Gitagovindam Tritiyah Sargah - Mugdha Madhusudanah

ॐ

ਗੀਤਗੋਵਿਨ੍ਦਂ ਤृਤੀਯਃ ਸਰ੍ਗਃ - ਮੁਗ੍ਧ ਮਧੁਸੂਦਨਃ

Vishnu Gita Jayadeva Gurmukhi

॥ ਤृਤੀਯਃ ਸਰ੍ਗਃ ॥

॥ ਮੁਗ੍ਧਮਧੁਸੂਦਨਃ ॥

ਕਂਸਾਰਿਰਪਿ ਸਂਸਾਰਵਾਸਨਾਬਨ੍ਧਸ਼ृਙ੍ਖਲਾਮ੍ ।

ਰਾਧਾਮਾਧਾਯ ਹृਦਯੇ ਤਤ੍ਯਾਜ ਵ੍ਰਜਸੁਨ੍ਦਰੀਃ ॥ 18 ॥

ਇਤਸ੍ਤਤਸ੍ਤਾਮਨੁਸृਤ੍ਯ ਰਾਧਿਕਾ-ਮਨਙ੍ਗਬਾਣਵ੍ਰਣਖਿਨ੍ਨਮਾਨਸਃ ।

ਕृਤਾਨੁਤਾਪਃ ਸ ਕਲਿਨ੍ਦਨਨ੍ਦਿਨੀ-ਤਟਾਨ੍ਤਕੁਞ੍ਜੇ ਵਿषਸਾਦ ਮਾਧਵਃ ॥ 19 ॥

॥ ਗੀਤਂ 7 ॥

ਮਾਮਿਯਂ ਚਲਿਤਾ ਵਿਲੋਕ੍ਯ ਵृਤਂ ਵਧੂਨਿਚਯੇਨ ।

ਸਾਪਰਾਧਤਯਾ ਮਯਾਪਿ ਨ ਵਾਰਿਤਾਤਿਭਯੇਨ ॥

ਹਰਿ ਹਰਿ ਹਤਾਦਰਤਯਾ ਗਤਾ ਸਾ ਕੁਪਿਤੇਵ ॥ 1 ॥

ਕਿਂ ਕਰਿष੍ਯਤਿ ਕਿਂ ਵਦਿष੍ਯਤਿ ਸਾ ਚਿਰਂ ਵਿਰਹੇਣ ।

ਕਿਂ ਧਨੇਨ ਜਨੇਨ ਕਿਂ ਮਮ ਜੀਵਨੇਨ ਗृਹੇਣ ॥ 2 ॥

ਚਿਨ੍ਤਯਾਮਿ ਤਦਾਨਨਂ ਕੁਟਿਲਭ੍ਰੁ ਕੋਪਭਰੇਣ ।

ਸ਼ੋਣਪਦ੍ਮਮਿਵੋਪਰਿ ਭ੍ਰਮਤਾਕੁਲਂ ਭ੍ਰਮਰੇਣ ॥ 3 ॥

ਤਾਮਹਂ ਹृਦਿ ਸਙ੍ਗਤਾਮਨਿਸ਼ਂ ਭृਸ਼ਂ ਰਮਯਾਮਿ ।

ਕਿਂ ਵਨੇऽਨੁਸਰਾਮਿ ਤਾਮਿਹ ਕਿਂ ਵृਥਾ ਵਿਲਪਾਮਿ ॥ 4 ॥

ਤਨ੍ਵਿ ਖਿਨ੍ਨਮਸੂਯਯਾ ਹृਦਯਂ ਤਵਾਕਲਯਾਮਿ ।

ਤਨ੍ਨ ਵੇਦ੍ਮਿ ਕੁਤੋ ਗਤਾਸਿ ਨ ਤੇਨ ਤੇऽਨੁਨਯਾਮਿ ॥ 5 ॥

