Shri Lalita Stavaratnam (arya Dvishati)

ॐ

ஶ்ரீ லலிதா ஸ்தவரத்நம் (ஆர்யா த்விஶதீ)

Devi Tamil

வந்தே கஜேந்த்ரவதநம்

வாமாங்காரூடவல்லபாஶ்லிஷ்டம் ।

குங்குமபராகஶோணம்

குவலயிநீஜாரகோரகாபீடம் ॥ 1 ॥

ஸ ஜயதி ஸுவர்ணஶைலஃ

ஸகலஜகச்சக்ரஸங்கடிதமூர்திஃ ।

காஞ்சநநிகுஞ்ஜவாடீ-

-கந்தலதமரீப்ரபஞ்சஸங்கீதஃ ॥ 2 ॥

ஹரிஹயநைர்ரு'தமாருத-

-ஹரிதாமந்தேஷ்வவஸ்திதம் தஸ்ய ।

விநுமஃ ஸாநுத்ரிதயம்

விதிஹரிகௌரீஶவிஷ்டபாதாரம் ॥ 3 ॥

மத்யே புநர்மநோஹர-

-ரத்நருசிஸ்தபகரஞ்ஜிததிகந்தம் ।

உபரி சதுஃஶதயோஜந-

-முத்துங்கம் ஶ்ரு'ங்கபுங்கவமுபாஸே ॥ 4 ॥

தத்ர சதுஃஶதயோஜந-

-பரிணாஹம் தேவஶில்பிநா ரசிதம் ।

நாநாஸாலமநோஜ்ஞம்

நமாம்யஹம் நகரமாதிவித்யாயாஃ ॥ 5 ॥

ப்ரதமம் ஸஹஸ்ரபூர்வக-

-ஷட்ஶதஸங்க்யாகயோஜநம் பரிதஃ ।

வலயீக்ரு'தஸ்வகாத்ரம்

வரணம் ஶரணம் வ்ரஜாம்யயோரூபம் ॥ 6 ॥

தஸ்யோத்தரே ஸமீரண-

-யோஜநதூரே தரங்கிதச்சாயஃ ।

கடயது முதம் த்விதீயோ

கண்டாஸ்தநஸாரநிர்மிதஃ ஸாலஃ ॥ 7 ॥

உபயோரந்தரஸீம-

-ந்யுத்தாமப்ரமரரஞ்ஜிதோதாரம் ।

உபவநமுபாஸ்மஹே வய-

-மூரீக்ரு'தமந்தமாருதஸ்யந்தம் ॥ 8 ॥

ஆலிங்க்ய பத்ரகாலீ-

-மாஸீநஸ்தத்ர ஹரிஶிலாஶ்யாமாம் ।

மநஸி மஹாகாலோ மே

விஹரது மதுபாநவிப்ரமந்நேத்ரஃ ॥ 9 ॥

தார்தீயீகோ வரண-

-ஸ்தஸ்யோத்தரஸீம்நி வாதயோஜநதஃ ।

தாம்ரேண ரசிதமூர்தி-

-ஸ்தநுதாமாசந்த்ரதாரகம் பத்ரம் ॥ 10 ॥

மத்யே தயோஶ்ச மணிமய-

-பல்லவஶாகாப்ரஸூநபக்ஷ்மலிதாம் ।

கல்பாநோகஹவாடீம்

கலயே மகரந்தபங்கிலாவாலாம் ॥ 11 ॥

தத்ர மதுமாதவஶ்ரீ-

-தருணீப்யாம் தரலத்ரு'க்சகோராப்யாம் ।

ஆலிங்கிதோऽவதாந்மா-

-மநிஶம் ப்ரதமர்துராத்தபுஷ்பாஸ்த்ரஃ ॥ 12 ॥

நமத ததுத்தரபாகே

நாகிபதோல்லங்கிஶ்ரு'ங்கஸங்காதம் ।

ஸீஸாக்ரு'திம் துரீயம்

ஸிதகிரணாலோகநிர்மலம் ஸாலம் ॥ 13 ॥

ஸாலத்வயாந்தராலே

ஸரலாலிகபோதசாடுஸுபகாயாம் ।

ஸந்தாநவாடிகாயாம்

ஸக்தம் சேதோऽஸ்து ஸததமஸ்மாகம் ॥ 14 ॥

தத்ர தபநாதிரூக்ஷஃ

ஸாம்ராஜ்ஞீசரணஸாந்த்ரிதஸ்வாந்தஃ ।

ஶுக்ரஶுசிஶ்ரீஸஹிதோ

க்ரீஷ்மர்துர்திஶது கீர்திமாகல்பம் ॥ 15 ॥

உத்தரஸீமநி தஸ்யோ-

-ந்நதஶிகரோத்கம்பிஹாடகபதாகஃ ।

ப்ரகடயது பஞ்சமோ நஃ

ப்ராகாரஃ குஶலமாரகூடமயஃ ॥ 16 ॥

ப்ராகாரயோஶ்ச மத்யே

பல்லவிதாந்யப்ரு'தபஞ்சமோந்மேஷா ।

ஹரிசந்தநத்ருவாடீ-

-ஹரதாதாமூலமஸ்மதநுதாபம் ॥ 17 ॥

தத்ர நபஃ ஶ்ரீமுக்யை-

-ஸ்தருணீவர்கைஃ ஸமந்விதஃ பரிதஃ ।

வஜ்ராட்டஹாஸமுகரோ

வாஞ்சாபூர்திம் தநோது வர்ஷர்துஃ ॥ 18 ॥

மாருதயோஜநதூரே

மஹநீயஸ்தஸ்ய சோத்தரே பாகே ।

பத்ரம் க்ரு'ஷீஷ்ட ஷஷ்டஃ

ப்ராகாரஃ பஞ்சலோஹதாதுமயஃ ॥ 19 ॥

அநயோர்மத்யே ஸந்தத-

-மங்கூரத்திவ்யகுஸுமகந்தாயாம் ।

மந்தாரவாடிகாயாம்

மாநஸமங்கீகரோது மே விஹ்ரு'திம் ॥ 20 ॥

தஸ்யாமிஷோர்ஜலக்ஷ்மீ-

-தருணீப்யாம் ஶரத்ரு'துஃ ஸதா ஸஹிதஃ ।

அப்யர்சயந் ஸ ஜீயா-

-தம்பாமாமோதமேதுரைஃ குஸுமைஃ ॥ 21 ॥

தஸ்யர்ஷிஸங்க்யயோஜந-

-தூரே தேதீப்யமாநஶ்ரு'ங்கௌகஃ ।

கலதௌதகலிதமூர்திஃ

கல்யாணம் திஶது ஸப்தமஃ ஸாலஃ ॥ 22 ॥

மத்யே தயோர்மருத்பத

லங்கிதவிடபாக்ரவிருதகலகண்டா ।

ஶ்ரீபாரிஜாதவாடீ

ஶ்ரியமநிஶம் திஶது ஶீதலோத்தேஶா ॥ 23 ॥

தஸ்யாமதிப்ரியாப்யாம்

ஸஹ கேலந் ஸஹஸஹஸ்யலக்ஷ்மீப்யாம் ।

ஸாமந்தோ சஷகேதோ-

-ர்ஹேமந்தோ பவது ஹேமவ்ரு'த்த்யை நஃ ॥ 24 ॥

உத்தரதஸ்தஸ்ய மஹா-

-நுத்படஹுதபுக்ஶிகாருணமயூகஃ ।

தபநீயகண்டரசித-

-ஸ்தநுதாதாயுஷ்யமஷ்டமோ வரணஃ ॥ 25 ॥

காதம்பவிபிநவாடீ-

-மநயோர்மத்யபுவி கல்பிதாவாஸாம் ।

கலயாமி ஸூநகோரக-

-கந்தலிதாமோததுந்திலஸமீராம் ॥ 26 ॥

தஸ்யாமதிஶிஶிராக்ரு'தி-

-ராஸீநஸ்தபதபஸ்யலக்ஷ்மீப்யாம் ।

ஶிவமநிஶம் குருதாந்மே

ஶிஶிரர்துஃ ஸததஶீதலதிகந்தஃ ॥ 27 ॥

தஸ்யாம் கதம்பவாட்யாம்

தத்ப்ரஸவாமோதமிலிதமதுகந்தம் ।

ஸப்தாவரணமநோஜ்ஞம்

ஶரணம் ஸமுபைமி மந்த்ரிணீஶரணம் ॥ 28 ॥

தத்ராலயே விஶாலே

தபநீயாரசிததரலஸோபாநே ।

மாணிக்யமண்டபாந்த-

-ர்மஹிதே ஸிம்ஹாஸநே ஸுமணிகசிதே ॥ 29 ॥

பிந்துத்ரிபஞ்சகோண-

-த்விபந்ரு'பவஸுவேததலகுரேகாட்யே ।

சக்ரே ஸதா நிவிஷ்டாம்

ஷஷ்ட்யஷ்டத்ரிம்ஶதக்ஷரேஶாநீம் ॥ 30 ॥

தாபிஞ்சமேசகாபாம்

தாலீதலகடிதகர்ணதாடங்காம் ।

தாம்பூலபூரிதமுகீம்

தாம்ராதரபிம்பத்ரு'ஷ்டதரஹாஸாம் ॥ 31 ॥

குங்குமபங்கிலதேஹாம்

குவலயஜீவாதுஶாவகவதம்ஸாம் ।

கோகநதஶோணசரணாம்

கோகிலநிக்வாணகோமலாலாபாம் ॥ 32 ॥

வாமாங்ககலிதசூலீம்

வநமால்யகதம்பமாலிகாபரணாம் ।

முக்தாலலந்திகாஞ்சித

முக்தாலிகமிலிதசித்ரகோதாராம் ॥ 33 ॥

கரவித்ரு'தகீரஶாவக-

-கலநிநதவ்யக்தநிகிலநிகமார்தாம் ।

வாமகுசஸங்கிவீணாவாதந-

-ஸௌக்யார்தமீலிதாக்ஷியுகாம் ॥ 34 ॥

ஆபாடலாம்ஶுகதரா-

-மாதிரஸோந்மேஷவாஸிதகடாக்ஷாம் ।

ஆம்நாயஸாரகுலிகா-

-மாத்யாம் ஸங்கீதமாத்ரு'காம் வந்தே ॥ 35 ॥

தஸ்ய ச ஸுவர்ணஸால-

-ஸ்யோத்தரதஸ்தருணகுங்குமச்சாயஃ ।

ஶமயது மம ஸந்தாபம்

ஸாலோ நவமஃ ஸ புஷ்பராகமயஃ ॥ 36 ॥

அநயோரந்தரவஸுதாஃ

ப்ரணுமஃ ப்ரத்யக்ரபுஷ்பராகமயீஃ ।

ஸிம்ஹாஸநேஶ்வரீமநு-

-சிந்தநநிஸ்தந்த்ரஸித்தநீரந்த்ராஃ ॥ 37 ॥

தத்ஸாலோத்தரதேஶே

தருணஜபாகிரணதோரணீஶோணஃ ।

ப்ரஶமயது பத்மராக-

-ப்ராகாரோ மம பராபவம் தஶமஃ ॥ 38 ॥

அந்தரபூக்ரு'தவாஸா-

-நநயோரபநீதசித்தவைமத்யாந் ।

சக்ரேஶீபதபக்தாம்-

-ஶ்சாரணவர்காநஹர்நிஶம் கலயே ॥ 39 ॥

ஸாரங்கவாஹயோஜநதூரே-

-ऽஸங்கடிதகேதநஸ்தஸ்ய ।

கோமேதகேந ரசிதோ

கோபாயது மாம் ஸமுந்நதஃ ஸாலஃ ॥ 40 ॥

வப்ரத்வயாந்தரோர்வ்யாம்

வடுகைர்விவிதைஶ்ச யோகிநீப்ரு'ந்தைஃ ।

ஸததம் ஸமர்சிதாயாஃ

ஸங்கர்ஷண்யாஃ ப்ரணௌமி சரணாப்ஜம் ॥ 41 ॥

தாபஸயோஜநதூரே

தஸ்ய ஸமுத்துங்க கோபுரோபேதஃ ।

வாஞ்சாபூர்த்யை பவதா-

-த்வஜ்ரமணீநிகரநிர்மிதோ வப்ரஃ ॥ 42 ॥

வரணத்விதயாந்தரதோ

வாஸஜுஷோ விஹிதமதுரஸாஸ்வாதாஃ ।

ரம்பாதிவிபுதவேஶ்யா

ரசயந்து மஹாந்தமஸ்மதாநந்தம் ॥ 43 ॥

தத்ர ஸதா ப்ரவஹந்தீ

தடிநீ வஜ்ராபிதா சிரம் ஜீயாத் ।

சடுலோர்மிஜாலந்ரு'த்ய-

-த்கலஹம்ஸீகுலகலக்வணிதபுஷ்டா ॥ 44 ॥

ரோதஸி தஸ்யா ருசிரே

வஜ்ரேஶீ ஜயதி வஜ்ரபூஷாட்யா ।

வஜ்ரப்ரதாநதோஷித-

-வஜ்ரிமுகத்ரிதஶவிநுதசாரித்ரா ॥ 45 ॥

தஸ்யோதீச்யாம் ஹரிதி

ஸ்தவகிதஸுஷமாவலீடவியதந்தஃ ।

வைடூர்யரத்நரசிதோ

வைமல்யம் திஶது சேதஸோ வரணஃ ॥ 46 ॥

அதிமத்யமேதயோஃ புந-

-ரம்பாசரணாவலம்பிதஸ்வாந்தாந் ।

கார்கோடகாதிநாகாந்

கலயாமஃ கிம் ச பலிமுகாந் தநுஜாந் ॥ 47 ॥

கந்தவஹஸங்க்யயோஜந-

-தூரே ககநோர்த்வஜாங்கிகஸ்தஸ்ய ।

வாஸவமணிப்ரணீதோ

வரணோ பஹலயது வைதுஷீம் விஶதாம் ॥ 48 ॥

மத்யக்ஷோண்யாமநயோ-

-ர்மஹேந்த்ரநீலாத்மகாநி ச ஸராம்ஸி ।

ஶாதோதரீஸஹாயா-

-ந்பூபாலாநபி புநஃ புநஃ ப்ரணுமஃ ॥ 49 ॥

ஆஶுகயோஜநதூரே

தஸ்யோர்த்வம் காந்திதவலிததிகந்தஃ ।

முக்தாவிரசிதகாத்ரோ

முஹுரஸ்மாகம் முதே பவது ஸாலஃ ॥ 50 ॥

ஆவ்ரு'த்த்யோரதிமத்யம்

பூர்வஸ்யாம் திஶி புரந்தரஃ ஶ்ரீமாந் ।

அப்ரமுவிடாதிரூடோ

விப்ரமமஸ்மாகமநிஶமாதநுதாத் ॥ 51 ॥

தத்கோணே வ்யஜநஸ்ரு-

-க்தோமரபாத்ரஸ்ருவாந்நஶக்திதரஃ ।

ஸ்வாஹாஸ்வதாஸமேதஃ

ஸுகயது மாம் ஹவ்யவாஹநஃ ஸுசிரம் ॥ 52 ॥

தக்ஷிணதிகந்தராலே

தண்டதரோ நீலநீரதச்சாயஃ ।

த்ரிபுராபதாப்ஜபக்தஸ்திரயது

மம நிகிலமம்ஹஸாம் நிகரம் ॥ 53 ॥

தஸ்யைவ பஶ்சிமாயாம்

திஶி தலிதேந்தீவரப்ரபாஶ்யாமஃ ।

கேடாஸியஷ்டிதாரீ

கேதாநபநயது யாதுதாநோ மே ॥ 54 ॥

தஸ்யா உத்தரதேஶே

