Kanakadhara Stotram — InfoLyter.in

ॐ

கநகதாரா ஸ்தோத்ரம்

Kanakadhara Stotram

Stotram Adi Shankaracharya Tamil

வந்தே வந்தாரு மந்தாரமிந்திராநந்தகந்தலம் ।

அமந்தாநந்தஸந்தோஹ பந்துரம் ஸிந்துராநநம் ॥

அங்கம் ஹரேஃ புலகபூஷணமாஶ்ரயந்தீ

ப்ரு'ங்காங்கநேவ முகுலாபரணம் தமாலம் ।

அங்கீக்ரு'தாகிலவிபூதிரபாங்கலீலா

மாங்கல்யதாஸ்து மம மங்கலதேவதாயாஃ ॥ 1 ॥

முக்தா முஹுர்விதததீ வதநே முராரேஃ

ப்ரேமத்ரபாப்ரணிஹிதாநி கதாகதாநி ।

மாலா த்ரு'ஶோர்மதுகரீவ மஹோத்பலே யா

ஸா மே ஶ்ரியம் திஶது ஸாகரஸம்பவாயாஃ ॥ 2 ॥

ஆமீலிதாக்ஷமதிகம்ய முதா முகுந்தம்-

ஆநந்தகந்தமநிமேஷமநங்கதந்த்ரம் ।

ஆகேகரஸ்திதகநீநிகபக்ஷ்மநேத்ரம்

பூத்யை பவேந்மம புஜங்கஶயாங்கநாயாஃ ॥ 3 ॥

பாஹ்வந்தரே மதுஜிதஃ ஶ்ரிதகௌஸ்துபே யா

ஹாராவலீவ ஹரிநீலமயீ விபாதி ।

காமப்ரதா பகவதோऽபி கடாக்ஷமாலா

கல்யாணமாவஹது மே கமலாலயாயாஃ ॥ 4 ॥

காலாம்புதாலிலலிதோரஸி கைடபாரேஃ

தாராதரே ஸ்புரதி யா தடிதங்கநேவ ।

மாதுஸ்ஸமஸ்தஜகதாம் மஹநீயமூர்திஃ

பத்ராணி மே திஶது பார்கவநந்தநாயாஃ ॥ 5 ॥

ப்ராப்தம் பதம் ப்ரதமதஃ கலு யத்ப்ரபாவாத்

மாங்கல்யபாஜி மதுமாதிநி மந்மதேந ।

மய்யாபதேத்ததிஹ மந்தரமீக்ஷணார்தம்

மந்தாலஸம் ச மகராலயகந்யகாயாஃ ॥ 6 ॥

விஶ்வாமரேந்த்ரபதவிப்ரமதாநதக்ஷம்

ஆநந்தஹேதுரதிகம் முரவித்விஷோऽபி ।

ஈஷந்நிஷீதது மயி க்ஷணமீக்ஷணார்தம்

இந்தீவரோதரஸஹோதரமிந்திராயாஃ ॥ 7 ॥

இஷ்டா விஶிஷ்டமதயோऽபி யயா தயார்த்ர

த்ரு'ஷ்ட்யா த்ரிவிஷ்டபபதம் ஸுலபம் லபந்தே ।

த்ரு'ஷ்டிஃ ப்ரஹ்ரு'ஷ்ட கமலோதரதீப்திரிஷ்டாம்

புஷ்டிம் க்ரு'ஷீஷ்ட மம புஷ்கரவிஷ்டராயாஃ ॥ 8 ॥

தத்யாத்தயாநுபவநோ த்ரவிணாம்புதாரா-

மஸ்மிந்ந கிஞ்சந விஹங்கஶிஶௌ விஷண்ணே ।

துஷ்கர்மகர்மமபநீய சிராய தூரம்

நாராயணப்ரணயிநீநயநாம்புவாஹஃ ॥ 9 ॥

கீர்தேவதேதி கருடத்வஜஸுந்தரீதி

ஶாகம்பரீதி ஶஶிஶேகரவல்லபேதி ।

ஸ்ரு'ஷ்டிஸ்திதிப்ரலயகேலிஷு ஸம்ஸ்திதாயை

தஸ்யை நமஸ்த்ரிபுவநைககுரோஸ்தருண்யை ॥ 10 ॥

ஶ்ருத்யை நமோऽஸ்து ஶுபகர்மபலப்ரஸூத்யை

