oṃ śa-nno̭ mi॒traśśaṃ-va~rṷṇaḥ | śa-nno̭ bhavatvarya॒mā | śa-nna॒ indro॒ bṛha॒spatiḥ̭ | śa-nno॒ viṣṇṷrurukra॒maḥ | namo॒ brahma̭ṇe | nama̭ste vāyo | tvame॒va pra॒tyakṣa॒-mbrahmā̭si | tvame॒va pra॒tyakṣa॒-mbrahma̭ vadiṣyāmi | ṛ॒taṃ-va~̭diṣyāmi | sa॒tyaṃ-va~̭diṣyāmi | tanmāma̭vatu | tadva॒ktāra̭mavatu | ava̭tu॒ mām | ava̭tu va॒ktāram᳚ |
oṃ śānti॒-śśānti॒-śśāntiḥ̭ || 1 ||
śa-nno̭ mi॒traśśaṃ-va~rṷṇaḥ | śa-nno̭ bhavatvarya॒mā | śa-nna॒ indro॒ bṛha॒spatiḥ̭ | śa-nno॒ viṣṇṷrurukra॒maḥ | namo॒ brahma̭ṇe | nama̭ste vāyo | tvame॒va pra॒tyakṣa॒-mbrahmā̭si | tvāme॒va pra॒tyakṣa॒-mbrahmāvā̭diṣam | ṛ॒tama̭vādiṣam | sa॒tyama̭vādiṣam | tanmāmā̭vīt | tadva॒ktāra̭māvīt | āvī॒nmām | āvī᳚dva॒ktāram᳚ |
oṃ śānti॒-śśānti॒-śśāntiḥ̭ || 2 ||
oṃ sa॒ha nā̭vavatu | sa॒ha naṷ bhunaktu | sa॒ha vī॒rya̭-ṅkaravāvahai | te॒ja॒svinā॒vadhī̭tamastu॒ mā vi̭dviṣā॒vahai᳚ |
oṃ śānti॒-śśānti॒-śśāntiḥ̭ || 3 ||
namo̭ vā॒ce yā co̭di॒tā yā cānṷditā॒ tasyai̭ vā॒ce namo॒
namo̭ vā॒ce namo̭ vā॒caspata̭ye॒ nama॒ ṛṣi̭bhyo mantra॒kṛdbhyo॒ mantra̭patibhyo॒
mā māmṛṣa̭yo mantra॒kṛto̭ mantra॒pata̭yaḥ॒ parā̭du॒rmā-'hamṛṣī᳚-nmantra॒kṛto̭
mantra॒patī॒-nparā̭dāṃ-vai~śvade॒vīṃ-vā~ca̭mudyāsagṃ śi॒vā mada̭stā॒ñjuṣṭāṃ᳚
de॒vebhya॒-śśarma̭ me॒ dyau-śśarma̭ pṛthi॒vī śarma॒ viśva̭mi॒da-ñjaga̭t |
śarma̭ ca॒ndraśca॒ sūrya̭śca॒ śarma̭ brahma prajāpa॒tī |
bhū॒taṃ-va~̭diṣye॒ bhuva̭naṃ-va~diṣye॒ tejo̭ vadiṣye॒ yaśo̭ vadiṣye॒ tapo̭ vadiṣye॒
brahma̭ vadiṣye sa॒tyaṃ-va~̭diṣye॒ tasmā̭ a॒hami॒da-mṷpa॒stara̭ṇa॒-mupa̭stṛṇa
upa॒stara̭ṇa-mme pra॒jāyai̭ paśū॒nā-mbhṷ̄yādupa॒stara̭ṇama॒ha-mpra॒jāyai̭ paśū॒nāṃ
bhṷ̄yāsa॒-mprāṇā̭pānau mṛ॒tyormā̭pāta॒-mprāṇā̭pānau॒ mā mā̭ hāsiṣṭa॒-mmadhṷ
