Shiva Keshadi Padanta Varnana Stotram

ॐ

ශිව කේශාදි පාදාන්ත වර්ණන ස්තෝත්රං

Shiva Stotram Sinhala

දේයාසුර්මූර්ධ්නි රාජත්සරසසුරසරිත්පාරපර්යන්තනිර්ය-

-ත්ප්රාංශුස්තම්බාඃ පිශඞ්ගාස්තුලිතපරිණතාරක්තශාලීලතා වඃ .

දුර්වාරාපත්තිගර්තශ්රිතනිඛිලජනෝත්තාරණේ රජ්ජුභූතා

ඝෝරාඝෝර්වීරුහාලීදහනශිඛිශිඛාඃ ශර්ම ශාර්වාඃ කපර්දාඃ .. 1 ..

කුර්වන්නිර්වාණමාර්ගප්රගමපරිලසද්රූප්යසෝපානශඞ්කාං

ශක්රාරීණාං පුරාණාං ත්රයවිජයකෘතස්පෂ්ටරේඛායමාණම් .

අව්යාදව්යාජමුච්චෛරලිකහිමධරාධිත්යකාන්තස්ත්රිධෝද්ය-

-ජ්ජාහ්නව්යාභං මෘඩානීකමිතුරුඩුපරුක්පාණ්ඩරං වස්ත්රිපුණ්ඩ්රම් .. 2 ..

ක්රුධ්යද්ගෞරීප්රසාදානතිසමයපදාඞ්ගුෂ්ඨසඞ්ක්රාන්තලාක්ෂා-

-බින්දුස්පර්ධි ස්මරාරේඃ ස්ඵටිකමණිදෘෂන්මග්නමාණික්යශෝභම් .

මූර්ධ්න්යුද්යද්දිව්යසින්ධෝඃ පතිතශඵරිකාකාරි වෝ මස්තකං ස්තා-

-දස්තෝකාපත්තිකෘත්යෛ හුතවහකණිකාමෝක්ෂරූක්ෂං සදාක්ෂි .. 3 ..

භූත්යෛ දෘග්භූතයෝඃ ස්යාද්යදහිමහිමරුග්බිම්බයෝඃ ස්නිග්ධවර්ණෝ

දෛත්යෞඝධ්වංසශංසී ස්ඵුට ඉව පරිවේෂාවශේෂෝ විභාති .

සර්ගස්ථිත්යන්තවෘත්තිර්මයි සමුපගතේතීව නිර්වෘත්තගර්වං

ශර්වාණීභර්තුරුච්චෛර්යුගලමථ දධද්විභ්රමං තද්භ්රුවෝර්වඃ .. 4 ..

යුග්මේ රුක්මාබ්ජපිඞ්ගේ ග්රහ ඉව පිහිතේ ද්රාග්යයෝඃ ප්රාග්දුහිත්රා

ශෛලස්ය ධ්වාන්තනීලාම්බරරචිතබෘහත්කඤ්චුකෝ(අ)භූත්ප්රපඤ්චඃ .

තේ ත්රෛනේත්රේ පවිත්රේ ත්රිදශවරඝටාමිත්රජෛත්රෝග්රශස්ත්රේ

නේත්රේ නේත්රේ භවේතාං ද්රුතමිහ භවතාමින්ද්රියාශ්වාන්වියන්තුම් .. 5 ..

චණ්ඩීවක්ත්රාර්පණේච්ඡෝස්තදනු භගවතඃ පාණ්ඩුරුක්පාණ්ඩුගණ්ඩ-

-ප්රෝද්යත්කණ්ඩූං විනේතුං විතනුත ඉව යේ රත්නකෝණෛර්විඝෘෂ්ටිම් .

චණ්ඩාර්චිර්මණ්ඩලාභේ සතතනතජනධ්වාන්තඛණ්ඩාතිශෞණ්ඩේ

චාණ්ඩීශේ තේ ශ්රියේස්තාමධිකමවනතාඛණ්ඩලේ කුණ්ඩලේ වඃ .. 6 ..