தவலாங்கோ விபுலசஷவராரூடஃ ।

பாஶாயுதாத்தபாணிஃ

பாஶீ விதலயது பாஶஜாலாநி ॥ 55 ॥

வந்தே ததுத்தரஹரி-

-த்கோணே வாயும் சமூருவரவாஹம் ।

கோரகிததத்த்வபோதா-

-ந்கோரக்ஷப்ரமுகயோகிநோऽபி முஹுஃ ॥ 56 ॥

தருணீரிடாப்ரதாநா-

-ஸ்திஸ்ரோ வாதஸ்ய தஸ்ய க்ரு'தவாஸாஃ ।

ப்ரத்யக்ரகாபிஶாயந-

-பாநபரிப்ராந்தலோசநாஃ கலயே ॥ 57 ॥

தல்லோகபூர்வபாகே

தநதம் த்யாயாமி ஶேவதிகுலேஶம் ।

அபி மாணிபத்ரமுக்யா-

-நம்பாசரணாவலம்பிநோ யக்ஷாந் ॥ 58 ॥

தஸ்யைவ பூர்வஸீமநி

தபநீயாரசிதகோபுரே நகரே ।

காத்யாயநீஸஹாயம்

கலயே ஶீதாம்ஶுகண்டசூடாலம் ॥ 59 ॥

தத்புரஷோடஶவரண-

-ஸ்தலபாஜஸ்தருணசந்த்ரசூடாலாந் ।

ருத்ராத்யாயே படிதா-

-ந்ருத்ராணீஸஹசராந்பஜே ருத்ராந் ॥ 60 ॥

பவமாநஸங்க்யயோஜந-

-தூரே பாலத்ரு'ண்மேசகஸ்தஸ்ய ।

ஸாலோ மரகதரசிதஃ

ஸம்பதமசலாம் ஶ்ரியம் ச புஷ்ணாது ॥ 61 ॥

ஆவ்ரு'தியுக்மாந்தரதோ

ஹரிதமணீநிவஹமேசகே தேஶே ।

ஹாடகதாலீவிபிநம்

ஹாலாகடகடிதவிடபமாகலயே ॥ 62 ॥

தத்ரைவ மந்த்ரிணீக்ரு'ஹ-

-பரிணாஹம் தரலகேதநம் ஸதநம் ।

மரகதஸௌதமநோஜ்ஞம்

தத்யாதாயூம்ஷி தண்டநாதாயாஃ ॥ 63 ॥

ஸதநே தத்ர ஹரிந்மணி-

-ஸங்கடிதே மண்டபே ஶதஸ்தம்பே ।

கார்தஸ்வரமயபீடே

கநகமயாம்புருஹகர்ணிகாமத்யே ॥ 64 ॥

பிந்துத்ரிகோணவர்துல-

-ஷடஸ்ரவ்ரு'த்தத்வயாந்விதே சக்ரே ।

ஸஞ்சாரிணீ தஶோத்தர-

ஶதார்ணமநுராஜகமலகலஹம்ஸீ ॥ 65 ॥

கோலவதநா குஶேஶய-

-நயநா கோகாரிமண்டிதஶிகண்டா ।

ஸந்தப்தகாஞ்சநாபா

ஸந்த்யாருணசேலஸம்வ்ரு'தநிதம்பா ॥ 66 ॥

ஹலமுஸலஶங்கசக்ரா-

-ऽங்குஶபாஶாபயவரஸ்புரிதஹஸ்தா ।

கூலங்கஷாநுகம்பா

குங்குமஜம்பாலிதஸ்தநாபோகா ॥ 67 ॥

தூர்தாநாமதிதூரா-

-வார்தாஶேஷாவலக்நகமநீயா ।

ஆர்தாலீஶுபதாத்ரீ

வார்தாலீ பவது வாஞ்சிதார்தாய ॥ 68 ॥

தஸ்யாஃ பரிதோ தேவீஃ

ஸ்வப்நேஶ்யுந்மத்தபைரவீமுக்யாஃ ।

ப்ரணமத ஜம்பிந்யாத்யாஃ

பைரவவர்காம்ஶ்ச ஹேதுகப்ரமுகாந் ॥ 69 ॥

பூர்வோக்தஸங்க்யயோஜந-

-தூரே பூயாம்ஶுபாடலஸ்தஸ்ய ।

வித்ராவயது மதார்திம்

வித்ருமஸாலோ விஶங்கடத்வாரஃ ॥ 70 ॥

ஆவரணயோரஹர்நிஶ-

-மந்தரபூமௌப்ரகாஶஶாலிந்யாம் ।

ஆஸீநமம்புஜாஸந-

-மபிநவஸிந்தூரகௌரமஹமீடே ॥ 71 ॥

வரணஸ்ய தஸ்ய மாருத-

-யோஜநதோ விபுலகோபுரத்வாரஃ ।

ஸாலோ நாநாரத்நைஃ

ஸங்கடிதாங்கஃ க்ரு'ஷீஷ்ட மதபீஷ்டம் ॥ 72 ॥

அந்தரகக்ஷ்யாமநயோ-

-ரவிரலஶோபாபிசண்டிலோத்தேஶாம் ।

மாணிக்யமண்டபாக்யாம்

மஹதீமதிஹ்ரு'தயமநிஶமாகலயே ॥ 73 ॥

தத்ர ஸ்திதம் ப்ரஸந்நம்

தருணதமாலப்ரவாலகிரணாபம் ।

கர்ணாவலம்பிகுண்டல-

-கந்தலிதாபீஶுகவசிதகபோலம் ॥ 74 ॥

ஶோணாதரம் ஶுசிஸ்மித-

-மேணாங்கவதநமேதமாநக்ரு'பம் ।

முக்தைணமதவிஶேஷக-

-முத்ரிதநிடிலேந்துரேகிகாருசிரம் ॥ 75 ॥

நாலீகதலஸஹோதர-

-நயநாஞ்சலகடிதமநஸிஜாகூதம் ।

கமலாகடிநபயோதர-

-கஸ்தூரீகுஸ்ரு'ணபங்கிலோரஸ்கம் ॥ 76 ॥

சாம்பேயகந்திகைஶ்யம்

ஶம்பாஸப்ரஹ்மசாரிகௌஶேயம் ।

ஶ்ரீவத்ஸகௌஸ்துபதரம்

ஶ்ரிதஜநரக்ஷாதுரீணசரணாப்ஜம் ॥ 77 ॥

கம்புஸுதர்ஶநவிலஸ-

-த்கரபத்மம் கண்டலோலவநமாலம் ।

முசுகுந்தமோக்ஷபலதம்

முகுந்தமாநந்தகந்தமவலம்பே ॥ 78 ॥

தத்வரணோத்தரபாகே

தாராபதிபிம்பசும்பிநிஜஶ்ரு'ங்கஃ ।

விவிதமணீகணகடிதோ

விதரது ஸாலோ விநிர்மலாம் திஷணாம் ॥ 79 ॥

ப்ராகாரத்விதயாந்தர-

-கக்ஷ்யாம் ப்ரு'துரத்நநிகரஸங்கீர்ணாம் ।

நமத ஸஹஸ்ரஸ்தம்பக-

-மண்டபநாம்நாதிவிஶ்ருதாம் புவநே ॥ 80 ॥

ப்ரணுமஸ்தத்ர பவாநீ-

-ஸஹசரமீஶாநமிந்துகண்டதரம் ।

ஶ்ரு'ங்காரநாயிகாமநு-

-ஶீலநபாஜோऽபி ப்ரு'ங்கிநந்திமுகாந் ॥ 81 ॥

தஸ்யைணவாஹயோஜந-

-தூரே வந்தே மநோமயம் வப்ரம் ।

அங்கூரந்மணிகிரணா-

-மந்தரகக்ஷ்யாம் ச நிர்மலாமநயோஃ ॥ 82 ॥

தத்ரைவாம்ரு'தவாபீம்

தரலதரங்காவலீடதடயுக்மாம் ।

முக்தாமயகலஹம்ஸீ-

-முத்ரிதகநகாரவிந்தஸந்தோஹாம் ॥ 83 ॥

ஶக்ரோபலமயப்ரு'ங்கீ-

-ஸங்கீதோந்மேஷகோஷிததிகந்தாம் ।

காஞ்சநமயாங்கவிலஸ-

-த்காரண்டவஷண்டதாண்டவமநோஜ்ஞாம் ॥ 84 ॥

குருவிந்தாத்மகஹல்லக-

-கோரகஸுஷமாஸமூஹபாடலிதாம் ।

கலயே ஸுதாஸ்வரூபாம்

கந்தலிதாமந்தகைரவாமோதாம் ॥ 85 ॥

தத்வாபிகாந்தராலே தரலே

மணிபோதஸீம்நி விஹரந்தீம் ।

ஸிந்தூரபாடலாங்கீம்

ஸிதகிரணாங்கூரகல்பிதவதம்ஸாம் ॥ 86 ॥

பர்வேந்துபிம்பவதநாம்

பல்லவஶோணாதரஸ்புரிதஹாஸாம் ।

குடிலகபரீம் குரங்கீ-

-ஶிஶுநயநாம் குண்டலஸ்புரிதகண்டாம் ॥ 87 ॥

நிகடஸ்தபோதநிலயாஃ

ஶக்தீஃ ஶயவித்ரு'தஹேமஶ்ரு'ங்கஜலைஃ ।

பரிஷிஞ்சந்தீம் பரித-

-ஸ்தாராம் தாருண்யகர்விதாம் வந்தே ॥ 88 ॥

ப்ராகுக்தஸங்க்யயோஜநதூரே

ப்ரணமாமி புத்திமயஸாலம் ।

அநயோரந்தரகக்ஷ்யா-

-மஷ்டாபதபுஷ்டமேதிநீம் ருசிராம் ॥ 89 ॥

காதம்பரீநிதாநாம்

கலயாம்யாநந்தவாபிகாம் தஸ்யாம் ।

ஶோணாஶ்மநிவஹநிர்மித-

-ஸோபாநஶ்ரேணிஶோபமாநதடீம் ॥ 90 ॥

மாணிக்யதரணிநிலயாம்

மத்யே தஸ்யா மதாருணகபோலாம் ।

அம்ரு'தேஶீத்யபிதாநா-

-மந்தஃ கலயாமி வாருணீம் தேவீம் ॥ 91 ॥

ஸௌவர்ணகேநிபாதந-

-ஹஸ்தாஃ ஸௌந்தர்யகர்விதா தேவ்யஃ ।

தத்புரதஃ ஸ்திதிபாஜோ

விதரந்த்வஸ்மாகமாயுஷோ வ்ரு'த்திம் ॥ 92 ॥

தஸ்ய ப்ரு'ஷதஶ்வயோஜந-

-தூரேऽஹங்காரஸாலமதிதுங்கம் ।

வந்தே தயோஶ்ச மத்யே

கக்ஷ்யாம் வலமாநமலயபவமாநாம் ॥ 93 ॥

விநுமோ விமர்ஶவாபீம்

ஸௌஷும்நஸுதாஸ்வரூபிணீம் தத்ர ।

வேலாதிலங்க்யவீசீ-

-கோலாஹலபரிதகூலவநவாடீம் ॥ 94 ॥

தத்ரைவ ஸலிலமத்யே

தாபிஞ்சதலப்ரபஞ்சஸுஷமாபாம் ।

ஶ்யாமலகஞ்சுகலஸிதாம்

ஶ்யாமாவிடபிம்படம்பரஹராஸ்யாம் ॥ 95 ॥

ஆபுக்நமஸ்ரு'ணசில்லீ-

-ஹஸிதாயுக்மஶரகார்முகவிலாஸாம் ।

மந்தஸ்மிதாஞ்சிதமுகீம்

மணிமயதாடங்கமண்டிதகபோலாம் ॥ 96 ॥

குருவிந்ததரணிநிலயாம்

குலாசலஸ்பர்திகுசநமந்மத்யாம் ।

குங்குமவிலிப்தகாத்ரீம்

குருகுல்லாம் மநஸி குர்மஹே ஸததம் ॥ 97 ॥

தத்ஸாலோத்தரபாகே

பாநுமயம் வப்ரமாஶ்ரயே தீப்தம் ।

மத்யம் ச விபுலமநயோ-

-ர்மந்யே விஶ்ராந்தமாதபோத்காரம் ॥ 98 ॥

தத்ர குருவிந்தபீடே

தாமரஸே கநககர்ணிகாகடிதே ।

ஆஸீநமருணவாஸஸ-

-மம்லாநப்ரஸவமாலிகாபரணம் ॥ 99 ॥

சக்ஷுஷ்மதீப்ரகாஶந-

-ஶக்திச்சாயாஸமாரசிதகேலிம் ।

மாணிக்யமுகுடரம்யம்

மந்யே மார்தாண்டபைரவம் ஹ்ரு'தயே ॥ 100 ॥

இந்துமயஸாலமீடே

தஸ்யோத்தரதஸ்துஷாரகிரிகௌரம் ।

அத்யந்தஶிஶிரமாருத-

-மநயோர்மத்யம் ச சந்த்ரிகோத்காரம் ॥ 101 ॥

தத்ர ப்ரகாஶமாநம்

தாராநிகரைஃ பரிஷ்க்ரு'தோத்தேஶம் ।

அம்ரு'தமயகாந்திகந்தல-

-மந்தஃ கலயாமி குந்தஸிதமிந்தும் ॥ 102 ॥

ஶ்ரு'ங்காரஸாலமீடே

ஶ்ரு'ங்கோல்லஸிதம் ததுத்தரே பாகே ।

மத்யஸ்தலே தயோரபி

மஹிதாம் ஶ்ரு'ங்காரபூர்விகாம் பரிகாம் ॥ 103 ॥

தத்ர மணிநௌஸ்திதாபி-

-ஸ்தபநீயாவிரசிதாக்ரஹஸ்தாபிஃ ।

ஶ்ரு'ங்காரதேவதாபிஃ

ஸஹிதம் பரிகாதிபம் பஜே மதநம் ॥ 104 ॥

ஶ்ரு'ங்காரவரணவர்யஸ்யோத்தரதஃ

ஸகலவிபுதஸம்ஸேவ்யம் ।

சிந்தாமணிகணரசிதம்

சிந்தாம் தூரீகரோது மே ஸதநம் ॥ 105 ॥

மணிஸதநஸாலயோரதி-

-மத்யம் தஶதாலபூமிருஹதீர்கைஃ ।

பர்ணைஃ ஸுவர்ணவர்ணை-

-ர்யுக்தாம் காண்டைஶ்ச யோஜநோத்துங்கைஃ ॥ 106 ॥

ம்ரு'துலைஸ்தாலீபஞ்சக-

-மாநைர்மிலிதாம் ச கேஸரகதம்பைஃ ।

ஸந்ததகலிதமரந்த-

-ஸ்ரோதோநிர்யந்மிலிந்தஸந்தோஹாம் ॥ 107 ॥

பாடீரபவநபாலக-

-தாடீநிர்யத்பராகபிஞ்ஜரிதாம் ।

கலஹம்ஸீகுலகலகல-

-கூலங்கஷநிநதநிசயகமநீயாம் ॥ 108 ॥

பத்மாடவீம் பஜாமஃ

பரிமலகல்லோலபக்ஷ்மலோபாந்தாம் ।

[ தேவ்யர்க்யபாத்ரதாரீ

தஸ்யாஃ பூர்வதிஶி தஶகலாயுக்தஃ । ]

