இந்த்ரத்யும்நஃ பாண்ட்யகண்டாதிராஜ-
ஸ்த்வத்பக்தாத்மா சந்தநாத்ரௌ கதாசித் ।
த்வத் ஸேவாயாம் மக்நதீராலுலோகே
நைவாகஸ்த்யம் ப்ராப்தமாதித்யகாமம் ॥1॥
கும்போத்பூதிஃ ஸம்ப்ரு'தக்ரோதபாரஃ
ஸ்தப்தாத்மா த்வம் ஹஸ்திபூயம் பஜேதி ।
ஶப்த்வாऽதைநம் ப்ரத்யகாத் ஸோऽபி லேபே
ஹஸ்தீந்த்ரத்வம் த்வத்ஸ்ம்ரு'திவ்யக்திதந்யம் ॥2॥
தக்தாம்போதேர்மத்யபாஜி த்ரிகூடே
க்ரீடஞ்சைலே யூதபோऽயம் வஶாபிஃ ।
ஸர்வாந் ஜந்தூநத்யவர்திஷ்ட ஶக்த்யா
த்வத்பக்தாநாம் குத்ர நோத்கர்ஷலாபஃ ॥3॥
ஸ்வேந ஸ்தேம்நா திவ்யதேஶத்வஶக்த்யா
ஸோऽயம் கேதாநப்ரஜாநந் கதாசித் ।
ஶைலப்ராந்தே கர்மதாந்தஃ ஸரஸ்யாம்
யூதைஸ்ஸார்தம் த்வத்ப்ரணுந்நோऽபிரேமே ॥4॥
ஹூஹூஸ்தாவத்தேவலஸ்யாபி ஶாபாத்
க்ராஹீபூதஸ்தஜ்ஜலே பர்தமாநஃ ।
ஜக்ராஹைநம் ஹஸ்திநம் பாததேஶே
ஶாந்த்யர்தம் ஹி ஶ்ராந்திதோऽஸி ஸ்வகாநாம் ॥5॥
த்வத்ஸேவாயா வைபவாத் துர்நிரோதம்
யுத்யந்தம் தம் வத்ஸராணாம் ஸஹஸ்ரம் ।
ப்ராப்தே காலே த்வத்பதைகாக்ர்யஸித்யை
நக்ராக்ராந்தம் ஹஸ்திவர்யம் வ்யதாஸ்த்வம் ॥6॥
ஆர்திவ்யக்தப்ராக்தநஜ்ஞாநபக்திஃ
ஶுண்டோத்க்ஷிப்தைஃ புண்டரீகைஃ ஸமர்சந் ।
பூர்வாப்யஸ்தம் நிர்விஶேஷாத்மநிஷ்டம்
ஸ்தோத்ரம் ஶ்ரேஷ்டம் ஸோऽந்வகாதீத் பராத்மந் ॥7॥
ஶ்ருத்வா ஸ்தோத்ரம் நிர்குணஸ்தம் ஸமஸ்தம்
ப்ரஹ்மேஶாத்யைர்நாஹமித்யப்ரயாதே ।
ஸர்வாத்மா த்வம் பூரிகாருண்யவேகாத்
தார்க்ஷ்யாரூடஃ ப்ரேக்ஷிதோऽபூஃ புரஸ்தாத் ॥8॥
ஹஸ்தீந்த்ரம் தம் ஹஸ்தபத்மேந த்ரு'த்வா
சக்ரேண த்வம் நக்ரவர்யம் வ்யதாரீஃ ।
கந்தர்வேऽஸ்மிந் முக்தஶாபே ஸ ஹஸ்தீ
த்வத்ஸாரூப்யம் ப்ராப்ய தேதீப்யதே ஸ்ம ॥9॥
ஏதத்வ்ரு'த்தம் த்வாம் ச மாம் ச ப்ரகே யோ
காயேத்ஸோऽயம் பூயஸே ஶ்ரேயஸே ஸ்யாத் ।
இத்யுக்த்வைநம் தேந ஸார்தம் கதஸ்த்வம்
திஷ்ண்யம் விஷ்ணோ பாஹி வாதாலயேஶ ॥10॥
Roman (IAST) Transliteration
indradyumnaḥ pāṇḍyakhaṇḍādhirāja-
stvadbhaktātmā candanādrau kadācit |
tvat sevāyāṃ magnadhīrāluloke
naivāgastyaṃ prāptamātithyakāmam ||1||
kumbhodbhūtiḥ sambhṛtakrodhabhāraḥ
stabdhātmā tvaṃ hastibhūyaṃ bhajeti |
śaptvā'thainaṃ pratyagāt so'pi lebhe
hastīndratvaṃ tvatsmṛtivyaktidhanyam ||2||
dagdhāmbhodhermadhyabhāji trikūṭe
krīḍañchaile yūthapo'yaṃ vaśābhiḥ |
sarvān jantūnatyavartiṣṭa śaktyā
tvadbhaktānāṃ kutra notkarṣalābhaḥ ||3||
svena sthemnā divyadeśatvaśaktyā
so'yaṃ khedānaprajānan kadācit |
śailaprānte gharmatāntaḥ sarasyāṃ
yūthaissārdhaṃ tvatpraṇunno'bhireme ||4||
hūhūstāvaddevalasyāpi śāpāt
grāhībhūtastajjale bartamānaḥ |
jagrāhainaṃ hastinaṃ pādadeśe
śāntyarthaṃ hi śrāntido'si svakānām ||5||
tvatsevāyā vaibhavāt durnirodhaṃ
yudhyantaṃ taṃ vatsarāṇāṃ sahasram |
prāpte kāle tvatpadaikāgryasidhyai
nakrākrāntaṃ hastivaryaṃ vyadhāstvam ||6||
ārtivyaktaprāktanajñānabhaktiḥ
śuṇḍotkṣiptaiḥ puṇḍarīkaiḥ samarcan |
pūrvābhyastaṃ nirviśeṣātmaniṣṭhaṃ
stotraṃ śreṣṭhaṃ so'nvagādīt parātman ||7||
śrutvā stotraṃ nirguṇasthaṃ samastaṃ
brahmeśādyairnāhamityaprayāte |
sarvātmā tvaṃ bhūrikāruṇyavegāt
tārkṣyārūḍhaḥ prekṣito'bhūḥ purastāt ||8||
hastīndraṃ taṃ hastapadmena dhṛtvā
cakreṇa tvaṃ nakravaryaṃ vyadārīḥ |
gandharve'smin muktaśāpe sa hastī
tvatsārūpyaṃ prāpya dedīpyate sma ||9||
etadvṛttaṃ tvāṃ ca māṃ ca prage yo
gāyetso'yaṃ bhūyase śreyase syāt |
ityuktvainaṃ tena sārdhaṃ gatastvaṃ
dhiṣṇyaṃ viṣṇo pāhi vātālayeśa ||10||