Manidvipa Varnana - 3 (devi Bhagavatam)

ॐ

මණිද්වීප වර්ණන - 3 (දේවී භාගවතම්)

Devi Vyasa Sinhala

(ශ්රීදේවීභාගවතං, ද්වාදශ ස්කන්ධං, ද්වාදශෝ(අ)ධ්යායඃ, මණිද්වීප වර්ණන - 3)

ව්යාස උවාච .

තදේව දේවීසදනං මධ්යභාගේ විරාජතේ .

සහස්ර ස්තම්භසංයුක්තාශ්චත්වාරස්තේෂු මණ්ඩපාඃ .. 1 ..

ශෘඞ්ගාරමණ්ඩපශ්චෛකෝ මුක්තිමණ්ඩප ඒව ච .

ජ්ඤානමණ්ඩප සඤ්ජ්ඤස්තු තෘතීයඃ පරිකීර්තිතඃ .. 2 ..

ඒකාන්තමණ්ඩපශ්චෛව චතුර්ථඃ පරිකීර්තිතඃ .

නානා විතානසංයුක්තා නානා ධූපෛස්තු ධූපිතාඃ .. 3 ..

කෝටිසූර්යසමාඃ කාන්ත්යා භ්රාඤ්ජන්තේ මණ්ඩපාඃ ශුභාඃ .

තන්මණ්ඩපානාං පරිතඃ කාශ්මීරවනිකා ස්මෘතා .. 4 ..

මල්ලිකාකුන්දවනිකා යත්ර පුෂ්කලකාඃ ස්ථිතාඃ .

අසඞ්ඛ්යාතා මෘගමදෛඃ පූරිතාස්තත්ස්රවා නෘප .. 5 ..

මහාපද්මාටවී තද්වද්රත්නසෝපානනිර්මිතා .

සුධාරසේනසම්පූර්ණා ගුඤ්ජන්මත්තමධුව්රතා .. 6 ..

හංසකාරණ්ඩවාකීර්ණා ගන්ධපූරිත දික්තටා .

වනිකානාං සුගන්ධෛස්තු මණිද්වීපං සුවාසිතම් .. 7 ..

ශෘඞ්ගාරමණ්ඩපේ දේව්යෝ ගායන්ති විවිධෛඃ ස්වරෛඃ .

සභාසදෝ දේවවශා මධ්යේ ශ්රීජගදම්බිකා .. 8 ..

මුක්තිමණ්ඩපමධ්යේ තු මෝචයත්යනිශං ශිවා .

ජ්ඤානෝපදේශං කුරුතේ තෘතීයේ නෘප මණ්ඩපේ .. 9 ..

චතුර්ථමණ්ඩපේ චෛව ජගද්රක්ෂා විචින්තනම් .

මන්ත්රිණී සහිතා නිත්යං කරෝති ජගදම්බිකා .. 10 ..

චින්තාමණිගෘහේ රාජඤ්ඡක්ති තත්ත්වාත්මකෛඃ පරෛඃ .

සෝපානෛර්දශභිර්යුක්තෝ මඤ්චකෝප්යධිරාජතේ .. 11 ..

බ්රහ්මා විෂ්ණුශ්ච රුද්රශ්ච ඊශ්වරශ්ච සදාශිවඃ .

ඒතේ මඤ්චඛුරාඃ ප්රෝක්තාඃ ඵලකස්තු සදාශිවඃ .. 12 ..

තස්යෝපරි මහාදේවෝ භුවනේශෝ විරාජතේ .

යා දේවී නිජලීලාර්ථං ද්විධාභූතා බභූවහ .. 13 ..

සෘෂ්ට්යාදෞ තු ස ඒවායං තදර්ධාඞ්ගෝ මහේශ්වරඃ .

කන්දර්ප දර්පනාශෝද්යත්කෝටි කන්දර්පසුන්දරඃ .. 14 ..

පඤ්චවක්ත්රස්ත්රිනේත්රශ්ච මණිභූෂණ භූෂිතඃ .

හරිණාභීතිපරශූන්වරං ච නිජබාහුභිඃ .. 15 ..

දධානඃ ෂෝඩශාබ්දෝ(අ)සෞ දේවඃ සර්වේශ්වරෝ මහාන් .

කෝටිසූර්ය ප්රතීකාශශ්චන්ද්රකෝටි සුශීතලඃ .. 16 ..

