Narayaniyam Dashaka 4 - Yogabhyasah Tatha Yogasiddhih

ॐ

நாராயணீயம் தஶக 4 - யோகாப்யாஸஃ ததா யோகஸித்திஃ

Vishnu Tamil

கல்யதாம் மம குருஷ்வ தாவதீம் கல்யதே பவதுபாஸநம் யயா ।

ஸ்பஷ்டமஷ்டவிதயோகசர்யயா புஷ்டயாஶு தவ துஷ்டிமாப்நுயாம் ॥1॥

ப்ரஹ்மசர்யத்ரு'டதாதிபிர்யமைராப்லவாதிநியமைஶ்ச பாவிதாஃ ।

குர்மஹே த்ரு'டமமீ ஸுகாஸநம் பங்கஜாத்யமபி வா பவத்பராஃ ॥2॥

தாரமந்தரநுசிந்த்ய ஸந்ததம் ப்ராணவாயுமபியம்ய நிர்மலாஃ ।

இந்த்ரியாணி விஷயாததாபஹ்ரு'த்யாஸ்மஹே பவதுபாஸநோந்முகாஃ ॥3॥

அஸ்புடே வபுஷி தே ப்ரயத்நதோ தாரயேம திஷணாம் முஹுர்முஹுஃ ।

தேந பக்திரஸமந்தரார்த்ரதாமுத்வஹேம பவதங்க்ரிசிந்தகா ॥4॥

விஸ்புடாவயவபேதஸுந்தரம் த்வத்வபுஃ ஸுசிரஶீலநாவஶாத் ।

அஶ்ரமம் மநஸி சிந்தயாமஹே த்யாநயோகநிரதாஸ்த்வதாஶ்ரயாஃ ॥5॥

த்யாயதாம் ஸகலமூர்திமீத்ரு'ஶீமுந்மிஷந்மதுரதாஹ்ரு'தாத்மநாம் ।

ஸாந்த்ரமோதரஸரூபமாந்தரம் ப்ரஹ்ம ரூபமயி தேऽவபாஸதே ॥6॥

தத்ஸமாஸ்வதநரூபிணீம் ஸ்திதிம் த்வத்ஸமாதிமயி விஶ்வநாயக ।

ஆஶ்ரிதாஃ புநரதஃ பரிச்யுதாவாரபேமஹி ச தாரணாதிகம் ॥7॥

இத்தமப்யஸநநிர்பரோல்லஸத்த்வத்பராத்மஸுககல்பிதோத்ஸவாஃ ।

முக்தபக்தகுலமௌலிதாம் கதாஃ ஸஞ்சரேம ஶுகநாரதாதிவத் ॥8॥

த்வத்ஸமாதிவிஜயே து யஃ புநர்மங்க்ஷு மோக்ஷரஸிகஃ க்ரமேண வா ।

யோகவஶ்யமநிலம் ஷடாஶ்ரயைருந்நயத்யஜ ஸுஷும்நயா ஶநைஃ ॥9॥

லிங்கதேஹமபி ஸந்த்யஜந்நதோ லீயதே த்வயி பரே நிராக்ரஹஃ ।

ஊர்த்வலோககுதுகீ து மூர்ததஃ ஸார்தமேவ கரணைர்நிரீயதே ॥10॥

அக்நிவாஸரவலர்க்ஷபக்ஷகைருத்தராயணஜுஷா ச தைவதைஃ ।

ப்ராபிதோ ரவிபதம் பவத்பரோ மோதவாந் த்ருவபதாந்தமீயதே ॥11॥

ஆஸ்திதோऽத மஹராலயே யதா ஶேஷவக்த்ரதஹநோஷ்மணார்த்யதே ।

ஈயதே பவதுபாஶ்ரயஸ்ததா வேதஸஃ பதமதஃ புரைவ வா ॥12॥

தத்ர வா தவ பதேऽதவா வஸந் ப்ராக்ரு'தப்ரலய ஏதி முக்ததாம் ।

ஸ்வேச்சயா கலு புரா விமுச்யதே ஸம்விபித்ய ஜகதண்டமோஜஸா ॥13॥

தஸ்ய ச க்ஷிதிபயோமஹோऽநிலத்யோமஹத்ப்ரக்ரு'திஸப்தகாவ்ரு'தீஃ ।

தத்ததாத்மகதயா விஶந் ஸுகீ யாதி தே பதமநாவ்ரு'தம் விபோ ॥14॥

அர்சிராதிகதிமீத்ரு'ஶீம் வ்ரஜந் விச்யுதிம் ந பஜதே ஜகத்பதே ।

ஸச்சிதாத்மக பவத் குணோதயாநுச்சரந்தமநிலேஶ பாஹி மாம் ॥15॥

Roman (IAST) Transliteration

