Narayaniyam Dashaka 35 - Shriramavataram-2

ॐ

நாராயணீயம் தஶக 35 - ஶ்ரீராமாவதாரம்-2

Vishnu Tamil

நீதஸ்ஸுக்ரீவமைத்ரீம் ததநு ஹநுமதா துந்துபேஃ காயமுச்சைஃ

க்ஷிப்த்வாங்குஷ்டேந பூயோ லுலுவித யுகபத் பத்ரிணா ஸப்த ஸாலாந் ।

ஹத்வா ஸுக்ரீவகாதோத்யதமதுலபலம் பாலிநம் வ்யாஜவ்ரு'த்த்யா

வர்ஷாவேலாமநைஷீர்விரஹதரலிதஸ்த்வம் மதங்காஶ்ரமாந்தே ॥1॥

ஸுக்ரீவேணாநுஜோக்த்யா ஸபயமபியதா வ்யூஹிதாம் வாஹிநீம் தா-

ம்ரு'க்ஷாணாம் வீக்ஷ்ய திக்ஷு த்ருதமத தயிதாமார்கணாயாவநம்ராம் ।

ஸந்தேஶம் சாங்குலீயம் பவநஸுதகரே ப்ராதிஶோ மோதஶாலீ

மார்கே மார்கே மமார்கே கபிபிரபி ததா த்வத்ப்ரியா ஸப்ரயாஸைஃ ॥2॥

த்வத்வார்தாகர்ணநோத்யத்கருதுருஜவஸம்பாதிஸம்பாதிவாக்ய-

ப்ரோத்தீர்ணார்ணோதிரந்தர்நகரி ஜநகஜாம் வீக்ஷ்ய தத்வாங்குலீயம் ।

ப்ரக்ஷுத்யோத்யாநமக்ஷக்ஷபணசணரணஃ ஸோடபந்தோ தஶாஸ்யம்

த்ரு'ஷ்ட்வா ப்லுஷ்ட்வா ச லங்காம் சடிதி ஸ ஹநுமாந் மௌலிரத்நம் ததௌ தே ॥3॥

த்வம் ஸுக்ரீவாங்கதாதிப்ரபலகபிசமூசக்ரவிக்ராந்தபூமீ-

சக்ரோऽபிக்ரம்ய பாரேஜலதி நிஶிசரேந்த்ராநுஜாஶ்ரீயமாணஃ ।

தத்ப்ரோக்தாம் ஶத்ருவார்தாம் ரஹஸி நிஶமயந் ப்ரார்தநாபார்த்யரோஷ-

ப்ராஸ்தாக்நேயாஸ்த்ரதேஜஸ்த்ரஸதுததிகிரா லப்தவாந் மத்யமார்கம் ॥4॥

கீஶைராஶாந்தரோபாஹ்ரு'தகிரிநிகரைஃ ஸேதுமாதாப்ய யாதோ

யாதூந்யாமர்த்ய தம்ஷ்ட்ராநகஶிகரிஶிலாஸாலஶஸ்த்ரைஃ ஸ்வஸைந்யைஃ ।

வ்யாகுர்வந் ஸாநுஜஸ்த்வம் ஸமரபுவி பரம் விக்ரமம் ஶக்ரஜேத்ரா

வேகாந்நாகாஸ்த்ரபத்தஃ பதகபதிகருந்மாருதைர்மோசிதோऽபூஃ ॥5॥

ஸௌமித்ரிஸ்த்வத்ர ஶக்திப்ரஹ்ரு'திகலதஸுர்வாதஜாநீதஶைல-

க்ராணாத் ப்ராணாநுபேதோ வ்யக்ரு'ணுத குஸ்ரு'திஶ்லாகிநம் மேகநாதம் ।

மாயாக்ஷோபேஷு வைபீஷணவசநஹ்ரு'தஸ்தம்பநஃ கும்பகர்ணம்

ஸம்ப்ராப்தம் கம்பிதோர்வீதலமகிலசமூபக்ஷிணம் வ்யக்ஷிணோஸ்த்வம் ॥6॥

க்ரு'ஹ்ணந் ஜம்பாரிஸம்ப்ரேஷிதரதகவசௌ ராவணேநாபியுத்த்யந்

ப்ரஹ்மாஸ்த்ரேணாஸ்ய பிந்தந் கலததிமபலாமக்நிஶுத்தாம் ப்ரக்ரு'ஹ்ணந் ।

தேவஶ்ரேணீவரோஜ்ஜீவிதஸமரம்ரு'தைரக்ஷதைஃ ரு'க்ஷஸங்கை-

ர்லங்காபர்த்ரா ச ஸாகம் நிஜநகரமகாஃ ஸப்ரியஃ புஷ்பகேண ॥7॥

ப்ரீதோ திவ்யாபிஷேகைரயுதஸமதிகாந் வத்ஸராந் பர்யரம்ஸீ-

ர்மைதில்யாம் பாபவாசா ஶிவ! ஶிவ! கில தாம் கர்பிணீமப்யஹாஸீஃ ।

ஶத்ருக்நேநார்தயித்வா லவணநிஶிசரம் ப்ரார்தயஃ ஶூத்ரபாஶம்

தாவத்வால்மீகிகேஹே க்ரு'தவஸதிருபாஸூத ஸீதா ஸுதௌ தே ॥8॥

வால்மீகேஸ்த்வத்ஸுதோத்காபிதமதுரக்ரு'தேராஜ்ஞயா யஜ்ஞவாடே

ஸீதாம் த்வய்யாப்துகாமே க்ஷிதிமவிஶதஸௌ த்வம் ச காலார்திதோऽபூஃ ।

ஹேதோஃ ஸௌமித்ரிகாதீ ஸ்வயமத ஸரயூமக்நநிஶ்ஶேஷப்ரு'த்யைஃ

ஸாகம் நாகம் ப்ரயாதோ நிஜபதமகமோ தேவ வைகுண்டமாத்யம் ॥9॥

ஸோऽயம் மர்த்யாவதாரஸ்தவ கலு நியதம் மர்த்யஶிக்ஷார்தமேவம்

விஶ்லேஷார்திர்நிராகஸ்த்யஜநமபி பவேத் காமதர்மாதிஸக்த்யா ।

நோ சேத் ஸ்வாத்மாநுபூதேஃ க்வ நு தவ மநஸோ விக்ரியா சக்ரபாணே

ஸ த்வம் ஸத்த்வைகமூர்தே பவநபுரபதே வ்யாதுநு வ்யாதிதாபாந் ॥10॥

Roman (IAST) Transliteration

