śrī śiva uvāca
śṛṇu devi mahāguhyaṃ paraṃ puṇyavivardhanaṃ .
śarabheśāṣṭakaṃ mantraṃ vakṣyāmi tava tattvataḥ ||
ṛṣinyāsādikaṃ yattatsarvapūrvavadācaret .
dhyānabhedaṃ viśeṣeṇa vakṣyāmyahamataḥ śive ||
dhyānaṃ
jvalanakuṭilakeśaṃ sūryacandrāgninetraṃ
niśitataranakhāgroddhūtahemābhadeham |
śarabhamatha munīndraiḥ sevyamānaṃ sitāṅgaṃ
praṇatabhayavināśaṃ bhāvayetpakṣirājam ||
atha stotraṃ
devādidevāya jaganmayāya śivāya nālīkanibhānanāya |
śarvāya bhīmāya śarādhipāya namo'stu tubhyaṃ śarabheśvarāya || 1 ||
harāya bhīmāya haripriyāya bhavāya śāntāya parātparāya |
mṛḍāya rudrāya vilocanāya namo'stu tubhyaṃ śarabheśvarāya || 2 ||
śītāṃśucūḍāya digambarāya sṛṣṭisthitidhvaṃsanakāraṇāya |
jaṭākalāpāya jitendriyāya namo'stu tubhyaṃ śarabheśvarāya || 3 ||
kalaṅkakaṇṭhāya bhavāntakāya kapālaśūlāttakarāmbujāya |
bhujaṅgabhūṣāya purāntakāya namo'stu tubhyaṃ śarabheśvarāya || 4 ||
śamādiṣaṭkāya yamāntakāya yamādiyogāṣṭakasiddhidāya |
umādhināthāya purātanāya namo'stu tubhyaṃ śarabheśvarāya || 5 ||
ghṛṇādipāśāṣṭakavarjitāya khilīkṛtāsmatpathi pūrvagāya |
guṇādihīnāya guṇatrayāya namo'stu tubhyaṃ śarabheśvarāya || 6 ||
kālāya vedāmṛtakandalāya kalyāṇakautūhalakāraṇāya |
sthūlāya sūkṣmāya svarūpagāya namo'stu tubhyaṃ śarabheśvarāya || 7 ||
pañcānanāyānilabhāskarāya pañcāśadarṇādyaparākṣayāya |
pañcākṣareśāya jagaddhitāya namo'stu tubhyaṃ śarabheśvarāya || 8 ||
iti śrī śarabheśāṣṭakam ||