5.37 Sundarakanda - Saptatrimsha Sargah

ॐ

5.37 සුන්දරකාණ්ඩ - සප්තත්රිංශ සර්ගඃ

Valmiki Sinhala

ශ්රීමද්වාල්මීකීය රාමායණේ සුන්දරකාණ්ඩම් .

අථ සප්තත්රිංශස්සර්ගඃ .

සීතා තද්වචනං ශ්රුත්වා පූර්ණචන්ද්රනිභානනා .

හනූමන්තමුවාචේදං ධර්මාර්ථසහිතං වචඃ .. 1 ..

අමෘතං විෂසංසෘෂ්ටං ත්වයා වානර භාෂිතම් .

යච්ච නාන්යමනා රාමෝ යච්ච ශෝකපරායණඃ .. 2 ..

ඓශ්වර්යේ වා සුවිස්තීර්ණේ ව්යසනේ වා සුදාරුණේ .

රජ්ජ්වේව පුරුෂං බද්ධ්වා කෘතාන්තඃ පරිකර්ෂති .. 3 ..

විධිර්නූනමසංහාර්යඃ ප්රාණිනාං ප්ලවගෝත්තම .

සෞමිත්රිං මාං ච රාමං ච ව්යසනෛඃ පශ්ය මෝහිතාන් .. 4 ..

ශෝකස්යාස්ය කදා පාරං රාඝවෝ(අ)ධිගමිෂ්යති .

ප්ලවමානඃ පරිශ්රාන්තෝ හතනෞ ස්සාගරේ යථා .. 5 ..

රාක්ෂසානාං වධං කෘත්වා සූදයිත්වා ච රාවණම් .

ලඞ්කාමුන්මූලිතාං කෘත්වා කදා ද්රක්ෂ්යති මාං පතිඃ .. 6 ..

ස වාච්යස්සන්ත්වරස්වේති යාවදේව න පූර්යතේ .

අයං සංවත්සරඃ කාලස්තාවද්ධි මම ජීවිතම් .. 7 ..

වර්තතේ දශමෝ මාසෝ ද්වෞ තු ශේෂෞ ප්ලවඞ්ගම .

රාවණේන නෘශංසේන සමයෝ යඃ කෘතෝ මම .. 8 ..

විභීෂණේන ච භ්රාත්රා මම නිර්යාතනං ප්රති .

අනුනීතඃ ප්රයත්නේන න ච තත්කුරුතේ මතිම් .. 9 ..

මම ප්රතිප්රදානං හි රාවණස්ය න රෝචතේ .

රාවණං මාර්ගතේ සඞ්ඛ්යේ මෘත්යුඃ කාලවශං ගතම් .. 10 ..

ජ්යේෂ්ඨා කන්යා නලා නාම විභීෂණසුතා කපේ .

තයා මමේදමාඛ්යාතං මාත්රා ප්රහිතයා ස්වයම් .. 11 ..

අසංශයං හරිශ්රේෂ්ඨ ක්ෂිප්රං මාං ප්රාප්ස්යතේ පතිඃ .

අන්තරාත්මා ච මේ ශුද්ධස්තස්මිංශ්ච බහවෝ ගුණාඃ .. 12 ..

උත්සාහඃ පෞරුෂං සත්ත්වමානෘශංස්යං කෘතජ්ඤතා .

වික්රමශ්ච ප්රභාවශ්ච සන්ති වානර රාඝවේ .. 13 ..

චතුර්දශසහස්රාණි රාක්ෂසානාං ජඝාන යඃ .

ජනස්ථානේ විනා භ්රාත්රා ශත්රුඃ කස්තස්ය නෝද්විජේත් .. 14 ..

න ස ශක්යස්තුලයිතුං ව්යසනෛඃ පුරුෂර්ෂභඃ .

අහං තස්ය ප්රභාවජ්ඤා ශක්රස්යේව පුලෝමජා .. 15 ..

ශරජාලාංශුමාන්ශූරඃ කපේ රාමදිවාකරඃ .

