📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
ஶ்ரீ ஸுப்ரஹ்மண்ய ஹ்ரு'தய ஸ்தோத்ரம்
Shri Subrahmanya Hridaya Stotram
Murugan Stotram Tamil
அஸ்ய ஶ்ரீஸுப்ரஹ்மண்யஹ்ரு'தயஸ்தோத்ரமஹாமந்த்ரஸ்ய, அகஸ்த்யோ பகவாந் ரு'ஷிஃ, அநுஷ்டுப்சந்தஃ, ஶ்ரீஸுப்ரஹ்மண்யோ தேவதா, ஸௌம் பீஜம், ஸ்வாஹா ஶக்திஃ, ஶ்ரீம் கீலகம், ஶ்ரீஸுப்ரஹ்மண்ய ப்ரஸாதஸித்த்யர்தே ஜபே விநியோகஃ ॥
கரந்யாஸஃ –
ஸுப்ரஹ்மண்யாய அங்குஷ்டாப்யாம் நமஃ ।
ஷண்முகாய தர்ஜநீப்யாம் நமஃ ।
ஶக்திதராய மத்யமாப்யாம் நமஃ ।
ஷட்கோணஸம்ஸ்திதாய அநாமிகாப்யாம் நமஃ ।
ஸர்வதோமுகாய கநிஷ்டிகாப்யாம் நமஃ ।
தாரகாந்தகாய கரதலகரப்ரு'ஷ்டாப்யாம் நமஃ ॥
ஹ்ரு'தயாதி ந்யாஸஃ –
ஸுப்ரஹ்மண்யாய ஹ்ரு'தயாய நமஃ ।
ஷண்முகாய ஶிரஸே ஸ்வாஹா ।
ஶக்திதராய ஶிகாயை வஷட் ।
ஷட்கோணஸம்ஸ்திதாய கவசாய ஹும் ।
ஸர்வதோமுகாய நேத்ரத்ரயாய வௌஷட் ।
தாரகாந்தகாய அஸ்த்ராய பட் ।
பூர்புவஸ்ஸுவரோமிதி திக்பந்தஃ ॥
த்யாநம் ।
ஷட்வக்த்ரம் ஶிகிவாஹநம் த்ரிநயநம் சித்ராம்பராலங்க்ரு'தம்
வஜ்ரம் ஶக்திமஸிம் த்ரிஶூலமபயம் கேடம் தநுஶ்சக்ரகம் ।
பாஶம் குக்குடமங்குஶம் ச வரதம் தோர்பிர்ததாநம் ஸதா
த்யாயாமீப்ஸித ஸித்திதம் ஶிவஸுதம் ஶ்ரீத்வாதஶாக்ஷம் குஹம் ॥
லமித்யாதி பஞ்சபூஜாம் குர்யாத் ।
பீடிகா ।
ஸத்யலோகே ஸதாநந்தே முநிபிஃ பரிவேஷ்டிதம் ।
பப்ரச்சுர்முநயஃ ஸர்வே ப்ரஹ்மாணம் ஜகதாம் குரும் ॥ 1 ॥
பகவந் ஸர்வலோகேஶ ஸர்வஜ்ஞ கமலாஸந ।
ஸதாநந்த ஜ்ஞாநமூர்தே ஸர்வபூதஹிதே ரத ॥ 2 ॥
பஹுதா ப்ரோக்தமேதஸ்ய குஹஸ்ய சரிதம் மஹத் ।
ஹ்ரு'தயம் ஶ்ரோதுமிச்சாமஃ தஸ்யைவ க்ரௌஞ்சபேதிநஃ ॥ 3 ॥
ப்ரஹ்மோவாச ।
ஶ்ரு'ண்வந்து முநயஃ ஸர்வே குஹ்யாத்குஹ்யதரம் மஹத் ।
ஸுப்ரஹ்மண்யஸ்ய ஹ்ரு'தயம் ஸர்வபூதஹிதோதயம் ॥ 4 ॥
ஸர்வார்தஸித்திதம் புண்யம் ஸர்வகார்யைக ஸாதநம் ।
தர்மார்தகாமதம் குஹ்யம் தநதாந்யப்ரவர்தநம் ॥ 5 ॥
ரஹஸ்யமேதத்தேவாநாம் அதேயம் யஸ்ய கஸ்யசித் ।
ஸர்வமித்ரகரம் கோப்யம் தேஜோபலஸமந்விதம் ॥ 6 ॥
ப்ரவக்ஷ்யாமி ஹிதார்தம் வஃ பரிதுஷ்டேந சேதஸா ।
ஹ்ரு'த்பத்மகர்ணிகாமத்யே த்யாயேத்ஸர்வமநோஹரம் ॥ 7 ॥
அத ஹ்ரு'தயம் ।
ஸுவர்ணமண்டபம் திவ்யம் ரத்நதோரணராஜிதம் ।
ரத்நஸ்தம்பஸஹஸ்ரைஶ்ச ஶோபிதம் பரமாத்புதம் ॥ 8 ॥
பரமாநந்தநிலயம் பாஸ்வத்ஸூர்யஸமப்ரபம் ।
