்ரு'த் ॥ 18 ॥

யஸ்ய ஸர்வே ஸமாரம்பாஃ காமஸங்கல்பவர்ஜிதாஃ ।

ஜ்ஞாநாக்நிதக்தகர்மாணம் தமாஹுஃ பண்டிதம் புதாஃ ॥ 19 ॥

த்யக்த்வா கர்மபலாஸங்கம் நித்யத்ரு'ப்தோ நிராஶ்ரயஃ ।

கர்மண்யபிப்ரவ்ரு'த்தோऽபி நைவ கிஞ்சித்கரோதி ஸஃ ॥ 20 ॥

நிராஶீர்யதசித்தாத்மா த்யக்தஸர்வபரிக்ரஹஃ ।

ஶாரீரம் கேவலம் கர்ம குர்வந்நாப்நோதி கில்பிஷம் ॥ 21 ॥

யத்ரு'ச்சாலாபஸந்துஷ்டோ த்வந்த்வாதீதோ விமத்ஸரஃ ।

ஸமஃ ஸித்தாவஸித்தௌ ச க்ரு'த்வாபி ந நிபத்யதே ॥ 22 ॥

கதஸங்கஸ்ய முக்தஸ்ய ஜ்ஞாநாவஸ்திதசேதஸஃ ।

யஜ்ஞாயாசரதஃ கர்ம ஸமக்ரம் ப்ரவிலீயதே ॥ 23 ॥

ப்ரஹ்மார்பணம் ப்ரஹ்ம ஹவிர்ப்ரஹ்மாக்நௌ ப்ரஹ்மணா ஹுதம் ।

ப்ரஹ்மைவ தேந கந்தவ்யம் ப்ரஹ்மகர்மஸமாதிநா ॥ 24 ॥

தைவமேவாபரே யஜ்ஞம் யோகிநஃ பர்யுபாஸதே ।

ப்ரஹ்மாக்நாவபரே யஜ்ஞம் யஜ்ஞேநைவோபஜுஹ்வதி ॥ 25 ॥

ஶ்ரோத்ராதீநீந்த்ரியாண்யந்யே ஸம்யமாக்நிஷு ஜுஹ்வதி ।

ஶப்தாதீந்விஷயாநந்ய இந்த்ரியாக்நிஷு ஜுஹ்வதி ॥ 26 ॥

ஸர்வாணீந்த்ரியகர்மாணி ப்ராணகர்மாணி சாபரே ।

ஆத்மஸம்யமயோகாக்நௌ ஜுஹ்வதி ஜ்ஞாநதீபிதே ॥ 27 ॥

த்ரவ்யயஜ்ஞாஸ்தபோயஜ்ஞா யோகயஜ்ஞாஸ்ததாபரே ।

ஸ்வாத்யாயஜ்ஞாநயஜ்ஞாஶ்ச யதயஃ ஸம்ஶிதவ்ரதாஃ ॥ 28 ॥

அபாநே ஜுஹ்வதி ப்ராணம் ப்ராணேऽபாநம் ததாபரே ।

ப்ராணாபாநகதீ ருத்த்வா ப்ராணாயாமபராயணாஃ ॥ 29 ॥

அபரே நியதாஹாராஃ ப்ராணாந்ப்ராணேஷு ஜுஹ்வதி ।

ஸர்வேऽப்யேதே யஜ்ஞவிதோ யஜ்ஞக்ஷபிதகல்மஷாஃ ॥ 30 ॥

யஜ்ஞஶிஷ்டாம்ரு'தபுஜோ யாந்தி ப்ரஹ்ம ஸநாதநம் ।

நாயம் லோகோऽஸ்த்யயஜ்ஞஸ்ய குதோऽந்யஃ குருஸத்தம ॥ 31 ॥

ஏவம் பஹுவிதா யஜ்ஞா விததா ப்ரஹ்மணோ முகே ।

கர்மஜாந்வித்தி தாந்ஸர்வாநேவம் ஜ்ஞாத்வா விமோக்ஷ்யஸே ॥ 32 ॥

ஶ்ரேயாந்த்ரவ்யமயாத்யஜ்ஞாஜ்ஜ்ஞாநயஜ்ஞஃ பரந்தப ।

ஸர்வம் கர்மாகிலம் பார்த ஜ்ஞாநே பரிஸமாப்யதே ॥ 33 ॥

தத்வித்தி ப்ரணிபாதேந பரிப்ரஶ்நேந ஸேவயா ।

உபதேக்ஷ்யந்தி தே ஜ்ஞாநம் ஜ்ஞாநிநஸ்தத்த்வதர்ஶிநஃ ॥ 34 ॥

யஜ்ஜ்ஞாத்வா ந புநர்மோஹமேவம் யாஸ்யஸி பாண்டவ ।

யேந பூதாந்யஶேஷேண த்ரக்ஷ்யஸ்யாத்மந்யதோ மயி ॥ 35 ॥

அபி சேதஸி பாபேப்யஃ ஸர்வேப்யஃ பாபக்ரு'த்தமஃ ।

ஸர்வம் ஜ்ஞாநப்லவேநைவ வ்ரு'ஜிநம் ஸந்தரிஷ்யஸி ॥ 36 ॥

