prītyā daityastava tanumahaḥprekṣaṇāt sarvathā'pi
tvāmārādhyannajita racayannañjaliṃ sañjagāda |
mattaḥ kiṃ te samabhilaṣitaṃ viprasūno vada tvaṃ
vittaṃ bhaktaṃ bhavanamavanīṃ vā'pi sarvaṃ pradāsye ||1||
tāmīkṣaṇāṃ baligiramupākarṇya kāruṇyapūrṇo'-
pyasyotsekaṃ śamayitumanā daityavaṃśaṃ praśaṃsan |
bhūmiṃ pādatrayaparimitāṃ prārthayāmāsitha tvaṃ
sarvaṃ dehīti tu nigadite kasya hāsyaṃ na vā syāt ||2||
viśveśaṃ māṃ tripadamiha kiṃ yācase bāliśastvaṃ
sarvāṃ bhūmiṃ vṛṇu kimamunetyālapattvāṃ sa dṛpyan |
yasmāddarpāt tripadaparipūrtyakṣamaḥ kṣepavādān
bandhaṃ cāsāvagamadatadarho'pi gāḍhopaśāntyai ||3||
pādatrayyā yadi na mudito viṣṭapairnāpi tuṣye-
dityukte'smin varada bhavate dātukāme'tha toyam |
daityācāryastava khalu parīkṣārthinaḥ preraṇāttaṃ
mā mā deyaṃ harirayamiti vyaktamevābabhāṣe ||4||
yācatyevaṃ yadi sa bhagavān pūrṇakāmo'smi so'haṃ
dāsyāmyeva sthiramiti vadan kāvyaśapto'pi daityaḥ |
vindhyāvalyā nijadayitayā dattapādyāya tubhyaṃ
citraṃ citraṃ sakalamapi sa prārpayattoyapūrvam ||5||
nissandehaṃ ditikulapatau tvayyaśeṣārpaṇaṃ tad-
vyātanvāne mumucuḥ-ṛṣayaḥ sāmarāḥ puṣpavarṣam |
divyaṃ rūpaṃ tava ca tadidaṃ paśyatāṃ viśvabhājā-
muccairuccairavṛdhadavadhīkṛtya viśvāṇḍabhāṇḍam ||6||
tvatpādāgraṃ nijapadagataṃ puṇḍarīkodbhavo'sau
kuṇḍītoyairasicadapunādyajjalaṃ viśvalokān |
harṣotkarṣāt subahu nanṛte khecarairutsave'smin
bherīṃ nighnan bhuvanamacarajjāmbavān bhaktiśālī ||7||
tāvaddaityāstvanumatimṛte bharturārabdhayuddhā
devopetairbhavadanucaraissaṅgatā bhaṅgamāpan |
kālātmā'yaṃ vasati purato yadvaśāt prāgjitāḥ smaḥ
kiṃ vo yuddhairiti baligirā te'tha pātālamāpuḥ ||8||
pāśairbaddhaṃ patagapatinā daityamuccairavādī-
stārttīyīkaṃ diśa mama padaṃ kiṃ na viśveśvaro'si |
pādaṃ mūrdhni praṇaya bhagavannityakampaṃ vadantaṃ
prahlādstaṃ svayamupagato mānayannastavīttvām ||9||
darpocchittyai vihitamakhilaṃ daitya siddho'si puṇyai-
rlokaste'stu tridivavijayī vāsavatvaṃ ca paścāt |
matsāyujyaṃ bhaja ca punarityanvagṛhṇā baliṃ taṃ
vipraissantānitamakhavaraḥ pāhi vātālayeśa ||10||