ඛට්වාඞ්ගෝදග්රපාණේඃ ස්ඵුටවිකටපුටෝ වක්ත්රරන්ධ්රප්රවේශ-

-ප්රේප්සූදඤ්චත්ඵණෝරුශ්වසදතිධවලාහීන්ද්රශඞ්කාං දධානඃ .

යුෂ්මාකං ක්රමවක්ත්රාම්බුරුහපරිලසත්කර්ණිකාකාරශෝභඃ

ශශ්වත්ත්රාණාය භූයාදලමතිවිමලෝත්තුඞ්ගකෝණඃ ස ඝෝණඃ .. 7 ..

ක්රුධ්යත්යද්ධා යයෝඃ ස්වාං තනුමතිලසතෝර්බිම්බිතාං ලක්ෂයන්තී

භර්ත්රේ ස්පර්ධාතිනිඝ්නා මුහුරිතරවධූශඞ්කයා ශෛලකන්යා .

යුෂ්මාංස්තෞ ශශ්වදුච්චෛරබහුලදශමීශර්වරීශාතිශුභ්රා-

-වව්යාස්තාං දිව්යසින්ධෝඃ කමිතුරවනමල්ලෝකපාලෞ කපෝලෞ .. 8 ..

යෝ භාසා භාත්යුපාන්තස්ථිත ඉව නිභෘතං කෞස්තුභෝ ද්රෂ්ටුමිච්ඡ-

-න්සෝත්ථස්නේහාන්නිතාන්තං ගලගතගරලං පත්යුරුච්චෛඃ පශූනාම් .

ප්රෝද්යත්ප්රේම්ණා යමාර්ද්රා පිබති ගිරිසුතා සම්පදඃ සාතිරේකා

ලෝකාඃ ශෝණීකෘතාන්තා යදධරමහසා සෝ(අ)ධරෝ වෝ විධත්තාම් .. 9 ..

අත්යර්ථං රාජතේ යා වදනශශධරාදුද්ගලච්චාරුවාණී-

-පීයූෂාම්භඃප්රවාහප්රසරපරිලසත්ඵේනබින්ද්වාවලීව .

දේයාත්සා දන්තපඞ්ක්තිශ්චිරමිහ දනුදායාදදෞවාරිකස්ය

ද්යුත්යා දීප්තේන්දුකුන්දච්ඡවිරමලතරප්රෝන්නතාග්රා මුදං වඃ .. 10 ..

න්යක්කුර්වන්නුර්වරාභෘන්නිභඝනසමයෝද්ධුෂ්ටමේඝෞඝඝෝෂං

ස්ඵූර්ජද්වාර්ධ්යුත්ථිතෝරුධ්වනිතමපි පරබ්රහ්මභූතෝ ගභීරඃ .

සුව්යක්තෝ ව්යක්තමූර්තේඃ ප්රකටිතකරණඃ ප්රාණනාථස්ය සත්යාඃ

ප්රීත්යා වඃ සංවිදධ්යාත්ඵලවිකලමලං ජන්ම නාදඃ ස නාදඃ .. 11 ..

භාසා යස්ය ත්රිලෝකී ලසති පරිලසත්ඵේනබින්ද්වර්ණවාන්ත-

-ර්ව්යාමග්නේවාතිගෞරස්තුලිතසුරසරිද්වාරිපූරප්රසාරඃ .

පීනාත්මා දන්තභාභිර්භෘශමහහහකාරාතිභීමඃ සදේෂ්ටාං

පුෂ්ටාං තුෂ්ටිං කෘෂීෂ්ට ස්ඵුටමිහ භවතාමට්ටහාසෝ(අ)ෂ්ටමූර්තේඃ .. 12 ..

