dhyānaṃ
acyutānanta govinda viṣṇo nārāyaṇā'mṛta
rogānme nāśayā'śeṣānāśu dhanvantare hare |
ārogyaṃ dīrghamāyuṣyaṃ balaṃ tejo dhiyaṃ śriyaṃ
svabhaktebhyo'nugṛhṇantaṃ vande dhanvantariṃ harim ||
śaṅkhaṃ cakraṃ jalaukāṃ dadhadamṛtaghaṭaṃ cārudorbhiścaturbhiḥ |
sūkṣmasvacchātihṛdyāṃśuka parivilasanmaulimambhojanetram |
kālāmbhodojjvalāṅgaṃ kaṭitaṭavilasaccārupītāmbarāḍhyam |
vande dhanvantariṃ taṃ nikhilagadavanaprauḍhadāvāgnilīlam ||
dhanvantarerimaṃ ślokaṃ bhaktyā nityaṃ paṭhanti ye |
anārogyaṃ na teṣāṃ syāt sukhaṃ jīvanti te ciram ||
mantraṃ
oṃ namo bhagavate vāsudevāya dhanvantaraye amṛtakalaśahastāya [vajrajalaukahastāya] sarvāmayavināśanāya trailokyanāthāya śrīmahāviṣṇave svāhā |
[pāṭhāntaraḥ]
oṃ namo bhagavate mahāsudarśanāya vāsudevāya dhanvantaraye amṛtakalaśahastāya sarvabhayavināśāya sarvaroganivāraṇāya trailokyapataye trailokyanidhaye śrīmahāviṣṇusvarūpa śrīdhanvantarīsvarūpa śrī śrī śrī auṣadhacakra nārāyaṇāya svāhā |
gāyatrī mantram
oṃ vāsudevāya vidmahe sudhāhastāya dhīmahi |
tanno dhanvantariḥ pracodayāt |
tārakamantram
oṃ dhaṃ dhanvantaraye namaḥ |