ශත්රුරක්ෂෝමයං තෝයමුපශෝෂං නයිෂ්යති .. 16 ..

ඉති සඤ්ජල්පමානාං තාං රාමාර්ථේ ශෝකකර්ශිතාම් .

ආශ්රුසම්පූර්ණනයනාමුවාච වචනං කපිඃ .. 17 ..

ශ්රුත්වෛව තු වචෝ මහ්යං ක්ෂිප්රමේෂ්යති රාඝවඃ .

චමූං ප්රකර්ෂන්මහතීං හර්යෘක්ෂගණසඞ්කුලාම් .. 18 ..

අථවා මෝචයිෂ්යාමි ත්වාමද්යෛව වරානනේ .

අස්මාද්ධුඃඛාදුපාරෝහ මම පෘෂ්ඨමනින්දිතේ .. 19 ..

ත්වාං හි පෘෂ්ඨගතාං කෘත්වා සන්තරිෂ්යාමි සාගරම් .

ශක්තිරස්ති හි මේ වෝඪුං ලඞ්කාමපි සරාවණාම් .. 20 ..

අහං ප්රස්රවණස්ථාය රාඝවායාද්ය මෛථිලි .

ප්රාපයිෂ්යාමි ශක්රාය හව්යං හුතමිවානලඃ .. 21 ..

ද්රක්ෂ්යස්යද්වෛව වෛදේහි රාඝවං සහලක්ෂ්මණම් .

ව්යවසායසමායුක්තං විෂ්ණුං දෛත්යවධේ යථා .. 22 ..

ත්වද්දර්ශනකෘතෝත්සාහමාශ්රමස්ථං මහාබලම් .

පුරන්දරමිවාසීනං නාගරාජස්ය මූර්ධනි .. 23 ..

පෘෂ්ඨමාරෝහ මේ දේවි මා විකාඞ්ක්ෂස්ව ශෝභනේ .

යෝගමන්විච්ඡ රාමේණ ශශාඞ්කේනේව රෝහිණී .. 24 ..

කථයන්තීව චන්ද්රේණ සූර්යේණ ච මහාර්චිෂා .

මත්පෘෂ්ඨමධිරුහ්ය ත්වං තරාකාශමහාර්ණවෞ .. 25 ..

න හි මේ සම්ප්රයාතස්ය ත්වාමිතෝ නයතෝ(අ)ඞ්ගනේ .

අනුගන්තුං ගතිං ශක්තාස්සර්වේ ලඞ්කානිවාසිනඃ .. 26 ..

යථෛවාහමිහ ප්රාප්තස්තථෛවාහමසංශයඃ .

යාස්යාමි පශ්ය වෛදේහි ත්වාමුද්යම්ය විහායසම් .. 27 ..

මෛථිලී තු හරිශ්රේෂ්ඨාච්ඡ්රුත්වා වචනමද්භුතම් .

හර්ෂවිස්මිතසර්වාඞ්ගී හනුමන්තමථාබ්රවීත් .. 28 ..

හනුමන්දූරමධ්වානං කථං මාං වෝඪුමිච්ඡසි .

තදේව ඛලු තේ මන්යේ කපිත්වං හරියූථප .. 29 ..

කථං වාල්පශරීරස්ත්වං මාමිතෝ නේතුමිච්ඡසි .

සකාශං මානවේන්ද්රස්ය භර්තුර්මේ ප්ලවගර්ෂභ .. 30 ..

සීතායා වචනං ශ්රුත්වා හනුමාන්මාරුතාත්මජඃ .

චින්තයාමාස ලක්ෂ්මීවාන්නවං පරිභවං කෘතම් .. 31 ..

න මේ ජානාති සත්ත්වං වා ප්රභාවං වා(අ)සිතේක්ෂණා .

තස්මාත්පශ්යතු වෛදේහී යද්රූපං මම කාමතඃ .. 32 ..

ඉති සඤ්චින්ත්ය හනුමාංස්තදා ප්ලවගසත්තමඃ .

දර්ශයාමාස වෛදේහ්යාස්ස්වරූපමරිමර්දනඃ .. 33 ..

