Mukundamala Stotram — InfoLyter.in

ॐ

முகுந்தமாலா ஸ்தோத்ரம்

Mukundamala Stotram

Stotram Kulasekhara Alvar Tamil

குஷ்யதே யஸ்ய நகரே ரங்கயாத்ரா திநே திநே ।

தமஹம் ஶிரஸா வந்தே ராஜாநம் குலஶேகரம் ॥

ஶ்ரீவல்லபேதி வரதேதி தயாபரேதி

பக்தப்ரியேதி பவலுண்டநகோவிதேதி ।

நாதேதி நாகஶயநேதி ஜகந்நிவாஸே-

-த்யாலாபநம் ப்ரதிபதம் குரு மே முகுந்த ॥ 1 ॥

ஜயது ஜயது தேவோ தேவகீநந்தநோऽயம்

ஜயது ஜயது க்ரு'ஷ்ணோ வ்ரு'ஷ்ணிவம்ஶப்ரதீபஃ ।

ஜயது ஜயது மேகஶ்யாமலஃ கோமலாங்கோ

ஜயது ஜயது ப்ரு'த்வீபாரநாஶோ முகுந்தஃ ॥ 2 ॥

முகுந்த மூர்த்நா ப்ரணிபத்ய யாசே

பவந்தமேகாந்தமியந்தமர்தம் ।

அவிஸ்ம்ரு'திஸ்த்வச்சரணாரவிந்தே

பவே பவே மேऽஸ்து பவத்ப்ரஸாதாத் ॥ 3 ॥

நாஹம் வந்தே தவ சரணயோர்த்வந்த்வமத்வந்த்வஹேதோஃ

கும்பீபாகம் குருமபி ஹரே நாரகம் நாபநேதும் ।

ரம்யாராமாம்ரு'துதநுலதா நந்தநே நாபி ரந்தும்

பாவே பாவே ஹ்ரு'தயபவநே பாவயேயம் பவந்தம் ॥ 4 ॥

நாஸ்தா தர்மே ந வஸுநிசயே நைவ காமோபபோகே

யத்யத்பவ்யம் பவது பகவந் பூர்வகர்மாநுரூபம் ।

ஏதத்ப்ரார்த்யம் மம பஹுமதம் ஜந்மஜந்மாந்தரேऽபி

த்வத்பாதாம்போருஹயுககதா நிஶ்சலா பக்திரஸ்து ॥ 5 ॥

திவி வா புவி வா மமாஸ்து வாஸோ

நரகே வா நரகாந்தக ப்ரகாமம் ।

அவதீரித ஶாரதாரவிந்தௌ

சரணௌ தே மரணேऽபி சிந்தயாமி ॥ 6 ॥

க்ரு'ஷ்ண த்வதீய பதபங்கஜபஞ்ஜராந்த-

-மத்யைவ மே விஶது மாநஸராஜஹம்ஸஃ ।

ப்ராணப்ரயாணஸமயே கபவாதபித்தைஃ

கண்டாவரோதநவிதௌ ஸ்மரணம் குதஸ்தே ॥ 7 ॥

சிந்தயாமி ஹரிமேவ ஸந்ததம்

மந்தமந்த ஹஸிதாநநாம்புஜம்

நந்தகோபதநயம் பராத்பரம்

நாரதாதிமுநிப்ரு'ந்தவந்திதம் ॥ 8 ॥

கரசரணஸரோஜே காந்திமந்நேத்ரமீநே

ஶ்ரமமுஷி புஜவீசிவ்யாகுலேऽகாதமார்கே ।

ஹரிஸரஸி விகாஹ்யாபீய தேஜோஜலௌகம்

பவமருபரிகிந்நஃ கேதமத்ய த்யஜாமி ॥ 9 ॥

ஸரஸிஜநயநே ஸஶங்கசக்ரே

முரபிதி மா விரம ஸ்வசித்த ரந்தும் ।

ஸுகதரமபரம் ந ஜாது ஜாநே

ஹரிசரணஸ்மரணாம்ரு'தேந துல்யம் ॥ 10 ॥

மா பீர்மந்தமநோ விசிந்த்ய பஹுதா யாமீஶ்சிரம் யாதநாஃ

நாமீ நஃ ப்ரபவந்தி பாபரிபவஃ ஸ்வாமீ நநு ஶ்ரீதரஃ ।

ஆலஸ்யம் வ்யபநீய பக்திஸுலபம் த்யாயஸ்வ நாராயணம்

லோகஸ்ய வ்யஸநாபநோதநகரோ தாஸஸ்ய கிம் ந க்ஷமஃ ॥ 11 ॥