தேவதாநவகந்தர்வகருடைர்யக்ஷகிந்நரைஃ । ॥ 9 ॥
ஸேவார்தமாகதைஃ ஸித்தைஃ ஸாத்யைரத்யுஷிதம் ஸதா ।
மஹாயோகீந்த்ரஸம்ஸேவ்யம் மந்தாரதருமண்டிதம் ॥ 10 ॥
மணிவித்ருமவேதீபிர்மஹதீபிருதஞ்சிதம் ।
தந்மத்யேऽநந்தரத்ந ஶ்ரீச்சடாமண்டலஶோபிதம் ॥ 11 ॥
ரத்நஸிம்ஹாஸநம் திவ்யம் ரவிகோடிஸமப்ரபம் ।
ஸர்வாஶ்சர்யமயம் புண்யம் ஸர்வதஃ ஸுபரிஷ்க்ரு'தம் ॥ 12 ॥
தந்மத்யேऽஷ்டதலம் பத்மம் உத்யதர்கப்ரபோதயம் ।
நிகமாகமரோலம்பலம்பிதம் சிந்மயோதயம் ॥ 13 ॥
திவ்யம் தேஜோமயம் திவ்யம் தேவதாபிர்நமஸ்க்ரு'தம் ।
தேதீப்யமாநம் ருசிபிர்விஶாலம் ஸுமநோஹரம் ॥ 14 ॥
தந்மத்யே ஸர்வலோகேஶம் த்யாயேத்ஸர்வாங்கஸுந்தரம் ।
அநந்தாதித்யஸங்காஶம் ஆஶ்ரிதாபீஷ்டதாயகம் ॥ 15 ॥
அசிந்த்யஜ்ஞாநவிஜ்ஞாநதேஜோபலஸமந்விதம் ।
ஸர்வாயுததரம் திவ்யம் ஸர்வாஶ்சர்யமயம் குஹம் ॥ 16 ॥
மஹார்ஹ ரத்நகசித ஷட்கிரீடவிராஜிதம் ।
ஶஶாங்கார்தகலாரம்ய ஸமுத்யந்மௌலிபூஷணம் ॥ 17 ॥
மதநோஜ்ஜ்வலகோதண்டமங்கலப்ரூவிராஜிதம் ।
விஸ்தீர்ணாருணபத்மஶ்ரீ விலஸத்த்வாதஶேக்ஷணம் ॥ 18 ॥
சாருஶ்ரீவர்ணஸம்பூர்ணமுகஶோபாவிபாஸுரம் ।
மணிப்ரபாஸமக்ரஶ்ரீஸ்புரந்மகரகுண்டலம் ॥ 19 ॥
லஸத்தர்பணதர்பாட்ய கண்டஸ்தலவிராஜிதம் ।
திவ்யகாஞ்சநபுஷ்பஶ்ரீநாஸாபுடவிராஜிதம் ॥ 20 ॥
மந்தஹாஸப்ரபாஜாலமதுராதர ஶோபிதம் ।
ஸர்வலக்ஷணலக்ஷ்மீப்ரு'த்கம்புகந்தர ஸுந்தரம் ॥ 21 ॥
மஹாநர்கமஹாரத்நதிவ்யஹாரவிராஜிதம் ।
ஸமக்ரநாககேயூரஸந்நத்தபுஜமண்டலம் ॥ 22 ॥
ரத்நகங்கணஸம்பாஸ்வத்கராக்ர ஶ்ரீமஹோஜ்ஜ்வலம் ।
மஹாமணிகவாடாபவக்ஷஃஸ்தலவிராஜிதம் ॥ 23 ॥
அதிகாம்பீர்யஸம்பாவ்யநாபீநவஸரோருஹம் ।
ரத்நஶ்ரீகலிதாபத்தலஸந்மத்யப்ரதேஶகம் ॥ 24 ॥
ஸ்புரத்கநகஸம்வீதபீதாம்பரஸமாவ்ரு'தம் ।
ஶ்ரு'ங்காரரஸஸம்பூர்ண ரத்நஸ்தம்போபமோருகம் ॥ 25 ॥
ஸ்வர்ணகாஹலரோசிஷ்ணு ஜங்காயுகலமண்டலம் ।
ரத்நமஞ்ஜீரஸந்நத்த ரமணீய பதாம்புஜம் ॥ 26 ॥
பக்தாபீஷ்டப்ரதம் தேவம் ப்ரஹ்மவிஷ்ண்வாதிஸம்ஸ்துதம் ।
கடாக்ஷைஃ கருணாதக்ஷைஸ்தோஷயந்தம் ஜகத்பதிம் ॥ 27 ॥
சிதாநந்தஜ்ஞாநமூர்திம் ஸர்வலோகப்ரியங்கரம் ।
ஶங்கரஸ்யாத்மஜம் தேவம் த்யாயேச்சரவணோத்பவம் ॥ 28 ॥
அநந்தாதித்யசந்த்ராக்நி தேஜஃ ஸம்பூர்ணவிக்ரஹம் ।
ஸர்வலோகைகவரதம் ஸர்வவித்யார்ததத்த்வகம் ॥ 29 ॥
ஸர்வேஶ்வரம் ஸர்வவிபும் ஸர்வபூதஹிதே ரதம் ।
ஏவம் த்யாத்வா து ஹ்ரு'தயம் ஷண்முகஸ்ய மஹாத்மநஃ ॥ 30 ॥
