Saundarya Lahari — InfoLyter.in

ॐ

ஸௌந்தர்ய லஹரீ

Saundarya Lahari

Lahari Adi Shankaracharya Tamil

ப்ரதம பாகஃ - ஆநந்த லஹரி

புமௌஸ்கலித பாதாநாம் பூமிரேவா வலம்பநம் ।

த்வயீ ஜாதா பராதாநாம் த்வமேவ ஶரணம் ஶிவே ॥

ஶிவஃ ஶக்த்யா யுக்தோ யதி பவதி ஶக்தஃ ப்ரபவிதும்

ந சேதேவம் தேவோ ந கலு குஶலஃ ஸ்பந்திதுமபி ।

அதஸ்த்வாமாராத்யாம் ஹரிஹரவிரிஞ்சாதிபிரபி

ப்ரணந்தும் ஸ்தோதும் வா கதமக்ரு'தபுண்யஃ ப்ரபவதி ॥ 1 ॥

தநீயாம்ஸம் பாம்ஸும் தவ சரணபங்கேருஹபவம்

விரிஞ்சிஸ்ஸஞ்சிந்வந் விரசயதி லோகாநவிகலம் ।

வஹத்யேநம் ஶௌரிஃ கதமபி ஸஹஸ்ரேண ஶிரஸாம்

ஹரஸ்ஸங்க்ஷுத்யைநம் பஜதி பஸிதோத்தூலநவிதிம் ॥ 2 ॥

அவித்யாநாமந்த-ஸ்திமிர-மிஹிரத்வீபநகரீ

ஜடாநாம் சைதந்ய-ஸ்தபக-மகரந்த-ஸ்ருதிசரீ ।

தரித்ராணாம் சிந்தாமணிகுணநிகா ஜந்மஜலதௌ

நிமக்நாநாம் தம்ஷ்ட்ரா முரரிபு-வராஹஸ்ய பவதி ॥ 3 ॥

த்வதந்யஃ பாணிப்யாமபயவரதோ தைவதகணஃ

த்வமேகா நைவாஸி ப்ரகடிதவராபீத்யபிநயா ।

பயாத் த்ராதும் தாதும் பலமபி ச வாஞ்சாஸமதிகம்

ஶரண்யே லோகாநாம் தவ ஹி சரணாவேவ நிபுணௌ ॥ 4 ॥

ஹரிஸ்த்வாமாராத்ய ப்ரணதஜநஸௌபாக்யஜநநீம்

புரா நாரீ பூத்வா புரரிபுமபி க்ஷோபமநயத் ।

ஸ்மரோऽபி த்வாம் நத்வா ரதிநயநலேஹ்யேந வபுஷா

முநீநாமப்யந்தஃ ப்ரபவதி ஹி மோஹாய மஹதாம் ॥ 5 ॥

தநுஃ பௌஷ்பம் மௌர்வீ மதுகரமயீ பஞ்ச விஶிகாஃ

வஸந்தஃ ஸாமந்தோ மலயமருதாயோதநரதஃ ।

ததாப்யேகஃ ஸர்வம் ஹிமகிரிஸுதே காமபி க்ரு'பாம்

அபாங்காத்தே லப்த்வா ஜகதித-மநங்கோ விஜயதே ॥ 6 ॥

க்வணத்காஞ்சீதாமா கரிகலபகும்பஸ்தநநதா

பரிக்ஷீணா மத்யே பரிணதஶரச்சந்த்ரவதநா ।

தநுர்பாணாந் பாஶம் ஸ்ரு'ணிமபி ததாநா கரதலைஃ

புரஸ்தாதாஸ்தாம் நஃ புரமதிதுராஹோபுருஷிகா ॥ 7 ॥

ஸுதாஸிந்தோர்மத்யே ஸுரவிடபிவாடீபரிவ்ரு'தே

மணித்வீபே நீபோபவநவதி சிந்தாமணிக்ரு'ஹே ।

ஶிவாகாரே மஞ்சே பரமஶிவபர்யங்கநிலயாம்

பஜந்தி த்வாம் தந்யாஃ கதிசந சிதாநந்தலஹரீம் ॥ 8 ॥

மஹீம் மூலாதாரே கமபி மணிபூரே ஹுதவஹம்

ஸ்திதம் ஸ்வாதிஷ்டாநே ஹ்ரு'தி மருதமாகாஶமுபரி ।

மநோऽபி ப்ரூமத்யே ஸகலமபி பித்வா குலபதம்

ஸஹஸ்ராரே பத்மே ஸஹ ரஹஸி பத்யா விஹரஸே ॥ 9 ॥

ஸுதாதாராஸாரைஶ்சரணயுகலாந்தர்விகலிதைஃ

ப்ரபஞ்சம் ஸிஞ்சந்தீ புநரபி ரஸாம்நாயமஹஸஃ ।

அவாப்ய ஸ்வாம் பூமிம் புஜகநிபமத்யுஷ்டவலயம்

ஸ்வமாத்மாநம் க்ரு'த்வா ஸ்வபிஷி குலகுண்டே குஹரிணி ॥ 10 ॥

சதுர்பிஃ ஶ்ரீகண்டைஃ ஶிவயுவதிபிஃ பஞ்சபிரபி

ப்ரபிந்நாபிஃ ஶம்போர்நவபிரபி மூலப்ரக்ரு'திபிஃ ।

சதுஶ்சத்வாரிம்ஶத்வஸுதலகலாஶ்ரத்ரிவலய- [த்ரயஶ்சத்வாரி]

த்ரிரேகாபிஃ ஸார்தம் தவ ஶரணகோணாஃ பரிணதாஃ ॥ 11 ॥ [சரணகோணாஃ, பவநகிணாஃ]

த்வதீயம் ஸௌந்தர்யம் துஹிநகிரிகந்யே துலயிதும்

கவீந்த்ராஃ கல்பந்தே கதமபி விரிஞ்சிப்ரப்ரு'தயஃ ।

யதாலோகௌத்ஸுக்யாதமரலலநா யாந்தி மநஸா

தபோபிர்துஷ்ப்ராபாமபி கிரிஶஸாயுஜ்யபதவீம் ॥ 12 ॥

நரம் வர்ஷீயாம்ஸம் நயநவிரஸம் நர்மஸு ஜடம்

தவாபாங்காலோகே பதிதமநுதாவந்தி ஶதஶஃ ।

கலத்வேணீபந்தாஃ குசகலஶவிஸ்ரஸ்தஸிசயா

ஹடாத் த்ருட்யத்காஞ்ச்யோ விகலிததுகூலா யுவதயஃ ॥ 13 ॥

க்ஷிதௌ ஷட்பஞ்சாஶத் த்விஸமதிகபஞ்சாஶதுதகே

ஹுதாஶே த்வாஷஷ்டிஶ்சதுரதிகபஞ்சாஶதநிலே ।

திவி த்விஷ்ஷட்த்ரிம்ஶந்மநஸி ச சதுஷ்ஷஷ்டிரிதி யே

மயூகாஸ்தேஷாமப்யுபரி தவ பாதாம்புஜயுகம் ॥ 14 ॥

ஶரஜ்ஜ்யோத்ஸ்நாஶுத்தாம் ஶஶியுதஜடாஜூடமகுடாம்

வரத்ராஸத்ராணஸ்படிககடிகாபுஸ்தககராம் ।

ஸக்ரு'ந்ந த்வா நத்வா கதமிவ ஸதாம் ஸந்ந்நிதததே

மதுக்ஷீரத்ராக்ஷாமதுரிமதுரீணாஃ பணிதயஃ ॥ 15॥ [பணிதயஃ]