பவஜலதிகதாநாம் த்வந்த்வவாதாஹதாநாம்

ஸுததுஹித்ரு'கலத்ரத்ராணபாரார்திதாநாம் ।

விஷமவிஷயதோயே மஜ்ஜதாமப்லவாநாம்

பவது ஶரணமேகோ விஷ்ணுபோதோ நராணாம் ॥ 12 ॥

பவஜலதிமகாதம் துஸ்தரம் நிஸ்தரேயம்

கதமஹமிதி சேதோ மா ஸ்ம காஃ காதரத்வம் ।

ஸரஸிஜத்ரு'ஶி தேவே தாவகீ பக்திரேகா

நரகபிதி நிஷண்ணா தாரயிஷ்யத்யவஶ்யம் ॥ 13 ॥

த்ரு'ஷ்ணாதோயே மதநபவநோத்தூத மோஹோர்மிமாலே

தாராவர்தே தநயஸஹஜக்ராஹஸங்காகுலே ச ।

ஸம்ஸாராக்யே மஹதி ஜலதௌ மஜ்ஜதாம் நஸ்த்ரிதாமந்

பாதாம்போஜே வரத பவதோ பக்திநாவம் ப்ரயச்ச ॥ 14 ॥

மாத்ராக்ஷம் க்ஷீணபுண்யாந் க்ஷணமபி பவதோ பக்திஹீநாந்பதாப்ஜே

மாஶ்ரௌஷம் ஶ்ராவ்யபந்தம் தவ சரிதமபாஸ்யாந்யதாக்யாநஜாதம் ।

மாஸ்மார்ஷம் மாதவ த்வாமபி புவநபதே சேதஸாபஹ்நுவாநா-

-ந்மாபூவம் த்வத்ஸபர்யாவ்யதிகரரஹிதோ ஜந்மஜந்மாந்தரேऽபி ॥ 15 ॥

ஜிஹ்வே கீர்தய கேஶவம் முரரிபும் சேதோ பஜ ஶ்ரீதரம்

பாணித்வந்த்வ ஸமர்சயாச்யுதகதாஃ ஶ்ரோத்ரத்வய த்வம் ஶ்ரு'ணு ।

க்ரு'ஷ்ணம் லோகய லோசநத்வய ஹரேர்கச்சாங்க்ரியுக்மாலயம்

ஜிக்ர க்ராண முகுந்தபாததுலஸீம் மூர்தந்நமாதோக்ஷஜம் ॥ 16 ॥

ஹே லோகாஃ ஶ்ரு'ணுத ப்ரஸூதிமரணவ்யாதேஶ்சிகித்ஸாமிமாம்

யோகஜ்ஞாஃ ஸமுதாஹரந்தி முநயோ யாம் யாஜ்ஞவல்க்யாதயஃ ।

அந்தர்ஜ்யோதிரமேயமேகமம்ரு'தம் க்ரு'ஷ்ணாக்யமாபீயதாம்

தத்பீதம் பரமௌஷதம் விதநுதே நிர்வாணமாத்யந்திகம் ॥ 17 ।

ஹே மர்த்யாஃ பரமம் ஹிதம் ஶ்ரு'ணுத வோ வக்ஷ்யாமி ஸங்க்ஷேபதஃ

ஸம்ஸாரார்ணவமாபதூர்மிபஹுலம் ஸம்யக்ப்ரவிஶ்ய ஸ்திதாஃ ।

நாநாஜ்ஞாநமபாஸ்ய சேதஸி நமோ நாராயணாயேத்யமும்

மந்த்ரம் ஸப்ரணவம் ப்ரணாமஸஹிதம் ப்ராவர்தயத்வம் முஹுஃ ॥ 18 ॥

ப்ரு'த்வீரேணுரணுஃ பயாம்ஸி கணிகாஃ பல்குஃ ஸ்புலிங்கோऽலகு-

-ஸ்தேஜோ நிஃஶ்வஸநம் மருத்தநுதரம் ரந்த்ரம் ஸுஸூக்ஷ்மம் நபஃ ।

க்ஷுத்ரா ருத்ரபிதாமஹப்ரப்ரு'தயஃ கீடாஃ ஸமஸ்தாஃ ஸுராஃ

த்ரு'ஷ்டே யத்ர ஸ தாவகோ விஜயதே பூமாவதூதாவதிஃ ॥ 19 ॥

பத்தேநாஞ்ஜலிநா நதேந ஶிரஸா காத்ரைஃ ஸரோமோத்கமைஃ

கண்டேந ஸ்வரகத்கதேந நயநேநோத்கீர்ணபாஷ்பாம்புநா ।

நித்யம் த்வச்சரணாரவிந்தயுகல த்யாநாம்ரு'தாஸ்வாதிநா-

-மஸ்மாகம் ஸரஸீருஹாக்ஷ ஸததம் ஸம்பத்யதாம் ஜீவிதம் ॥ 20 ॥