ரத்யை நமோऽஸ்து ரமணீயகுணார்ணவாயை ।

ஶக்த்யை நமோऽஸ்து ஶதபத்ரநிகேதநாயை

புஷ்ட்யை நமோऽஸ்து புருஷோத்தமவல்லபாயை ॥ 11 ॥

நமோऽஸ்து நாலீகநிபாநநாயை

நமோऽஸ்து துக்தோததிஜந்மபூம்யை ।

நமோऽஸ்து ஸோமாம்ரு'தஸோதராயை

நமோऽஸ்து நாராயணவல்லபாயை ॥ 12 ॥

நமோऽஸ்து ஹேமாம்புஜபீடிகாயை

நமோऽஸ்து பூமண்டலநாயிகாயை ।

நமோऽஸ்து தேவாதிதயாபராயை

நமோऽஸ்து ஶார்ங்காயுதவல்லபாயை ॥ 13 ॥

நமோऽஸ்து தேவ்யை ப்ரு'குநந்தநாயை

நமோऽஸ்து விஷ்ணோருரஸிஸ்திதாயை ।

நமோऽஸ்து லக்ஷ்ம்யை கமலாலயாயை

நமோऽஸ்து தாமோதரவல்லபாயை ॥ 14 ॥

நமோऽஸ்து காந்த்யை கமலேக்ஷணாயை

நமோऽஸ்து பூத்யை புவநப்ரஸூத்யை ।

நமோऽஸ்து தேவாதிபிரர்சிதாயை

நமோऽஸ்து நந்தாத்மஜவல்லபாயை ॥ 15 ॥

ஸம்பத்கராணி ஸகலேந்த்ரியநந்தநாநி

ஸாம்ராஜ்யதாநவிபவாநி ஸரோருஹாக்ஷி ।

த்வத்வந்தநாநி துரிதோத்தரணோத்யதாநி

மாமேவ மாதரநிஶம் கலயந்து மாந்யே ॥ 16 ॥

யத்கடாக்ஷஸமுபாஸநாவிதிஃ

ஸேவகஸ்ய ஸகலார்தஸம்பதஃ ।

ஸந்தநோதி வசநாங்கமாநஸைஃ

த்வாம் முராரிஹ்ரு'தயேஶ்வரீம் பஜே ॥ 17 ॥

ஸரஸிஜநிலயே ஸரோஜஹஸ்தே [ஸரஸிஜநயநெ]

தவலதமாம்ஶுககந்தமால்யஶோபே ।

பகவதி ஹரிவல்லபே மநோஜ்ஞே

த்ரிபுவநபூதிகரி ப்ரஸீத மஹ்யம் ॥ 18 ॥

திக்கஸ்திபிஃ கநககும்பமுகாவஸ்ரு'ஷ்ட

ஸ்வர்வாஹிநீ விமலசாருஜலப்லுதாங்கீம் ।

ப்ராதர்நமாமி ஜகதாம் ஜநநீமஶேஷ

லோகாதிநாத-க்ரு'ஹிணீம்-அம்ரு'தாப்திபுத்ரீம் ॥ 19 ॥

கமலே கமலாக்ஷவல்லபே த்வம்

கருணாபூரதரங்கிதைரபாங்கைஃ ।

அவலோகய மாமகிஞ்சநாநாம்

ப்ரதமம் பாத்ரமக்ரு'த்ரிமம் தயாயாஃ ॥ 20 ॥

ஸ்துவந்தி யே ஸ்துதிபிரமூபிரந்வஹம்

த்ரயீமயீம் த்ரிபுவநமாதரம் ரமாம் ।

குணாதிகா குருதர-பாக்ய-பாகிநோ [பாகிநஹ்]

பவந்தி தே புவி புதபாவிதாஶயாஃ ॥ 21 ॥

ஸுவர்ணதாராஸ்தோத்ரம் யச்சங்கராசார்ய நிர்மிதம் ।

த்ரிஸந்த்யம் யஃ படேந்நித்யம் ஸ குபேரஸமோ பவேத் ॥

இதி ஶ்ரீமத்பரமஹம்ஸபரிவ்ராஜகாசார்யஸ்ய ஶ்ரீகோவிந்தபகவத்பூஜ்யபாதஶிஷ்யஸ்ய ஶ்ரீமச்சங்கரபகவதஃ க்ரு'தௌ கநகதாராஸ்தோத்ரம் ஸம்பூர்ணம் ।

