📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
1.59 ബാലകാണ്ഡ - ഏകോനഷഷ്ടിതമ സര്ഗഃ
1.59 Balakanda - Ekonashashtitama Sargah
Valmiki Malayalam
ശ്രീമദ്വാല്മീകീയ രാമായണേ ബാലകാണ്ഡമ് ।
അഥ ഏകോനഷഷ്ടിതമസ്സര്ഗഃ ।
ഉക്തവാക്യം തു രാജാനം കൃപയാ കുശികാത്മജഃ ।
അബ്രവീന്മധുരം വാക്യം സാക്ഷാച്ചണ്ഡാലരൂപിണമ് ॥ 1 ॥
ഐക്ഷ്വാക സ്വാഗതം വത്സ ജാനാമി ത്വാം സുധാര്മികമ് ।
ശരണം തേ ഭവിഷ്യാമി മാ ഭൈഷീര്നൃപപുങ്ഗവ ॥ 2 ॥
അഹമാമന്ത്രയേ സര്വാന്മഹര്ഷീന്പുണ്യകര്മണഃ ।
യജ്ഞസാഹ്യകരാന് രാജന് തതോ യക്ഷ്യസി നിര്വൃതഃ ॥ 3 ॥
ഗുരുശാപകൃതം രൂപം യദിദം ത്വയി വര്തതേ ।
അനേന സഹ രൂപേണ സശരീരോ ഗമിഷ്യസി ॥ 4 ॥
ഹസ്തപ്രാപ്തമഹം മന്യേ സ്വര്ഗം തവ നരാധിപ ।
യസ്ത്വം കൌശികമാഗമ്യ ശരണ്യം ശരണാഗതഃ ॥ 5 ॥
ഏവമുക്ത്വാ മഹാതേജാഃ പുത്രാന് പരമധാര്മികാന് ।
വ്യാദിദേശ മഹാപ്രാജ്ഞാന് യജ്ഞസമ്ഭാരകാരണാത് ॥ 6 ॥
സര്വാന് ശിഷ്യാന് സമാഹൂയ വാക്യമേതദുവാച ഹ ।
സര്വാനൃഷിഗണാന്വത്സാ ആനയധ്വം മമാജ്ഞയാ ।
സശിഷ്യസുഹൃദശ്ചൈവ സര്ത്വിജ സ്സബഹുശ്രുതാന് ॥ 7 ॥
യദന്യോ വചനം ബ്രൂയാന്മദ്വാക്യബലചോദിതഃ ।
തത്സര്വമഖിലേനോക്തം മമാഖ്യേയമനാദൃതമ് ॥ 8 ॥
തസ്യ തദ്വചനം ശ്രുത്വാ ദിശോ ജഗ്മുസ്തദാജ്ഞയാ ।
ആജഗ്മുരഥ ദേശേഭ്യ സ്സര്വേഭ്യോ ബ്രഹ്മവാദിനഃ ॥ 9 ॥
തേ ച ശിഷ്യാഃ സമാഗമ്യ മുനിം ജ്വലിതതേജസമ് ।
ഊചുശ്ചവചനം സര്വേ സര്വേഷാം ബ്രഹ്മവാദിനാമ് ॥ 10 ॥
ശ്രുത്വാ തേ വചനം സര്വേ സമായാന്തി ദ്വിജാതയഃ ।
സര്വദേശേഷു ചാഗച്ഛന് വര്ജയിത്വാ മഹോദയമ് ॥ 11 ॥
വാസിഷ്ഠം തച്ഛതം സര്വം ക്രോധപര്യാകുലാക്ഷരമ് ।
യദാഹ വചനം സര്വം ശൃണു ത്വം മുനിപുങ്ഗവ ॥ 12 ॥
ക്ഷത്രിയോ യാജകോ യസ്യ ചണ്ഡാലസ്യ വിശേഷതഃ ।
കഥം സദസി ഭോക്താരോ ഹവിസ്തസ്യ സുരര്ഷയഃ ॥ 13 ॥
ബ്രാഹ്മണാ വാ മഹാത്മാനോ ഭുക്ത്വാ ചണ്ഡാലഭോജനമ് ।
കഥം സ്വര്ഗം ഗമിഷ്യന്തി വിശ്വാമിത്രേണ പാലിതാഃ ॥ 14 ॥
ഏതദ്വചനനൈഷ്ഠുര്യമൂചു സ്സംരക്തലോചനാഃ ।
വാസിഷ്ഠാ മുനിശാര്ദൂല സര്വേ തേ സമഹോദയാഃ ॥ 15 ॥
തേഷാം തദ്വചനം ശ്രുത്വാ സര്വേഷാം മുനിപുങ്ഗവഃ ।
ക്രോധസംരക്തനയന സ്സരോഷമിദമബ്രവീത് ॥ 16 ॥
യേ ദൂഷയന്ത്യദുഷ്ടം മാം തപ ഉഗ്രം സമാസ്ഥിതമ് ।
ഭസ്മീഭൂതാ ദുരാത്മാനോ ഭവിഷ്യന്തി ന സംശയഃ ॥ 17 ॥
അദ്യ തേ കാലപാശേന നീതാ വൈവസ്വതക്ഷയമ് ।
സപ്തജാതിശതാന്യേവ മൃതപസ്സന്തു സര്വശഃ ॥ 18 ॥
ശ്വമാംസനിയതാഹാരാ മുഷ്ടികാ നാമ നിര്ഘൃണാഃ ।
വികൃതാശ്ച വിരൂപാശ്ച ലോകാനനുചരന്ത്വിമാന് ॥ 19 ॥
മഹോദയസ്തു ദുര്ബുദ്ധിര്മാമദൂഷ്യം ഹ്യദൂഷയത് ।
ദൂഷിത സ്സര്വലോകേഷു നിഷാദത്വം ഗമിഷ്യതി ॥ 20 ॥
പ്രാണാതിപാതനിരതോ നിരനുക്രോശതാം ഗതഃ ।
ദീര്ഘകാലം മമ ക്രോധാദ്ദുര്ഗതിം വര്തയിഷ്യതി ॥ 21 ॥
ഏതാവദുക്ത്വാ വചനം വിശ്വാമിത്രോ മഹാതപാഃ ।
വിരരാമ മഹാതേജാ ഋഷിമധ്യേ മഹാമുനിഃ ॥ 22 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാണ്ഡേ ഏകോനഷഷ്ടിതമസ്സര്ഗഃ ॥
Roman (IAST) Transliteration
śrīmadvālmīkīya rāmāyaṇe bālakāṇḍam |