கவீந்த்ராணாம் சேதஃகமலவநபாலாதபருசிம்

பஜந்தே யே ஸந்தஃ கதிசிதருணாமேவ பவதீம் ।

விரிஞ்சிப்ரேயஸ்யாஸ்தருணதரஶ்ரு'ங்காரலஹரீ-

கபீராபிர்வாக்பிர்விதததி ஸதாம் ரஞ்ஜநமமீ ॥ 16 ॥

ஸவித்ரீபிர்வாசாம் ஶஶிமணிஶிலாபங்கருசிபிஃ

வஶிந்யாத்யாபிஸ்த்வாம் ஸஹ ஜநநி ஸஞ்சிந்தயதி யஃ ।

ஸ கர்தா காவ்யாநாம் பவதி மஹதாம் பங்கிருசிபிஃ

வசோபிர்வாக்தேவீவதநகமலாமோதமதுரைஃ ॥ 17 ॥

தநுச்சாயாபிஸ்தே தருணதரணிஶ்ரீஸரணிபிஃ

திவம் ஸர்வாமுர்வீமருணிமநி மக்நாம் ஸ்மரதி யஃ ।

பவந்த்யஸ்ய த்ரஸ்யத்வநஹரிணஶாலீநநயநாஃ

ஸஹோர்வஶ்யா வஶ்யாஃ கதி கதி ந கீர்வாணகணிகாஃ ॥ 18 ॥

முகம் பிந்தும் க்ரு'த்வா குசயுகமதஸ்தஸ்ய தததோ

ஹரார்தம் த்யாயேத்யோ ஹரமஹிஷி தே மந்மதகலாம் ।

ஸ ஸத்யஃ ஸங்க்ஷோபம் நயதி வநிதா இத்யதிலகு

த்ரிலோகீமப்யாஶு ப்ரமயதி ரவீந்துஸ்தநயுகாம் ॥ 19 ॥

கிரந்தீமங்கேப்யஃ கிரணநிகுரம்பாம்ரு'தரஸம்

ஹ்ரு'தி த்வாமாதத்தே ஹிமகரஶிலாமூர்திமிவ யஃ ।

ஸ ஸர்பாணாம் தர்பம் ஶமயதி ஶகுந்தாதிப இவ

ஜ்வரப்லுஷ்டாந் த்ரு'ஷ்ட்யா ஸுகயதி ஸுதாதாரஸிரயா ॥ 20 ॥

தடில்லேகாதந்வீம் தபநஶஶிவைஶ்வாநரமயீம்

நிஷண்ணாம் ஷண்ணாமப்யுபரி கமலாநாம் தவ கலாம் ।

மஹாபத்மாடவ்யாம் ம்ரு'திதமலமாயேந மநஸா

மஹாந்தஃ பஶ்யந்தோ தததி பரமாஹ்லாதலஹரீம் ॥ 21 ॥

பவாநி த்வம் தாஸே மயி விதர த்ரு'ஷ்டிம் ஸகருணா-

மிதி ஸ்தோதும் வாஞ்சந் கதயதி பவாநி த்வமிதி யஃ ।

ததைவ த்வம் தஸ்மை திஶஸி நிஜஸாயுஜ்யபதவீம்

முகுந்தப்ரஹ்மேந்த்ரஸ்புடமகுடநீராஜிதபதாம் ॥ 22 ॥

த்வயா ஹ்ரு'த்வா வாமம் வபுரபரி-த்ரு'ப்தேந மநஸா

ஶரீரார்தம் ஶம்போரபரமபி ஶங்கே ஹ்ரு'தமபூத் ।

யதேதத்த்வத்ரூபம் ஸகலமருணாபம் த்ரிநயநம்

குசாப்யாமாநம்ரம் குடிலஶஶிசூடாலமகுடம் ॥ 23 ॥

ஜகத்ஸூதே தாதா ஹரிரவதி ருத்ரஃ க்ஷபயதே

திரஸ்குர்வந்நேதத்ஸ்வமபி வபுரீஶஸ்திரயதி ।

ஸதாபூர்வஃ ஸர்வம் ததிதமநுக்ரு'ஹ்ணாதி ச ஶிவ-

ஸ்தவாஜ்ஞாமாலம்ப்ய க்ஷணசலிதயோர்ப்ரூலதிகயோஃ ॥ 24 ॥

த்ரயாணாம் தேவாநாம் த்ரிகுணஜநிதாநாம் தவ ஶிவே

பவேத் பூஜா பூஜா தவ சரணயோர்யா விரசிதா ।

ததா ஹி த்வத்பாதோத்வஹநமணிபீடஸ்ய நிகடே

ஸ்திதா ஹ்யேதே ஶஶ்வந்முகுலிதகரோத்தம்ஸமகுடாஃ ॥ 25 ॥

விரிஞ்சிஃ பஞ்சத்வம் வ்ரஜதி ஹரிராப்நோதி விரதிம்

விநாஶம் கீநாஶோ பஜதி தநதோ யாதி நிதநம் ।

விதந்த்ரீ மாஹேந்த்ரீ விததிரபி ஸம்மீலிதத்ரு'ஶா

மஹாஸம்ஹாரேऽஸ்மிந் விஹரதி ஸதி த்வத்பதிரஸௌ ॥ 26 ॥

ஜபோ ஜல்பஃ ஶில்பம் ஸகலமபி முத்ராவிரசநா

கதிஃ ப்ராதக்ஷிண்யக்ரமணமஶநாத்யாஹுதிவிதிஃ ।

ப்ரணாமஸ்ஸம்வேஶஸ்ஸுகமகிலமாத்மார்பணத்ரு'ஶா

ஸபர்யாபர்யாயஸ்தவ பவது யந்மே விலஸிதம் ॥ 27 ॥

ஸுதாமப்யாஸ்வாத்ய ப்ரதிபயஜராம்ரு'த்யுஹரிணீம்

விபத்யந்தே விஶ்வே விதிஶதமகாத்யா திவிஷதஃ ।

கராலம் யத்க்ஷ்வேலம் கபலிதவதஃ காலகலநா

ந ஶம்போஸ்தந்மூலம் தவ ஜநநி தாடங்கமஹிமா ॥ 28 ॥

கிரீடம் வைரிஞ்சம் பரிஹர புரஃ கைடபபிதஃ

கடோரே கோடீரே ஸ்கலஸி ஜஹி ஜம்பாரிமுகுடம் ।

ப்ரணம்ரேஷ்வேதேஷு ப்ரஸபமுபயாதஸ்ய பவநம்

பவஸ்யாப்யுத்தாநே தவ பரிஜநோக்திர்விஜயதே ॥ 29 ॥

ஸ்வதேஹோத்பூதாபிர்க்ரு'ணிபிரணிமாத்யாபிரபிதோ

நிஷேவ்யே நித்யே த்வாமஹமிதி ஸதா பாவயதி யஃ ।

கிமாஶ்சர்யம் தஸ்ய த்ரிநயநஸம்ரு'த்திம் த்ரு'ணயதோ

மஹாஸம்வர்தாக்நிர்விரசயதி நிராஜநவிதிம் ॥ 30 ॥

சதுஷ்ஷஷ்ட்யா தந்த்ரைஃ ஸகலமதிஸந்தாய புவநம்

ஸ்திதஸ்தத்தத்ஸித்திப்ரஸவபரதந்த்ரைஃ பஶுபதிஃ ।

புநஸ்த்வந்நிர்பந்தாதகிலபுருஷார்தைககடநா-

ஸ்வதந்த்ரம் தே தந்த்ரம் க்ஷிதிதலமவாதீதரதிதம் ॥ 31 ॥

ஶிவஃ ஶக்திஃ காமஃ க்ஷிதிரத ரவிஃ ஶீதகிரணஃ

ஸ்மரோ ஹம்ஸஃ ஶக்ரஸ்ததநு ச பராமாரஹரயஃ ।

அமீ ஹ்ரு'ல்லேகாபிஸ்திஸ்ரு'பிரவஸாநேஷு கடிதா

பஜந்தே வர்ணாஸ்தே தவ ஜநநி நாமாவயவதாம் ॥ 32 ॥

ஸ்மரம் யோநிம் லக்ஷ்மீம் த்ரிதயமிதமாதௌ தவ மநோ-

ர்நிதாயைகே நித்யே நிரவதிமஹாபோகரஸிகாஃ ।

பஜந்தி த்வாம் சிந்தாமணிகுநநிபத்தாக்ஷவலயாஃ

ஶிவாக்நௌ ஜுஹ்வந்தஃ ஸுரபிக்ரு'ததாராஹுதிஶதைஃ ॥ 33 ॥

ஶரீரம் த்வம் ஶம்போஃ ஶஶிமிஹிரவக்ஷோருஹயுகம்

தவாத்மாநம் மந்யே பகவதி நவாத்மாநமநகம் ।

அதஶ்ஶேஷஶ்ஶேஷீத்யயமுபயஸாதாரணதயா

ஸ்திதஃ ஸம்பந்தோ வாம் ஸமரஸபராநந்தபரயோஃ ॥ 34 ॥

மநஸ்த்வம் வ்யோம த்வம் மருதஸி மருத்ஸாரதிரஸி

த்வமாபஸ்த்வம் பூமிஸ்த்வயி பரிணதாயாம் ந ஹி பரம் ।

த்வமேவ ஸ்வாத்மாநம் பரிணமயிதும் விஶ்வவபுஷா

சிதாநந்தாகாரம் ஶிவயுவதி பாவேந பிப்ரு'ஷே ॥ 35 ॥

தவாஜ்ஞாசக்ரஸ்தம் தபநஶஶிகோடித்யுதிதரம்

பரம் ஶம்பும் வந்தே பரிமிலிதபார்ஶ்வம் பரசிதா ।

யமாராத்யந் பக்த்யா ரவிஶஶிஶுசீநாமவிஷயே

நிராலோகேऽலோகே நிவஸதி ஹி பாலோகபுவநே ॥ 36 ॥

விஶுத்தௌ தே ஶுத்தஸ்படிகவிஶதம் வ்யோமஜநகம்

ஶிவம் ஸேவே தேவீமபி ஶிவஸமாநவ்யவஸிதாம் ।

யயோஃ காந்த்யா யாந்த்யாஃ ஶஶிகிரணஸாரூப்யஸரணே-

விதூதாந்தர்த்வாந்தா விலஸதி சகோரீவ ஜகதீ ॥ 37 ॥

ஸமுந்மீலத் ஸம்வித் கமலமகரந்தைகரஸிகம்

பஜே ஹம்ஸத்வந்த்வம் கிமபி மஹதாம் மாநஸசரம் ।

யதாலாபாதஷ்டாதஶகுணிதவித்யாபரிணதி-

ர்யதாதத்தே தோஷாத் குணமகிலமத்ப்யஃ பய இவ ॥ 38 ॥

தவ ஸ்வாதிஷ்டாநே ஹுதவஹமதிஷ்டாய நிரதம்

தமீடே ஸம்வர்தம் ஜநநி மஹதீம் தாம் ச ஸமயாம் ।

யதாலோகே லோகாந் தஹதி மஹதி க்ரோதகலிதே

தயார்த்ரா யா த்ரு'ஷ்டிஃ ஶிஶிரமுபசாரம் ரசயதி ॥ 39 ॥

தடித்த்வந்தம் ஶக்த்யா திமிரபரிபந்திஸ்புரணயா

ஸ்புரந்நாநாரத்நாபரணபரிணத்தேந்த்ரதநுஷம் ।

தவ ஶ்யாமம் மேகம் கமபி மணிபூரைகஶரணம்

நிஷேவே வர்ஷந்தம் ஹரமிஹிரதப்தம் த்ரிபுவநம் ॥ 40 ॥

தவாதாரே மூலே ஸஹ ஸமயயா லாஸ்யபரயா

நவாத்மாநம் மந்யே நவரஸமஹாதாண்டவநடம் ।

உபாப்யாமேதாப்யாமுதயவிதிமுத்திஶ்ய தயயா

ஸநாதாப்யாம் ஜஜ்ஞே ஜநகஜநநீமஜ்ஜகதிதம் ॥ 41 ॥

த்விதீய பாகஃ - ஸௌந்தர்ய லஹரீ

கதைர்மாணிக்யத்வம் ககநமணிபிஃ ஸாந்த்ரகடிதம்

கிரீடம் தே ஹைமம் ஹிமகிரிஸுதே கீர்தயதி யஃ ।

ஸ நீடேயச்சாயாச்சுரணஶபலம் சந்த்ரஶகலம்

தநுஃ ஶௌநாஸீரம் கிமிதி ந நிபத்நாதி திஷணாம் ॥ 42 ॥

துநோது த்வாந்தம் நஸ்துலிததலிதேந்தீவரவநம்

கநஸ்நிக்தஶ்லக்ஷ்ணம் சிகுரநிகுரும்பம் தவ ஶிவே ।

யதீயம் ஸௌரப்யம் ஸஹஜமுபலப்தும் ஸுமநஸோ

வஸந்த்யஸ்மிந் மந்யே வலமதநவாடீவிடபிநாம் ॥ 43 ॥

தநோது க்ஷேமம் நஸ்தவ வதநஸௌந்தர்யலஹரீ-

பரீவாஹஸ்ரோதஃஸரணிரிவ ஸீமந்தஸரணிஃ ।

வஹந்தீ ஸிந்தூரம் ப்ரபலகபரீபாரதிமிர-

த்விஷாம் ப்ரு'ந்தைர்பந்தீக்ரு'தமிவ நவீநார்ககிரணம் ॥ 44 ॥

அராலைஃ ஸ்வாபாவ்யாதலிகலபஸஶ்ரீபிரலகைஃ

பரீதம் தே வக்த்ரம் பரிஹஸதி பங்கேருஹருசிம் ।

தரஸ்மேரே யஸ்மிந் தஶநருசிகிஞ்ஜல்கருசிரே

ஸுகந்தௌ மாத்யந்தி ஸ்மரதஹநசக்ஷுர்மதுலிஹஃ ॥ 45 ॥

லலாடம் லாவண்யத்யுதிவிமலமாபாதி தவ ய-

த்த்விதீயம் தந்மந்யே மகுடகடிதம் சந்த்ரஶகலம் ।

விபர்யாஸந்யாஸாதுபயமபி ஸம்பூய ச மிதஃ

ஸுதாலேபஸ்யூதிஃ பரிணமதி ராகாஹிமகரஃ ॥ 46 ॥

ப்ருவௌ புக்நே கிஞ்சித்புவநபயபங்கவ்யஸநிநி

த்வதீயே நேத்ராப்யாம் மதுகரருசிப்யாம் த்ரு'தகுணம் ।

தநுர்மந்யே ஸவ்யேதரகரக்ரு'ஹீதம் ரதிபதேஃ

ப்ரகோஷ்டே முஷ்டௌ ச ஸ்தகயதி நிகூடாந்தரமுமே ॥ 47 ॥

அஹஃ ஸூதே ஸவ்யம் தவ நயநமர்காத்மகதயா

த்ரியாமாம் வாமம் தே ஸ்ரு'ஜதி ரஜநீநாயகதயா ।

த்ரு'தீயா தே த்ரு'ஷ்டிர்தரதலிதஹேமாம்புஜருசிஃ

ஸமாதத்தே ஸந்த்யாம் திவஸநிஶயோரந்தரசரீம் ॥ 48 ॥

விஶாலா கல்யாணீ ஸ்புடருசிரயோத்யா குவலயைஃ

க்ரு'பாதாராதாரா கிமபி மதுராபோகவதிகா ।

அவந்தீ த்ரு'ஷ்டிஸ்தே பஹுநகரவிஸ்தாரவிஜயா

த்ருவம் தத்தந்நாமவ்யவஹரணயோக்யா விஜயதே ॥ 49 ॥

கவீநாம் ஸந்தர்பஸ்தபகமகரந்தைகரஸிகம்

கடாக்ஷவ்யாக்ஷேபப்ரமரகலபௌ கர்ணயுகலம் ।

அமுஞ்சந்தௌ த்ரு'ஷ்ட்வா தவ நவரஸாஸ்வாததரலா-

வஸூயாஸம்ஸர்காதலிகநயநம் கிஞ்சிதருணம் ॥ 50 ॥

ஶிவே ஶ்ரு'ங்காரார்த்ரா ததிதரஜநே குத்ஸநபரா

ஸரோஷா கங்காயாம் கிரிஶசரிதே விஸ்மயவதீ ।

ஹராஹிப்யோ பீதா ஸரஸிருஹஸௌபாக்யஜநநீ (ஜயிநீ)

