Ranganatha Ashtakam — InfoLyter.in

ॐ

रङ्गनाथ अष्टकं

Ranganatha Ashtakam

Vishnu Ashtakam Adi Shankaracharya Devanagari

आनन्दरूपे निजबोधरूपे

ब्रह्मस्वरूपे श्रुतिमूर्तिरूपे ।

शशाङ्करूपे रमणीयरूपे

श्रीरङ्गरूपे रमतां मनो मे ॥ 1 ॥

कावेरितीरे करुणाविलोले

मन्दारमूले धृतचारुकेले ।

दैत्यान्तकालेऽखिललोकलीले

श्रीरङ्गलीले रमतां मनो मे ॥ 2 ॥

लक्ष्मीनिवासे जगतां निवासे

हृत्पद्मवासे रविबिम्बवासे ।

कृपानिवासे गुणबृन्दवासे

श्रीरङ्गवासे रमतां मनो मे ॥ 3 ॥

ब्रह्मादिवन्द्ये जगदेकवन्द्ये

मुकुन्दवन्द्ये सुरनाथवन्द्ये ।

व्यासादिवन्द्ये सनकादिवन्द्ये

श्रीरङ्गवन्द्ये रमतां मनो मे ॥ 4 ॥

ब्रह्माधिराजे गरुडाधिराजे

वैकुण्ठराजे सुरराजराजे ।

त्रैलोक्यराजेऽखिललोकराजे

श्रीरङ्गराजे रमतां मनो मे ॥ 5 ॥

अमोघमुद्रे परिपूर्णनिद्रे

श्रीयोगनिद्रे ससमुद्रनिद्रे ।

श्रितैकभद्रे जगदेकनिद्रे

श्रीरङ्गभद्रे रमतां मनो मे ॥ 6 ॥

सचित्रशायी भुजगेन्द्रशायी

नन्दाङ्कशायी कमलाङ्कशायी ।

क्षीराब्धिशायी वटपत्रशायी

श्रीरङ्गशायी रमतां मनो मे ॥ 7 ॥

इदं हि रङ्गं त्यजतामिहाङ्गं

पुनर्न चाङ्गं यदि चाङ्गमेति ।

पाणौ रथाङ्गं चरणेऽम्बु गाङ्गं

याने विहङ्गं शयने भुजङ्गम् ॥ 8 ॥

रङ्गनाथाष्टकं पुण्यं प्रातरुत्थाय यः पठेत् ।

सर्वान्कामानवाप्नोति रङ्गिसायुज्यमाप्नुयात् ॥ 9 ॥

इति श्री रङ्गनाथाष्टकम् ।

Roman (IAST) Transliteration

ānandarūpe nijabodharūpe

brahmasvarūpe śrutimūrtirūpe |

śaśāṅkarūpe ramaṇīyarūpe

śrīraṅgarūpe ramatāṃ mano me || 1 ||

kāveritīre karuṇāvilole

mandāramūle dhṛtacārukele |

daityāntakāle'khilalokalīle

śrīraṅgalīle ramatāṃ mano me || 2 ||

lakṣmīnivāse jagatāṃ nivāse

hṛtpadmavāse ravibimbavāse |

kṛpānivāse guṇabṛndavāse

śrīraṅgavāse ramatāṃ mano me || 3 ||

brahmādivandye jagadekavandye

mukundavandye suranāthavandye |

vyāsādivandye sanakādivandye

śrīraṅgavandye ramatāṃ mano me || 4 ||

brahmādhirāje garuḍādhirāje

vaikuṇṭharāje surarājarāje |

trailokyarāje'khilalokarāje

śrīraṅgarāje ramatāṃ mano me || 5 ||

amoghamudre paripūrṇanidre

śrīyoganidre sasamudranidre |

śritaikabhadre jagadekanidre

śrīraṅgabhadre ramatāṃ mano me || 6 ||

sacitraśāyī bhujagendraśāyī

nandāṅkaśāyī kamalāṅkaśāyī |

kṣīrābdhiśāyī vaṭapatraśāyī

śrīraṅgaśāyī ramatāṃ mano me || 7 ||

idaṃ hi raṅgaṃ tyajatāmihāṅgaṃ

punarna cāṅgaṃ yadi cāṅgameti |

pāṇau rathāṅgaṃ caraṇe'mbu gāṅgaṃ

yāne vihaṅgaṃ śayane bhujaṅgam || 8 ||

raṅganāthāṣṭakaṃ puṇyaṃ prātarutthāya yaḥ paṭhet |

sarvānkāmānavāpnoti raṅgisāyujyamāpnuyāt || 9 ||

iti śrī raṅganāthāṣṭakam |