Vishnu Padadi Keshanta Varnana Stotram

ॐ

විෂ්ණු පාදාදි කේශාන්ත වර්ණන ස්තෝත්රං

Vishnu Stotram Sinhala

ලක්ෂ්මීභර්තුර්භුජාග්රේ කෘතවසති සිතං යස්ය රූපං විශාලං

නීලාද්රේස්තුඞ්ගශෘඞ්ගස්ථිතමිව රජනීනාථබිම්බං විභාති .

පායාන්නඃ පාඤ්චජන්යඃ ස දිතිසුතකුලත්රාසනෛඃ පූරයන්ස්වෛ-

-ර්නිධ්වානෛර්නීරදෞඝධ්වනිපරිභවදෛරම්බරං කම්බුරාජඃ .. 1 ..

ආහුර්යස්ය ස්වරූපං ක්ෂණමුඛමඛිලං සූරයඃ කාලමේතං

ධ්වාන්තස්යෛකාන්තමන්තං යදපි ච පරමං සර්වධාම්නාං ච ධාම .

චක්රං තච්චක්රපාණේර්දිතිජතනුගලද්රක්තධාරාක්තධාරං

ශශ්වන්නෝ විශ්වවන්ද්යං විතරතු විපුලං ශර්ම ධර්මාංශුශෝභම් .. 2 ..

අව්යාන්නිර්ඝාතඝෝරෝ හරිභුජපවනාමර්ශනාධ්මාතමූර්තේ-

-රස්මාන්විස්මේරනේත්රත්රිදශනුතිවචඃසාධුකාරෛඃ සුතාරඃ .

සර්වං සංහර්තුමිච්ඡෝරරිකුලභුවන ස්ඵාරවිෂ්ඵාරනාදඃ

සංයත්කල්පාන්තසින්ධෞ ශරසලිලඝටාවාර්මුචඃ කාර්මුකස්ය .. 3 ..

ජීමූතශ්යාමභාසා මුහුරපි භගවද්බාහුනා මෝහයන්තී

යුද්ධේෂූද්ධූයමානා ඣටිති තටිදිවාලක්ෂ්යතේ යස්ය මූර්තිඃ .

සෝ(අ)සිස්ත්රාසාකුලාක්ෂත්රිදශරිපුවපුඃශෝණිතාස්වාදතෘප්තෝ

නිත්යානන්දාය භූයාන්මධුමථනමනෝනන්දනෝ නන්දකෝ නඃ .. 4 ..

කම්රාකාරා මුරාරේඃ කරකමලතලේනානුරාගාද්ගෘහීතා

සම්යග්වෘත්තා ස්ථිතාග්රේ සපදි න සහතේ දර්ශනං යා පරේෂාම් .

රාජන්තී දෛත්යජීවාසවමදමුදිතා ලෝහිතාලේපනාර්ද්රා

කාමං දීප්තාංශුකාන්තා ප්රදිශතු දයිතේවාස්ය කෞමෝදකී නඃ .. 5 ..

යෝ විශ්වප්රාණභූතස්තනුරපි ච හරේර්යානකේතුස්වරූපෝ

යං සඤ්චින්ත්යෛව සද්යඃ ස්වයමුරගවධූවර්ගගර්භාඃ පතන්ති .

චඤ්චච්චණ්ඩෝරුතුණ්ඩත්රුටිතඵණිවසාරක්තපඞ්කාඞ්කිතස්යං

වන්දේ ඡන්දෝමයං තං ඛගපතිමමලස්වර්ණවර්ණං සුපර්ණම් .. 6 ..

විෂ්ණෝර්විශ්වේශ්වරස්ය ප්රවරශයනකෘත්සර්වලෝකෛකධර්තා

සෝ(අ)නන්තඃ සර්වභූතඃ පෘථුවිමලයශාඃ සර්වවේදෛශ්ච වේද්යඃ .

පාතා විශ්වස්ය ශශ්වත්සකලසුරරිපුධ්වංසනඃ පාපහන්තා

සර්වජ්ඤඃ සර්වසාක්ෂී සකලවිෂභයාත්පාතු භෝගීශ්වරෝ නඃ .. 7 ..

වාග්භූගෛර්යාදිභේදෛර්විදුරිහ මුනයෝ යාං යදීයෛශ්ච පුංසාං

කාරුණ්යාර්ද්රෛඃ කටාක්ෂෛඃ සකෘදපි පතිතෛඃ සම්පදඃ ස්යුඃ සමග්රාඃ .

කුන්දේන්දුස්වච්ඡමන්දස්මිතමධුරමුඛාම්භෝරුහාං සුන්දරාඞ්ගීං

වන්දේ වන්ද්යාමශේෂෛරපි මුරභිදුරෝමන්දිරාමින්දිරාං තාම් .. 8 ..

යා සූතේ සත්ත්වජාලං සකලමපි සදා සන්නිධානේන පුංසෝ

ධත්තේ යා තත්ත්වයෝගාච්චරමචරමිදං භූතයේ භූතජාතම් .

ධාත්රීං ස්ථාත්රීං ජනිත්රීං ප්රකෘතිමවිකෘතිං විශ්වශක්තිං විධාත්රීං

විෂ්ණෝර්විශ්වාත්මනස්තාං විපුලගුණමයීං ප්රාණනාථාං ප්රණෞමි .. 9 ..

යේභ්යෝ(අ)සූයද්භිරුච්චෛඃ සපදි පදමුරු ත්යජ්යතේ දෛත්යවර්ගෛ-

-ර්යේභෝ ධර්තුං ච මූර්ධ්නා ස්පෘහයති සතතං සර්වගීර්වාණවර්ගඃ .

නිත්යං නිර්මූලයේයුර්නිචිතතරමමී භක්තිනිඝ්නාත්මනාං නඃ

පද්මාක්ෂස්යාඞ්ඝ්රිපද්මද්වයතලනිලයාඃ පාංසවඃ පාපපඞ්කම් .. 10 ..

රේඛා ලේඛාදිවන්ද්යාශ්චරණතලගතාශ්චක්රමත්ස්යාදිරූපාඃ

ස්නිග්ධාඃ සූක්ෂ්මාඃ සුජාතා මෘදුලලිතතරක්ෂෞමසූත්රායමාණාඃ .

දද්යුර්නෝ මඞ්ගලානි භ්රමරභරජුෂා කෝමලේනාබ්ධිජායාඃ

කම්රේණාම්රේඩ්යමානාඃ කිසලයමෘදුනා පාණිනා චක්රපාණේඃ .. 11 ..