ஸகீஷு ஸ்மேரா தே மயி ஜநநீ த்ரு'ஷ்டிஃ ஸகருணா ॥ 51 ॥

கதே கர்ணாப்யர்ணம் கருத இவ பக்ஷ்மாணி தததீ

புராம் பேத்துஶ்சித்தப்ரஶமரஸவித்ராவணபலே ।

இமே நேத்ரே கோத்ராதரபதிகுலோத்தம்ஸகலிகே

தவாகர்ணாக்ரு'ஷ்டஸ்மரஶரவிலாஸம் கலயதஃ ॥ 52 ॥

விபக்தத்ரைவர்ண்யம் வ்யதிகரிதலீலாஞ்ஜநதயா

விபாதி த்வந்நேத்ரத்ரிதயமிதமீஶாநதயிதே ।

புநஃ ஸ்ரஷ்டும் தேவாந் த்ருஹிணஹரிருத்ராநுபரதாந்

ரஜஃ ஸத்த்வம் பிப்ரத்தம இதி குணாநாம் த்ரயமிவ ॥ 53 ॥

பவித்ரீகர்தும் நஃ பஶுபதிபராதீநஹ்ரு'தயே

தயாமித்ரைர்நேத்ரைரருணதவலஶ்யாமருசிபிஃ ।

நதஃ ஶோணோ கங்கா தபநதநயேதி த்ருவமமும்

த்ரயாணாம் தீர்தாநாமுபநயஸி ஸம்பேதமநகம் ॥ 54 ॥

நிமேஷோந்மேஷாப்யாம் ப்ரலயமுதயம் யாதி ஜகதீ

தவேத்யாஹுஃ ஸந்தோ தரணிதரராஜந்யதநயே ।

த்வதுந்மேஷாஜ்ஜாதம் ஜகதிதமஶேஷம் ப்ரலயதஃ

பரித்ராதும் ஶங்கே பரிஹ்ரு'தநிமேஷாஸ்தவ த்ரு'ஶஃ ॥ 55 ॥

தவாபர்ணே கர்ணேஜபநயநபைஶுந்யசகிதா

நிலீயந்தே தோயே நியதமநிமேஷாஃ ஶபரிகாஃ ।

இயம் ச ஶ்ரீர்பத்தச்சதபுடகவாடம் குவலயம்

ஜஹாதி ப்ரத்யூஷே நிஶி ச விகடய்ய ப்ரவிஶதி ॥ 56 ॥

த்ரு'ஶா த்ராகீயஸ்யா தரதலிதநீலோத்பலருசா

தவீயாம்ஸம் தீநம் ஸ்நபய க்ரு'பயா மாமபி ஶிவே ।

அநேநாயம் தந்யோ பவதி ந ச தே ஹாநிரியதா

வநே வா ஹர்ம்யே வா ஸமகரநிபாதோ ஹிமகரஃ ॥ 57 ॥

அராலம் தே பாலீயுகலமகராஜந்யதநயே

ந கேஷாமாதத்தே குஸுமஶரகோதண்டகுதுகம் ।

திரஶ்சீநோ யத்ர ஶ்ரவணபதமுல்லங்க்ய விலஸ-

ந்நபாங்கவ்யாஸங்கோ திஶதி ஶரஸந்தாநதிஷணாம் ॥ 58 ॥

ஸ்புரத்கண்டாபோகப்ரதிபலிததாடங்கயுகலம்

சதுஶ்சக்ரம் மந்யே தவ முகமிதம் மந்மதரதம் ।

யமாருஹ்ய த்ருஹ்யத்யவநிரதமர்கேந்துசரணம்

மஹாவீரோ மாரஃ ப்ரமதபதயே ஸஜ்ஜிதவதே ॥ 59 ॥

ஸரஸ்வத்யாஃ ஸூக்தீரம்ரு'தலஹரீகௌஶலஹரீஃ

பிபந்த்யாஃ ஶர்வாணி ஶ்ரவணசுலுகாப்யாமவிரலம் ।

சமத்காரஶ்லாகாசலிதஶிரஸஃ குண்டலகணோ

சணத்காரைஸ்தாரைஃ ப்ரதிவசநமாசஷ்ட இவ தே ॥ 60 ॥

அஸௌ நாஸாவம்ஶஸ்துஹிநகிரிவம்ஶத்வஜபடி

த்வதீயோ நேதீயஃ பலது பலமஸ்மாகமுசிதம் ।

வஹந்நந்தர்முக்தாஃ ஶிஶிரதரநிஶ்வாஸகலிதம்

ஸம்ரு'த்த்யா யத்தாஸாம் பஹிரபி ச முக்தாமணிதரஃ ॥ 61 ॥

ப்ரக்ரு'த்யா ரக்தாயாஸ்தவ ஸுததி தந்தச்சதருசேஃ

ப்ரவக்ஷ்யே ஸாத்ரு'ஶ்யம் ஜநயது பலம் வித்ருமலதா ।

ந பிம்பம் தத்பிம்பப்ரதிபலநராகாதருணிதம்

துலாமத்யாரோடும் கதமிவ விலஜ்ஜேத கலயா ॥ 62 ॥

ஸ்மிதஜ்யோத்ஸ்நாஜாலம் தவ வதநசந்த்ரஸ்ய பிபதாம்

சகோராணாமாஸீததிரஸதயா சஞ்சுஜடிமா ।

அதஸ்தே ஶீதாம்ஶோரம்ரு'தலஹரீமம்லருசயஃ

பிபந்தி ஸ்வச்சந்தம் நிஶி நிஶி ப்ரு'ஶம் காஞ்ஜிகதியா ॥ 63 ॥

அவிஶ்ராந்தம் பத்யுர்குணகணகதாம்ரேடநஜபா

ஜபாபுஷ்பச்சாயா தவ ஜநநி ஜிஹ்வா ஜயதி ஸா ।

யதக்ராஸீநாயாஃ ஸ்படிகத்ரு'ஷதச்சச்சவிமயீ

ஸரஸ்வத்யா மூர்திஃ பரிணமதி மாணிக்யவபுஷா ॥ 64 ॥

ரணே ஜித்வா தைத்யாநபஹ்ரு'தஶிரஸ்த்ரைஃ கவசிபிர்-

நிவ்ரு'த்தைஶ்சண்டாம்ஶத்ரிபுரஹரநிர்மால்யவிமுகைஃ ।

விஶாகேந்த்ரோபேந்த்ரைஃ ஶஶிவிஶதகர்பூரஶகலா

விலீயந்தே மாதஸ்தவ வதநதாம்பூலகபலாஃ ॥ 65 ॥

விபஞ்ச்யா காயந்தீ விவிதமபதாநம் பஶுபதேஃ

த்வயாரப்தே வக்தும் சலிதஶிரஸா ஸாதுவசநே ।

ததீயைர்மாதுர்யைரபலபிததந்த்ரீகலரவாம்

நிஜாம் வீணாம் வாணீ நிசுலயதி சோலேந நிப்ரு'தம் ॥ 66 ॥

கராக்ரேண ஸ்ப்ரு'ஷ்டம் துஹிநகிரிணா வத்ஸலதயா

கிரீஶேநோதஸ்தம் முஹுரதரபாநாகுலதயா ।

கரக்ராஹ்யம் ஶம்போர்முகமுகுரவ்ரு'ந்தம் கிரிஸுதே

கதங்காரம் ப்ரூமஸ்தவ சிபுகமௌபம்யரஹிதம் ॥ 67 ॥

புஜாஶ்லேஷாந் நித்யம் புரதமயிதுஃ கண்டகவதீ

தவ க்ரீவா தத்தே முககமலநாலஶ்ரியமியம் ।

ஸ்வதஃ ஶ்வேதா காலாகுருபஹுலஜம்பாலமலிநா

ம்ரு'ணாலீலாலித்யம் வஹதி யததோ ஹாரலதிகா ॥ 68 ॥

கலே ரேகாஸ்திஸ்ரோ கதிகமககீதைகநிபுணே

விவாஹவ்யாநத்தப்ரகுணகுணஸங்க்யாப்ரதிபுவஃ ।

விராஜந்தே நாநாவிதமதுரராகாகரபுவாம்

த்ரயாணாம் க்ராமாணாம் ஸ்திதிநியமஸீமாந இவ தே ॥ 69 ॥

ம்ரு'ணாலீம்ரு'த்வீநாம் தவ புஜலதாநாம் சதஸ்ரு'ணாம்

சதுர்பிஃ ஸௌந்தர்யம் ஸரஸிஜபவஃ ஸ்தௌதி வதநைஃ ।

நகேப்யஃ ஸந்த்ரஸ்யந் ப்ரதமமதநாதந்தகரிபோ-

ஶ்சதுர்ணாம் ஶீர்ஷாணாம் ஸமமபயஹஸ்தார்பணதியா ॥ 70 ॥

நகாநாமுத்த்யோதைர்நவநலிநராகம் விஹஸதாம்

கராணாம் தே காந்திம் கதய கதயாமஃ கதமுமே ।

கயாசித்வா ஸாம்யம் பஜது கலயா ஹந்த கமலம்

யதி க்ரீடல்லக்ஷ்மீசரணதலலாக்ஷாரஸசணம் ॥ 71 ॥

ஸமம் தேவி ஸ்கந்தத்விபவதநபீதம் ஸ்தநயுகம்

தவேதம் நஃ கேதம் ஹரது ஸததம் ப்ரஸ்நுதமுகம் ।

யதாலோக்யாஶங்காகுலிதஹ்ரு'தயோ ஹாஸஜநகஃ

ஸ்வகும்பௌ ஹேரம்பஃ பரிம்ரு'ஶதி ஹஸ்தேந சடிதி ॥ 72 ॥

அமூ தே வக்ஷோஜாவம்ரு'தரஸமாணிக்யகுதுபௌ

ந ஸந்தேஹஸ்பந்தோ நகபதிபதாகே மநஸி நஃ ।

பிபந்தௌ தௌ யஸ்மாதவிதிதவதூஸங்கரஸிகௌ

குமாராவத்யாபி த்விரதவதநக்ரௌஞ்சதலநௌ ॥ 73 ॥

வஹத்யம்ப ஸ்தம்பேரமதநுஜகும்பப்ரக்ரு'திபிஃ

