📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
3.48 അരണ്യകാണ്ഡ - അഷ്ടചത്വാരിംശ സര്ഗഃ
3.48 Aranyakanda - Ashtachatvarimsha Sargah
Valmiki Malayalam
ശ്രീമദ്വാല്മീകീയ രാമായണേ അരണ്യകാണ്ഡമ് ।
അഥ അഷ്ടചത്വാരിംശസ്സര്ഗഃ ।
ഏവം ബൃവന്ത്യാം സീതായാം സംരബ്ദഃ പരുഷം വചഃ ।
ലലാടേ ഭൃകുടീം കൃത്വാ രാവണഃ പ്രത്യുവാച ഹ ॥ 1 ॥
ഭ്രാതാ വൈശ്രവണസ്യാഹം സാപത്ന്യോ വരവര്ണിനി ।
രാവണോ നാമ ഭദ്രം തേ ദശഗ്രീവഃ പ്രതാപവാന് ॥ 2 ॥
യസ്യ ദേവാസ്സഗന്ധര്വാഃ പിശാചപതഗോരഗാഃ ।
വിദ്രവന്തി ഭയാദ്ഭീതാ മൃത്യോരിവ സദാ പ്രജാഃ ॥ 3 ॥
യേന വൈശ്രവണോ രാജാ ദ്വൈമാത്രഃ കാരണാന്തരേ ।
ദ്വന്ദ്വമാസാദിതഃ ക്രോധാദ്രണേ വിക്രമ്യ നിര്ജിതഃ ॥ 4 ॥
യദ്ഭയാര്തഃ പരിത്യജ്യ സ്വമധിഷ്ഠാനമൃദ്ധിമത് ।
കൈലാസം പര്വതശ്രേഷ്ഠമധ്യാസ്തേ നരവാഹനഃ ॥ 5 ॥
യസ്യ തത്പുഷ്പകം നാമ വിമാനം കാമഗം ശുഭമ് ।
വീര്യാദേവാര്ജിതം ഭദ്രേ യേന യാമി വിഹായസമ് ॥ 6 ॥
മമ സഞ്ജാതരോഷസ്യ മുഖം ദൃഷ്ട്വൈവ മൈഥിലി ।
വിദ്രവന്തി പരിത്രസ്താസ്സുരാശ്ശക്രപുരോഗമാഃ ॥ 7 ॥
യത്ര തിഷ്ഠാമ്യഹം തത്ര മാരുതോ വാതി ശങ്കിതഃ ।
തീവ്രാംശുശ്ശിശിരാംശുശ്ച ഭയാത്സമ്പദ്യതേ രവിഃ ॥ 8 ॥
നിഷ്കമ്പപത്രാസ്തരവോ നദ്യശ്ച സ്തിമിതോദകാഃ ।
ഭവന്തി യത്ര യത്രാഹം തിഷ്ഠാമി വിചരാമി ച ॥ 9 ॥
മമ പാരേ സമുദ്രസ്യ ലങ്കാ നാമ പുരീ ശുഭാ ।
സമ്പൂര്ണാ രാക്ഷസൈര്ഘോരൈര്യഥേന്ദ്രസ്യാമരാവതീ ॥ 10 ॥
പ്രാകാരേണ പരിക്ഷിപ്താ പാണ്ഡുരേണ വിരാജതാ ।
ഹേമകക്ഷ്യാ പുരീ രമ്യാ വൈഢൂര്യമയതോരണാ ॥ 11 ॥
ഹസ്ത്യശ്വരഥസമ്ബാധാ തൂര്യനാദവിനാദിതാ ।
സര്വകാലഫലൈര്വൃക്ഷൈസ്സങ്കുലോദ്ദ്യാനശോഭിതാ ॥ 12 ॥
തത്ര ത്വം വസതീ സീതേ രാജപുത്രി മയാ സഹ ।
ന സ്മരിഷ്യസി നാരീണാം മാനുഷീണാം മനസ്വിനി ॥ 13 ॥
ഭുഞ്ജാനാ മാനുഷാന്ഭോഗാന്ദിവ്യാംശ്ച വരവര്ണിനി ।
ന സ്മരിഷ്യസി രാമസ്യ മാനുഷസ്യ ഗതായുഷഃ ॥ 14 ॥
സ്ഥാപയിത്വാ പ്രിയം പുത്രം രാജ്ഞാ ദശരഥേന യഃ ।
മന്ദവീര്യസ്സുതോ ജ്യേഷ്ഠസ്തതഃ പ്രസ്ഥാപിതോ വനമ് ॥ 15 ॥
തേന കിം ഭ്രഷ്ടരാജ്യേന രാമേണ ഗതചേതസാ ।
കരിഷ്യസി വിശാലാക്ഷി താപസേന തപസ്വിനാ ॥ 16 ॥
സര്വരാക്ഷസഭര്താരം കാമാത്സ്വയമിഹാഗതമ് ।