யதைதாம்ஸி ஸமித்தோऽக்நிர்பஸ்மஸாத்குருதேऽர்ஜுந ।

ஜ்ஞாநாக்நிஃ ஸர்வகர்மாணி பஸ்மஸாத்குருதே ததா ॥ 37 ॥

ந ஹி ஜ்ஞாநேந ஸத்ரு'ஶம் பவித்ரமிஹ வித்யதே ।

தத்ஸ்வயம் யோகஸம்ஸித்தஃ காலேநாத்மநி விந்ததி ॥ 38 ॥

ஶ்ரத்தாவாँல்லபதே ஜ்ஞாநம் தத்பரஃ ஸம்யதேந்த்ரியஃ ।

ஜ்ஞாநம் லப்த்வா பராம் ஶாந்திமசிரேணாதிகச்சதி ॥ 39 ॥

அஜ்ஞஶ்சாஶ்ரத்ததாநஶ்ச ஸம்ஶயாத்மா விநஶ்யதி ।

நாயம் லோகோऽஸ்தி ந பரோ ந ஸுகம் ஸம்ஶயாத்மநஃ ॥ 40 ॥

யோகஸந்ந்யஸ்தகர்மாணம் ஜ்ஞாநஸஞ்சிந்நஸம்ஶயம் ।

ஆத்மவந்தம் ந கர்மாணி நிபத்நந்தி தநஞ்ஜய ॥ 41 ॥

தஸ்மாதஜ்ஞாநஸம்பூதம் ஹ்ரு'த்ஸ்தம் ஜ்ஞாநாஸிநாத்மநஃ ।

சித்த்வைநம் ஸம்ஶயம் யோகமாதிஷ்டோத்திஷ்ட பாரத ॥ 42 ॥

ௐ தத்ஸதிதி ஶ்ரீமத்பகவத்கீதாஸூபநிஷத்ஸு ப்ரஹ்மவித்யாயாம் யோகஶாஸ்த்ரே

ஶ்ரீக்ரு'ஷ்ணார்ஜுநஸம்வாதே ஜ்ஞாநகர்மஸந்ந்யாஸயோகோ நாம சதுர்தோऽத்யாயஃ ॥4 ॥

Roman (IAST) Transliteration

oṃ śrī paramātmane namaḥ

atha caturtho'dhyāyaḥ |

jñānayogaḥ

śrībhagavānuvāca

imaṃ vivasvate yogaṃ proktavānahamavyayam |

vivasvānmanave prāha manurikṣvākave'bravīt || 1 ||

evaṃ paramparāprāptamimaṃ rājarṣayo viduḥ |

sa kāleneha mahatā yogo naṣṭaḥ parantapa || 2 ||

sa evāyaṃ mayā te'dya yogaḥ proktaḥ purātanaḥ |

bhakto'si me sakhā ceti rahasyaṃ hyetaduttamam || 3 ||

arjuna uvāca

aparaṃ bhavato janma paraṃ janma vivasvataḥ |

kathametadvijānīyāṃ tvamādau proktavāniti || 4 ||

śrībhagavānuvāca

bahūni me vyatītāni janmāni tava cārjuna |

tānyahaṃ veda sarvāṇi na tvaṃ vettha parantapa || 5 ||

ajo'pi sannavyayātmā bhūtānāmīśvaro'pi san |

prakṛtiṃ svāmadhiṣṭhāya sambhavāmyātmamāyayā || 6 ||

yadā yadā hi dharmasya glānirbhavati bhārata |

abhyutthānamadharmasya tadātmānaṃ sṛjāmyaham || 7 ||

paritrāṇāya sādhūnāṃ vināśāya ca duṣkṛtām |

dharmasaṃsthāpanārthāya sambhavāmi yuge yuge || 8 ||

janma karma ca me divyamevaṃ yo vetti tattvataḥ |

tyaktvā dehaṃ punarjanma naiti māmeti so'rjuna || 9 ||