ஹே கோபாலக ஹே க்ரு'பாஜலநிதே ஹே ஸிந்துகந்யாபதே

ஹே கம்ஸாந்தக ஹே கஜேந்த்ரகருணாபாரீண ஹே மாதவ ।

ஹே ராமாநுஜ ஹே ஜகத்த்ரயகுரோ ஹே புண்டரீகாக்ஷ மாம்

ஹே கோபீஜநநாத பாலய பரம் ஜாநாமி ந த்வாம் விநா ॥ 21 ॥

பக்தாபாயபுஜங்ககாருடமணிஸ்த்ரைலோக்யரக்ஷாமணிஃ

கோபீலோசநசாதகாம்புதமணிஃ ஸௌந்தர்யமுத்ராமணிஃ ।

யஃ காந்தாமணி ருக்மிணீ கநகுசத்வந்த்வைகபூஷாமணிஃ

ஶ்ரேயோ தேவஶிகாமணிர்திஶது நோ கோபாலசூடாமணிஃ ॥ 22 ॥

ஶத்ருச்சேதைகமந்த்ரம் ஸகலமுபநிஷத்வாக்யஸம்பூஜ்யமந்த்ரம்

ஸம்ஸாரோத்தாரமந்த்ரம் ஸமுபசிததமஃ ஸங்கநிர்யாணமந்த்ரம் ।

ஸர்வைஶ்வர்யைகமந்த்ரம் வ்யஸநபுஜகஸந்தஷ்டஸந்த்ராணமந்த்ரம்

ஜிஹ்வே ஶ்ரீக்ரு'ஷ்ணமந்த்ரம் ஜப ஜப ஸததம் ஜந்மஸாபல்யமந்த்ரம் ॥ 23 ॥

வ்யாமோஹ ப்ரஶமௌஷதம் முநிமநோவ்ரு'த்தி ப்ரவ்ரு'த்த்யௌஷதம்

தைத்யேந்த்ரார்திகரௌஷதம் த்ரிபுவநீ ஸஞ்ஜீவநைகௌஷதம் ।

பக்தாத்யந்தஹிதௌஷதம் பவபயப்ரத்வம்ஸநைகௌஷதம்

ஶ்ரேயஃப்ராப்திகரௌஷதம் பிப மநஃ ஶ்ரீக்ரு'ஷ்ணதிவ்யௌஷதம் ॥ 24 ॥

ஆம்நாயாப்யஸநாந்யரண்யருதிதம் வேதவ்ரதாந்யந்வஹம்

மேதஶ்சேதபலாநி பூர்தவிதயஃ ஸர்வே ஹுதம் பஸ்மநி ।

தீர்தாநாமவகாஹநாநி ச கஜஸ்நாநம் விநா யத்பத-

-த்வந்த்வாம்போருஹஸம்ஸ்ம்ரு'திர்விஜயதே தேவஃ ஸ நாராயணஃ ॥ 25 ॥

ஶ்ரீமந்நாம ப்ரோச்ய நாராயணாக்யம்

கே ந ப்ராபுர்வாஞ்சிதம் பாபிநோऽபி ।

ஹா நஃ பூர்வம் வாக்ப்ரவ்ரு'த்தா ந தஸ்மிந்

தேந ப்ராப்தம் கர்பவாஸாதிதுஃகம் ॥ 26 ॥

மஜ்ஜந்மநஃ பலமிதம் மதுகைடபாரே

மத்ப்ரார்தநீய மதநுக்ரஹ ஏஷ ஏவ ।

த்வத்ப்ரு'த்யப்ரு'த்ய பரிசாரக ப்ரு'த்யப்ரு'த்ய

ப்ரு'த்யஸ்ய ப்ரு'த்ய இதி மாம் ஸ்மர லோகநாத ॥ 27 ॥

நாதே நஃ புருஷோத்தமே த்ரிஜகதாமேகாதிபே சேதஸா

ஸேவ்யே ஸ்வஸ்ய பதஸ்ய தாதரி ஸுரே நாராயணே திஷ்டதி ।

யம் கஞ்சித்புருஷாதமம் கதிபயக்ராமேஶமல்பார்ததம்

ஸேவாயை ம்ரு'கயாமஹே நரமஹோ மூகா வராகா வயம் ॥ 28 ॥

மதந பரிஹர ஸ்திதிம் மதீயே

மநஸி முகுந்தபதாரவிந்ததாம்நி ।

ஹரநயநக்ரு'ஶாநுநா க்ரு'ஶோऽஸி

ஸ்மரஸி ந சக்ரபராக்ரமம் முராரேஃ ॥ 29 ॥

தத்த்வம் ப்ருவாணாநி பரம் பரஸ்மா-

-ந்மது க்ஷரந்தீவ ஸதாம் பலாநி ।

ப்ராவர்தய ப்ராஞ்ஜலிரஸ்மி ஜிஹ்வே

நாமாநி நாராயண கோசராணி ॥ 30 ॥

