Gayatryashtakam (gayatri Ashtakam)

ॐ

ගායත්ර්යෂ්ටකං (ගයත්රී අෂ්ටකං)

Ashtakam Sinhala

විශ්වාමිත්රතපඃඵලාං ප්රියතරාං විප්රාලිසංසේවිතාං

නිත්යානිත්යවිවේකදාං ස්මිතමුඛීං ඛණ්ඩේන්දුභූෂෝජ්ජ්වලාම් .

තාම්බූලාරුණභාසමානවදනාං මාර්තාණ්ඩමධ්යස්ථිතාං

ගායත්රීං හරිවල්ලභාං ත්රිණයනාං ධ්යායාමි පඤ්චානනාම් .. 1 ..

ජාතීපඞ්කජකේතකීකුවලයෛඃ සම්පූජිතාඞ්ඝ්රිද්වයාං

තත්ත්වාර්ථාත්මිකවර්ණපඞ්ක්තිසහිතාං තත්ත්වාර්ථබුද්ධිප්රදාම් .

ප්රාණායාමපරායණෛර්බුධජනෛඃ සංසේව්යමානාං ශිවාං

ගායත්රීං හරිවල්ලභාං ත්රිණයනාං ධ්යායාමි පඤ්චානනාම් .. 2 ..

මඤ්ජීරධ්වනිභිඃ සමස්තජගතාං මඤ්ජුත්වසංවර්ධනීං

විප්රප්රේඞ්ඛිතවාරිවාරිතමහාරක්ෂෝගණාං මෘණ්මයීම් .

ජප්තුඃ පාපහරාං ජපාසුමනිභාං හංසේන සංශෝභිතාං

ගායත්රීං හරිවල්ලභාං ත්රිණයනාං ධ්යායාමි පඤ්චානනාම් .. 3 ..

කාඤ්චීචේලවිභූෂිතාං ශිවමයීං මාලාර්ධමාලාදිකා-

-න්බිභ්රාණාං පරමේශ්වරීං ශරණදාං මෝහාන්ධබුද්ධිච්ඡිදාම් .

භූරාදිත්රිපුරාං ත්රිලෝකජනනීමධ්යාත්මශාඛානුතාං

ගායත්රීං හරිවල්ලභාං ත්රිණයනාං ධ්යායාමි පඤ්චානනාම් .. 4 ..

ධ්යාතුර්ගර්භකෘශානුතාපහරණාං සාමාත්මිකාං සාමගාං

සායඞ්කාලසුසේවිතාං ස්වරමයීං දූර්වාදලශ්යාමලාම් .

මාතුර්දාස්යවිලෝචනෛකමතිමත්ඛේටීන්ද්රසංරාජිතාං

ගායත්රීං හරිවල්ලභාං ත්රිණයනාං ධ්යායාමි පඤ්චානනාම් .. 5 ..

සන්ධ්යාරාගවිචිත්රවස්ත්රවිලසද්විප්රෝත්තමෛඃ සේවිතාං

තාරාහාරසුමාලිකාං සුවිලසද්රත්නේන්දුකුම්භාන්තරාම් .

රාකාචන්ද්රමුඛීං රමාපතිනුතාං ශඞ්ඛාදිභාස්වත්කරාං

ගායත්රීං හරිවල්ලභාං ත්රිණයනාං ධ්යායාමි පඤ්චානනාම් .. 6 ..

වේණීභූෂිතමාලකධ්වනිකරෛර්භෘඞ්ගෛඃ සදා ශෝභිතාං

තත්ත්වජ්ඤානරසායනජ්ඤරසනාසෞධභ්රමද්භ්රාමරීම් .

නාසාලඞ්කෘතමෞක්තිකේන්දුකිරණෛඃ සායන්තමශ්ඡේදිනීං

ගායත්රීං හරිවල්ලභාං ත්රිණයනාං ධ්යායාමි පඤ්චානනාම් .. 7 ..

පාදාබ්ජාන්තරරේණුකුඞ්කුමලසත්ඵාලද්යුරාමාවෘතාං

රම්භානාට්යවිලෝකනෛකරසිකාං වේදාන්තබුද්ධිප්රදාම් .

වීණාවේණුමෘදඞ්ගකාහලරවාන් දේවෛඃ කෘතාඤ්ඡෘණ්වතීං

ගායත්රීං හරිවල්ලභාං ත්රිණයනාං ධ්යායාමි පඤ්චානනාම් .. 8 ..

