Narayaniyam Dashaka 91 - Bhaktimahattvam

ॐ

நாராயணீயம் தஶக 91 - பக்திமஹத்த்வம்

Vishnu Tamil

ஶ்ரீக்ரு'ஷ்ண த்வத்பதோபாஸநமபயதமம் பத்தமித்யார்தத்ரு'ஷ்டே-

ர்மர்த்யஸ்யார்தஸ்ய மந்யே வ்யபஸரதி பயம் யேந ஸர்வாத்மநைவ ।

யத்தாவத் த்வத்ப்ரணீதாநிஹ பஜநவிதீநாஸ்திதோ மோஹமார்கே

தாவந்நப்யாவ்ரு'தாக்ஷஃ ஸ்கலதி ந குஹசித்தேவதேவாகிலாத்மந் ॥1॥

பூமந் காயேந வாசா முஹுரபி மநஸா த்வத்பலப்ரேரிதாத்மா

யத்யத் குர்வே ஸமஸ்தம் ததிஹ பரதரே த்வய்யஸாவர்பயாமி ।

ஜாத்யாபீஹ ஶ்வபாகஸ்த்வயி நிஹிதமநஃகர்மவாகிந்த்ரியார்த-

ப்ராணோ விஶ்வம் புநீதே ந து விமுகமநாஸ்த்வத்பதாத்விப்ரவர்யஃ ॥2॥

பீதிர்நாம த்விதீயாத்பவதி நநு மநஃகல்பிதம் ச த்விதீயம்

தேநைக்யாப்யாஸஶீலோ ஹ்ரு'தயமிஹ யதாஶக்தி புத்த்யா நிருந்த்யாம் ।

மாயாவித்தே து தஸ்மிந் புநரபி ந ததா பாதி மாயாதிநாதம்

தம் த்வாம் பக்த்யா மஹத்யா ஸததமநுபஜநீஶ பீதிம் விஜஹ்யாம் ॥3॥

பக்தேருத்பத்திவ்ரு'த்தீ தவ சரணஜுஷாம் ஸங்கமேநைவ பும்ஸா-

மாஸாத்யே புண்யபாஜாம் ஶ்ரிய இவ ஜகதி ஶ்ரீமதாம் ஸங்கமேந ।

தத்ஸங்கோ தேவ பூயாந்மம கலு ஸததம் தந்முகாதுந்மிஷத்பி-

ஸ்த்வந்மாஹாத்ம்யப்ரகாரைர்பவதி ச ஸுத்ரு'டா பக்திருத்தூதபாபா ॥4॥

ஶ்ரேயோமார்கேஷு பக்தாவதிகபஹுமதிர்ஜந்மகர்மாணி பூயோ

காயந் க்ஷேமாணி நாமாந்யபி ததுபயதஃ ப்ரத்ருதம் ப்ரத்ருதாத்மா ।

உத்யத்தாஸஃ கதாசித் குஹசிதபி ருதந் க்வாபி கர்ஜந் ப்ரகாய-

ந்நுந்மாதீவ ப்ரந்ரு'த்யந்நயி குரு கருணாம் லோகபாஹ்யஶ்சரேயம் ॥5॥

பூதாந்யேதாநி பூதாத்மகமபி ஸகலம் பக்ஷிமத்ஸ்யாந் ம்ரு'காதீந்

மர்த்யாந் மித்ராணி ஶத்ரூநபி யமிதமதிஸ்த்வந்மயாந்யாநமாநி ।

த்வத்ஸேவாயாம் ஹி ஸித்த்யேந்மம தவ க்ரு'பயா பக்திதார்ட்யம் விராக-

ஸ்த்வத்தத்த்வஸ்யாவபோதோऽபி ச புவநபதே யத்நபேதம் விநைவ ॥6॥

நோ முஹ்யந் க்ஷுத்த்ரு'டாத்யைர்பவஸரணிபவைஸ்த்வந்நிலீநாஶயத்வா-

ச்சிந்தாஸாதத்யஶாலீ நிமிஷலவமபி த்வத்பதாதப்ரகம்பஃ ।

இஷ்டாநிஷ்டேஷு துஷ்டிவ்யஸநவிரஹிதோ மாயிகத்வாவபோதா-

ஜ்ஜ்யோத்ஸ்நாபிஸ்த்வந்நகேந்தோரதிகஶிஶிரிதேநாத்மநா ஸஞ்சரேயம் ॥7॥

பூதேஷ்வேஷு த்வதைக்யஸ்ம்ரு'திஸமதிகதௌ நாதிகாரோऽதுநா சே-

த்த்வத்ப்ரேம த்வத்கமைத்ரீ ஜடமதிஷு க்ரு'பா த்விட்ஸு பூயாதுபேக்ஷா ।

அர்சாயாம் வா ஸமர்சாகுதுகமுருதரஶ்ரத்தயா வர்ததாம் மே

த்வத்ஸம்ஸேவீ ததாபி த்ருதமுபலபதே பக்தலோகோத்தமத்வம் ॥8॥

ஆவ்ரு'த்ய த்வத்ஸ்வரூபம் க்ஷிதிஜலமருதாத்யாத்மநா விக்ஷிபந்தீ

ஜீவாந் பூயிஷ்டகர்மாவலிவிவஶகதீந் துஃகஜாலே க்ஷிபந்தீ ।

த்வந்மாயா மாபிபூந்மாமயி புவநபதே கல்பதே தத்ப்ரஶாந்த்யை

த்வத்பாதே பக்திரேவேத்யவததயி விபோ ஸித்தயோகீ ப்ரபுத்தஃ ॥9॥

துஃகாந்யாலோக்ய ஜந்துஷ்வலமுதிதவிவேகோऽஹமாசார்யவர்யா-

ல்லப்த்வா த்வத்ரூபதத்த்வம் குணசரிதகதாத்யுத்பவத்பக்திபூமா ।

மாயாமேநாம் தரித்வா பரமஸுகமயே த்வத்பதே மோதிதாஹே

தஸ்யாயம் பூர்வரங்கஃ பவநபுரபதே நாஶயாஶேஷரோகாந் ॥10॥

Roman (IAST) Transliteration