வலயிதமூர்திர்பகவா-

-ந்வஹ்நிஃ க்ரோஶோந்நதஶ்சிரம் பாயாத் ॥ 109 ॥

தத்ராதாரே தேவ்யாஃ

பாத்ரீரூபஃ ப்ரபாகரஃ ஶ்ரீமாந் ।

த்வாதஶகலாஸமேதோ

த்வாந்தம் மம பஹுலமாந்தரம் பிந்த்யாத் ॥ 110 ॥

தஸ்மிந் திநேஶபாத்ரே

தரங்கிதாமோதமம்ரு'தமயமர்க்யம் ।

சந்த்ரகலாத்மகமம்ரு'தம்

ஸாந்த்ரீகுர்யாதமந்தமாநந்தம் ॥ 111 ॥

அம்ரு'தே தஸ்மிந்நபிதோ

விஹரந்த்யோ விவிதமணிதரணிபாஜஃ ।

ஷோடஶ கலாஃ ஸுதாம்ஶோஃ

ஶோகாதுத்தாரயந்து மாமநிஶம் ॥ 112 ॥

தத்ரைவ விஹ்ரு'திபாஜோ

தாத்ரு'முகாநாம் ச காரணேஶாநாம் ।

ஸ்ரு'ஷ்ட்யாதிரூபிகாஸ்தாஃ

ஶமயந்த்வகிலாஃ கலாஶ்ச ஸந்தாபம் ॥ 113 ॥

கீநாஶவருணகிந்நர-

-ராஜதிகந்தேஷு ரத்நகேஹஸ்ய ।

கலயாமி தாந்யஜஸ்ரம்

கலயந்த்வாயுஷ்யமர்க்யபாத்ராணி ॥ 114 ॥

பாத்ரஸ்தலஸ்ய புரதஃ

பத்மாரமணவிதிபார்வதீஶாநாம் ।

பவநாநி ஶர்மணே நோ

பவந்து பாஸா ப்ரதீபிதஜகந்தி ॥ 115 ॥

ஸதநஸ்யாநலகோணே

ஸததம் ப்ரணமாமி குண்டமாக்நேயம் ।

தத்ர ஸ்திதம் ச வஹ்நிம்

தரலஶிகாஜடிலமம்பிகாஜநகம் ॥ 116 ॥

தஸ்யாஸுரதிஶி தாத்ரு'ஶ-

-ரத்நபரிஸ்புரிதபர்வநவகாட்யம் ।

சக்ராத்மகம் ஶதாங்கம்

ஶதயோஜநமுந்நதம் பஜே திவ்யம் ॥ 117 ॥

தத்ரைவ திஶி நிஷண்ணம்

தபநீயத்வஜபரம்பராஶ்லிஷ்டம் ।

ரதமபரம் ச பவாந்யா

ரசயாமோ மநஸி ரத்நமயசூடம் ॥ 118 ॥

பவநஸ்ய வாயுபாகே

பரிஷ்க்ரு'தோ விவிதவைஜயந்தீபிஃ ।

ரசயது முதம் ரதேந்த்ரஃ

ஸசிவேஶாந்யாஃ ஸமஸ்தவந்த்யாயாஃ ॥ 119 ॥

குர்மோऽதிஹ்ரு'தயமநிஶம்

க்ரோடாஸ்யாயாஃ ஶதாங்கமூர்தந்யம் ।

ருத்ரதிஶி ரத்நதாம்நோ

ருசிரஶலாகாப்ரபஞ்சகஞ்சுகிதம் ॥ 120 ॥

பரிதோ தேவீதாம்நஃ

ப்ரணீதவாஸா மநுஸ்வரூபிண்யஃ ।

குர்வந்து ரஶ்மிமாலா-

-க்ரு'தயஃ குஶலாநி தேவதா நிகிலாஃ ॥ 121 ॥

ப்ராக்த்வாரஸ்ய பவாநீ-

-தாம்நஃ பார்ஶ்வத்வயாரசிதவாஸே ।

மாதங்கீகிடிமுக்யௌ

மணிஸதநே மநஸி பாவயாமி சிரம் ॥ 122 ॥

யோஜநயுகலாபோகா

தத்க்ரோஶபரிணாஹயைவ பித்த்யா ச ।

சிந்தாமணிக்ரு'ஹபூமி-

-ர்ஜீயாதாம்நாயமயசதுர்த்வாரா ॥ 123 ॥

த்வாரே த்வாரே தாம்நஃ

பிண்டீபூதா நவீநபிம்பாபாஃ ।

விததது விபுலாம் கீர்திம்

திவ்யா லௌஹித்யஸித்த்யோ தேவ்யஃ ॥ 124 ॥

மணிஸதநஸ்யாந்தரதோ

மஹநீயே ரத்நவேதிகாமத்யே ।

பிந்துமயசக்ரமீடே

பீடாநாமுபரி விரசிதாவாஸம் ॥ 125 ॥

சக்ராணாம் ஸகலாநாம்

ப்ரதமமதஃ ஸீமபலகவாஸ்தவ்யாஃ ।

அணிமாதிஸித்தயோ மா-

-மவந்து தேவீ ப்ரபாஸ்வரூபிண்யஃ ॥ 126 ॥

அணிமாதிஸித்திபலக-

-ஸ்யோபரிஹரிணாங்ககண்டக்ரு'தசூடாஃ ।

பத்ரம் பக்ஷ்மலயந்து

ப்ராஹ்மீப்ரமுகாஶ்ச மாதரோऽஸ்மாகம் ॥ 127 ॥

தஸ்யோபரி மணிபலகே

தாருண்யோத்துங்கபீநகுசபாராஃ ।

ஸங்க்ஷோபிணீப்ரதாநாஃ

ப்ராந்தி வித்ராவயந்து தஶ முத்ராஃ ॥ 128 ॥

பலகத்ரயஸ்வரூபே

ப்ரு'துலே த்ரைலோக்யமோஹநே சக்ரே ।

தீவ்யந்து ப்ரகடாக்யா-

-ஸ்தாஸாம் கர்த்ரீம் ச பகவதீ த்ரிபுரா ॥ 129 ॥

ததுபரி விபுலே திஷ்ண்யே

தரலத்ரு'ஶஸ்தருணகோகநதபாஸஃ ।

காமாகர்ஷிண்யாத்யாஃ

கலயே தேவீஃ கலாதரஶிகண்டாஃ ॥ 130 ॥

ஸர்வாஶாபரிபூரகசக்ரே-

-ऽஸ்மிந் குப்தயோகிநீஸேவ்யாஃ ।

த்ரிபுரேஶீ மம துரிதம்

துத்யாத் கண்டாவலம்பிமணிஹாரா ॥ 131 ॥

தஸ்யோபரி மணிபீடே

தாம்ராம்போருஹதலப்ரபாஶோணாஃ ।

த்யாயாம்யநங்ககுஸுமா-

-ப்ரமுகா தேவீஶ்ச வித்ரு'தகூர்பாஸாஃ ॥ 132 ॥

ஸங்க்ஷோபகாரகேऽஸ்மிம்-

-ஶ்சக்ரே ஶ்ரீத்ரிபுரஸுந்தரீ ஸாக்ஷாத் ।

கோப்த்ரீ குப்ததராக்யாஃ

கோபாயது மாம் க்ரு'பார்த்ரயா த்ரு'ஷ்ட்யா ॥ 133 ॥

ஸங்க்ஷோபிணீப்ரதாநாஃ

ஶக்தீஸ்தஸ்யோர்த்வவலயக்ரு'தவாஸாஃ ।

ஆலோலநீலவேணீ-

-ரந்தஃ கலயாமி யௌவநோந்மத்தாஃ ॥ 134 ॥

ஸௌபாக்யதாயகேऽஸ்மிம்-

-ஶ்சக்ரேஶீ த்ரிபுரவாஸிநீ ஜீயாத் ।

ஶக்தீஶ்ச ஸம்ப்ரதாயாபிதாஃ

ஸமஸ்தாஃ ப்ரமோதயந்த்வநிஶம் ॥ 135 ॥

மணிபீடோபரி தாஸாம்

மஹதி சதுர்ஹஸ்தவிஸ்த்ரு'தே வலயே ।

ஸந்ததவிரசிதவாஸாஃ

ஶக்தீஃ கலயாமி ஸர்வஸித்திமுகாஃ ॥ 136 ॥

ஸர்வார்தஸாதகாக்யே

சக்ரேऽமுஷ்மிந் ஸமஸ்தபலதாத்ரீ ।

த்ரிபுரா ஶ்ரீர்மம குஶலம்

திஶதாதுத்தீர்ணயோகிநீஸேவ்யா ॥ 137 ॥

தாஸாம் நிலயஸ்யோபரி

திஷ்ண்யே கௌஸும்பகஞ்சுகமநோஜ்ஞாஃ ।

ஸர்வாஜ்ஞாத்யாஃ தேவ்யஃ

ஸகலாஃ ஸம்பாதயந்து மம கீர்திம் ॥ 138 ॥

சக்ரே ஸமஸ்தரக்ஷா-

-கரநாம்ந்யஸ்மிந் ஸமஸ்தஜநஸேவ்யாம் ।

மநஸி நிகர்பாஸஹிதாம்

மந்யே ஶ்ரீத்ரிபுரமாலிநீம் தேவீம் ॥ 139 ॥

ஸர்வஜ்ஞாஸதநஸ்யோபரி

சக்ரே விபுலே ஸமாகலிதகேஹாஃ ।

வந்தே வஶிநீமுக்யாஃ

ஶக்தீஃ ஸிந்தூரரேணுருசஃ ॥ 140 ॥

ஶ்ரீஸர்வரோகஹராக்ய-

-சக்ரேऽஸ்மிம்ஸ்த்ரிபுரபூர்விகாம் ஸித்தாம் ।

வந்தே ரஹஸ்யநாம்நா

வேத்யாபிஃ ஶக்திபிஃ ஸதா ஸேவ்யாம் ॥ 141 ॥

வஶிநீக்ரு'ஹோபரிஷ்டா-

-த்விம்ஶதிஹஸ்தோந்நதே மஹாபீடே ।

ஶமயந்து ஶத்ருப்ரு'ந்தம்

ஶஸ்த்ராண்யஸ்த்ராணி சாதிதம்பத்யோஃ ॥ 142 ॥

ஶஸ்த்ரஸதநோபரிஷ்டா-

-த்வலயே வலவைரிரத்நஸங்கடிதே ।

காமேஶ்வரீப்ரதாநாஃ

கலயே தேவீஃ ஸமஸ்தஜநவந்த்யாஃ ॥ 143 ॥

சக்ரேऽத்ர ஸர்வஸித்திப்ரத-

-நாமநி ஸர்வபலதாத்ரீ ।

த்ரிபுராம்பாவது ஸததம்

பராபரரஹஸ்யயோகிநீஸேவ்யா ॥ 144 ॥

காமேஶ்வரீக்ரு'ஹோபரிவலயே

விவிதமநுஸம்ப்ரதாயஜ்ஞாஃ ।

சத்வாரோ யுகநாதா

ஜயந்து மித்ரேஶபூர்வகாஃ குரவஃ ॥ 145 ॥

நாதபவநோபரிஷ்டா-

-ந்நாநாரத்நசயமேதுரே பீடே ।

காமேஶ்யாத்யா நித்யாஃ

கலயந்து முதம் திதிஸ்வரூபிண்யஃ ॥ 146 ॥

நித்யாஸதநஸ்யோபரி

நிர்மலமணிநிவஹவிரசிதே திஷ்ண்யே ।

குஶலம் ஷடங்கதேவ்யஃ

கலயந்த்வஸ்மாகமுத்தரலநேத்ராஃ ॥ 147 ॥

ஸதநஸ்யோபரி தாஸாம்

ஸர்வாநந்தமயநாமகே பிந்தௌ ।

பஞ்சப்ரஹ்மாகாராம்

மஞ்சம் ப்ரணமாமி மணிகணாகீர்ணம் ॥ 148 ॥

பரிதோ மணிமஞ்சஸ்ய

ப்ரலம்பமாநா நியந்த்ரிதா பாஶைஃ ।

மாயாமயீ ஜவநிகா

மம துரிதம் ஹரது மேசகச்சாயா ॥ 149 ॥

மஞ்சஸ்யோபரி லம்ப-

-ந்மதநீபுந்நாகமாலிகாபரிதம் ।

ஹரிகோபமயவிதாநம்

ஹரதாதாலஸ்யமநிஶமஸ்மாகம் ॥ 150 ॥

பர்யங்கஸ்ய பஜாமஃ

பாதாந்பிம்பாம்புதேந்துஹேமருசஃ ।

அஜஹரிருத்ரேஶமயா-

-நநலாஸுரமாருதேஶகோணஸ்தாந் ॥ 151 ॥

பலகம் ஸதாஶிவமயம்

ப்ரணௌமி ஸிந்தூரரேணுகிரணாபம் ।

ஆரப்யாங்கேஶீநாம்

ஸதநாத்கலிதம் ச ரத்நஸோபாநம் ॥ 152 ॥

பட்டோபதாநகண்டக-

-சதுஷ்டயஸ்புரிதபாடலாஸ்தரணம் ।

பர்யங்கோபரி கடிதம்

பாது சிரம் ஹம்ஸதூலஶயநம் நஃ ॥ 153 ॥

தஸ்யோபரி நிவஸந்தம்

தாருண்யஶ்ரீநிஷேவிதம் ஸததம் ।

ஆவ்ரு'ந்தபுல்லஹல்லக-

-மரீசிகாபுஞ்ஜமஞ்ஜுலச்சாயம் ॥ 154 ॥

ஸிந்தூரஶோணவஸநம்

ஶீதாம்ஶுஸ்தபகசும்பிதகிரீடம் ।

குங்குமதிலகமநோஹர-

-குடிலாலிகஹஸிதகுமுதபந்துஶிஶும் ॥ 155 ॥

பூர்ணேந்துபிம்பவதநம்

புல்லஸரோஜாதலோசநத்ரிதயம் ।

தரலாபாங்கதரங்கித-

-ஶபராங்கநஶாஸ்த்ரஸம்ப்ரதாயார்தம் ॥ 156 ॥

மணிமயகுண்டலபுஷ்ய-

-ந்மரீசிகல்லோலமாம்ஸலகபோலம் ।

வித்ருமஸஹோதராதர-

-விஸ்ரு'மரஸுஸ்மிதகிஶோரஸஞ்சாரம் ॥ 157 ॥

ஆமோதிகுஸுமஶேகர-

-மாநீலப்ரூலதாயுகமநோஜ்ஞம் ।

வீடீஸௌரபவீசீ-

-த்விகுணிதவக்த்ராரவிந்தஸௌரப்யம் ॥ 158 ॥

பாஶாங்குஶேக்ஷுசாப-

-ப்ரஸவஶரஸ்புரிதகோமலகராப்ஜம் ।

காஶ்மீரபங்கிலாங்கம்

காமேஶம் மநஸி குர்மஹே ஸததம் ॥ 159 ॥

தஸ்யாங்கபுவி நிஷண்ணாம்

தருணகதம்பப்ரஸூநகிரணாபாம் ।

ஶீதாம்ஶுகண்டசூடாம்

ஸீமந்தந்யஸ்தஸாந்த்ரஸிந்தூராம் ॥ 160 ॥

குங்குமலலாமபாஸ்வ-

-ந்நிடிலாம் குடிலதரசில்லிகாயுகலாம் ।

நாலீகதுல்யநயநாம்

நாஸாஞ்சலநடிதமௌக்திகாபரணாம் ॥ 161 ॥

அங்குரிதமந்தஹாஸ-

-மருணாதரகாந்திவிஜிதபிம்பாபாம் ।

கஸ்தூரீமகரீயுத-

-கபோலஸங்க்ராந்தகநகதாடங்காம் ॥ 162 ॥

கர்பூரஸாந்த்ரவீடீ-

-கபலிதவதநாரவிந்தகமநீயாம் ।

கம்புஸஹோதரகண்ட-

-ப்ரலம்பமாநாச்சமௌக்திககலாபாம் ॥ 163 ॥

கஹ்லாரதாமகோமல-

-புஜயுகலஸ்புரிதரத்நகேயூராம் ।

கரபத்மமூலவிலஸ-

-த்காஞ்சநமயகடகவலயஸந்தோஹாம் ॥ 164 ॥

பாணிசதுஷ்டயவிலஸ-

-த்பாஶாங்குஶபுண்ட்ரசாபபுஷ்பாஸ்த்ராம் ।