maniṣye॒ madhṷ janiṣye॒ madhṷ vakṣyāmi॒ madhṷ vadiṣyāmi॒ madhṷmatī-nde॒vebhyo॒
vāca̭mudyāsagṃ śuśrū॒ṣeṇyā᳚-mmanu॒ṣye᳚bhya॒sta-mmā̭ de॒vā a̭vantu
śo॒bhāyai̭ pi॒taro-'nṷmadantu ||
oṃ śānti॒-śśānti॒-śśāntiḥ̭ || 4 ||
śanno॒ vātaḥ̭ pavatā-mmāta॒riśvā॒ śanna̭ stapatu॒ sūryaḥ̭ |
ahā̭ni॒ śa-mbha̭vantu na॒ śśagṃ rātriḥ॒ prati̭dhīyatām ||
śamu॒ṣā no॒ vyṷcchatu॒ śamā̭di॒tya udḙtu naḥ |
śi॒vā na॒ śśanta̭mābhava sumṛḍī॒kā sara̭svati | māte॒ vyo̭ma sa॒ndṛśi̭ || 1
iḍā̭yai॒ vāstva̭si vāstu॒madvā᳚stu॒manto̭ bhūyāsma॒ mā vāsto᳚śchiths
mahyavā॒stu ssa bhṷ̄yā॒d yo᳚-'smā-ndveṣṭi॒ ya-ñca̭ va॒ya-ndvi॒ṣmaḥ ||
pra॒ti॒ṣṭhā-'si̭ prati॒ṣṭhāva̭nto bhūyāsma॒ mā pra̭ti॒ṣṭhāyā᳚chiths mahya
prati॒ṣṭhassa bhṷ̄yā॒d yo᳚-'smā-ndveṣṭi॒ ya-ñca̭ va॒ya-ndvi॒ṣmaḥ || 2
āvā̭ta vāhi bheṣa॒jaṃ-vi~vā̭ta-vāhi॒ yadrapaḥ̭ |
tvagṃhi vi॒śvabhḙṣajo de॒vānā᳚-ndū॒ta īya̭se ||
dvāvi॒mau vātaṷ vāta॒ āsindho॒rā pa̭rā॒vataḥ̭ |
dakṣa̭-mme a॒nya ā॒vātu॒ parā॒-'nyo vā̭tu॒ yadrapaḥ̭ ||
yada॒do vā̭ta te gṛ॒hḙ-'mṛta̭sya ni॒dhirhi॒taḥ |
tato̭ no dehi jī॒vase॒ tato̭ no dhehi bheṣa॒jam |
tato̭ no॒ maha॒ āva̭ha॒ vāta॒ āvā̭tu bheṣa॒jam ||
śa॒mbhūr-ma̭yo॒bhūr-no̭ hṛ॒de praṇa॒ āyugṃ̭ṣi tāriṣat | indra̭sya gṛ॒ho̭-'si॒ ta-ntvā॒ pra̭padye॒ sagu॒ssāśvaḥ̭ | sa॒ha yanme॒ asti॒ tena̭ || 3
bhūḥ prapa̭dye॒ bhuvaḥ॒ prapa̭dye॒ suvaḥ॒ prapa̭dye॒ bhūrbhuva॒ssuvaḥ॒ prapa̭dye vā॒yuṃ
prapa॒dye-'nā᳚rtā-nde॒vatā॒-mprapa॒dye-'śmā̭namākha॒ṇa-mprapa̭dye pra॒jāpa̭ter
brahmako॒śa-mbrahma॒ prapa̭dya॒ o-mprapa̭dye ||
a॒ntari̭kṣa-mma u॒rva̭ntara̭-mbṛ॒hada॒gnayaḥ॒ parva̭tāśca॒ yayā॒ vātaḥ̭ sva॒styā
sva̭sti॒māntayā᳚ sva॒styā sva̭sti॒ māna̭sāni ||
