Shri Gurugita Prathamodhyayah

ॐ

ஶ்ரீ குருகீதா ப்ரதமோத்யாயஃ

Gita Tamil

ஶ்ரீகுருப்யோ நமஃ ।

ஹரிஃ ஓம் ।

த்யாநம்

ஹம்ஸாப்யாம் பரிவ்ரு'த்தபத்ரகமலைர்திவ்யைர்ஜகத்காரணம்

விஶ்வோத்கீர்ணமநேகதேஹநிலயம் ஸ்வச்சந்தமாநந்தகம் ।

ஆத்யந்தைகமகண்டசித்கநரஸம் பூர்ணம் ஹ்யநந்தம் ஶுபம்

ப்ரத்யக்ஷாக்ஷரவிக்ரஹம் குருபதம் த்யாயேத்விபும் ஶாஶ்வதம் ॥

அத ப்ரதமோऽத்யாயஃ ॥

அசிந்த்யாவ்யக்தரூபாய நிர்குணாய கணாத்மநே ।

ஸமஸ்தஜகதாதாரமூர்தயே ப்ரஹ்மணே நமஃ ॥ 1 ॥

ரு'ஷய ஊசுஃ ।

ஸூத ஸூத மஹாப்ராஜ்ஞ நிகமாகமபாரக ।

குருஸ்வரூபமஸ்மாகம் ப்ரூஹி ஸர்வமலாபஹம் ॥ 2 ॥

யஸ்ய ஶ்ரவணமாத்ரேண தேஹீ துஃகாத்விமுச்யதே ।

யேந மார்கேண முநயஃ ஸர்வஜ்ஞத்வம் ப்ரபேதிரே ॥ 3 ॥

யத்ப்ராப்ய ந புநர்யாதி நரஃ ஸம்ஸாரபந்தநம் ।

ததாவிதம் பரம் தத்த்வம் வக்தவ்யமதுநா த்வயா ॥ 4 ॥

குஹ்யாத்குஹ்யதமம் ஸாரம் குருகீதா விஶேஷதஃ ।

த்வத்ப்ரஸாதாச்ச ஶ்ரோதவ்யா தத்ஸர்வம் ப்ரூஹி ஸூத நஃ ॥ 5 ॥

இதி ஸம்ப்ரார்திதஃ ஸூதோ முநிஸங்கைர்முஹுர்முஹுஃ ॥

குதூஹலேந மஹதா ப்ரோவாச மதுரம் வசஃ ॥ 6 ॥

ஸூத உவாச ।

ஶ்ருணுத்வம் முநயஃ ஸர்வே ஶ்ரத்தயா பரயா முதா ।

வதாமி பவரோகக்நீம் கீதாம் மாத்ரு'ஸ்வரூபிணீம் ॥ 7 ॥

புரா கைலாஸஶிகரே ஸித்தகந்தர்வஸேவிதே ।

தத்ர கல்பலதாபுஷ்பமந்திரேऽத்யந்தஸுந்தரே ॥ 8 ॥

வ்யாக்ராஜிநே ஸமாஸீநம் ஶுகாதிமுநிவந்திதம் ।

போதயந்தம் பரம் தத்த்வம் மத்யே முநிகணே க்வசித் ॥ 9 ॥

ப்ரணம்ரவதநா ஶஶ்வந்நமஸ்குர்வந்தமாதராத் ।

த்ரு'ஷ்ட்வா விஸ்மயமாபந்ந பார்வதீ பரிப்ரு'ச்சதி ॥ 10 ॥

பார்வத்யுவாச ।

ௐ நமோ தேவ தேவேஶ பராத்பர ஜகத்குரோ ।

த்வாம் நமஸ்குர்வதே பக்த்யா ஸுராஸுரநராஃ ஸதா ॥ 11 ॥

விதிவிஷ்ணுமஹேந்த்ராத்யைர்வந்த்யஃ கலு ஸதா பவாந் ।

நமஸ்கரோஷி கஸ்மை த்வம் நமஸ்காராஶ்ரயஃ கில ॥ 12 ॥

த்ரு'ஷ்ட்வைதத்கர்ம விபுலமாஶ்சர்ய ப்ரதிபாதி மே ।

கிமேதந்ந விஜாநேऽஹம் க்ரு'பயா வத மே ப்ரபோ ॥ 13 ॥

பகவந் ஸர்வதர்மஜ்ஞ வ்ரதாநாம் வ்ரதநாயகம் ।

ப்ரூஹி மே க்ரு'பயா ஶம்போ குருமாஹாத்ம்யமுத்தமம் ॥ 14 ॥

கேந மார்கேண போ ஸ்வாமிந் தேஹீ ப்ரஹ்மமயோ பவேத் ।

தத்க்ரு'பாம் குரு மே ஸ்வாமிந் நமாமி சரணௌ தவ ॥ 15 ॥

இதி ஸம்ப்ரார்திதஃ ஶஶ்வந்மஹாதேவோ மஹேஶ்வரஃ ।

ஆநந்தபரிதஃ ஸ்வாந்தே பார்வதீமிதமப்ரவீத் ॥ 16 ॥

ஶ்ரீ மஹாதேவ உவாச ।

ந வக்தவ்யமிதம் தேவி ரஹஸ்யாதிரஹஸ்யகம் ।

ந கஸ்யாபி புரா ப்ரோக்தம் த்வத்பக்த்யர்தம் வதாமி தத் ॥ 17 ॥

மம ரூபாऽஸி தேவி த்வமதஸ்தத்கதயாமி தே ।

லோகோபகாரகஃ ப்ரஶ்நோ ந கேநாபி க்ரு'தஃ புரா ॥ 18 ॥

யஸ்ய தேவே பரா பக்திர்யதா தேவே ததா குரௌ ।

தஸ்யைதே கதிதா ஹ்யர்தாஃ ப்ரகாஶந்தே மஹாத்மநஃ ॥ 19 ॥

யோ குருஃ ஸ ஶிவஃ ப்ரோக்தோ யஃ ஶிவஃ ஸ குருஃ ஸ்ம்ரு'தஃ ।

விகல்பம் யஸ்து குர்வீத ஸ நரோ குருதல்பகஃ ॥ 20 ॥

துர்லபம் த்ரிஷு லோகேஷு தச்ச்ரு'ணுஷ்வ வதாம்யஹம் ।

குருப்ரஹ்ம விநா நாந்யஃ ஸத்யம் ஸத்யம் வராநநே ॥ 21 ॥

வேதஶாஸ்த்ரபுராணாநி சேதிஹாஸாதிகாநி ச ।

மந்த்ரயந்த்ராதிவித்யாநாம் மோஹநோச்சாடநாதிகம் ॥ 22 ॥

ஶைவஶாக்தாகமாதீநி ஹ்யந்யே ச பஹவோ மதாஃ ।

அபப்ரம்ஶாஃ ஸமஸ்தாநாம் ஜீவாநாம் ப்ராந்தசேதஸாம் ॥ 23 ॥

ஜபஸ்தபோ வ்ரதம் தீர்தம் யஜ்ஞோ தாநம் ததைவ ச ।

குருதத்த்வமவிஜ்ஞாய ஸர்வம் வ்யர்தம் பவேத்ப்ரியே ॥ 24 ॥

குருபுத்த்யாத்மநோ நாந்யத் ஸத்யம் ஸத்யம் வராநநே ।

தல்லாபார்தம் ப்ரயத்நஸ்து கர்தவ்யஶ்ச மநீஷிபிஃ ॥ 25 ॥

கூடாவித்யா ஜகந்மாயா தேஹஶ்சாஜ்ஞாநஸம்பவஃ ।

விஜ்ஞாநம் யத்ப்ரஸாதேந குருஶப்தேந கத்யதே ॥ 26 ॥

யதங்க்ரிகமலத்வந்த்வம் த்வந்த்வதாபநிவாரகம் ।