ന മന്മഥശരാവിഷ്ടം പ്രത്യാഖ്യാതും ത്വമര്ഹസി ॥ 17 ॥
പ്രത്യാഖ്യായ ഹി മാം ഭീരു പരിതാപം ഗമിഷ്യസി ।
ചരണേനാഭിഹത്യേവ പുരൂരവസമൂര്വശീ ॥ 18 ॥
അങ്ഗുല്യാ ന സമോ രാമോ മമ യുദ്ധേ സ മാനുഷഃ ।
തവ ഭാഗ്യേന സമ്പ്രാപ്തം ഭജസ്വ വരവര്ണിനി ॥ 19 ॥
ഏവമുക്താ തു വൈദേഹീ ക്രുദ്ധാ സംരക്തലോചനാ ।
അബ്രവീത്പരുഷം വാക്യം രഹിതേ രാക്ഷസാധിപമ് ॥ 20 ॥
കഥം വൈശ്രവണം ദേവം സര്വഭൂതനമസ്കൃതമ് ।
ഭ്രാതരം വ്യപദിശ്യ ത്വമശുഭം കര്തുമിച്ഛസി ॥ 21 ॥
അവശ്യം വിനശിഷ്യന്തി സര്വേ രാവണ രാക്ഷസാഃ ।
യേഷാം ത്വം കര്കശോ രാജാ ദുര്ബുദ്ധിരജിതേന്ദ്രിയഃ ॥ 22 ॥
അപഹൃത്യ ശചീം ഭാര്യാം ശക്യമിന്ദ്രസ്യ ജീവിതുമ് ।
ന ച രാമസ്യ ഭാര്യാം മാമപനീയാസ്തി ജീവിതമ് ॥ 23 ॥
ജീവേച്ചിരം വജ്രധരസ്യ ഹസ്താച്ഛചീം പ്രധൃഷ്യാപ്രതിരൂപരൂപാമ് ।
ന മാദൃശീം രാക്ഷസ ദൂശയിത്വാ പീതാമൃതസ്യാപി തവാസ്തി മോക്ഷഃ ॥ 24 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അരണ്യകാണ്ഡേ അഷ്ടചത്വാരിംശസ്സര്ഗഃ ॥
Roman (IAST) Transliteration
śrīmadvālmīkīya rāmāyaṇe araṇyakāṇḍam |
atha aṣṭacatvāriṃśassargaḥ |
evaṃ bṛvantyāṃ sītāyāṃ saṃrabdaḥ paruṣaṃ vacaḥ |
lalāṭe bhṛkuṭīṃ kṛtvā rāvaṇaḥ pratyuvāca ha || 1 ||
bhrātā vaiśravaṇasyāhaṃ sāpatnyo varavarṇini |
rāvaṇo nāma bhadraṃ te daśagrīvaḥ pratāpavān || 2 ||
yasya devāssagandharvāḥ piśācapatagoragāḥ |
vidravanti bhayādbhītā mṛtyoriva sadā prajāḥ || 3 ||
yena vaiśravaṇo rājā dvaimātraḥ kāraṇāntare |
dvandvamāsāditaḥ krodhādraṇe vikramya nirjitaḥ || 4 ||
yadbhayārtaḥ parityajya svamadhiṣṭhānamṛddhimat |
kailāsaṃ parvataśreṣṭhamadhyāste naravāhanaḥ || 5 ||
yasya tatpuṣpakaṃ nāma vimānaṃ kāmagaṃ śubham |
vīryādevārjitaṃ bhadre yena yāmi vihāyasam || 6 ||
mama sañjātaroṣasya mukhaṃ dṛṣṭvaiva maithili |
vidravanti paritrastāssurāśśakrapurogamāḥ || 7 ||
yatra tiṣṭhāmyahaṃ tatra māruto vāti śaṅkitaḥ |
tīvrāṃśuśśiśirāṃśuśca bhayātsampadyate raviḥ || 8 ||
niṣkampapatrāstaravo nadyaśca stimitodakāḥ |