vītarāgabhayakrodhā manmayā māmupāśritāḥ |

bahavo jñānatapasā pūtā madbhāvamāgatāḥ || 10 ||

ye yathā māṃ prapadyante tāṃstathaiva bhajāmyaham |

mama vartmānuvartante manuṣyāḥ pārtha sarvaśaḥ || 11 ||

kāṅkṣantaḥ karmaṇāṃ siddhiṃ yajanta iha devatāḥ |

kṣipraṃ hi mānuṣe loke siddhirbhavati karmajā || 12 ||

cāturvarṇyaṃ mayā sṛṣṭaṃ guṇakarmavibhāgaśaḥ |

tasya kartāramapi māṃ viddhyakartāramavyayam || 13 ||

na māṃ karmāṇi limpanti na me karmaphale spṛhā |

iti māṃ yo'bhijānāti karmabhirna sa badhyate || 14 ||

evaṃ jñātvā kṛtaṃ karma pūrvairapi mumukṣubhiḥ |

kuru karmaiva tasmāttvaṃ pūrvaiḥ pūrvataraṃ kṛtam || 15 ||

kiṃ karma kimakarmeti kavayo'pyatra mohitāḥ |

tatte karma pravakṣyāmi yajjñātvā mokṣyase'śubhāt || 16 ||

karmaṇo hyapi boddhavyaṃ boddhavyaṃ ca vikarmaṇaḥ |

akarmaṇaśca boddhavyaṃ gahanā karmaṇo gatiḥ || 17 ||

karmaṇyakarma yaḥ paśyedakarmaṇi ca karma yaḥ |

sa buddhimānmanuṣyeṣu sa yuktaḥ kṛtsnakarmakṛt || 18 ||

yasya sarve samārambhāḥ kāmasaṅkalpavarjitāḥ |

jñānāgnidagdhakarmāṇaṃ tamāhuḥ paṇḍitaṃ budhāḥ || 19 ||

tyaktvā karmaphalāsaṅgaṃ nityatṛpto nirāśrayaḥ |

karmaṇyabhipravṛtto'pi naiva kiñcitkaroti saḥ || 20 ||

nirāśīryatacittātmā tyaktasarvaparigrahaḥ |

śārīraṃ kevalaṃ karma kurvannāpnoti kilbiṣam || 21 ||

yadṛcchālābhasantuṣṭo dvandvātīto vimatsaraḥ |

samaḥ siddhāvasiddhau ca kṛtvāpi na nibadhyate || 22 ||

gatasaṅgasya muktasya jñānāvasthitacetasaḥ |

yajñāyācarataḥ karma samagraṃ pravilīyate || 23 ||

brahmārpaṇaṃ brahma havirbrahmāgnau brahmaṇā hutam |

brahmaiva tena gantavyaṃ brahmakarmasamādhinā || 24 ||

daivamevāpare yajñaṃ yoginaḥ paryupāsate |

brahmāgnāvapare yajñaṃ yajñenaivopajuhvati || 25 ||

śrotrādīnīndriyāṇyanye saṃyamāgniṣu juhvati |

śabdādīnviṣayānanya indriyāgniṣu juhvati || 26 ||