සද්යෝජාතාඛ්යමාප්යං යදුවිමලමුදග්වර්ති යද්වාමදේවං

නාම්නා හේම්නා සදෘක්ෂං ජලදනිභමඝෝරාහ්වයං දක්ෂිණං යත් .

යද්බාලාර්කප්රභං තත්පුරුෂනිගදිතං පූර්වමීශානසඤ්ජ්ඤං

යද්දිව්යං තානි ශම්භෝර්භවදභිලෂිතං පඤ්ච දද්යුර්මුඛානි .. 13 ..

ආත්මප්රේම්ණෝ භවාන්යා ස්වයමිව රචිතාඃ සාදරං සාංවනන්යා

මෂ්යා තිස්රඃසුනීලාඤ්ජනනිභගරරේඛාඃ සමාභාන්ති යස්යාම් .

අකල්පානල්පභාසා භෘශරුචිරතරා කම්බුකල්පාම්බිකායාඃ

පත්යුඃ සාත්යන්තමන්තර්විලසතු සතතං මන්ථරා කන්ධරා වඃ .. 14 ..

වක්ත්රේන්දෝර්දන්තලක්ෂ්ම්යාශ්චිරමධරමහාකෞස්තුභස්යාප්යුපාන්තේ

සෝත්ථානාං ප්රාර්ථයන්යඃ ස්ථිතිමචලභුවේ වාරයන්ත්යෛ නිවේශම් .

ප්රායුඞ්ක්තේවාශිෂෝ යඃ ප්රතිපදමමෘතත්වේ ස්ථිතඃ කාලශත්රෝඃ

කාලං කුර්වන්ගලං වෝ හෘදයමයමලං ක්ෂාලයේත්කාලකූටඃ .. 15 ..

ප්රෞඪප්රේමාකුලායා දෘඪතරපරිරම්භේෂු පර්වේන්දුමුඛ්යාඃ

පාර්වත්යාශ්චාරුචාමීකරවලයපදෛරඞ්කිතං කාන්තිශාලි .

රඞ්ගන්නාගාඞ්ගදාඪ්යං සතතමවිහිතං කර්ම නිර්මූලයේත්ත-

-ද්දෝර්මූලං නිර්මලං යද්ධෘදි දුරිතමපාස්යාර්ජිතං ධූර්ජටේර්වඃ .. 16 ..

කණ්ඨාශ්ලේෂාර්ථමාප්තා දිව ඉව කමිතුඃ ස්වර්ගසින්ධෝඃ ප්රවාහාඃ

ක්රාන්ත්යෛ සංසාරසින්ධෝඃ ස්ඵටිකමණිමහාසඞ්ක්රමාකාරදීර්ඝාඃ .

තිර්යග්විෂ්කම්භභූතාස්ත්රිභුවනවසතේර්භින්නදෛත්යේභදේහා

බාහා වස්තා හරස්ය ද්රුතමිහ නිවහානංහසාං සංහරන්තු .. 17 ..

වක්ෂෝ දක්ෂද්විෂෝ(අ)ලං ස්මරභරවිනමද්දක්ෂජාක්ෂීණවක්ෂෝ-

-ජාන්තර්නික්ෂිප්තශුම්භන්මලයජමිලිතෝද්භාසි භස්මෝක්ෂිතං යත් .

ක්ෂිප්රං තද්රූක්ෂචක්ෂුඃ ශ්රුතිගණඵණරත්නෞඝභාභීක්ෂ්ණශෝභං

යුෂ්මාකං ශශ්වදේනඃ ස්ඵටිකමණිශිලාමණ්ඩලාභං ක්ෂිණෝතු .. 18 ..

මුක්තාමුක්තේ විචිත්රාකුලවලිලහරීජාලශාලින්යවාඤ්ච-

-න්නාභ්යාවර්තේ විලෝලද්භුජගවරයුතේ කාලශත්රෝර්විශාලේ .