தாரகம் பவஸிந்தோஶ்ச தம் குரும் ப்ரணமாம்யஹம் ॥ 27 ॥

தேஹீ ப்ரஹ்ம பவேத்யஸ்மாத் த்வத்க்ரு'பார்தம் வதாமி தத் ।

ஸர்வபாபவிஶுத்தாத்மா ஶ்ரீகுரோஃ பாதஸேவநாத் ॥ 28 ॥

ஸர்வதீர்தாவகாஹஸ்ய ஸம்ப்ராப்நோதி பலம் நரஃ ।

குரோஃ பாதோதகம் பீத்வா ஶேஷம் ஶிரஸி தாரயந் ॥ 29 ॥

ஶோஷணம் பாபபங்கஸ்ய தீபநம் ஜ்ஞாநதேஜஸஃ ।

குரோஃ பாதோதகம் ஸம்யக் ஸம்ஸாரார்ணவதாரகம் ॥ 30 ॥

அஜ்ஞாநமூலஹரணம் ஜந்மகர்மநிவாரகம் ।

ஜ்ஞாநவைராக்யஸித்த்யர்தம் குரோஃ பாதோதகம் பிபேத் ॥ 31 ॥

குருபாதோதகம் பாநம் குரோருச்சிஷ்டபோஜநம் ।

குருமூர்தேஃ ஸதா த்யாநம் குரோர்நாம ஸதா ஜபஃ ॥ 32 ॥

ஸ்வதேஶிகஸ்யைவ ச நாமகீர்தநம்

பவேதநந்தஸ்ய ஶிவஸ்ய கீர்தநம் ।

ஸ்வதேஶிகஸ்யைவ ச நாமசிந்தநம்

பவேதநந்தஸ்ய ஶிவஸ்ய சிந்தநம் ॥ 33 ॥

யத்பாதாம்புஜரேணுர்வை கோऽபி ஸம்ஸாரவாரிதௌ ।

ஸேதுபந்தாயதே நாதம் தேஶிகம் தமுபாஸ்மஹே ॥ 34 ॥

யதநுக்ரஹமாத்ரேண ஶோகமோஹௌ விநஶ்யதஃ ।

தஸ்மை ஶ்ரீதேஶிகேந்த்ராய நமோऽஸ்து பரமாத்மநே ॥ 35 ॥

யஸ்மாதநுக்ரஹம் லப்த்வா மஹதஜ்ஞாநமுத்ஸ்ரு'ஜேத் ।

தஸ்மை ஶ்ரீதேஶிகேந்த்ராய நமஶ்சாபீஷ்டஸித்தயே ॥ 36 ॥

காஶீக்ஷேத்ரம் நிவாஸஶ்ச ஜாஹ்நவீ சரணோதகம் ।

குருர்விஶ்வேஶ்வரஃ ஸாக்ஷாத் தாரகம் ப்ரஹ்மநிஶ்சயஃ ॥ 37 ॥

குருஸேவா கயா ப்ரோக்தா தேஹஃ ஸ்யாதக்ஷயோ வடஃ ।

தத்பாதம் விஷ்ணுபாதம் ஸ்யாத் தத்ர தத்தமநஸ்ததம் ॥ 38 ॥

குருமூர்திம் ஸ்மரேந்நித்யம் குரோர்நாம ஸதா ஜபேத் ।

குரோராஜ்ஞாம் ப்ரகுர்வீத குரோரந்யம் ந பாவயேத் ॥ 39 ॥

குருவக்த்ரே ஸ்திதம் ப்ரஹ்ம ப்ராப்யதே தத்ப்ரஸாததஃ ।

குரோர்த்யாநம் ஸதா குர்யாத் குலஸ்த்ரீ ஸ்வபதிம் யதா ॥ 40 ॥

ஸ்வாஶ்ரமம் ச ஸ்வஜாதிம் ச ஸ்வகீர்திம் புஷ்டிவர்தநம் ।

ஏதத்ஸர்வம் பரித்யஜ்ய குருமேவ ஸமாஶ்ரயேத் ॥ 41 ॥

அநந்யாஶ்சிந்தயந்தோ யே ஸுலபம் பரமம் ஸுகம் ।

தஸ்மாத்ஸர்வப்ரயத்நேந குரோராராதநம் குரு ॥ 42 ॥

குருவக்த்ரே ஸ்திதா வித்யா குருபக்த்யா ச லப்யதே ।

த்ரைலோக்யே ஸ்புடவக்தாரோ தேவர்ஷிபித்ரு'மாநவாஃ ॥ 43 ॥

குகாரஶ்சாந்தகாரோ ஹி ருகாரஸ்தேஜ உச்யதே ।

அஜ்ஞாநக்ராஸகம் ப்ரஹ்ம குருரேவ ந ஸம்ஶயஃ ॥ 44 ॥

குகாரஶ்சாந்தகாரஸ்து ருகாரஸ்தந்நிரோதக்ரு'த் ।

அந்தகாரவிநாஶித்வாத்குருரித்யபிதீயதே ॥

குகாரோ பவரோகஃ ஸ்யாத் ருகாரஸ்தந்நிரோதக்ரு'த் ।

பவரோகஹரத்வாச்ச குருரித்யபிதீயதே ॥ 45 ॥

குகாரஶ்ச குணாதீதோ ரூபாதீதோ ருகாரகஃ ।

குணரூபவிஹீநத்வாத் குருரித்யபிதீயதே ॥ 46 ॥

குகாரஃ ப்ரதமோ வர்ணோ மாயாதிகுணபாஸகஃ ।

ருகாரோऽஸ்தி பரம் ப்ரஹ்ம மாயாப்ராந்திவிமோசகம் ॥ 47 ॥

ஏவம் குருபதம் ஶ்ரேஷ்டம் தேவாநாமபி துர்லபம் ।

ஹாஹாஹூஹூகணைஶ்சைவ கந்தர்வாத்யைஶ்ச பூஜிதம் ॥ 48 ॥

த்ருவம் தேஷாம் ச ஸர்வேஷாம் நாஸ்தி தத்த்வம் குரோஃ பரம் ।

குரோராராதநம் குர்யாத் ஸ்வஜீவத்வம் நிவேதயேத் ॥ 49 ॥

ஆஸநம் ஶயநம் வஸ்த்ரம் வாஹநம் பூஷணாதிகம் ।

ஸாதகேந ப்ரதாதவ்யம் குருஸந்தோஷகாரணம் ॥ 50 ॥

கர்மணா மநஸா வாசா ஸர்வதாऽऽராதயேத்குரும் ।

தீர்கதண்டம் நமஸ்க்ரு'த்ய நிர்லஜ்ஜோ குருஸந்நிதௌ ॥ 51 ॥

ஶரீரமிந்த்ரியம் ப்ராணமர்தஸ்வஜநபாந்தவாந் ।

ஆத்மதாராதிகம் ஸர்வம் ஸத்குருப்யோ நிவேதயேத் ॥ 52 ॥

குருரேகோ ஜகத்ஸர்வம் ப்ரஹ்மவிஷ்ணுஶிவாத்மகம் ।

குரோஃ பரதரம் நாஸ்தி தஸ்மாத்ஸம்பூஜயேத்குரும் ॥ 53 ॥

ஸர்வஶ்ருதிஶிரோரத்நவிராஜிதபதாம்புஜம் ।

வேதாந்தார்தப்ரவக்தாரம் தஸ்மாத் ஸம்பூஜயேத்குரும் ॥ 54 ॥

யஸ்ய ஸ்மரணமாத்ரேண ஜ்ஞாநமுத்பத்யதே ஸ்வயம் ।

ஸ ஏவ ஸர்வஸம்பத்திஃ தஸ்மாத்ஸம்பூஜயேத்குரும் ॥ 55 ॥

[பாடபேதஃ -

க்ரு'மிகோடிபிராவிஷ்டம் துர்கந்தமலமூத்ரகம் ।

ஶ்லேஷ்மரக்தத்வசாமாம்ஸைர்நத்தம் சைதத்வராநநே ॥

]