ஸமாரப்தாம் முக்தாமணிபிரமலாம் ஹாரலதிகாம் ।

குசாபோகோ பிம்பாதரருசிபிரந்தஃ ஶபலிதாம்

ப்ரதாபவ்யாமிஶ்ராம் புரதமயிதுஃ கீர்திமிவ தே ॥ 74 ॥

தவ ஸ்தந்யம் மந்யே தரணிதரகந்யே ஹ்ரு'தயதஃ

பயஃபாராவாரஃ பரிவஹதி ஸாரஸ்வதமிவ ।

தயாவத்யா தத்தம் த்ரவிடஶிஶுராஸ்வாத்ய தவ யத்

கவீநாம் ப்ரௌடாநாமஜநி கமநீயஃ கவயிதா ॥ 75 ॥

ஹரக்ரோதஜ்வாலாவலிபிரவலீடேந வபுஷா

கபீரே தே நாபீஸரஸி க்ரு'தஸங்கோ மநஸிஜஃ ।

ஸமுத்தஸ்தௌ தஸ்மாதசலதநயே தூமலதிகா

ஜநஸ்தாம் ஜாநீதே தவ ஜநநி ரோமாவலிரிதி ॥ 76 ॥

யதேதத் காலிந்தீதநுதரதரங்காக்ரு'தி ஶிவே

க்ரு'ஶே மத்யே கிஞ்சிஜ்ஜநநி தவ யத்பாதி ஸுதியாம் ।

விமர்தாதந்யோऽந்யம் குசகலஶயோரந்தரகதம்

தநூபூதம் வ்யோம ப்ரவிஶதிவ நாபிம் குஹரிணீம் ॥ 77 ॥

ஸ்திரோ கங்காவர்தஃ ஸ்தநமுகுலரோமாவலிலதா-

கலாவாலம் குண்டம் குஸுமஶரதேஜோஹுதபுஜஃ ।

ரதேர்லீலாகாரம் கிமபி தவ நாபிர்கிரிஸுதே

பிலத்வாரம் ஸித்தேர்கிரிஶநயநாநாம் விஜயதே ॥ 78 ॥

நிஸர்கக்ஷீணஸ்ய ஸ்தநதடபரேண க்லமஜுஷோ

நமந்மூர்தேர்நாரீதிலக ஶநகைஸ்த்ருட்யத இவ ।

சிரம் தே மத்யஸ்ய த்ருடிததடிநீதீரதருணா

ஸமாவஸ்தாஸ்தேம்நோ பவது குஶலம் ஶைலதநயே ॥ 79 ॥

குசௌ ஸத்யஃஸ்வித்யத்தடகடிதகூர்பாஸபிதுரௌ

கஷந்தௌ தோர்மூலே கநககலஶாபௌ கலயதா ।

தவ த்ராதும் பங்காதலமிதி வலக்நம் தநுபுவா

த்ரிதா நத்தம் தேவி த்ரிவலி லவலீவல்லிபிரிவ ॥ 80 ॥

குருத்வம் விஸ்தாரம் க்ஷிதிதரபதிஃ பார்வதி நிஜா-

ந்நிதம்பாதாச்சித்ய த்வயி ஹரணரூபேண நிததே ।

அதஸ்தே விஸ்தீர்ணோ குருரயமஶேஷாம் வஸுமதீம்

நிதம்பப்ராக்பாரஃ ஸ்தகயதி லகுத்வம் நயதி ச ॥ 81 ॥

கரீந்த்ராணாம் ஶுண்டாந் கநககதலீகாண்டபடலீ-

முபாப்யாமூருப்யாமுபயமபி நிர்ஜித்ய பவதீ ।

ஸுவ்ரு'த்தாப்யாம் பத்யுஃ ப்ரணதிகடிநாப்யாம் கிரிஸுதே

விதிஜ்ஞே ஜாநுப்யாம் விபுதகரிகும்பத்வயமஸி ॥ 82 ॥

பராஜேதும் ருத்ரம் த்விகுணஶரகர்பௌ கிரிஸுதே

நிஷங்கௌ ஜங்கே தே விஷமவிஶிகோ பாடமக்ரு'த ।

யதக்ரே த்ரு'ஶ்யந்தே தஶஶரபலாஃ பாதயுகலீ-

நகாக்ரச்சத்மாநஃ ஸுரமகுடஶாணைகநிஶிதாஃ ॥ 83 ॥

ஶ்ருதீநாம் மூர்தாநோ தததி தவ யௌ ஶேகரதயா

மமாப்யேதௌ மாதஃ ஶிரஸி தயயா தேஹி சரணௌ ।

யயோஃ பாத்யம் பாதஃ பஶுபதிஜடாஜூடதடிநீ

யயோர்லாக்ஷாலக்ஷ்மீரருணஹரிசூடாமணிருசிஃ ॥ 84 ॥

நமோவாகம் ப்ரூமோ நயநரமணீயாய பதயோ-

ஸ்தவாஸ்மை த்வந்த்வாய ஸ்புடருசிரஸாலக்தகவதே ।

அஸூயத்யத்யந்தம் யதபிஹநநாய ஸ்ப்ரு'ஹயதே

பஶூநாமீஶாநஃ ப்ரமதவநகங்கேலிதரவே ॥ 85 ॥

ம்ரு'ஷா க்ரு'த்வா கோத்ரஸ்கலநமத வைலக்ஷ்யநமிதம்

லலாடே பர்தாரம் சரணகமலே தாடயதி தே ।

சிராதந்தஃஶல்யம் தஹநக்ரு'தமுந்மூலிதவதா

துலாகோடிக்வாணைஃ கிலிகிலிதமீஶாநரிபுணா ॥ 86 ॥

ஹிமாநீஹந்தவ்யம் ஹிமகிரிநிவாஸைகசதுரௌ

நிஶாயாம் நித்ராணம் நிஶி சரமபாகே ச விஶதௌ ।

வரம் லக்ஷ்மீபாத்ரம் ஶ்ரியமதிஸ்ரு'ஜந்தௌ ஸமயிநாம்

ஸரோஜம் த்வத்பாதௌ ஜநநி ஜயதஶ்சித்ரமிஹ கிம் ॥ 87 ॥

பதம் தே கீர்தீநாம் ப்ரபதமபதம் தேவி விபதாம்

கதம் நீதம் ஸத்பிஃ கடிநகமடீகர்பரதுலாம் ।

கதம் வா பாஹுப்யாமுபயமநகாலே புரபிதா

யதாதாய ந்யஸ்தம் த்ரு'ஷதி தயமாநேந மநஸா ॥ 88 ॥

நகைர்நாகஸ்த்ரீணாம் கரகமலஸங்கோசஶஶிபி-

ஸ்தரூணாம் திவ்யாநாம் ஹஸத இவ தே சண்டி சரணௌ ।

பலாநி ஸ்வஃஸ்தேப்யஃ கிஸலயகராக்ரேண தததாம்

தரித்ரேப்யோ பத்ராம் ஶ்ரியமநிஶமஹ்நாய தததௌ ॥ 89 ॥

ததாநே தீநேப்யஃ ஶ்ரியமநிஶமாஶாநுஸத்ரு'ஶீ-

மமந்தம் ஸௌந்தர்யப்ரகரமகரந்தம் விகிரதி ।

தவாஸ்மிந் மந்தாரஸ்தபகஸுபகே யாது சரணே

நிமஜ்ஜந்மஜ்ஜீவஃ கரணசரணஃ ஷட்சரணதாம் ॥ 90 ॥

பதந்யாஸக்ரீடாபரிசயமிவாரப்துமநஸஃ

ஸ்கலந்தஸ்தே கேலம் பவநகலஹம்ஸா ந ஜஹதி ।

அதஸ்தேஷாம் ஶிக்ஷாம் ஸுபகமணிமஞ்ஜீரரணித-

ச்சலாதாசக்ஷாணம் சரணகமலம் சாருசரிதே ॥ 91 ॥

கதாஸ்தே மஞ்சத்வம் த்ருஹிணஹரிருத்ரேஶ்வரப்ரு'தஃ

ஶிவஃ ஸ்வச்சச்சாயாகடிதகபடப்ரச்சதபடஃ ।

த்வதீயாநாம் பாஸாம் ப்ரதிபலநராகாருணதயா

ஶரீரீ ஶ்ரு'ங்காரோ ரஸ இவ த்ரு'ஶாம் தோக்தி குதுகம் ॥ 92 ॥

அராலா கேஶேஷு ப்ரக்ரு'திஸரலா மந்தஹஸிதே

ஶிரீஷாபா சித்தே த்ரு'ஷதுபலஶோபா குசதடே ।

ப்ரு'ஶம் தந்வீ மத்யே ப்ரு'துருரஸிஜாரோஹவிஷயே

ஜகத்த்ராதும் ஶம்போர்ஜயதி கருணா காசிதருணா ॥ 93 ॥

கலங்கஃ கஸ்தூரீ ரஜநிகரபிம்பம் ஜலமயம்

கலாபிஃ கர்பூரைர்மரகதகரண்டம் நிபிடிதம் ।

அதஸ்த்வத்போகேந ப்ரதிதிநமிதம் ரிக்தகுஹரம்

விதிர்பூயோ பூயோ நிபிடயதி நூநம் தவ க்ரு'தே ॥ 94 ॥

புராராதேரந்தஃபுரமஸி ததஸ்த்வச்சரணயோஃ

ஸபர்யாமர்யாதா தரலகரணாநாமஸுலபா ।

ததா ஹ்யேதே நீதாஃ ஶதமகமுகாஃ ஸித்திமதுலாம்

தவ த்வாரோபாந்தஸ்திதிபிரணிமாத்யாபிரமராஃ ॥ 95 ॥

கலத்ரம் வைதாத்ரம் கதிகதி பஜந்தே ந கவயஃ

ஶ்ரியோ தேவ்யாஃ கோ வா ந பவதி பதிஃ கைரபி தநைஃ ।

மஹாதேவம் ஹித்வா தவ ஸதி ஸதீநாமசரமே

குசாப்யாமாஸங்கஃ குரவகதரோரப்யஸுலபஃ ॥ 96 ॥