යුෂ්මච්චිත්තත්රිධාමා ප්රතිනවරුචිරේ මන්දිරේ කාන්තිලක්ෂ්ම්යාඃ

ශේතාං ශීතාංශුගෞරේ චිරතරමුදරක්ෂීරසින්ධෞ සලීලම් .. 19 ..

වෛයාඝ්රී යත්ර කෘත්තිඃ ස්ඵුරති හිමගිරේර්විස්තෘතෝපත්යකාන්තඃ

සාන්ද්රාවශ්යායමිශ්රා පරිත ඉව වෘතා නීලජීමූතමාලා .

ආබද්ධාහීන්ද්රකාඤ්චීගුණමතිපෘථුලං ශෛලජාක්රීඩභූමි-

-ස්තද්වෝ නිඃශ්රේයසේ ස්යාජ්ජඝනමතිඝනං බාලශීතාංශුමෞලේඃ .. 20 ..

පුෂ්ටාවෂ්ටම්භභූතෞ පෘථුතරජඝනස්යාපි නිත්යං ත්රිලෝක්යාඃ

සම්යග්වෘත්තෞ සුරේන්ද්රද්විරදවරකරෝදාරකාන්තිං දධානෞ .

සාරාවූරූ පුරාරේඃ ප්රසභමරිඝටාඝස්මරෞ භස්මශුභ්රෞ

භක්තෛරත්යාර්ද්රචිත්තෛරධිකමවනතෞ වාඤ්ඡිතං වෝ විධත්තාම් .. 21 ..

ආනන්දායේන්දුකාන්තෝපලරචිතසමුද්ගායිතේ යේ මුනීනාං

චිත්තාදර්ශං නිධාතුං විදධති චරණේ තාණ්ඩවාකුඤ්චනානි .

කාඤ්චීභෝගීන්ද්රමූර්ධ්නාං ප්රතිමුහුරුපධානායමානේ ක්ෂණං තේ

කාන්තේ ස්තාමන්තකාරේර්ද්යුතිවිජිතසුධාභානුනී ජානුනී වඃ .. 22 ..

මඤ්ජීරීභූතභෝගිප්රවරගණඵණාමණ්ඩලාන්තර්නිතාන්ත-

-ව්යාදීර්ඝානර්ඝරත්නද්යුතිකිසලයතේ ස්තූයමානේ ද්යුසද්භිඃ .

බිභ්රත්යෞ විභ්රමං වඃ ස්ඵටිකමණිබෘහද්දණ්ඩවද්භාසිතේ යේ

ජඞ්ඝේ ශඞ්ඛේන්දුශුභ්රේ භෘශමිහ භවතාං මානසේ ශූලපාණේඃ .. 23 ..

අස්තෝකස්තෝමශස්ත්රෛරපචිතිමමලාං භූරිභාවෝපහාරෛඃ

කුර්වද්භිඃ සර්වදෝච්චෛඃ සතතමභිවෘතෞ බ්රහ්මවිද්දේවලාද්යෛඃ .

සම්යක්සම්පූජ්යමානාවිහ හෘදි සරසීවානිශං යුෂ්මදීයේ

ශර්වස්ය ක්රීඩතාං තෞ ප්රපදවරබෘහත්කච්ඡපාවච්ඡභාසෞ .. 24 ..

යාඃ ස්වස්යෛකාංශපාතාදතිබහලගලද්රක්තවක්ත්රං ප්රණුන්න-

-ප්රාණං ප්රාක්රෝශයන්ප්රාඞ්නිජමචලවරං චාලයන්තං දශාස්යම් .

පාදාඞ්ගුල්යෝ දිශන්තු ද්රුතමයුගදෘශඃ කල්මෂප්ලෝෂකල්යාඃ

කල්යාණං ඵුල්ලමාල්යප්රකරවිලසිතා වඃ ප්රණද්ධාහිවල්ල්යඃ .. 25 ..

