Shri Raghavendra Stotram

ॐ

ஶ்ரீ ராகவேந்த்ர ஸ்தோத்ரம்

Stotram Tamil

ஶ்ரீபூர்ணபோதகுருதீர்தபயோப்திபாரா

காமாரிமாக்ஷவிஷமாக்ஷஶிரஃ ஸ்ப்ரு'ஶந்தீ ।

பூர்வோத்தராமிததரங்கசரத்ஸுஹம்ஸா

தேவாலிஸேவிதபராங்க்ரிபயோஜலக்நா ॥ 1 ॥

ஜீவேஶபேதகுணபூர்திஜகத்ஸுஸத்த்வ-

-நீசோச்சபாவமுகநக்ரகணைஃ ஸமேதா ।

துர்வாத்யஜாபதிகிலைர்குருராகவேந்த்ர-

-வாக்தேவதாஸரிதமும் விமலீ கரோது ॥ 2 ॥

ஶ்ரீராகவேந்த்ரஃ ஸகலப்ரதாதா

ஸ்வபாதகஞ்ஜத்வயபக்திமத்ப்யஃ ।

அகாத்ரிஸம்பேதநத்ரு'ஷ்டிவஜ்ரஃ

க்ஷமாஸுரேந்த்ரோऽவது மாம் ஸதாऽயம் ॥ 3 ॥

ஶ்ரீராகவேந்த்ரோ ஹரிபாதகஞ்ஜ-

-நிஷேவணால்லப்தஸமஸ்தஸம்பத் ।

தேவஸ்வபாவோ திவிஜத்ருமோऽய-

-மிஷ்டப்ரதோ மே ஸததம் ஸ பூயாத் ॥ 4 ॥

பவ்யஸ்வரூபோ பவதுஃகதூல-

-ஸங்காக்நிசர்யஃ ஸுகதைர்யஶாலீ ।

ஸமஸ்ததுஷ்டக்ரஹநிக்ரஹேஶோ

துரத்யயோபப்லவஸிந்துஸேதுஃ ॥ 5 ॥

நிரஸ்ததோஷோ நிரவத்யவேஷஃ

ப்ரத்யர்திமூகத்த்வநிதாநபாஷஃ ।

வித்வத்பரிஜ்ஞேயமஹாவிஶேஷோ

வாக்வைகரீநிர்ஜிதபவ்யஶேஷஃ ॥ 6 ॥

ஸந்தாநஸம்பத்பரிஶுத்தபக்தி-

-விஜ்ஞாநவாக்தேஹஸுபாடவாதீந் ।

தத்வா ஶரீரோத்தஸமஸ்ததோஷாந்

ஹத்த்வா ஸ நோऽவ்யாத்குருராகவேந்த்ரஃ ॥ 7 ॥

யத்பாதோதகஸஞ்சயஃ ஸுரநதீமுக்யாபகாஸாதிதா-

-ஸங்க்யாநுத்தமபுண்யஸங்கவிலஸத்ப்ரக்யாதபுண்யாவஹஃ ।

துஸ்தாபத்ரயநாஶநோ புவி மஹாவந்த்யாஸுபுத்ரப்ரதோ

வ்யங்கஸ்வங்கஸம்ரு'த்திதோ க்ரஹமஹாபாபாபஹஸ்தம் ஶ்ரயே ॥ 8 ॥

யத்பாதகஞ்ஜரஜஸா பரிபூஷிதாங்கா

யத்பாதபத்மமதுபாயிதமாநஸா யே ।

யத்பாதபத்மபரிகீர்தநஜீர்ணவாச

-ஸ்தத்தர்ஶநம் துரிதகாநநதாவபூதம் ॥ 9 ॥

ஸர்வதந்த்ரஸ்வதந்த்ரோऽஸௌ ஶ்ரீமத்வமதவர்தநஃ

விஜயீந்த்ரகராப்ஜோத்தஸுதீந்த்ரவரபுத்ரகஃ ॥ 10 ॥

ஶ்ரீராகவேந்த்ரோ யதிராட் குருர்மே ஸ்யாத்பயாபஹஃ

ஜ்ஞாநபக்திஸுபுத்ராயுர்யஶஃ ஶ்ரீபுண்யவர்தநஃ ॥ 11 ॥

ப்ரதிவாதிஜயஸ்வாந்தபேதசிஹ்நாதரோ குருஃ ।

ஸர்வவித்யாப்ரவீணோऽந்யோ ராகவேந்த்ராந்ந வித்யதே ॥ 12 ॥

அபரோக்ஷீக்ரு'தஶ்ரீஶஃ ஸமுபேக்ஷிதபாவஜஃ ।

அபேக்ஷிதப்ரதாதாऽந்யோ ராகவேந்த்ராந்ந வித்யதே ॥ 13 ॥

தயாதாக்ஷிண்யவைராக்யவாக்பாடவமுகாங்கிதஃ ।

ஶாபாநுக்ரஹஶக்தோऽந்யோ ராகவேந்த்ராந்ந வித்யதே ॥ 14 ॥

அஜ்ஞாநவிஸ்ம்ரு'திப்ராந்திஸம்ஶயாऽபஸ்ம்ரு'திக்ஷயாஃ ।

