Narayaniyam Dashaka 95 - Dhyanayogah - Mokshapraptimargah

ॐ

நாராயணீயம் தஶக 95 - த்யாநயோகஃ - மோக்ஷப்ராப்திமார்கஃ

Vishnu Tamil

ஆதௌ ஹைரண்யகர்பீம் தநுமவிகலஜீவாத்மிகாமாஸ்திதஸ்த்வம்

ஜீவத்வம் ப்ராப்ய மாயாகுணகணகசிதோ வர்தஸே விஶ்வயோநே ।

தத்ரோத்வ்ரு'த்தேந ஸத்த்வேந து குணயுகலம் பக்திபாவம் கதேந

சித்வா ஸத்த்வம் ச ஹித்வா புநரநுபஹிதோ வர்திதாஹே த்வமேவ ॥1॥

ஸத்த்வோந்மேஷாத் கதாசித் கலு விஷயரஸே தோஷபோதேऽபி பூமந்

பூயோऽப்யேஷு ப்ரவ்ரு'த்திஸ்ஸதமஸி ரஜஸி ப்ரோத்ததே துர்நிவாரா ।

சித்தம் தாவத்குணாஶ்ச க்ரதிதமிஹ மிதஸ்தாநி ஸர்வாணி ரோத்தும்

துர்யே த்வய்யேகபக்திஶ்ஶரணமிதி பவாந் ஹம்ஸரூபீ ந்யகாதீத் ॥2॥

ஸந்தி ஶ்ரேயாம்ஸி பூயாம்ஸ்யபி ருசிபிதயா கர்மிணாம் நிர்மிதாநி

க்ஷுத்ராநந்தாஶ்ச ஸாந்தா பஹுவிதகதயஃ க்ரு'ஷ்ண தேப்யோ பவேயுஃ ।

த்வம் சாசக்யாத ஸக்யே நநு மஹிததமாம் ஶ்ரேயஸாம் பக்திமேகாம்

த்வத்பக்த்யாநந்ததுல்யஃ கலு விஷயஜுஷாம் ஸம்மதஃ கேந வா ஸ்யாத் ॥3॥

த்வத்பக்த்யா துஷ்டபுத்தேஃ ஸுகமிஹ சரதோ விச்யுதாஶஸ்ய சாஶாஃ

ஸர்வாஃ ஸ்யுஃ ஸௌக்யமய்யஃ ஸலிலகுஹரகஸ்யேவ தோயைகமய்யஃ ।

ஸோऽயம் கல்விந்த்ரலோகம் கமலஜபவநம் யோகஸித்தீஶ்ச ஹ்ரு'த்யாஃ

நாகாங்க்ஷத்யேததாஸ்தாம் ஸ்வயமநுபதிதே மோக்ஷஸௌக்யேऽப்யநீஹஃ ॥4॥

த்வத்பக்தோ பாத்யமாநோऽபி ச விஷயரஸைரிந்த்ரியாஶாந்திஹேதோ-

ர்பக்த்யைவாக்ரம்யமாணைஃ புநரபி கலு தைர்துர்பலைர்நாபிஜய்யஃ ।

ஸப்தார்சிர்தீபிதார்சிர்தஹதி கில யதா பூரிதாருப்ரபஞ்சம்

த்வத்பக்த்யோகே ததைவ ப்ரதஹதி துரிதம் துர்மதஃ க்வேந்த்ரியாணாம் ॥5॥

சித்தார்த்ரீபாவமுச்சைர்வபுஷி ச புலகம் ஹர்ஷவாஷ்பம் ச ஹித்வா

சித்தம் ஶுத்த்யேத்கதம் வா கிமு பஹுதபஸா வித்யயா வீதபக்தேஃ ।

த்வத்காதாஸ்வாதஸித்தாஞ்ஜநஸததமரீம்ரு'ஜ்யமாநோऽயமாத்மா

சக்ஷுர்வத்தத்த்வஸூக்ஷ்மம் பஜதி ந து ததாऽப்யஸ்தயா தர்ககோட்யா॥6॥

த்யாநம் தே ஶீலயேயம் ஸமதநுஸுகபத்தாஸநோ நாஸிகாக்ர-

ந்யஸ்தாக்ஷஃ பூரகாத்யைர்ஜிதபவநபதஶ்சித்தபத்மம் த்வவாஞ்சம்।

ஊர்த்வாக்ரம் பாவயித்வா ரவிவிதுஶிகிநஃ ஸம்விசிந்த்யோபரிஷ்டாத்

தத்ரஸ்தம் பாவயே த்வாம் ஸஜலஜலதரஶ்யாமலம் கோமலாங்கம் ॥7॥

ஆநீலஶ்லக்ஷ்ணகேஶம் ஜ்வலிதமகரஸத்குண்டலம் மந்தஹாஸ-

ஸ்யந்தார்த்ரம் கௌஸ்துபஶ்ரீபரிகதவநமாலோருஹாராபிராமம் ।

ஶ்ரீவத்ஸாங்கம் ஸுபாஹும் ம்ரு'துலஸதுதரம் காஞ்சநச்சாயசேலம்

சாருஸ்நிக்தோருமம்போருஹலலிதபதம் பாவயேऽஹம் பவந்தம் ॥8॥

ஸர்வாங்கேஷ்வங்க ரங்கத்குதுகமிதி முஹுர்தாரயந்நீஶ சித்தம்

தத்ராப்யேகத்ர யுஞ்ஜே வதநஸரஸிஜே ஸுந்தரே மந்தஹாஸே

தத்ராலீநம் து சேதஃ பரமஸுகசிதத்வைதரூபே விதந்வ-

ந்நந்யந்நோ சிந்தயேயம் முஹுரிதி ஸமுபாரூடயோகோ பவேயம் ॥9॥

இத்தம் த்வத்த்யாநயோகே ஸதி புநரணிமாத்யஷ்டஸம்ஸித்தயஸ்தாஃ

தூரஶ்ருத்யாதயோऽபி ஹ்யஹமஹமிகயா ஸம்பதேயுர்முராரே ।

த்வத்ஸம்ப்ராப்தௌ விலம்பாவஹமகிலமிதம் நாத்ரியே காமயேऽஹம்

த்வாமேவாநந்தபூர்ணம் பவநபுரபதே பாஹி மாம் ஸர்வதாபாத் ॥10॥

Roman (IAST) Transliteration