යස්මාදාක්රාමතෝ ද්යාං ගරුඩමණිශිලාකේතුදණ්ඩායමානා

දාශ්ච්යෝතන්තී බභාසේ සුරසරිදමලා වෛජයන්තීව කාන්තා .

භූමිෂ්ඨෝ යස්තථාන්යෝ භුවනගෘහබෘහත්‍ස්තම්භශෝභාං දධෞ නඃ

පාතාමේතෞ පායෝජෝදරලලිතතලෞ පඞ්කජාක්ෂස්ය පාදෞ .. 12 ..

ආක්රාමද්භ්යාං ත්රිලෝකීමසුරසුරපතී තත්ක්ෂණාදේව නීතෞ

යාභ්යාං වෛරෝචනීන්ද්රෞ යුගපදපි විපත්සම්පදෝරේකධාමඃ .

තාභ්යාං තාම්රෝදරාභ්යාං මුහුරහමජිතස්යාඤ්චිතාභ්යාමුභාභ්යාං

ප්රාජ්යෛශ්වර්යප්රදාභ්යාං ප්රණතිමුපගතඃ පාදපඞ්කේරුහාභ්යාම් .. 13 ..

යේභ්යෝ වර්ණශ්චතුර්ථශ්චරමත උදභූදාදිසර්ගේ ප්රජානාං

සාහස්රී චාපි සඞ්ඛ්යා ප්රකටමභිහිතා සර්වවේදේෂු යේෂාම් .

ප්රාප්තා විශ්වම්භරා යෛරතිවිතතතනෝර්විශ්වමූර්තේර්විරාජෝ

විෂ්ණෝස්තේභ්යෝ මහද්භ්යඃ සතතමපි නමෝ(අ)ස්ත්වඞ්ඝ්රිපඞ්කේරුහේභ්යඃ .. 14 ..

විෂ්ණෝඃ පාදද්වයාග්රේ විමලනඛමණිභ්රාජිතා රාජතේ යා

රාජීවස්යේව රම්යා හිමජලකණිකාලඞ්කෘතාග්රා දලාලී .

අස්මාකං විස්මයාර්හාණ්යඛිලජනමන ප්රාර්ථනීයා හි සේයං

දද්යාදාද්යානවද්යා තතිරතිරුචිරා මඞ්ගලාන්යඞ්ගුලීනාම් .. 15 ..

යස්යාං දෘෂ්ට්වාමලායාං ප්රතිකෘතිමමරාඃ සම්භවන්ත්යානමන්තඃ

සේන්ද්රාඃ සාන්ද්රීකෘතේර්ෂ්යාස්ත්වපරසුරකුලාශඞ්කයාතඞ්කවන්තඃ .

සා සද්යඃ සාතිරේකාං සකලසුඛකරීං සම්පදං සාධයේන්න-

-ශ්චඤ්චච්චාර්වංශුචක්රා චරණනලිනයෝශ්චක්රපාණේර්නඛාලී .. 16 ..

පාදාම්භෝජන්මසේවාසමවනතසුරව්රාතභාස්වත්කිරීට-

-ප්රත්යුප්තෝච්චාවචාශ්මප්රවරකරගණෛශ්චින්තිතං යද්විභාති .

නම්රාඞ්ගානාං හරේර්නෝ හරිදුපලමහාකූර්මසෞන්දර්යහාරි-

-ච්ඡායං ශ්රේයඃප්රදායි ප්රපදයුගමිදං ප්රාපයේත්පාපමන්තම් .. 17 ..

ශ්රීමත්යෞ චාරුවෘත්තේ කරපරිමලනානන්දහෘෂ්ටේ රමායාඃ

සෞන්දර්යාඪ්යේන්ද්රනීලෝපලරචිතමහාදණ්ඩයෝඃ කාන්තිචෝරේ .

සූරීන්ද්රෛඃ ස්තූයමානේ සුරකුලසුඛදේ සූදිතාරාතිසඞ්ඝේ

ජඞ්ඝේ නාරායණීයේ මුහුරපි ජයතාමස්මදංහෝ හරන්ත්යෞ .. 18 ..

සම්යක්සාහ්යං විධාතුං සමමිව සතතං ජඞ්ඝයෝඃ ඛින්නයෝර්යේ

භාරීභූතෝරුදණ්ඩද්වයභරණකෘතෝත්තම්භභාවං භජේතේ .

චිත්තාදර්ශං නිධාතුං මහිතමිව සතාං තේ සමුද්රායමානේ

වෘත්තාකාරේ විධත්තාං හ්යදි මුදමජිතස්යානිශං ජානුනී නඃ .. 19 ..

දේවෝ භීතිං විධාතුඃ සපදි විදධතෞ කෛටභාඛ්යං මධුං චා-

-ප්යාරෝප්යාරූඪගර්වාවධිජලධි යයෝරාදිදෛත්යෞ ජඝාන .

වෘත්තාවන්යෝන්යතුල්යෞ චතුරමුපචයං බිභ්රතාවභ්රනීලා-

-වූරූ චාරූ හරේස්තෞ මුදමතිශයිනීං මානසේ නෝ විධත්තාම් .. 20 ..

පීතේන ද්යෝතතේ යච්චතුරපරිහිතේනාම්බරේණාත්යුදාරං

ජාතාලඞ්කාරයෝගං ජලමිව ජලධේර්බාඩබාග්නිප්රභාභිඃ .

ඒතත්පාතිත්යදාන්නෝ ජඝනමතිඝනාදේනසෝ මානනීයං

සාතත්යේනෛව චේතෝවිෂයමවතරත්පාතු පීතාම්බරස්ය .. 21 ..

යස්යා දාම්නා ත්රිධාම්නෝ ජඝනකලිතයා භ්රාජතේ(අ)ඞ්ගං යථාබ්ධේ-

-ර්මධ්යස්ථෝ මන්දරාද්රිර්භුජගපතිමහාභෝගසන්නද්ධමධ්යඃ .

කාඤ්චී සා කාඤ්චනාභා මණිවරකිරණෛරුල්ලසද්භිඃ ප්රදීප්තා

කල්යාං කල්යාණදාත්රීං මම මතිමනිශං කම්රරූපාං කරෝතු .. 22 ..

උන්නම්රං කම්රමුච්චෛරුපචිතමුදභූද්යත්ර පත්රෛර්විචිත්රෛඃ

පූර්වං ගීර්වාණපූජ්යං කමලජමධුපස්යාස්පදං තත්පයෝජම් .

