1.12 Balakanda - Dvadasha Sargah

ॐ

1.12 බාලකාණ්ඩ - ද්වාදශ සර්ගඃ

Valmiki Sinhala

ශ්රීමද්වාල්මීකීය රාමායණේ බාලකාණ්ඩම් .

අථ ද්වාදශස්සර්ගඃ .

තතඃ කාලේ බහුතිථේ කස්මිංශ්චිත්සුමනෝහරේ .

වසන්තේ සමනුප්රාප්තේ රාජ්ඤෝ යෂ්ටුං මනෝ(අ)භවත් .. 1 ..

තතඃ ප්රසාද්ය ශිරසා තං විප්රං දේවවර්ණිනම් .

යජ්ඤාය වරයාමාස සන්තානාර්ථං කුලස්ය වෛ .. 2 ..

තථේති ච ස රාජානමුවාච ච සුසත්කෘතඃ .

සම්භාරා සම්භ්රියන්තාං තේ තුරගශ්ච විමුච්යතාම් .. 3 ..

තතෝ රාජා(අ)බ්රවීද්වාක්යං සුමන්ත්රං මන්ත්රිසත්තමම් .

සුමන්ත්රාවාහය ක්ෂිප්රං ඍත්විජෝ බ්රහ්මවාදිනඃ .. 4 ..

සුයජ්ඤං වාමදේවං ච ජාබාලිමථ කාශ්යපම් .

පුරෝහිතං වසිෂ්ඨං ච යේ චාන්යේ ද්විජසත්තමාඃ .. 5 ..

තතස්සුමන්ත්රස්ත්වරිතං ගත්වා ත්වරිතවික්රමඃ .

සමානයත්ස තාන්විප්රාන් සමස්තාන්වේදපාරගාන් .. 6 ..

තාන්පූජයිත්වා ධර්මාත්මා රාජා දශරථස්තදා .

ධර්මාර්ථසහිතං යුක්තං ශ්ලක්ෂ්ණං වචනමබ්රවීත් .. 7 ..

මම ලාලප්යමානස්ය පුත්රාර්ථං නාස්ති වෛ සුඛම් .

තදර්ථං හයමේධේන යක්ෂ්යාමීති මතිර්මම .. 8 ..

තදහං යෂ්ටුමිච්ඡාමි ශාස්ත්රදෘෂ්ටේන කර්මණා .

ඍෂිපුත්රප්රභාවේන කාමාන්ප්රාප්ස්යාමි චාප්යහම් .. 9 ..

තතස්සාධ්විති තද්වාක්යං බ්රාහ්මණාඃ ප්රත්යපූජයන් .

වසිෂ්ඨප්රමුඛාස්සර්වේ පාර්ථිවස්ය මුඛාච්ච්යුතම් .. 10 ..

ඍෂ්යශෘඞ්ගපුරෝගාශ්ච ප්රත්යූචුර්නෘපතිං තදා .

සම්භාරාස්සම්භ්රියන්තාං තේ තුරගශ්ච විමුච්යතාම් .. 11 ..

සර්වථා ප්රාප්ස්යසේ පුත්රාංශ්චත්වාරෝ(අ)මිතවික්රමාන් .

යස්ය තේ ධාර්මිකී බුද්ධිරියං පුත්රාර්ථමාගතා .. 12 ..

තතඃ ප්රීතෝ(අ)භවද්රාජා ශ්රුත්වා තද්විජභාෂිතම් .

අමාත්යාංශ්චාබ්රවීද්රාජා හර්ෂේණේදං ශුභාක්ෂරම් .. 13 ..

ගුරූණාං වචනාච්ඡීඝ්රං සම්භාරාස්සම්භ්රියන්තු මේ .

සමර්ථාධිෂ්ඨිතශ්චාශ්වස්සෝපාධ්යායෝ විමුච්යතාම් .. 14 ..

සරය්වාශ්චෝත්තරේ තීරේ යජ්ඤභූමිර්විධීයතාම් .

ශාන්තයශ්චාභිවර්ධන්තාං යථාකල්පං යථාවිධි .. 15 ..

ශක්යඃ ප්රාප්තුමයං යජ්ඤස්සර්වේණාපි මහීක්ෂිතා .

නාපරාධෝ භවේත්කෂ්ටෝ යද්යස්මින්ක්රතුසත්තමේ .. 16 ..

ඡිද්රං හි මෘගයන්තේ(අ)ත්ර විද්වාංසෝ බ්රහ්මරාක්ෂසාඃ .

නිහතස්ය ච යජ්ඤස්ය සද්යඃ කර්තා විනශ්යති .. 17 ..

තද්යථා විධිපූර්වං මේ ක්රතුරේෂ සමාප්යතේ .

තථා විධානං ක්රියතාං සමර්ථාඃ කරණේෂ්විහ .. 18 ..

