Gitagovindam Tritiyah Sargah - Mugdha Madhusudanah

ॐ

ගීතගෝවින්දං තෘතීයඃ සර්ගඃ - මුග්ධ මධුසූදනඃ

Vishnu Gita Jayadeva Sinhala

.. තෘතීයඃ සර්ගඃ ..

.. මුග්ධමධුසූදනඃ ..

කංසාරිරපි සංසාරවාසනාබන්ධශෘඞ්ඛලාම් .

රාධාමාධාය හෘදයේ තත්යාජ ව්රජසුන්දරීඃ .. 18 ..

ඉතස්තතස්තාමනුසෘත්ය රාධිකා-මනඞ්ගබාණව්රණඛින්නමානසඃ .

කෘතානුතාපඃ ස කලින්දනන්දිනී-තටාන්තකුඤ්ජේ විෂසාද මාධවඃ .. 19 ..

.. ගීතං 7 ..

මාමියං චලිතා විලෝක්ය වෘතං වධූනිචයේන .

සාපරාධතයා මයාපි න වාරිතාතිභයේන ..

හරි හරි හතාදරතයා ගතා සා කුපිතේව .. 1 ..

කිං කරිෂ්යති කිං වදිෂ්යති සා චිරං විරහේණ .

කිං ධනේන ජනේන කිං මම ජීවනේන ගෘහේණ .. 2 ..

චින්තයාමි තදානනං කුටිලභ්රු කෝපභරේණ .

ශෝණපද්මමිවෝපරි භ්රමතාකුලං භ්රමරේණ .. 3 ..

තාමහං හෘදි සඞ්ගතාමනිශං භෘශං රමයාමි .

කිං වනේ(අ)නුසරාමි තාමිහ කිං වෘථා විලපාමි .. 4 ..

තන්වි ඛින්නමසූයයා හෘදයං තවාකලයාමි .

තන්න වේද්මි කුතෝ ගතාසි න තේන තේ(අ)නුනයාමි .. 5 ..

දෘශ්යතේ පුරතෝ ගතාගතමේව මේ විදධාසි .

කිං පුරේව සසම්භ්රමං පරිරම්භණං න දදාසි .. 6 ..

ක්ෂම්යතාමපරං කදාපි තවේදෘශං න කරෝමි .

දේහි සුන්දරි දර්ශනං මම මන්මථේන දුනෝමි .. 7 ..

වර්ණිතං ජයදේවකේන හරේරිදං ප්රවණේන .

කින්දුබිල්වසමුද්රසම්භවරෝහිණීරමණේන .. 8 ..

හෘදි බිසලතාහාරෝ නායං භුජඞ්ගමනායකඃ කුවලයදලශ්රේණී කණ්ඨේ න සා ගරලද්යුතිඃ .

මලයජරජෝ නේදං භස්ම ප්රියාරහිතේ මයි ප්රහර න හරභ්රාන්ත්යානඞ්ග ක්රුධා කිමු ධාවසි .. 20 ..

පාණෞ මා කුරු චූතසායකමමුං මා චාපමාරෝපය ක්රීඩානිර්ජිතවිශ්ව මූර්ඡිතජනාඝාතේන කිං පෞරුෂම් .

තස්යා ඒව මෘගීදෘශෝ මනසිජප්රේඞ්ඛත්කටාක්ෂාශුග-ශ්රේණීජර්ජරිතං මනාගපි මනෝ නාද්යාපි සන්ධුක්ෂතේ .. 21 ..

භ්රූචාපේ නිහිතඃ කටාක්ෂවිශිඛෝ නිර්මාතු මර්මව්යථාං ශ්යාමාත්මා කුටිලඃ කරෝතු කබරීභාරෝ(අ)පි මාරෝද්යමම් .

මෝහං තාවදයං ච තන්වි තනුතාං බිම්බාදරෝ රාගවාන් සද්වෘත්තස්තනමණ්දලස්තව කථං ප්රාණෛර්මම ක්රීඩති .. 22 ..

තානි ස්පර්ශසුඛානි තේ ච තරලාඃ ස්නිග්ධා දෘශෝර්විභ්රමා-ස්තද්වක්ත්රාම්බුජසෞරභං ස ච සුධාස්යන්දී ගිරාං වක්රිමා .

සා බිම්බාධරමාධුරීති විෂයාසඞ්ගේ(අ)පි චේන්මානසං තස්යාං ලග්නසමාධි හන්ත විරහව්යාධිඃ කථං වර්ධතේ .. 23 ..

භ්රූපල්ලවං ධනුරපාඞ්ගතරඞ්ගිතානි බාණාඃ ගුණඃ ශ්රවණපාලිරිති ස්මරේණ .

තස්යාමනඞ්ගජයජඞ්ගමදේවතායාං අස්ත්රාණි නිර්ජිතජගන්ති කිමර්පිතානි .. 24 ..