க்ரு'மிகோடிபிராவிஷ்டம் துர்கந்தகுலதூஷிதம் ।

அநித்யம் துஃகநிலயம் தேஹம் வித்தி வராநநே ॥ 56 ॥

ஸம்ஸாரவ்ரு'க்ஷமாரூடாஃ பதந்தி நரகார்ணவே ।

யஸ்தாநுத்தரதே ஸர்வாந் தஸ்மை ஶ்ரீகுரவே நமஃ ॥ 57 ॥

குருர்ப்ரஹ்மா குருர்விஷ்ணுர்குருர்தேவோ மஹேஶ்வரஃ ।

குருஸ்ஸாக்ஷாத் பரப்ரஹ்ம தஸ்மை ஶ்ரீகுரவே நமஃ ॥ 58 ॥

அஜ்ஞாநதிமிராந்தஸ்ய ஜ்ஞாநாஞ்ஜநஶலாகயா ।

சக்ஷுருந்மீலிதம் யேந தஸ்மை ஶ்ரீகுரவே நமஃ ॥ 59 ॥

அகண்டமண்டலாகாரம் வ்யாப்தம் யேந சராசரம் ।

தத்பதம் தர்ஶிதம் யேந தஸ்மை ஶ்ரீகுரவே நமஃ ॥ 60 ॥

ஸ்தாவரம் ஜங்கமம் வ்யாப்தம் யத்கிஞ்சித்ஸசராசரம் ।

த்வம் பதம் தர்ஶிதம் யேந தஸ்மை ஶ்ரீகுரவே நமஃ ॥ 61 ॥

சிந்மயவ்யாபிதம் ஸர்வம் த்ரைலோக்யம் ஸசராசரம் ।

அஸித்வம் தர்ஶிதம் யேந தஸ்மை ஶ்ரீகுரவே நமஃ ॥ 62 ॥

நிமிஷாந்நிமிஷார்தாத்வா யத்வாக்யாத்வை விமுச்யதே ।

ஸ்வாத்மாநம் ஶிவமாலோக்ய தஸ்மை ஶ்ரீகுரவே நமஃ ॥ 63 ॥

சைதந்யம் ஶாஶ்வதம் ஶாந்தம் வ்யோமாதீதம் நிரஞ்ஜநம் ।

நாதபிந்துகலாதீதம் தஸ்மை ஶ்ரீகுரவே நமஃ ॥ 64 ॥

நிர்குணம் நிர்மலம் ஶாந்தம் ஜங்கமம் ஸ்திரமேவ ச ।

வ்யாப்தம் யேந ஜகத்ஸர்வம் தஸ்மை ஶ்ரீகுரவே நமஃ ॥ 65 ॥

ஸ பிதா ஸ ச மே மாதா ஸ பந்துஃ ஸ ச தேவதா ।

ஸம்ஸாரமோஹநாஶாய தஸ்மை ஶ்ரீகுரவே நமஃ ॥ 66 ॥

யத்ஸத்த்வேந ஜகத்ஸத்த்வம் யத்ப்ரகாஶேந பாதி தத் ।

யதாநந்தேந நந்தந்தி தஸ்மை ஶ்ரீகுரவே நமஃ ॥ 67 ॥

யஸ்மிந் ஸ்திதமிதம் ஸர்வம் பாதி யத்பாநரூபதஃ ।

ப்ரியம் புத்ராதி யத்ப்ரீத்யா தஸ்மை ஶ்ரீகுரவே நமஃ ॥ 68 ॥

யேநேதம் தர்ஶிதம் தத்த்வம் சித்தசைத்யாதிகம் ததா ।

ஜாக்ரத்ஸ்வப்நஸுஷுப்த்யாதி தஸ்மை ஶ்ரீகுரவே நமஃ ॥ 69 ॥

யஸ்ய ஜ்ஞாநமிதம் விஶ்வம் ந த்ரு'ஶ்யம் பிந்நபேததஃ ।

ஸதைகரூபரூபாய தஸ்மை ஶ்ரீகுரவே நமஃ ॥ 70 ॥

யஸ்ய ஜ்ஞாதம் மதம் தஸ்ய மதம் யஸ்ய ந வேத ஸஃ ।

அநந்யபாவபாவாய தஸ்மை ஶ்ரீகுரவே நமஃ ॥ 71 ॥

யஸ்மை காரணரூபாய கார்யரூபேண பாதி யத் ।

கார்யகாரணரூபாய தஸ்மை ஶ்ரீகுரவே நமஃ ॥ 72 ॥

நாநாரூபமிதம் விஶ்வம் ந கேநாப்யஸ்தி பிந்நதா ।

கார்யகாரணரூபாய தஸ்மை ஶ்ரீகுரவே நமஃ ॥ 73 ॥

ஜ்ஞாநஶக்திஸமாரூடதத்த்வமாலாவிபூஷிணே ।

புக்திமுக்திப்ரதாத்ரே ச தஸ்மை ஶ்ரீகுரவே நமஃ ॥ 74 ॥

அநேகஜந்மஸம்ப்ராப்தகர்மபந்தவிதாஹிநே ।

ஜ்ஞாநாநலப்ரபாவேந தஸ்மை ஶ்ரீகுரவே நமஃ ॥ 75 ॥

ஶோஷணம் பவஸிந்தோஶ்ச தீபநம் க்ஷரஸம்பதாம் ।

குரோஃ பாதோதகம் யஸ்ய தஸ்மை ஶ்ரீகுரவே நமஃ ॥ 76 ॥

ந குரோரதிகம் தத்த்வம் ந குரோரதிகம் தபஃ ।

ந குரோரதிகம் ஜ்ஞாநம் தஸ்மை ஶ்ரீகுரவே நமஃ ॥ 77 ॥

மந்நாதஃ ஶ்ரீஜகந்நாதோ மத்குருஃ ஶ்ரீஜகத்குருஃ ।

மமாऽऽத்மா ஸர்வபூதாத்மா தஸ்மை ஶ்ரீகுரவே நமஃ ॥ 78 ॥

குருராதிரநாதிஶ்ச குருஃ பரமதைவதம் ।

குருமந்த்ரஸமோ நாஸ்தி தஸ்மை ஶ்ரீகுரவே நமஃ ॥ 79 ॥

ஏக ஏவ பரோ பந்துர்விஷமே ஸமுபஸ்திதே ।

குருஃ ஸகலதர்மாத்மா தஸ்மை ஶ்ரீகுரவே நமஃ ॥ 80 ॥

குருமத்யே ஸ்திதம் விஶ்வம் விஶ்வமத்யே ஸ்திதோ குருஃ ।

குருர்விஶ்வம் ந சாந்யோऽஸ்தி தஸ்மை ஶ்ரீகுரவே நமஃ ॥ 81 ॥

பவாரண்யப்ரவிஷ்டஸ்ய திங்மோஹப்ராந்தசேதஸஃ ।

யேந ஸந்தர்ஶிதஃ பந்தாஃ தஸ்மை ஶ்ரீகுரவே நமஃ ॥ 82 ॥

தாபத்ரயாக்நிதப்தாநாமஶாந்தப்ராணிநாம் முதே ।

குருரேவ பரா கங்கா தஸ்மை ஶ்ரீகுரவே நமஃ ॥ 83 ॥

[பாடபேதஃ -

அஜ்ஞாநேநாஹிநா க்ரஸ்தாஃ ப்ராணிநஸ்தாந் சிகித்ஸகஃ ।

வித்யாஸ்வரூபோ பகவாம்ஸ்தஸ்மை ஶ்ரீகுரவே நமஃ ॥

]