கூலங்கஷகுசஶிகராம்

குங்குமகர்தமிதரத்நகூர்பாஸாம் ॥ 165 ॥

அணுதாயாதவலக்நா-

-மம்புதஶோபாஸநாபிரோமலதாம் ।

மாணிக்யகசிதகாஞ்சீ-

-மரீசிகாக்ராந்தமாம்ஸலநிதம்பாம் ॥ 166 ॥

கரபோருகாண்டயுகலாம்

ஜங்காஜிதகாமஜைத்ரதூணீராம் ।

ப்ரபதபரிபூதகூர்மாம்

பல்லவஸச்சாயபதயுகமநோஜ்ஞாம் ॥ 167 ॥

கமலபவகஞ்ஜலோசந-

-கிரீடரத்நாம்ஶுரஞ்ஜிதபதாப்ஜாம் ।

உந்மஸ்தகாநுகம்பா-

-முத்தரலாபாங்கபோஷிதாநங்காம் ॥ 168 ॥

ஆதிமரஸாவலம்பா-

-மநிதம் ப்ரதமோக்திவல்லரீகலிகாம் ।

ஆப்ரஹ்மகீடஜநநீ-

-மந்தஃ கலயாமி ஸுந்தரீமநிஶம் ॥ 169 ॥

கஸ்து க்ஷிதௌ படீயா-

-ந்வஸ்து ஸ்தோதும் ஶிவாங்கவாஸ்தவ்யம் ।

அஸ்து சிரந்தநஸுக்ரு'தைஃ

ப்ரஸ்துதகாம்யாய தந்மம புரஸ்தாத் ॥ 170 ॥

ப்ரபுஸம்மிதோக்திகம்யம்

பரமஶிவோத்ஸங்கதுங்கபர்யங்கம் ।

தேஜஃ கிஞ்சந திவ்யம்

புரதோ மே பவது புண்ட்ரகோதண்டம் ॥ 171 ॥

மதுரிமபரிதஶராஸம்

மகரந்தஸ்யந்திமார்கணோதாரம் ।

கைரவிணீவிடசூடம்

கைவல்யாயாஸ்து கிஞ்சந மஹோ நஃ ॥ 172 ॥

அக்ஷுத்ரமிக்ஷுசாபம்

பரோக்ஷமவலக்நஸீம்நி த்ர்யக்ஷம் ।

க்ஷபயது மே க்ஷேமேதர-

-முக்ஷரதப்ரேமபக்ஷ்மலம் தேஜஃ ॥ 173 ॥

ப்ரு'ங்கருசிஸங்கரகராபாங்கம்

ஶ்ரு'ங்காரதுங்கமருணாங்கம் ।

மங்கலமபங்குரம் மே

கடயது கங்காதராங்கஸங்கி மஹஃ ॥ 174 ॥

ப்ரபதாஜிதகூர்மமூர்ஜித-

-கருணம் பர்மருசிநிர்மதநதேஹம் ।

ஶ்ரிதவர்ம மர்ம ஶம்போஃ

கிஞ்சந மம நர்ம ஶர்ம நிர்மாது ॥ 175 ॥

காலகுரலாலிகாலிம-

-கந்தலவிஜிதாலி வித்ரு'தமணிவாலி ।

மிலது ஹ்ரு'தி புலிநஜகநம்

பஹுலிதகலகரலகேலி கிமபி மஹஃ ॥ 176 ॥

குங்குமதிலகிதபாலா

குருவிந்தச்சாயபாடலதுகூலா ।

கருணாபயோதிவேலா

காசந சித்தே சகாஸ்து மே லீலா ॥ 177 ॥

புஷ்பந்தயருசிவேண்யஃ

புலிநாபோகத்ரபாகரஶ்ரேண்யஃ ।

ஜீயாஸுரிக்ஷுபாண்யஃ

காஶ்சந காமாரிகேலிஸாக்ஷிண்யஃ ॥ 178 ॥

தபநீயாம்ஶுகபாம்ஸி

த்ராக்ஷாமாதுர்யநாஸ்திகவசாம்ஸி ।

கதிசந ஶுசம் மஹாம்ஸி

க்ஷபயது கபாலிதோஷிதமநாம்ஸி ॥ 179 ॥

அஸிதகசமாயதாக்ஷம்

குஸுமஶரம் கூலமுத்வஹக்ரு'பார்த்ரம் ।

ஆதிமரஸாதிதைவத-

-மந்தஃ கலயே ஹராங்கவாஸி மஹஃ ॥ 180 ॥

கர்ணோபாந்ததரங்கித-

-கடாக்ஷவிஸ்பந்திகண்டதக்நக்ரு'பாம் ।

காமேஶ்வராங்கநிலயாம்

காமபி வித்யாம் புராதநீம் கலயே ॥ 181 ॥

அரவிந்தகாந்த்யருந்துத-

-விலோசநத்வந்த்வஸுந்தரமுகேந்து ।

சந்தஃ கந்தலமந்திர-

-மந்தஃபுரமைந்துஶேகரம் வந்தே ॥ 182 ॥

பிம்பிநிகுரம்படம்பர-

-விடம்பகச்சாயமம்பரவலக்நம் ।

கம்புகலமம்புதகுசம்

பிம்போகம் கமபி சும்பது மநோ மே ॥ 183 ॥

கமபி கமநீயரூபம்

கலயாம்யந்தஃ கதம்பகுஸுமாட்யம் ।

சம்பகருசிரஸுவேஷைஃ

ஸம்பாதிதகாந்த்யலங்க்ரு'ததிகந்தம் ॥ 184 ॥

ஶம்பாருசிபர-

-கர்ஹாஸம்பாதககாந்திகவசிததிகந்தம் ।

ஸித்தாந்தம் நிகமாநாம்

ஶுத்தாந்தம் கிமபி ஶூலிநஃ கலயே ॥ 185 ॥

உத்யத்திநகரஶோணா-

-நுத்பலபந்துஸ்தநந்தயாபீடாந் ।

கரகலிதபுண்ட்ரசாபா-

-ந்கலயே காநபி கபர்திநஃ ப்ராணாந் ॥ 186 ॥

ரஶநாலஸஜ்ஜகநயா

ரஸநாஜீவாதுசாபபாஸுரயா ।

க்ராணாயுஷ்கரஶரயா

க்ராதம் சித்தம் கயாபி வாஸநயா ॥ 187 ॥

ஸரஸிஜஸஹயுத்வத்ரு'ஶா

ஶம்பாலதிகாஸநாபிவிக்ரஹயா ।

பாஸா கயாபி சேதோ

நாஸாமணிஶோபிவதநயா பரிதம் ॥ 188 ॥

நவயாவகாபஸிசயாந்விதயா

கஜயாநயா தயாபரயா ।

த்ரு'தயாமிநீஶகலயா

தியா கயாபி க்ஷதாமயா ஹி வயம் ॥ 189 ॥

அலமலமகுஸுமபாணை-

-ரபிம்பஶோணைரபுண்ட்ரகோதண்டைஃ ।

அகுமுதபாந்தவசூடை-

-ரந்யைரிஹ ஜகதி தைவதம் மந்யைஃ ॥ 190 ॥

குவலயஸத்ரு'க்ஷநயநைஃ

குலகிரிகூடஸ்தபந்துகுசபாரைஃ ।

கருணாஸ்பந்திகடாக்ஷைஃ

கவசிதசித்தோऽஸ்மி கதிபயைஃ குதுகைஃ ॥ 191 ॥

நதஜநஸுலபாய நமோ

நாலீகஸநாபிலோசநாய நமஃ ।

நந்திதகிரிஶாய நமோ

மஹஸே நவநீபபாடலாய நமஃ ॥ 192 ॥

காதம்பகுஸுமதாம்நே

காயச்சாயாகணாயிதார்யம்ணே ।

ஸீம்நே சிரந்தநகிராம்

பூம்நே கஸ்மைசிதாததே ப்ரணதிம் ॥ 193 ॥

குடிலகபரீபரேப்யஃ

குங்குமஸப்ரஹ்மசாரிகிரணேப்யஃ ।

கூலங்கஷஸ்தநேப்யஃ

குர்மஃ ப்ரணதிம் குலாத்ரிகுதுகேப்யஃ ॥ 194 ॥

கோகநதஶோணசரணா-

-த்கோமலகுரலாலிவிஜிதஶைவாலாத் ।

உத்பலஸகந்திநயநா-

-துரரீகுர்மோ ந தேவதமாந்யாம் ॥ 195 ॥

ஆபாடலாதராணா-

-மாநீலஸ்நிக்தபர்பரகசாநாம் ।

ஆம்நாயஜீவநாநா-

-மாகூதாநாம் ஹரஸ்ய தாஸோऽஹம் ॥ 196 ॥

புங்கிதவிலாஸஹாஸ-

-ஸ்புரிதாஸு புராஹிதாங்கநிலயாஸு ।

மக்நம் மநோ மதீயம்

காஸ்வபி காமாரிஜீவநாடீஷு ॥ 197 ॥

லலிதா பாது ஶிரோ மே

லலாடமம்பா ச மதுமதீரூபா ।

ப்ரூயுக்மம் ச பவாநீ

புஷ்பஶரா பாது லோசநத்வந்த்வம் ॥ 198 ॥

பாயாந்நாஸாம் பாலா

ஸுபகா தந்தாம்ஶ்ச ஸுந்தரீ ஜிஹ்வாம் ।

அதரோஷ்டமாதிஶக்தி-

-ஶ்சக்ரேஶீ பாது மே சிரம் சிபுகம் ॥ 199 ॥

காமேஶ்வரீ ச கர்ணௌ

காமாக்ஷீ பாது கண்டயோர்யுகலம் ।

ஶ்ரு'ங்காரநாயிகாவ்யா-

-த்வதநம் ஸிம்ஹாஸநேஶ்வரீ ச கலம் ॥ 200 ॥

ஸ்கந்தப்ரஸூஶ்ச பாது

ஸ்கந்தௌ பாஹூ ச பாடலாங்கீ மே ।

பாணீ ச பத்மநிலயா

பாயாதநிஶம் நகாவலீர்விஜயா ॥ 201 ॥

கோதண்டிநீ ச வக்ஷஃ

குக்ஷிம் சாவ்யாத் குலாசலதநூஜா ।

கல்யாணீ ச வலக்நம்

கடிம் ச பாயாத்கலாதரஶிகண்டா ॥ 202 ॥

ஊருத்வயம் ச பாயா-

-துமா ம்ரு'டாநீ ச ஜாநுநீ ரக்ஷேத் ।

ஜங்கே ச ஷோடஶீ மே

பாயாத் பாதௌ ச பாஶஸ்ரு'ணிஹஸ்தா ॥ 203 ॥

ப்ராதஃ பாது பரா மாம்

மத்யாஹ்நே பாது மணிக்ரு'ஹாதீஶா ।

ஶர்வாண்யவது ச ஸாயம்

பாயாத்ராத்ரௌ ச பைரவீ ஸாக்ஷாத் ॥ 204 ॥

பார்யாம் ரக்ஷது கௌரீம்

பாயாத் புத்ராம்ஶ்ச பிந்துக்ரு'ஹபீடா ।

ஶ்ரீவித்யா ச யஶோ மே

ஶீலம் சாவ்யாச்சிரம் மஹாராஜ்ஞீ ॥ 205 ॥

பவநமயி பாவகமயி

க்ஷோணீமயி ககநமயி க்ரு'பீடமயி ।

ரவிமயி ஶஶிமயி திங்மயி

ஸமயமயி ப்ராணமயி ஶிவே பாஹி ॥ 206 ॥

காலி கபாலிநி ஶூலிநி

பைரவி மாதங்கி பஞ்சமி த்ரிபுரே ।

வாக்தேவி விந்த்யவாஸிநி

பாலே புவநேஶி பாலய சிரம் மாம் ॥ 207 ॥

அபிநவஸிந்தூராபா-

-மம்ப த்வாம் சிந்தயந்தி யே ஹ்ரு'தயே ।

உபரி நிபதந்தி தேஷா-

-முத்பலநயநாகடாக்ஷகல்லோலாஃ ॥ 208 ॥

வர்காஷ்டகமிலிதாபி-

-ர்வஶிநீமுக்யாபிராவ்ரு'தாம் பவதீம் ।

சிந்தயதாம் ஸிதவர்ணாம்

வாசோ நிர்யாந்த்யயத்நதோ வதநாத் ॥ 209 ॥

கநகஶலாகாகௌரீம்

கர்ணவ்யாலோலகுண்டலத்விதயாம் ।

ப்ரஹஸிதமுகீம் ச பவதீம்

த்யாயந்தோ யே த ஏவ பூதநதாஃ ॥ 210 ॥

ஶீர்ஷாம்போருஹமத்யே

ஶீதலபீயூஷவர்ஷிணீம் பவதீம் ।

அநுதிநமநுசிந்தயதா-

-மாயுஷ்யம் பவதி புஷ்கலமவந்யாம் ॥ 211 ॥

மதுரஸ்மிதாம் மதாருணநயநாம்

மாதங்ககும்பவக்ஷோஜாம் ।

சந்த்ரவதம்ஸிநீம் த்வாம்

ஸவிதே பஶ்யந்தி ஸுக்ரு'திநஃ கேசித் ॥ 212 ॥

லலிதாயாஃ ஸ்தவரத்நம்

லலிதபதாபிஃ ப்ரணீதமார்யாபிஃ ।

ப்ரதிதிநமவநௌ படதாம்

பலாநி வக்தும் ப்ரகல்பதே ஸைவ ॥ 213 ॥

ஸதஸதநுக்ரஹநிக்ரஹ-

-க்ரு'ஹீதமுநிவிக்ரஹோ பகவாந் ।

ஸர்வாஸாமுபநிஷதாம்

துர்வாஸா ஜயதி தேஶிகஃ ப்ரதமஃ ॥ 214 ॥

இதி மஹர்ஷிதுர்வாஸஃ விரசிதம் ஶ்ரீலலிதாஸ்தவரத்நம் ।

Roman (IAST) Transliteration

vande gajendravadanaṃ

vāmāṅkārūḍhavallabhāśliṣṭam |

kuṅkumaparāgaśoṇaṃ

kuvalayinījārakorakāpīḍam || 1 ||

sa jayati suvarṇaśailaḥ

sakalajagaccakrasaṅghaṭitamūrtiḥ |

kāñcananikuñjavāṭī-

-kandaladamarīprapañcasaṅgītaḥ || 2 ||

harihayanairṛtamāruta-

-haritāmanteṣvavasthitaṃ tasya |

vinumaḥ sānutritayaṃ

vidhiharigaurīśaviṣṭapādhāram || 3 ||

madhye punarmanohara-

-ratnarucistabakarañjitadigantam |

upari catuḥśatayojana-

-muttuṅgaṃ śṛṅgapuṅgavamupāse || 4 ||

tatra catuḥśatayojana-

-pariṇāhaṃ devaśilpinā racitam |

nānāsālamanojñaṃ

namāmyahaṃ nagaramādividyāyāḥ || 5 ||

prathamaṃ sahasrapūrvaka-

-ṣaṭśatasaṅkhyākayojanaṃ paritaḥ |

