śrīṃ sauṃ śaravaṇabhavaḥ śaraccandrāyutaprabhaḥ |
śaśāṅkaśekharasutaḥ śacīmāṅgalyarakṣakaḥ || 1 ||
śatāyuṣyapradātā ca śatakoṭiraviprabhaḥ |
śacīvallabhasuprītaḥ śacīnāyakapūjitaḥ || 2 ||
śacīnāthacaturvaktradevadaityābhivanditaḥ |
śacīśārtiharaścaiva śambhuḥ śambhūpadeśakaḥ || 3 ||
śaṅkaraḥ śaṅkaraprītaḥ śamyākakusumapriyaḥ |
śaṅkukarṇamahākarṇapramukhādyabhivanditaḥ || 4 ||
śacīnāthasutāprāṇanāyakaḥ śaktipāṇimān |
śaṅkhapāṇipriyaḥ śaṅkhopamaṣaḍgalasuprabhaḥ || 5 ||
śaṅkhaghoṣapriyaḥ śaṅkhacakraśūlādikāyudhaḥ |
śaṅkhadhārābhiṣekādipriyaḥ śaṅkaravallabhaḥ || 6 ||
śabdabrahmamayaścaiva śabdamūlāntarātmakaḥ |
śabdapriyaḥ śabdarūpaḥ śabdānandaḥ śacīstutaḥ || 7 ||
śatakoṭipravistārayojanāyatamandiraḥ |
śatakoṭiraviprakhyaratnasiṃhāsanānvitaḥ || 8 ||
śatakoṭimaharṣīndrasevitobhayapārśvabhūḥ |
śatakoṭisurastrīṇāṃ nṛttasaṅgītakautukaḥ || 9 ||
śatakoṭīndradikpālahastacāmarasevitaḥ |
śatakoṭyakhilāṇḍādimahābrahmāṇḍanāyakaḥ || 10 ||
śaṅkhapāṇividhibhyāṃ ca pārśvayorupasevitaḥ |
śaṅkhapadmanidhīnāṃ ca koṭibhiḥ parisevitaḥ || 11 ||
śaśāṅkādityakoṭībhiḥ savyadakṣiṇasevitaḥ |
śaṅkhapālādyaṣṭanāgakoṭībhiḥ parisevitaḥ || 12 ||
śaśāṅkārapataṅgādigrahanakṣatrasevitaḥ |
śaśibhāskarabhaumādigrahadoṣārtibhañjanaḥ || 13 ||
śatapatradvayakaraḥ śatapatrārcanapriyaḥ |
śatapatrasamāsīnaḥ śatapatrāsanastutaḥ || 14 ||
śārīrabrahmamūlādiṣaḍādhāranivāsakaḥ |
śatapatrasamutpannabrahmagarvavibhedanaḥ || 15 ||
śaśāṅkārdhajaṭājūṭaḥ śaraṇāgatavatsalaḥ |
rakārarūpo ramaṇo rājīvākṣo rahogataḥ || 16 ||
ratīśakoṭisaundaryo ravikoṭyudayaprabhaḥ |
rāgasvarūpo rāgaghno raktābjapriya eva ca || 17 ||
rājarājeśvarīputro rājendravibhavapradaḥ |
ratnaprabhākirīṭāgro ravicandrāgnilocanaḥ || 18 ||
ratnāṅgadamahābāhū ratnatāṭaṅkabhūṣaṇaḥ |
ratnakeyūrabhūṣāḍhyo ratnahāravirājitaḥ || 19 ||
ratnakiṅkiṇikāñcyādibaddhasatkaṭiśobhitaḥ |
ravasaṃyuktaratnābhanūpurāṅghrisaroruhaḥ || 20 ||
ratnakaṅkaṇacūlyādisarvābharaṇabhūṣitaḥ |
ratnasiṃhāsanāsīno ratnaśobhitamandiraḥ || 21 ||
rākendumukhaṣaṭkaśca ramāvāṇyādipūjitaḥ |
rākṣasāmaragandharvakoṭikoṭyabhivanditaḥ || 22 ||
raṇaraṅge mahādaityasaṅgrāmajayakautukaḥ |
rākṣasānīkasaṃhārakopāviṣṭāyudhānvitaḥ || 23 ||
rākṣasāṅgasamutpannaraktapānapriyāyudhaḥ |
ravayuktadhanurhasto ratnakukkuṭadhāraṇaḥ || 24 ||
raṇaraṅgajayo rāmāstotraśravaṇakautukaḥ |
rambhāghṛtācīviśvācīmenakādyabhivanditaḥ || 25 ||
raktapītāmbaradharo raktagandhānulepanaḥ |