அஜ்ஞாநஸர்பதஷ்டாநாம் ப்ராணிநாம் கஶ்சிகித்ஸகஃ ।

ஸம்யக்ஜ்ஞாநமஹாமந்த்ரவேதிநம் ஸத்குரு விநா ॥ 84 ॥

ஹேதவே ஜகதாமேவ ஸம்ஸாரார்ணவஸேதவே ।

ப்ரபவே ஸர்வவித்யாநாம் ஶம்பவே குரவே நமஃ ॥ 85 ॥

த்யாநமூலம் குரோர்மூர்திஃ பூஜாமூலம் குரோஃ பதம் ।

மந்த்ரமூலம் குரோர்வாக்யம் முக்திமூலம் குரோஃ க்ரு'பா ॥ 86 ॥

ஸப்தஸாகரபர்யந்ததீர்தஸ்நாநபலம் து யத் ।

குரோஃ பாதோதபிந்தோஶ்ச ஸஹஸ்ராம்ஶே ந தத்பலம் ॥ 87 ॥

ஶிவே ருஷ்டே குருஸ்த்ராதா குரௌ ருஷ்டே ந கஶ்சந ।

லப்த்வா குலகுரும் ஸம்யக்குருமேவ ஸமாஶ்ரயேத் ॥ 88 ॥

மதுலுப்தோ யதா ப்ரு'ங்கஃ புஷ்பாத்புஷ்பாந்தரம் வ்ரஜேத் ।

ஜ்ஞாநலுப்தஸ்ததா ஶிஷ்யோ குரோர்குர்வந்தரம் வ்ரஜேத் ॥ 89 ॥

வந்தே குருபதத்வந்த்வம் வாங்மநாதீதகோசரம் ।

ஶ்வேதரக்தப்ரபாபிந்நம் ஶிவஶக்த்யாத்மகம் பரம் ॥ 90 ॥

குகாரம் ச குணாதீதம் ரூகாரம் ரூபவர்ஜிதம் ।

குணாதீதமரூபம் ச யோ தத்யாத்ஸ குருஃ ஸ்ம்ரு'தஃ ॥ 91 ॥

அத்ரிநேத்ரஃ ஶிவஃ ஸாக்ஷாத் த்விபாஹுஶ்ச ஹரிஃ ஸ்ம்ரு'தஃ ।

யோऽசதுர்வதநோ ப்ரஹ்மா ஶ்ரீகுருஃ கதிதஃ ப்ரியே ॥ 92 ॥

அயம் மயாஞ்ஜலிர்பத்தோ தயாஸாகரஸித்தயே ।

யதநுக்ரஹதோ ஜந்துஶ்சித்ரஸம்ஸாரமுக்திபாக் ॥ 93 ॥

ஶ்ரீகுரோஃ பரமம் ரூபம் விவேகசக்ஷுரக்ரதஃ ।

மந்தபாக்யா ந பஶ்யந்தி அந்தாஃ ஸூர்யோதயம் யதா ॥ 94 ॥

குலாநாம் குலகோடீநாம் தாரகஸ்தத்ர தத்க்ஷணாத் ।

அதஸ்தம் ஸத்குரும் ஜ்ஞாத்வா த்ரிகாலமபிவாதயேத் ॥ 95 ॥

ஶ்ரீநாதசரணத்வந்த்வம் யஸ்யாம் திஶி விராஜதே ।

தஸ்யாம் திஶி நமஸ்குர்யாத் பக்த்யா ப்ரதிதிநம் ப்ரியே ॥ 96 ॥

ஸாஷ்டாங்கப்ரணிபாதேந ஸ்துவந்நித்யம் குரும் பஜேத் ।

பஜநாத் ஸ்தைர்யமாப்நோதி ஸ்வஸ்வரூபமயோ பவேத் ॥ 97 ॥

தோர்ப்யாம் பத்ப்யாம் ச ஜாநுப்யாமுரஸா ஶிரஸா த்ரு'ஶா ।

மநஸா வசஸா சேதி ப்ரணாமோऽஷ்டாங்க உச்யதே ॥ 98 ॥

தஸ்யை திஶே ஸததமஞ்ஜலிரேஷ நித்யம்

ப்ரக்ஷிப்யதாம் முகரிதைர்மதுரைஃ ப்ரஸூநைஃ ।

ஜாகர்தி யத்ர பகவாந் குருசக்ரவர்தீ

விஶ்வஸ்திதிப்ரலயநாடகநித்யஸாக்ஷீ ॥ 99 ॥

அப்யஸ்தைஃ கிமு தீர்ககாலவிமலைர்வ்யாதிப்ரதைர்துஷ்கரைஃ

ப்ராணாயாமஶதைரநேககரணைர்துஃகாத்மகைர்துர்ஜயைஃ ।

யஸ்மிந்நப்யுதிதே விநஶ்யதி பலீ வாயுஃ ஸ்வயம் தத்க்ஷணாத்

ப்ராப்தும் தத்ஸஹஜஸ்வபாவமநிஶம் ஸேவேத சைகம் குரும் ॥ 100 ॥

ஜ்ஞாநம் விநா முக்திபதம் லப்யதே குருபக்திதஃ ।

குரோஸ்ஸமாநதோ நாந்யத் ஸாதநம் குருமார்கிணாம் ॥ 101 ॥

யஸ்மாத்பரதரம் நாஸ்தி நேதி நேதீதி வை ஶ்ருதிஃ ।

மநஸா வசஸா சைவ ஸத்யமாராதயேத்குரும் ॥ 102 ॥

குரோஃ க்ரு'பாப்ரஸாதேந ப்ரஹ்மவிஷ்ணுமஹேஶ்வராஃ ।

ஸாமர்த்யமபஜந் ஸர்வே ஸ்ரு'ஷ்டிஸ்தித்யந்தகர்மணி ॥ 103 ॥

தேவகிந்நரகந்தர்வாஃ பித்ரு'யக்ஷாஸ்து தும்புரஃ ।

முநயோऽபி ந ஜாநந்தி குருஶுஶ்ரூஷணே விதிம் ॥ 104 ॥

தார்கிகாஶ்சாந்தஸாஶ்சைவ தைவஜ்ஞாஃ கர்மடாஃ ப்ரியே ।

லௌகிகாஸ்தே ந ஜாநந்தி குருதத்த்வம் நிராகுலம் ॥ 105 ॥

மஹாஹங்காரகர்வேண ததோவித்யாபலேந ச ।

ப்ரமந்தி சாஸ்மிந் ஸம்ஸாரே கடீயந்த்ரம் யதா புநஃ ॥ 106 ॥

யஜ்ஞிநோऽபி ந முக்தாஃ ஸ்யுஃ ந முக்தா யோகிநஸ்ததா ।

தாபஸா அபி நோ முக்தா குருதத்த்வாத்பராங்முகாஃ ॥ 107 ॥

ந முக்தாஸ்து ச கந்தர்வாஃ பித்ரு'யக்ஷாஸ்து சாரணாஃ ।

ரு'ஷயஃ ஸித்ததேவாத்யா குருஸேவாபராங்முகாஃ ॥ 108 ॥

இதி ஶ்ரீஸ்கந்தபுராணே உத்தரகண்டே உமாமஹேஶ்வர ஸம்வாதே

ஶ்ரீ குருகீதாயாம் ப்ரதமோऽத்யாயஃ ॥

Roman (IAST) Transliteration

śrīgurubhyo namaḥ |

hariḥ om |

dhyānam

haṃsābhyāṃ parivṛttapatrakamalairdivyairjagatkāraṇaṃ

viśvotkīrṇamanekadehanilayaṃ svacchandamānandakam |

ādyantaikamakhaṇḍacidghanarasaṃ pūrṇaṃ hyanantaṃ śubhaṃ