bhavanti yatra yatrāhaṃ tiṣṭhāmi vicarāmi ca || 9 ||
mama pāre samudrasya laṅkā nāma purī śubhā |
sampūrṇā rākṣasairghorairyathendrasyāmarāvatī || 10 ||
prākāreṇa parikṣiptā pāṇḍureṇa virājatā |
hemakakṣyā purī ramyā vaiḍhūryamayatoraṇā || 11 ||
hastyaśvarathasambādhā tūryanādavināditā |
sarvakālaphalairvṛkṣaissaṅkuloddyānaśobhitā || 12 ||
tatra tvaṃ vasatī sīte rājaputri mayā saha |
na smariṣyasi nārīṇāṃ mānuṣīṇāṃ manasvini || 13 ||
bhuñjānā mānuṣānbhogāndivyāṃśca varavarṇini |
na smariṣyasi rāmasya mānuṣasya gatāyuṣaḥ || 14 ||
sthāpayitvā priyaṃ putraṃ rājñā daśarathena yaḥ |
mandavīryassuto jyeṣṭhastataḥ prasthāpito vanam || 15 ||
tena kiṃ bhraṣṭarājyena rāmeṇa gatacetasā |
kariṣyasi viśālākṣi tāpasena tapasvinā || 16 ||
sarvarākṣasabhartāraṃ kāmātsvayamihāgatam |
na manmathaśarāviṣṭaṃ pratyākhyātuṃ tvamarhasi || 17 ||
pratyākhyāya hi māṃ bhīru paritāpaṃ gamiṣyasi |
caraṇenābhihatyeva purūravasamūrvaśī || 18 ||
aṅgulyā na samo rāmo mama yuddhe sa mānuṣaḥ |
tava bhāgyena samprāptaṃ bhajasva varavarṇini || 19 ||
evamuktā tu vaidehī kruddhā saṃraktalocanā |
abravītparuṣaṃ vākyaṃ rahite rākṣasādhipam || 20 ||
kathaṃ vaiśravaṇaṃ devaṃ sarvabhūtanamaskṛtam |
bhrātaraṃ vyapadiśya tvamaśubhaṃ kartumicchasi || 21 ||
avaśyaṃ vinaśiṣyanti sarve rāvaṇa rākṣasāḥ |
yeṣāṃ tvaṃ karkaśo rājā durbuddhirajitendriyaḥ || 22 ||
apahṛtya śacīṃ bhāryāṃ śakyamindrasya jīvitum |
na ca rāmasya bhāryāṃ māmapanīyāsti jīvitam || 23 ||
jīvecciraṃ vajradharasya hastācchacīṃ pradhṛṣyāpratirūparūpām |
na mādṛśīṃ rākṣasa dūśayitvā pītāmṛtasyāpi tavāsti mokṣaḥ || 24 ||
ityārṣe śrīmadrāmāyaṇe vālmīkīya ādikāvye araṇyakāṇḍe aṣṭacatvāriṃśassargaḥ ||
InfoLyter.in — Sacred Vedic Knowledge Portal · Free forever