ස තස්මාත්පාදපාද්ධීමානාප්ලුත්ය ප්ලවගර්ෂභඃ .

තතෝ වර්ධිතුමාරේභේ සීතාප්රත්යයකාරණාත් .. 34 ..

මේරුමන්දරසඞ්කාශෝ බභෞ දීප්තානලප්රභඃ .

අග්රතෝ ව්යවතස්ථේ ච සීතායා වානරෝත්තමඃ .. 35 ..

හරිඃ පර්වතසඞ්කාශස්තාම්රවක්ත්රෝ මහාබලඃ .

වජ්රදංෂ්ට්රනඛෝ භීමෝ වෛදේහීමිදමබ්රවීත් .. 36 ..

සපර්වතවනෝද්දේශාං සාට්ටප්රාකාරතෝරණාම් .

ලඞ්කාමිමාං සනාථාං වා නයිතුං ශක්තිරස්ති මේ .. 37 ..

තදවස්ථාප්යතාං බුද්ධිරලං දේවි විකාඞ්ක්ෂයා .

විශෝකං කුරු වෛදේහි රාඝවං සහලක්ෂ්මණම් .. 38 ..

තං දෘෂ්ට්වා භීමසඞ්කාශමුවාච ජනකාත්මජා .

පද්මපත්රවිශාලාක්ෂී මාරුතස්යෞරසං සුතම් .. 39 ..

තව සත්ත්වං බලං චෛව විජානාමි මහාකපේ .

වායෝරිව ගතිං චෛව තේජශ්චාග්නේරිවාද්භුතම් .. 40 ..

ප්රාකෘතෝ(අ)න්යඃ කථං චේමාං භූමිමාගන්තුමර්හති .

උදධේරප්රමේයස්ය පාරං වානරපුඞ්ගව .. 41 ..

ජානාමි ගමනේ ශක්තිං නයනේ චාපි තේ මම .

අවශ්යං සම්ප්රධාර්යාශු කාර්යසිද්ධිර්මහාත්මනඃ .. 42 ..

අයුක්තං තු කපිශ්රේෂ්ඨ මම ගන්තුං ත්වයා(අ)නඝ .

වායුවේගසවේගස්ය වේගෝ මාං මෝහයේත්තව .. 43 ..

අහමාකාශමාපන්නා හ්යුපර්යුපරි සාගරම් .

ප්රපතේයං හි තේ පෘෂ්ඨාද්භයාද්වේගේව ගච්ඡතඃ .. 44 ..

පතිතා සාගරේ චාහං තිමිනක්රඣෂාකුලේ .

භවේයමාශු විවශා යාදසාමන්නමුත්තමම් .. 45 ..

න ච ශක්ෂ්යේ ත්වයා සාර්ධං ගන්තුං ශත්රුවිනාශන .

කලත්රවති සන්දේහස්ත්වය්යපි ස්යාදසංශයඃ .. 46 ..

හ්රියමාණාං තු මාං දෘෂ්ට්වා රාක්ෂසා භීමවික්රමාඃ .

අනුගච්ඡේයුරාදිෂ්ටා රාවණේන දුරාත්මනා .. 47 ..

තෛස්ත්වං පරිවෘතශ්ශූරෛශ්ශූලමුද්ගරපාණිභිඃ .

භවේස්ත්වං සංශයං ප්රාප්තෝ මයා වීර කලත්රවාන් .. 48 ..

සායුධා බහවෝ ව්යෝම්නි රාක්ෂසාස්ත්වං නිරායුධඃ .

කථං ශක්ෂ්යසි සංයාතුං මාං චෛව පරිරක්ෂිතුම් .. 49 ..

යුධ්යමානස්ය රක්ෂෝභිස්තව තෛඃ ක්රූරකර්මභිඃ .

ප්රපතේයං හි තේ පෘෂ්ඨාද්භයාර්තා කපිසත්තම .. 50 ..

අථ රක්ෂාංසි භීමානි මහාන්ති බලවන්ති ච .

කථඤ්චිත්සාම්පරායේ ත්වාං ජයේයුඃ කපිසත්තම .. 51 ..

