📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
3.6 അരണ്യകാണ്ഡ - ഷഷ്ഠ സര്ഗഃ
3.6 Aranyakanda - Shashtha Sargah
Valmiki Malayalam
ശ്രീമദ്വാല്മീകീയ രാമായണേ അരണ്യകാണ്ഡമ് ।
അഥ ഷഷ്ഠസ്സര്ഗഃ ।
ശരഭങ്ഗേ ദിവം പ്രാപ്തേ മുനിസങ്ഘാസ്സമാഗതാഃ ।
അഭ്യഗച്ഛന്ത കാകുത്സ്ഥം രാമം ജ്വലിതതേജസമ് ॥ 1 ॥
വൈഖാനസാ വാലഖില്യാസ്സമ്പ്രക്ഷാലാ മരീചിപാഃ ।
അശ്മകുട്ടാശ്ച ബഹവഃ പത്രാഹാരാശ്ച താപസാഃ ॥ 2 ॥
ദന്തോലൂഖലിനശ്ചൈവ തഥൈവോന്മജ്ജകാഃ പരേ ।
ഗാത്രശയ്യാ അശയ്യാശ്ച തഥൈവാഭ്രാവകാശകാഃ ॥ 3 ॥
മുനയസ്സലിലാഹാരാവായുഭക്ഷാ സ്തഥാപരേ ।
ആകാശനിലയാശ്ചൈവ തഥാ സ്ഥണ്ഡിലശായിനഃ ॥ 4 ॥
വ്രതോപവാസിനോ ദാന്താസ്തഥാഽര്ദ്രപടവാസസഃ ।
സജപാശ്ച തപോനിത്യാസ്തഥാ പഞ്ചതപോഽന്വിതാഃ ॥ 5 ॥
സര്വേ ബ്രാഹ്മ്യാ ശ്രിയാ ജുഷ്ടാ ദൃഢയോഗാസ്സമാഹിതാഃ ।
ശരഭങ്ഗാശ്രമേ രാമമഭിജഗ്മുശ്ച താപസാഃ ॥ 6 ॥
അഭിഗമ്യ ച ധര്മജ്ഞാ രാമം ധര്മഭൃതാം വരമ് ।
ഊചുഃ പരമധര്മജ്ഞമൃഷിസങ്ഘാസ്സമാഹിതാഃ ॥ 7 ॥
ത്വമിക്ഷ്വാകുകുലസ്യാസ്യ പൃഥിവ്യാശ്ച മഹാരഥ ।
പ്രധാനശ്ചാസി നാഥശ്ച ദേവാനാം മഘവാനിവ ॥ 8 ॥
വിശ്രുതസ്ത്രിഷു ലോകേഷു യശസാ വിക്രമേണ ച ।
പിതൃഭക്തിശ്ച സത്യം ച ത്വയി ധര്മശ്ച പുഷ്കലഃ ॥ 9 ॥
ത്വാമാസാദ്യ മഹാത്മാനം ധര്മജ്ഞം ധര്മവത്സലമ് ।
അര്ഥിത്വാന്നാഥ വക്ഷ്യാമസ്തച്ച നഃ ക്ഷന്തുമര്ഹസി ॥ 10 ॥
അധര്മസ്സുമഹാംസ്താത ഭവേത്തസ്യ മഹീപതേഃ ।
യോ ഹരേദ്ബലിഷഡ്ഭാഗാം ന ച രക്ഷതി പുത്രവത് ॥ 11 ॥
യുഞ്ജാനസ്സ്വാനിവ പ്രാണാന്പ്രാണൈരിഷ്ടാന്സുതാനിവ ।
നിത്യയുക്തസ്സദാ രക്ഷന്സര്വാന്വിഷയവാസിനഃ ॥ 12 ॥
പ്രാപ്നോതി ശാശ്വതീം രാമ കീര്തിം സ ബഹുവാര്ഷികീമ് ।
ബ്രഹ്മണസ്സ്ഥാനമാസാദ്യ തത്ര ചാപി മഹീയതേ ॥ 13 ॥
യത്കരോതി പരം ധര്മ മുനിര്മൂലഫലാശനഃ ।
തത്ര രാജ്ഞശ്ചതുര്ഭാഗ പ്രജാ ധര്മേണ രക്ഷിതഃ ॥ 14 ॥
സോഽയം ബ്രാഹ്മണഭൂയിഷ്ഠോ വാനപ്രസ്ഥഗണോ മഹാന് ।
ത്വന്നാഥോഽനാഥവദ്രാമ രാക്ഷസൈര്വധ്യതേ ഭൃശമ് ॥ 15 ॥
ഏഹി പശ്യ ശരീരാണി മുനീനാം ഭാവിതാത്മനാമ് ।
ഹതാനാം രാക്ഷസൈര്ഘോരൈര്ബഹൂനാം ബഹുധാ വനേ ॥ 16 ॥
പമ്പാനദീനിവാസാനാമനുമന്ദാകിനീമപി ।
ചിത്രകൂടാലയാനാം ച ക്രിയതേ കദനം മഹത് ॥ 17 ॥
ഏവം വയം ന മൃഷ്യാമോ വിപ്രകാരം തപസ്വിനാമ് ।
ക്രിയമാണം വനേ ഘോരം രക്ഷോഭിര്ഭീമകര്മഭിഃ ॥ 18 ॥
തതസ്ത്വാം ശരണാര്ഥം ച ശരണ്യം സമുപസ്ഥിതാഃ ।