கிராமாஹுர்தேவீம் த்ருஹிணக்ரு'ஹிணீமாகமவிதோ

ஹரேஃ பத்நீம் பத்மாம் ஹரஸஹசரீமத்ரிதநயாம் ।

துரீயா காபி த்வம் துரதிகமநிஃஸீமமஹிமா

மஹாமாயா விஶ்வம் ப்ரமயஸி பரப்ரஹ்மமஹிஷி ॥ 97 ॥

கதா காலே மாதஃ கதய கலிதாலக்தகரஸம்

பிபேயம் வித்யார்தீ தவ சரணநிர்ணேஜநஜலம் ।

ப்ரக்ரு'த்யா மூகாநாமபி ச கவிதாகாரணதயா

கதா தத்தே வாணீமுககமலதாம்பூலரஸதாம் ॥ 98 ॥

ஸரஸ்வத்யா லக்ஷ்ம்யா விதிஹரிஸபத்நோ விஹரதே

ரதேஃ பாதிவ்ரத்யம் ஶிதிலயதி ரம்யேண வபுஷா ।

சிரம் ஜீவந்நேவ க்ஷபிதபஶுபாஶவ்யதிகரஃ

பராநந்தாபிக்யம் ரஸயதி ரஸம் த்வத்பஜநவாந் ॥ 99 ॥

ப்ரதீபஜ்வாலாபிர்திவஸகரநீராஜநவிதிஃ

ஸுதாஸூதேஶ்சந்த்ரோபலஜலலவைரர்க்யரசநா ।

ஸ்வகீயைரம்போபிஃ ஸலிலநிதிஸௌஹித்யகரணம்

த்வதீயாபிர்வாக்பிஸ்தவ ஜநநி வாசாம் ஸ்துதிரியம் ॥ 100 ॥

ஸௌந்தர்யலஹரி முக்யஸ்தோத்ரம் ஸம்வார்ததாயகம் ।

பகவத்பாத ஸந்க்லுப்தம் படேந் முக்தௌ பவேந்நரஃ ॥

॥ இதி ஶ்ரீமத்பரமஹம்ஸபரிவ்ராஜகாசார்யஸ்ய

ஶ்ரீகோவிந்தபகவத்பூஜ்யபாதஶிஷ்யஸ்ய

ஶ்ரீமச்சங்கரபகவதஃ க்ரு'தௌ ஸௌந்தர்யலஹரீ ஸம்பூர்ணா ॥

॥ ௐ தத்ஸத் ॥

(அநுபந்தஃ)

ஸமாநீதஃ பத்ப்யாம் மணிமுகுரதாமம்பரமணி-

ர்பயாதாஸ்யாதந்தஃஸ்திமிதகிரணஶ்ரேணிமஸ்ரு'ணஃ ।

(பாடபேதஃ - பயாதாஸ்ய ஸ்நிக்தஸ்த்மித, பயாதாஸ்யஸ்யாந்தஃஸ்த்மித)

ததாதி த்வத்வக்த்ரம்ப்ரதிபலநமஶ்ராந்தவிகசம்

நிராதங்கம் சந்த்ராந்நிஜஹ்ரு'தயபங்கேருஹமிவ ॥ 101 ॥

ஸமுத்பூதஸ்தூலஸ்தநபரமுரஶ்சாரு ஹஸிதம்

கடாக்ஷே கந்தர்பஃ கதிசந கதம்பத்யுதி வபுஃ ।

ஹரஸ்ய த்வத்ப்ராந்திம் மநஸி ஜநயந்தி ஸ்ம விமலாஃ

பாடபேதஃ - ஜநயாமாஸ மதநோ, ஜநயந்தஃ ஸமதுலாம், ஜநயந்தா ஸுவதநே

பவத்யா யே பக்தாஃ பரிணதிரமீஷாமியமுமே ॥ 102 ॥

நிதே நித்யஸ்மேரே நிரவதிகுணே நீதிநிபுணே

நிராகாதஜ்ஞாநே நியமபரசித்தைகநிலயே ।

நியத்யா நிர்முக்தே நிகிலநிகமாந்தஸ்துதிபதே

நிராதங்கே நித்யே நிகமய மமாபி ஸ்துதிமிமாம் ॥ 103 ॥

Roman (IAST) Transliteration

prathama bhāgaḥ - ānanda lahari

bhumauskhalita pādānāṃ bhūmirevā valambanam |

tvayī jātā parādhānāṃ tvameva śaraṇaṃ śive ||

śivaḥ śaktyā yukto yadi bhavati śaktaḥ prabhavituṃ

na cedevaṃ devo na khalu kuśalaḥ spanditumapi |

atastvāmārādhyāṃ hariharaviriñcādibhirapi

praṇantuṃ stotuṃ vā kathamakṛtapuṇyaḥ prabhavati || 1 ||

tanīyāṃsaṃ pāṃsuṃ tava caraṇapaṅkeruhabhavaṃ

viriñcissañcinvan viracayati lokānavikalam |

vahatyenaṃ śauriḥ kathamapi sahasreṇa śirasāṃ

harassaṅkṣudyainaṃ bhajati bhasitoddhūlanavidhim || 2 ||

avidyānāmanta-stimira-mihiradvīpanagarī

jaḍānāṃ caitanya-stabaka-makaranda-srutijharī |

daridrāṇāṃ cintāmaṇiguṇanikā janmajaladhau

nimagnānāṃ daṃṣṭrā muraripu-varāhasya bhavati || 3 ||

tvadanyaḥ pāṇibhyāmabhayavarado daivatagaṇaḥ

tvamekā naivāsi prakaṭitavarābhītyabhinayā |

bhayāt trātuṃ dātuṃ phalamapi ca vāñchāsamadhikaṃ

śaraṇye lokānāṃ tava hi caraṇāveva nipuṇau || 4 ||

haristvāmārādhya praṇatajanasaubhāgyajananīṃ

purā nārī bhūtvā puraripumapi kṣobhamanayat |

smaro'pi tvāṃ natvā ratinayanalehyena vapuṣā

munīnāmapyantaḥ prabhavati hi mohāya mahatām || 5 ||

dhanuḥ pauṣpaṃ maurvī madhukaramayī pañca viśikhāḥ

vasantaḥ sāmanto malayamarudāyodhanarathaḥ |

tathāpyekaḥ sarvaṃ himagirisute kāmapi kṛpām

apāṅgātte labdhvā jagadida-manaṅgo vijayate || 6 ||

kvaṇatkāñcīdāmā karikalabhakumbhastananatā

parikṣīṇā madhye pariṇataśaraccandravadanā |

dhanurbāṇān pāśaṃ sṛṇimapi dadhānā karatalaiḥ

purastādāstāṃ naḥ puramathiturāhopuruṣikā || 7 ||

sudhāsindhormadhye suraviṭapivāṭīparivṛte

maṇidvīpe nīpopavanavati cintāmaṇigṛhe |

śivākāre mañce paramaśivaparyaṅkanilayāṃ

bhajanti tvāṃ dhanyāḥ katicana cidānandalaharīm || 8 ||

mahīṃ mūlādhāre kamapi maṇipūre hutavahaṃ

sthitaṃ svādhiṣṭhāne hṛdi marutamākāśamupari |

mano'pi bhrūmadhye sakalamapi bhitvā kulapathaṃ

sahasrāre padme saha rahasi patyā viharase || 9 ||

sudhādhārāsāraiścaraṇayugalāntarvigalitaiḥ

prapañcaṃ siñcantī punarapi rasāmnāyamahasaḥ |

avāpya svāṃ bhūmiṃ bhujaganibhamadhyuṣṭavalayaṃ

svamātmānaṃ kṛtvā svapiṣi kulakuṇḍe kuhariṇi || 10 ||

caturbhiḥ śrīkaṇṭhaiḥ śivayuvatibhiḥ pañcabhirapi

prabhinnābhiḥ śambhornavabhirapi mūlaprakṛtibhiḥ |

catuścatvāriṃśadvasudalakalāśratrivalaya- [trayaścatvāri]