pratyakṣākṣaravigrahaṃ gurupadaṃ dhyāyedvibhuṃ śāśvatam ||

atha prathamo'dhyāyaḥ ||

acintyāvyaktarūpāya nirguṇāya gaṇātmane |

samastajagadādhāramūrtaye brahmaṇe namaḥ || 1 ||

ṛṣaya ūcuḥ |

sūta sūta mahāprājña nigamāgamapāraga |

gurusvarūpamasmākaṃ brūhi sarvamalāpaham || 2 ||

yasya śravaṇamātreṇa dehī duḥkhādvimucyate |

yena mārgeṇa munayaḥ sarvajñatvaṃ prapedire || 3 ||

yatprāpya na punaryāti naraḥ saṃsārabandhanam |

tathāvidhaṃ paraṃ tattvaṃ vaktavyamadhunā tvayā || 4 ||

guhyādguhyatamaṃ sāraṃ gurugītā viśeṣataḥ |

tvatprasādācca śrotavyā tatsarvaṃ brūhi sūta naḥ || 5 ||

iti samprārthitaḥ sūto munisaṅghairmuhurmuhuḥ ||

kutūhalena mahatā provāca madhuraṃ vacaḥ || 6 ||

sūta uvāca |

śruṇudhvaṃ munayaḥ sarve śraddhayā parayā mudā |

vadāmi bhavarogaghnīṃ gītāṃ mātṛsvarūpiṇīm || 7 ||

purā kailāsaśikhare siddhagandharvasevite |

tatra kalpalatāpuṣpamandire'tyantasundare || 8 ||

vyāghrājine samāsīnaṃ śukādimunivanditam |

bodhayantaṃ paraṃ tattvaṃ madhye munigaṇe kvacit || 9 ||

praṇamravadanā śaśvannamaskurvantamādarāt |

dṛṣṭvā vismayamāpanna pārvatī paripṛcchati || 10 ||

pārvatyuvāca |

oṃ namo deva deveśa parātpara jagadguro |

tvāṃ namaskurvate bhaktyā surāsuranarāḥ sadā || 11 ||

vidhiviṣṇumahendrādyairvandyaḥ khalu sadā bhavān |

namaskaroṣi kasmai tvaṃ namaskārāśrayaḥ kila || 12 ||

dṛṣṭvaitatkarma vipulamāścarya pratibhāti me |

kimetanna vijāne'haṃ kṛpayā vada me prabho || 13 ||

bhagavan sarvadharmajña vratānāṃ vratanāyakam |

brūhi me kṛpayā śambho gurumāhātmyamuttamam || 14 ||

kena mārgeṇa bho svāmin dehī brahmamayo bhavet |

tatkṛpāṃ kuru me svāmin namāmi caraṇau tava || 15 ||

iti samprārthitaḥ śaśvanmahādevo maheśvaraḥ |

ānandabharitaḥ svānte pārvatīmidamabravīt || 16 ||

śrī mahādeva uvāca |

na vaktavyamidaṃ devi rahasyātirahasyakam |

na kasyāpi purā proktaṃ tvadbhaktyarthaṃ vadāmi tat || 17 ||

mama rūpā'si devi tvamatastatkathayāmi te |

lokopakārakaḥ praśno na kenāpi kṛtaḥ purā || 18 ||

yasya deve parā bhaktiryathā deve tathā gurau |

tasyaite kathitā hyarthāḥ prakāśante mahātmanaḥ || 19 ||

yo guruḥ sa śivaḥ prokto yaḥ śivaḥ sa guruḥ smṛtaḥ |

vikalpaṃ yastu kurvīta sa naro gurutalpagaḥ || 20 ||

durlabhaṃ triṣu lokeṣu tacchṛṇuṣva vadāmyaham |

gurubrahma vinā nānyaḥ satyaṃ satyaṃ varānane || 21 ||

vedaśāstrapurāṇāni cetihāsādikāni ca |

mantrayantrādividyānāṃ mohanoccāṭanādikam || 22 ||

śaivaśāktāgamādīni hyanye ca bahavo matāḥ |

apabhraṃśāḥ samastānāṃ jīvānāṃ bhrāntacetasām || 23 ||

japastapo vrataṃ tīrthaṃ yajño dānaṃ tathaiva ca |

gurutattvamavijñāya sarvaṃ vyarthaṃ bhavetpriye || 24 ||

gurubuddhyātmano nānyat satyaṃ satyaṃ varānane |

tallābhārthaṃ prayatnastu kartavyaśca manīṣibhiḥ || 25 ||

gūḍhāvidyā jaganmāyā dehaścājñānasambhavaḥ |

vijñānaṃ yatprasādena guruśabdena kathyate || 26 ||

yadaṅghrikamaladvandvaṃ dvandvatāpanivārakam |

tārakaṃ bhavasindhośca taṃ guruṃ praṇamāmyaham || 27 ||

dehī brahma bhavedyasmāt tvatkṛpārthaṃ vadāmi tat |

sarvapāpaviśuddhātmā śrīguroḥ pādasevanāt || 28 ||

