Ashtavakra Gita Tritiyo'dhyayah

ॐ

அஷ்டாவக்ர கீதா த்ரு'தீயோऽத்யாயஃ

Gita Tamil

அஷ்டாவக்ர உவாச ॥

அவிநாஶிநமாத்மாநமேகம் விஜ்ஞாய தத்த்வதஃ ।

தவாத்மஜ்ஞாநஸ்ய தீரஸ்ய கதமர்தார்ஜநே ரதிஃ ॥ 3-1॥

ஆத்மாஜ்ஞாநாதஹோ ப்ரீதிர்விஷயப்ரமகோசரே ।

ஶுக்தேரஜ்ஞாநதோ லோபோ யதா ரஜதவிப்ரமே ॥ 3-2॥

விஶ்வம் ஸ்புரதி யத்ரேதம் தரங்கா இவ ஸாகரே ।

ஸோऽஹமஸ்மீதி விஜ்ஞாய கிம் தீந இவ தாவஸி ॥ 3-3॥

ஶ்ருத்வாபி ஶுத்தசைதந்ய ஆத்மாநமதிஸுந்தரம் ।

உபஸ்தேऽத்யந்தஸம்ஸக்தோ மாலிந்யமதிகச்சதி ॥ 3-4॥

ஸர்வபூதேஷு சாத்மாநம் ஸர்வபூதாநி சாத்மநி ।

முநேர்ஜாநத ஆஶ்சர்யம் மமத்வமநுவர்ததே ॥ 3-5॥

ஆஸ்திதஃ பரமாத்வைதம் மோக்ஷார்தேऽபி வ்யவஸ்திதஃ ।

ஆஶ்சர்யம் காமவஶகோ விகலஃ கேலிஶிக்ஷயா ॥ 3-6॥

உத்பூதம் ஜ்ஞாநதுர்மித்ரமவதார்யாதிதுர்பலஃ ।

ஆஶ்சர்யம் காமமாகாங்க்ஷேத் காலமந்தமநுஶ்ரிதஃ ॥ 3-7॥

இஹாமுத்ர விரக்தஸ்ய நித்யாநித்யவிவேகிநஃ ।

ஆஶ்சர்யம் மோக்ஷகாமஸ்ய மோக்ஷாத் ஏவ விபீஷிகா ॥ 3-8॥

தீரஸ்து போஜ்யமாநோऽபி பீட்யமாநோऽபி ஸர்வதா ।

ஆத்மாநம் கேவலம் பஶ்யந் ந துஷ்யதி ந குப்யதி ॥ 3-9॥

சேஷ்டமாநம் ஶரீரம் ஸ்வம் பஶ்யத்யந்யஶரீரவத் ।

ஸம்ஸ்தவே சாபி நிந்தாயாம் கதம் க்ஷுப்யேத் மஹாஶயஃ ॥ 3-10॥

மாயாமாத்ரமிதம் விஶ்வம் பஶ்யந் விகதகௌதுகஃ ।

அபி ஸந்நிஹிதே ம்ரு'த்யௌ கதம் த்ரஸ்யதி தீரதீஃ ॥ 3-11॥

நிஃஸ்ப்ரு'ஹம் மாநஸம் யஸ்ய நைராஶ்யேऽபி மஹாத்மநஃ ।

தஸ்யாத்மஜ்ஞாநத்ரு'ப்தஸ்ய துலநா கேந ஜாயதே ॥ 3-12॥

ஸ்வபாவாத் ஏவ ஜாநாநோ த்ரு'ஶ்யமேதந்ந கிஞ்சந ।

இதம் க்ராஹ்யமிதம் த்யாஜ்யம் ஸ கிம் பஶ்யதி தீரதீஃ ॥ 3-13॥

அந்தஸ்த்யக்தகஷாயஸ்ய நிர்த்வந்த்வஸ்ய நிராஶிஷஃ ।

யத்ரு'ச்சயாகதோ போகோ ந துஃகாய ந துஷ்டயே ॥ 3-14॥

Roman (IAST) Transliteration

aṣṭāvakra uvāca ||

avināśinamātmānamekaṃ vijñāya tattvataḥ |

tavātmajñānasya dhīrasya kathamarthārjane ratiḥ || 3-1||

ātmājñānādaho prītirviṣayabhramagocare |

śukterajñānato lobho yathā rajatavibhrame || 3-2||

viśvaṃ sphurati yatredaṃ taraṅgā iva sāgare |

so'hamasmīti vijñāya kiṃ dīna iva dhāvasi || 3-3||

śrutvāpi śuddhacaitanya ātmānamatisundaram |

upasthe'tyantasaṃsakto mālinyamadhigacchati || 3-4||

sarvabhūteṣu cātmānaṃ sarvabhūtāni cātmani |

munerjānata āścaryaṃ mamatvamanuvartate || 3-5||

āsthitaḥ paramādvaitaṃ mokṣārthe'pi vyavasthitaḥ |

āścaryaṃ kāmavaśago vikalaḥ keliśikṣayā || 3-6||

udbhūtaṃ jñānadurmitramavadhāryātidurbalaḥ |

āścaryaṃ kāmamākāṅkṣet kālamantamanuśritaḥ || 3-7||

ihāmutra viraktasya nityānityavivekinaḥ |

āścaryaṃ mokṣakāmasya mokṣād eva vibhīṣikā || 3-8||

dhīrastu bhojyamāno'pi pīḍyamāno'pi sarvadā |

ātmānaṃ kevalaṃ paśyan na tuṣyati na kupyati || 3-9||

ceṣṭamānaṃ śarīraṃ svaṃ paśyatyanyaśarīravat |

saṃstave cāpi nindāyāṃ kathaṃ kṣubhyet mahāśayaḥ || 3-10||

māyāmātramidaṃ viśvaṃ paśyan vigatakautukaḥ |

api sannihite mṛtyau kathaṃ trasyati dhīradhīḥ || 3-11||

niḥspṛhaṃ mānasaṃ yasya nairāśye'pi mahātmanaḥ |

tasyātmajñānatṛptasya tulanā kena jāyate || 3-12||

svabhāvād eva jānāno dṛśyametanna kiñcana |

idaṃ grāhyamidaṃ tyājyaṃ sa kiṃ paśyati dhīradhīḥ || 3-13||

antastyaktakaṣāyasya nirdvandvasya nirāśiṣaḥ |

yadṛcchayāgato bhogo na duḥkhāya na tuṣṭaye || 3-14||