ශුද්ධස්ඵටික සඞ්කාශස්ත්රිනේත්රඃ ශීතල ද්යුතිඃ .

වාමාඞ්කේ සන්නිෂණ්ණා(අ)ස්ය දේවී ශ්රීභුවනේශ්වරී .. 17 ..

නවරත්නගණාකීර්ණ කාඤ්චීදාම විරාජිතා .

තප්තකාඤ්චනසන්නද්ධ වෛදූර්යාඞ්ගදභූෂණා .. 18 ..

කනච්ඡ්රීචක්රතාටඞ්ක විටඞ්ක වදනාම්බුජා .

ලලාටකාන්ති විභව විජිතාර්ධසුධාකරා .. 19 ..

බිම්බකාන්ති තිරස්කාරිරදච්ඡද විරාජිතා .

ලසත්කුඞ්කුමකස්තූරීතිලකෝද්භාසිතානනා .. 20 ..

දිව්ය චූඩාමණි ස්ඵාර චඤ්චච්චන්ද්රකසූර්යකා .

උද්යත්කවිසමස්වච්ඡ නාසාභරණ භාසුරා .. 21 ..

චින්තාකලම්බිතස්වච්ඡ මුක්තාගුච්ඡ විරාජිතා .

පාටීර පඞ්ක කර්පූර කුඞ්කුමාලඞ්කෘත ස්තනී .. 22 ..

විචිත්ර විවිධා කල්පා කම්බුසඞ්කාශ කන්ධරා .

දාඩිමීඵලබීජාභ දන්තපඞ්ක්ති විරාජිතා .. 23 ..

අනර්ඝ්ය රත්නඝටිත මුකුටාඤ්චිත මස්තකා .

මත්තාලිමාලාවිලසදලකාඪ්ය මුඛාම්බුජා .. 24 ..

කලඞ්කකාර්ශ්යනිර්මුක්ත ශරච්චන්ද්රනිභානනා .

ජාහ්නවීසලිලාවර්ත ශෝභිනාභිවිභූෂිතා .. 25 ..

මාණික්ය ශකලාබද්ධ මුද්රිකාඞ්ගුලිභූෂිතා .

පුණ්ඩරීකදලාකාර නයනත්රයසුන්දරී .. 26 ..

කල්පිතාච්ඡ මහාරාග පද්මරාගෝජ්ජ්වලප්රභා .

රත්නකිඞ්කිණිකායුක්ත රත්නකඞ්කණශෝභිතා .. 27 ..

මණිමුක්තාසරාපාර ලසත්පදකසන්තතිඃ .

රත්නාඞ්ගුලිප්රවිතත ප්රභාජාලලසත්කරා .. 28 ..

කඤ්චුකීගුම්ඵිතාපාර නානා රත්නතතිද්යුතිඃ .

මල්ලිකාමෝදි ධම්මිල්ල මල්ලිකාලිසරාවෘතා .. 29 ..

සුවෘත්තනිබිඩෝත්තුඞ්ග කුචභාරාලසා ශිවා .

වරපාශාඞ්කුශාභීති ලසද්බාහු චතුෂ්ටයා .. 30 ..

සර්වශෘඞ්ගාරවේෂාඪ්යා සුකුමාරාඞ්ගවල්ලරී .

සෞන්දර්යධාරාසර්වස්වා නිර්ව්යාජකරුණාමයී .. 31 ..

නිජසංලාපමාධුර්ය විනිර්භර්ත්සිතකච්ඡපී .

කෝටිකෝටිරවීන්දූනාං කාන්තිං යා බිභ්රතී පරා .. 32 ..

නානා සඛීභිර්දාසීභිස්තථා දේවාඞ්ගනාදිභිඃ .

සර්වාභිර්දේවතාභිස්තු සමන්තාත්පරිවේෂ්ටිතා .. 33 ..

ඉච්ඡාශක්ත්යා ජ්ඤානශක්ත්යා ක්රියාශක්ත්යා සමන්විතා .

ලජ්ජා තුෂ්ටිස්තථා පුෂ්ටිඃ කීර්තිඃ කාන්තිඃ ක්ෂමා දයා .. 34 ..

බුද්ධිර්මේධාස්මෘතිර්ලක්ෂ්මීර්මූර්තිමත්යෝඞ්ගනාඃ ස්මෘතාඃ .

ජයා ච විජයා චෛවාප්යජිතා චාපරාජිතා .. 35 ..