යස්මින්නීලාශ්මනීලෛස්තරලරුචිජලෛඃ පූරිතේ කේලිබුද්ධ්යා

නාලීකාක්ෂස්ය නාභීසරසි වසතු නශ්චිත්තහංසශ්චිරාය .. 23 ..

පාතාලං යස්ය නාලං වලයමපි දිශාං පත්රපඞ්ක්තීර්නගේන්ද්රා-

-න්විද්වාංසඃ කේසරාලීර්විදුරිහ විපුලාං කර්ණිකාං ස්වර්ණශෛලම් .

භූයාද්ගායත්ස්වයම්භූමධුකරභවනං භූමයං කාමදං නෝ

නාලීකං නාභිපද්මාකරභවමුරු තන්නාගශය්යස්ය ශෞරේඃ .. 24 ..

ආදෞ කල්පස්ය යස්මාත්ප්රභවති විතතං විශ්වමේතද්විකල්පෛඃ

කල්පාන්තේ යස්ය චාන්ත ප්රවිශති සකලං ස්ථාවරං ජඞ්ගමං ච .

අත්යන්තාචින්ත්යමූර්තේශ්චිරතරමජිතස්යාන්තරික්ෂස්වරූපේ

තස්මින්නස්මාකමන්තඃකරණමතිමුදා ක්රීඩතාත්ක්රෝඩභාගේ .. 25 ..

කාන්ත්යම්භඃපූරපූර්ණේ ලසදසිතවලීභඞ්ගභාස්වත්තරඞ්ගේ

ගම්භීරාකාරනාභීචතුරතරමහාවර්තශෝභින්යුදාරේ .

ක්රීඩත්වානද්වහේමෝදරනහනමහාබාඩබාග්නිප්රභාඪ්යේ

කාමං දාමෝදරීයෝදරසලිලනිධෞ චිත්තමත්ස්යශ්චිරං නඃ .. 26 ..

නාභීනාලීකමූලාදධිකපරිමලෝන්මෝහිතානාමලීනාං

මාලා නීලේව යාන්තී ස්ඵුරති රුචිමතී වක්ත්රපද්මෝන්මුඛී යා .

රම්යා සා රෝමරාජිර්මහිතරුචිකරී මධ්යභාගස්ය විෂ්ණෝ-

-ශ්චිත්තස්ථා මා විරංසීච්චිරතරමුචිතාං සාධයන්තී ශ්රියං නඃ .. 27 ..

සංස්තීර්ණං කෞස්තුභාංශුප්රසරකිසලයෛර්මුග්ධමුක්තාඵලාඪ්යං

ශ්රීවත්සෝල්ලාසි ඵුල්ලප්රතිනවවනමාලාඞ්කි රාජද්භුජාන්තම් .

වක්ෂඃ ශ්රීවෘක්ෂකාන්තං මධුකරනිකරශ්යාමලං ශාර්ඞ්ගපාණේඃ

සංසාරාධ්වශ්රමාර්තෛරුපවනමිව යත්සේවිතං තත්ප්රපද්යේ .. 28 ..

කාන්තං වක්ෂෝ නිතාන්තං විදධදිව ගලං කාලිමා කාලශත්රෝ-

-රින්දෝර්බිම්බං යථාඞ්කෝ මධුප ඉව තරෝර්මඤ්ජරීං රාජතේ යඃ .

ශ්රීමාන්නිත්යං විධේයාදවිරලමිලිතඃ කෞස්තුභශ්රීප්රතානෛඃ

ශ්රීවත්සඃ ශ්රීපතේඃ ස ශ්රිය ඉව දයිතෝ වත්ස උච්චෛඃශ්රියං නඃ .. 29 ..

සම්භූයාම්භෝධිමධ්යාත්සපදි සහජයා යඃ ශ්රියා සන්නිධත්තේ

නීලේ නාරායණෝරඃස්ථලගගනතලේ හාරතාරෝපසේව්යේ .

ආශාඃ සර්වාඃ ප්රකාශා විදධදපිදධච්චාත්මභාසාන්යතේජා-

-ස්යාශ්චර්යස්යාකරෝ නෝ ද්යුමණිරිව මණිඃ කෞස්තුභඃ සෝ(අ)ස්තුභූත්යෛ .. 30 ..

යා වායාවානුකූල්යාත්සරති මණිරුචා භාසමානා සමානා

සාකං සාකම්පමංසේ වසති විදධතී වාසුභද්රං සුභද්රම් .

සාරං සාරඞ්ගසඞ්ඝෛර්මුඛරිතකුසුමා මේචකාන්තා ච කාන්තා

මාලා මාලාලිතාස්මාන්න විරමතු සුඛෛර්යෝජයන්තී ජයන්තී .. 31 ..

හාරස්යෝරුප්රභාභිඃ ප්රතිනවවනමාලාශුභිඃ ප්රාංශුරූපෛඃ

ශ්රීභිශ්චාප්යඞ්ගදානාං කබලිතරුචි යන්නිෂ්කභාභිශ්ච භාති .

බාහුල්යේනෛව බද්ධාඤ්ජලිපුටමජිතස්යාභියාචාමහේ ත-

-ද්වන්ධාර්තිං බාධතාං නෝ බහුවිහතිකරීං බන්ධුරං බාහුමූලම් .. 32 ..

විශ්වත්රාණෛකදීක්ෂාස්තදනුගුණගුණක්ෂත්රනිර්මාණදක්ෂාඃ

කර්තාරෝ දුර්නිරූපස්ඵුටගුණයශසා කර්මණාමද්භුතානාම් .

ශාර්ඞ්ගං බාණං කෘපාණං ඵලකමරිගදේ පද්මශඞ්ඛෞ සහස්රං

බිභ්රාණාඃ ශස්ත්රජාලං මම දධතු හරේර්බාහවෝ මෝහහානිම් .. 33 ..

කණ්ඨාකල්පෝද්ගතෛර්යඃ කනකමයලසත්කුණ්ඩලෝත්ථෛරුදාරෛ-

-රුද්යෝතෛඃ කෞස්තුභස්යාප්යුරුභිරුපචිතශ්චිත්රවර්ණෝ විභාති .

කණ්ඨාශ්ලේෂේ රමායාඃ කරවලයපදෛර්මුද්රිතේ භද්රරූපේ

වෛකුණ්ඨීයේ(අ)ත්ර කණ්ඨේ වසතු මම මතිඃ කුණ්ඨභාවං විහාය .. 34 ..

පද්මානන්දප්රදාතා පරිලසදරුණශ්රීපරීතාග්රභාගඃ

කාලේ කාලේ ච කම්බුප්රවරශශධරාපූරණේ යඃ ප්රවීණඃ .

