ත්වත්සේවෝත්කස්සෞභරිර්නාම පූර්වං
කාලින්ද්යන්තර්ද්වාදශාබ්දං තපස්යන් .
මීනව්රාතේ ස්නේහවාන් භෝගලෝලේ
තාර්ක්ෂ්යං සාක්ෂාදෛක්ෂතාග්රේ කදාචිත් ..1..
ත්වද්වාහං තං සක්ෂුධං තෘක්ෂසූනුං
මීනං කඤ්චිජ්ජක්ෂතං ලක්ෂයන් සඃ .
තප්තශ්චිත්තේ ශප්තවානත්ර චේත්ත්වං
ජන්තූන් භෝක්තා ජීවිතං චාපි මෝක්තා ..2..
තස්මින් කාලේ කාලියඃ ක්ෂ්වේලදර්පාත්
සර්පාරාතේඃ කල්පිතං භාගමශ්නන් .
තේන ක්රෝධාත්ත්වත්පදාම්භෝජභාජා
පක්ෂක්ෂිප්තස්තද්දුරාපං පයෝ(අ)ගාත් ..3..
ඝෝරේ තස්මින් සූරජානීරවාසේ
තීරේ වෘක්ෂා වික්ෂතාඃ ක්ෂ්වේලවේගාත් .
පක්ෂිව්රාතාඃ පේතුරභ්රේ පතන්තඃ
කාරුණ්යාර්ද්රං ත්වන්මනස්තේන ජාතම් ..4..
කාලේ තස්මින්නේකදා සීරපාණිං
මුක්ත්වා යාතේ යාමුනං කානනාන්තම් .
ත්වය්යුද්දාමග්රීෂ්මභීෂ්මෝෂ්මතප්තා
ගෝගෝපාලා ව්යාපිබන් ක්ෂ්වේලතෝයම් ..5..
නශ්යජ්ජීවාන් විච්යුතාන් ක්ෂ්මාතලේ තාන්
විශ්වාන් පශ්යන්නච්යුත ත්වං දයාර්ද්රඃ .
ප්රාප්යෝපාන්තං ජීවයාමාසිථ ද්රාක්
පීයූෂාම්භෝවර්ෂිභිඃ ශ්රීකටක්ෂෛඃ ..6..
කිං කිං ජාතෝ හර්ෂවර්ෂාතිරේකඃ
සර්වාඞ්ගේෂ්විත්යුත්ථිතා ගෝපසඞ්ඝාඃ .
දෘෂ්ට්වා(අ)ග්රේ ත්වාං ත්වත්කෘතං තද්විදන්ත-
ස්ත්වාමාලිඞ්ගන් දෘෂ්ටනානාප්රභාවාඃ ..7..
ගාවශ්චෛවං ලබ්ධජීවාඃ ක්ෂණේන
ස්ඵීතානන්දාස්ත්වාං ච දෘෂ්ට්වා පුරස්තාත් .
ද්රාගාවව්රුඃ සර්වතෝ හර්ෂබාෂ්පං
ව්යාමුඤ්චන්ත්යෝ මන්දමුද්යන්නිනාදාඃ ..8..
රෝමාඤ්චෝ(අ)යං සර්වතෝ නඃ ශරීරේ
භූයස්යන්තඃ කාචිදානන්දමූර්ඡා .
ආශ්චර්යෝ(අ)යං ක්ෂ්වේලවේගෝ මුකුන්දේ-
ත්යුක්තෝ ගෝපෛර්නන්දිතෝ වන්දිතෝ(අ)භූඃ ..9..
ඒවං භක්තාන් මුක්තජීවානපි ත්වං
මුග්ධාපාඞ්ගෛරස්තරෝගාංස්තනෝෂි .
තාදෘග්භූතස්ඵීතකාරුණ්යභූමා
රෝගාත් පායා වායුගේහාධිවාස ..10..
Roman (IAST) Transliteration
tvatsevotkassaubharirnāma pūrvaṃ
kālindyantardvādaśābdaṃ tapasyan |
mīnavrāte snehavān bhogalole
tārkṣyaṃ sākṣādaikṣatāgre kadācit ||1||
tvadvāhaṃ taṃ sakṣudhaṃ tṛkṣasūnuṃ
mīnaṃ kañcijjakṣataṃ lakṣayan saḥ |
taptaścitte śaptavānatra cettvaṃ
jantūn bhoktā jīvitaṃ cāpi moktā ||2||
tasmin kāle kāliyaḥ kṣveladarpāt
sarpārāteḥ kalpitaṃ bhāgamaśnan |
tena krodhāttvatpadāmbhojabhājā
pakṣakṣiptastaddurāpaṃ payo'gāt ||3||
ghore tasmin sūrajānīravāse
tīre vṛkṣā vikṣatāḥ kṣvelavegāt |
pakṣivrātāḥ peturabhre patantaḥ
kāruṇyārdraṃ tvanmanastena jātam ||4||
kāle tasminnekadā sīrapāṇiṃ
muktvā yāte yāmunaṃ kānanāntam |
tvayyuddāmagrīṣmabhīṣmoṣmataptā
gogopālā vyāpiban kṣvelatoyam ||5||
naśyajjīvān vicyutān kṣmātale tān
viśvān paśyannacyuta tvaṃ dayārdraḥ |
prāpyopāntaṃ jīvayāmāsitha drāk
pīyūṣāmbhovarṣibhiḥ śrīkaṭakṣaiḥ ||6||
kiṃ kiṃ jāto harṣavarṣātirekaḥ
sarvāṅgeṣvityutthitā gopasaṅghāḥ |
dṛṣṭvā'gre tvāṃ tvatkṛtaṃ tadvidanta-
stvāmāliṅgan dṛṣṭanānāprabhāvāḥ ||7||
gāvaścaivaṃ labdhajīvāḥ kṣaṇena
sphītānandāstvāṃ ca dṛṣṭvā purastāt |
drāgāvavruḥ sarvato harṣabāṣpaṃ
vyāmuñcantyo mandamudyanninādāḥ ||8||
romāñco'yaṃ sarvato naḥ śarīre
bhūyasyantaḥ kācidānandamūrchā |
āścaryo'yaṃ kṣvelavego mukunde-
tyukto gopairnandito vandito'bhūḥ ||9||
evaṃ bhaktān muktajīvānapi tvaṃ
mugdhāpāṅgairastarogāṃstanoṣi |
tādṛgbhūtasphītakāruṇyabhūmā
rogāt pāyā vāyugehādhivāsa ||10||