தந்த்ராகம்பவசஃகௌண்ட்யமுகா யே சேந்த்ரியோத்பவாஃ ।

தோஷாஸ்தே நாஶமாயாந்தி ராகவேந்த்ரப்ரஸாததஃ ॥ 15 ॥

ௐ ஶ்ரீராகவேந்த்ராய நமஃ இத்யऽஷ்டாக்ஷரமந்த்ரதஃ ।

ஜபிதாத்பாவிதாந்நித்யம் இஷ்டார்தாஃ ஸ்யுர்ந ஸம்ஶயஃ ॥ 16 ॥

ஹந்து நஃ காயஜாந் தோஷாந் ஆத்மாத்மீயஸமுத்பவாந் ।

ஸர்வாநபி புமர்தாம்ஶ்ச ததாது குருராத்மவித் ॥ 17 ॥

இதி காலத்ரயே நித்யம் ப்ரார்தநாம் யஃ கரோதி ஸஃ ।

இஹாமுத்ராப்தஸர்வேஷ்டோ மோததே நாத்ர ஸம்ஶயஃ ॥ 18 ॥

அகம்யமஹிமா லோகே ராகவேந்த்ரோ மஹாயஶாஃ ।

ஶ்ரீமத்வமததுக்தாப்திசந்த்ரோऽவது ஸதாऽநகஃ ॥ 19 ॥

ஸர்வயாத்ராபலாவாப்த்யை யதாஶக்திப்ரதக்ஷிணம் ।

கரோமி தவ ஸித்தஸ்ய ப்ரு'ந்தாவநகதம் ஜலம் ॥ 20 ॥

ஶிரஸா தாரயாம்யத்ய ஸர்வதீர்தபலாப்தயே ।

ஸர்வாபீஷ்டார்தஸித்த்யர்தம் நமஸ்காரம் கரோம்யஹம் ।

தவ ஸங்கீர்தநம் வேதஶாஸ்த்ரார்தஜ்ஞாநஸித்தயே ॥ 21 ॥

ஸம்ஸாரேऽக்ஷயஸாகரே ப்ரக்ரு'திதோऽகாதே ஸதா துஸ்தரே

ஸர்வாவத்யஜலக்ரஹைரநுபமைஃ காமாதிபங்காகுலே ।

நாநாவிப்ரமதுர்ப்ரமேऽமிதபயஸ்தோமாதிபேநோத்கடே

துஃகோத்க்ரு'ஷ்டவிஷே ஸமுத்தர குரோ மா மக்நரூபம் ஸதா ॥ 22 ॥

ராகவேந்த்ரகுருஸ்தோத்ரம் யஃ படேத்பக்திபூர்வகம் ।

தஸ்ய குஷ்டாதிரோகாணாம் நிவ்ரு'த்திஸ்த்வரயா பவேத் ॥ 23 ॥

அந்தோऽபி திவ்யத்ரு'ஷ்டிஃ ஸ்யாதேடமூகோऽபி வாக்பதிஃ ।

பூர்ணாயுஃ பூர்ணஸம்பத்திஃ ஸ்தோத்ரஸ்யாऽஸ்ய ஜபாத்பவேத் ॥ 24 ॥

யஃ பிபேஜ்ஜலமேதேந ஸ்தோத்ரேணைவாபிமந்த்ரிதம் ।

தஸ்ய குக்ஷிகதா தோஷாஃ ஸர்வே நஶ்யந்தி தத் க்ஷணாத் ॥ 25 ॥

யத்வ்ரு'ந்தாவநமாஸாத்ய பங்குஃ கஞ்ஜோऽபி வா ஜநஃ ।

ஸ்தோத்ரேணாநேந யஃ குர்யாத் ப்ரதக்ஷிணநமஸ்க்ரு'தீ ॥ 26 ॥

ஸ ஜங்காலோ பவேதேவ குருராஜப்ரஸாததஃ ।

ஸோமஸூர்யோபராகே ச புஷ்யார்காதிஸமாகமே ॥ 27 ॥

யோऽநுத்தமமிதம் ஸ்தோத்ரமஷ்டோத்தரஶதம் ஜபேத் ।

பூதப்ரேதபிஶாசாதி பீடா தஸ்ய ந ஜாயதே ॥ 28 ॥

ஏதத் ஸ்தோத்ரம் ஸமுச்சார்ய குரோர்வ்ரு'ந்தாவநாந்திகே ।

தீபஸம்யோஜநாஜ்ஜ்ஞாநம் புத்ரலாபோ பவேத்த்ருவம் ॥ 29 ॥

பரவாதிஜயோ திவ்யஜ்ஞாநபக்த்யாதிவர்தநம் ।

ஸர்வாபீஷ்டப்ரவ்ரு'த்திஃ ஸ்யாந்நாத்ர கார்யா விசாரணா ॥ 30 ॥

ராஜசோரமஹாவ்யாக்ரஸர்பநக்ராதிபீடநம் ।

ந ஜாயதேऽஸ்ய ஸ்தோத்ரஸ்ய ப்ரபாவாந்நாத்ர ஸம்ஶயஃ ॥ 31 ॥