sarvatīrthāvagāhasya samprāpnoti phalaṃ naraḥ |

guroḥ pādodakaṃ pītvā śeṣaṃ śirasi dhārayan || 29 ||

śoṣaṇaṃ pāpapaṅkasya dīpanaṃ jñānatejasaḥ |

guroḥ pādodakaṃ samyak saṃsārārṇavatārakam || 30 ||

ajñānamūlaharaṇaṃ janmakarmanivārakam |

jñānavairāgyasiddhyarthaṃ guroḥ pādodakaṃ pibet || 31 ||

gurupādodakaṃ pānaṃ gurorucchiṣṭabhojanam |

gurumūrteḥ sadā dhyānaṃ gurornāma sadā japaḥ || 32 ||

svadeśikasyaiva ca nāmakīrtanaṃ

bhavedanantasya śivasya kīrtanam |

svadeśikasyaiva ca nāmacintanaṃ

bhavedanantasya śivasya cintanam || 33 ||

yatpādāmbujareṇurvai ko'pi saṃsāravāridhau |

setubandhāyate nāthaṃ deśikaṃ tamupāsmahe || 34 ||

yadanugrahamātreṇa śokamohau vinaśyataḥ |

tasmai śrīdeśikendrāya namo'stu paramātmane || 35 ||

yasmādanugrahaṃ labdhvā mahadajñānamutsṛjet |

tasmai śrīdeśikendrāya namaścābhīṣṭasiddhaye || 36 ||

kāśīkṣetraṃ nivāsaśca jāhnavī caraṇodakam |

gururviśveśvaraḥ sākṣāt tārakaṃ brahmaniścayaḥ || 37 ||

gurusevā gayā proktā dehaḥ syādakṣayo vaṭaḥ |

tatpādaṃ viṣṇupādaṃ syāt tatra dattamanastatam || 38 ||

gurumūrtiṃ smarennityaṃ gurornāma sadā japet |

gurorājñāṃ prakurvīta guroranyaṃ na bhāvayet || 39 ||

guruvaktre sthitaṃ brahma prāpyate tatprasādataḥ |

gurordhyānaṃ sadā kuryāt kulastrī svapatiṃ yathā || 40 ||

svāśramaṃ ca svajātiṃ ca svakīrtiṃ puṣṭivardhanam |

etatsarvaṃ parityajya gurumeva samāśrayet || 41 ||

ananyāścintayanto ye sulabhaṃ paramaṃ sukham |

tasmātsarvaprayatnena gurorārādhanaṃ kuru || 42 ||

guruvaktre sthitā vidyā gurubhaktyā ca labhyate |

trailokye sphuṭavaktāro devarṣipitṛmānavāḥ || 43 ||

gukāraścāndhakāro hi rukārasteja ucyate |

ajñānagrāsakaṃ brahma gurureva na saṃśayaḥ || 44 ||

gukāraścāndhakārastu rukārastannirodhakṛt |

andhakāravināśitvādgururityabhidhīyate ||

gukāro bhavarogaḥ syāt rukārastannirodhakṛt |

bhavarogaharatvācca gururityabhidhīyate || 45 ||

gukāraśca guṇātīto rūpātīto rukārakaḥ |

guṇarūpavihīnatvāt gururityabhidhīyate || 46 ||

gukāraḥ prathamo varṇo māyādiguṇabhāsakaḥ |

rukāro'sti paraṃ brahma māyābhrāntivimocakam || 47 ||

evaṃ gurupadaṃ śreṣṭhaṃ devānāmapi durlabham |

hāhāhūhūgaṇaiścaiva gandharvādyaiśca pūjitam || 48 ||

dhruvaṃ teṣāṃ ca sarveṣāṃ nāsti tattvaṃ guroḥ param |

gurorārādhanaṃ kuryāt svajīvatvaṃ nivedayet || 49 ||

āsanaṃ śayanaṃ vastraṃ vāhanaṃ bhūṣaṇādikam |

sādhakena pradātavyaṃ gurusantoṣakāraṇam || 50 ||

karmaṇā manasā vācā sarvadā''rādhayedgurum |

dīrghadaṇḍaṃ namaskṛtya nirlajjo gurusannidhau || 51 ||

śarīramindriyaṃ prāṇamarthasvajanabāndhavān |

ātmadārādikaṃ sarvaṃ sadgurubhyo nivedayet || 52 ||

gurureko jagatsarvaṃ brahmaviṣṇuśivātmakam |

guroḥ parataraṃ nāsti tasmātsampūjayedgurum || 53 ||

sarvaśrutiśiroratnavirājitapadāmbujam |

vedāntārthapravaktāraṃ tasmāt sampūjayedgurum || 54 ||

yasya smaraṇamātreṇa jñānamutpadyate svayam |

sa eva sarvasampattiḥ tasmātsampūjayedgurum || 55 ||

[pāṭhabhedaḥ -

kṛmikoṭibhirāviṣṭaṃ durgandhamalamūtrakam |

śleṣmaraktatvacāmāṃsairnaddhaṃ caitadvarānane ||

]