இதம் ஶரீரம் பரிணாமபேஶலம்

பதத்யவஶ்யம் ஶ்லதஸந்திஜர்ஜரம் ।

கிமௌஷதைஃ க்லிஶ்யஸி மூட துர்மதே

நிராமயம் க்ரு'ஷ்ணரஸாயநம் பிப ॥ 31 ॥

தாரா வாராகரவரஸுதா தே தநூஜோ விரிஞ்சிஃ

ஸ்தோதா வேதஸ்தவ ஸுரகணோ ப்ரு'த்யவர்கஃ ப்ரஸாதஃ ।

முக்திர்மாயா ஜகதவிகலம் தாவகீ தேவகீ தே

மாதா மித்ரம் பலரிபுஸுதஸ்த்வய்யதோऽந்யந்ந ஜாநே ॥ 32 ॥

க்ரு'ஷ்ணோ ரக்ஷது நோ ஜகத்த்ரயகுருஃ க்ரு'ஷ்ணம் நமஸ்யாம்யஹம்

க்ரு'ஷ்ணேநாமரஶத்ரவோ விநிஹதாஃ க்ரு'ஷ்ணாய தஸ்மை நமஃ ।

க்ரு'ஷ்ணாதேவ ஸமுத்திதம் ஜகதிதம் க்ரு'ஷ்ணஸ்ய தாஸோऽஸ்ம்யஹம்

க்ரு'ஷ்ணே திஷ்டதி ஸர்வமேததகிலம் ஹே க்ரு'ஷ்ண ரக்ஷஸ்வ மாம் ॥ 33 ॥

தத்த்வம் ப்ரஸீத பகவந் குரு மய்யநாதே

விஷ்ணோ க்ரு'பாம் பரமகாருணிகஃ கில த்வம் ।

ஸம்ஸாரஸாகரநிமக்நமநந்ததீந-

-முத்தர்துமர்ஹஸி ஹரே புருஷோத்தமோऽஸி ॥ 34 ॥

நமாமி நாராயணபாதபங்கஜம்

கரோமி நாராயணபூஜநம் ஸதா ।

வதாமி நாராயணநாம நிர்மலம்

ஸ்மராமி நாராயணதத்த்வமவ்யயம் ॥ 35 ॥

ஶ்ரீநாத நாராயண வாஸுதேவ

ஶ்ரீக்ரு'ஷ்ண பக்தப்ரிய சக்ரபாணே ।

ஶ்ரீபத்மநாபாச்யுத கைடபாரே

ஶ்ரீராம பத்மாக்ஷ ஹரே முராரே ॥ 36 ॥

அநந்த வைகுண்ட முகுந்த க்ரு'ஷ்ண

கோவிந்த தாமோதர மாதவேதி ।

வக்தும் ஸமர்தோऽபி ந வக்தி கஶ்சி-

-தஹோ ஜநாநாம் வ்யஸநாபிமுக்யம் ॥ 37 ॥

த்யாயந்தி யே விஷ்ணுமநந்தமவ்யயம்

ஹ்ரு'த்பத்மமத்யே ஸததம் வ்யவஸ்திதம் ।

ஸமாஹிதாநாம் ஸததாபயப்ரதம்

தே யாந்தி ஸித்திம் பரமாம் ச வைஷ்ணவீம் ॥ 38 ॥

க்ஷீரஸாகரதரங்கஶீகரா-

-ऽऽஸாரதாரகிதசாருமூர்தயே ।

போகிபோகஶயநீயஶாயிநே

மாதவாய மதுவித்விஷே நமஃ ॥ 39 ॥

யஸ்ய ப்ரியௌ ஶ்ருதிதரௌ கவிலோகவீரௌ

மித்ரே த்விஜந்மவரபத்மஶராவபூதாம் ।

தேநாம்புஜாக்ஷசரணாம்புஜஷட்பதேந

ராஜ்ஞா க்ரு'தா க்ரு'திரியம் குலஶேகரேண ॥ 40 ॥

இதி குலஶேகர ப்ரணீதம் முகுந்தமாலா ।

Roman (IAST) Transliteration

ghuṣyate yasya nagare raṅgayātrā dine dine |

tamahaṃ śirasā vande rājānaṃ kulaśekharam ||

śrīvallabheti varadeti dayāpareti

bhaktapriyeti bhavaluṇṭhanakovideti |

nātheti nāgaśayaneti jagannivāse-

-tyālāpanaṃ pratipadaṃ kuru me mukunda || 1 ||