valayīkṛtasvagātraṃ

varaṇaṃ śaraṇaṃ vrajāmyayorūpam || 6 ||

tasyottare samīraṇa-

-yojanadūre taraṅgitacchāyaḥ |

ghaṭayatu mudaṃ dvitīyo

ghaṇṭāstanasāranirmitaḥ sālaḥ || 7 ||

ubhayorantarasīma-

-nyuddāmabhramararañjitodāram |

upavanamupāsmahe vaya-

-mūrīkṛtamandamārutasyandam || 8 ||

āliṅgya bhadrakālī-

-māsīnastatra hariśilāśyāmām |

manasi mahākālo me

viharatu madhupānavibhramannetraḥ || 9 ||

tārtīyīko varaṇa-

-stasyottarasīmni vātayojanataḥ |

tāmreṇa racitamūrti-

-stanutāmācandratārakaṃ bhadram || 10 ||

madhye tayośca maṇimaya-

-pallavaśākhāprasūnapakṣmalitām |

kalpānokahavāṭīṃ

kalaye makarandapaṅkilāvālām || 11 ||

tatra madhumādhavaśrī-

-taruṇībhyāṃ taraladṛkcakorābhyām |

āliṅgito'vatānmā-

-maniśaṃ prathamarturāttapuṣpāstraḥ || 12 ||

namata taduttarabhāge

nākipathollaṅghiśṛṅgasaṅghātam |

sīsākṛtiṃ turīyaṃ

sitakiraṇālokanirmalaṃ sālam || 13 ||

sāladvayāntarāle

saralālikapotacāṭusubhagāyām |

santānavāṭikāyāṃ

saktaṃ ceto'stu satatamasmākam || 14 ||

tatra tapanātirūkṣaḥ

sāmrājñīcaraṇasāndritasvāntaḥ |

śukraśuciśrīsahito

grīṣmarturdiśatu kīrtimākalpam || 15 ||

uttarasīmani tasyo-

-nnataśikharotkampihāṭakapatākaḥ |

prakaṭayatu pañcamo naḥ

prākāraḥ kuśalamārakūṭamayaḥ || 16 ||

prākārayośca madhye

pallavitānyabhṛtapañcamonmeṣā |

haricandanadruvāṭī-

-haratādāmūlamasmadanutāpam || 17 ||

tatra nabhaḥ śrīmukhyai-

-staruṇīvargaiḥ samanvitaḥ paritaḥ |

vajrāṭṭahāsamukharo

vāñchāpūrtiṃ tanotu varṣartuḥ || 18 ||

mārutayojanadūre

mahanīyastasya cottare bhāge |

bhadraṃ kṛṣīṣṭa ṣaṣṭhaḥ

prākāraḥ pañcalohadhātumayaḥ || 19 ||

anayormadhye santata-

-maṅkūraddivyakusumagandhāyām |

mandāravāṭikāyāṃ

mānasamaṅgīkarotu me vihṛtim || 20 ||

tasyāmiṣorjalakṣmī-

-taruṇībhyāṃ śaradṛtuḥ sadā sahitaḥ |

abhyarcayan sa jīyā-

-dambāmāmodameduraiḥ kusumaiḥ || 21 ||

tasyarṣisaṅkhyayojana-

-dūre dedīpyamānaśṛṅgaughaḥ |

kaladhautakalitamūrtiḥ

kalyāṇaṃ diśatu saptamaḥ sālaḥ || 22 ||

madhye tayormarutpatha

laṅghitaviṭapāgravirutakalakaṇṭhā |

śrīpārijātavāṭī

śriyamaniśaṃ diśatu śītaloddeśā || 23 ||

tasyāmatipriyābhyāṃ

saha khelan sahasahasyalakṣmībhyām |

sāmanto jhaṣaketo-

-rhemanto bhavatu hemavṛddhyai naḥ || 24 ||

uttaratastasya mahā-

-nudbhaṭahutabhukśikhāruṇamayūkhaḥ |

tapanīyakhaṇḍaracita-

-stanutādāyuṣyamaṣṭamo varaṇaḥ || 25 ||

kādambavipinavāṭī-

-manayormadhyabhuvi kalpitāvāsām |

kalayāmi sūnakoraka-

-kandalitāmodatundilasamīrām || 26 ||

tasyāmatiśiśirākṛti-

-rāsīnastapatapasyalakṣmībhyām |

śivamaniśaṃ kurutānme

śiśirartuḥ satataśītaladigantaḥ || 27 ||

tasyāṃ kadambavāṭyāṃ

tatprasavāmodamilitamadhugandham |

saptāvaraṇamanojñaṃ

śaraṇaṃ samupaimi mantriṇīśaraṇam || 28 ||

tatrālaye viśāle

tapanīyāracitataralasopāne |

māṇikyamaṇḍapānta-

-rmahite siṃhāsane sumaṇikhacite || 29 ||

bindutripañcakoṇa-

-dvipanṛpavasuvedadalakurekhāḍhye |

cakre sadā niviṣṭāṃ

ṣaṣṭhyaṣṭatriṃśadakṣareśānīm || 30 ||

tāpiñchamecakābhāṃ

tālīdalaghaṭitakarṇatāṭaṅkām |

tāmbūlapūritamukhīṃ

tāmrādharabimbadṛṣṭadarahāsām || 31 ||

kuṅkumapaṅkiladehāṃ

kuvalayajīvātuśāvakavataṃsām |

kokanadaśoṇacaraṇāṃ

kokilanikvāṇakomalālāpām || 32 ||

vāmāṅgagalitacūlīṃ

vanamālyakadambamālikābharaṇām |

muktālalantikāñcita

mugdhālikamilitacitrakodārām || 33 ||

karavidhṛtakīraśāvaka-

-kalaninadavyaktanikhilanigamārthām |

vāmakucasaṅgivīṇāvādana-

-saukhyārdhamīlitākṣiyugām || 34 ||

āpāṭalāṃśukadharā-

-mādirasonmeṣavāsitakaṭākṣām |

āmnāyasāragulikā-

-mādyāṃ saṅgītamātṛkāṃ vande || 35 ||

tasya ca suvarṇasāla-

-syottaratastaruṇakuṅkumacchāyaḥ |

śamayatu mama santāpaṃ

sālo navamaḥ sa puṣparāgamayaḥ || 36 ||

anayorantaravasudhāḥ

praṇumaḥ pratyagrapuṣparāgamayīḥ |

siṃhāsaneśvarīmanu-

-cintananistandrasiddhanīrandhrāḥ || 37 ||

tatsālottaradeśe

taruṇajapākiraṇadhoraṇīśoṇaḥ |

praśamayatu padmarāga-

-prākāro mama parābhavaṃ daśamaḥ || 38 ||

antarabhūkṛtavāsā-

-nanayorapanītacittavaimatyān |

cakreśīpadabhaktāṃ-

-ścāraṇavargānaharniśaṃ kalaye || 39 ||

sāraṅgavāhayojanadūre-

-'saṅghaṭitaketanastasya |

gomedakena racito

gopāyatu māṃ samunnataḥ sālaḥ || 40 ||

vapradvayāntarorvyāṃ

vaṭukairvividhaiśca yoginībṛndaiḥ |

satataṃ samarcitāyāḥ

saṅkarṣaṇyāḥ praṇaumi caraṇābjam || 41 ||

tāpasayojanadūre

tasya samuttuṅga gopuropetaḥ |

vāñchāpūrtyai bhavatā-

-dvajramaṇīnikaranirmito vapraḥ || 42 ||

varaṇadvitayāntarato

vāsajuṣo vihitamadhurasāsvādāḥ |

rambhādivibudhaveśyā

racayantu mahāntamasmadānandam || 43 ||

tatra sadā pravahantī

taṭinī vajrābhidhā ciraṃ jīyāt |

caṭulormijālanṛtya-

-tkalahaṃsīkulakalakvaṇitapuṣṭā || 44 ||

rodhasi tasyā rucire

vajreśī jayati vajrabhūṣāḍhyā |

vajrapradānatoṣita-

-vajrimukhatridaśavinutacāritrā || 45 ||

tasyodīcyāṃ hariti

stavakitasuṣamāvalīḍhaviyadantaḥ |

vaiḍūryaratnaracito

vaimalyaṃ diśatu cetaso varaṇaḥ || 46 ||

adhimadhyametayoḥ puna-

-rambācaraṇāvalambitasvāntān |

kārkoṭakādināgān

kalayāmaḥ kiṃ ca balimukhān danujān || 47 ||

gandhavahasaṅkhyayojana-

-dūre gaganordhvajāṅghikastasya |

vāsavamaṇipraṇīto

varaṇo bahalayatu vaiduṣīṃ viśadām || 48 ||

madhyakṣoṇyāmanayo-

-rmahendranīlātmakāni ca sarāṃsi |

śātodarīsahāyā-

-nbhūpālānapi punaḥ punaḥ praṇumaḥ || 49 ||

āśugayojanadūre

tasyordhvaṃ kāntidhavalitadigantaḥ |

muktāviracitagātro

muhurasmākaṃ mude bhavatu sālaḥ || 50 ||

āvṛttyoradhimadhyaṃ

pūrvasyāṃ diśi purandaraḥ śrīmān |

abhramuviṭādhirūḍho

vibhramamasmākamaniśamātanutāt || 51 ||

tatkoṇe vyajanasru-

-ktomarapātrasruvānnaśaktidharaḥ |

svāhāsvadhāsametaḥ

sukhayatu māṃ havyavāhanaḥ suciram || 52 ||

dakṣiṇadigantarāle

daṇḍadharo nīlanīradacchāyaḥ |

tripurāpadābjabhaktastirayatu

mama nikhilamaṃhasāṃ nikaram || 53 ||

tasyaiva paścimāyāṃ

diśi dalitendīvaraprabhāśyāmaḥ |

kheṭāsiyaṣṭidhārī

khedānapanayatu yātudhāno me || 54 ||

tasyā uttaradeśe

dhavalāṅgo vipulajhaṣavarārūḍhaḥ |

pāśāyudhāttapāṇiḥ

pāśī vidalayatu pāśajālāni || 55 ||

vande taduttarahari-

-tkoṇe vāyuṃ camūruvaravāham |

korakitatattvabodhā-

-ngorakṣapramukhayogino'pi muhuḥ || 56 ||

taruṇīriḍāpradhānā-

-stisro vātasya tasya kṛtavāsāḥ |

pratyagrakāpiśāyana-

-pānaparibhrāntalocanāḥ kalaye || 57 ||

tallokapūrvabhāge