ප්රහ්වප්රාචීනබර්හිඃප්රමුඛසුරවරප්රස්ඵුරන්මෞලිසක්ත-

-ජ්යායෝරත්නෝත්කරෝස්රෛරවිරතමමලා භූරිනීරාජිතා යා .

ප්රෝදග්රාග්රා ප්රදේයාත්තතිරිව රුචිරා තාරකාණාං නිතාන්තං

නීලග්රීවස්ය පාදාම්බුරුහවිලසිතා සා නඛාලී සුඛං වඃ .. 26 ..

සත්යාඃ සත්යානනේන්දාවපි සවිධගතේ යේ විකාසං දධාතේ

ස්වාන්තේ ස්වාං තේ ලභන්තේ ශ්රියමිහ සරසීවාමරා යේ දධානාඃ .

ලෝලං ලෝලම්බකානාං කුලමිව සුධියාං සේවතේ යේ සදා ස්තාං

භූත්යෛ භූත්යෛණපාණේර්විමලතරරුචස්තේ පදාම්භෝරුහේ වඃ .. 27 ..

යේෂාං රාගාදිදෝෂාක්ෂතමති යතයෝ යාන්ති මුක්තිං ප්රසාදා-

-ද්යේ වා නම්රාත්මමූර්තිද්යුසදෘෂිපරිෂන්මූර්ධ්නි ශේෂායමාණාඃ .

ශ්රීකණ්ඨස්යාරුණෝද්යච්චරණසරසිජප්රෝත්ථිතාස්තේ භාවාඛ්යා-

-ත්පාරාවාරාච්චිරං වෝ දුරිතහතිකෘතස්තාරයේයුඃ පරාගාඃ .. 28 ..

භූම්නා යස්යාස්තසීම්නා භුවනමනුසෘතං යත්පරං ධාම ධාම්නාං

සාම්නාමාම්නායතත්ත්වං යදපි ච පරමං යද්ගුණාතීතමාද්යම් .

යච්චාංහෝහන්නිරීහං ගහනමිති මුහුඃ ප්රාහුරුච්චෛර්මහාන්තෝ

මාහේශං තන්මහෝ මේ මහිතමහරහර්මෝහරෝහං නිහන්තු .. 29 ..

ඉති ශ්රීමත්පරමහංසපරිව්රාජකාචාර්යස්ය ශ්රීගෝවින්දභගවත්පූජ්යපාදශිෂ්යස්ය ශ්රීමච්ඡඞ්කරභගවතඃ කෘතෞ ශ්රී ශිව කේශාදිපාදාන්තවර්ණන ස්තෝත්රම් ..