പരിപാലയ നോ രാമ വധ്യമാനാന്നിശാചരൈഃ ॥ 19 ॥
പരാ ത്വത്തോ ഗതിര്വീര പൃഥിവ്യാം നോപപദ്യതേ ।
പരിപാലയ ന സ്സര്വാന്രാക്ഷസേഭ്യോ നൃപാത്മജ ॥ 20 ॥
ഏതച്ഛ്രുത്വാ തു കാകുത്സ്ഥസ്താപസാനാം തപസ്വിനാമ് ।
ഇദം പ്രോവാച ധര്മാത്മാ സര്വാനേവ തപസ്വിനഃ ॥ 21 ॥
നൈവമര്ഹഥ മാം വക്തുമാജ്ഞാപ്യോഽഹം തപസ്വിനാമ് ।
കേവലേനാത്മകാര്യേണ പ്രവേഷ്ടവ്യം മയാ വനമ് ॥ 22 ॥
വിപ്രകാരമപാക്രഷ്ടും രാക്ഷസൈര്ഭവതാമിമമ് ।
പിതുസ്തു നിര്ദേശകരഃ പ്രവിഷ്ടോഽഹമിദം വനമ് ॥ 23 ॥
ഭവതാമര്ഥസിദ്ധ്യര്ഥമാഗതോഽഹം യദൃച്ഛയാ ।
തസ്യ മേഽയം വനേ വാസോ ഭവിഷ്യതി മഹാഫലഃ ॥ 24 ॥
തപസ്വിനാം രണേ ശത്രൂന്ഹന്തുമിച്ഛാമി രാക്ഷസാന് ।
പശ്യന്തു വീര്യമൃഷയസ്സഭ്രാതുര്മേ തപോധനാഃ ॥ 25 ॥
ദത്ത്വാഽഭയം ചാപി തപോധനാനാം ധര്മേ ധൃതാത്മാ സഹ ലക്ഷ്മണേന ।
തപോധനൈശ്ചാപി സഭാജ്യവൃത്തഃ സുതീക്ഷ്ണമേവാഭിജഗാമ വീരഃ ॥ 26 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാണ്ഡേ ഷഷ്ഠസ്സര്ഗഃ ॥
Roman (IAST) Transliteration
śrīmadvālmīkīya rāmāyaṇe araṇyakāṇḍam |
atha ṣaṣṭhassargaḥ |
śarabhaṅge divaṃ prāpte munisaṅghāssamāgatāḥ |
abhyagacchanta kākutsthaṃ rāmaṃ jvalitatejasam || 1 ||
vaikhānasā vālakhilyāssamprakṣālā marīcipāḥ |
aśmakuṭṭāśca bahavaḥ patrāhārāśca tāpasāḥ || 2 ||
dantolūkhalinaścaiva tathaivonmajjakāḥ pare |
gātraśayyā aśayyāśca tathaivābhrāvakāśakāḥ || 3 ||
munayassalilāhārāvāyubhakṣā stathāpare |
ākāśanilayāścaiva tathā sthaṇḍilaśāyinaḥ || 4 ||
vratopavāsino dāntāstathā'rdrapaṭavāsasaḥ |
sajapāśca taponityāstathā pañcatapo'nvitāḥ || 5 ||
sarve brāhmyā śriyā juṣṭā dṛḍhayogāssamāhitāḥ |
śarabhaṅgāśrame rāmamabhijagmuśca tāpasāḥ || 6 ||
abhigamya ca dharmajñā rāmaṃ dharmabhṛtāṃ varam |
ūcuḥ paramadharmajñamṛṣisaṅghāssamāhitāḥ || 7 ||
tvamikṣvākukulasyāsya pṛthivyāśca mahāratha |
pradhānaścāsi nāthaśca devānāṃ maghavāniva || 8 ||
viśrutastriṣu lokeṣu yaśasā vikrameṇa ca |
pitṛbhaktiśca satyaṃ ca tvayi dharmaśca puṣkalaḥ || 9 ||
tvāmāsādya mahātmānaṃ dharmajñaṃ dharmavatsalam |
