athāparamahaṃ vakṣye'mṛtasañjīvanaṃ stavam |
yasyānuṣṭhānamātreṇa mṛtyurdūrātpalāyate || 1 ||
asādhyāḥ kaṣṭasādhyāśca mahārogā bhayaṅkarāḥ |
śīghraṃ naśyanti paṭhanādasyāyuśca pravardhate || 2 ||
śākinīḍākinīdoṣāḥ kudṛṣṭigrahaśatrujāḥ |
pretavetālayakṣotthā bādhā naśyanti cākhilāḥ || 3 ||
duritāni samastāni nānājanmodbhavāni ca |
saṃsargajavikārāṇi vilīyante'sya pāṭhataḥ || 4 ||
sarvopadravanāśāya sarvabādhāpraśāntaye |
āyuḥ pravṛddhaye caitat stotraṃ paramamadbhutam || 5 ||
bālagrahābhibhūtānāṃ bālānāṃ sukhadāyakam |
sarvāriṣṭaharaṃ caitadbalapuṣṭikaraṃ param || 6 ||
bālānāṃ jīvanāyaitat stotraṃ divyaṃ sudhopamam |
mṛtavatsatvaharaṇaṃ cirañjīvitvakārakam || 7 ||
mahārogābhibhūtānāṃ bhayavyākulitātmanām |
sarvādhivyādhiharaṇaṃ bhayaghnamamṛtopamam || 8 ||
alpamṛtyuścāpamṛtyuḥ pāṭhādasyaḥ praṇaśyati |
jalā'gniviṣaśastrāri na hi śṛṅgi bhayaṃ tathā || 9 ||
garbharakṣākaraṃ strīṇāṃ bālānāṃ jīvanapradam |
mahārogaharaṃ nṝṇāmalpamṛtyuharaṃ param || 10 ||
bālā vṛddhāśca taruṇā narā nāryaśca duḥkhitāḥ |
bhavanti sukhinaḥ pāṭhādasya loke cirāyuṣaḥ || 11 ||
asmātparataraṃ nāsti jīvanopāya aihikaḥ |
tasmāt sarvaprayatnena pāṭhamasya samācaret || 12 ||
ayutāvṛttikaṃ vātha sahasrāvṛttikaṃ tathā |
tadardhaṃ vā tadardhaṃ vā paṭhedetacca bhaktitaḥ || 13 ||
kalaśe viṣṇumārādhya dīpaṃ prajvālya yatnataḥ |
sāyaṃ prātaśca vidhivat stotrametat paṭhet sudhīḥ || 14 ||
sarpiṣā haviṣā vā'pi saṃyāvenātha bhaktitaḥ |
daśāṃśamānato homaṃ kuryāt sarvārthasiddhaye || 15 ||
atha stotram
namo namo viśvavibhāvanāya
namo namo lokasukhapradāya |
namo namo viśvasṛjeśvarāya
namo namo muktivarapradāya || 1 ||
namo namaste'khilalokapāya
namo namaste'khilakāmadāya |
namo namaste'khilakāraṇāya
namo namaste'khilarakṣakāya || 2 ||
namo namaste sakalārtihartre
namo namaste virujaḥ prakartre |
namo namaste'khilaviśvadhartre
namo namaste'khilalokabhartre || 3 ||
sṛṣṭaṃ deva carācaraṃ jagadidaṃ brahmasvarūpeṇa te
sarvaṃ tatparipālyate jagadidaṃ viṣṇusvarūpeṇa te |
viśvaṃ saṃhritaye tadeva nikhilaṃ rudrasvarūpeṇa te
saṃsicyāmṛtaśīkarairhara mahāriṣṭaṃ ciraṃ jīvaya || 4 ||
yo dhanvantarisañjñayā nigaditaḥ kṣīrābdhito niḥsṛto
hastābhyāṃ janajīvanāya kalaśaṃ pīyūṣapūrṇaṃ dadhat |
āyurvedamarīracajjanarujāṃ nāśāya sa tvaṃ mudā
saṃsicyāmṛtaśīkarairhara mahāriṣṭaṃ ciraṃ jīvaya || 5 ||
strīrūpaṃ varabhūṣaṇāmbaradharaṃ trailokyasammohanaṃ
kṛtvā pāyayati sma yaḥ suragaṇān pīyūṣamatyuttamam |
cakre daityagaṇān sudhāvirahitān sammohya sa tvaṃ mudā
saṃsicyāmṛtaśīkarairhara mahāriṣṭaṃ ciraṃ jīvaya || 6 ||
cākṣuṣodadhisamplāva bhūvedapa jhaṣākṛte |
siñca siñcāmṛtakaṇaiściraṃ jīvaya jīvaya || 7 ||