raktadvādaśapadmākṣo raktamālyavibhūṣitaḥ || 26 ||
ravipriyo rāvaṇeśastotrasāmamanoharaḥ |
rājyaprado randhraguhyo rativallabhasupriyaḥ || 27 ||
raṇānubandhanirmukto rākṣasānīkanāśakaḥ |
rājīvasambhavadveṣī rājīvāsanapūjitaḥ || 28 ||
ramaṇīyamahācitramayūrārūḍhasundaraḥ |
ramānāthastuto rāmo rakārākarṣaṇakriyaḥ || 29 ||
vakārarūpo varado vajraśaktyabhayānvitaḥ |
vāmadevādisampūjyo vajrapāṇimanoharaḥ || 30 ||
vāṇīstuto vāsaveśo vallīkalyāṇasundaraḥ |
vallīvadanapadmārko vallīnetrotpaloḍupaḥ || 31 ||
vallīdvinayanānando vallīcittataṭāmṛtam |
vallīkalpalatāvṛkṣo vallīpriyamanoharaḥ || 32 ||
vallīkumudahāsyenduḥ vallībhāṣitasupriyaḥ |
vallīmanohṛtsaundaryo vallīvidyullatāghanaḥ || 33 ||
vallīmaṅgalaveṣāḍhyo vallīmukhavaśaṅkaraḥ |
vallīkucagiridvandvakuṅkumāṅkitavakṣakaḥ || 34 ||
vallīśo vallabho vāyusārathirvaruṇastutaḥ |
vakratuṇḍānujo vatso vatsalo vatsarakṣakaḥ || 35 ||
vatsapriyo vatsanātho vatsavīragaṇāvṛtaḥ |
vāraṇānanadaityaghno vātāpighnopadeśakaḥ || 36 ||
varṇagātramayūrastho varṇarūpo varaprabhuḥ |
varṇastho vāraṇārūḍho vajraśaktyāyudhapriyaḥ || 37 ||
vāmāṅgo vāmanayano vacadbhūrvāmanapriyaḥ |
varaveṣadharo vāmo vācaspatisamarcitaḥ || 38 ||
vasiṣṭhādimuniśreṣṭhavandito vandanapriyaḥ |
vakāranṛpadevastrīcorabhūtārimohanaḥ || 39 ||
ṇakārarūpo nādānto nāradādimunistutaḥ |
ṇakārapīṭhamadhyastho nagabhedī nageśvaraḥ || 40 ||
ṇakāranādasantuṣṭo nāgāśanarathasthitaḥ |
ṇakārajapasuprīto nānāveṣo nagapriyaḥ || 41 ||
ṇakārabindunilayo navagrahasurūpakaḥ |
ṇakārapaṭhanānando nandikeśvaravanditaḥ || 42 ||
ṇakāraghaṇṭāninado nārāyaṇamanoharaḥ |
ṇakāranādaśravaṇo nalinodbhavaśikṣakaḥ || 43 ||
ṇakārapaṅkajādityo navavīrādhināyakaḥ |
ṇakārapuṣpabhramaro navaratnavibhūṣaṇaḥ || 44 ||
ṇakārānarghaśayano navaśaktisamāvṛtaḥ |
ṇakāravṛkṣakusumo nāṭyasaṅgītasupriyaḥ || 45 ||
ṇakārabindunādajño nayajño nayanodbhavaḥ |
ṇakāraparvatendrāgrasamutpannasudhāraṇiḥ || 46 ||
ṇakārapeṭakamaṇirnāgaparvatamandiraḥ |
ṇakārakaruṇānando nādātmā nāgabhūṣaṇaḥ || 47 ||
ṇakārakiṅkiṇībhūṣo nayanādṛśyadarśanaḥ |
ṇakāravṛṣabhāvāso nāmapārāyaṇapriyaḥ || 48 ||
ṇakārakamalārūḍho nāmānantasamanvitaḥ |
ṇakāraturagārūḍho navaratnādidāyakaḥ || 49 ||
ṇakāramakuṭajvālāmaṇirnavanidhipradaḥ |
ṇakāramūlamantrārtho navasiddhādipūjitaḥ || 50 ||
ṇakāramūlanādānto ṇakārastambhanakriyaḥ |
bhakārarūpo bhaktārtho bhavo bhargo bhayāpahaḥ || 51 ||