jayatu jayatu devo devakīnandano'yaṃ

jayatu jayatu kṛṣṇo vṛṣṇivaṃśapradīpaḥ |

jayatu jayatu meghaśyāmalaḥ komalāṅgo

jayatu jayatu pṛthvībhāranāśo mukundaḥ || 2 ||

mukunda mūrdhnā praṇipatya yāce

bhavantamekāntamiyantamartham |

avismṛtistvaccaraṇāravinde

bhave bhave me'stu bhavatprasādāt || 3 ||

nāhaṃ vande tava caraṇayordvandvamadvandvahetoḥ

kumbhīpākaṃ gurumapi hare nārakaṃ nāpanetum |

ramyārāmāmṛdutanulatā nandane nāpi rantuṃ

bhāve bhāve hṛdayabhavane bhāvayeyaṃ bhavantam || 4 ||

nāsthā dharme na vasunicaye naiva kāmopabhoge

yadyadbhavyaṃ bhavatu bhagavan pūrvakarmānurūpam |

etatprārthyaṃ mama bahumataṃ janmajanmāntare'pi

tvatpādāmbhoruhayugagatā niścalā bhaktirastu || 5 ||

divi vā bhuvi vā mamāstu vāso

narake vā narakāntaka prakāmam |

avadhīrita śāradāravindau

caraṇau te maraṇe'pi cintayāmi || 6 ||

kṛṣṇa tvadīya padapaṅkajapañjarānta-

-madyaiva me viśatu mānasarājahaṃsaḥ |

prāṇaprayāṇasamaye kaphavātapittaiḥ

kaṇṭhāvarodhanavidhau smaraṇaṃ kutaste || 7 ||

cintayāmi harimeva santataṃ

mandamanda hasitānanāmbujaṃ

nandagopatanayaṃ parātparaṃ

nāradādimunibṛndavanditam || 8 ||

karacaraṇasaroje kāntimannetramīne

śramamuṣi bhujavīcivyākule'gādhamārge |

harisarasi vigāhyāpīya tejojalaughaṃ

bhavamaruparikhinnaḥ khedamadya tyajāmi || 9 ||

sarasijanayane saśaṅkhacakre

murabhidi mā virama svacitta rantum |

sukhataramaparaṃ na jātu jāne

haricaraṇasmaraṇāmṛtena tulyam || 10 ||

mā bhīrmandamano vicintya bahudhā yāmīściraṃ yātanāḥ

nāmī naḥ prabhavanti pāparipavaḥ svāmī nanu śrīdharaḥ |

ālasyaṃ vyapanīya bhaktisulabhaṃ dhyāyasva nārāyaṇaṃ

lokasya vyasanāpanodanakaro dāsasya kiṃ na kṣamaḥ || 11 ||

bhavajaladhigatānāṃ dvandvavātāhatānāṃ

sutaduhitṛkalatratrāṇabhārārditānām |

viṣamaviṣayatoye majjatāmaplavānāṃ