யோ பக்த்யா குருராகவேந்த்ரசரணத்வந்த்வம் ஸ்மரந் யஃ படேத்

ஸ்தோத்ரம் திவ்யமிதம் ஸதா ந ஹி பவேத்தஸ்யாஸுகம் கிஞ்சந ।

கிம் த்விஷ்டார்தஸம்ரு'த்திரேவ கமலாநாதப்ரஸாதோதயாத்

கீர்திர்திக்விதிதா விபூதிரதுலா ஸாக்ஷீ ஹயாஸ்யோऽத்ர ஹி ॥ 32 ॥

பலஶ்ரு'திஃ

இதி ஶ்ரீ ராகவேந்த்ரார்ய குருராஜப்ரஸாததஃ ।

க்ரு'தம் ஸ்தோத்ரமிதம் புண்யம் ஶ்ரீமத்பிர்ஹ்யப்பணாபிதைஃ ॥

பூஜ்யாய ராகவேந்த்ராய ஸத்யதர்மரதாய ச ।

பஜதாம் கல்பவ்ரு'க்ஷாய நமதாம் காமதேநவே ॥

ஆபாதமௌலிபர்யந்தம் குரூணாமாக்ரு'திம் ஸ்மரேத் ।

தேந விக்நஃ ப்ரணஶ்யந்தி ஸித்த்யந்தி ச மநோரதாஃ ॥

துர்வாதித்வாந்தரவயே வைஷ்ணவேந்தீவரேந்தவே ।

ஶ்ரீராகவேந்த்ர குரவே நமோऽத்யந்ததயாலவே ॥

மூகோऽபி யத்ப்ரஸாதேந முகுந்தஶயநாய தே ।

ராஜராஜாயதே ரிக்தோ ராகவேந்த்ரம் தமாஶ்ரயே ।

இதி ஶ்ரீ அப்பண்ணாசார்யவிரசிதம் ஶ்ரீராகவேந்த்ர ஸ்தோத்ரம் ஸம்பூர்ணம் ॥

Roman (IAST) Transliteration

śrīpūrṇabodhagurutīrthapayobdhipārā

kāmārimākṣaviṣamākṣaśiraḥ spṛśantī |

pūrvottarāmitataraṅgacaratsuhaṃsā

devālisevitaparāṅghripayojalagnā || 1 ||

jīveśabhedaguṇapūrtijagatsusattva-

-nīcoccabhāvamukhanakragaṇaiḥ sametā |

durvādyajāpatigilairgururāghavendra-

-vāgdevatāsaridamuṃ vimalī karotu || 2 ||

śrīrāghavendraḥ sakalapradātā

svapādakañjadvayabhaktimadbhyaḥ |

aghādrisambhedanadṛṣṭivajraḥ

kṣamāsurendro'vatu māṃ sadā'yam || 3 ||

śrīrāghavendro haripādakañja-

-niṣevaṇāllabdhasamastasampat |

devasvabhāvo divijadrumo'ya-

-miṣṭaprado me satataṃ sa bhūyāt || 4 ||

bhavyasvarūpo bhavaduḥkhatūla-

-saṅghāgnicaryaḥ sukhadhairyaśālī |

samastaduṣṭagrahanigraheśo

duratyayopaplavasindhusetuḥ || 5 ||

nirastadoṣo niravadyaveṣaḥ

pratyarthimūkattvanidānabhāṣaḥ |

vidvatparijñeyamahāviśeṣo

vāgvaikharīnirjitabhavyaśeṣaḥ || 6 ||

santānasampatpariśuddhabhakti-

-vijñānavāgdehasupāṭavādīn |

datvā śarīrotthasamastadoṣān

hattvā sa no'vyādgururāghavendraḥ || 7 ||