අථවා යුධ්යමානස්ය පතේයං විමුඛස්ය තේ .

පතිතාං ච ගෘහීත්වා මාං නයේයුඃ පාපරාක්ෂසාඃ .. 52 ..

මාං වා හරේයුස්ත්වද්ධස්තාද්විශසේයුරථාපි වා .

අව්යවස්ථෞ හි දෘශ්යේතේ යුද්ධේ ජයපරාජයෞ .. 53 ..

අහං වාපි විපද්යේයං රක්ෂෝභිරභිතර්ජිතා .

ත්වත්ප්රයත්නෝ හරිශ්රේෂ්ඨ භවේන්නිෂ්ඵල ඒව තු .. 54 ..

කාමං ත්වමසි පර්යාප්තෝ නිහන්තුං සර්වරාක්ෂසාන් .

රාඝවස්ය යශෝ හීයේත්ත්වයා ශස්තෛස්තු රාක්ෂසෛඃ .. 55 ..

අථවා(අ)දාය රක්ෂාංසි න්යසේයුස්සම්වෘතේ හි මාම් .

යත්ර තේ නාභිජානීයුර්හරයෝ නාපි රාඝවෞ .. 56 ..

ආරම්භස්තු මදර්ථෝ(අ)යං තතස්තව නිරර්ථකඃ .

ත්වයා හි සහ රාමස්ය මහානාගමනේ ගුණඃ .. 57 ..

මයි ජීවිතමායත්තං රාඝවස්ය මහාත්මනඃ .

භ්රාත්රූණාං ච මහාබාහෝ තව රාජකුලස්ය ච .. 58 ..

තෞ නිරාශෞ මදර්ථං තු ශෝකසන්තාපකර්ශිතෞ .

සහ සර්වර්ක්ෂහරිභිස්ත්යක්ෂ්යතඃ ප්රාණසඞ්ග්රහම් .. 59 ..

භර්තුර්භක්තිං පුරස්කෘත්ය රාමාදන්යස්ය වානර .

න ස්පෘශාමි ශරීරං තු පුංසෝ වානරපුඞ්ගව .. 60 ..

යදහං ගාත්රසංස්පර්ශං රාවණස්ය බලාද්ගතා .

අනීශා කිං කරිෂ්යාමි විනාථා විවශා සතී .. 61 ..

යදි රාමෝ දශග්රීවමිහ හත්ත්වා සබාන්ධවම් .

මාමිතෝ ගෘහ්ය ගච්ඡේත තත්තස්ය සදෘශං භවේත් .. 62 ..

ශ්රුතා හි දෘෂ්ටාශ්ච මයා පරාක්රමා මහාත්මනස්තස්ය රණාවමර්දිනඃ .

න දේවගන්ධර්වභුජඞ්ගරාක්ෂසා භවන්ති රාමේණ සමා හි සංයුගේ .. 63 ..

සමීක්ෂ්ය තං සංයති චිත්රකාර්මුකං මහාබලං වාසවතුල්යවික්රමම් .

සලක්ෂ්මණං කෝ විෂහේත රාඝවං හුතාශනං දීප්තමිවානිලේරිතම් .. 64 ..

සලක්ෂ්මණං රාඝවමාජිමර්දනං දිශාගජං මත්තමිව ව්යවස්ථිතම් .

සහේත කෝ වානරමුඛ්ය සංයුගේ යුගාන්තසූර්යප්රතිමං ශරාර්චිෂම් .. 65 ..

ස මේ හරිශ්රේෂ්ඨ සලක්ෂ්මණං පතිං සයූථපං ක්ෂිප්රමිහෝපපාදය .

චිරාය රාමං ප්රති ශෝකකර්ශිතාං කුරුෂ්ව මාං වානරමුඛ්ය හර්ෂිතාම් .. 66 ..

ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුන්දරකාණ්ඩේ සප්තත්රිංශස්සර්ගඃ ..