වක්ත්රාකාශාන්තරස්ථස්තිරයති නිතරාං දන්තතාරෞඝශෝභාං

ශ්රීභර්තුර්දන්තවාසෝද්යුමණිරඝතමෝනාශනායාස්ත්වසෞ නඃ .. 35 ..

නිත්යං ස්නේහාතිරේකාන්නිජකමිතුරලං විප්රයෝගාක්ෂමා යා

වක්ත්රේන්දෝරන්තරාලේ කෘතවසතිරිවාභාති නක්ෂත්රරාජිඃ .

ලක්ෂ්මීකාන්තස්ය කාන්තාකෘතිරතිවිලසන්මුග්ධමුක්තාවලිශ්රී-

-ර්දන්තාලී සන්තතං සා නතිනුතිනිරතානක්ෂතාන්රක්ෂතාන්නඃ .. 36 ..

බ්රහ්මන්බ්රහ්මණ්යජිහ්මාං මතිමපි කුරුෂේ දේව සම්භාවයේ ත්වාං

ශම්භෝ ශක්ර ත්රිලෝකීමවසි කිමමරෛර්නාරදාද්යාඃ සුඛං වඃ .

ඉත්ථං සේවාවනම්රං සුරමුනිනිකරං වීක්ෂ්ය විෂ්ණෝඃ ප්රසන්න-

-ස්යාස්යේන්දෝරාස්රවන්තී වරවචනසුධාහ්ලාදයේන්මානසං නඃ .. 37 ..

කර්ණස්ථස්වර්ණකම්රෝජ්ජ්වලමකරමහාකුණ්ඩලප්රෝතදීප්ය-

-න්මාණික්යශ්රීප්රතානෛඃ පරිමිලිතමලිශ්යාමලං කෝමලං යත් .

ප්රෝද්යත්සූර්යාංශුරාජන්මරකතමුකුරාකාරචෝරං මුරාරේ-

-ර්ගාඪාමාගාමිනීං නඃ ශමයතු විපදං ගණ්ඩයෝර්මණ්ඩලං තත් .. 38 ..

වක්ත්රාම්භෝජේ ලසන්තං මුහුරධරමණිං පක්වබිම්බාභිරාමං

දෘෂ්ට්වා ද්රෂ්ටුං ශුකස්ය ස්ඵුටමවතරතස්තුණ්ඩදණ්ඩායතේ යඃ .

ඝෝණඃ ශෝණීකෘතාත්මා ශ්රවණයුගලසත්කුණ්ඩලෝස්රෛර්මුරාරේඃ

ප්රාණාඛ්යස්යානිලස්ය ප්රසරණසරණිඃ ප්රාණදානාය නඃ ස්යාත් .. 39 ..

දික්කාලෞ වේදයන්තෞ ජගති මුහුරිමෞ සඤ්චරන්තෞ රවීන්දූ

ත්රෛලෝක්යාලෝකදීපාවභිදධති යයෝරේව රූපං මුනීන්ද්රාඃ .

අස්මානබ්ජප්රභේ තේ ප්රචුරතරකෘපානිර්භරං ප්රේක්ෂමාණේ

පාතාමාතාම්රශුක්ලාසිතරුචිරුචිරේ පද්මනේත්රස්ය නේත්රේ .. 40 ..

පාතාත්පාතාලපාතාත්පතගපතිගතේර්භ්රූයුගං භුග්නමධ්යං

යේනේෂච්චාලිතේන ස්වපදනියමිතාඃ සාසුරා දේවසඞ්ඝාඃ .

නෘත්යල්ලාලාටරඞ්ගේ රජනිකරතනෝරර්ධඛණ්ඩාවදාතේ

කාලව්යාලද්වයං වා විලසති සමයා වාලිකාමාතරං නඃ .. 41 ..

ලක්ෂ්මාකාරාලකාලිස්ඵුරදලිකශශාඞ්කාර්ධසන්දර්ශමීල-

-න්නේත්රාම්භෝජප්රබෝධෝත්සුකනිභෘතතරාලීනභෘඞ්ගච්ඡටාභේ .

ලක්ෂ්මීනාථස්ය ලක්ෂ්යීකෘතවිබුධගණාපාඞ්ගබාණාසනාර්ධ-

-ච්ඡායේ නෝ භූරිභූතිප්රසවකුශලතේ භ්රූලතේ පාලයේතාම් .. 42 ..

රූක්ෂස්මාරේක්ෂුචාපච්යුතශරනිකරක්ෂීණලක්ෂ්මීකටාක්ෂ-

-ප්රෝත්ඵුල්ලත්පද්මමාලාවිලසිතමහිතස්ඵාටිකෛශානලිඞ්ගම් .

භූයාද්භූයෝ විභූත්යෛ මම භුවනපතේර්භ්රූලතාද්වන්ද්වමධ්යා-

-දුත්ථං තත්පුණ්ඩ්රමූර්ධ්වං ජනිමරණතමඃඛණ්ඩනං මණ්ඩනං ච .. 43 ..

පීඨීභූතාලකාන්තේ කෘතමකුටමහාදේවලිඞ්ගප්රතිෂ්ඨේ

ලාලාටේ නාට්යරඞ්ගේ විකටතරතටේ කෛටභාරේශ්චිරාය .

ප්රෝද්ධාට්යෛවාත්මතන්ද්රීප්රකටපටකුටීං ප්රස්ඵුරන්තීං ස්ඵුටාඞ්ගං

පට්වීයං භාවනාඛ්යාං චටුලමතිනටී නාටිකාං නාටයේන්නඃ .. 44 ..

මාලාලීවාලිධාම්නඃ කුවලයකලිතා ශ්රීපතේඃ කුන්තලාලී

කාලින්ද්යාරුහ්ය මූර්ධ්නෝ ගලති හරශිරඃස්වර්ධුනීස්පර්ධයා නු .

රාහුර්වා යාති වක්ත්රං සකලශශිකලාභ්රාන්තිලෝලාන්තරාත්මා

ලෝකෛරාලෝක්යතේ යා ප්රදිශතු සතතං සාඛිලං මඞ්ගලං නඃ .. 45 ..

සුප්තාකාරාඃ ප්රසුප්තේ භගවති විබුධෛරප්යදෘෂ්ටස්වරූපා

ව්යාප්තව්යෝමාන්තරාලාස්තරලමණිරුචා රඤ්ජිතාඃ ස්පෂ්ටභාසඃ .

දේහච්ඡායෝද්ගමාභා රිපුවපුරගුරුප්ලෝෂරෝෂාග්නිධූම්යාඃ

කේශාඃ කේශිද්විෂෝ නෝ විදධතු විපුලක්ලේශපාශප්රණාශම් .. 46 ..