ādau hairaṇyagarbhīṃ tanumavikalajīvātmikāmāsthitastvaṃ

jīvatvaṃ prāpya māyāguṇagaṇakhacito vartase viśvayone |

tatrodvṛddhena sattvena tu guṇayugalaṃ bhaktibhāvaṃ gatena

chitvā sattvaṃ ca hitvā punaranupahito vartitāhe tvameva ||1||

sattvonmeṣāt kadācit khalu viṣayarase doṣabodhe'pi bhūman

bhūyo'pyeṣu pravṛttissatamasi rajasi proddhate durnivārā |

cittaṃ tāvadguṇāśca grathitamiha mithastāni sarvāṇi roddhuṃ

turye tvayyekabhaktiśśaraṇamiti bhavān haṃsarūpī nyagādīt ||2||

santi śreyāṃsi bhūyāṃsyapi rucibhidayā karmiṇāṃ nirmitāni

kṣudrānandāśca sāntā bahuvidhagatayaḥ kṛṣṇa tebhyo bhaveyuḥ |

tvaṃ cācakhyātha sakhye nanu mahitatamāṃ śreyasāṃ bhaktimekāṃ

tvadbhaktyānandatulyaḥ khalu viṣayajuṣāṃ sammadaḥ kena vā syāt ||3||

tvatbhaktyā tuṣṭabuddheḥ sukhamiha carato vicyutāśasya cāśāḥ

sarvāḥ syuḥ saukhyamayyaḥ salilakuharagasyeva toyaikamayyaḥ |

so'yaṃ khalvindralokaṃ kamalajabhavanaṃ yogasiddhīśca hṛdyāḥ

nākāṅkṣatyetadāstāṃ svayamanupatite mokṣasaukhye'pyanīhaḥ ||4||

tvadbhakto bādhyamāno'pi ca viṣayarasairindriyāśāntiheto-

rbhaktyaivākramyamāṇaiḥ punarapi khalu tairdurbalairnābhijayyaḥ |

saptārcirdīpitārcirdahati kila yathā bhūridāruprapañcaṃ

tvadbhaktyoghe tathaiva pradahati duritaṃ durmadaḥ kvendriyāṇām ||5||

cittārdrībhāvamuccairvapuṣi ca pulakaṃ harṣavāṣpaṃ ca hitvā

cittaṃ śuddhyetkathaṃ vā kimu bahutapasā vidyayā vītabhakteḥ |

tvadgāthāsvādasiddhāñjanasatatamarīmṛjyamāno'yamātmā

cakṣurvattattvasūkṣmaṃ bhajati na tu tathā'bhyastayā tarkakoṭyā||6||

dhyānaṃ te śīlayeyaṃ samatanusukhabaddhāsano nāsikāgra-

nyastākṣaḥ pūrakādyairjitapavanapathaścittapadmaṃ tvavāñcam|

ūrdhvāgraṃ bhāvayitvā ravividhuśikhinaḥ saṃvicintyopariṣṭāt

tatrasthaṃ bhāvaye tvāṃ sajalajaladharaśyāmalaṃ komalāṅgam ||7||

ānīlaślakṣṇakeśaṃ jvalitamakarasatkuṇḍalaṃ mandahāsa-

syandārdraṃ kaustubhaśrīparigatavanamāloruhārābhirāmam |

śrīvatsāṅkaṃ subāhuṃ mṛdulasadudaraṃ kāñcanacchāyacelaṃ

cārusnigdhorumambhoruhalalitapadaṃ bhāvaye'haṃ bhavantam ||8||

sarvāṅgeṣvaṅga raṅgatkutukamiti muhurdhārayannīśa cittaṃ

tatrāpyekatra yuñje vadanasarasije sundare mandahāse

tatrālīnaṃ tu cetaḥ paramasukhacidadvaitarūpe vitanva-

nnanyanno cintayeyaṃ muhuriti samupārūḍhayogo bhaveyam ||9||

itthaṃ tvaddhyānayoge sati punaraṇimādyaṣṭasaṃsiddhayastāḥ

dūraśrutyādayo'pi hyahamahamikayā sampateyurmurāre |

tvatsamprāptau vilambāvahamakhilamidaṃ nādriye kāmaye'haṃ

tvāmevānandapūrṇaṃ pavanapurapate pāhi māṃ sarvatāpāt ||10||