bhavatu śaraṇameko viṣṇupoto narāṇām || 12 ||

bhavajaladhimagādhaṃ dustaraṃ nistareyaṃ

kathamahamiti ceto mā sma gāḥ kātaratvam |

sarasijadṛśi deve tāvakī bhaktirekā

narakabhidi niṣaṇṇā tārayiṣyatyavaśyam || 13 ||

tṛṣṇātoye madanapavanoddhūta mohormimāle

dārāvarte tanayasahajagrāhasaṅghākule ca |

saṃsārākhye mahati jaladhau majjatāṃ nastridhāman

pādāmbhoje varada bhavato bhaktināvaṃ prayaccha || 14 ||

mādrākṣaṃ kṣīṇapuṇyān kṣaṇamapi bhavato bhaktihīnānpadābje

māśrauṣaṃ śrāvyabandhaṃ tava caritamapāsyānyadākhyānajātam |

māsmārṣaṃ mādhava tvāmapi bhuvanapate cetasāpahnuvānā-

-nmābhūvaṃ tvatsaparyāvyatikararahito janmajanmāntare'pi || 15 ||

jihve kīrtaya keśavaṃ muraripuṃ ceto bhaja śrīdharaṃ

pāṇidvandva samarcayācyutakathāḥ śrotradvaya tvaṃ śṛṇu |

kṛṣṇaṃ lokaya locanadvaya harergacchāṅghriyugmālayaṃ

jighra ghrāṇa mukundapādatulasīṃ mūrdhannamādhokṣajam || 16 ||

he lokāḥ śṛṇuta prasūtimaraṇavyādheścikitsāmimāṃ

yogajñāḥ samudāharanti munayo yāṃ yājñavalkyādayaḥ |

antarjyotirameyamekamamṛtaṃ kṛṣṇākhyamāpīyatāṃ

tatpītaṃ paramauṣadhaṃ vitanute nirvāṇamātyantikam || 17 |

he martyāḥ paramaṃ hitaṃ śṛṇuta vo vakṣyāmi saṅkṣepataḥ

saṃsārārṇavamāpadūrmibahulaṃ samyakpraviśya sthitāḥ |

nānājñānamapāsya cetasi namo nārāyaṇāyetyamuṃ

mantraṃ sapraṇavaṃ praṇāmasahitaṃ prāvartayadhvaṃ muhuḥ || 18 ||

pṛthvīreṇuraṇuḥ payāṃsi kaṇikāḥ phalguḥ sphuliṅgo'laghu-

-stejo niḥśvasanaṃ maruttanutaraṃ randhraṃ susūkṣmaṃ nabhaḥ |

kṣudrā rudrapitāmahaprabhṛtayaḥ kīṭāḥ samastāḥ surāḥ

dṛṣṭe yatra sa tāvako vijayate bhūmāvadhūtāvadhiḥ || 19 ||

baddhenāñjalinā natena śirasā gātraiḥ saromodgamaiḥ

kaṇṭhena svaragadgadena nayanenodgīrṇabāṣpāmbunā |

nityaṃ tvaccaraṇāravindayugala dhyānāmṛtāsvādinā-

-masmākaṃ sarasīruhākṣa satataṃ sampadyatāṃ jīvitam || 20 ||