arthitvānnātha vakṣyāmastacca naḥ kṣantumarhasi || 10 ||
adharmassumahāṃstāta bhavettasya mahīpateḥ |
yo haredbaliṣaḍbhāgāṃ na ca rakṣati putravat || 11 ||
yuñjānassvāniva prāṇānprāṇairiṣṭānsutāniva |
nityayuktassadā rakṣansarvānviṣayavāsinaḥ || 12 ||
prāpnoti śāśvatīṃ rāma kīrtiṃ sa bahuvārṣikīm |
brahmaṇassthānamāsādya tatra cāpi mahīyate || 13 ||
yatkaroti paraṃ dharma munirmūlaphalāśanaḥ |
tatra rājñaścaturbhāga prajā dharmeṇa rakṣitaḥ || 14 ||
so'yaṃ brāhmaṇabhūyiṣṭho vānaprasthagaṇo mahān |
tvannātho'nāthavadrāma rākṣasairvadhyate bhṛśam || 15 ||
ehi paśya śarīrāṇi munīnāṃ bhāvitātmanām |
hatānāṃ rākṣasairghorairbahūnāṃ bahudhā vane || 16 ||
pampānadīnivāsānāmanumandākinīmapi |
citrakūṭālayānāṃ ca kriyate kadanaṃ mahat || 17 ||
evaṃ vayaṃ na mṛṣyāmo viprakāraṃ tapasvinām |
kriyamāṇaṃ vane ghoraṃ rakṣobhirbhīmakarmabhiḥ || 18 ||
tatastvāṃ śaraṇārthaṃ ca śaraṇyaṃ samupasthitāḥ |
paripālaya no rāma vadhyamānānniśācaraiḥ || 19 ||
parā tvatto gatirvīra pṛthivyāṃ nopapadyate |
paripālaya na ssarvānrākṣasebhyo nṛpātmaja || 20 ||
etacchrutvā tu kākutsthastāpasānāṃ tapasvinām |
idaṃ provāca dharmātmā sarvāneva tapasvinaḥ || 21 ||
naivamarhatha māṃ vaktumājñāpyo'haṃ tapasvinām |
kevalenātmakāryeṇa praveṣṭavyaṃ mayā vanam || 22 ||
viprakāramapākraṣṭuṃ rākṣasairbhavatāmimam |
pitustu nirdeśakaraḥ praviṣṭo'hamidaṃ vanam || 23 ||
bhavatāmarthasiddhyarthamāgato'haṃ yadṛcchayā |
tasya me'yaṃ vane vāso bhaviṣyati mahāphalaḥ || 24 ||
tapasvināṃ raṇe śatrūnhantumicchāmi rākṣasān |
paśyantu vīryamṛṣayassabhrāturme tapodhanāḥ || 25 ||
dattvā'bhayaṃ cāpi tapodhanānāṃ dharme dhṛtātmā saha lakṣmaṇena |
tapodhanaiścāpi sabhājyavṛttaḥ sutīkṣṇamevābhijagāma vīraḥ || 26 ||
ityārṣe śrīmadrāmāyaṇe vālmīkīya ādikāvye araṇyakāṇḍe ṣaṣṭhassargaḥ ||
InfoLyter.in — Sacred Vedic Knowledge Portal · Free forever