sarvāṇīndriyakarmāṇi prāṇakarmāṇi cāpare |

ātmasaṃyamayogāgnau juhvati jñānadīpite || 27 ||

dravyayajñāstapoyajñā yogayajñāstathāpare |

svādhyāyajñānayajñāśca yatayaḥ saṃśitavratāḥ || 28 ||

apāne juhvati prāṇaṃ prāṇe'pānaṃ tathāpare |

prāṇāpānagatī ruddhvā prāṇāyāmaparāyaṇāḥ || 29 ||

apare niyatāhārāḥ prāṇānprāṇeṣu juhvati |

sarve'pyete yajñavido yajñakṣapitakalmaṣāḥ || 30 ||

yajñaśiṣṭāmṛtabhujo yānti brahma sanātanam |

nāyaṃ loko'styayajñasya kuto'nyaḥ kurusattama || 31 ||

evaṃ bahuvidhā yajñā vitatā brahmaṇo mukhe |

karmajānviddhi tānsarvānevaṃ jñātvā vimokṣyase || 32 ||

śreyāndravyamayādyajñājjñānayajñaḥ parantapa |

sarvaṃ karmākhilaṃ pārtha jñāne parisamāpyate || 33 ||

tadviddhi praṇipātena paripraśnena sevayā |

upadekṣyanti te jñānaṃ jñāninastattvadarśinaḥ || 34 ||

yajjñātvā na punarmohamevaṃ yāsyasi pāṇḍava |

yena bhūtānyaśeṣeṇa drakṣyasyātmanyatho mayi || 35 ||

api cedasi pāpebhyaḥ sarvebhyaḥ pāpakṛttamaḥ |

sarvaṃ jñānaplavenaiva vṛjinaṃ santariṣyasi || 36 ||

yathaidhāṃsi samiddho'gnirbhasmasātkurute'rjuna |

jñānāgniḥ sarvakarmāṇi bhasmasātkurute tathā || 37 ||

na hi jñānena sadṛśaṃ pavitramiha vidyate |

tatsvayaṃ yogasaṃsiddhaḥ kālenātmani vindati || 38 ||

śraddhāvā~llabhate jñānaṃ tatparaḥ saṃyatendriyaḥ |

jñānaṃ labdhvā parāṃ śāntimacireṇādhigacchati || 39 ||

ajñaścāśraddadhānaśca saṃśayātmā vinaśyati |

nāyaṃ loko'sti na paro na sukhaṃ saṃśayātmanaḥ || 40 ||

yogasannyastakarmāṇaṃ jñānasañchinnasaṃśayam |

ātmavantaṃ na karmāṇi nibadhnanti dhanañjaya || 41 ||

tasmādajñānasambhūtaṃ hṛtsthaṃ jñānāsinātmanaḥ |

chittvainaṃ saṃśayaṃ yogamātiṣṭhottiṣṭha bhārata || 42 ||

oṃ tatsaditi śrīmadbhagavadgītāsūpaniṣatsu brahmavidyāyāṃ yogaśāstre

śrīkṛṣṇārjunasaṃvāde jñānakarmasannyāsayogo nāma caturtho'dhyāyaḥ ||4 ||