Roman (IAST) Transliteration

śrīmadvālmīkīya rāmāyaṇe sundarakāṇḍam |

atha saptatriṃśassargaḥ |

sītā tadvacanaṃ śrutvā pūrṇacandranibhānanā |

hanūmantamuvācedaṃ dharmārthasahitaṃ vacaḥ || 1 ||

amṛtaṃ viṣasaṃsṛṣṭaṃ tvayā vānara bhāṣitam |

yacca nānyamanā rāmo yacca śokaparāyaṇaḥ || 2 ||

aiśvarye vā suvistīrṇe vyasane vā sudāruṇe |

rajjveva puruṣaṃ baddhvā kṛtāntaḥ parikarṣati || 3 ||

vidhirnūnamasaṃhāryaḥ prāṇināṃ plavagottama |

saumitriṃ māṃ ca rāmaṃ ca vyasanaiḥ paśya mohitān || 4 ||

śokasyāsya kadā pāraṃ rāghavo'dhigamiṣyati |

plavamānaḥ pariśrānto hatanau ssāgare yathā || 5 ||

rākṣasānāṃ vadhaṃ kṛtvā sūdayitvā ca rāvaṇam |

laṅkāmunmūlitāṃ kṛtvā kadā drakṣyati māṃ patiḥ || 6 ||

sa vācyassantvarasveti yāvadeva na pūryate |

ayaṃ saṃvatsaraḥ kālastāvaddhi mama jīvitam || 7 ||

vartate daśamo māso dvau tu śeṣau plavaṅgama |

rāvaṇena nṛśaṃsena samayo yaḥ kṛto mama || 8 ||

vibhīṣaṇena ca bhrātrā mama niryātanaṃ prati |

anunītaḥ prayatnena na ca tatkurute matim || 9 ||

mama pratipradānaṃ hi rāvaṇasya na rocate |

rāvaṇaṃ mārgate saṅkhye mṛtyuḥ kālavaśaṃ gatam || 10 ||

jyeṣṭhā kanyā nalā nāma vibhīṣaṇasutā kape |

tayā mamedamākhyātaṃ mātrā prahitayā svayam || 11 ||

asaṃśayaṃ hariśreṣṭha kṣipraṃ māṃ prāpsyate patiḥ |

antarātmā ca me śuddhastasmiṃśca bahavo guṇāḥ || 12 ||

utsāhaḥ pauruṣaṃ sattvamānṛśaṃsyaṃ kṛtajñatā |

vikramaśca prabhāvaśca santi vānara rāghave || 13 ||

caturdaśasahasrāṇi rākṣasānāṃ jaghāna yaḥ |

janasthāne vinā bhrātrā śatruḥ kastasya nodvijet || 14 ||

na sa śakyastulayituṃ vyasanaiḥ puruṣarṣabhaḥ |

ahaṃ tasya prabhāvajñā śakrasyeva pulomajā || 15 ||

śarajālāṃśumānśūraḥ kape rāmadivākaraḥ |

śatrurakṣomayaṃ toyamupaśoṣaṃ nayiṣyati || 16 ||

iti sañjalpamānāṃ tāṃ rāmārthe śokakarśitām |

āśrusampūrṇanayanāmuvāca vacanaṃ kapiḥ || 17 ||

śrutvaiva tu vaco mahyaṃ kṣiprameṣyati rāghavaḥ |

camūṃ prakarṣanmahatīṃ haryṛkṣagaṇasaṅkulām || 18 ||

athavā mocayiṣyāmi tvāmadyaiva varānane |

asmāddhuḥkhādupāroha mama pṛṣṭhamanindite || 19 ||

tvāṃ hi pṛṣṭhagatāṃ kṛtvā santariṣyāmi sāgaram |

śaktirasti hi me voḍhuṃ laṅkāmapi sarāvaṇām || 20 ||

ahaṃ prasravaṇasthāya rāghavāyādya maithili |

prāpayiṣyāmi śakrāya havyaṃ hutamivānalaḥ || 21 ||

drakṣyasyadvaiva vaidehi rāghavaṃ sahalakṣmaṇam |

vyavasāyasamāyuktaṃ viṣṇuṃ daityavadhe yathā || 22 ||