නිත්යා විලාසිනී දෝග්ධ්රී ත්වඝෝරා මඞ්ගලා නවා .

පීඨශක්තය ඒතාස්තු සේවන්තේ යාං පරාම්බිකාම් .. 36 ..

යස්යාස්තු පාර්ශ්වභාගේස්තෝනිධීතෞ ශඞ්ඛපද්මකෞ .

නවරත්න වහානද්යස්තථා වෛ කාඤ්චනස්රවාඃ .. 37 ..

සප්තධාතුවහානද්යෝ නිධිභ්යාං තු විනිර්ගතාඃ .

සුධාසින්ධ්වන්තගාමින්යස්තාඃ සර්වා නෘපසත්තම .. 38 ..

සා දේවී භුවනේශානී තද්වාමාඞ්කේ විරාජතේ .

සර්වේශ ත්වං මහේශස්ය යත්සඞ්ගා දේව නාන්යථා .. 39 ..

චින්තාමණි ගෘහස්යා(අ)ස්ය ප්රමාණං ශෘණු භූමිප .

සහස්රයෝජනායාමං මහාන්තස්තත්ප්රචක්ෂතේ .. 40 ..

තදුත්තරේ මහාශාලාඃ පූර්වස්මාද් ද්විගුණාඃ ස්මෘතාඃ .

අන්තරික්ෂගතං ත්වේතන්නිරාධාරං විරාජතේ .. 41 ..

සඞ්කෝචශ්ච විකාශශ්ච ජායතේ(අ)ස්ය නිරන්තරම් .

පටවත්කාර්යවශතඃ ප්රලයේ සර්ජනේ තථා .. 42 ..

ශාලානාං චෛව සර්වේෂාං සර්වකාන්තිපරාවධි .

චින්තාමණිගෘහං ප්රෝක්තං යත්ර දේවී මහෝමයී .. 43 ..

යේයේ උපාසකාඃ සන්ති ප්රතිබ්රහ්මාණ්ඩවර්තිනඃ .

දේවේෂු නාගලෝකේෂු මනුෂ්යේෂ්විතරේෂු ච .. 44 ..

ශ්රීදේව්යාස්තේ ච සර්වේපි ව්රජන්ත්යත්රෛව භූමිප .

දේවීක්ෂේත්රේ යේ ත්යජන්ති ප්රාණාන්දේව්යර්චනේ රතාඃ .. 45 ..

තේ සර්වේ යාන්ති තත්රෛව යත්ර දේවී මහෝත්සවා .

ඝෘතකුල්යා දුග්ධකුල්යා දධිකුල්යා මධුස්රවාඃ .. 46 ..

ස්යන්දන්ති සරිතඃ සර්වාස්තථාමෘතවහාඃ පරාඃ .

ද්රාක්ෂාරසවහාඃ කාශ්චිජ්ජම්බූරසවහාඃ පරාඃ .. 47 ..

ආම්රේක්ෂුරසවාහින්යෝ නද්යස්තාස්තු සහස්රශඃ .

මනෝරථඵලාවෘක්ෂාවාප්යඃ කූපාස්තථෛව ච .. 48 ..

යථේෂ්ටපානඵලදාන න්යූනං කිඤ්චිදස්ති හි .

න රෝගපලිතං වාපි ජරා වාපි කදාචන .. 49 ..

න චින්තා න ච මාත්සර්යං කාමක්රෝධාදිකං තථා .

සර්වේ යුවානඃ සස්ත්රීකාඃ සහස්රාදිත්යවර්චසඃ .. 50 ..

භජන්ති සතතං දේවීං තත්ර ශ්රීභුවනේශ්වරීම් .

කේචිත්සලෝකතාපන්නාඃ කේචිත්සාමීප්යතාං ගතාඃ .. 51 ..

සරූපතාං ගතාඃ කේචිත්සාර්ෂ්ටිතාං ච පරේගතාඃ .

යායාස්තු දේවතාස්තත්ර ප්රතිබ්රහ්මාණ්ඩවර්තිනාම් .. 52 ..

සමෂ්ටයඃ ස්ථිතාස්තාස්තු සේවන්තේ ජගදීශ්වරීම් .

සප්තකෝටිමහාමන්ත්රා මූර්තිමන්ත උපාසතේ .. 53 ..

මහාවිද්යාශ්ච සකලාඃ සාම්යාවස්ථාත්මිකාං ශිවාම් .