තථේති ච තතස්සර්වේ මන්ත්රිණඃ ප්රත්යපූජයන් .

පාර්ථිවේන්ද්රස්ය තද්වාක්යං යථාජ්ඤප්තමකුර්වත .. 19 ..

තතෝ ද්විජාස්තේ ධර්මජ්ඤමස්තුවන්පාර්ථිවර්ෂභම් .

අනුජ්ඤාතාස්තතස්සර්වේ පුනර්ජග්මුර්යථාගතම් .. 20 ..

ගතේෂ්වථ ද්විජාග්ය්රේෂු මන්ත්රිණස්තාන්නරාධිපඃ .

විසර්ජයිත්වා ස්වං වේශ්ම ප්රවිවේශ මහාද්යුතිඃ .. 21 ..

ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාණ්ඩේ ද්වාදශස්සර්ගඃ ..

Roman (IAST) Transliteration

śrīmadvālmīkīya rāmāyaṇe bālakāṇḍam |

atha dvādaśassargaḥ |

tataḥ kāle bahutithe kasmiṃścitsumanohare |

vasante samanuprāpte rājño yaṣṭuṃ mano'bhavat || 1 ||

tataḥ prasādya śirasā taṃ vipraṃ devavarṇinam |

yajñāya varayāmāsa santānārthaṃ kulasya vai || 2 ||

tatheti ca sa rājānamuvāca ca susatkṛtaḥ |

sambhārā sambhriyantāṃ te turagaśca vimucyatām || 3 ||

tato rājā'bravīdvākyaṃ sumantraṃ mantrisattamam |

sumantrāvāhaya kṣipraṃ ṛtvijo brahmavādinaḥ || 4 ||

suyajñaṃ vāmadevaṃ ca jābālimatha kāśyapam |

purohitaṃ vasiṣṭhaṃ ca ye cānye dvijasattamāḥ || 5 ||

tatassumantrastvaritaṃ gatvā tvaritavikramaḥ |

samānayatsa tānviprān samastānvedapāragān || 6 ||

tānpūjayitvā dharmātmā rājā daśarathastadā |

dharmārthasahitaṃ yuktaṃ ślakṣṇaṃ vacanamabravīt || 7 ||

mama lālapyamānasya putrārthaṃ nāsti vai sukham |

tadarthaṃ hayamedhena yakṣyāmīti matirmama || 8 ||

tadahaṃ yaṣṭumicchāmi śāstradṛṣṭena karmaṇā |

ṛṣiputraprabhāvena kāmānprāpsyāmi cāpyaham || 9 ||

tatassādhviti tadvākyaṃ brāhmaṇāḥ pratyapūjayan |

vasiṣṭhapramukhāssarve pārthivasya mukhāccyutam || 10 ||

ṛṣyaśṛṅgapurogāśca pratyūcurnṛpatiṃ tadā |

sambhārāssambhriyantāṃ te turagaśca vimucyatām || 11 ||

sarvathā prāpsyase putrāṃścatvāro'mitavikramān |

yasya te dhārmikī buddhiriyaṃ putrārthamāgatā || 12 ||

tataḥ prīto'bhavadrājā śrutvā tadvijabhāṣitam |

amātyāṃścābravīdrājā harṣeṇedaṃ śubhākṣaram || 13 ||

gurūṇāṃ vacanācchīghraṃ sambhārāssambhriyantu me |

samarthādhiṣṭhitaścāśvassopādhyāyo vimucyatām || 14 ||

sarayvāścottare tīre yajñabhūmirvidhīyatām |

śāntayaścābhivardhantāṃ yathākalpaṃ yathāvidhi || 15 ||

śakyaḥ prāptumayaṃ yajñassarveṇāpi mahīkṣitā |

nāparādho bhavetkaṣṭo yadyasminkratusattame || 16 ||

chidraṃ hi mṛgayante'tra vidvāṃso brahmarākṣasāḥ |

nihatasya ca yajñasya sadyaḥ kartā vinaśyati || 17 ||

tadyathā vidhipūrvaṃ me kratureṣa samāpyate |

tathā vidhānaṃ kriyatāṃ samarthāḥ karaṇeṣviha || 18 ||

tatheti ca tatassarve mantriṇaḥ pratyapūjayan |

pārthivendrasya tadvākyaṃ yathājñaptamakurvata || 19 ||

tato dvijāste dharmajñamastuvanpārthivarṣabham |

anujñātāstatassarve punarjagmuryathāgatam || 20 ||

gateṣvatha dvijāgyreṣu mantriṇastānnarādhipaḥ |

visarjayitvā svaṃ veśma praviveśa mahādyutiḥ || 21 ||

ityārṣe śrīmadrāmāyaṇe vālmīkīya ādikāvye bālakāṇḍe dvādaśassargaḥ ||