trirekhābhiḥ sārdhaṃ tava śaraṇakoṇāḥ pariṇatāḥ || 11 || [caraṇakoṇāḥ, bhavanakiṇāḥ]

tvadīyaṃ saundaryaṃ tuhinagirikanye tulayituṃ

kavīndrāḥ kalpante kathamapi viriñciprabhṛtayaḥ |

yadālokautsukyādamaralalanā yānti manasā

tapobhirduṣprāpāmapi giriśasāyujyapadavīm || 12 ||

naraṃ varṣīyāṃsaṃ nayanavirasaṃ narmasu jaḍaṃ

tavāpāṅgāloke patitamanudhāvanti śataśaḥ |

galadveṇībandhāḥ kucakalaśavisrastasicayā

haṭhāt truṭyatkāñcyo vigalitadukūlā yuvatayaḥ || 13 ||

kṣitau ṣaṭpañcāśad dvisamadhikapañcāśadudake

hutāśe dvāṣaṣṭiścaturadhikapañcāśadanile |

divi dviṣṣaṭtriṃśanmanasi ca catuṣṣaṣṭiriti ye

mayūkhāsteṣāmapyupari tava pādāmbujayugam || 14 ||

śarajjyotsnāśuddhāṃ śaśiyutajaṭājūṭamakuṭāṃ

varatrāsatrāṇasphaṭikaghaṭikāpustakakarām |

sakṛnna tvā natvā kathamiva satāṃ sannnidadhate

madhukṣīradrākṣāmadhurimadhurīṇāḥ bhaṇitayaḥ || 15|| [phaṇitayaḥ]