කාරණබ්රහ්මරූපාං තාං මායා ශබලවිග්රහාම් .. 54 ..

ඉත්ථං රාජන්මයා ප්රෝක්තං මණිද්වීපං මහත්තරම් .

න සූර්යචන්ද්රෞ නෝ විද්යුත්කෝටයෝග්නිස්තථෛව ච .. 55 ..

ඒතස්ය භාසා කෝට්යංශ කෝට්යංශෝ නාපි තේ සමාඃ .

ක්වචිද්විද්රුමසඞ්කාශං ක්වචින්මරකතච්ඡවි .. 56 ..

විද්යුද්භානුසමච්ඡායං මධ්යසූර්යසමං ක්වචිත් .

විද්යුත්කෝටිමහාධාරා සාරකාන්තිතතං ක්වචිත් .. 57 ..

ක්වචිත්සින්දූර නීලේන්ද්රං මාණික්ය සදෘශච්ඡවි .

හීරසාර මහාගර්භ ධගද්ධගිත දික්තටම් .. 58 ..

කාන්ත්යා දාවානලසමං තප්තකාඤ්චන සන්නිභම් .

ක්වචිච්චන්ද්රෝපලෝද්ගාරං සූර්යෝද්ගාරං ච කුත්ර චිත් .. 59 ..

රත්නශෘඞ්ගි සමායුක්තං රත්නප්රාකාර ගෝපුරම් .

රත්නපත්රෛ රත්නඵලෛර්වෘක්ෂෛශ්ච පරිමණ්ඩිතම් .. 60 ..

නෘත්යන්මයූරසඞ්ඝෛශ්ච කපෝතරණිතෝජ්ජ්වලම් .

කෝකිලාකාකලීලාපෛඃ ශුකලාපෛශ්ච ශෝභිතම් .. 61 ..

සුරම්ය රමණීයාම්බු ලක්ෂාවධි සරෝවෘතම් .

තන්මධ්යභාග විලසද්විකචද්රත්න පඞ්කජෛඃ .. 62 ..

සුගන්ධිභිඃ සමන්තාත්තු වාසිතං ශතයෝජනම් .

මන්දමාරුත සම්භින්න චලද්ද්රුම සමාකුලම් .. 63 ..

චින්තාමණි සමූහානාං ජ්යෝතිෂා විතතාම්බරම් .

රත්නප්රභාභිරභිතෝ ධගද්ධගිත දික්තටම් .. 64 ..

වෘක්ෂව්රාත මහාගන්ධවාතව්රාත සුපූරිතම් .

ධූපධූපායිතං රාජන්මණිදීපායුතෝජ්ජ්වලම් .. 65 ..

මණිජාලක සච්ඡිද්ර තරලෝදරකාන්තිභිඃ .

දිඞ්මෝහජනකං චෛතද්දර්පණෝදර සංයුතම් .. 66 ..

ඓශ්වර්යස්ය සමග්රස්ය ශෘඞ්ගාරස්යාඛිලස්ය ච .

සර්වජ්ඤතායාඃ සර්වායාස්තේජසශ්චාඛිලස්ය ච .. 67 ..

පරාක්රමස්ය සර්වස්ය සර්වෝත්තමගුණස්ය ච .

සකලා යා දයායාශ්ච සමාප්තිරිහ භූපතේ .. 68 ..

රාජ්ඤ ආනන්දමාරභ්ය බ්රහ්මලෝකාන්ත භූමිෂු .

ආනන්දා යේ ස්ථිතාඃ සර්වේ තේ(අ)ත්රෛවාන්තර්භවන්ති හි .. 69 ..

ඉති තේ වර්ණිතං රාජන්මණිද්වීපං මහත්තරම් .

මහාදේව්යාඃ පරංස්ථානං සර්වලෝකෝත්තමෝත්තමම් .. 70 ..

ඒතස්ය ස්මරණාත්සද්යඃ සර්වපාපං විනශ්යති .

ප්රාණෝත්ක්රමණසන්ධෞ තු ස්මෘත්වා තත්රෛව ගච්ඡති .. 71 ..

අධ්යාය පඤ්චකං ත්වේතත්පඨේන්නිත්යං සමාහිතඃ .

භූතප්රේතපිශාචාදි බාධා තත්ර භවේන්න හි .. 72 ..

නවීන ගෘහ නිර්මාණේ වාස්තුයාගේ තථෛව ච .

