Narayaniyam Dashaka 42 - Shakatasuravadham

ॐ

நாராயணீயம் தஶக 42 - ஶகடாஸுரவதம்

Vishnu Tamil

கதாபி ஜந்மர்க்ஷதிநே தவ ப்ரபோ நிமந்த்ரிதஜ்ஞாதிவதூமஹீஸுரா ।

மஹாநஸஸ்த்வாம் ஸவிதே நிதாய ஸா மஹாநஸாதௌ வவ்ரு'தே வ்ரஜேஶ்வரீ ॥1॥

ததோ பவத்த்ராணநியுக்தபாலகப்ரபீதிஸங்க்ரந்தநஸங்குலாரவைஃ ।

விமிஶ்ரமஶ்ராவி பவத்ஸமீபதஃ பரிஸ்புடத்தாருசடச்சடாரவஃ ॥2॥

ததஸ்ததாகர்ணநஸம்ப்ரமஶ்ரமப்ரகம்பிவக்ஷோஜபரா வ்ரஜாங்கநாஃ ।

பவந்தமந்தர்தத்ரு'ஶுஸ்ஸமந்ததோ விநிஷ்பதத்தாருணதாருமத்யகம் ॥3॥

ஶிஶோரஹோ கிம் கிமபூதிதி த்ருதம் ப்ரதாவ்ய நந்தஃ பஶுபாஶ்ச பூஸுராஃ ।

பவந்தமாலோக்ய யஶோதயா த்ரு'தம் ஸமாஶ்வஸந்நஶ்ருஜலார்த்ரலோசநாஃ ॥4॥

கஸ்கோ நு கௌதஸ்குத ஏஷ விஸ்மயோ விஶங்கடம் யச்சகடம் விபாடிதம் ।

ந காரணம் கிஞ்சிதிஹேதி தே ஸ்திதாஃ ஸ்வநாஸிகாதத்தகராஸ்த்வதீக்ஷகாஃ ॥5॥

குமாரகஸ்யாஸ்ய பயோதரார்திநஃ ப்ரரோதநே லோலபதாம்புஜாஹதம் ।

மயா மயா த்ரு'ஷ்டமநோ விபர்யகாதிதீஶ தே பாலகபாலகா ஜகுஃ ॥6॥

பியா ததா கிஞ்சிதஜாநதாமிதம் குமாரகாணாமதிதுர்கடம் வசஃ ।

பவத்ப்ரபாவாவிதுரைரிதீரிதம் மநாகிவாஶங்க்யத த்ரு'ஷ்டபூதநைஃ ॥7॥

ப்ரவாலதாம்ரம் கிமிதம் பதம் க்ஷதம் ஸரோஜரம்யௌ நு கரௌ விரோஜிதௌ।

இதி ப்ரஸர்பத்கருணாதரங்கிதாஸ்த்வதங்கமாபஸ்ப்ரு'ஶுரங்கநாஜநாஃ ॥8॥

அயே ஸுதம் தேஹி ஜகத்பதேஃ க்ரு'பாதரங்கபாதாத்பரிபாதமத்ய மே ।

இதி ஸ்ம ஸங்க்ரு'ஹ்ய பிதா த்வதங்ககம் முஹுர்முஹுஃ ஶ்லிஷ்யதி ஜாதகண்டகஃ ॥9॥

அநோநிலீநஃ கில ஹந்துமாகதஃ ஸுராரிரேவம் பவதா விஹிம்ஸிதஃ ।

ரஜோऽபி நோ த்ரு'ஷ்டமமுஷ்ய தத்கதம் ஸ ஶுத்தஸத்த்வே த்வயி லீநவாந் த்ருவம் ॥10॥

ப்ரபூஜிதைஸ்தத்ர ததோ த்விஜாதிபிர்விஶேஷதோ லம்பிதமங்கலாஶிஷஃ ।

வ்ரஜம் நிஜைர்பால்யரஸைர்விமோஹயந் மருத்புராதீஶ ருஜாம் ஜஹீஹி மே ॥11॥

Roman (IAST) Transliteration

kadāpi janmarkṣadine tava prabho nimantritajñātivadhūmahīsurā |

mahānasastvāṃ savidhe nidhāya sā mahānasādau vavṛte vrajeśvarī ||1||

tato bhavattrāṇaniyuktabālakaprabhītisaṅkrandanasaṅkulāravaiḥ |

vimiśramaśrāvi bhavatsamīpataḥ parisphuṭaddārucaṭaccaṭāravaḥ ||2||

tatastadākarṇanasambhramaśramaprakampivakṣojabharā vrajāṅganāḥ |

bhavantamantardadṛśussamantato viniṣpataddāruṇadārumadhyagam ||3||

śiśoraho kiṃ kimabhūditi drutaṃ pradhāvya nandaḥ paśupāśca bhūsurāḥ |

bhavantamālokya yaśodayā dhṛtaṃ samāśvasannaśrujalārdralocanāḥ ||4||

kasko nu kautaskuta eṣa vismayo viśaṅkaṭaṃ yacchakaṭaṃ vipāṭitam |

na kāraṇaṃ kiñcidiheti te sthitāḥ svanāsikādattakarāstvadīkṣakāḥ ||5||

kumārakasyāsya payodharārthinaḥ prarodane lolapadāmbujāhatam |

mayā mayā dṛṣṭamano viparyagāditīśa te pālakabālakā jaguḥ ||6||

bhiyā tadā kiñcidajānatāmidaṃ kumārakāṇāmatidurghaṭaṃ vacaḥ |

bhavatprabhāvāvidurairitīritaṃ manāgivāśaṅkyata dṛṣṭapūtanaiḥ ||7||

pravālatāmraṃ kimidaṃ padaṃ kṣataṃ sarojaramyau nu karau virojitau|

iti prasarpatkaruṇātaraṅgitāstvadaṅgamāpaspṛśuraṅganājanāḥ ||8||

aye sutaṃ dehi jagatpateḥ kṛpātaraṅgapātātparipātamadya me |

iti sma saṅgṛhya pitā tvadaṅgakaṃ muhurmuhuḥ śliṣyati jātakaṇṭakaḥ ||9||

anonilīnaḥ kila hantumāgataḥ surārirevaṃ bhavatā vihiṃsitaḥ |

rajo'pi no dṛṣṭamamuṣya tatkathaṃ sa śuddhasattve tvayi līnavān dhruvam ||10||

prapūjitaistatra tato dvijātibhirviśeṣato lambhitamaṅgalāśiṣaḥ |

vrajaṃ nijairbālyarasairvimohayan marutpurādhīśa rujāṃ jahīhi me ||11||