kadācana vrajaśiśubhiḥ samaṃ bhavān
vanāśane vihitamatiḥ pragetarām |
samāvṛto bahutaravatsamaṇḍalaiḥ
satemanairniragamadīśa jemanaiḥ ||1||
viniryatastava caraṇāmbujadvayā-
dudañcitaṃ tribhuvanapāvanaṃ rajaḥ |
maharṣayaḥ pulakadharaiḥ kalebarai-
rudūhire dhṛtabhavadīkṣaṇotsavāḥ ||2||
pracārayatyaviralaśādvale tale
paśūn vibho bhavati samaṃ kumārakaiḥ |
aghāsuro nyaruṇadaghāya vartanī
bhayānakaḥ sapadi śayānakākṛtiḥ ||3||
mahācalapratimatanorguhānibha-
prasāritaprathitamukhasya kānane |
mukhodaraṃ viharaṇakautukādgatāḥ
kumārakāḥ kimapi vidūrage tvayi ||4||
pramādataḥ praviśati pannagodaraṃ
kvathattanau paśupakule savātsake |
vidannidaṃ tvamapi viveśitha prabho
suhṛjjanaṃ viśaraṇamāśu rakṣitum ||5||
galodare vipulitavarṣmaṇā tvayā
mahorage luṭhati niruddhamārute |
drutaṃ bhavān vidalitakaṇṭhamaṇḍalo
vimocayan paśupapaśūn viniryayau ||6||
kṣaṇaṃ divi tvadupagamārthamāsthitaṃ
mahāsuraprabhavamaho maho mahat |
vinirgate tvayi tu nilīnamañjasā
nabhaḥsthale nanṛturatho jaguḥ surāḥ ||7||
savismayaiḥ kamalabhavādibhiḥ surai-
ranudrutastadanu gataḥ kumārakaiḥ |
dine punastaruṇadaśāmupeyuṣi
svakairbhavānatanuta bhojanotsavam ||8||
viṣāṇikāmapi muralīṃ nitambake
niveśayan kabaladharaḥ karāmbuje |
prahāsayan kalavacanaiḥ kumārakān
bubhojitha tridaśagaṇairmudā nutaḥ ||9||
sukhāśanaṃ tviha tava gopamaṇḍale
makhāśanāt priyamiva devamaṇḍale |
iti stutastridaśavarairjagatpate
marutpurīnilaya gadāt prapāhi mām ||10||