ஸர்வாந்காமாநவாப்நோதி ஸம்யக் ஜ்ஞாநம் ச விந்ததி ।
ஶுசௌ தேஶே ஸமாஸீநஃ ஶுத்தாத்மா சரிதாஹ்நிகஃ ॥ 31 ॥
ப்ராங்முகோ யதசித்தஶ்ச ஜபேத்த்ரு'தயமுத்தமம் ।
ஸக்ரு'தேவ மநும் ஜப்த்வா ஸம்ப்ராப்நோத்யகிலம் ஶுபம் ॥ 32 ॥
இதம் ஸர்வாகஹரணம் ம்ரு'த்யுதாரித்ர்யநாஶநம் ।
ஸர்வஸம்பத்கரம் புண்யம் ஸர்வரோகநிவாரணம் ॥ 33 ॥
ஸர்வகாமகரம் திவ்யம் ஸர்வாபீஷ்டப்ரதாயகம் ।
ப்ரஜாகரம் ராஜ்யகரம் பாக்யதம் பஹுபுண்யதம் ॥ 34 ॥
குஹ்யாத்குஹ்யதரம் பூயோ தேவாநாமபி துர்லபம் ।
இதம் து நாதபஸ்காய நாபக்தாய கதாசந ॥ 35 ॥
ந சாஶுஶ்ரூஷவே தேயம் ந மதாந்தாய கர்ஹிசித் ।
ஸச்சிஷ்யாய குலீநாய ஸ்கந்தபக்திரதாய ச ॥ 36 ॥
ஸதாமபிமதாயேதம் தாதவ்யம் தர்மவர்தநம் ।
ய இதம் பரமம் புண்யம் நித்யம் ஜபதி மாநவஃ ।
தஸ்ய ஶ்ரீ பகவாந் ஸ்கந்தஃ ப்ரஸந்நோ பவதி த்ருவம் ॥ 37 ॥
இதி ஶ்ரீஸ்காந்தபுராணே ஸுப்ரஹ்மண்யஹ்ரு'தயஸ்தோத்ரம் ॥
Roman (IAST) Transliteration
asya śrīsubrahmaṇyahṛdayastotramahāmantrasya, agastyo bhagavān ṛṣiḥ, anuṣṭupchandaḥ, śrīsubrahmaṇyo devatā, sauṃ bījaṃ, svāhā śaktiḥ, śrīṃ kīlakaṃ, śrīsubrahmaṇya prasādasiddhyarthe jape viniyogaḥ ||
karanyāsaḥ –
subrahmaṇyāya aṅguṣṭhābhyāṃ namaḥ |
ṣaṇmukhāya tarjanībhyāṃ namaḥ |
śaktidharāya madhyamābhyāṃ namaḥ |
ṣaṭkoṇasaṃsthitāya anāmikābhyāṃ namaḥ |
sarvatomukhāya kaniṣṭhikābhyāṃ namaḥ |
tārakāntakāya karatalakarapṛṣṭhābhyāṃ namaḥ ||
hṛdayādi nyāsaḥ –
subrahmaṇyāya hṛdayāya namaḥ |
ṣaṇmukhāya śirase svāhā |
śaktidharāya śikhāyai vaṣaṭ |
ṣaṭkoṇasaṃsthitāya kavacāya hum |
sarvatomukhāya netratrayāya vauṣaṭ |
tārakāntakāya astrāya phaṭ |
bhūrbhuvassuvaromiti digbandhaḥ ||
dhyānam |
ṣaḍvaktraṃ śikhivāhanaṃ trinayanaṃ citrāmbarālaṅkṛtaṃ
vajraṃ śaktimasiṃ triśūlamabhayaṃ kheṭaṃ dhanuścakrakam |
pāśaṃ kukkuṭamaṅkuśaṃ ca varadaṃ dorbhirdadhānaṃ sadā
dhyāyāmīpsita siddhidaṃ śivasutaṃ śrīdvādaśākṣaṃ guham ||
lamityādi pañcapūjāṃ kuryāt |
pīṭhikā |
satyaloke sadānande munibhiḥ pariveṣṭitam |
papracchurmunayaḥ sarve brahmāṇaṃ jagatāṃ gurum || 1 ||