atha ekonaṣaṣṭitamassargaḥ |
uktavākyaṃ tu rājānaṃ kṛpayā kuśikātmajaḥ |
abravīnmadhuraṃ vākyaṃ sākṣāccaṇḍālarūpiṇam || 1 ||
aikṣvāka svāgataṃ vatsa jānāmi tvāṃ sudhārmikam |
śaraṇaṃ te bhaviṣyāmi mā bhaiṣīrnṛpapuṅgava || 2 ||
ahamāmantraye sarvānmaharṣīnpuṇyakarmaṇaḥ |
yajñasāhyakarān rājan tato yakṣyasi nirvṛtaḥ || 3 ||
guruśāpakṛtaṃ rūpaṃ yadidaṃ tvayi vartate |
anena saha rūpeṇa saśarīro gamiṣyasi || 4 ||
hastaprāptamahaṃ manye svargaṃ tava narādhipa |
yastvaṃ kauśikamāgamya śaraṇyaṃ śaraṇāgataḥ || 5 ||
evamuktvā mahātejāḥ putrān paramadhārmikān |
vyādideśa mahāprājñān yajñasambhārakāraṇāt || 6 ||
sarvān śiṣyān samāhūya vākyametaduvāca ha |
sarvānṛṣigaṇānvatsā ānayadhvaṃ mamājñayā |
saśiṣyasuhṛdaścaiva sartvija ssabahuśrutān || 7 ||
yadanyo vacanaṃ brūyānmadvākyabalacoditaḥ |
tatsarvamakhilenoktaṃ mamākhyeyamanādṛtam || 8 ||
tasya tadvacanaṃ śrutvā diśo jagmustadājñayā |
ājagmuratha deśebhya ssarvebhyo brahmavādinaḥ || 9 ||
te ca śiṣyāḥ samāgamya muniṃ jvalitatejasam |
ūcuścavacanaṃ sarve sarveṣāṃ brahmavādinām || 10 ||
śrutvā te vacanaṃ sarve samāyānti dvijātayaḥ |
sarvadeśeṣu cāgacchan varjayitvā mahodayam || 11 ||
vāsiṣṭhaṃ tacchataṃ sarvaṃ krodhaparyākulākṣaram |
yadāha vacanaṃ sarvaṃ śṛṇu tvaṃ munipuṅgava || 12 ||
kṣatriyo yājako yasya caṇḍālasya viśeṣataḥ |
kathaṃ sadasi bhoktāro havistasya surarṣayaḥ || 13 ||
brāhmaṇā vā mahātmāno bhuktvā caṇḍālabhojanam |
kathaṃ svargaṃ gamiṣyanti viśvāmitreṇa pālitāḥ || 14 ||
etadvacananaiṣṭhuryamūcu ssaṃraktalocanāḥ |
vāsiṣṭhā muniśārdūla sarve te samahodayāḥ || 15 ||
teṣāṃ tadvacanaṃ śrutvā sarveṣāṃ munipuṅgavaḥ |
krodhasaṃraktanayana ssaroṣamidamabravīt || 16 ||
ye dūṣayantyaduṣṭaṃ māṃ tapa ugraṃ samāsthitam |
bhasmībhūtā durātmāno bhaviṣyanti na saṃśayaḥ || 17 ||
adya te kālapāśena nītā vaivasvatakṣayam |
saptajātiśatānyeva mṛtapassantu sarvaśaḥ || 18 ||
śvamāṃsaniyatāhārā muṣṭikā nāma nirghṛṇāḥ |
vikṛtāśca virūpāśca lokānanucarantvimān || 19 ||
mahodayastu durbuddhirmāmadūṣyaṃ hyadūṣayat |
dūṣita ssarvalokeṣu niṣādatvaṃ gamiṣyati || 20 ||
prāṇātipātanirato niranukrośatāṃ gataḥ |
dīrghakālaṃ mama krodhāddurgatiṃ vartayiṣyati || 21 ||
etāvaduktvā vacanaṃ viśvāmitro mahātapāḥ |
virarāma mahātejā ṛṣimadhye mahāmuniḥ || 22 ||
ityārṣe śrīmadrāmāyaṇe vālmīkīya ādikāvye bālakāṇḍe ekonaṣaṣṭitamassargaḥ ||
InfoLyter.in — Sacred Vedic Knowledge Portal · Free forever