පඨිතව්යං ප්රයත්නේන කල්යාණං තේන ජායතේ .. 73 ..

ඉති ශ්රීදේවීභාගවතේ මහාපුරාණේ ද්වාදශස්කන්ධේ ද්වාදශෝධ්යායඃ ..

Roman (IAST) Transliteration

(śrīdevībhāgavataṃ, dvādaśa skandhaṃ, dvādaśo'dhyāyaḥ, maṇidvīpa varṇana - 3)

vyāsa uvāca |

tadeva devīsadanaṃ madhyabhāge virājate |

sahasra stambhasaṃyuktāścatvārasteṣu maṇḍapāḥ || 1 ||

śṛṅgāramaṇḍapaścaiko muktimaṇḍapa eva ca |

jñānamaṇḍapa sañjñastu tṛtīyaḥ parikīrtitaḥ || 2 ||

ekāntamaṇḍapaścaiva caturthaḥ parikīrtitaḥ |

nānā vitānasaṃyuktā nānā dhūpaistu dhūpitāḥ || 3 ||

koṭisūryasamāḥ kāntyā bhrāñjante maṇḍapāḥ śubhāḥ |

tanmaṇḍapānāṃ paritaḥ kāśmīravanikā smṛtā || 4 ||

mallikākundavanikā yatra puṣkalakāḥ sthitāḥ |

asaṅkhyātā mṛgamadaiḥ pūritāstatsravā nṛpa || 5 ||

mahāpadmāṭavī tadvadratnasopānanirmitā |

sudhārasenasampūrṇā guñjanmattamadhuvratā || 6 ||

haṃsakāraṇḍavākīrṇā gandhapūrita diktaṭā |

vanikānāṃ sugandhaistu maṇidvīpaṃ suvāsitam || 7 ||

śṛṅgāramaṇḍape devyo gāyanti vividhaiḥ svaraiḥ |

sabhāsado devavaśā madhye śrījagadambikā || 8 ||

muktimaṇḍapamadhye tu mocayatyaniśaṃ śivā |

jñānopadeśaṃ kurute tṛtīye nṛpa maṇḍape || 9 ||

caturthamaṇḍape caiva jagadrakṣā vicintanam |

mantriṇī sahitā nityaṃ karoti jagadambikā || 10 ||

cintāmaṇigṛhe rājañchakti tattvātmakaiḥ paraiḥ |

sopānairdaśabhiryukto mañcakopyadhirājate || 11 ||

brahmā viṣṇuśca rudraśca īśvaraśca sadāśivaḥ |

ete mañcakhurāḥ proktāḥ phalakastu sadāśivaḥ || 12 ||

tasyopari mahādevo bhuvaneśo virājate |

yā devī nijalīlārthaṃ dvidhābhūtā babhūvaha || 13 ||

sṛṣṭyādau tu sa evāyaṃ tadardhāṅgo maheśvaraḥ |

kandarpa darpanāśodyatkoṭi kandarpasundaraḥ || 14 ||

pañcavaktrastrinetraśca maṇibhūṣaṇa bhūṣitaḥ |

hariṇābhītiparaśūnvaraṃ ca nijabāhubhiḥ || 15 ||

dadhānaḥ ṣoḍaśābdo'sau devaḥ sarveśvaro mahān |

koṭisūrya pratīkāśaścandrakoṭi suśītalaḥ || 16 ||

śuddhasphaṭika saṅkāśastrinetraḥ śītala dyutiḥ |

vāmāṅke sanniṣaṇṇā'sya devī śrībhuvaneśvarī || 17 ||

navaratnagaṇākīrṇa kāñcīdāma virājitā |

taptakāñcanasannaddha vaidūryāṅgadabhūṣaṇā || 18 ||

kanacchrīcakratāṭaṅka viṭaṅka vadanāmbujā |

lalāṭakānti vibhava vijitārdhasudhākarā || 19 ||

bimbakānti tiraskāriradacchada virājitā |

lasatkuṅkumakastūrītilakodbhāsitānanā || 20 ||

divya cūḍāmaṇi sphāra cañcaccandrakasūryakā |

udyatkavisamasvaccha nāsābharaṇa bhāsurā || 21 ||

cintākalambitasvaccha muktāguccha virājitā |

pāṭīra paṅka karpūra kuṅkumālaṅkṛta stanī || 22 ||

vicitra vividhā kalpā kambusaṅkāśa kandharā |

dāḍimīphalabījābha dantapaṅkti virājitā || 23 ||