dhanadaṃ dhyāyāmi śevadhikuleśam |

api māṇibhadramukhyā-

-nambācaraṇāvalambino yakṣān || 58 ||

tasyaiva pūrvasīmani

tapanīyāracitagopure nagare |

kātyāyanīsahāyaṃ

kalaye śītāṃśukhaṇḍacūḍālam || 59 ||

tatpuraṣoḍaśavaraṇa-

-sthalabhājastaruṇacandracūḍālān |

rudrādhyāye paṭhitā-

-nrudrāṇīsahacarānbhaje rudrān || 60 ||

pavamānasaṅkhyayojana-

-dūre bālatṛṇmecakastasya |

sālo marakataracitaḥ

sampadamacalāṃ śriyaṃ ca puṣṇātu || 61 ||

āvṛtiyugmāntarato

haritamaṇīnivahamecake deśe |

hāṭakatālīvipinaṃ

hālāghaṭaghaṭitaviṭapamākalaye || 62 ||

tatraiva mantriṇīgṛha-

-pariṇāhaṃ taralaketanaṃ sadanam |

marakatasaudhamanojñaṃ

dadyādāyūṃṣi daṇḍanāthāyāḥ || 63 ||

sadane tatra harinmaṇi-

-saṅghaṭite maṇḍape śatastambhe |

kārtasvaramayapīṭhe

kanakamayāmburuhakarṇikāmadhye || 64 ||

bindutrikoṇavartula-

-ṣaḍasravṛttadvayānvite cakre |

sañcāriṇī daśottara-

śatārṇamanurājakamalakalahaṃsī || 65 ||

kolavadanā kuśeśaya-

-nayanā kokārimaṇḍitaśikhaṇḍā |

santaptakāñcanābhā

sandhyāruṇacelasaṃvṛtanitambā || 66 ||

halamusalaśaṅkhacakrā-

-'ṅkuśapāśābhayavarasphuritahastā |

kūlaṅkaṣānukampā

kuṅkumajambālitastanābhogā || 67 ||

dhūrtānāmatidūrā-

-vārtāśeṣāvalagnakamanīyā |

ārtālīśubhadātrī

vārtālī bhavatu vāñchitārthāya || 68 ||

tasyāḥ parito devīḥ

svapneśyunmattabhairavīmukhyāḥ |

praṇamata jambhinyādyāḥ

bhairavavargāṃśca hetukapramukhān || 69 ||

pūrvoktasaṅkhyayojana-

-dūre pūyāṃśupāṭalastasya |

vidrāvayatu madārtiṃ

vidrumasālo viśaṅkaṭadvāraḥ || 70 ||

āvaraṇayoraharniśa-

-mantarabhūmauprakāśaśālinyām |

āsīnamambujāsana-

-mabhinavasindūragauramahamīḍe || 71 ||

varaṇasya tasya māruta-

-yojanato vipulagopuradvāraḥ |

sālo nānāratnaiḥ

saṅghaṭitāṅgaḥ kṛṣīṣṭa madabhīṣṭam || 72 ||

antarakakṣyāmanayo-

-raviralaśobhāpicaṇḍiloddeśām |

māṇikyamaṇḍapākhyāṃ

mahatīmadhihṛdayamaniśamākalaye || 73 ||

tatra sthitaṃ prasannaṃ

taruṇatamālapravālakiraṇābham |

karṇāvalambikuṇḍala-

-kandalitābhīśukavacitakapolam || 74 ||

śoṇādharaṃ śucismita-

-meṇāṅkavadanamedhamānakṛpam |

mugdhaiṇamadaviśeṣaka-

-mudritaniṭilendurekhikāruciram || 75 ||

nālīkadalasahodara-

-nayanāñcalaghaṭitamanasijākūtam |

kamalākaṭhinapayodhara-

-kastūrīghusṛṇapaṅkiloraskam || 76 ||

cāmpeyagandhikaiśyaṃ

śampāsabrahmacārikauśeyam |

śrīvatsakaustubhadharaṃ

śritajanarakṣādhurīṇacaraṇābjam || 77 ||

kambusudarśanavilasa-

-tkarapadmaṃ kaṇṭhalolavanamālam |

mucukundamokṣaphaladaṃ

mukundamānandakandamavalambe || 78 ||

tadvaraṇottarabhāge

tārāpatibimbacumbinijaśṛṅgaḥ |

vividhamaṇīgaṇaghaṭito

vitaratu sālo vinirmalāṃ dhiṣaṇām || 79 ||

prākāradvitayāntara-

-kakṣyāṃ pṛthuratnanikarasaṅkīrṇām |

namata sahasrastambhaka-

-maṇḍapanāmnātiviśrutāṃ bhuvane || 80 ||

praṇumastatra bhavānī-

-sahacaramīśānamindukhaṇḍadharam |

śṛṅgāranāyikāmanu-

-śīlanabhājo'pi bhṛṅginandimukhān || 81 ||

tasyaiṇavāhayojana-

-dūre vande manomayaṃ vapram |

aṅkūranmaṇikiraṇā-

-mantarakakṣyāṃ ca nirmalāmanayoḥ || 82 ||

tatraivāmṛtavāpīṃ

taralataraṅgāvalīḍhataṭayugmām |

muktāmayakalahaṃsī-

-mudritakanakāravindasandohām || 83 ||

śakropalamayabhṛṅgī-

-saṅgītonmeṣaghoṣitadigantām |

kāñcanamayāṅgavilasa-

-tkāraṇḍavaṣaṇḍatāṇḍavamanojñām || 84 ||

kuruvindātmakahallaka-

-korakasuṣamāsamūhapāṭalitām |

kalaye sudhāsvarūpāṃ

kandalitāmandakairavāmodām || 85 ||

tadvāpikāntarāle tarale

maṇipotasīmni viharantīm |

sindūrapāṭalāṅgīṃ

sitakiraṇāṅkūrakalpitavataṃsām || 86 ||

parvendubimbavadanāṃ

pallavaśoṇādharasphuritahāsām |

kuṭilakabarīṃ kuraṅgī-

-śiśunayanāṃ kuṇḍalasphuritagaṇḍām || 87 ||

nikaṭasthapotanilayāḥ

śaktīḥ śayavidhṛtahemaśṛṅgajalaiḥ |

pariṣiñcantīṃ parita-

-stārāṃ tāruṇyagarvitāṃ vande || 88 ||

prāguktasaṅkhyayojanadūre

praṇamāmi buddhimayasālam |

anayorantarakakṣyā-

-maṣṭāpadapuṣṭamedinīṃ rucirām || 89 ||

kādambarīnidhānāṃ

kalayāmyānandavāpikāṃ tasyām |

śoṇāśmanivahanirmita-

-sopānaśreṇiśobhamānataṭīm || 90 ||

māṇikyataraṇinilayāṃ

madhye tasyā madāruṇakapolām |

amṛteśītyabhidhānā-

-mantaḥ kalayāmi vāruṇīṃ devīm || 91 ||

sauvarṇakenipātana-

-hastāḥ saundaryagarvitā devyaḥ |

tatpurataḥ sthitibhājo

vitarantvasmākamāyuṣo vṛddhim || 92 ||

tasya pṛṣadaśvayojana-

-dūre'haṅkārasālamatituṅgam |

vande tayośca madhye

kakṣyāṃ valamānamalayapavamānām || 93 ||

vinumo vimarśavāpīṃ

sauṣumnasudhāsvarūpiṇīṃ tatra |

velātilaṅghyavīcī-

-kolāhalabharitakūlavanavāṭīm || 94 ||

tatraiva salilamadhye

tāpiñchadalaprapañcasuṣamābhām |

śyāmalakañcukalasitāṃ

śyāmāviṭabimbaḍambaraharāsyām || 95 ||

ābhugnamasṛṇacillī-

-hasitāyugmaśarakārmukavilāsām |

mandasmitāñcitamukhīṃ

maṇimayatāṭaṅkamaṇḍitakapolām || 96 ||

kuruvindataraṇinilayāṃ

kulācalaspardhikucanamanmadhyām |

kuṅkumaviliptagātrīṃ

kurukullāṃ manasi kurmahe satatam || 97 ||

tatsālottarabhāge

bhānumayaṃ vapramāśraye dīptam |

madhyaṃ ca vipulamanayo-

-rmanye viśrāntamātapodgāram || 98 ||

tatra kuruvindapīṭhe

tāmarase kanakakarṇikāghaṭite |

āsīnamaruṇavāsasa-

-mamlānaprasavamālikābharaṇam || 99 ||

cakṣuṣmatīprakāśana-

-śakticchāyāsamāracitakelim |

māṇikyamukuṭaramyaṃ

manye mārtāṇḍabhairavaṃ hṛdaye || 100 ||

indumayasālamīḍe

tasyottaratastuṣāragirigauram |

atyantaśiśiramāruta-

-manayormadhyaṃ ca candrikodgāram || 101 ||

tatra prakāśamānaṃ

tārānikaraiḥ pariṣkṛtoddeśam |

amṛtamayakāntikandala-

-mantaḥ kalayāmi kundasitamindum || 102 ||

śṛṅgārasālamīḍe

śṛṅgollasitaṃ taduttare bhāge |

madhyasthale tayorapi

mahitāṃ śṛṅgārapūrvikāṃ parikhām || 103 ||

tatra maṇinausthitābhi-

-stapanīyāviracitāgrahastābhiḥ |

śṛṅgāradevatābhiḥ

sahitaṃ parikhādhipaṃ bhaje madanam || 104 ||

śṛṅgāravaraṇavaryasyottarataḥ

sakalavibudhasaṃsevyam |

cintāmaṇigaṇaracitaṃ

cintāṃ dūrīkarotu me sadanam || 105 ||

maṇisadanasālayoradhi-

-madhyaṃ daśatālabhūmiruhadīrghaiḥ |

parṇaiḥ suvarṇavarṇai-

-ryuktāṃ kāṇḍaiśca yojanottuṅgaiḥ || 106 ||

mṛdulaistālīpañcaka-

-mānairmilitāṃ ca kesarakadambaiḥ |

santatagalitamaranda-

-srotoniryanmilindasandohām || 107 ||

pāṭīrapavanabālaka-

-dhāṭīniryatparāgapiñjaritām |

kalahaṃsīkulakalakala-

-kūlaṅkaṣaninadanicayakamanīyām || 108 ||

padmāṭavīṃ bhajāmaḥ

parimalakallolapakṣmalopāntām |

[ devyarghyapātradhārī

tasyāḥ pūrvadiśi daśakalāyuktaḥ | ]

