1.59 Balakanda - Ekonashashtitama Sargah

ॐ

1.59 බාලකාණ්ඩ - ඒකෝනෂෂ්ටිතම සර්ගඃ

Valmiki Sinhala

ශ්රීමද්වාල්මීකීය රාමායණේ බාලකාණ්ඩම් .

අථ ඒකෝනෂෂ්ටිතමස්සර්ගඃ .

උක්තවාක්යං තු රාජානං කෘපයා කුශිකාත්මජඃ .

අබ්රවීන්මධුරං වාක්යං සාක්ෂාච්චණ්ඩාලරූපිණම් .. 1 ..

ඓක්ෂ්වාක ස්වාගතං වත්ස ජානාමි ත්වාං සුධාර්මිකම් .

ශරණං තේ භවිෂ්යාමි මා භෛෂීර්නෘපපුඞ්ගව .. 2 ..

අහමාමන්ත්රයේ සර්වාන්මහර්ෂීන්පුණ්යකර්මණඃ .

යජ්ඤසාහ්යකරාන් රාජන් තතෝ යක්ෂ්යසි නිර්වෘතඃ .. 3 ..

ගුරුශාපකෘතං රූපං යදිදං ත්වයි වර්තතේ .

අනේන සහ රූපේණ සශරීරෝ ගමිෂ්යසි .. 4 ..

හස්තප්රාප්තමහං මන්යේ ස්වර්ගං තව නරාධිප .

යස්ත්වං කෞශිකමාගම්ය ශරණ්යං ශරණාගතඃ .. 5 ..

ඒවමුක්ත්වා මහාතේජාඃ පුත්රාන් පරමධාර්මිකාන් .

ව්යාදිදේශ මහාප්රාජ්ඤාන් යජ්ඤසම්භාරකාරණාත් .. 6 ..

සර්වාන් ශිෂ්යාන් සමාහූය වාක්යමේතදුවාච හ .

සර්වානෘෂිගණාන්වත්සා ආනයධ්වං මමාජ්ඤයා .

සශිෂ්යසුහෘදශ්චෛව සර්ත්විජ ස්සබහුශ්රුතාන් .. 7 ..

යදන්යෝ වචනං බ්රූයාන්මද්වාක්යබලචෝදිතඃ .

තත්සර්වමඛිලේනෝක්තං මමාඛ්යේයමනාදෘතම් .. 8 ..

තස්ය තද්වචනං ශ්රුත්වා දිශෝ ජග්මුස්තදාජ්ඤයා .

ආජග්මුරථ දේශේභ්ය ස්සර්වේභ්යෝ බ්රහ්මවාදිනඃ .. 9 ..

තේ ච ශිෂ්යාඃ සමාගම්ය මුනිං ජ්වලිතතේජසම් .

ඌචුශ්චවචනං සර්වේ සර්වේෂාං බ්රහ්මවාදිනාම් .. 10 ..

ශ්රුත්වා තේ වචනං සර්වේ සමායාන්ති ද්විජාතයඃ .

සර්වදේශේෂු චාගච්ඡන් වර්ජයිත්වා මහෝදයම් .. 11 ..

වාසිෂ්ඨං තච්ඡතං සර්වං ක්රෝධපර්යාකුලාක්ෂරම් .

යදාහ වචනං සර්වං ශෘණු ත්වං මුනිපුඞ්ගව .. 12 ..

ක්ෂත්රියෝ යාජකෝ යස්ය චණ්ඩාලස්ය විශේෂතඃ .

කථං සදසි භෝක්තාරෝ හවිස්තස්ය සුරර්ෂයඃ .. 13 ..

බ්රාහ්මණා වා මහාත්මානෝ භුක්ත්වා චණ්ඩාලභෝජනම් .

කථං ස්වර්ගං ගමිෂ්යන්ති විශ්වාමිත්රේණ පාලිතාඃ .. 14 ..

ඒතද්වචනනෛෂ්ඨුර්යමූචු ස්සංරක්තලෝචනාඃ .

වාසිෂ්ඨා මුනිශාර්දූල සර්වේ තේ සමහෝදයාඃ .. 15 ..

තේෂාං තද්වචනං ශ්රුත්වා සර්වේෂාං මුනිපුඞ්ගවඃ .

ක්රෝධසංරක්තනයන ස්සරෝෂමිදමබ්රවීත් .. 16 ..

යේ දූෂයන්ත්යදුෂ්ටං මාං තප උග්රං සමාස්ථිතම් .

භස්මීභූතා දුරාත්මානෝ භවිෂ්යන්ති න සංශයඃ .. 17 ..

අද්ය තේ කාලපාශේන නීතා වෛවස්වතක්ෂයම් .

සප්තජාතිශතාන්යේව මෘතපස්සන්තු සර්වශඃ .. 18 ..

ශ්වමාංසනියතාහාරා මුෂ්ටිකා නාම නිර්ඝෘණාඃ .

විකෘතාශ්ච විරූපාශ්ච ලෝකානනුචරන්ත්විමාන් .. 19 ..

මහෝදයස්තු දුර්බුද්ධිර්මාමදූෂ්යං හ්යදූෂයත් .