bhaktapriyo bhaktavandyo bhagavānbhaktavatsalaḥ |
bhaktārtibhañjano bhadro bhaktasaubhāgyadāyakaḥ || 52 ||
bhaktamaṅgaladātā ca bhaktakalyāṇadarśanaḥ |
bhaktadarśanasantuṣṭo bhaktasaṅghasupūjitaḥ || 53 ||
bhaktastotrapriyānando bhaktābhīṣṭapradāyakaḥ |
bhaktasampūrṇaphalado bhaktasāmrājyabhogadaḥ || 54 ||
bhaktasālokyasāmīpyarūpamokṣavarapradaḥ |
bhavauṣadhirbhavaghnaśca bhavāraṇyadavānalaḥ || 55 ||
bhavāndhakāramārtāṇḍo bhavavaidyo bhavāyudham |
bhavaśailamahāvajro bhavasāgaranāvikaḥ || 56 ||
bhavamṛtyubhayadhvaṃsī bhāvanātītavigrahaḥ |
bhavabhūtapiśācaghno bhāsvaro bhāratīpriyaḥ || 57 || [bhaya]
bhāṣitadhvanimūlānto bhāvābhāvavivarjitaḥ |
bhānukopapitṛdhvaṃsī bhāratīśopadeśakaḥ || 58 ||
bhārgavīnāyakaśrīmadbhāgineyo bhavodbhavaḥ |
bhārakrauñcāsuradveṣo bhārgavīnāthavallabhaḥ || 59 ||
bhaṭavīranamaskṛtyo bhaṭavīrasamāvṛtaḥ |
bhaṭatārāgaṇoḍvīśo bhaṭavīragaṇastutaḥ || 60 ||
bhāgīratheyo bhāṣārtho bhāvanāśabarīpriyaḥ |
bhakāre kalicorāribhūtādyuccāṭanodyataḥ || 61 ||
vakārasukalāsaṃstho variṣṭho vasudāyakaḥ |
vakārakumudenduśca vakārābdhisudhāmayaḥ || 62 ||
vakārāmṛtamādhuryo vakārāmṛtadāyakaḥ |
dakṣe vajrābhītiyuto vāme śaktivarānvitaḥ || 63 ||
vakārodadhipūrṇenduḥ vakārodadhimauktikam |
vakārameghasalilo vāsavātmajarakṣakaḥ || 64 ||
vakāraphalasārajño vakārakalaśāmṛtam |
vakārapaṅkajaraso vasurvaṃśavivardhanaḥ || 65 ||
vakāradivyakamalabhramaro vāyuvanditaḥ |
vakāraśaśisaṅkāśo vajrapāṇisutāpriyaḥ || 66 ||
vakārapuṣpasadgandho vakārataṭapaṅkajam |
vakārabhramaradhvāno vayastejobalapradaḥ || 67 ||
vakāravanitānātho vaśyādyaṣṭapriyāpradaḥ |
vakāraphalasatkāro vakārājyahutāśanaḥ || 68 ||
varcasvī vāṅmano'tīto vātāpyarikṛtapriyaḥ |
vakāravaṭamūlastho vakārajaladhestaṭaḥ || 69 ||
vakāragaṅgāvegābdhiḥ vajramāṇikyabhūṣaṇaḥ |
vātarogaharo vāṇīgītaśravaṇakautukaḥ || 70 ||
vakāramakarārūḍho vakārajaladheḥ patiḥ |
vakārāmalamantrārtho vakāragṛhamaṅgalam || 71 ||
vakārasvargamāhendro vakārāraṇyavāraṇaḥ |
vakārapañjaraśuko valāritanayāstutaḥ || 72 ||
vakāramantramalayasānumanmandamārutaḥ |
vādyantabhānta ṣaṭkramya japānte śatrubhañjanaḥ || 73 ||
vajrahastasutāvallīvāmadakṣiṇasevitaḥ |
vakulotpalakādambapuṣpadāmasvalaṅkṛtaḥ || 74 ||
vajraśaktyādisampannadviṣaṭpāṇisaroruhaḥ |
vāsanāgandhaliptāṅgo vaṣaṭkāro vaśīkaraḥ || 75 ||
vāsanāyuktatāmbūlapūritānanasundaraḥ |
vallabhānāthasuprīto varapūrṇāmṛtodadhiḥ || 76 ||
iti śrī subrahmaṇya triśatī stotram |