anarghya ratnaghaṭita mukuṭāñcita mastakā |

mattālimālāvilasadalakāḍhya mukhāmbujā || 24 ||

kalaṅkakārśyanirmukta śaraccandranibhānanā |

jāhnavīsalilāvarta śobhinābhivibhūṣitā || 25 ||

māṇikya śakalābaddha mudrikāṅgulibhūṣitā |

puṇḍarīkadalākāra nayanatrayasundarī || 26 ||

kalpitāccha mahārāga padmarāgojjvalaprabhā |

ratnakiṅkiṇikāyukta ratnakaṅkaṇaśobhitā || 27 ||

maṇimuktāsarāpāra lasatpadakasantatiḥ |

ratnāṅgulipravitata prabhājālalasatkarā || 28 ||

kañcukīgumphitāpāra nānā ratnatatidyutiḥ |

mallikāmodi dhammilla mallikālisarāvṛtā || 29 ||

suvṛttanibiḍottuṅga kucabhārālasā śivā |

varapāśāṅkuśābhīti lasadbāhu catuṣṭayā || 30 ||

sarvaśṛṅgāraveṣāḍhyā sukumārāṅgavallarī |

saundaryadhārāsarvasvā nirvyājakaruṇāmayī || 31 ||

nijasaṃlāpamādhurya vinirbhartsitakacchapī |

koṭikoṭiravīndūnāṃ kāntiṃ yā bibhratī parā || 32 ||

nānā sakhībhirdāsībhistathā devāṅganādibhiḥ |

sarvābhirdevatābhistu samantātpariveṣṭitā || 33 ||

icchāśaktyā jñānaśaktyā kriyāśaktyā samanvitā |

lajjā tuṣṭistathā puṣṭiḥ kīrtiḥ kāntiḥ kṣamā dayā || 34 ||

buddhirmedhāsmṛtirlakṣmīrmūrtimatyoṅganāḥ smṛtāḥ |

jayā ca vijayā caivāpyajitā cāparājitā || 35 ||

nityā vilāsinī dogdhrī tvaghorā maṅgalā navā |

pīṭhaśaktaya etāstu sevante yāṃ parāmbikām || 36 ||

yasyāstu pārśvabhāgestonidhītau śaṅkhapadmakau |

navaratna vahānadyastathā vai kāñcanasravāḥ || 37 ||

saptadhātuvahānadyo nidhibhyāṃ tu vinirgatāḥ |

sudhāsindhvantagāminyastāḥ sarvā nṛpasattama || 38 ||

sā devī bhuvaneśānī tadvāmāṅke virājate |

sarveśa tvaṃ maheśasya yatsaṅgā deva nānyathā || 39 ||

cintāmaṇi gṛhasyā'sya pramāṇaṃ śṛṇu bhūmipa |

sahasrayojanāyāmaṃ mahāntastatpracakṣate || 40 ||

taduttare mahāśālāḥ pūrvasmād dviguṇāḥ smṛtāḥ |

antarikṣagataṃ tvetannirādhāraṃ virājate || 41 ||

saṅkocaśca vikāśaśca jāyate'sya nirantaram |

paṭavatkāryavaśataḥ pralaye sarjane tathā || 42 ||

śālānāṃ caiva sarveṣāṃ sarvakāntiparāvadhi |

cintāmaṇigṛhaṃ proktaṃ yatra devī mahomayī || 43 ||

yeye upāsakāḥ santi pratibrahmāṇḍavartinaḥ |

deveṣu nāgalokeṣu manuṣyeṣvitareṣu ca || 44 ||

śrīdevyāste ca sarvepi vrajantyatraiva bhūmipa |

devīkṣetre ye tyajanti prāṇāndevyarcane ratāḥ || 45 ||

te sarve yānti tatraiva yatra devī mahotsavā |

ghṛtakulyā dugdhakulyā dadhikulyā madhusravāḥ || 46 ||

syandanti saritaḥ sarvāstathāmṛtavahāḥ parāḥ |

drākṣārasavahāḥ kāścijjambūrasavahāḥ parāḥ || 47 ||

āmrekṣurasavāhinyo nadyastāstu sahasraśaḥ |

manorathaphalāvṛkṣāvāpyaḥ kūpāstathaiva ca || 48 ||

yatheṣṭapānaphaladāna nyūnaṃ kiñcidasti hi |