යත්ර ප්රත්යුප්තරත්නප්රවරපරිලසද්භූරිරෝචිෂ්ප්රතාන-

-ස්ඵූර්ත්යාං මූර්තිර්මුරාරේර්ද්යුමණිශතචිතව්යෝමවද්දුර්නිරීක්ෂ්යා .

කුර්වත්පාරේපයෝධි ජ්වලදකෘශශිඛාභාස්වදෞර්වාග්නිශඞ්කාං

ශශ්වන්නඃ ශර්ම දිශ්යාත්කලිකලුෂතමඃපාටනං තත්කිරීටම් .. 47 ..

භ්රාන්ත්වා භ්රාන්ත්වා යදන්තස්ත්රිභුවනගුරුරප්යබ්දකෝටීරනේකා

ගන්තුං නාන්තං සමර්ථෝ භ්රමර ඉව පුනර්නාභිනාලීකනාලාත් .

උන්මජ්ජන්නූර්ජිතශ්රීස්ත්රිභුවනමපරං නිර්මමේ තත්සදෘක්ෂං

දේහාම්භෝධිඃ ස දේයාන්නිරවධිරමෘතං දෛත්යවිද්වේෂිණෝ නඃ .. 48 ..

මත්ස්යඃ කූර්මෝ වරාහෝ නරහරිණපතිර්වාමනෝ ජාමදග්න්යඃ

කාකුත්ස්ථඃ කංසඝාතී මනසිජවිජයී යශ්ච කල්කිර්භවිෂ්යන් .

විෂ්ණෝරංශාවතරා භුවනහිතකරා ධර්මසංස්ථාපනාර්ථාඃ

පායාසුර්මාං ත ඒතේ ගුරුතරකරුණාභාරඛින්නාශයා යේ .. 49 ..

යස්මාද්වාචෝ නිවෘත්තාඃ සමමපි මනසා ලක්ෂණාමීක්ෂමාණාඃ

ස්වාර්ථාලාභාත්පරාර්ථව්යපගමකථනශ්ලාඝිනෝ වේදවාදාඃ .

නිත්යානන්දං ස්වසංවින්නිරවධිවිමලස්වාන්තසඞ්ක්රාන්තබිම්බ-

-ච්ඡායාපත්යාපි නිත්යං සුඛයති යමිනෝ යත්තදව්යාන්මහෝ නඃ .. 50 ..

ආපාදාදා ච ශීර්ෂාද්වපුරිදමනඝං වෛෂ්ණවං යඃ ස්වචිත්තේ

ධත්තේ නිත්යං නිරස්තාඛිලකලිකලුෂ සන්තතාන්තඃ ප්රමෝදම් .

ජුහ්වජ්ජිහ්වාකෘශානෞ හරිචරිතහවිඃ ස්තෝත්රමන්ත්රානුපාඨෛ-

-ස්තත්පාදාම්භෝරුහාභ්යාං සතතමපි නමස්කුර්මහේ නිර්මලාභ්යාම් .. 51 ..

මෝදාත්පාදාදිකේශස්තුතිමිතිරචිතා කීර්තයිත්වා ත්රිධාම්න

පාදාබ්ජද්වන්ද්වසේවාසමයනතමතිර්මස්තකේනානමේද්ය .

උන්මුච්යෛවාත්මනෛනෝනිචයකවචක පඤ්චතාමේත්ය භානෝ-

-ර්බිම්බාන්තර්ගෝචර ස ප්රවිශති පරමානන්දමාත්මස්වරූපම් .. 52 ..

ඉති ශ්රීමත්පරමහංසපරිව්රාජකාචාර්යස්ය ශ්රීගෝවින්දභගවත්පූජ්යපාදශිෂ්යස්ය ශ්රීමච්ඡඞ්කරභගවතඃ කෘතෞ ශ්රී විෂ්ණු පාදාදිකේශාන්තවර්ණණ ස්තෝත්රං සම්පූර්ණම් .