valayitamūrtirbhagavā-

-nvahniḥ krośonnataściraṃ pāyāt || 109 ||

tatrādhāre devyāḥ

pātrīrūpaḥ prabhākaraḥ śrīmān |

dvādaśakalāsameto

dhvāntaṃ mama bahulamāntaraṃ bhindyāt || 110 ||

tasmin dineśapātre

taraṅgitāmodamamṛtamayamarghyam |

candrakalātmakamamṛtaṃ

sāndrīkuryādamandamānandam || 111 ||

amṛte tasminnabhito

viharantyo vividhamaṇitaraṇibhājaḥ |

ṣoḍaśa kalāḥ sudhāṃśoḥ

śokāduttārayantu māmaniśam || 112 ||

tatraiva vihṛtibhājo

dhātṛmukhānāṃ ca kāraṇeśānām |

sṛṣṭyādirūpikāstāḥ

śamayantvakhilāḥ kalāśca santāpam || 113 ||

kīnāśavaruṇakinnara-

-rājadiganteṣu ratnagehasya |

kalayāmi tānyajasraṃ

kalayantvāyuṣyamarghyapātrāṇi || 114 ||

pātrasthalasya purataḥ

padmāramaṇavidhipārvatīśānām |

bhavanāni śarmaṇe no

bhavantu bhāsā pradīpitajaganti || 115 ||

sadanasyānalakoṇe

satataṃ praṇamāmi kuṇḍamāgneyam |

tatra sthitaṃ ca vahniṃ

taralaśikhājaṭilamambikājanakam || 116 ||

tasyāsuradiśi tādṛśa-

-ratnaparisphuritaparvanavakāḍhyam |

cakrātmakaṃ śatāṅgaṃ

śatayojanamunnataṃ bhaje divyam || 117 ||

tatraiva diśi niṣaṇṇaṃ

tapanīyadhvajaparamparāśliṣṭam |

rathamaparaṃ ca bhavānyā

racayāmo manasi ratnamayacūḍam || 118 ||

bhavanasya vāyubhāge

pariṣkṛto vividhavaijayantībhiḥ |

racayatu mudaṃ rathendraḥ

saciveśānyāḥ samastavandyāyāḥ || 119 ||

kurmo'dhihṛdayamaniśaṃ

kroḍāsyāyāḥ śatāṅgamūrdhanyam |

rudradiśi ratnadhāmno

ruciraśalākāprapañcakañcukitam || 120 ||

parito devīdhāmnaḥ

praṇītavāsā manusvarūpiṇyaḥ |

kurvantu raśmimālā-

-kṛtayaḥ kuśalāni devatā nikhilāḥ || 121 ||

prāgdvārasya bhavānī-

-dhāmnaḥ pārśvadvayāracitavāse |

mātaṅgīkiṭimukhyau

maṇisadane manasi bhāvayāmi ciram || 122 ||

yojanayugalābhogā

tatkrośapariṇāhayaiva bhittyā ca |

cintāmaṇigṛhabhūmi-

-rjīyādāmnāyamayacaturdvārā || 123 ||

dvāre dvāre dhāmnaḥ

piṇḍībhūtā navīnabimbābhāḥ |

vidadhatu vipulāṃ kīrtiṃ

divyā lauhityasiddhyo devyaḥ || 124 ||

maṇisadanasyāntarato

mahanīye ratnavedikāmadhye |

bindumayacakramīḍe

pīṭhānāmupari viracitāvāsam || 125 ||

cakrāṇāṃ sakalānāṃ

prathamamadhaḥ sīmaphalakavāstavyāḥ |

aṇimādisiddhayo mā-

-mavantu devī prabhāsvarūpiṇyaḥ || 126 ||

aṇimādisiddhiphalaka-

-syoparihariṇāṅkakhaṇḍakṛtacūḍāḥ |

bhadraṃ pakṣmalayantu

brāhmīpramukhāśca mātaro'smākam || 127 ||

tasyopari maṇiphalake

tāruṇyottuṅgapīnakucabhārāḥ |

saṅkṣobhiṇīpradhānāḥ

bhrānti vidrāvayantu daśa mudrāḥ || 128 ||

phalakatrayasvarūpe

pṛthule trailokyamohane cakre |

dīvyantu prakaṭākhyā-

-stāsāṃ kartrīṃ ca bhagavatī tripurā || 129 ||

tadupari vipule dhiṣṇye

taraladṛśastaruṇakokanadabhāsaḥ |

kāmākarṣiṇyādyāḥ

kalaye devīḥ kalādharaśikhaṇḍāḥ || 130 ||

sarvāśāparipūrakacakre-

-'smin guptayoginīsevyāḥ |

tripureśī mama duritaṃ

tudyāt kaṇṭhāvalambimaṇihārā || 131 ||

tasyopari maṇipīṭhe

tāmrāmbhoruhadalaprabhāśoṇāḥ |

dhyāyāmyanaṅgakusumā-

-pramukhā devīśca vidhṛtakūrpāsāḥ || 132 ||

saṅkṣobhakārake'smiṃ-

-ścakre śrītripurasundarī sākṣāt |

goptrī guptatarākhyāḥ

gopāyatu māṃ kṛpārdrayā dṛṣṭyā || 133 ||

saṅkṣobhiṇīpradhānāḥ

śaktīstasyordhvavalayakṛtavāsāḥ |

ālolanīlaveṇī-

-rantaḥ kalayāmi yauvanonmattāḥ || 134 ||

saubhāgyadāyake'smiṃ-

-ścakreśī tripuravāsinī jīyāt |

śaktīśca sampradāyābhidhāḥ

samastāḥ pramodayantvaniśam || 135 ||

maṇipīṭhopari tāsāṃ

mahati caturhastavistṛte valaye |

santataviracitavāsāḥ

śaktīḥ kalayāmi sarvasiddhimukhāḥ || 136 ||

sarvārthasādhakākhye

cakre'muṣmin samastaphaladātrī |

tripurā śrīrmama kuśalaṃ

diśatāduttīrṇayoginīsevyā || 137 ||

tāsāṃ nilayasyopari

dhiṣṇye kausumbhakañcukamanojñāḥ |

sarvājñādyāḥ devyaḥ

sakalāḥ sampādayantu mama kīrtim || 138 ||

cakre samastarakṣā-

-karanāmnyasmin samastajanasevyām |

manasi nigarbhāsahitāṃ

manye śrītripuramālinīṃ devīm || 139 ||

sarvajñāsadanasyopari

cakre vipule samākalitagehāḥ |

vande vaśinīmukhyāḥ

śaktīḥ sindūrareṇurucaḥ || 140 ||

śrīsarvarogaharākhya-

-cakre'smiṃstripurapūrvikāṃ siddhām |

vande rahasyanāmnā

vedyābhiḥ śaktibhiḥ sadā sevyām || 141 ||

vaśinīgṛhopariṣṭā-

-dviṃśatihastonnate mahāpīṭhe |

śamayantu śatrubṛndaṃ

śastrāṇyastrāṇi cādidampatyoḥ || 142 ||

śastrasadanopariṣṭā-

-dvalaye valavairiratnasaṅghaṭite |

kāmeśvarīpradhānāḥ

kalaye devīḥ samastajanavandyāḥ || 143 ||

cakre'tra sarvasiddhiprada-

-nāmani sarvaphaladātrī |

tripurāmbāvatu satataṃ

parāpararahasyayoginīsevyā || 144 ||

kāmeśvarīgṛhoparivalaye

vividhamanusampradāyajñāḥ |

catvāro yuganāthā

jayantu mitreśapūrvakāḥ guravaḥ || 145 ||

nāthabhavanopariṣṭā-

-nnānāratnacayamedure pīṭhe |

kāmeśyādyā nityāḥ

kalayantu mudaṃ tithisvarūpiṇyaḥ || 146 ||

nityāsadanasyopari

nirmalamaṇinivahaviracite dhiṣṇye |

kuśalaṃ ṣaḍaṅgadevyaḥ

kalayantvasmākamuttaralanetrāḥ || 147 ||

sadanasyopari tāsāṃ

sarvānandamayanāmake bindau |

pañcabrahmākārāṃ

mañcaṃ praṇamāmi maṇigaṇākīrṇam || 148 ||

parito maṇimañcasya

pralambamānā niyantritā pāśaiḥ |

māyāmayī javanikā

mama duritaṃ haratu mecakacchāyā || 149 ||

mañcasyopari lamba-

-nmadanīpunnāgamālikābharitam |

harigopamayavitānaṃ

haratādālasyamaniśamasmākam || 150 ||

paryaṅkasya bhajāmaḥ

pādānbimbāmbudenduhemarucaḥ |

ajaharirudreśamayā-

-nanalāsuramāruteśakoṇasthān || 151 ||

phalakaṃ sadāśivamayaṃ

praṇaumi sindūrareṇukiraṇābham |

ārabhyāṅgeśīnāṃ

sadanātkalitaṃ ca ratnasopānam || 152 ||

paṭṭopadhānagaṇḍaka-

-catuṣṭayasphuritapāṭalāstaraṇam |

paryaṅkopari ghaṭitaṃ

pātu ciraṃ haṃsatūlaśayanaṃ naḥ || 153 ||

tasyopari nivasantaṃ

tāruṇyaśrīniṣevitaṃ satatam |

āvṛntapullahallaka-

-marīcikāpuñjamañjulacchāyam || 154 ||

sindūraśoṇavasanaṃ

śītāṃśustabakacumbitakirīṭam |

kuṅkumatilakamanohara-

-kuṭilālikahasitakumudabandhuśiśum || 155 ||

pūrṇendubimbavadanaṃ

phullasarojātalocanatritayam |

taralāpāṅgataraṅgita-

-śapharāṅkanaśāstrasampradāyārtham || 156 ||

maṇimayakuṇḍalapuṣya-

-nmarīcikallolamāṃsalakapolam |

vidrumasahodarādhara-

-visṛmarasusmitakiśorasañcāram || 157 ||

āmodikusumaśekhara-

-mānīlabhrūlatāyugamanojñam |

vīṭīsaurabhavīcī-

-dviguṇitavaktrāravindasaurabhyam || 158 ||

pāśāṅkuśekṣucāpa-

-prasavaśarasphuritakomalakarābjam |

kāśmīrapaṅkilāṅgaṃ

kāmeśaṃ manasi kurmahe satatam || 159 ||

tasyāṅkabhuvi niṣaṇṇāṃ

taruṇakadambaprasūnakiraṇābhām |

śītāṃśukhaṇḍacūḍāṃ

sīmantanyastasāndrasindūrām || 160 ||

kuṅkumalalāmabhāsva-

-nniṭilāṃ kuṭilataracillikāyugalām |

nālīkatulyanayanāṃ

nāsāñcalanaṭitamauktikābharaṇām || 161 ||

aṅkuritamandahāsa-

-maruṇādharakāntivijitabimbābhām |

kastūrīmakarīyuta-