nītassugrīvamaitrīṃ tadanu hanumatā dundubheḥ kāyamuccaiḥ

kṣiptvāṅguṣṭhena bhūyo luluvitha yugapat patriṇā sapta sālān |

hatvā sugrīvaghātodyatamatulabalaṃ bālinaṃ vyājavṛttyā

varṣāvelāmanaiṣīrvirahataralitastvaṃ mataṅgāśramānte ||1||

sugrīveṇānujoktyā sabhayamabhiyatā vyūhitāṃ vāhinīṃ tā-

mṛkṣāṇāṃ vīkṣya dikṣu drutamatha dayitāmārgaṇāyāvanamrām |

sandeśaṃ cāṅgulīyaṃ pavanasutakare prādiśo modaśālī

mārge mārge mamārge kapibhirapi tadā tvatpriyā saprayāsaiḥ ||2||

tvadvārtākarṇanodyadgarudurujavasampātisampātivākya-

prottīrṇārṇodhirantarnagari janakajāṃ vīkṣya datvāṅgulīyam |

prakṣudyodyānamakṣakṣapaṇacaṇaraṇaḥ soḍhabandho daśāsyaṃ

dṛṣṭvā pluṣṭvā ca laṅkāṃ jhaṭiti sa hanumān mauliratnaṃ dadau te ||3||

tvaṃ sugrīvāṅgadādiprabalakapicamūcakravikrāntabhūmī-

cakro'bhikramya pārejaladhi niśicarendrānujāśrīyamāṇaḥ |

tatproktāṃ śatruvārtāṃ rahasi niśamayan prārthanāpārthyaroṣa-

prāstāgneyāstratejastrasadudadhigirā labdhavān madhyamārgam ||4||

kīśairāśāntaropāhṛtagirinikaraiḥ setumādhāpya yāto

yātūnyāmardya daṃṣṭrānakhaśikhariśilāsālaśastraiḥ svasainyaiḥ |

vyākurvan sānujastvaṃ samarabhuvi paraṃ vikramaṃ śakrajetrā

vegānnāgāstrabaddhaḥ patagapatigarunmārutairmocito'bhūḥ ||5||

saumitristvatra śaktiprahṛtigaladasurvātajānītaśaila-

ghrāṇāt prāṇānupeto vyakṛṇuta kusṛtiślāghinaṃ meghanādam |

māyākṣobheṣu vaibhīṣaṇavacanahṛtastambhanaḥ kumbhakarṇaṃ

samprāptaṃ kampitorvītalamakhilacamūbhakṣiṇaṃ vyakṣiṇostvam ||6||

gṛhṇan jambhārisampreṣitarathakavacau rāvaṇenābhiyuddhyan

brahmāstreṇāsya bhindan galatatimabalāmagniśuddhāṃ pragṛhṇan |

devaśreṇīvarojjīvitasamaramṛtairakṣataiḥ ṛkṣasaṅghai-

rlaṅkābhartrā ca sākaṃ nijanagaramagāḥ sapriyaḥ puṣpakeṇa ||7||

prīto divyābhiṣekairayutasamadhikān vatsarān paryaraṃsī-

rmaithilyāṃ pāpavācā śiva! śiva! kila tāṃ garbhiṇīmabhyahāsīḥ |

śatrughnenārdayitvā lavaṇaniśicaraṃ prārdayaḥ śūdrapāśaṃ

tāvadvālmīkigehe kṛtavasatirupāsūta sītā sutau te ||8||

vālmīkestvatsutodgāpitamadhurakṛterājñayā yajñavāṭe

sītāṃ tvayyāptukāme kṣitimaviśadasau tvaṃ ca kālārthito'bhūḥ |

hetoḥ saumitrighātī svayamatha sarayūmagnaniśśeṣabhṛtyaiḥ

sākaṃ nākaṃ prayāto nijapadamagamo deva vaikuṇṭhamādyam ||9||

so'yaṃ martyāvatārastava khalu niyataṃ martyaśikṣārthamevaṃ

viśleṣārtirnirāgastyajanamapi bhavet kāmadharmātisaktyā |

no cet svātmānubhūteḥ kva nu tava manaso vikriyā cakrapāṇe

sa tvaṃ sattvaikamūrte pavanapurapate vyādhunu vyādhitāpān ||10||