Roman (IAST) Transliteration

lakṣmībharturbhujāgre kṛtavasati sitaṃ yasya rūpaṃ viśālaṃ

nīlādrestuṅgaśṛṅgasthitamiva rajanīnāthabimbaṃ vibhāti |

pāyānnaḥ pāñcajanyaḥ sa ditisutakulatrāsanaiḥ pūrayansvai-

-rnidhvānairnīradaughadhvaniparibhavadairambaraṃ kamburājaḥ || 1 ||

āhuryasya svarūpaṃ kṣaṇamukhamakhilaṃ sūrayaḥ kālametaṃ

dhvāntasyaikāntamantaṃ yadapi ca paramaṃ sarvadhāmnāṃ ca dhāma |

cakraṃ taccakrapāṇerditijatanugaladraktadhārāktadhāraṃ

śaśvanno viśvavandyaṃ vitaratu vipulaṃ śarma dharmāṃśuśobham || 2 ||

avyānnirghātaghoro haribhujapavanāmarśanādhmātamūrte-

-rasmānvismeranetratridaśanutivacaḥsādhukāraiḥ sutāraḥ |

sarvaṃ saṃhartumicchorarikulabhuvana sphāraviṣphāranādaḥ

saṃyatkalpāntasindhau śarasalilaghaṭāvārmucaḥ kārmukasya || 3 ||

jīmūtaśyāmabhāsā muhurapi bhagavadbāhunā mohayantī

yuddheṣūddhūyamānā jhaṭiti taṭidivālakṣyate yasya mūrtiḥ |

so'sistrāsākulākṣatridaśaripuvapuḥśoṇitāsvādatṛpto

nityānandāya bhūyānmadhumathanamanonandano nandako naḥ || 4 ||

kamrākārā murāreḥ karakamalatalenānurāgādgṛhītā

samyagvṛttā sthitāgre sapadi na sahate darśanaṃ yā pareṣām |

rājantī daityajīvāsavamadamuditā lohitālepanārdrā

kāmaṃ dīptāṃśukāntā pradiśatu dayitevāsya kaumodakī naḥ || 5 ||

yo viśvaprāṇabhūtastanurapi ca hareryānaketusvarūpo

yaṃ sañcintyaiva sadyaḥ svayamuragavadhūvargagarbhāḥ patanti |

cañcaccaṇḍorutuṇḍatruṭitaphaṇivasāraktapaṅkāṅkitasyaṃ

vande chandomayaṃ taṃ khagapatimamalasvarṇavarṇaṃ suparṇam || 6 ||

viṣṇorviśveśvarasya pravaraśayanakṛtsarvalokaikadhartā

so'nantaḥ sarvabhūtaḥ pṛthuvimalayaśāḥ sarvavedaiśca vedyaḥ |

pātā viśvasya śaśvatsakalasuraripudhvaṃsanaḥ pāpahantā

sarvajñaḥ sarvasākṣī sakalaviṣabhayātpātu bhogīśvaro naḥ || 7 ||

vāgbhūgairyādibhedairviduriha munayo yāṃ yadīyaiśca puṃsāṃ

kāruṇyārdraiḥ kaṭākṣaiḥ sakṛdapi patitaiḥ sampadaḥ syuḥ samagrāḥ |

kundendusvacchamandasmitamadhuramukhāmbhoruhāṃ sundarāṅgīṃ

vande vandyāmaśeṣairapi murabhiduromandirāmindirāṃ tām || 8 ||

yā sūte sattvajālaṃ sakalamapi sadā sannidhānena puṃso

dhatte yā tattvayogāccaramacaramidaṃ bhūtaye bhūtajātam |

dhātrīṃ sthātrīṃ janitrīṃ prakṛtimavikṛtiṃ viśvaśaktiṃ vidhātrīṃ

viṣṇorviśvātmanastāṃ vipulaguṇamayīṃ prāṇanāthāṃ praṇaumi || 9 ||

yebhyo'sūyadbhiruccaiḥ sapadi padamuru tyajyate daityavargai-

-ryebho dhartuṃ ca mūrdhnā spṛhayati satataṃ sarvagīrvāṇavargaḥ |

nityaṃ nirmūlayeyurnicitataramamī bhaktinighnātmanāṃ naḥ

padmākṣasyāṅghripadmadvayatalanilayāḥ pāṃsavaḥ pāpapaṅkam || 10 ||

rekhā lekhādivandyāścaraṇatalagatāścakramatsyādirūpāḥ

snigdhāḥ sūkṣmāḥ sujātā mṛdulalitatarakṣaumasūtrāyamāṇāḥ |

dadyurno maṅgalāni bhramarabharajuṣā komalenābdhijāyāḥ

kamreṇāmreḍyamānāḥ kisalayamṛdunā pāṇinā cakrapāṇeḥ || 11 ||

yasmādākrāmato dyāṃ garuḍamaṇiśilāketudaṇḍāyamānā

dāścyotantī babhāse surasaridamalā vaijayantīva kāntā |

bhūmiṣṭho yastathānyo bhuvanagṛhabṛhat‍stambhaśobhāṃ dadhau naḥ

pātāmetau pāyojodaralalitatalau paṅkajākṣasya pādau || 12 ||

ākrāmadbhyāṃ trilokīmasurasurapatī tatkṣaṇādeva nītau

yābhyāṃ vairocanīndrau yugapadapi vipatsampadorekadhāmaḥ |

tābhyāṃ tāmrodarābhyāṃ muhurahamajitasyāñcitābhyāmubhābhyāṃ

prājyaiśvaryapradābhyāṃ praṇatimupagataḥ pādapaṅkeruhābhyām || 13 ||

yebhyo varṇaścaturthaścaramata udabhūdādisarge prajānāṃ

sāhasrī cāpi saṅkhyā prakaṭamabhihitā sarvavedeṣu yeṣām |

prāptā viśvambharā yairativitatatanorviśvamūrtervirājo

viṣṇostebhyo mahadbhyaḥ satatamapi namo'stvaṅghripaṅkeruhebhyaḥ || 14 ||

viṣṇoḥ pādadvayāgre vimalanakhamaṇibhrājitā rājate yā

rājīvasyeva ramyā himajalakaṇikālaṅkṛtāgrā dalālī |

asmākaṃ vismayārhāṇyakhilajanamana prārthanīyā hi seyaṃ

dadyādādyānavadyā tatiratirucirā maṅgalānyaṅgulīnām || 15 ||

yasyāṃ dṛṣṭvāmalāyāṃ pratikṛtimamarāḥ sambhavantyānamantaḥ

sendrāḥ sāndrīkṛterṣyāstvaparasurakulāśaṅkayātaṅkavantaḥ |

sā sadyaḥ sātirekāṃ sakalasukhakarīṃ sampadaṃ sādhayenna-

-ścañcaccārvaṃśucakrā caraṇanalinayoścakrapāṇernakhālī || 16 ||

pādāmbhojanmasevāsamavanatasuravrātabhāsvatkirīṭa-

-pratyuptoccāvacāśmapravarakaragaṇaiścintitaṃ yadvibhāti |

namrāṅgānāṃ harerno haridupalamahākūrmasaundaryahāri-

-cchāyaṃ śreyaḥpradāyi prapadayugamidaṃ prāpayetpāpamantam || 17 ||

śrīmatyau cāruvṛtte karaparimalanānandahṛṣṭe ramāyāḥ

saundaryāḍhyendranīlopalaracitamahādaṇḍayoḥ kānticore |

