gopya ūcuḥ |
jayati te'dhikaṃ janmanā vrajaḥ
śrayata indirā śaśvadatra hi |
dayita dṛśyatāṃ dikṣu tāvakā-
stvayi dhṛtāsavastvāṃ vicinvate || 1||
śaradudāśaye sādhujātasa-
tsarasijodaraśrīmuṣā dṛśā |
suratanātha te'śulkadāsikā
varada nighnato neha kiṃ vadhaḥ || 2||
viṣajalāpyayādvyālarākṣasā-
dvarṣamārutādvaidyutānalāt |
vṛṣamayātmajādviśvatobhayā-
dṛṣabha te vayaṃ rakṣitā muhuḥ || 3||
na khalu gopikānandano bhavā-
nakhiladehināmantarātmadṛk |
vikhanasārthito viśvaguptaye
sakha udeyivānsātvatāṃ kule || 4||
viracitābhayaṃ vṛṣṇidhurya te
caraṇamīyuṣāṃ saṃsṛterbhayāt |
karasaroruhaṃ kānta kāmadaṃ
śirasi dhehi naḥ śrīkaragraham || 5||
vrajajanārtihanvīra yoṣitāṃ
nijajanasmayadhvaṃsanasmita |
bhaja sakhe bhavatkiṅkarīḥ sma no
jalaruhānanaṃ cāru darśaya || 6||
praṇatadehināṃ pāpakarśanaṃ
tṛṇacarānugaṃ śrīniketanam |
phaṇiphaṇārpitaṃ te padāmbujaṃ
kṛṇu kuceṣu naḥ kṛndhi hṛcchayam || 7||
madhurayā girā valguvākyayā
budhamanojñayā puṣkarekṣaṇa |
vidhikarīrimā vīra muhyatī-
radharasīdhunā''pyāyayasva naḥ || 8||
tava kathāmṛtaṃ taptajīvanaṃ
kavibhirīḍitaṃ kalmaṣāpaham |
śravaṇamaṅgalaṃ śrīmadātataṃ
bhuvi gṛṇanti te bhūridā janāḥ || 9||
prahasitaṃ priya premavīkṣaṇaṃ
viharaṇaṃ ca te dhyānamaṅgalam |
rahasi saṃvido yā hṛdispṛśaḥ
kuhaka no manaḥ kṣobhayanti hi || 10||
calasi yadvrajāccārayanpaśūn
nalinasundaraṃ nātha te padam |
śilatṛṇāṅkuraiḥ sīdatīti naḥ
kalilatāṃ manaḥ kānta gacchati || 11||
dinaparikṣaye nīlakuntalai-
rvanaruhānanaṃ bibhradāvṛtam |
ghanarajasvalaṃ darśayanmuhu-
rmanasi naḥ smaraṃ vīra yacchasi || 12||
praṇatakāmadaṃ padmajārcitaṃ
dharaṇimaṇḍanaṃ dhyeyamāpadi |
caraṇapaṅkajaṃ śantamaṃ ca te
ramaṇa naḥ staneṣvarpayādhihan || 13||
suratavardhanaṃ śokanāśanaṃ
svaritaveṇunā suṣṭhu cumbitam |
itararāgavismāraṇaṃ nṛṇāṃ
vitara vīra naste'dharāmṛtam || 14||
aṭati yadbhavānahni kānanaṃ
truṭiryugāyate tvāmapaśyatām |
kuṭilakuntalaṃ śrīmukhaṃ ca te
jaḍa udīkṣatāṃ pakṣmakṛddṛśām || 15||
patisutānvayabhrātṛbāndhavā-
nativilaṅghya te'ntyacyutāgatāḥ |
gatividastavodgītamohitāḥ
kitava yoṣitaḥ kastyajenniśi || 16||
rahasi saṃvidaṃ hṛcchayodayaṃ
prahasitānanaṃ premavīkṣaṇam |
bṛhaduraḥ śriyo vīkṣya dhāma te
muhuratispṛhā muhyate manaḥ || 17||
vrajavanaukasāṃ vyaktiraṅga te
vṛjinahantryalaṃ viśvamaṅgalam |
tyaja manāk ca nastvatspṛhātmanāṃ
svajanahṛdrujāṃ yanniṣūdanam || 18||
yatte sujātacaraṇāmburuhaṃ staneṣa
bhītāḥ śanaiḥ priya dadhīmahi karkaśeṣu |
tenāṭavīmaṭasi tadvyathate na kiṃsvit
kūrpādibhirbhramati dhīrbhavadāyuṣāṃ naḥ || 19||
iti śrīmadbhāgavata mahāpurāṇe pāramahaṃsyāṃ saṃhitāyāṃ
daśamaskandhe pūrvārdhe rāsakrīḍāyāṃ gopīgītaṃ nāmaikatriṃśo'dhyāyaḥ ||