kṛmikoṭibhirāviṣṭaṃ durgandhakuladūṣitam |

anityaṃ duḥkhanilayaṃ dehaṃ viddhi varānane || 56 ||

saṃsāravṛkṣamārūḍhāḥ patanti narakārṇave |

yastānuddharate sarvān tasmai śrīgurave namaḥ || 57 ||

gururbrahmā gururviṣṇurgururdevo maheśvaraḥ |

gurussākṣāt parabrahma tasmai śrīgurave namaḥ || 58 ||

ajñānatimirāndhasya jñānāñjanaśalākayā |

cakṣurunmīlitaṃ yena tasmai śrīgurave namaḥ || 59 ||

akhaṇḍamaṇḍalākāraṃ vyāptaṃ yena carācaram |

tatpadaṃ darśitaṃ yena tasmai śrīgurave namaḥ || 60 ||

sthāvaraṃ jaṅgamaṃ vyāptaṃ yatkiñcitsacarācaram |

tvaṃ padaṃ darśitaṃ yena tasmai śrīgurave namaḥ || 61 ||

cinmayavyāpitaṃ sarvaṃ trailokyaṃ sacarācaram |

asitvaṃ darśitaṃ yena tasmai śrīgurave namaḥ || 62 ||

nimiṣānnimiṣārdhādvā yadvākyādvai vimucyate |

svātmānaṃ śivamālokya tasmai śrīgurave namaḥ || 63 ||

caitanyaṃ śāśvataṃ śāntaṃ vyomātītaṃ nirañjanam |

nādabindukalātītaṃ tasmai śrīgurave namaḥ || 64 ||

nirguṇaṃ nirmalaṃ śāntaṃ jaṅgamaṃ sthirameva ca |

vyāptaṃ yena jagatsarvaṃ tasmai śrīgurave namaḥ || 65 ||

sa pitā sa ca me mātā sa bandhuḥ sa ca devatā |

saṃsāramohanāśāya tasmai śrīgurave namaḥ || 66 ||

yatsattvena jagatsattvaṃ yatprakāśena bhāti tat |

yadānandena nandanti tasmai śrīgurave namaḥ || 67 ||

yasmin sthitamidaṃ sarvaṃ bhāti yadbhānarūpataḥ |

priyaṃ putrādi yatprītyā tasmai śrīgurave namaḥ || 68 ||

yenedaṃ darśitaṃ tattvaṃ cittacaityādikaṃ tathā |

jāgratsvapnasuṣuptyādi tasmai śrīgurave namaḥ || 69 ||

yasya jñānamidaṃ viśvaṃ na dṛśyaṃ bhinnabhedataḥ |

sadaikarūparūpāya tasmai śrīgurave namaḥ || 70 ||

yasya jñātaṃ mataṃ tasya mataṃ yasya na veda saḥ |

ananyabhāvabhāvāya tasmai śrīgurave namaḥ || 71 ||

yasmai kāraṇarūpāya kāryarūpeṇa bhāti yat |

kāryakāraṇarūpāya tasmai śrīgurave namaḥ || 72 ||

nānārūpamidaṃ viśvaṃ na kenāpyasti bhinnatā |

kāryakāraṇarūpāya tasmai śrīgurave namaḥ || 73 ||

jñānaśaktisamārūḍhatattvamālāvibhūṣiṇe |

bhuktimuktipradātre ca tasmai śrīgurave namaḥ || 74 ||

anekajanmasamprāptakarmabandhavidāhine |

jñānānalaprabhāvena tasmai śrīgurave namaḥ || 75 ||

śoṣaṇaṃ bhavasindhośca dīpanaṃ kṣarasampadām |

guroḥ pādodakaṃ yasya tasmai śrīgurave namaḥ || 76 ||

na guroradhikaṃ tattvaṃ na guroradhikaṃ tapaḥ |

na guroradhikaṃ jñānaṃ tasmai śrīgurave namaḥ || 77 ||

mannāthaḥ śrījagannātho madguruḥ śrījagadguruḥ |

mamā''tmā sarvabhūtātmā tasmai śrīgurave namaḥ || 78 ||

gururādiranādiśca guruḥ paramadaivatam |

gurumantrasamo nāsti tasmai śrīgurave namaḥ || 79 ||

eka eva paro bandhurviṣame samupasthite |

guruḥ sakaladharmātmā tasmai śrīgurave namaḥ || 80 ||

gurumadhye sthitaṃ viśvaṃ viśvamadhye sthito guruḥ |

gururviśvaṃ na cānyo'sti tasmai śrīgurave namaḥ || 81 ||

bhavāraṇyapraviṣṭasya diṅmohabhrāntacetasaḥ |

yena sandarśitaḥ panthāḥ tasmai śrīgurave namaḥ || 82 ||

tāpatrayāgnitaptānāmaśāntaprāṇināṃ mude |

gurureva parā gaṅgā tasmai śrīgurave namaḥ || 83 ||

[pāṭhabhedaḥ -

ajñānenāhinā grastāḥ prāṇinastān cikitsakaḥ |