-kapolasaṅkrāntakanakatāṭaṅkām || 162 ||

karpūrasāndravīṭī-

-kabalitavadanāravindakamanīyām |

kambusahodarakaṇṭha-

-pralambamānācchamauktikakalāpām || 163 ||

kahlāradāmakomala-

-bhujayugalasphuritaratnakeyūrām |

karapadmamūlavilasa-

-tkāñcanamayakaṭakavalayasandohām || 164 ||

pāṇicatuṣṭayavilasa-

-tpāśāṅkuśapuṇḍracāpapuṣpāstrām |

kūlaṅkaṣakucaśikharāṃ

kuṅkumakardamitaratnakūrpāsām || 165 ||

aṇudāyādavalagnā-

-mambudaśobhāsanābhiromalatām |

māṇikyakhacitakāñcī-

-marīcikākrāntamāṃsalanitambām || 166 ||

karabhorukāṇḍayugalāṃ

jaṅghājitakāmajaitratūṇīrām |

prapadaparibhūtakūrmāṃ

pallavasacchāyapadayugamanojñām || 167 ||

kamalabhavakañjalocana-

-kirīṭaratnāṃśurañjitapadābjām |

unmastakānukampā-

-muttaralāpāṅgapoṣitānaṅgām || 168 ||

ādimarasāvalambā-

-manidaṃ prathamoktivallarīkalikām |

ābrahmakīṭajananī-

-mantaḥ kalayāmi sundarīmaniśam || 169 ||

kastu kṣitau paṭīyā-

-nvastu stotuṃ śivāṅkavāstavyam |

astu cirantanasukṛtaiḥ

prastutakāmyāya tanmama purastāt || 170 ||

prabhusammitoktigamyaṃ

paramaśivotsaṅgatuṅgaparyaṅkam |

tejaḥ kiñcana divyaṃ

purato me bhavatu puṇḍrakodaṇḍam || 171 ||

madhurimabharitaśarāsaṃ

makarandasyandimārgaṇodāram |

kairaviṇīviṭacūḍaṃ

kaivalyāyāstu kiñcana maho naḥ || 172 ||

akṣudramikṣucāpaṃ

parokṣamavalagnasīmni tryakṣam |

kṣapayatu me kṣemetara-

-mukṣarathapremapakṣmalaṃ tejaḥ || 173 ||

bhṛṅgarucisaṅgarakarāpāṅgaṃ

śṛṅgāratuṅgamaruṇāṅgam |

maṅgalamabhaṅguraṃ me

ghaṭayatu gaṅgādharāṅgasaṅgi mahaḥ || 174 ||

prapadājitakūrmamūrjita-

-karuṇaṃ bharmarucinirmathanadeham |

śritavarma marma śambhoḥ

kiñcana mama narma śarma nirmātu || 175 ||

kālakuralālikālima-

-kandalavijitāli vidhṛtamaṇivāli |

milatu hṛdi pulinajaghanaṃ

bahulitagalagaralakeli kimapi mahaḥ || 176 ||

kuṅkumatilakitaphālā

kuruvindacchāyapāṭaladukūlā |

karuṇāpayodhivelā

kācana citte cakāstu me līlā || 177 ||

puṣpandhayaruciveṇyaḥ

pulinābhogatrapākaraśreṇyaḥ |

jīyāsurikṣupāṇyaḥ

kāścana kāmārikelisākṣiṇyaḥ || 178 ||

tapanīyāṃśukabhāṃsi

drākṣāmādhuryanāstikavacāṃsi |

katicana śucaṃ mahāṃsi

kṣapayatu kapālitoṣitamanāṃsi || 179 ||

asitakacamāyatākṣaṃ

kusumaśaraṃ kūlamudvahakṛpārdram |

ādimarasādhidaivata-

-mantaḥ kalaye harāṅkavāsi mahaḥ || 180 ||

karṇopāntataraṅgita-

-kaṭākṣavispandikaṇṭhadaghnakṛpām |

kāmeśvarāṅkanilayāṃ

kāmapi vidyāṃ purātanīṃ kalaye || 181 ||

aravindakāntyaruntuda-

-vilocanadvandvasundaramukhendu |

chandaḥ kandalamandira-

-mantaḥpuramainduśekharaṃ vande || 182 ||

bimbinikurambaḍambara-

-viḍambakacchāyamambaravalagnam |

kambugalamambudakucaṃ

bimbokaṃ kamapi cumbatu mano me || 183 ||

kamapi kamanīyarūpaṃ

kalayāmyantaḥ kadambakusumāḍhyam |

campakarucirasuveṣaiḥ

sampāditakāntyalaṅkṛtadigantam || 184 ||

śampārucibhara-

-garhāsampādakakāntikavacitadigantam |

siddhāntaṃ nigamānāṃ

śuddhāntaṃ kimapi śūlinaḥ kalaye || 185 ||

udyaddinakaraśoṇā-

-nutpalabandhustanandhayāpīḍān |

karakalitapuṇḍracāpā-

-nkalaye kānapi kapardinaḥ prāṇān || 186 ||

raśanālasajjaghanayā

rasanājīvātucāpabhāsurayā |

ghrāṇāyuṣkaraśarayā

ghrātaṃ cittaṃ kayāpi vāsanayā || 187 ||

sarasijasahayudhvadṛśā

śampālatikāsanābhivigrahayā |

bhāsā kayāpi ceto

nāsāmaṇiśobhivadanayā bharitam || 188 ||

navayāvakābhasicayānvitayā

gajayānayā dayāparayā |

dhṛtayāminīśakalayā

dhiyā kayāpi kṣatāmayā hi vayam || 189 ||

alamalamakusumabāṇai-

-rabimbaśoṇairapuṇḍrakodaṇḍaiḥ |

akumudabāndhavacūḍai-

-ranyairiha jagati daivataṃ manyaiḥ || 190 ||

kuvalayasadṛkṣanayanaiḥ

kulagirikūṭasthabandhukucabhāraiḥ |

karuṇāspandikaṭākṣaiḥ

kavacitacitto'smi katipayaiḥ kutukaiḥ || 191 ||

natajanasulabhāya namo

nālīkasanābhilocanāya namaḥ |

nanditagiriśāya namo

mahase navanīpapāṭalāya namaḥ || 192 ||

kādambakusumadāmne

kāyacchāyākaṇāyitāryamṇe |

sīmne cirantanagirāṃ

bhūmne kasmaicidādade praṇatim || 193 ||

kuṭilakabarībharebhyaḥ

kuṅkumasabrahmacārikiraṇebhyaḥ |

kūlaṅkaṣastanebhyaḥ

kurmaḥ praṇatiṃ kulādrikutukebhyaḥ || 194 ||

kokanadaśoṇacaraṇā-

-tkomalakuralālivijitaśaivālāt |

utpalasagandhinayanā-

-durarīkurmo na devatamānyām || 195 ||

āpāṭalādharāṇā-

-mānīlasnigdhabarbarakacānām |

āmnāyajīvanānā-

-mākūtānāṃ harasya dāso'ham || 196 ||

puṅkhitavilāsahāsa-

-sphuritāsu purāhitāṅkanilayāsu |

magnaṃ mano madīyaṃ

kāsvapi kāmārijīvanāḍīṣu || 197 ||

lalitā pātu śiro me

lalāṭamambā ca madhumatīrūpā |

bhrūyugmaṃ ca bhavānī

puṣpaśarā pātu locanadvandvam || 198 ||

pāyānnāsāṃ bālā

subhagā dantāṃśca sundarī jihvām |

adharoṣṭhamādiśakti-

-ścakreśī pātu me ciraṃ cibukam || 199 ||

kāmeśvarī ca karṇau

kāmākṣī pātu gaṇḍayoryugalam |

śṛṅgāranāyikāvyā-

-dvadanaṃ siṃhāsaneśvarī ca galam || 200 ||

skandaprasūśca pātu

skandhau bāhū ca pāṭalāṅgī me |

pāṇī ca padmanilayā

pāyādaniśaṃ nakhāvalīrvijayā || 201 ||

kodaṇḍinī ca vakṣaḥ

kukṣiṃ cāvyāt kulācalatanūjā |

kalyāṇī ca valagnaṃ

kaṭiṃ ca pāyātkalādharaśikhaṇḍā || 202 ||

ūrudvayaṃ ca pāyā-

-dumā mṛḍānī ca jānunī rakṣet |

jaṅghe ca ṣoḍaśī me

pāyāt pādau ca pāśasṛṇihastā || 203 ||

prātaḥ pātu parā māṃ

madhyāhne pātu maṇigṛhādhīśā |

śarvāṇyavatu ca sāyaṃ

pāyādrātrau ca bhairavī sākṣāt || 204 ||

bhāryāṃ rakṣatu gaurīṃ

pāyāt putrāṃśca bindugṛhapīṭhā |

śrīvidyā ca yaśo me

śīlaṃ cāvyācciraṃ mahārājñī || 205 ||

pavanamayi pāvakamayi

kṣoṇīmayi gaganamayi kṛpīṭamayi |

ravimayi śaśimayi diṅmayi

samayamayi prāṇamayi śive pāhi || 206 ||

kāli kapālini śūlini

bhairavi mātaṅgi pañcami tripure |

vāgdevi vindhyavāsini

bāle bhuvaneśi pālaya ciraṃ mām || 207 ||

abhinavasindūrābhā-

-mamba tvāṃ cintayanti ye hṛdaye |

upari nipatanti teṣā-

-mutpalanayanākaṭākṣakallolāḥ || 208 ||

vargāṣṭakamilitābhi-

-rvaśinīmukhyābhirāvṛtāṃ bhavatīm |

cintayatāṃ sitavarṇāṃ

vāco niryāntyayatnato vadanāt || 209 ||

kanakaśalākāgaurīṃ

karṇavyālolakuṇḍaladvitayām |

prahasitamukhīṃ ca bhavatīṃ

dhyāyanto ye ta eva bhūdhanadāḥ || 210 ||

śīrṣāmbhoruhamadhye

śītalapīyūṣavarṣiṇīṃ bhavatīm |

anudinamanucintayatā-

-māyuṣyaṃ bhavati puṣkalamavanyām || 211 ||

madhurasmitāṃ madāruṇanayanāṃ

mātaṅgakumbhavakṣojām |

candravataṃsinīṃ tvāṃ

savidhe paśyanti sukṛtinaḥ kecit || 212 ||

lalitāyāḥ stavaratnaṃ

lalitapadābhiḥ praṇītamāryābhiḥ |

pratidinamavanau paṭhatāṃ

phalāni vaktuṃ pragalbhate saiva || 213 ||

sadasadanugrahanigraha-

-gṛhītamunivigraho bhagavān |

sarvāsāmupaniṣadāṃ

durvāsā jayati deśikaḥ prathamaḥ || 214 ||

iti maharṣidurvāsaḥ viracitaṃ śrīlalitāstavaratnam |