Roman (IAST) Transliteration

deyāsurmūrdhni rājatsarasasurasaritpāraparyantanirya-

-tprāṃśustambāḥ piśaṅgāstulitapariṇatāraktaśālīlatā vaḥ |

durvārāpattigartaśritanikhilajanottāraṇe rajjubhūtā

ghorāghorvīruhālīdahanaśikhiśikhāḥ śarma śārvāḥ kapardāḥ || 1 ||

kurvannirvāṇamārgapragamaparilasadrūpyasopānaśaṅkāṃ

śakrārīṇāṃ purāṇāṃ trayavijayakṛtaspaṣṭarekhāyamāṇam |

avyādavyājamuccairalikahimadharādhityakāntastridhodya-

-jjāhnavyābhaṃ mṛḍānīkamituruḍuparukpāṇḍaraṃ vastripuṇḍram || 2 ||

krudhyadgaurīprasādānatisamayapadāṅguṣṭhasaṅkrāntalākṣā-

-binduspardhi smarāreḥ sphaṭikamaṇidṛṣanmagnamāṇikyaśobham |

mūrdhnyudyaddivyasindhoḥ patitaśapharikākāri vo mastakaṃ stā-

-dastokāpattikṛtyai hutavahakaṇikāmokṣarūkṣaṃ sadākṣi || 3 ||

bhūtyai dṛgbhūtayoḥ syādyadahimahimarugbimbayoḥ snigdhavarṇo

daityaughadhvaṃsaśaṃsī sphuṭa iva pariveṣāvaśeṣo vibhāti |

sargasthityantavṛttirmayi samupagatetīva nirvṛttagarvaṃ

śarvāṇībharturuccairyugalamatha dadhadvibhramaṃ tadbhruvorvaḥ || 4 ||

yugme rukmābjapiṅge graha iva pihite drāgyayoḥ prāgduhitrā

śailasya dhvāntanīlāmbararacitabṛhatkañcuko'bhūtprapañcaḥ |

te trainetre pavitre tridaśavaraghaṭāmitrajaitrograśastre

netre netre bhavetāṃ drutamiha bhavatāmindriyāśvānviyantum || 5 ||

caṇḍīvaktrārpaṇecchostadanu bhagavataḥ pāṇḍurukpāṇḍugaṇḍa-

-prodyatkaṇḍūṃ vinetuṃ vitanuta iva ye ratnakoṇairvighṛṣṭim |

caṇḍārcirmaṇḍalābhe satatanatajanadhvāntakhaṇḍātiśauṇḍe

cāṇḍīśe te śriyestāmadhikamavanatākhaṇḍale kuṇḍale vaḥ || 6 ||

khaṭvāṅgodagrapāṇeḥ sphuṭavikaṭapuṭo vaktrarandhrapraveśa-

-prepsūdañcatphaṇoruśvasadatidhavalāhīndraśaṅkāṃ dadhānaḥ |

yuṣmākaṃ kramavaktrāmburuhaparilasatkarṇikākāraśobhaḥ

śaśvattrāṇāya bhūyādalamativimalottuṅgakoṇaḥ sa ghoṇaḥ || 7 ||

krudhyatyaddhā yayoḥ svāṃ tanumatilasatorbimbitāṃ lakṣayantī

bhartre spardhātinighnā muhuritaravadhūśaṅkayā śailakanyā |

yuṣmāṃstau śaśvaduccairabahuladaśamīśarvarīśātiśubhrā-

-vavyāstāṃ divyasindhoḥ kamituravanamallokapālau kapolau || 8 ||

yo bhāsā bhātyupāntasthita iva nibhṛtaṃ kaustubho draṣṭumiccha-

-nsotthasnehānnitāntaṃ galagatagaralaṃ patyuruccaiḥ paśūnām |

prodyatpremṇā yamārdrā pibati girisutā sampadaḥ sātirekā

lokāḥ śoṇīkṛtāntā yadadharamahasā so'dharo vo vidhattām || 9 ||

atyarthaṃ rājate yā vadanaśaśadharādudgalaccāruvāṇī-

-pīyūṣāmbhaḥpravāhaprasaraparilasatphenabindvāvalīva |

deyātsā dantapaṅktiściramiha danudāyādadauvārikasya