[ඒෂඃ ශ්ලෝකඃ කේෂුචන සංස්කරණේෂු විද්යතේ]

තිර්යක්කණ්ඨ විලෝල මෞලි තරලෝත්තං සස්ය වංශෝච්චරද්-

දීප්තිස්ථාන කෘතාවධාන ලලනා ලක්ෂෛර්න සංලක්ෂිතාඃ .

සම්මුග්ධේ මධුසූදනස්ය මධුරේ රාධාමුඛේන්දෞ සුධා-

සාරේ කන්දලිතාශ්චිරං දධතු වඃ ක්ෂේමං කටාක්ෂෝර්ම්මය .. (25) ..

.. ඉති ශ්රීගීතගෝවින්දේ මුග්ධමධුසූදනෝ නාම තෘතීයඃ සර්ගඃ ..

Roman (IAST) Transliteration

|| tṛtīyaḥ sargaḥ ||

|| mugdhamadhusūdanaḥ ||

kaṃsārirapi saṃsāravāsanābandhaśṛṅkhalām |

rādhāmādhāya hṛdaye tatyāja vrajasundarīḥ || 18 ||

itastatastāmanusṛtya rādhikā-manaṅgabāṇavraṇakhinnamānasaḥ |

kṛtānutāpaḥ sa kalindanandinī-taṭāntakuñje viṣasāda mādhavaḥ || 19 ||

|| gītaṃ 7 ||

māmiyaṃ calitā vilokya vṛtaṃ vadhūnicayena |

sāparādhatayā mayāpi na vāritātibhayena ||

hari hari hatādaratayā gatā sā kupiteva || 1 ||

kiṃ kariṣyati kiṃ vadiṣyati sā ciraṃ viraheṇa |

kiṃ dhanena janena kiṃ mama jīvanena gṛheṇa || 2 ||

cintayāmi tadānanaṃ kuṭilabhru kopabhareṇa |

śoṇapadmamivopari bhramatākulaṃ bhramareṇa || 3 ||

tāmahaṃ hṛdi saṅgatāmaniśaṃ bhṛśaṃ ramayāmi |

kiṃ vane'nusarāmi tāmiha kiṃ vṛthā vilapāmi || 4 ||

tanvi khinnamasūyayā hṛdayaṃ tavākalayāmi |

tanna vedmi kuto gatāsi na tena te'nunayāmi || 5 ||

dṛśyate purato gatāgatameva me vidadhāsi |

kiṃ pureva sasambhramaṃ parirambhaṇaṃ na dadāsi || 6 ||

kṣamyatāmaparaṃ kadāpi tavedṛśaṃ na karomi |

dehi sundari darśanaṃ mama manmathena dunomi || 7 ||

varṇitaṃ jayadevakena hareridaṃ pravaṇena |

kindubilvasamudrasambhavarohiṇīramaṇena || 8 ||

hṛdi bisalatāhāro nāyaṃ bhujaṅgamanāyakaḥ kuvalayadalaśreṇī kaṇṭhe na sā garaladyutiḥ |

malayajarajo nedaṃ bhasma priyārahite mayi prahara na harabhrāntyānaṅga krudhā kimu dhāvasi || 20 ||

pāṇau mā kuru cūtasāyakamamuṃ mā cāpamāropaya krīḍānirjitaviśva mūrchitajanāghātena kiṃ pauruṣam |

tasyā eva mṛgīdṛśo manasijapreṅkhatkaṭākṣāśuga-śreṇījarjaritaṃ manāgapi mano nādyāpi sandhukṣate || 21 ||

bhrūcāpe nihitaḥ kaṭākṣaviśikho nirmātu marmavyathāṃ śyāmātmā kuṭilaḥ karotu kabarībhāro'pi mārodyamam |

mohaṃ tāvadayaṃ ca tanvi tanutāṃ bimbādaro rāgavān sadvṛttastanamaṇdalastava kathaṃ prāṇairmama krīḍati || 22 ||

tāni sparśasukhāni te ca taralāḥ snigdhā dṛśorvibhramā-stadvaktrāmbujasaurabhaṃ sa ca sudhāsyandī girāṃ vakrimā |

sā bimbādharamādhurīti viṣayāsaṅge'pi cenmānasaṃ tasyāṃ lagnasamādhi hanta virahavyādhiḥ kathaṃ vardhate || 23 ||

bhrūpallavaṃ dhanurapāṅgataraṅgitāni bāṇāḥ guṇaḥ śravaṇapāliriti smareṇa |

tasyāmanaṅgajayajaṅgamadevatāyāṃ astrāṇi nirjitajaganti kimarpitāni || 24 ||

[eṣaḥ ślokaḥ keṣucana saṃskaraṇeṣu vidyate]

tiryakkaṇṭha vilola mauli taralottaṃ sasya vaṃśoccarad-

dīptisthāna kṛtāvadhāna lalanā lakṣairna saṃlakṣitāḥ |

sammugdhe madhusūdanasya madhure rādhāmukhendau sudhā-

sāre kandalitāściraṃ dadhatu vaḥ kṣemaṃ kaṭākṣormmaya || (25) ||

|| iti śrīgītagovinde mugdhamadhusūdano nāma tṛtīyaḥ sargaḥ ||