śrīkṛṣṇa tvatpadopāsanamabhayatamaṃ baddhamithyārthadṛṣṭe-

rmartyasyārtasya manye vyapasarati bhayaṃ yena sarvātmanaiva |

yattāvat tvatpraṇītāniha bhajanavidhīnāsthito mohamārge

dhāvannapyāvṛtākṣaḥ skhalati na kuhaciddevadevākhilātman ||1||

bhūman kāyena vācā muhurapi manasā tvadbalapreritātmā

yadyat kurve samastaṃ tadiha paratare tvayyasāvarpayāmi |

jātyāpīha śvapākastvayi nihitamanaḥkarmavāgindriyārtha-

prāṇo viśvaṃ punīte na tu vimukhamanāstvatpadādvipravaryaḥ ||2||

bhītirnāma dvitīyādbhavati nanu manaḥkalpitaṃ ca dvitīyaṃ

tenaikyābhyāsaśīlo hṛdayamiha yathāśakti buddhyā nirundhyām |

māyāviddhe tu tasmin punarapi na tathā bhāti māyādhināthaṃ

taṃ tvāṃ bhaktyā mahatyā satatamanubhajanīśa bhītiṃ vijahyām ||3||

bhakterutpattivṛddhī tava caraṇajuṣāṃ saṅgamenaiva puṃsā-

māsādye puṇyabhājāṃ śriya iva jagati śrīmatāṃ saṅgamena |

tatsaṅgo deva bhūyānmama khalu satataṃ tanmukhādunmiṣadbhi-

stvanmāhātmyaprakārairbhavati ca sudṛḍhā bhaktiruddhūtapāpā ||4||

śreyomārgeṣu bhaktāvadhikabahumatirjanmakarmāṇi bhūyo

gāyan kṣemāṇi nāmānyapi tadubhayataḥ pradrutaṃ pradrutātmā |

udyaddhāsaḥ kadācit kuhacidapi rudan kvāpi garjan pragāya-

nnunmādīva pranṛtyannayi kuru karuṇāṃ lokabāhyaścareyam ||5||

bhūtānyetāni bhūtātmakamapi sakalaṃ pakṣimatsyān mṛgādīn

martyān mitrāṇi śatrūnapi yamitamatistvanmayānyānamāni |

tvatsevāyāṃ hi siddhyenmama tava kṛpayā bhaktidārḍhyaṃ virāga-

stvattattvasyāvabodho'pi ca bhuvanapate yatnabhedaṃ vinaiva ||6||

no muhyan kṣuttṛḍādyairbhavasaraṇibhavaistvannilīnāśayatvā-

ccintāsātatyaśālī nimiṣalavamapi tvatpadādaprakampaḥ |

iṣṭāniṣṭeṣu tuṣṭivyasanavirahito māyikatvāvabodhā-

jjyotsnābhistvannakhendoradhikaśiśiritenātmanā sañcareyam ||7||

bhūteṣveṣu tvadaikyasmṛtisamadhigatau nādhikāro'dhunā ce-

ttvatprema tvatkamaitrī jaḍamatiṣu kṛpā dviṭsu bhūyādupekṣā |

arcāyāṃ vā samarcākutukamurutaraśraddhayā vardhatāṃ me

tvatsaṃsevī tathāpi drutamupalabhate bhaktalokottamatvam ||8||

āvṛtya tvatsvarūpaṃ kṣitijalamarudādyātmanā vikṣipantī

jīvān bhūyiṣṭhakarmāvalivivaśagatīn duḥkhajāle kṣipantī |

tvanmāyā mābhibhūnmāmayi bhuvanapate kalpate tatpraśāntyai

tvatpāde bhaktirevetyavadadayi vibho siddhayogī prabuddhaḥ ||9||

duḥkhānyālokya jantuṣvalamuditaviveko'hamācāryavaryā-

llabdhvā tvadrūpatattvaṃ guṇacaritakathādyudbhavadbhaktibhūmā |

māyāmenāṃ taritvā paramasukhamaye tvatpade moditāhe

tasyāyaṃ pūrvaraṅgaḥ pavanapurapate nāśayāśeṣarogān ||10||