dyutyā dīptendukundacchaviramalatarapronnatāgrā mudaṃ vaḥ || 10 ||

nyakkurvannurvarābhṛnnibhaghanasamayoddhuṣṭameghaughaghoṣaṃ

sphūrjadvārdhyutthitorudhvanitamapi parabrahmabhūto gabhīraḥ |

suvyakto vyaktamūrteḥ prakaṭitakaraṇaḥ prāṇanāthasya satyāḥ

prītyā vaḥ saṃvidadhyātphalavikalamalaṃ janma nādaḥ sa nādaḥ || 11 ||

bhāsā yasya trilokī lasati parilasatphenabindvarṇavānta-

-rvyāmagnevātigaurastulitasurasaridvāripūraprasāraḥ |

pīnātmā dantabhābhirbhṛśamahahahakārātibhīmaḥ sadeṣṭāṃ

puṣṭāṃ tuṣṭiṃ kṛṣīṣṭa sphuṭamiha bhavatāmaṭṭahāso'ṣṭamūrteḥ || 12 ||

sadyojātākhyamāpyaṃ yaduvimalamudagvarti yadvāmadevaṃ

nāmnā hemnā sadṛkṣaṃ jaladanibhamaghorāhvayaṃ dakṣiṇaṃ yat |

yadbālārkaprabhaṃ tatpuruṣanigaditaṃ pūrvamīśānasañjñaṃ

yaddivyaṃ tāni śambhorbhavadabhilaṣitaṃ pañca dadyurmukhāni || 13 ||

ātmapremṇo bhavānyā svayamiva racitāḥ sādaraṃ sāṃvananyā

maṣyā tisraḥsunīlāñjananibhagararekhāḥ samābhānti yasyām |

akalpānalpabhāsā bhṛśaruciratarā kambukalpāmbikāyāḥ

patyuḥ sātyantamantarvilasatu satataṃ mantharā kandharā vaḥ || 14 ||

vaktrendordantalakṣmyāściramadharamahākaustubhasyāpyupānte

sotthānāṃ prārthayanyaḥ sthitimacalabhuve vārayantyai niveśam |

prāyuṅktevāśiṣo yaḥ pratipadamamṛtatve sthitaḥ kālaśatroḥ

kālaṃ kurvangalaṃ vo hṛdayamayamalaṃ kṣālayetkālakūṭaḥ || 15 ||

prauḍhapremākulāyā dṛḍhataraparirambheṣu parvendumukhyāḥ

pārvatyāścārucāmīkaravalayapadairaṅkitaṃ kāntiśāli |

raṅgannāgāṅgadāḍhyaṃ satatamavihitaṃ karma nirmūlayetta-

-ddormūlaṃ nirmalaṃ yaddhṛdi duritamapāsyārjitaṃ dhūrjaṭervaḥ || 16 ||

kaṇṭhāśleṣārthamāptā diva iva kamituḥ svargasindhoḥ pravāhāḥ

krāntyai saṃsārasindhoḥ sphaṭikamaṇimahāsaṅkramākāradīrghāḥ |

tiryagviṣkambhabhūtāstribhuvanavasaterbhinnadaityebhadehā

bāhā vastā harasya drutamiha nivahānaṃhasāṃ saṃharantu || 17 ||

vakṣo dakṣadviṣo'laṃ smarabharavinamaddakṣajākṣīṇavakṣo-

-jāntarnikṣiptaśumbhanmalayajamilitodbhāsi bhasmokṣitaṃ yat |

kṣipraṃ tadrūkṣacakṣuḥ śrutigaṇaphaṇaratnaughabhābhīkṣṇaśobhaṃ

yuṣmākaṃ śaśvadenaḥ sphaṭikamaṇiśilāmaṇḍalābhaṃ kṣiṇotu || 18 ||

muktāmukte vicitrākulavalilaharījālaśālinyavāñca-

-nnābhyāvarte viloladbhujagavarayute kālaśatrorviśāle |

yuṣmaccittatridhāmā pratinavarucire mandire kāntilakṣmyāḥ

śetāṃ śītāṃśugaure cirataramudarakṣīrasindhau salīlam || 19 ||

vaiyāghrī yatra kṛttiḥ sphurati himagirervistṛtopatyakāntaḥ

sāndrāvaśyāyamiśrā parita iva vṛtā nīlajīmūtamālā |

ābaddhāhīndrakāñcīguṇamatipṛthulaṃ śailajākrīḍabhūmi-

