asya śrīraṅganāthāṣṭottaraśatanāmastotramahāmantrasya vedavyāso bhagavānṛṣiḥ anuṣṭupchandaḥ bhagavān śrīmahāviṣṇurdevatā, śrīraṅgaśāyīti bījaṃ śrīkānta iti śaktiḥ śrīprada iti kīlakaṃ mama samastapāpanāśārthe śrīraṅgarājaprasāda siddhyarthe jape viniyogaḥ |
dhaumya uvāca |
śrīraṅgaśāyī śrīkāntaḥ śrīpradaḥ śritavatsalaḥ |
ananto mādhavo jetā jagannātho jagadguruḥ || 1 ||
suravaryaḥ surārādhyaḥ surarājānujaḥ prabhuḥ |
harirhatārirviśveśaḥ śāśvataḥ śambhuravyayaḥ || 2 ||
bhaktārtibhañjano vāgmī vīro vikhyātakīrtimān |
bhāskaraḥ śāstratattvajño daityaśāstā'mareśvaraḥ || 3 ||
nārāyaṇo naraharirnīrajākṣo narapriyaḥ |
brahmaṇyo brahmakṛdbrahmā brahmāṅgo brahmapūjitaḥ || 4 ||
kṛṣṇaḥ kṛtajño govindo hṛṣīkeśo'ghanāśanaḥ |
viṣṇurjiṣṇurjitārātiḥ sajjanapriya īśvaraḥ || 5 ||
trivikramastrilokeśaḥ trayyarthastriguṇātmakaḥ |
kākutsthaḥ kamalākāntaḥ kālīyoragamardanaḥ || 6 ||
kālāmbudaśyāmalāṅgaḥ keśavaḥ kleśanāśanaḥ |
keśiprabhañjanaḥ kānto nandasūnurarindamaḥ || 7 ||
rukmiṇīvallabhaḥ śaurirbalabhadro balānujaḥ |
dāmodaro hṛṣīkeśo vāmano madhusūdanaḥ || 8 ||
pūtaḥ puṇyajanadhvaṃsī puṇyaślokaśikhāmaṇiḥ |
ādimūrtirdayāmūrtiḥ śāntamūrtiramūrtimān || 9 ||
parambrahma parandhāma pāvanaḥ pavano vibhuḥ |
candraśchandomayo rāmaḥ saṃsārāmbudhitārakaḥ || 10 ||
āditeyo'cyuto bhānuḥ śaṅkaraśśiva ūrjitaḥ |
maheśvaro mahāyogī mahāśaktirmahatpriyaḥ || 11 ||
durjanadhvaṃsako'śeṣasajjanopāstasatphalam |
pakṣīndravāhano'kṣobhyaḥ kṣīrābdhiśayano vidhuḥ || 12 ||
janārdano jagaddheturjitamanmathavigrahaḥ |
cakrapāṇiḥ śaṅkhadhārī śārṅgī khaḍgī gadādharaḥ || 13 ||
evaṃ viṣṇośśataṃ nāmnāmaṣṭottaramiheritam |
stotrāṇāmuttamaṃ guhyaṃ nāmaratnastavābhidham || 14 ||
sarvadā sarvarogaghnaṃ cintitārthaphalapradam |
tvaṃ tu śīghraṃ mahārāja gaccha raṅgasthalaṃ śubham || 15 ||
snātvā tulārke kāveryāṃ māhātmya śravaṇaṃ kuru |
gavāśvavastradhānyānnabhūmikanyāprado bhava || 16 ||
dvādaśyāṃ pāyasānnena sahasraṃ daśa bhojaya |
nāmaratnastavākhyena viṣṇoraṣṭaśatena ca |
stutvā śrīraṅganāthaṃ tvamabhīṣṭaphalamāpnuhi || 17 ||
iti tulākāverīmāhātmye śantanuṃ prati dhaumyopadiṣṭa śrīraṅganāthāṣṭottaraśatanāma stotram |