bhagavan sarvalokeśa sarvajña kamalāsana |
sadānanda jñānamūrte sarvabhūtahite rata || 2 ||
bahudhā proktametasya guhasya caritaṃ mahat |
hṛdayaṃ śrotumicchāmaḥ tasyaiva krauñcabhedinaḥ || 3 ||
brahmovāca |
śṛṇvantu munayaḥ sarve guhyādguhyataraṃ mahat |
subrahmaṇyasya hṛdayaṃ sarvabhūtahitodayam || 4 ||
sarvārthasiddhidaṃ puṇyaṃ sarvakāryaika sādhanam |
dharmārthakāmadaṃ guhyaṃ dhanadhānyapravardhanam || 5 ||
rahasyametaddevānāṃ adeyaṃ yasya kasyacit |
sarvamitrakaraṃ gopyaṃ tejobalasamanvitam || 6 ||
pravakṣyāmi hitārthaṃ vaḥ parituṣṭena cetasā |
hṛtpadmakarṇikāmadhye dhyāyetsarvamanoharam || 7 ||
atha hṛdayam |
suvarṇamaṇḍapaṃ divyaṃ ratnatoraṇarājitam |
ratnastambhasahasraiśca śobhitaṃ paramādbhutam || 8 ||
paramānandanilayaṃ bhāsvatsūryasamaprabham |
devadānavagandharvagaruḍairyakṣakinnaraiḥ | || 9 ||
sevārthamāgataiḥ siddhaiḥ sādhyairadhyuṣitaṃ sadā |
mahāyogīndrasaṃsevyaṃ mandāratarumaṇḍitam || 10 ||
maṇividrumavedībhirmahatībhirudañcitam |
tanmadhye'nantaratna śrīcchaṭāmaṇḍalaśobhitam || 11 ||
ratnasiṃhāsanaṃ divyaṃ ravikoṭisamaprabham |
sarvāścaryamayaṃ puṇyaṃ sarvataḥ supariṣkṛtam || 12 ||
tanmadhye'ṣṭadalaṃ padmaṃ udyadarkaprabhodayam |
nigamāgamarolambalambitaṃ cinmayodayam || 13 ||
divyaṃ tejomayaṃ divyaṃ devatābhirnamaskṛtam |
dedīpyamānaṃ rucibhirviśālaṃ sumanoharam || 14 ||
tanmadhye sarvalokeśaṃ dhyāyetsarvāṅgasundaram |
anantādityasaṅkāśaṃ āśritābhīṣṭadāyakam || 15 ||
acintyajñānavijñānatejobalasamanvitam |
sarvāyudhadharaṃ divyaṃ sarvāścaryamayaṃ guham || 16 ||
mahārha ratnakhacita ṣaṭkirīṭavirājitam |
śaśāṅkārdhakalāramya samudyanmaulibhūṣaṇam || 17 ||
madanojjvalakodaṇḍamaṅgalabhrūvirājitam |
vistīrṇāruṇapadmaśrī vilasaddvādaśekṣaṇam || 18 ||
cāruśrīvarṇasampūrṇamukhaśobhāvibhāsuram |
maṇiprabhāsamagraśrīsphuranmakarakuṇḍalam || 19 ||
lasaddarpaṇadarpāḍhya gaṇḍasthalavirājitam |
divyakāñcanapuṣpaśrīnāsāpuṭavirājitam || 20 ||