pṛṣṭhamandaranirghūrṇanidrākṣa kamaṭhākṛte |
siñca siñcāmṛtakaṇaiściraṃ jīvaya jīvaya || 8 ||
yāñcācchalabalitrāsamuktanirjara vāmana |
siñca siñcāmṛtakaṇaiściraṃ jīvaya jīvaya || 9 ||
dharoddhāra hiraṇyākṣaghāta kroḍākṛte prabho |
siñca siñcāmṛtakaṇaiściraṃ jīvaya jīvaya || 10 ||
bhaktatrāsavināśāttacaṇḍatva nṛhare vibho |
siñca siñcāmṛtakaṇaiściraṃ jīvaya jīvaya || 11 ||
kṣatriyāraṇyasañchedakuṭhārakararaiṇuka |
siñca siñcāmṛtakaṇaiściraṃ jīvaya jīvaya || 12 ||
rakṣorājapratāpābdhiśoṣaṇāśuga rāghava |
siñca siñcāmṛtakaṇaiściraṃ jīvaya jīvaya || 13 ||
bhūbhārāsurasandohakālāgne rukmiṇīpate |
siñca siñcāmṛtakaṇaiściraṃ jīvaya jīvaya || 14 ||
vedamārgaratānarhavibhrāntyai buddharūpadhṛk |
siñca siñcāmṛtakaṇaiściraṃ jīvaya jīvaya || 15 ||
kalivarṇāśramāspaṣṭadharmardhyai kalkirūpabhāk |
siñca siñcāmṛtakaṇaiściraṃ jīvaya jīvaya || 16 ||
asādhyāḥ kaṣṭasādhyā ye mahārogā bhayaṅkarāḥ |
chindhi tānāśu cakreṇa ciraṃ jīvaya jīvaya || 17 ||
alpamṛtyuṃ cāpamṛtyuṃ mahotpātānupadravān |
bhindhi bhindhi gadāghātaiściraṃ jīvaya jīvaya || 18 ||
ahaṃ na jāne kimapi tvadanyat
samāśraye nātha padāmbujaṃ te |
kuruṣva tadyanmanasīpsitaṃ te
sukarmaṇā kena samakṣamīyām || 19 ||
tvameva tāto jananī tvameva
tvameva nāthaśca tvameva bandhuḥ |
vidyādhanāgārakulaṃ tvameva
tvameva sarvaṃ mama devadeva || 20 ||
na me'parādhaṃ pravilokaya prabho-
-'parādhasindhośca dayānidhistvam |
tātena duṣṭo'pi sutaḥ surakṣate
dayālutā te'vatu sarvadā'smān || 21 ||
ahaha vismara nātha na māṃ sadā
karuṇayā nijayā paripūritaḥ |
bhuvi bhavān yadi me na hi rakṣakaḥ
kathamaho mama jīvanamatra vai || 22 ||
daha daha kṛpayā tvaṃ vyādhijālaṃ viśālaṃ
hara hara karavālaṃ cālpamṛtyoḥ karālam |
nijajanaparipālaṃ tvāṃ bhaje bhāvayālaṃ
kuru kuru bahukālaṃ jīvitaṃ me sadā'lam || 23 ||
na yatra dharmācaraṇaṃ na jānaṃ
vrataṃ na yogo na ca viṣṇucarcā |
na pitṛgovipravarāmarārcā
svalpāyuṣastatra janā bhavanti || 24 ||
atha mantram
klīṃ śrīṃ klīṃ śrīṃ namo bhagavate janārdanāya sakala duritāni nāśaya nāśaya |
kṣrauṃ ārogyaṃ kuru kuru | hrīṃ dīrghamāyurdehi dehi svāhā ||
phalaśrutiḥ
asya dhāraṇato jāpādalpamṛtyuḥ praśāmyati |
garbharakṣākaraṃ strīṇāṃ bālānāṃ jīvanaṃ param || 1 ||
śataṃ pañcāśataṃ śaktyā'thavā pañcādhiviṃśatim |
pustakānāṃ dvijebhyastu dadyāddīrghāyuṣāptaye || 2 ||
bhūrjapatre vilikhyedaṃ kaṇṭhe vā bāhumūlake |
sandhārayedgarbharakṣā bālarakṣā ca jāyate || 3 ||
sarve rogā vinaśyanti sarvā bādhāḥ praśāmyati |
kudṛṣṭijaṃ bhayaṃ naśyet tathā pretādijaṃ bhayam || 4 ||
mayā kathitametatte'mṛtasañjīvanaṃ param |
alpamṛtyuharaṃ stotraṃ mṛtavatsatvanāśanam || 5 ||
iti sudarśanasaṃhitoktaṃ amṛtasañjīvana dhanvantari stotram ||