ਦृਸ਼੍ਯਤੇ ਪੁਰਤੋ ਗਤਾਗਤਮੇਵ ਮੇ ਵਿਦਧਾਸਿ ।

ਕਿਂ ਪੁਰੇਵ ਸਸਮ੍ਭ੍ਰਮਂ ਪਰਿਰਮ੍ਭਣਂ ਨ ਦਦਾਸਿ ॥ 6 ॥

ਕ੍षਮ੍ਯਤਾਮਪਰਂ ਕਦਾਪਿ ਤਵੇਦृਸ਼ਂ ਨ ਕਰੋਮਿ ।

ਦੇਹਿ ਸੁਨ੍ਦਰਿ ਦਰ੍ਸ਼ਨਂ ਮਮ ਮਨ੍ਮਥੇਨ ਦੁਨੋਮਿ ॥ 7 ॥

ਵਰ੍ਣਿਤਂ ਜਯਦੇਵਕੇਨ ਹਰੇਰਿਦਂ ਪ੍ਰਵਣੇਨ ।

ਕਿਨ੍ਦੁਬਿਲ੍ਵਸਮੁਦ੍ਰਸਮ੍ਭਵਰੋਹਿਣੀਰਮਣੇਨ ॥ 8 ॥

ਹृਦਿ ਬਿਸਲਤਾਹਾਰੋ ਨਾਯਂ ਭੁਜਙ੍ਗਮਨਾਯਕਃ ਕੁਵਲਯਦਲਸ਼੍ਰੇਣੀ ਕਣ੍ਠੇ ਨ ਸਾ ਗਰਲਦ੍ਯੁਤਿਃ ।

ਮਲਯਜਰਜੋ ਨੇਦਂ ਭਸ੍ਮ ਪ੍ਰਿਯਾਰਹਿਤੇ ਮਯਿ ਪ੍ਰਹਰ ਨ ਹਰਭ੍ਰਾਨ੍ਤ੍ਯਾਨਙ੍ਗ ਕ੍ਰੁਧਾ ਕਿਮੁ ਧਾਵਸਿ ॥ 20 ॥

ਪਾਣੌ ਮਾ ਕੁਰੁ ਚੂਤਸਾਯਕਮਮੁਂ ਮਾ ਚਾਪਮਾਰੋਪਯ ਕ੍ਰੀਡਾਨਿਰ੍ਜਿਤਵਿਸ਼੍ਵ ਮੂਰ੍ਛਿਤਜਨਾਘਾਤੇਨ ਕਿਂ ਪੌਰੁषਮ੍ ।

ਤਸ੍ਯਾ ਏਵ ਮृਗੀਦृਸ਼ੋ ਮਨਸਿਜਪ੍ਰੇਙ੍ਖਤ੍ਕਟਾਕ੍षਾਸ਼ੁਗ-ਸ਼੍ਰੇਣੀਜਰ੍ਜਰਿਤਂ ਮਨਾਗਪਿ ਮਨੋ ਨਾਦ੍ਯਾਪਿ ਸਨ੍ਧੁਕ੍षਤੇ ॥ 21 ॥

ਭ੍ਰੂਚਾਪੇ ਨਿਹਿਤਃ ਕਟਾਕ੍षਵਿਸ਼ਿਖੋ ਨਿਰ੍ਮਾਤੁ ਮਰ੍ਮਵ੍ਯਥਾਂ ਸ਼੍ਯਾਮਾਤ੍ਮਾ ਕੁਟਿਲਃ ਕਰੋਤੁ ਕਬਰੀਭਾਰੋऽਪਿ ਮਾਰੋਦ੍ਯਮਮ੍ ।

ਮੋਹਂ ਤਾਵਦਯਂ ਚ ਤਨ੍ਵਿ ਤਨੁਤਾਂ ਬਿਮ੍ਬਾਦਰੋ ਰਾਗਵਾਨ੍ ਸਦ੍ਵृਤ੍ਤਸ੍ਤਨਮਣ੍ਦਲਸ੍ਤਵ ਕਥਂ ਪ੍ਰਾਣੈਰ੍ਮਮ ਕ੍ਰੀਡਤਿ ॥ 22 ॥