he gopālaka he kṛpājalanidhe he sindhukanyāpate

he kaṃsāntaka he gajendrakaruṇāpārīṇa he mādhava |

he rāmānuja he jagattrayaguro he puṇḍarīkākṣa māṃ

he gopījananātha pālaya paraṃ jānāmi na tvāṃ vinā || 21 ||

bhaktāpāyabhujaṅgagāruḍamaṇistrailokyarakṣāmaṇiḥ

gopīlocanacātakāmbudamaṇiḥ saundaryamudrāmaṇiḥ |

yaḥ kāntāmaṇi rukmiṇī ghanakucadvandvaikabhūṣāmaṇiḥ

śreyo devaśikhāmaṇirdiśatu no gopālacūḍāmaṇiḥ || 22 ||

śatrucchedaikamantraṃ sakalamupaniṣadvākyasampūjyamantraṃ

saṃsārottāramantraṃ samupacitatamaḥ saṅghaniryāṇamantram |

sarvaiśvaryaikamantraṃ vyasanabhujagasandaṣṭasantrāṇamantraṃ

jihve śrīkṛṣṇamantraṃ japa japa satataṃ janmasāphalyamantram || 23 ||

vyāmoha praśamauṣadhaṃ munimanovṛtti pravṛttyauṣadhaṃ

daityendrārtikarauṣadhaṃ tribhuvanī sañjīvanaikauṣadham |

bhaktātyantahitauṣadhaṃ bhavabhayapradhvaṃsanaikauṣadhaṃ

śreyaḥprāptikarauṣadhaṃ piba manaḥ śrīkṛṣṇadivyauṣadham || 24 ||

āmnāyābhyasanānyaraṇyaruditaṃ vedavratānyanvahaṃ

medaśchedaphalāni pūrtavidhayaḥ sarve hutaṃ bhasmani |

tīrthānāmavagāhanāni ca gajasnānaṃ vinā yatpada-

-dvandvāmbhoruhasaṃsmṛtirvijayate devaḥ sa nārāyaṇaḥ || 25 ||

śrīmannāma procya nārāyaṇākhyaṃ

ke na prāpurvāñchitaṃ pāpino'pi |

hā naḥ pūrvaṃ vākpravṛttā na tasmin

tena prāptaṃ garbhavāsādiduḥkham || 26 ||

majjanmanaḥ phalamidaṃ madhukaiṭabhāre

matprārthanīya madanugraha eṣa eva |

tvadbhṛtyabhṛtya paricāraka bhṛtyabhṛtya

bhṛtyasya bhṛtya iti māṃ smara lokanātha || 27 ||

nāthe naḥ puruṣottame trijagatāmekādhipe cetasā

sevye svasya padasya dātari sure nārāyaṇe tiṣṭhati |

yaṃ kañcitpuruṣādhamaṃ katipayagrāmeśamalpārthadaṃ

sevāyai mṛgayāmahe naramaho mūkā varākā vayam || 28 ||

madana parihara sthitiṃ madīye

manasi mukundapadāravindadhāmni |

haranayanakṛśānunā kṛśo'si