හත්යාපානසුවර්ණතස්කරමහාගුර්වඞ්ගනාසඞ්ගමා-

-න්දෝෂාඤ්ඡෛලසමාන් පුරන්දරසමාඃ සඤ්ච්ඡිද්ය සූර්යෝපමාඃ .

ගායත්රීං ශ්රුතිමාතුරේකමනසා සන්ධ්යාසු යේ භූසුරා

ජප්ත්වා යාන්ති පරාං ගතිං මනුමිමං දේව්යාඃ පරං වෛදිකාඃ .. 9 ..

ඉති ශ්රීමච්ඡඞ්කරාචාර්ය විරචිතං ශ්රී ගායත්ර්යෂ්ටකම් .

Roman (IAST) Transliteration

viśvāmitratapaḥphalāṃ priyatarāṃ viprālisaṃsevitāṃ

nityānityavivekadāṃ smitamukhīṃ khaṇḍendubhūṣojjvalām |

tāmbūlāruṇabhāsamānavadanāṃ mārtāṇḍamadhyasthitāṃ

gāyatrīṃ harivallabhāṃ triṇayanāṃ dhyāyāmi pañcānanām || 1 ||

jātīpaṅkajaketakīkuvalayaiḥ sampūjitāṅghridvayāṃ

tattvārthātmikavarṇapaṅktisahitāṃ tattvārthabuddhipradām |

prāṇāyāmaparāyaṇairbudhajanaiḥ saṃsevyamānāṃ śivāṃ

gāyatrīṃ harivallabhāṃ triṇayanāṃ dhyāyāmi pañcānanām || 2 ||

mañjīradhvanibhiḥ samastajagatāṃ mañjutvasaṃvardhanīṃ

viprapreṅkhitavārivāritamahārakṣogaṇāṃ mṛṇmayīm |

japtuḥ pāpaharāṃ japāsumanibhāṃ haṃsena saṃśobhitāṃ

gāyatrīṃ harivallabhāṃ triṇayanāṃ dhyāyāmi pañcānanām || 3 ||

kāñcīcelavibhūṣitāṃ śivamayīṃ mālārdhamālādikā-

-nbibhrāṇāṃ parameśvarīṃ śaraṇadāṃ mohāndhabuddhicchidām |

bhūrāditripurāṃ trilokajananīmadhyātmaśākhānutāṃ

gāyatrīṃ harivallabhāṃ triṇayanāṃ dhyāyāmi pañcānanām || 4 ||

dhyāturgarbhakṛśānutāpaharaṇāṃ sāmātmikāṃ sāmagāṃ

sāyaṅkālasusevitāṃ svaramayīṃ dūrvādalaśyāmalām |

māturdāsyavilocanaikamatimatkheṭīndrasaṃrājitāṃ

gāyatrīṃ harivallabhāṃ triṇayanāṃ dhyāyāmi pañcānanām || 5 ||

sandhyārāgavicitravastravilasadviprottamaiḥ sevitāṃ

tārāhārasumālikāṃ suvilasadratnendukumbhāntarām |

rākācandramukhīṃ ramāpatinutāṃ śaṅkhādibhāsvatkarāṃ

gāyatrīṃ harivallabhāṃ triṇayanāṃ dhyāyāmi pañcānanām || 6 ||

veṇībhūṣitamālakadhvanikarairbhṛṅgaiḥ sadā śobhitāṃ

tattvajñānarasāyanajñarasanāsaudhabhramadbhrāmarīm |

nāsālaṅkṛtamauktikendukiraṇaiḥ sāyantamaśchedinīṃ

gāyatrīṃ harivallabhāṃ triṇayanāṃ dhyāyāmi pañcānanām || 7 ||

pādābjāntarareṇukuṅkumalasatphāladyurāmāvṛtāṃ

rambhānāṭyavilokanaikarasikāṃ vedāntabuddhipradām |

vīṇāveṇumṛdaṅgakāhalaravān devaiḥ kṛtāñchṛṇvatīṃ

gāyatrīṃ harivallabhāṃ triṇayanāṃ dhyāyāmi pañcānanām || 8 ||

hatyāpānasuvarṇataskaramahāgurvaṅganāsaṅgamā-

-ndoṣāñchailasamān purandarasamāḥ sañcchidya sūryopamāḥ |

gāyatrīṃ śrutimāturekamanasā sandhyāsu ye bhūsurā

japtvā yānti parāṃ gatiṃ manumimaṃ devyāḥ paraṃ vaidikāḥ || 9 ||

iti śrīmacchaṅkarācārya viracitaṃ śrī gāyatryaṣṭakam |