vidyāsvarūpo bhagavāṃstasmai śrīgurave namaḥ ||

]

ajñānasarpadaṣṭānāṃ prāṇināṃ kaścikitsakaḥ |

samyagjñānamahāmantravedinaṃ sadguru vinā || 84 ||

hetave jagatāmeva saṃsārārṇavasetave |

prabhave sarvavidyānāṃ śambhave gurave namaḥ || 85 ||

dhyānamūlaṃ gurormūrtiḥ pūjāmūlaṃ guroḥ padam |

mantramūlaṃ gurorvākyaṃ muktimūlaṃ guroḥ kṛpā || 86 ||

saptasāgaraparyantatīrthasnānaphalaṃ tu yat |

guroḥ pādodabindośca sahasrāṃśe na tatphalam || 87 ||

śive ruṣṭe gurustrātā gurau ruṣṭe na kaścana |

labdhvā kulaguruṃ samyaggurumeva samāśrayet || 88 ||

madhulubdho yathā bhṛṅgaḥ puṣpātpuṣpāntaraṃ vrajet |

jñānalubdhastathā śiṣyo gurorgurvantaraṃ vrajet || 89 ||

vande gurupadadvandvaṃ vāṅmanātītagocaram |

śvetaraktaprabhābhinnaṃ śivaśaktyātmakaṃ param || 90 ||

gukāraṃ ca guṇātītaṃ rūkāraṃ rūpavarjitam |

guṇātītamarūpaṃ ca yo dadyātsa guruḥ smṛtaḥ || 91 ||

atrinetraḥ śivaḥ sākṣāt dvibāhuśca hariḥ smṛtaḥ |

yo'caturvadano brahmā śrīguruḥ kathitaḥ priye || 92 ||

ayaṃ mayāñjalirbaddho dayāsāgarasiddhaye |

yadanugrahato jantuścitrasaṃsāramuktibhāk || 93 ||

śrīguroḥ paramaṃ rūpaṃ vivekacakṣuragrataḥ |

mandabhāgyā na paśyanti andhāḥ sūryodayaṃ yathā || 94 ||

kulānāṃ kulakoṭīnāṃ tārakastatra tatkṣaṇāt |

atastaṃ sadguruṃ jñātvā trikālamabhivādayet || 95 ||

śrīnāthacaraṇadvandvaṃ yasyāṃ diśi virājate |

tasyāṃ diśi namaskuryāt bhaktyā pratidinaṃ priye || 96 ||

sāṣṭāṅgapraṇipātena stuvannityaṃ guruṃ bhajet |

bhajanāt sthairyamāpnoti svasvarūpamayo bhavet || 97 ||

dorbhyāṃ padbhyāṃ ca jānubhyāmurasā śirasā dṛśā |

manasā vacasā ceti praṇāmo'ṣṭāṅga ucyate || 98 ||

tasyai diśe satatamañjalireṣa nityaṃ

prakṣipyatāṃ mukharitairmadhuraiḥ prasūnaiḥ |

jāgarti yatra bhagavān gurucakravartī

viśvasthitipralayanāṭakanityasākṣī || 99 ||

abhyastaiḥ kimu dīrghakālavimalairvyādhipradairduṣkaraiḥ

prāṇāyāmaśatairanekakaraṇairduḥkhātmakairdurjayaiḥ |

yasminnabhyudite vinaśyati balī vāyuḥ svayaṃ tatkṣaṇāt

prāptuṃ tatsahajasvabhāvamaniśaṃ seveta caikaṃ gurum || 100 ||

jñānaṃ vinā muktipadaṃ labhyate gurubhaktitaḥ |

gurossamānato nānyat sādhanaṃ gurumārgiṇām || 101 ||

yasmātparataraṃ nāsti neti netīti vai śrutiḥ |

manasā vacasā caiva satyamārādhayedgurum || 102 ||

guroḥ kṛpāprasādena brahmaviṣṇumaheśvarāḥ |

sāmarthyamabhajan sarve sṛṣṭisthityantakarmaṇi || 103 ||

devakinnaragandharvāḥ pitṛyakṣāstu tumburaḥ |

munayo'pi na jānanti guruśuśrūṣaṇe vidhim || 104 ||

tārkikāśchāndasāścaiva daivajñāḥ karmaṭhāḥ priye |

laukikāste na jānanti gurutattvaṃ nirākulam || 105 ||

mahāhaṅkāragarveṇa tatovidyābalena ca |

bhramanti cāsmin saṃsāre ghaṭīyantraṃ yathā punaḥ || 106 ||

yajñino'pi na muktāḥ syuḥ na muktā yoginastathā |

tāpasā api no muktā gurutattvātparāṅmukhāḥ || 107 ||

na muktāstu ca gandharvāḥ pitṛyakṣāstu cāraṇāḥ |

ṛṣayaḥ siddhadevādyā gurusevāparāṅmukhāḥ || 108 ||

iti śrīskandapurāṇe uttarakhaṇḍe umāmaheśvara saṃvāde

śrī gurugītāyāṃ prathamo'dhyāyaḥ ||