sūrīndraiḥ stūyamāne surakulasukhade sūditārātisaṅghe

jaṅghe nārāyaṇīye muhurapi jayatāmasmadaṃho harantyau || 18 ||

samyaksāhyaṃ vidhātuṃ samamiva satataṃ jaṅghayoḥ khinnayorye

bhārībhūtorudaṇḍadvayabharaṇakṛtottambhabhāvaṃ bhajete |

cittādarśaṃ nidhātuṃ mahitamiva satāṃ te samudrāyamāne

vṛttākāre vidhattāṃ hyadi mudamajitasyāniśaṃ jānunī naḥ || 19 ||

devo bhītiṃ vidhātuḥ sapadi vidadhatau kaiṭabhākhyaṃ madhuṃ cā-

-pyāropyārūḍhagarvāvadhijaladhi yayorādidaityau jaghāna |

vṛttāvanyonyatulyau caturamupacayaṃ bibhratāvabhranīlā-

-vūrū cārū harestau mudamatiśayinīṃ mānase no vidhattām || 20 ||

pītena dyotate yaccaturaparihitenāmbareṇātyudāraṃ

jātālaṅkārayogaṃ jalamiva jaladherbāḍabāgniprabhābhiḥ |

etatpātityadānno jaghanamatighanādenaso mānanīyaṃ

sātatyenaiva cetoviṣayamavataratpātu pītāmbarasya || 21 ||

yasyā dāmnā tridhāmno jaghanakalitayā bhrājate'ṅgaṃ yathābdhe-

-rmadhyastho mandarādrirbhujagapatimahābhogasannaddhamadhyaḥ |

kāñcī sā kāñcanābhā maṇivarakiraṇairullasadbhiḥ pradīptā

kalyāṃ kalyāṇadātrīṃ mama matimaniśaṃ kamrarūpāṃ karotu || 22 ||

unnamraṃ kamramuccairupacitamudabhūdyatra patrairvicitraiḥ

pūrvaṃ gīrvāṇapūjyaṃ kamalajamadhupasyāspadaṃ tatpayojam |

yasminnīlāśmanīlaistaralarucijalaiḥ pūrite kelibuddhyā

nālīkākṣasya nābhīsarasi vasatu naścittahaṃsaścirāya || 23 ||

pātālaṃ yasya nālaṃ valayamapi diśāṃ patrapaṅktīrnagendrā-

-nvidvāṃsaḥ kesarālīrviduriha vipulāṃ karṇikāṃ svarṇaśailam |

bhūyādgāyatsvayambhūmadhukarabhavanaṃ bhūmayaṃ kāmadaṃ no

nālīkaṃ nābhipadmākarabhavamuru tannāgaśayyasya śaureḥ || 24 ||

ādau kalpasya yasmātprabhavati vitataṃ viśvametadvikalpaiḥ

kalpānte yasya cānta praviśati sakalaṃ sthāvaraṃ jaṅgamaṃ ca |

atyantācintyamūrteścirataramajitasyāntarikṣasvarūpe

tasminnasmākamantaḥkaraṇamatimudā krīḍatātkroḍabhāge || 25 ||

kāntyambhaḥpūrapūrṇe lasadasitavalībhaṅgabhāsvattaraṅge

gambhīrākāranābhīcaturataramahāvartaśobhinyudāre |

krīḍatvānadvahemodaranahanamahābāḍabāgniprabhāḍhye

kāmaṃ dāmodarīyodarasalilanidhau cittamatsyaściraṃ naḥ || 26 ||

nābhīnālīkamūlādadhikaparimalonmohitānāmalīnāṃ

mālā nīleva yāntī sphurati rucimatī vaktrapadmonmukhī yā |

ramyā sā romarājirmahitarucikarī madhyabhāgasya viṣṇo-

-ścittasthā mā viraṃsīccirataramucitāṃ sādhayantī śriyaṃ naḥ || 27 ||

saṃstīrṇaṃ kaustubhāṃśuprasarakisalayairmugdhamuktāphalāḍhyaṃ

śrīvatsollāsi phullapratinavavanamālāṅki rājadbhujāntam |

vakṣaḥ śrīvṛkṣakāntaṃ madhukaranikaraśyāmalaṃ śārṅgapāṇeḥ

saṃsārādhvaśramārtairupavanamiva yatsevitaṃ tatprapadye || 28 ||

kāntaṃ vakṣo nitāntaṃ vidadhadiva galaṃ kālimā kālaśatro-

-rindorbimbaṃ yathāṅko madhupa iva tarormañjarīṃ rājate yaḥ |

śrīmānnityaṃ vidheyādaviralamilitaḥ kaustubhaśrīpratānaiḥ

śrīvatsaḥ śrīpateḥ sa śriya iva dayito vatsa uccaiḥśriyaṃ naḥ || 29 ||

sambhūyāmbhodhimadhyātsapadi sahajayā yaḥ śriyā sannidhatte

nīle nārāyaṇoraḥsthalagaganatale hāratāropasevye |

āśāḥ sarvāḥ prakāśā vidadhadapidadhaccātmabhāsānyatejā-

-syāścaryasyākaro no dyumaṇiriva maṇiḥ kaustubhaḥ so'stubhūtyai || 30 ||

yā vāyāvānukūlyātsarati maṇirucā bhāsamānā samānā

sākaṃ sākampamaṃse vasati vidadhatī vāsubhadraṃ subhadram |

sāraṃ sāraṅgasaṅghairmukharitakusumā mecakāntā ca kāntā

mālā mālālitāsmānna viramatu sukhairyojayantī jayantī || 31 ||

hārasyoruprabhābhiḥ pratinavavanamālāśubhiḥ prāṃśurūpaiḥ

śrībhiścāpyaṅgadānāṃ kabalitaruci yanniṣkabhābhiśca bhāti |

bāhulyenaiva baddhāñjalipuṭamajitasyābhiyācāmahe ta-

-dvandhārtiṃ bādhatāṃ no bahuvihatikarīṃ bandhuraṃ bāhumūlam || 32 ||

viśvatrāṇaikadīkṣāstadanuguṇaguṇakṣatranirmāṇadakṣāḥ

kartāro durnirūpasphuṭaguṇayaśasā karmaṇāmadbhutānām |

śārṅgaṃ bāṇaṃ kṛpāṇaṃ phalakamarigade padmaśaṅkhau sahasraṃ

bibhrāṇāḥ śastrajālaṃ mama dadhatu harerbāhavo mohahānim || 33 ||

kaṇṭhākalpodgatairyaḥ kanakamayalasatkuṇḍalotthairudārai-

-rudyotaiḥ kaustubhasyāpyurubhirupacitaścitravarṇo vibhāti |

kaṇṭhāśleṣe ramāyāḥ karavalayapadairmudrite bhadrarūpe

vaikuṇṭhīye'tra kaṇṭhe vasatu mama matiḥ kuṇṭhabhāvaṃ vihāya || 34 ||

padmānandapradātā parilasadaruṇaśrīparītāgrabhāgaḥ

kāle kāle ca kambupravaraśaśadharāpūraṇe yaḥ pravīṇaḥ |

vaktrākāśāntarasthastirayati nitarāṃ dantatāraughaśobhāṃ

śrībharturdantavāsodyumaṇiraghatamonāśanāyāstvasau naḥ || 35 ||

