|| aṣṭamaḥ sargaḥ ||
|| vilakṣyalakṣmīpatiḥ ||
atha kathamapi yāminīṃ vinīya smaraśarajarjaritāpi sā prabhāte |
anunayavacanaṃ vadantamagre praṇatamapi priyamāha sābhyasūyam || 49 ||
|| gītaṃ 17 ||
rajanijanitagurujāgararāgakaṣāyitamalasaniveśam |
vahati nayanamanurāgamiva sphuṭamuditarasābhiniveśam ||
harihari yāhi mādhava yāhi keśava mā vada kaitavavādaṃ tāmanusara sarasīruhalocana yā tava harati viṣādam || 50 ||
kajjalamalinavilocanacumbanaviracitanīlimarūpam |
daśanavasanamaruṇaṃ tava kṛṣṇa tanoti tanoranurūpam || 2 ||
vapuranuharati tava smarasaṅgarakharanakharakṣatarekham |
marakataśakalakalitakaladhautalipireva ratijayalekham || 3 ||
caraṇakamalagaladalaktakasiktamidaṃ tava hṛdayamudāram |
darśayatīva bahirmadanadrumanavakisalayaparivāram || 4 ||
daśanapadaṃ bhavadadharagataṃ mama janayati cetasi khedam |
kathayati kathamadhunāpi mayā saha tava vapuretadabhedam || 5 ||
bahiriva malinataraṃ tava kṛṣṇa mano'pi bhaviṣyati nūnam |
kathamatha vañcayase janamanugatamasamaśarajvaradūnam || 6 ||
bhramati bhavānabalākavalāya vaneṣu kimatra vicitram |
prathayati pūtanikaiva vadhūvadhanirdayabālacaritram || 7 ||
śrījayadevabhaṇitarativañcitakhaṇḍitayuvativilāpam |
śṛṇuta sudhāmadhuraṃ vibudhā vibudhālayato'pi durāpam || 8 ||
tadevaṃ paśyantyāḥ prasaradanurāgaṃ bahiriva priyāpādālaktacchuritamaruṇacchāyahṛdayam |
mamādya prakhyātapraṇayabharabhaṅgena kitava tvadālokaḥ śokādapi kimapi lajjāṃ janayati || 50 ||
|| iti gītagovinde khaṇḍitāvarṇane vilakṣyalakṣmīpatirnāma aṣṭhamaḥ sargaḥ ||