mandahāsaprabhājālamadhurādhara śobhitam |
sarvalakṣaṇalakṣmībhṛtkambukandhara sundaram || 21 ||
mahānarghamahāratnadivyahāravirājitam |
samagranāgakeyūrasannaddhabhujamaṇḍalam || 22 ||
ratnakaṅkaṇasambhāsvatkarāgra śrīmahojjvalam |
mahāmaṇikavāṭābhavakṣaḥsthalavirājitam || 23 ||
atigāmbhīryasambhāvyanābhīnavasaroruham |
ratnaśrīkalitābaddhalasanmadhyapradeśakam || 24 ||
sphuratkanakasaṃvītapītāmbarasamāvṛtam |
śṛṅgārarasasampūrṇa ratnastambhopamorukam || 25 ||
svarṇakāhalarociṣṇu jaṅghāyugalamaṇḍalam |
ratnamañjīrasannaddha ramaṇīya padāmbujam || 26 ||
bhaktābhīṣṭapradaṃ devaṃ brahmaviṣṇvādisaṃstutam |
kaṭākṣaiḥ karuṇādakṣaistoṣayantaṃ jagatpatim || 27 ||
cidānandajñānamūrtiṃ sarvalokapriyaṅkaram |
śaṅkarasyātmajaṃ devaṃ dhyāyeccharavaṇodbhavam || 28 ||
anantādityacandrāgni tejaḥ sampūrṇavigraham |
sarvalokaikavaradaṃ sarvavidyārthatattvakam || 29 ||
sarveśvaraṃ sarvavibhuṃ sarvabhūtahite ratam |
evaṃ dhyātvā tu hṛdayaṃ ṣaṇmukhasya mahātmanaḥ || 30 ||
sarvānkāmānavāpnoti samyak jñānaṃ ca vindati |
śucau deśe samāsīnaḥ śuddhātmā caritāhnikaḥ || 31 ||
prāṅmukho yatacittaśca japeddhṛdayamuttamam |
sakṛdeva manuṃ japtvā samprāpnotyakhilaṃ śubham || 32 ||
idaṃ sarvāghaharaṇaṃ mṛtyudāridryanāśanam |
sarvasampatkaraṃ puṇyaṃ sarvaroganivāraṇam || 33 ||
sarvakāmakaraṃ divyaṃ sarvābhīṣṭapradāyakam |
prajākaraṃ rājyakaraṃ bhāgyadaṃ bahupuṇyadam || 34 ||
guhyādguhyataraṃ bhūyo devānāmapi durlabham |
idaṃ tu nātapaskāya nābhaktāya kadācana || 35 ||
na cāśuśrūṣave deyaṃ na madāndhāya karhicit |
sacchiṣyāya kulīnāya skandabhaktiratāya ca || 36 ||
satāmabhimatāyedaṃ dātavyaṃ dharmavardhanam |
ya idaṃ paramaṃ puṇyaṃ nityaṃ japati mānavaḥ |
tasya śrī bhagavān skandaḥ prasanno bhavati dhruvam || 37 ||
iti śrīskāndapurāṇe subrahmaṇyahṛdayastotram ||
InfoLyter.in — Sacred Vedic Knowledge Portal · Free forever