nityaṃ snehātirekānnijakamituralaṃ viprayogākṣamā yā

vaktrendorantarāle kṛtavasatirivābhāti nakṣatrarājiḥ |

lakṣmīkāntasya kāntākṛtirativilasanmugdhamuktāvaliśrī-

-rdantālī santataṃ sā natinutiniratānakṣatānrakṣatānnaḥ || 36 ||

brahmanbrahmaṇyajihmāṃ matimapi kuruṣe deva sambhāvaye tvāṃ

śambho śakra trilokīmavasi kimamarairnāradādyāḥ sukhaṃ vaḥ |

itthaṃ sevāvanamraṃ suramuninikaraṃ vīkṣya viṣṇoḥ prasanna-

-syāsyendorāsravantī varavacanasudhāhlādayenmānasaṃ naḥ || 37 ||

karṇasthasvarṇakamrojjvalamakaramahākuṇḍalaprotadīpya-

-nmāṇikyaśrīpratānaiḥ parimilitamaliśyāmalaṃ komalaṃ yat |

prodyatsūryāṃśurājanmarakatamukurākāracoraṃ murāre-

-rgāḍhāmāgāminīṃ naḥ śamayatu vipadaṃ gaṇḍayormaṇḍalaṃ tat || 38 ||

vaktrāmbhoje lasantaṃ muhuradharamaṇiṃ pakvabimbābhirāmaṃ

dṛṣṭvā draṣṭuṃ śukasya sphuṭamavataratastuṇḍadaṇḍāyate yaḥ |

ghoṇaḥ śoṇīkṛtātmā śravaṇayugalasatkuṇḍalosrairmurāreḥ

prāṇākhyasyānilasya prasaraṇasaraṇiḥ prāṇadānāya naḥ syāt || 39 ||

dikkālau vedayantau jagati muhurimau sañcarantau ravīndū

trailokyālokadīpāvabhidadhati yayoreva rūpaṃ munīndrāḥ |

asmānabjaprabhe te pracuratarakṛpānirbharaṃ prekṣamāṇe

pātāmātāmraśuklāsitarucirucire padmanetrasya netre || 40 ||

pātātpātālapātātpatagapatigaterbhrūyugaṃ bhugnamadhyaṃ

yeneṣaccālitena svapadaniyamitāḥ sāsurā devasaṅghāḥ |

nṛtyallālāṭaraṅge rajanikaratanorardhakhaṇḍāvadāte

kālavyāladvayaṃ vā vilasati samayā vālikāmātaraṃ naḥ || 41 ||

lakṣmākārālakālisphuradalikaśaśāṅkārdhasandarśamīla-

-nnetrāmbhojaprabodhotsukanibhṛtatarālīnabhṛṅgacchaṭābhe |

lakṣmīnāthasya lakṣyīkṛtavibudhagaṇāpāṅgabāṇāsanārdha-

-cchāye no bhūribhūtiprasavakuśalate bhrūlate pālayetām || 42 ||

rūkṣasmārekṣucāpacyutaśaranikarakṣīṇalakṣmīkaṭākṣa-

-protphullatpadmamālāvilasitamahitasphāṭikaiśānaliṅgam |

bhūyādbhūyo vibhūtyai mama bhuvanapaterbhrūlatādvandvamadhyā-

-dutthaṃ tatpuṇḍramūrdhvaṃ janimaraṇatamaḥkhaṇḍanaṃ maṇḍanaṃ ca || 43 ||

pīṭhībhūtālakānte kṛtamakuṭamahādevaliṅgapratiṣṭhe

lālāṭe nāṭyaraṅge vikaṭatarataṭe kaiṭabhāreścirāya |

proddhāṭyaivātmatandrīprakaṭapaṭakuṭīṃ prasphurantīṃ sphuṭāṅgaṃ

paṭvīyaṃ bhāvanākhyāṃ caṭulamatinaṭī nāṭikāṃ nāṭayennaḥ || 44 ||

mālālīvālidhāmnaḥ kuvalayakalitā śrīpateḥ kuntalālī

kālindyāruhya mūrdhno galati haraśiraḥsvardhunīspardhayā nu |

rāhurvā yāti vaktraṃ sakalaśaśikalābhrāntilolāntarātmā

lokairālokyate yā pradiśatu satataṃ sākhilaṃ maṅgalaṃ naḥ || 45 ||

suptākārāḥ prasupte bhagavati vibudhairapyadṛṣṭasvarūpā

vyāptavyomāntarālāstaralamaṇirucā rañjitāḥ spaṣṭabhāsaḥ |

dehacchāyodgamābhā ripuvapuraguruploṣaroṣāgnidhūmyāḥ

keśāḥ keśidviṣo no vidadhatu vipulakleśapāśapraṇāśam || 46 ||

yatra pratyuptaratnapravaraparilasadbhūrirociṣpratāna-

-sphūrtyāṃ mūrtirmurārerdyumaṇiśatacitavyomavaddurnirīkṣyā |

kurvatpārepayodhi jvaladakṛśaśikhābhāsvadaurvāgniśaṅkāṃ

śaśvannaḥ śarma diśyātkalikaluṣatamaḥpāṭanaṃ tatkirīṭam || 47 ||

bhrāntvā bhrāntvā yadantastribhuvanagururapyabdakoṭīranekā

gantuṃ nāntaṃ samartho bhramara iva punarnābhinālīkanālāt |

unmajjannūrjitaśrīstribhuvanamaparaṃ nirmame tatsadṛkṣaṃ

dehāmbhodhiḥ sa deyānniravadhiramṛtaṃ daityavidveṣiṇo naḥ || 48 ||

matsyaḥ kūrmo varāho narahariṇapatirvāmano jāmadagnyaḥ

kākutsthaḥ kaṃsaghātī manasijavijayī yaśca kalkirbhaviṣyan |

viṣṇoraṃśāvatarā bhuvanahitakarā dharmasaṃsthāpanārthāḥ

pāyāsurmāṃ ta ete gurutarakaruṇābhārakhinnāśayā ye || 49 ||

yasmādvāco nivṛttāḥ samamapi manasā lakṣaṇāmīkṣamāṇāḥ

svārthālābhātparārthavyapagamakathanaślāghino vedavādāḥ |

nityānandaṃ svasaṃvinniravadhivimalasvāntasaṅkrāntabimba-

-cchāyāpatyāpi nityaṃ sukhayati yamino yattadavyānmaho naḥ || 50 ||

āpādādā ca śīrṣādvapuridamanaghaṃ vaiṣṇavaṃ yaḥ svacitte

dhatte nityaṃ nirastākhilakalikaluṣa santatāntaḥ pramodam |

juhvajjihvākṛśānau haricaritahaviḥ stotramantrānupāṭhai-

-statpādāmbhoruhābhyāṃ satatamapi namaskurmahe nirmalābhyām || 51 ||

modātpādādikeśastutimitiracitā kīrtayitvā tridhāmna

pādābjadvandvasevāsamayanatamatirmastakenānamedya |

unmucyaivātmanainonicayakavacaka pañcatāmetya bhāno-

-rbimbāntargocara sa praviśati paramānandamātmasvarūpam || 52 ||

iti śrīmatparamahaṃsaparivrājakācāryasya śrīgovindabhagavatpūjyapādaśiṣyasya śrīmacchaṅkarabhagavataḥ kṛtau śrī viṣṇu pādādikeśāntavarṇaṇa stotraṃ sampūrṇam |