Roman (IAST) Transliteration

vande vandāru mandāramindirānandakandalam |

amandānandasandoha bandhuraṃ sindhurānanam ||

aṅgaṃ hareḥ pulakabhūṣaṇamāśrayantī

bhṛṅgāṅganeva mukulābharaṇaṃ tamālam |

aṅgīkṛtākhilavibhūtirapāṅgalīlā

māṅgalyadāstu mama maṅgaladevatāyāḥ || 1 ||

mugdhā muhurvidadhatī vadane murāreḥ

prematrapāpraṇihitāni gatāgatāni |

mālā dṛśormadhukarīva mahotpale yā

sā me śriyaṃ diśatu sāgarasambhavāyāḥ || 2 ||

āmīlitākṣamadhigamya mudā mukundam-

ānandakandamanimeṣamanaṅgatantram |

ākekarasthitakanīnikapakṣmanetraṃ

bhūtyai bhavenmama bhujaṅgaśayāṅganāyāḥ || 3 ||

bāhvantare madhujitaḥ śritakaustubhe yā

hārāvalīva harinīlamayī vibhāti |

kāmapradā bhagavato'pi kaṭākṣamālā

kalyāṇamāvahatu me kamalālayāyāḥ || 4 ||

kālāmbudālilalitorasi kaiṭabhāreḥ

dhārādhare sphurati yā taṭidaṅganeva |

mātussamastajagatāṃ mahanīyamūrtiḥ

bhadrāṇi me diśatu bhārgavanandanāyāḥ || 5 ||

prāptaṃ padaṃ prathamataḥ khalu yatprabhāvāt

māṅgalyabhāji madhumāthini manmathena |

mayyāpatettadiha mantharamīkṣaṇārdhaṃ

mandālasaṃ ca makarālayakanyakāyāḥ || 6 ||

viśvāmarendrapadavibhramadānadakṣaṃ

ānandaheturadhikaṃ muravidviṣo'pi |

īṣanniṣīdatu mayi kṣaṇamīkṣaṇārthaṃ

indīvarodarasahodaramindirāyāḥ || 7 ||

iṣṭā viśiṣṭamatayo'pi yayā dayārdra

dṛṣṭyā triviṣṭapapadaṃ sulabhaṃ labhante |

dṛṣṭiḥ prahṛṣṭa kamalodaradīptiriṣṭāṃ

puṣṭiṃ kṛṣīṣṭa mama puṣkaraviṣṭarāyāḥ || 8 ||

dadyāddayānupavano draviṇāmbudhārā-

masminna kiñcana vihaṅgaśiśau viṣaṇṇe |

duṣkarmagharmamapanīya cirāya dūraṃ

nārāyaṇapraṇayinīnayanāmbuvāhaḥ || 9 ||

gīrdevateti garuḍadhvajasundarīti

śākambharīti śaśiśekharavallabheti |

sṛṣṭisthitipralayakeliṣu saṃsthitāyai

tasyai namastribhuvanaikagurostaruṇyai || 10 ||

śrutyai namo'stu śubhakarmaphalaprasūtyai

ratyai namo'stu ramaṇīyaguṇārṇavāyai |

śaktyai namo'stu śatapatraniketanāyai

puṣṭyai namo'stu puruṣottamavallabhāyai || 11 ||

namo'stu nālīkanibhānanāyai

namo'stu dugdhodadhijanmabhūmyai |

namo'stu somāmṛtasodarāyai

namo'stu nārāyaṇavallabhāyai || 12 ||

namo'stu hemāmbujapīṭhikāyai

namo'stu bhūmaṇḍalanāyikāyai |

namo'stu devādidayāparāyai

namo'stu śārṅgāyudhavallabhāyai || 13 ||

namo'stu devyai bhṛgunandanāyai

namo'stu viṣṇorurasisthitāyai |

namo'stu lakṣmyai kamalālayāyai

namo'stu dāmodaravallabhāyai || 14 ||

namo'stu kāntyai kamalekṣaṇāyai

namo'stu bhūtyai bhuvanaprasūtyai |

namo'stu devādibhirarcitāyai

namo'stu nandātmajavallabhāyai || 15 ||

sampatkarāṇi sakalendriyanandanāni

sāmrājyadānavibhavāni saroruhākṣi |

tvadvandanāni duritoddharaṇodyatāni

māmeva mātaraniśaṃ kalayantu mānye || 16 ||

yatkaṭākṣasamupāsanāvidhiḥ

sevakasya sakalārthasampadaḥ |

santanoti vacanāṅgamānasaiḥ

tvāṃ murārihṛdayeśvarīṃ bhaje || 17 ||

sarasijanilaye sarojahaste [sarasijanayanè]

dhavalatamāṃśukagandhamālyaśobhe |

bhagavati harivallabhe manojñe

tribhuvanabhūtikari prasīda mahyam || 18 ||

digghastibhiḥ kanakakumbhamukhāvasṛṣṭa

svarvāhinī vimalacārujalaplutāṅgīm |

prātarnamāmi jagatāṃ jananīmaśeṣa

lokādhinātha-gṛhiṇīm-amṛtābdhiputrīm || 19 ||

kamale kamalākṣavallabhe tvaṃ

karuṇāpūrataraṅgitairapāṅgaiḥ |

avalokaya māmakiñcanānāṃ

prathamaṃ pātramakṛtrimaṃ dayāyāḥ || 20 ||

stuvanti ye stutibhiramūbhiranvahaṃ

trayīmayīṃ tribhuvanamātaraṃ ramām |

guṇādhikā gurutara-bhāgya-bhāgino [bhāginah]

bhavanti te bhuvi budhabhāvitāśayāḥ || 21 ||

suvarṇadhārāstotraṃ yacchaṅkarācārya nirmitam |

trisandhyaṃ yaḥ paṭhennityaṃ sa kuberasamo bhavet ||

iti śrīmatparamahaṃsaparivrājakācāryasya śrīgovindabhagavatpūjyapādaśiṣyasya śrīmacchaṅkarabhagavataḥ kṛtau kanakadhārāstotraṃ sampūrṇam |