tvaddarśanakṛtotsāhamāśramasthaṃ mahābalam |

purandaramivāsīnaṃ nāgarājasya mūrdhani || 23 ||

pṛṣṭhamāroha me devi mā vikāṅkṣasva śobhane |

yogamanviccha rāmeṇa śaśāṅkeneva rohiṇī || 24 ||

kathayantīva candreṇa sūryeṇa ca mahārciṣā |

matpṛṣṭhamadhiruhya tvaṃ tarākāśamahārṇavau || 25 ||

na hi me samprayātasya tvāmito nayato'ṅgane |

anugantuṃ gatiṃ śaktāssarve laṅkānivāsinaḥ || 26 ||

yathaivāhamiha prāptastathaivāhamasaṃśayaḥ |

yāsyāmi paśya vaidehi tvāmudyamya vihāyasam || 27 ||

maithilī tu hariśreṣṭhācchrutvā vacanamadbhutam |

harṣavismitasarvāṅgī hanumantamathābravīt || 28 ||

hanumandūramadhvānaṃ kathaṃ māṃ voḍhumicchasi |

tadeva khalu te manye kapitvaṃ hariyūthapa || 29 ||

kathaṃ vālpaśarīrastvaṃ māmito netumicchasi |

sakāśaṃ mānavendrasya bharturme plavagarṣabha || 30 ||

sītāyā vacanaṃ śrutvā hanumānmārutātmajaḥ |

cintayāmāsa lakṣmīvānnavaṃ paribhavaṃ kṛtam || 31 ||

na me jānāti sattvaṃ vā prabhāvaṃ vā'sitekṣaṇā |

tasmātpaśyatu vaidehī yadrūpaṃ mama kāmataḥ || 32 ||

iti sañcintya hanumāṃstadā plavagasattamaḥ |

darśayāmāsa vaidehyāssvarūpamarimardanaḥ || 33 ||

sa tasmātpādapāddhīmānāplutya plavagarṣabhaḥ |

tato vardhitumārebhe sītāpratyayakāraṇāt || 34 ||

merumandarasaṅkāśo babhau dīptānalaprabhaḥ |

agrato vyavatasthe ca sītāyā vānarottamaḥ || 35 ||

hariḥ parvatasaṅkāśastāmravaktro mahābalaḥ |

vajradaṃṣṭranakho bhīmo vaidehīmidamabravīt || 36 ||

saparvatavanoddeśāṃ sāṭṭaprākāratoraṇām |

laṅkāmimāṃ sanāthāṃ vā nayituṃ śaktirasti me || 37 ||

tadavasthāpyatāṃ buddhiralaṃ devi vikāṅkṣayā |

viśokaṃ kuru vaidehi rāghavaṃ sahalakṣmaṇam || 38 ||

taṃ dṛṣṭvā bhīmasaṅkāśamuvāca janakātmajā |

padmapatraviśālākṣī mārutasyaurasaṃ sutam || 39 ||

tava sattvaṃ balaṃ caiva vijānāmi mahākape |

vāyoriva gatiṃ caiva tejaścāgnerivādbhutam || 40 ||

prākṛto'nyaḥ kathaṃ cemāṃ bhūmimāgantumarhati |

udadheraprameyasya pāraṃ vānarapuṅgava || 41 ||

jānāmi gamane śaktiṃ nayane cāpi te mama |

avaśyaṃ sampradhāryāśu kāryasiddhirmahātmanaḥ || 42 ||

ayuktaṃ tu kapiśreṣṭha mama gantuṃ tvayā'nagha |

vāyuvegasavegasya vego māṃ mohayettava || 43 ||

ahamākāśamāpannā hyuparyupari sāgaram |

prapateyaṃ hi te pṛṣṭhādbhayādvegeva gacchataḥ || 44 ||

patitā sāgare cāhaṃ timinakrajhaṣākule |

bhaveyamāśu vivaśā yādasāmannamuttamam || 45 ||

na ca śakṣye tvayā sārdhaṃ gantuṃ śatruvināśana |

