suvakṣojakumbhāṃ sudhāpūrṇakumbhāṃ
prasādāvalambāṃ prapuṇyāvalambām |
sadāsyendubimbāṃ sadānoṣṭhabimbāṃ
bhaje śāradāmbāmajasraṃ madambām || 1 ||
kaṭākṣe dayārdrāṃ kare jñānamudrāṃ
kalābhirvinidrāṃ kalāpaiḥ subhadrām |
purastrīṃ vinidrāṃ purastuṅgabhadrāṃ
bhaje śāradāmbāmajasraṃ madambām || 2 ||
lalāmāṅkaphālāṃ lasadgānalolāṃ
svabhaktaikapālāṃ yaśaḥśrīkapolām |
kare tvakṣamālāṃ kanatpatralolāṃ
bhaje śāradāmbāmajasraṃ madambām || 3 ||
susīmantaveṇīṃ dṛśā nirjitaiṇīṃ
ramatkīravāṇīṃ namadvajrapāṇīm |
sudhāmantharāsyāṃ mudā cintyaveṇīṃ
bhaje śāradāmbāmajasraṃ madambām || 4 ||
suśāntāṃ sudehāṃ dṛgante kacāntāṃ
lasatsallatāṅgīmanantāmacintyām |
smarettāpasaiḥ sargapūrvasthitāṃ tāṃ
bhaje śāradāmbāmajasraṃ madambām || 5 ||
kuraṅge turaṅge mṛgendre khagendre
marāle madebhe mahokṣe'dhirūḍhām |
mahatyāṃ navamyāṃ sadā sāmarūpāṃ
bhaje śāradāmbāmajasraṃ madambām || 6 ||
jvalatkāntivahniṃ jaganmohanāṅgīṃ
bhaje mānasāmbhoja subhrāntabhṛṅgīm |
nijastotrasaṅgītanṛtyaprabhāṅgīṃ
bhaje śāradāmbāmajasraṃ madambām || 7 ||
bhavāmbhojanetrājasampūjyamānāṃ
lasanmandahāsaprabhāvaktracihnām |
calaccañcalācārutāṭaṅkakarṇāṃ
bhaje śāradāmbāmajasraṃ madambām || 8 ||
iti śrī śāradā bhujaṅga prayātāṣṭakam |