yatpādodakasañcayaḥ suranadīmukhyāpagāsāditā-

-saṅkhyānuttamapuṇyasaṅghavilasatprakhyātapuṇyāvahaḥ |

dustāpatrayanāśano bhuvi mahāvandhyāsuputraprado

vyaṅgasvaṅgasamṛddhido grahamahāpāpāpahastaṃ śraye || 8 ||

yatpādakañjarajasā paribhūṣitāṅgā

yatpādapadmamadhupāyitamānasā ye |

yatpādapadmaparikīrtanajīrṇavāca

-staddarśanaṃ duritakānanadāvabhūtam || 9 ||

sarvatantrasvatantro'sau śrīmadhvamatavardhanaḥ

vijayīndrakarābjotthasudhīndravaraputrakaḥ || 10 ||

śrīrāghavendro yatirāṭ gururme syādbhayāpahaḥ

jñānabhaktisuputrāyuryaśaḥ śrīpuṇyavardhanaḥ || 11 ||

prativādijayasvāntabhedacihnādaro guruḥ |

sarvavidyāpravīṇo'nyo rāghavendrānna vidyate || 12 ||

aparokṣīkṛtaśrīśaḥ samupekṣitabhāvajaḥ |

apekṣitapradātā'nyo rāghavendrānna vidyate || 13 ||

dayādākṣiṇyavairāgyavākpāṭavamukhāṅkitaḥ |

śāpānugrahaśakto'nyo rāghavendrānna vidyate || 14 ||

ajñānavismṛtibhrāntisaṃśayā'pasmṛtikṣayāḥ |

tandrākampavacaḥkauṇṭhyamukhā ye cendriyodbhavāḥ |

doṣāste nāśamāyānti rāghavendraprasādataḥ || 15 ||

oṃ śrīrāghavendrāya namaḥ itya'ṣṭākṣaramantrataḥ |

japitādbhāvitānnityaṃ iṣṭārthāḥ syurna saṃśayaḥ || 16 ||

hantu naḥ kāyajān doṣān ātmātmīyasamudbhavān |

sarvānapi pumarthāṃśca dadātu gururātmavit || 17 ||

iti kālatraye nityaṃ prārthanāṃ yaḥ karoti saḥ |

ihāmutrāptasarveṣṭo modate nātra saṃśayaḥ || 18 ||

agamyamahimā loke rāghavendro mahāyaśāḥ |

śrīmadhvamatadugdhābdhicandro'vatu sadā'naghaḥ || 19 ||

sarvayātrāphalāvāptyai yathāśaktipradakṣiṇam |

karomi tava siddhasya bṛndāvanagataṃ jalam || 20 ||

śirasā dhārayāmyadya sarvatīrthaphalāptaye |

sarvābhīṣṭārthasiddhyarthaṃ namaskāraṃ karomyaham |

tava saṅkīrtanaṃ vedaśāstrārthajñānasiddhaye || 21 ||

saṃsāre'kṣayasāgare prakṛtito'gādhe sadā dustare

sarvāvadyajalagrahairanupamaiḥ kāmādibhaṅgākule |