prāṇā̭pānau mṛ॒tyor mā̭ pāta॒-mprāṇā̭pānau॒ mā mā̭ hāsiṣṭa॒-mmayi̭ me॒dhā-mmayi̭ pra॒jā-mmayya॒gni stejo̭ dadhātu॒
mayi̭ me॒dhā-mmayi̭ pra॒jā-mmayīndra̭ indri॒ya-nda̭dhātu॒
mayi̭ me॒dhā-mmayi̭ pra॒jā-mmayi॒ sūryo॒ bhrājo̭ dadhātu || 4
dyu॒bhira॒ktubhiḥ॒ pari̭pāta-ma॒smā-nari̭ṣṭebhiraśvinā॒ saubha̭gebhiḥ |
tanno̭ mi॒tro varṷṇo māmahantā॒-madi̭tiḥ॒-sindhuḥ̭ pṛthi॒vī u॒tadyauḥ ||
kayā̭naści॒tra ābhṷva dū॒tī sa॒dāvṛ̭dha॒ ssakhā᳚ | kayā॒śaci̭ṣṭhayā vṛ॒tā ||
kastvā̭ sa॒tyo madā̭nā॒-mmagṃhi̭ṣṭho mathsa॒dandha̭saḥ |
dṛ॒ḍhā-ci̭dā॒-ruje॒-vasṷ ||
a॒bhīṣuṇa॒ ssakhī̭nā-mavi॒tā-ja̭rit-ṝ॒ṇām | śa॒ta-mbha̭vāsyū॒tibhiḥ̭ ||
vaya̭ssupa॒rṇā upa̭sedu॒rindra̭-mpri॒yamḙdhā॒ ṛṣa̭yo॒ nādha̭mānāḥ |
apa̭ddhvā॒ntamū᳚rṇu॒hi pū॒rdhicakṣṷr mumu॒gdhya̭smā-nni॒dhayḙva ba॒ddhān ||
śanno̭ de॒vīra॒bhiṣṭa̭ya॒ āpo̭ bhavantu pī॒taye᳚ | śaṃyo~-ra॒bhisra̭vantunaḥ ||
īśā̭nā॒ vāryā̭ṇā॒-ṅkṣaya̭ntī ścarṣaṇī॒nām | a॒po yā̭cāmi bheṣa॒jam ||
su॒mi॒trāna॒ āpa॒ oṣa̭dhaya ssantu durmi॒trāstasmai̭ bhūyā-su॒ryo᳚-'smān
dveṣṭi॒ ya-ñca̭ va॒ya-ndvi॒ṣmaḥ || 5
āpo॒hiṣṭhā ma̭yo॒bhuva॒-stāna̭ ū॒rje da̭dhātana | ma॒he raṇā̭ya॒ cakṣa̭se |
yo vaḥ̭ śi॒vata̭mo॒ rasa॒stasya̭ bhājayate॒ha naḥ̭ | u॒śa॒tīri̭va mā॒taraḥ̭ |
tasmā॒ ara̭-ṅgamāmavo॒ yasya॒ kṣayā̭ya॒ jinva̭tha | āpo̭ ja॒naya̭thā canaḥ ||
pṛ॒thi॒vī śā॒ntā sā-'gninā̭ śā॒ntā sā mḙ śā॒ntā śucagṃ̭ śamayatu |
a॒ntari̭kṣagṃ śā॒nta-ntad vā॒yunā̭ śā॒nta-ntanmḙ śā॒ntagṃ śucagṃ̭ śamayatu |
dyau-śśā॒ntā sā-''di॒tyena̭ śā॒ntā sā mḙ śā॒ntā śucagṃ̭ śamayatu || 6
pṛ॒thi॒vī śānti̭ra॒ntari̭kṣa॒gṃ॒ śānti॒r dyau śśānti॒r diśa॒-śśānti̭-ravāntaradi॒śāḥ-śānti̭-ra॒gniśśānti̭r-vā॒yuśśānti̭-rādi॒tya śśānti̭-
śca॒ndramā॒ śśānti॒r-nakṣa̭trāṇi॒ śānti॒-rāpa॒śśānti॒-roṣa̭dhaya॒ śśānti॒r-