kalyatāṃ mama kuruṣva tāvatīṃ kalyate bhavadupāsanaṃ yayā |

spaṣṭamaṣṭavidhayogacaryayā puṣṭayāśu tava tuṣṭimāpnuyām ||1||

brahmacaryadṛḍhatādibhiryamairāplavādiniyamaiśca pāvitāḥ |

kurmahe dṛḍhamamī sukhāsanaṃ paṅkajādyamapi vā bhavatparāḥ ||2||

tāramantaranucintya santataṃ prāṇavāyumabhiyamya nirmalāḥ |

indriyāṇi viṣayādathāpahṛtyāsmahe bhavadupāsanonmukhāḥ ||3||

asphuṭe vapuṣi te prayatnato dhārayema dhiṣaṇāṃ muhurmuhuḥ |

tena bhaktirasamantarārdratāmudvahema bhavadaṅghricintakā ||4||

visphuṭāvayavabhedasundaraṃ tvadvapuḥ suciraśīlanāvaśāt |

aśramaṃ manasi cintayāmahe dhyānayoganiratāstvadāśrayāḥ ||5||

dhyāyatāṃ sakalamūrtimīdṛśīmunmiṣanmadhuratāhṛtātmanām |

sāndramodarasarūpamāntaraṃ brahma rūpamayi te'vabhāsate ||6||

tatsamāsvadanarūpiṇīṃ sthitiṃ tvatsamādhimayi viśvanāyaka |

āśritāḥ punarataḥ paricyutāvārabhemahi ca dhāraṇādikam ||7||

itthamabhyasananirbharollasattvatparātmasukhakalpitotsavāḥ |

muktabhaktakulamaulitāṃ gatāḥ sañcarema śukanāradādivat ||8||

tvatsamādhivijaye tu yaḥ punarmaṅkṣu mokṣarasikaḥ krameṇa vā |

yogavaśyamanilaṃ ṣaḍāśrayairunnayatyaja suṣumnayā śanaiḥ ||9||

liṅgadehamapi santyajannatho līyate tvayi pare nirāgrahaḥ |

ūrdhvalokakutukī tu mūrdhataḥ sārdhameva karaṇairnirīyate ||10||

agnivāsaravalarkṣapakṣagairuttarāyaṇajuṣā ca daivataiḥ |

prāpito ravipadaṃ bhavatparo modavān dhruvapadāntamīyate ||11||

āsthito'tha maharālaye yadā śeṣavaktradahanoṣmaṇārdyate |

īyate bhavadupāśrayastadā vedhasaḥ padamataḥ puraiva vā ||12||

tatra vā tava pade'thavā vasan prākṛtapralaya eti muktatām |

svecchayā khalu purā vimucyate saṃvibhidya jagadaṇḍamojasā ||13||

tasya ca kṣitipayomaho'niladyomahatprakṛtisaptakāvṛtīḥ |

tattadātmakatayā viśan sukhī yāti te padamanāvṛtaṃ vibho ||14||

arcirādigatimīdṛśīṃ vrajan vicyutiṃ na bhajate jagatpate |

saccidātmaka bhavat guṇodayānuccarantamanileśa pāhi mām ||15||