kavīndrāṇāṃ cetaḥkamalavanabālātaparuciṃ

bhajante ye santaḥ katicidaruṇāmeva bhavatīm |

viriñcipreyasyāstaruṇataraśṛṅgāralaharī-

gabhīrābhirvāgbhirvidadhati satāṃ rañjanamamī || 16 ||

savitrībhirvācāṃ śaśimaṇiśilābhaṅgarucibhiḥ

vaśinyādyābhistvāṃ saha janani sañcintayati yaḥ |

sa kartā kāvyānāṃ bhavati mahatāṃ bhaṅgirucibhiḥ

vacobhirvāgdevīvadanakamalāmodamadhuraiḥ || 17 ||

tanucchāyābhiste taruṇataraṇiśrīsaraṇibhiḥ

divaṃ sarvāmurvīmaruṇimani magnāṃ smarati yaḥ |

bhavantyasya trasyadvanahariṇaśālīnanayanāḥ

sahorvaśyā vaśyāḥ kati kati na gīrvāṇagaṇikāḥ || 18 ||

mukhaṃ binduṃ kṛtvā kucayugamadhastasya tadadho

harārdhaṃ dhyāyedyo haramahiṣi te manmathakalām |

sa sadyaḥ saṅkṣobhaṃ nayati vanitā ityatilaghu

trilokīmapyāśu bhramayati ravīndustanayugām || 19 ||

kirantīmaṅgebhyaḥ kiraṇanikurambāmṛtarasaṃ

hṛdi tvāmādhatte himakaraśilāmūrtimiva yaḥ |

sa sarpāṇāṃ darpaṃ śamayati śakuntādhipa iva

jvarapluṣṭān dṛṣṭyā sukhayati sudhādhārasirayā || 20 ||

taṭillekhātanvīṃ tapanaśaśivaiśvānaramayīṃ

niṣaṇṇāṃ ṣaṇṇāmapyupari kamalānāṃ tava kalām |

mahāpadmāṭavyāṃ mṛditamalamāyena manasā

mahāntaḥ paśyanto dadhati paramāhlādalaharīm || 21 ||

bhavāni tvaṃ dāse mayi vitara dṛṣṭiṃ sakaruṇā-

miti stotuṃ vāñchan kathayati bhavāni tvamiti yaḥ |

tadaiva tvaṃ tasmai diśasi nijasāyujyapadavīṃ

mukundabrahmendrasphuṭamakuṭanīrājitapadām || 22 ||

tvayā hṛtvā vāmaṃ vapurapari-tṛptena manasā

śarīrārdhaṃ śambhoraparamapi śaṅke hṛtamabhūt |

yadetattvadrūpaṃ sakalamaruṇābhaṃ trinayanaṃ

kucābhyāmānamraṃ kuṭilaśaśicūḍālamakuṭam || 23 ||

jagatsūte dhātā hariravati rudraḥ kṣapayate

tiraskurvannetatsvamapi vapurīśastirayati |

sadāpūrvaḥ sarvaṃ tadidamanugṛhṇāti ca śiva-

stavājñāmālambya kṣaṇacalitayorbhrūlatikayoḥ || 24 ||

trayāṇāṃ devānāṃ triguṇajanitānāṃ tava śive

bhavet pūjā pūjā tava caraṇayoryā viracitā |

tathā hi tvatpādodvahanamaṇipīṭhasya nikaṭe

sthitā hyete śaśvanmukulitakarottaṃsamakuṭāḥ || 25 ||

viriñciḥ pañcatvaṃ vrajati harirāpnoti viratiṃ

vināśaṃ kīnāśo bhajati dhanado yāti nidhanam |

vitandrī māhendrī vitatirapi sammīlitadṛśā

mahāsaṃhāre'smin viharati sati tvatpatirasau || 26 ||

japo jalpaḥ śilpaṃ sakalamapi mudrāviracanā

gatiḥ prādakṣiṇyakramaṇamaśanādyāhutividhiḥ |

praṇāmassaṃveśassukhamakhilamātmārpaṇadṛśā

saparyāparyāyastava bhavatu yanme vilasitam || 27 ||

sudhāmapyāsvādya pratibhayajarāmṛtyuhariṇīṃ

vipadyante viśve vidhiśatamakhādyā diviṣadaḥ |

karālaṃ yatkṣvelaṃ kabalitavataḥ kālakalanā

na śambhostanmūlaṃ tava janani tāṭaṅkamahimā || 28 ||

kirīṭaṃ vairiñcaṃ parihara puraḥ kaiṭabhabhidaḥ

kaṭhore koṭīre skhalasi jahi jambhārimukuṭam |

praṇamreṣveteṣu prasabhamupayātasya bhavanaṃ

bhavasyābhyutthāne tava parijanoktirvijayate || 29 ||

svadehodbhūtābhirghṛṇibhiraṇimādyābhirabhito

niṣevye nitye tvāmahamiti sadā bhāvayati yaḥ |

kimāścaryaṃ tasya trinayanasamṛddhiṃ tṛṇayato

mahāsaṃvartāgnirviracayati nirājanavidhim || 30 ||

catuṣṣaṣṭyā tantraiḥ sakalamatisandhāya bhuvanaṃ

sthitastattatsiddhiprasavaparatantraiḥ paśupatiḥ |

punastvannirbandhādakhilapuruṣārthaikaghaṭanā-

svatantraṃ te tantraṃ kṣititalamavātītaradidam || 31 ||

śivaḥ śaktiḥ kāmaḥ kṣitiratha raviḥ śītakiraṇaḥ

smaro haṃsaḥ śakrastadanu ca parāmāraharayaḥ |

amī hṛllekhābhistisṛbhiravasāneṣu ghaṭitā

bhajante varṇāste tava janani nāmāvayavatām || 32 ||

smaraṃ yoniṃ lakṣmīṃ tritayamidamādau tava mano-

rnidhāyaike nitye niravadhimahābhogarasikāḥ |

bhajanti tvāṃ cintāmaṇigunanibaddhākṣavalayāḥ

śivāgnau juhvantaḥ surabhighṛtadhārāhutiśataiḥ || 33 ||

śarīraṃ tvaṃ śambhoḥ śaśimihiravakṣoruhayugaṃ

tavātmānaṃ manye bhagavati navātmānamanagham |

ataśśeṣaśśeṣītyayamubhayasādhāraṇatayā

sthitaḥ sambandho vāṃ samarasaparānandaparayoḥ || 34 ||

manastvaṃ vyoma tvaṃ marudasi marutsārathirasi

tvamāpastvaṃ bhūmistvayi pariṇatāyāṃ na hi param |

tvameva svātmānaṃ pariṇamayituṃ viśvavapuṣā

cidānandākāraṃ śivayuvati bhāvena bibhṛṣe || 35 ||

tavājñācakrasthaṃ tapanaśaśikoṭidyutidharaṃ

paraṃ śambhuṃ vande parimilitapārśvaṃ paracitā |

yamārādhyan bhaktyā raviśaśiśucīnāmaviṣaye

nirāloke'loke nivasati hi bhālokabhuvane || 36 ||

viśuddhau te śuddhasphaṭikaviśadaṃ vyomajanakaṃ

śivaṃ seve devīmapi śivasamānavyavasitām |

yayoḥ kāntyā yāntyāḥ śaśikiraṇasārūpyasaraṇe-

vidhūtāntardhvāntā vilasati cakorīva jagatī || 37 ||

samunmīlat saṃvit kamalamakarandaikarasikaṃ

bhaje haṃsadvandvaṃ kimapi mahatāṃ mānasacaram |

yadālāpādaṣṭādaśaguṇitavidyāpariṇati-

ryadādatte doṣād guṇamakhilamadbhyaḥ paya iva || 38 ||

tava svādhiṣṭhāne hutavahamadhiṣṭhāya nirataṃ

tamīḍe saṃvartaṃ janani mahatīṃ tāṃ ca samayām |

yadāloke lokān dahati mahati krodhakalite

dayārdrā yā dṛṣṭiḥ śiśiramupacāraṃ racayati || 39 ||

taṭittvantaṃ śaktyā timiraparipanthisphuraṇayā

sphurannānāratnābharaṇapariṇaddhendradhanuṣam |

tava śyāmaṃ meghaṃ kamapi maṇipūraikaśaraṇaṃ

niṣeve varṣantaṃ haramihirataptaṃ tribhuvanam || 40 ||

tavādhāre mūle saha samayayā lāsyaparayā

navātmānaṃ manye navarasamahātāṇḍavanaṭam |

ubhābhyāmetābhyāmudayavidhimuddiśya dayayā

sanāthābhyāṃ jajñe janakajananīmajjagadidam || 41 ||

dvitīya bhāgaḥ - saundarya laharī

gatairmāṇikyatvaṃ gaganamaṇibhiḥ sāndraghaṭitaṃ

kirīṭaṃ te haimaṃ himagirisute kīrtayati yaḥ |

sa nīḍeyacchāyācchuraṇaśabalaṃ candraśakalaṃ

dhanuḥ śaunāsīraṃ kimiti na nibadhnāti dhiṣaṇām || 42 ||

dhunotu dhvāntaṃ nastulitadalitendīvaravanaṃ

ghanasnigdhaślakṣṇaṃ cikuranikurumbaṃ tava śive |

yadīyaṃ saurabhyaṃ sahajamupalabdhuṃ sumanaso

vasantyasmin manye valamathanavāṭīviṭapinām || 43 ||

tanotu kṣemaṃ nastava vadanasaundaryalaharī-

parīvāhasrotaḥsaraṇiriva sīmantasaraṇiḥ |

vahantī sindūraṃ prabalakabarībhāratimira-

dviṣāṃ bṛndairbandīkṛtamiva navīnārkakiraṇam || 44 ||

arālaiḥ svābhāvyādalikalabhasaśrībhiralakaiḥ

parītaṃ te vaktraṃ parihasati paṅkeruharucim |

darasmere yasmin daśanarucikiñjalkarucire

sugandhau mādyanti smaradahanacakṣurmadhulihaḥ || 45 ||

lalāṭaṃ lāvaṇyadyutivimalamābhāti tava ya-

ddvitīyaṃ tanmanye makuṭaghaṭitaṃ candraśakalam |

viparyāsanyāsādubhayamapi sambhūya ca mithaḥ

sudhālepasyūtiḥ pariṇamati rākāhimakaraḥ || 46 ||

bhruvau bhugne kiñcidbhuvanabhayabhaṅgavyasanini

tvadīye netrābhyāṃ madhukararucibhyāṃ dhṛtaguṇam |

dhanurmanye savyetarakaragṛhītaṃ ratipateḥ

prakoṣṭhe muṣṭau ca sthagayati nigūḍhāntaramume || 47 ||

ahaḥ sūte savyaṃ tava nayanamarkātmakatayā

triyāmāṃ vāmaṃ te sṛjati rajanīnāyakatayā |

tṛtīyā te dṛṣṭirdaradalitahemāmbujaruciḥ

samādhatte sandhyāṃ divasaniśayorantaracarīm || 48 ||

viśālā kalyāṇī sphuṭarucirayodhyā kuvalayaiḥ

kṛpādhārādhārā kimapi madhurābhogavatikā |

avantī dṛṣṭiste bahunagaravistāravijayā

dhruvaṃ tattannāmavyavaharaṇayogyā vijayate || 49 ||

kavīnāṃ sandarbhastabakamakarandaikarasikaṃ

kaṭākṣavyākṣepabhramarakalabhau karṇayugalam |

amuñcantau dṛṣṭvā tava navarasāsvādataralā-

vasūyāsaṃsargādalikanayanaṃ kiñcidaruṇam || 50 ||

śive śṛṅgārārdrā taditarajane kutsanaparā

saroṣā gaṅgāyāṃ giriśacarite vismayavatī |

harāhibhyo bhītā sarasiruhasaubhāgyajananī (jayinī)