-stadvo niḥśreyase syājjaghanamatighanaṃ bālaśītāṃśumauleḥ || 20 ||

puṣṭāvaṣṭambhabhūtau pṛthutarajaghanasyāpi nityaṃ trilokyāḥ

samyagvṛttau surendradviradavarakarodārakāntiṃ dadhānau |

sārāvūrū purāreḥ prasabhamarighaṭāghasmarau bhasmaśubhrau

bhaktairatyārdracittairadhikamavanatau vāñchitaṃ vo vidhattām || 21 ||

ānandāyendukāntopalaracitasamudgāyite ye munīnāṃ

cittādarśaṃ nidhātuṃ vidadhati caraṇe tāṇḍavākuñcanāni |

kāñcībhogīndramūrdhnāṃ pratimuhurupadhānāyamāne kṣaṇaṃ te

kānte stāmantakārerdyutivijitasudhābhānunī jānunī vaḥ || 22 ||

mañjīrībhūtabhogipravaragaṇaphaṇāmaṇḍalāntarnitānta-

-vyādīrghānargharatnadyutikisalayate stūyamāne dyusadbhiḥ |

bibhratyau vibhramaṃ vaḥ sphaṭikamaṇibṛhaddaṇḍavadbhāsite ye

jaṅghe śaṅkhenduśubhre bhṛśamiha bhavatāṃ mānase śūlapāṇeḥ || 23 ||

astokastomaśastrairapacitimamalāṃ bhūribhāvopahāraiḥ

kurvadbhiḥ sarvadoccaiḥ satatamabhivṛtau brahmaviddevalādyaiḥ |

samyaksampūjyamānāviha hṛdi sarasīvāniśaṃ yuṣmadīye

śarvasya krīḍatāṃ tau prapadavarabṛhatkacchapāvacchabhāsau || 24 ||

yāḥ svasyaikāṃśapātādatibahalagaladraktavaktraṃ praṇunna-

-prāṇaṃ prākrośayanprāṅnijamacalavaraṃ cālayantaṃ daśāsyam |

pādāṅgulyo diśantu drutamayugadṛśaḥ kalmaṣaploṣakalyāḥ

kalyāṇaṃ phullamālyaprakaravilasitā vaḥ praṇaddhāhivallyaḥ || 25 ||

prahvaprācīnabarhiḥpramukhasuravaraprasphuranmaulisakta-

-jyāyoratnotkarosrairaviratamamalā bhūrinīrājitā yā |

prodagrāgrā pradeyāttatiriva rucirā tārakāṇāṃ nitāntaṃ

nīlagrīvasya pādāmburuhavilasitā sā nakhālī sukhaṃ vaḥ || 26 ||

satyāḥ satyānanendāvapi savidhagate ye vikāsaṃ dadhāte

svānte svāṃ te labhante śriyamiha sarasīvāmarā ye dadhānāḥ |

lolaṃ lolambakānāṃ kulamiva sudhiyāṃ sevate ye sadā stāṃ

bhūtyai bhūtyaiṇapāṇervimalatararucaste padāmbhoruhe vaḥ || 27 ||

yeṣāṃ rāgādidoṣākṣatamati yatayo yānti muktiṃ prasādā-

-dye vā namrātmamūrtidyusadṛṣipariṣanmūrdhni śeṣāyamāṇāḥ |

śrīkaṇṭhasyāruṇodyaccaraṇasarasijaprotthitāste bhāvākhyā-

-tpārāvārācciraṃ vo duritahatikṛtastārayeyuḥ parāgāḥ || 28 ||

bhūmnā yasyāstasīmnā bhuvanamanusṛtaṃ yatparaṃ dhāma dhāmnāṃ

sāmnāmāmnāyatattvaṃ yadapi ca paramaṃ yadguṇātītamādyam |

yaccāṃhohannirīhaṃ gahanamiti muhuḥ prāhuruccairmahānto

māheśaṃ tanmaho me mahitamaharaharmoharohaṃ nihantu || 29 ||

iti śrīmatparamahaṃsaparivrājakācāryasya śrīgovindabhagavatpūjyapādaśiṣyasya śrīmacchaṅkarabhagavataḥ kṛtau śrī śiva keśādipādāntavarṇana stotram ||