nānāvibhramadurbhrame'mitabhayastomādiphenotkaṭe

duḥkhotkṛṣṭaviṣe samuddhara guro mā magnarūpaṃ sadā || 22 ||

rāghavendragurustotraṃ yaḥ paṭhedbhaktipūrvakam |

tasya kuṣṭhādirogāṇāṃ nivṛttistvarayā bhavet || 23 ||

andho'pi divyadṛṣṭiḥ syādeḍamūko'pi vākpatiḥ |

pūrṇāyuḥ pūrṇasampattiḥ stotrasyā'sya japādbhavet || 24 ||

yaḥ pibejjalametena stotreṇaivābhimantritam |

tasya kukṣigatā doṣāḥ sarve naśyanti tat kṣaṇāt || 25 ||

yadvṛndāvanamāsādya paṅguḥ khañjo'pi vā janaḥ |

stotreṇānena yaḥ kuryāt pradakṣiṇanamaskṛtī || 26 ||

sa jaṅghālo bhavedeva gururājaprasādataḥ |

somasūryoparāge ca puṣyārkādisamāgame || 27 ||

yo'nuttamamidaṃ stotramaṣṭottaraśataṃ japet |

bhūtapretapiśācādi pīḍā tasya na jāyate || 28 ||

etat stotraṃ samuccārya gurorvṛndāvanāntike |

dīpasaṃyojanājjñānaṃ putralābho bhaveddhruvam || 29 ||

paravādijayo divyajñānabhaktyādivardhanam |

sarvābhīṣṭapravṛddhiḥ syānnātra kāryā vicāraṇā || 30 ||

rājacoramahāvyāghrasarpanakrādipīḍanam |

na jāyate'sya stotrasya prabhāvānnātra saṃśayaḥ || 31 ||

yo bhaktyā gururāghavendracaraṇadvandvaṃ smaran yaḥ paṭhet

stotraṃ divyamidaṃ sadā na hi bhavettasyāsukhaṃ kiñcana |

kiṃ tviṣṭārthasamṛddhireva kamalānāthaprasādodayāt

kīrtirdigviditā vibhūtiratulā sākṣī hayāsyo'tra hi || 32 ||

phalaśṛtiḥ

iti śrī rāghavendrārya gururājaprasādataḥ |

kṛtaṃ stotramidaṃ puṇyaṃ śrīmadbhirhyappaṇābhidaiḥ ||

pūjyāya rāghavendrāya satyadharmaratāya ca |

bhajatāṃ kalpavṛkṣāya namatāṃ kāmadhenave ||

āpādamauliparyantaṃ gurūṇāmākṛtiṃ smaret |

tena vighnaḥ praṇaśyanti siddhyanti ca manorathāḥ ||

durvādidhvāntaravaye vaiṣṇavendīvarendave |

śrīrāghavendra gurave namo'tyantadayālave ||

mūko'pi yatprasādena mukundaśayanāya te |

rājarājāyate rikto rāghavendraṃ tamāśraye |

iti śrī appaṇṇācāryaviracitaṃ śrīrāghavendra stotraṃ sampūrṇam ||