na rogapalitaṃ vāpi jarā vāpi kadācana || 49 ||

na cintā na ca mātsaryaṃ kāmakrodhādikaṃ tathā |

sarve yuvānaḥ sastrīkāḥ sahasrādityavarcasaḥ || 50 ||

bhajanti satataṃ devīṃ tatra śrībhuvaneśvarīm |

kecitsalokatāpannāḥ kecitsāmīpyatāṃ gatāḥ || 51 ||

sarūpatāṃ gatāḥ kecitsārṣṭitāṃ ca paregatāḥ |

yāyāstu devatāstatra pratibrahmāṇḍavartinām || 52 ||

samaṣṭayaḥ sthitāstāstu sevante jagadīśvarīm |

saptakoṭimahāmantrā mūrtimanta upāsate || 53 ||

mahāvidyāśca sakalāḥ sāmyāvasthātmikāṃ śivām |

kāraṇabrahmarūpāṃ tāṃ māyā śabalavigrahām || 54 ||

itthaṃ rājanmayā proktaṃ maṇidvīpaṃ mahattaram |

na sūryacandrau no vidyutkoṭayognistathaiva ca || 55 ||

etasya bhāsā koṭyaṃśa koṭyaṃśo nāpi te samāḥ |

kvacidvidrumasaṅkāśaṃ kvacinmarakatacchavi || 56 ||

vidyudbhānusamacchāyaṃ madhyasūryasamaṃ kvacit |

vidyutkoṭimahādhārā sārakāntitataṃ kvacit || 57 ||

kvacitsindūra nīlendraṃ māṇikya sadṛśacchavi |

hīrasāra mahāgarbha dhagaddhagita diktaṭam || 58 ||

kāntyā dāvānalasamaṃ taptakāñcana sannibham |

kvaciccandropalodgāraṃ sūryodgāraṃ ca kutra cit || 59 ||

ratnaśṛṅgi samāyuktaṃ ratnaprākāra gopuram |

ratnapatrai ratnaphalairvṛkṣaiśca parimaṇḍitam || 60 ||

nṛtyanmayūrasaṅghaiśca kapotaraṇitojjvalam |

kokilākākalīlāpaiḥ śukalāpaiśca śobhitam || 61 ||

suramya ramaṇīyāmbu lakṣāvadhi sarovṛtam |

tanmadhyabhāga vilasadvikacadratna paṅkajaiḥ || 62 ||

sugandhibhiḥ samantāttu vāsitaṃ śatayojanam |

mandamāruta sambhinna caladdruma samākulam || 63 ||

cintāmaṇi samūhānāṃ jyotiṣā vitatāmbaram |

ratnaprabhābhirabhito dhagaddhagita diktaṭam || 64 ||

vṛkṣavrāta mahāgandhavātavrāta supūritam |

dhūpadhūpāyitaṃ rājanmaṇidīpāyutojjvalam || 65 ||

maṇijālaka sacchidra taralodarakāntibhiḥ |

diṅmohajanakaṃ caitaddarpaṇodara saṃyutam || 66 ||

aiśvaryasya samagrasya śṛṅgārasyākhilasya ca |

sarvajñatāyāḥ sarvāyāstejasaścākhilasya ca || 67 ||

parākramasya sarvasya sarvottamaguṇasya ca |

sakalā yā dayāyāśca samāptiriha bhūpate || 68 ||

rājña ānandamārabhya brahmalokānta bhūmiṣu |

ānandā ye sthitāḥ sarve te'traivāntarbhavanti hi || 69 ||

iti te varṇitaṃ rājanmaṇidvīpaṃ mahattaram |

mahādevyāḥ paraṃsthānaṃ sarvalokottamottamam || 70 ||

etasya smaraṇātsadyaḥ sarvapāpaṃ vinaśyati |

prāṇotkramaṇasandhau tu smṛtvā tatraiva gacchati || 71 ||

adhyāya pañcakaṃ tvetatpaṭhennityaṃ samāhitaḥ |

bhūtapretapiśācādi bādhā tatra bhavenna hi || 72 ||

navīna gṛha nirmāṇe vāstuyāge tathaiva ca |

paṭhitavyaṃ prayatnena kalyāṇaṃ tena jāyate || 73 ||

iti śrīdevībhāgavate mahāpurāṇe dvādaśaskandhe dvādaśodhyāyaḥ ||