ਤਾਨਿ ਸ੍ਪਰ੍ਸ਼ਸੁਖਾਨਿ ਤੇ ਚ ਤਰਲਾਃ ਸ੍ਨਿਗ੍ਧਾ ਦृਸ਼ੋਰ੍ਵਿਭ੍ਰਮਾ-ਸ੍ਤਦ੍ਵਕ੍ਤ੍ਰਾਮ੍ਬੁਜਸੌਰਭਂ ਸ ਚ ਸੁਧਾਸ੍ਯਨ੍ਦੀ ਗਿਰਾਂ ਵਕ੍ਰਿਮਾ ।

ਸਾ ਬਿਮ੍ਬਾਧਰਮਾਧੁਰੀਤਿ ਵਿषਯਾਸਙ੍ਗੇऽਪਿ ਚੇਨ੍ਮਾਨਸਂ ਤਸ੍ਯਾਂ ਲਗ੍ਨਸਮਾਧਿ ਹਨ੍ਤ ਵਿਰਹਵ੍ਯਾਧਿਃ ਕਥਂ ਵਰ੍ਧਤੇ ॥ 23 ॥

ਭ੍ਰੂਪਲ੍ਲਵਂ ਧਨੁਰਪਾਙ੍ਗਤਰਙ੍ਗਿਤਾਨਿ ਬਾਣਾਃ ਗੁਣਃ ਸ਼੍ਰਵਣਪਾਲਿਰਿਤਿ ਸ੍ਮਰੇਣ ।

ਤਸ੍ਯਾਮਨਙ੍ਗਜਯਜਙ੍ਗਮਦੇਵਤਾਯਾਂ ਅਸ੍ਤ੍ਰਾਣਿ ਨਿਰ੍ਜਿਤਜਗਨ੍ਤਿ ਕਿਮਰ੍ਪਿਤਾਨਿ ॥ 24 ॥

[ਏषਃ ਸ਼੍ਲੋਕਃ ਕੇषੁਚਨ ਸਂਸ੍ਕਰਣੇषੁ ਵਿਦ੍ਯਤੇ]