vana॒spata̭ya॒ śśānti॒r-gau śśānti̭-ra॒jā śānti॒-raśva॒ śśāntiḥ॒ purṷṣa॒ śśānti॒r brahma॒ śānti̭r brāhma॒ṇa śśānti॒-śśānti̭-re॒va śānti॒ śśānti̭r me astu śāntiḥ̭ ||
tayā॒-'hagṃ śā॒ntyā sa̭rva śā॒ntyā mahya̭-ndvi॒pade॒ catṷṣpade ca॒
śānti̭-ṅkaromi॒ śānti̭r me astu॒ śāntiḥ̭ || 7
eha॒ śrīśca॒ hrīśca॒ dhṛti̭śca॒ tapo̭ me॒dhā pra̭ti॒ṣṭhā śra॒ddhā sa॒tya-ndharma̭ścai॒tāni॒
motti̭ṣṭhanta॒-manūtti̭ṣṭhantu॒ māmā॒g॒ śrīśca॒ hrīśca॒ dhṛti̭śca॒ tapo̭ me॒dhā pra̭ti॒ṣṭhā
śra॒ddhā sa॒tya-ndharma̭ścai॒tāni̭ mā॒ mā hā̭siṣuḥ ||
udāyṷṣā svā॒yuṣo-doṣa̭dhīnā॒gṃ॒ rase॒no-tpa॒rjanya̭sya॒ śuṣme॒ṇoda̭sthā-
ma॒mṛtā॒gṃ॒ anṷ || taccakṣṷr de॒vahi̭ta-mpu॒rastā᳚-cchu॒kramu॒ccara̭t || 8
paśyḙma śa॒rada̭śśa॒ta-ñjīvḙma śa॒rada̭śśa॒ta-nnandā̭ma śa॒rada̭śśa॒ta-mmodā̭ma
śa॒rada̭śśa॒ta-mbhavā̭ma śa॒rada̭śśa॒tagṃ śṛ॒ṇavā̭ma śa॒rada̭śśa॒ta-mprabra̭vāma
śa॒rada̭śśa॒ta-majī̭tāsyāma śa॒rada̭śśa॒ta-ñjokca॒ sūrya̭-ndṛ॒śe ||
ya uda̭gā-nmaha॒to-'rṇavā᳚n vi॒brāja̭māna-ssari॒rasya॒ maddhyā॒thsa mā̭
vṛṣa॒bho lo̭hitā॒kṣa ssūryo̭ vipa॒ści-nmana̭sā punātu || 9
brahma̭ṇa॒ścota̭nyasi॒ brahma̭ṇa ā॒ṇīstho॒ brahma̭ṇa ā॒vapa̭namasi dhāri॒teyaṃ
pṛ̭thi॒vī brahma̭ṇā ma॒hī dhā̭ri॒ta-mḙnena ma॒hada॒ntari̭kṣa॒-ndiva̭-ndādhāra
pṛthi॒vīgṃ sadḙvāṃ॒ya~da॒haṃve~da॒ tada॒ha-ndhā̭rayāṇi॒ māmadvedo-'dhi॒ visra̭sat |
me॒dhā॒ma॒nī॒ṣe māvi̭śatāgṃ sa॒mīcī̭ bhū॒tasya॒ bhavya॒syāva̭ruddhyai॒
sarva॒māyṷrayāṇi॒ sarva॒māyṷrayāṇi || 10
ā॒bhir gī॒rbhir yadato̭na ū॒namāpyā̭yaya harivo॒ vardha̭mānaḥ |
ya॒dā sto॒tṛbhyo॒ mahi̭ go॒trā ru॒jāsi̭ bhūyiṣṭha॒bhājo॒ adha̭te śyāma |
brahma॒ prāvā̭diṣma॒ tanno॒ māhā̭sīt ||
oṃ śānti॒-śśānti॒-śśāntiḥ̭ || 5 ||