kalatravati sandehastvayyapi syādasaṃśayaḥ || 46 ||

hriyamāṇāṃ tu māṃ dṛṣṭvā rākṣasā bhīmavikramāḥ |

anugaccheyurādiṣṭā rāvaṇena durātmanā || 47 ||

taistvaṃ parivṛtaśśūraiśśūlamudgarapāṇibhiḥ |

bhavestvaṃ saṃśayaṃ prāpto mayā vīra kalatravān || 48 ||

sāyudhā bahavo vyomni rākṣasāstvaṃ nirāyudhaḥ |

kathaṃ śakṣyasi saṃyātuṃ māṃ caiva parirakṣitum || 49 ||

yudhyamānasya rakṣobhistava taiḥ krūrakarmabhiḥ |

prapateyaṃ hi te pṛṣṭhādbhayārtā kapisattama || 50 ||

atha rakṣāṃsi bhīmāni mahānti balavanti ca |

kathañcitsāmparāye tvāṃ jayeyuḥ kapisattama || 51 ||

athavā yudhyamānasya pateyaṃ vimukhasya te |

patitāṃ ca gṛhītvā māṃ nayeyuḥ pāparākṣasāḥ || 52 ||

māṃ vā hareyustvaddhastādviśaseyurathāpi vā |

avyavasthau hi dṛśyete yuddhe jayaparājayau || 53 ||

ahaṃ vāpi vipadyeyaṃ rakṣobhirabhitarjitā |

tvatprayatno hariśreṣṭha bhavenniṣphala eva tu || 54 ||

kāmaṃ tvamasi paryāpto nihantuṃ sarvarākṣasān |

rāghavasya yaśo hīyettvayā śastaistu rākṣasaiḥ || 55 ||

athavā'dāya rakṣāṃsi nyaseyussamvṛte hi mām |

yatra te nābhijānīyurharayo nāpi rāghavau || 56 ||

ārambhastu madartho'yaṃ tatastava nirarthakaḥ |

tvayā hi saha rāmasya mahānāgamane guṇaḥ || 57 ||

mayi jīvitamāyattaṃ rāghavasya mahātmanaḥ |

bhrātrūṇāṃ ca mahābāho tava rājakulasya ca || 58 ||

tau nirāśau madarthaṃ tu śokasantāpakarśitau |

saha sarvarkṣaharibhistyakṣyataḥ prāṇasaṅgraham || 59 ||

bharturbhaktiṃ puraskṛtya rāmādanyasya vānara |

na spṛśāmi śarīraṃ tu puṃso vānarapuṅgava || 60 ||

yadahaṃ gātrasaṃsparśaṃ rāvaṇasya balādgatā |

anīśā kiṃ kariṣyāmi vināthā vivaśā satī || 61 ||

yadi rāmo daśagrīvamiha hattvā sabāndhavam |

māmito gṛhya gaccheta tattasya sadṛśaṃ bhavet || 62 ||

śrutā hi dṛṣṭāśca mayā parākramā mahātmanastasya raṇāvamardinaḥ |

na devagandharvabhujaṅgarākṣasā bhavanti rāmeṇa samā hi saṃyuge || 63 ||

samīkṣya taṃ saṃyati citrakārmukaṃ mahābalaṃ vāsavatulyavikramam |

salakṣmaṇaṃ ko viṣaheta rāghavaṃ hutāśanaṃ dīptamivānileritam || 64 ||

salakṣmaṇaṃ rāghavamājimardanaṃ diśāgajaṃ mattamiva vyavasthitam |

saheta ko vānaramukhya saṃyuge yugāntasūryapratimaṃ śarārciṣam || 65 ||

sa me hariśreṣṭha salakṣmaṇaṃ patiṃ sayūthapaṃ kṣipramihopapādaya |

cirāya rāmaṃ prati śokakarśitāṃ kuruṣva māṃ vānaramukhya harṣitām || 66 ||

ityārṣe śrīmadrāmāyaṇe vālmīkīya ādikāvye sundarakāṇḍe saptatriṃśassargaḥ ||