ਤਿਰ੍ਯਕ੍ਕਣ੍ਠ ਵਿਲੋਲ ਮੌਲਿ ਤਰਲੋਤ੍ਤਂ ਸਸ੍ਯ ਵਂਸ਼ੋਚ੍ਚਰਦ੍-

ਦੀਪ੍ਤਿਸ੍ਥਾਨ ਕृਤਾਵਧਾਨ ਲਲਨਾ ਲਕ੍षੈਰ੍ਨ ਸਂਲਕ੍षਿਤਾਃ ।

ਸਮ੍ਮੁਗ੍ਧੇ ਮਧੁਸੂਦਨਸ੍ਯ ਮਧੁਰੇ ਰਾਧਾਮੁਖੇਨ੍ਦੌ ਸੁਧਾ-

ਸਾਰੇ ਕਨ੍ਦਲਿਤਾਸ਼੍ਚਿਰਂ ਦਧਤੁ ਵਃ ਕ੍षੇਮਂ ਕਟਾਕ੍षੋਰ੍ਮ੍ਮਯ ॥ (25) ॥

॥ ਇਤਿ ਸ਼੍ਰੀਗੀਤਗੋਵਿਨ੍ਦੇ ਮੁਗ੍ਧਮਧੁਸੂਦਨੋ ਨਾਮ ਤृਤੀਯਃ ਸਰ੍ਗਃ ॥

Roman (IAST) Transliteration

|| tṛtīyaḥ sargaḥ ||

|| mugdhamadhusūdanaḥ ||

kaṃsārirapi saṃsāravāsanābandhaśṛṅkhalām |

rādhāmādhāya hṛdaye tatyāja vrajasundarīḥ || 18 ||

itastatastāmanusṛtya rādhikā-manaṅgabāṇavraṇakhinnamānasaḥ |

kṛtānutāpaḥ sa kalindanandinī-taṭāntakuñje viṣasāda mādhavaḥ || 19 ||

|| gītaṃ 7 ||

māmiyaṃ calitā vilokya vṛtaṃ vadhūnicayena |

sāparādhatayā mayāpi na vāritātibhayena ||

hari hari hatādaratayā gatā sā kupiteva || 1 ||

kiṃ kariṣyati kiṃ vadiṣyati sā ciraṃ viraheṇa |

kiṃ dhanena janena kiṃ mama jīvanena gṛheṇa || 2 ||

cintayāmi tadānanaṃ kuṭilabhru kopabhareṇa |

śoṇapadmamivopari bhramatākulaṃ bhramareṇa || 3 ||

tāmahaṃ hṛdi saṅgatāmaniśaṃ bhṛśaṃ ramayāmi |

kiṃ vane'nusarāmi tāmiha kiṃ vṛthā vilapāmi || 4 ||

tanvi khinnamasūyayā hṛdayaṃ tavākalayāmi |

tanna vedmi kuto gatāsi na tena te'nunayāmi || 5 ||

dṛśyate purato gatāgatameva me vidadhāsi |

kiṃ pureva sasambhramaṃ parirambhaṇaṃ na dadāsi || 6 ||

kṣamyatāmaparaṃ kadāpi tavedṛśaṃ na karomi |

dehi sundari darśanaṃ mama manmathena dunomi || 7 ||

varṇitaṃ jayadevakena hareridaṃ pravaṇena |

kindubilvasamudrasambhavarohiṇīramaṇena || 8 ||

hṛdi bisalatāhāro nāyaṃ bhujaṅgamanāyakaḥ kuvalayadalaśreṇī kaṇṭhe na sā garaladyutiḥ |

malayajarajo nedaṃ bhasma priyārahite mayi prahara na harabhrāntyānaṅga krudhā kimu dhāvasi || 20 ||

pāṇau mā kuru cūtasāyakamamuṃ mā cāpamāropaya krīḍānirjitaviśva mūrchitajanāghātena kiṃ pauruṣam |

tasyā eva mṛgīdṛśo manasijapreṅkhatkaṭākṣāśuga-śreṇījarjaritaṃ manāgapi mano nādyāpi sandhukṣate || 21 ||

bhrūcāpe nihitaḥ kaṭākṣaviśikho nirmātu marmavyathāṃ śyāmātmā kuṭilaḥ karotu kabarībhāro'pi mārodyamam |

mohaṃ tāvadayaṃ ca tanvi tanutāṃ bimbādaro rāgavān sadvṛttastanamaṇdalastava kathaṃ prāṇairmama krīḍati || 22 ||

tāni sparśasukhāni te ca taralāḥ snigdhā dṛśorvibhramā-stadvaktrāmbujasaurabhaṃ sa ca sudhāsyandī girāṃ vakrimā |

sā bimbādharamādhurīti viṣayāsaṅge'pi cenmānasaṃ tasyāṃ lagnasamādhi hanta virahavyādhiḥ kathaṃ vardhate || 23 ||

bhrūpallavaṃ dhanurapāṅgataraṅgitāni bāṇāḥ guṇaḥ śravaṇapāliriti smareṇa |

tasyāmanaṅgajayajaṅgamadevatāyāṃ astrāṇi nirjitajaganti kimarpitāni || 24 ||

[eṣaḥ ślokaḥ keṣucana saṃskaraṇeṣu vidyate]

tiryakkaṇṭha vilola mauli taralottaṃ sasya vaṃśoccarad-

dīptisthāna kṛtāvadhāna lalanā lakṣairna saṃlakṣitāḥ |

sammugdhe madhusūdanasya madhure rādhāmukhendau sudhā-

sāre kandalitāściraṃ dadhatu vaḥ kṣemaṃ kaṭākṣormmaya || (25) ||

|| iti śrīgītagovinde mugdhamadhusūdano nāma tṛtīyaḥ sargaḥ ||