sakhīṣu smerā te mayi jananī dṛṣṭiḥ sakaruṇā || 51 ||

gate karṇābhyarṇaṃ garuta iva pakṣmāṇi dadhatī

purāṃ bhettuścittapraśamarasavidrāvaṇaphale |

ime netre gotrādharapatikulottaṃsakalike

tavākarṇākṛṣṭasmaraśaravilāsaṃ kalayataḥ || 52 ||

vibhaktatraivarṇyaṃ vyatikaritalīlāñjanatayā

vibhāti tvannetratritayamidamīśānadayite |

punaḥ sraṣṭuṃ devān druhiṇaharirudrānuparatān

rajaḥ sattvaṃ bibhrattama iti guṇānāṃ trayamiva || 53 ||

pavitrīkartuṃ naḥ paśupatiparādhīnahṛdaye

dayāmitrairnetrairaruṇadhavalaśyāmarucibhiḥ |

nadaḥ śoṇo gaṅgā tapanatanayeti dhruvamamuṃ

trayāṇāṃ tīrthānāmupanayasi sambhedamanagham || 54 ||

nimeṣonmeṣābhyāṃ pralayamudayaṃ yāti jagatī

tavetyāhuḥ santo dharaṇidhararājanyatanaye |

tvadunmeṣājjātaṃ jagadidamaśeṣaṃ pralayataḥ

paritrātuṃ śaṅke parihṛtanimeṣāstava dṛśaḥ || 55 ||

tavāparṇe karṇejapanayanapaiśunyacakitā

nilīyante toye niyatamanimeṣāḥ śapharikāḥ |

iyaṃ ca śrīrbaddhacchadapuṭakavāṭaṃ kuvalayam

jahāti pratyūṣe niśi ca vighaṭayya praviśati || 56 ||

dṛśā drāghīyasyā daradalitanīlotpalarucā

davīyāṃsaṃ dīnaṃ snapaya kṛpayā māmapi śive |

anenāyaṃ dhanyo bhavati na ca te hāniriyatā

vane vā harmye vā samakaranipāto himakaraḥ || 57 ||

arālaṃ te pālīyugalamagarājanyatanaye

na keṣāmādhatte kusumaśarakodaṇḍakutukam |

tiraścīno yatra śravaṇapathamullaṅghya vilasa-

nnapāṅgavyāsaṅgo diśati śarasandhānadhiṣaṇām || 58 ||

sphuradgaṇḍābhogapratiphalitatāṭaṅkayugalaṃ

catuścakraṃ manye tava mukhamidaṃ manmatharatham |

yamāruhya druhyatyavanirathamarkenducaraṇaṃ

mahāvīro māraḥ pramathapataye sajjitavate || 59 ||

sarasvatyāḥ sūktīramṛtalaharīkauśalaharīḥ

pibantyāḥ śarvāṇi śravaṇaculukābhyāmaviralam |

camatkāraślāghācalitaśirasaḥ kuṇḍalagaṇo

jhaṇatkāraistāraiḥ prativacanamācaṣṭa iva te || 60 ||

asau nāsāvaṃśastuhinagirivaṃśadhvajapaṭi

tvadīyo nedīyaḥ phalatu phalamasmākamucitam |

vahannantarmuktāḥ śiśirataraniśvāsagalitaṃ

samṛddhyā yattāsāṃ bahirapi ca muktāmaṇidharaḥ || 61 ||

prakṛtyā raktāyāstava sudati dantacchadaruceḥ

pravakṣye sādṛśyaṃ janayatu phalaṃ vidrumalatā |

na bimbaṃ tadbimbapratiphalanarāgādaruṇitaṃ

tulāmadhyāroḍhuṃ kathamiva vilajjeta kalayā || 62 ||

smitajyotsnājālaṃ tava vadanacandrasya pibatāṃ

cakorāṇāmāsīdatirasatayā cañcujaḍimā |

ataste śītāṃśoramṛtalaharīmamlarucayaḥ

pibanti svacchandaṃ niśi niśi bhṛśaṃ kāñjikadhiyā || 63 ||

aviśrāntaṃ patyurguṇagaṇakathāmreḍanajapā

japāpuṣpacchāyā tava janani jihvā jayati sā |

yadagrāsīnāyāḥ sphaṭikadṛṣadacchacchavimayī

sarasvatyā mūrtiḥ pariṇamati māṇikyavapuṣā || 64 ||

raṇe jitvā daityānapahṛtaśirastraiḥ kavacibhir-

nivṛttaiścaṇḍāṃśatripuraharanirmālyavimukhaiḥ |

viśākhendropendraiḥ śaśiviśadakarpūraśakalā

vilīyante mātastava vadanatāmbūlakabalāḥ || 65 ||

vipañcyā gāyantī vividhamapadānaṃ paśupateḥ

tvayārabdhe vaktuṃ calitaśirasā sādhuvacane |

tadīyairmādhuryairapalapitatantrīkalaravāṃ

nijāṃ vīṇāṃ vāṇī niculayati colena nibhṛtam || 66 ||

karāgreṇa spṛṣṭaṃ tuhinagiriṇā vatsalatayā

girīśenodastaṃ muhuradharapānākulatayā |

karagrāhyaṃ śambhormukhamukuravṛntaṃ girisute

kathaṅkāraṃ brūmastava cibukamaupamyarahitam || 67 ||

bhujāśleṣān nityaṃ puradamayituḥ kaṇṭakavatī

tava grīvā dhatte mukhakamalanālaśriyamiyam |

svataḥ śvetā kālāgurubahulajambālamalinā

mṛṇālīlālityaṃ vahati yadadho hāralatikā || 68 ||

gale rekhāstisro gatigamakagītaikanipuṇe

vivāhavyānaddhapraguṇaguṇasaṅkhyāpratibhuvaḥ |

virājante nānāvidhamadhurarāgākarabhuvāṃ

trayāṇāṃ grāmāṇāṃ sthitiniyamasīmāna iva te || 69 ||

mṛṇālīmṛdvīnāṃ tava bhujalatānāṃ catasṛṇāṃ

caturbhiḥ saundaryaṃ sarasijabhavaḥ stauti vadanaiḥ |

nakhebhyaḥ santrasyan prathamamathanādandhakaripo-

ścaturṇāṃ śīrṣāṇāṃ samamabhayahastārpaṇadhiyā || 70 ||

nakhānāmuddyotairnavanalinarāgaṃ vihasatāṃ

karāṇāṃ te kāntiṃ kathaya kathayāmaḥ kathamume |

kayācidvā sāmyaṃ bhajatu kalayā hanta kamalaṃ

yadi krīḍallakṣmīcaraṇatalalākṣārasachaṇam || 71 ||

samaṃ devi skandadvipavadanapītaṃ stanayugaṃ

tavedaṃ naḥ khedaṃ haratu satataṃ prasnutamukham |

yadālokyāśaṅkākulitahṛdayo hāsajanakaḥ

svakumbhau herambaḥ parimṛśati hastena jhaḍiti || 72 ||

amū te vakṣojāvamṛtarasamāṇikyakutupau

na sandehaspando nagapatipatāke manasi naḥ |

pibantau tau yasmādaviditavadhūsaṅgarasikau

kumārāvadyāpi dviradavadanakrauñcadalanau || 73 ||

vahatyamba stamberamadanujakumbhaprakṛtibhiḥ

samārabdhāṃ muktāmaṇibhiramalāṃ hāralatikām |

kucābhogo bimbādhararucibhirantaḥ śabalitāṃ

pratāpavyāmiśrāṃ puradamayituḥ kīrtimiva te || 74 ||

tava stanyaṃ manye dharaṇidharakanye hṛdayataḥ

payaḥpārāvāraḥ parivahati sārasvatamiva |

dayāvatyā dattaṃ draviḍaśiśurāsvādya tava yat

kavīnāṃ prauḍhānāmajani kamanīyaḥ kavayitā || 75 ||

harakrodhajvālāvalibhiravalīḍhena vapuṣā

gabhīre te nābhīsarasi kṛtasaṅgo manasijaḥ |

samuttasthau tasmādacalatanaye dhūmalatikā

janastāṃ jānīte tava janani romāvaliriti || 76 ||

yadetat kālindītanutarataraṅgākṛti śive

kṛśe madhye kiñcijjanani tava yadbhāti sudhiyām |

vimardādanyo'nyaṃ kucakalaśayorantaragataṃ

tanūbhūtaṃ vyoma praviśadiva nābhiṃ kuhariṇīm || 77 ||

sthiro gaṅgāvartaḥ stanamukularomāvalilatā-

kalāvālaṃ kuṇḍaṃ kusumaśaratejohutabhujaḥ |

raterlīlāgāraṃ kimapi tava nābhirgirisute

biladvāraṃ siddhergiriśanayanānāṃ vijayate || 78 ||

nisargakṣīṇasya stanataṭabhareṇa klamajuṣo

namanmūrternārītilaka śanakaistruṭyata iva |

ciraṃ te madhyasya truṭitataṭinītīrataruṇā

samāvasthāsthemno bhavatu kuśalaṃ śailatanaye || 79 ||

kucau sadyaḥsvidyattaṭaghaṭitakūrpāsabhidurau

kaṣantau dormūle kanakakalaśābhau kalayatā |

tava trātuṃ bhaṅgādalamiti valagnaṃ tanubhuvā

tridhā naddhaṃ devi trivali lavalīvallibhiriva || 80 ||

gurutvaṃ vistāraṃ kṣitidharapatiḥ pārvati nijā-

nnitambādācchidya tvayi haraṇarūpeṇa nidadhe |

ataste vistīrṇo gururayamaśeṣāṃ vasumatīṃ

nitambaprāgbhāraḥ sthagayati laghutvaṃ nayati ca || 81 ||

karīndrāṇāṃ śuṇḍān kanakakadalīkāṇḍapaṭalī-

mubhābhyāmūrubhyāmubhayamapi nirjitya bhavatī |

suvṛttābhyāṃ patyuḥ praṇatikaṭhinābhyāṃ girisute

vidhijñe jānubhyāṃ vibudhakarikumbhadvayamasi || 82 ||

parājetuṃ rudraṃ dviguṇaśaragarbhau girisute

niṣaṅgau jaṅghe te viṣamaviśikho bāḍhamakṛta |

yadagre dṛśyante daśaśaraphalāḥ pādayugalī-

nakhāgracchadmānaḥ suramakuṭaśāṇaikaniśitāḥ || 83 ||

śrutīnāṃ mūrdhāno dadhati tava yau śekharatayā

mamāpyetau mātaḥ śirasi dayayā dhehi caraṇau |

yayoḥ pādyaṃ pāthaḥ paśupatijaṭājūṭataṭinī

yayorlākṣālakṣmīraruṇaharicūḍāmaṇiruciḥ || 84 ||

namovākaṃ brūmo nayanaramaṇīyāya padayo-

stavāsmai dvandvāya sphuṭarucirasālaktakavate |

asūyatyatyantaṃ yadabhihananāya spṛhayate

paśūnāmīśānaḥ pramadavanakaṅkelitarave || 85 ||

mṛṣā kṛtvā gotraskhalanamatha vailakṣyanamitaṃ

lalāṭe bhartāraṃ caraṇakamale tāḍayati te |

cirādantaḥśalyaṃ dahanakṛtamunmūlitavatā

tulākoṭikvāṇaiḥ kilikilitamīśānaripuṇā || 86 ||

himānīhantavyaṃ himagirinivāsaikacaturau

niśāyāṃ nidrāṇaṃ niśi caramabhāge ca viśadau |

varaṃ lakṣmīpātraṃ śriyamatisṛjantau samayināṃ

sarojaṃ tvatpādau janani jayataścitramiha kim || 87 ||

padaṃ te kīrtīnāṃ prapadamapadaṃ devi vipadāṃ

kathaṃ nītaṃ sadbhiḥ kaṭhinakamaṭhīkarparatulām |

kathaṃ vā bāhubhyāmupayamanakāle purabhidā

yadādāya nyastaṃ dṛṣadi dayamānena manasā || 88 ||

nakhairnākastrīṇāṃ karakamalasaṅkocaśaśibhi-

starūṇāṃ divyānāṃ hasata iva te caṇḍi caraṇau |

phalāni svaḥsthebhyaḥ kisalayakarāgreṇa dadatāṃ

daridrebhyo bhadrāṃ śriyamaniśamahnāya dadatau || 89 ||

dadāne dīnebhyaḥ śriyamaniśamāśānusadṛśī-

mamandaṃ saundaryaprakaramakarandaṃ vikirati |

tavāsmin mandārastabakasubhage yātu caraṇe

nimajjanmajjīvaḥ karaṇacaraṇaḥ ṣaṭcaraṇatām || 90 ||

padanyāsakrīḍāparicayamivārabdhumanasaḥ

skhalantaste khelaṃ bhavanakalahaṃsā na jahati |

atasteṣāṃ śikṣāṃ subhagamaṇimañjīraraṇita-

cchalādācakṣāṇaṃ caraṇakamalaṃ cārucarite || 91 ||

gatāste mañcatvaṃ druhiṇaharirudreśvarabhṛtaḥ

śivaḥ svacchacchāyāghaṭitakapaṭapracchadapaṭaḥ |

tvadīyānāṃ bhāsāṃ pratiphalanarāgāruṇatayā

śarīrī śṛṅgāro rasa iva dṛśāṃ dogdhi kutukam || 92 ||

arālā keśeṣu prakṛtisaralā mandahasite

śirīṣābhā citte dṛṣadupalaśobhā kucataṭe |

bhṛśaṃ tanvī madhye pṛthururasijārohaviṣaye

jagattrātuṃ śambhorjayati karuṇā kācidaruṇā || 93 ||

kalaṅkaḥ kastūrī rajanikarabimbaṃ jalamayaṃ

kalābhiḥ karpūrairmarakatakaraṇḍaṃ nibiḍitam |

atastvadbhogena pratidinamidaṃ riktakuharaṃ

vidhirbhūyo bhūyo nibiḍayati nūnaṃ tava kṛte || 94 ||

purārāterantaḥpuramasi tatastvaccaraṇayoḥ

saparyāmaryādā taralakaraṇānāmasulabhā |

tathā hyete nītāḥ śatamakhamukhāḥ siddhimatulāṃ

tava dvāropāntasthitibhiraṇimādyābhiramarāḥ || 95 ||

kalatraṃ vaidhātraṃ katikati bhajante na kavayaḥ

śriyo devyāḥ ko vā na bhavati patiḥ kairapi dhanaiḥ |

mahādevaṃ hitvā tava sati satīnāmacarame

kucābhyāmāsaṅgaḥ kuravakatarorapyasulabhaḥ || 96 ||

girāmāhurdevīṃ druhiṇagṛhiṇīmāgamavido

hareḥ patnīṃ padmāṃ harasahacarīmadritanayām |

turīyā kāpi tvaṃ duradhigamaniḥsīmamahimā

mahāmāyā viśvaṃ bhramayasi parabrahmamahiṣi || 97 ||

kadā kāle mātaḥ kathaya kalitālaktakarasaṃ

pibeyaṃ vidyārthī tava caraṇanirṇejanajalam |

prakṛtyā mūkānāmapi ca kavitākāraṇatayā

kadā dhatte vāṇīmukhakamalatāmbūlarasatām || 98 ||

sarasvatyā lakṣmyā vidhiharisapatno viharate

rateḥ pātivratyaṃ śithilayati ramyeṇa vapuṣā |

ciraṃ jīvanneva kṣapitapaśupāśavyatikaraḥ

parānandābhikhyaṃ rasayati rasaṃ tvadbhajanavān || 99 ||

pradīpajvālābhirdivasakaranīrājanavidhiḥ

sudhāsūteścandropalajalalavairarghyaracanā |

svakīyairambhobhiḥ salilanidhisauhityakaraṇaṃ

tvadīyābhirvāgbhistava janani vācāṃ stutiriyam || 100 ||

saundaryalahari mukhyastotraṃ saṃvārtadāyakam |

bhagavadpāda sankluptaṃ paṭhen muktau bhavennaraḥ ||

|| iti śrīmatparamahaṃsaparivrājakācāryasya

śrīgovindabhagavatpūjyapādaśiṣyasya

śrīmacchaṅkarabhagavataḥ kṛtau saundaryalaharī sampūrṇā ||

|| oṃ tatsat ||

(anubandhaḥ)

samānītaḥ padbhyāṃ maṇimukuratāmambaramaṇi-

rbhayādāsyādantaḥstimitakiraṇaśreṇimasṛṇaḥ |

(pāṭhabhedaḥ - bhayādāsya snigdhastmita, bhayādāsyasyāntaḥstmita)

dadhāti tvadvaktrampratiphalanamaśrāntavikacaṃ

nirātaṅkaṃ candrānnijahṛdayapaṅkeruhamiva || 101 ||

samudbhūtasthūlastanabharamuraścāru hasitaṃ

kaṭākṣe kandarpaḥ katicana kadambadyuti vapuḥ |

harasya tvadbhrāntiṃ manasi janayanti sma vimalāḥ

pāṭhabhedaḥ - janayāmāsa madano, janayantaḥ samatulāṃ, janayantā suvadane

bhavatyā ye bhaktāḥ pariṇatiramīṣāmiyamume || 102 ||

nidhe nityasmere niravadhiguṇe nītinipuṇe

nirāghātajñāne niyamaparacittaikanilaye |

niyatyā nirmukte nikhilanigamāntastutipade

nirātaṅke nitye nigamaya mamāpi stutimimām || 103 ||