දූෂිත ස්සර්වලෝකේෂු නිෂාදත්වං ගමිෂ්යති .. 20 ..

ප්රාණාතිපාතනිරතෝ නිරනුක්රෝශතාං ගතඃ .

දීර්ඝකාලං මම ක්රෝධාද්දුර්ගතිං වර්තයිෂ්යති .. 21 ..

ඒතාවදුක්ත්වා වචනං විශ්වාමිත්රෝ මහාතපාඃ .

විරරාම මහාතේජා ඍෂිමධ්යේ මහාමුනිඃ .. 22 ..

ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාණ්ඩේ ඒකෝනෂෂ්ටිතමස්සර්ගඃ ..

Roman (IAST) Transliteration

śrīmadvālmīkīya rāmāyaṇe bālakāṇḍam |

atha ekonaṣaṣṭitamassargaḥ |

uktavākyaṃ tu rājānaṃ kṛpayā kuśikātmajaḥ |

abravīnmadhuraṃ vākyaṃ sākṣāccaṇḍālarūpiṇam || 1 ||

aikṣvāka svāgataṃ vatsa jānāmi tvāṃ sudhārmikam |

śaraṇaṃ te bhaviṣyāmi mā bhaiṣīrnṛpapuṅgava || 2 ||

ahamāmantraye sarvānmaharṣīnpuṇyakarmaṇaḥ |

yajñasāhyakarān rājan tato yakṣyasi nirvṛtaḥ || 3 ||

guruśāpakṛtaṃ rūpaṃ yadidaṃ tvayi vartate |

anena saha rūpeṇa saśarīro gamiṣyasi || 4 ||

hastaprāptamahaṃ manye svargaṃ tava narādhipa |

yastvaṃ kauśikamāgamya śaraṇyaṃ śaraṇāgataḥ || 5 ||

evamuktvā mahātejāḥ putrān paramadhārmikān |

vyādideśa mahāprājñān yajñasambhārakāraṇāt || 6 ||

sarvān śiṣyān samāhūya vākyametaduvāca ha |

sarvānṛṣigaṇānvatsā ānayadhvaṃ mamājñayā |

saśiṣyasuhṛdaścaiva sartvija ssabahuśrutān || 7 ||

yadanyo vacanaṃ brūyānmadvākyabalacoditaḥ |

tatsarvamakhilenoktaṃ mamākhyeyamanādṛtam || 8 ||

tasya tadvacanaṃ śrutvā diśo jagmustadājñayā |

ājagmuratha deśebhya ssarvebhyo brahmavādinaḥ || 9 ||

te ca śiṣyāḥ samāgamya muniṃ jvalitatejasam |

ūcuścavacanaṃ sarve sarveṣāṃ brahmavādinām || 10 ||

śrutvā te vacanaṃ sarve samāyānti dvijātayaḥ |

sarvadeśeṣu cāgacchan varjayitvā mahodayam || 11 ||

vāsiṣṭhaṃ tacchataṃ sarvaṃ krodhaparyākulākṣaram |

yadāha vacanaṃ sarvaṃ śṛṇu tvaṃ munipuṅgava || 12 ||

kṣatriyo yājako yasya caṇḍālasya viśeṣataḥ |

kathaṃ sadasi bhoktāro havistasya surarṣayaḥ || 13 ||

brāhmaṇā vā mahātmāno bhuktvā caṇḍālabhojanam |

kathaṃ svargaṃ gamiṣyanti viśvāmitreṇa pālitāḥ || 14 ||

etadvacananaiṣṭhuryamūcu ssaṃraktalocanāḥ |

vāsiṣṭhā muniśārdūla sarve te samahodayāḥ || 15 ||

teṣāṃ tadvacanaṃ śrutvā sarveṣāṃ munipuṅgavaḥ |

krodhasaṃraktanayana ssaroṣamidamabravīt || 16 ||

ye dūṣayantyaduṣṭaṃ māṃ tapa ugraṃ samāsthitam |

bhasmībhūtā durātmāno bhaviṣyanti na saṃśayaḥ || 17 ||

adya te kālapāśena nītā vaivasvatakṣayam |

saptajātiśatānyeva mṛtapassantu sarvaśaḥ || 18 ||

śvamāṃsaniyatāhārā muṣṭikā nāma nirghṛṇāḥ |

vikṛtāśca virūpāśca lokānanucarantvimān || 19 ||

mahodayastu durbuddhirmāmadūṣyaṃ hyadūṣayat |

dūṣita ssarvalokeṣu niṣādatvaṃ gamiṣyati || 20 ||

prāṇātipātanirato niranukrośatāṃ gataḥ |

dīrghakālaṃ mama krodhāddurgatiṃ vartayiṣyati || 21 ||

etāvaduktvā vacanaṃ viśvāmitro mahātapāḥ |

virarāma mahātejā ṛṣimadhye mahāmuniḥ || 22 ||

ityārṣe śrīmadrāmāyaṇe vālmīkīya ādikāvye bālakāṇḍe ekonaṣaṣṭitamassargaḥ ||