smarasi na cakraparākramaṃ murāreḥ || 29 ||

tattvaṃ bruvāṇāni paraṃ parasmā-

-nmadhu kṣarantīva satāṃ phalāni |

prāvartaya prāñjalirasmi jihve

nāmāni nārāyaṇa gocarāṇi || 30 ||

idaṃ śarīraṃ pariṇāmapeśalaṃ

patatyavaśyaṃ ślathasandhijarjaram |

kimauṣadhaiḥ kliśyasi mūḍha durmate

nirāmayaṃ kṛṣṇarasāyanaṃ piba || 31 ||

dārā vārākaravarasutā te tanūjo viriñciḥ

stotā vedastava suragaṇo bhṛtyavargaḥ prasādaḥ |

muktirmāyā jagadavikalaṃ tāvakī devakī te

mātā mitraṃ balaripusutastvayyato'nyanna jāne || 32 ||

kṛṣṇo rakṣatu no jagattrayaguruḥ kṛṣṇaṃ namasyāmyahaṃ

kṛṣṇenāmaraśatravo vinihatāḥ kṛṣṇāya tasmai namaḥ |

kṛṣṇādeva samutthitaṃ jagadidaṃ kṛṣṇasya dāso'smyahaṃ

kṛṣṇe tiṣṭhati sarvametadakhilaṃ he kṛṣṇa rakṣasva mām || 33 ||

tattvaṃ prasīda bhagavan kuru mayyanāthe

viṣṇo kṛpāṃ paramakāruṇikaḥ kila tvam |

saṃsārasāgaranimagnamanantadīna-

-muddhartumarhasi hare puruṣottamo'si || 34 ||

namāmi nārāyaṇapādapaṅkajaṃ

karomi nārāyaṇapūjanaṃ sadā |

vadāmi nārāyaṇanāma nirmalaṃ

smarāmi nārāyaṇatattvamavyayam || 35 ||

śrīnātha nārāyaṇa vāsudeva

śrīkṛṣṇa bhaktapriya cakrapāṇe |

śrīpadmanābhācyuta kaiṭabhāre

śrīrāma padmākṣa hare murāre || 36 ||

ananta vaikuṇṭha mukunda kṛṣṇa

govinda dāmodara mādhaveti |

vaktuṃ samartho'pi na vakti kaści-

-daho janānāṃ vyasanābhimukhyam || 37 ||

dhyāyanti ye viṣṇumanantamavyayaṃ

hṛtpadmamadhye satataṃ vyavasthitam |

samāhitānāṃ satatābhayapradaṃ

te yānti siddhiṃ paramāṃ ca vaiṣṇavīm || 38 ||

kṣīrasāgarataraṅgaśīkarā-

-''sāratārakitacārumūrtaye |

bhogibhogaśayanīyaśāyine

mādhavāya madhuvidviṣe namaḥ || 39 ||

yasya priyau śrutidharau kavilokavīrau

mitre dvijanmavarapadmaśarāvabhūtām |

tenāmbujākṣacaraṇāmbujaṣaṭpadena

rājñā kṛtā kṛtiriyaṃ kulaśekhareṇa || 40 ||

iti kulaśekhara praṇītaṃ mukundamālā |