📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
1.27 ബാലകാണ്ഡ - സപ്തവിംശ സര്ഗഃ
1.27 Balakanda - Saptavimsha Sargah
Valmiki Malayalam
ശ്രീമദ്വാല്മീകീയ രാമായണേ ബാലകാണ്ഡമ് ।
അഥ സപ്തവിംശസ്സര്ഗഃ ।
അഥ താം രജനീമുഷ്യ വിശ്വാമിത്രോ മഹായശാഃ ।
പ്രഹസ്യ രാഘവം വാക്യമുവാച മധുരാക്ഷരമ് ॥ 1 ॥
പരിതുഷ്ടോഽസ്മി ഭദ്രം തേ രാജപുത്ര മഹായശഃ ।
പ്രീത്യാ പരമയാ യുക്തോ ദദാമ്യസ്ത്രാണി സര്വശഃ ॥ 2 ॥
ദേവാസുരഗണാന്വാപി സഗന്ധര്വോരഗാനപി ।
യൈരമിത്രാന് പ്രസഹ്യാജൌ വശീകൃത്യ ജയിഷ്യസി ॥ 3 ॥
താനി ദിവ്യാനി ഭദ്രം തേ ദദാമ്യസ്ത്രാണി സര്വശഃ ।
ദണ്ഡചക്രം മഹദ്ദിവ്യം തവ ദാസ്യാമി രാഘവ ॥ 4 ॥
ധര്മചക്രം തതോ വീര കാലചക്രം തഥൈവ ച ।
വിഷ്ണുചക്രം തഥാത്യുഗ്രമൈന്ദ്രമസ്ത്രം തഥൈവ ച ॥ 5 ॥
വജ്രമസ്ത്രം നരശ്രേഷ്ഠ ശൈവം ശൂലവരം തഥാ ।
അസ്ത്രം ബ്രഹ്മശിരശ്ചൈവ ഐഷീകമപി രാഘവ ॥ 6 ॥
ദദാമി തേ മഹാബാഹോ ബ്രാഹ്മമസ്ത്രമനുത്തമമ് ।
ഗദേ ദ്വേ ചൈവ കാകുത്സ്ഥ മോദകീ ശിഖരീ ഉഭേ ॥ 7 ॥
പ്രദീപ്തേ നരശാര്ദൂല പ്രയച്ഛാമി നൃപാത്മജ ।
ധര്മപാശമഹം രാമ കാലപാശം തഥൈവ ച ॥ 8 ॥
പാശം വാരുണമസ്ത്രം ച ദദാമ്യഹമനുത്തമമ് ।
അശനീ ദ്വേ പ്രയച്ഛാമി ശുഷ്കാര്ദ്രേ രഘുനന്ദന ॥ 9 ॥
ദദാമി ചാസ്ത്രം പൈനാകമസ്ത്രം നാരായണം തഥാ ।
ആഗ്നേയമസ്ത്രം ദയിതം ശിഖരം നാമ നാമതഃ ॥ 10 ॥
വായവ്യം പ്രഥനം നാമ ദദാമി ച തവാനഘ ।
അസ്ത്രം ഹയശിരോ നാമ ക്രൌഞ്ചമസ്ത്രം തഥൈവ ച ।
ശക്തിദ്വയം ച കാകുത്സ്ഥ ദദാമി തവ രാഘവ ॥ 11 ॥
കങ്കാലം മുസലം ഘോരം കാപാലമഥ കങ്കണമ് ।
ധാരയന്ത്യസുരാ യാനി ദദാമ്യേതാനി സര്വശഃ ॥ 12 ॥
വൈദ്യാധരം മഹാസ്ത്രം ച നന്ദനം നാമ നാമതഃ ।
അസിരത്നം മഹാബാഹോ ദദാമി ച നൃപാത്മജ ॥ 13 ॥
ഗാന്ധര്വമസ്ത്രം ദയിതം മാനവം നാമ നാമതഃ ।
പ്രസ്വാപനപ്രശമനേ ദദ്മി സൌരം ച രാഘവ ॥ 14 ॥
ദര്പണം ശോഷണം ചൈവ സന്താപനവിലാപനേ ।
മദനം ചൈവ ദുര്ധര്ഷം കന്ദര്പദയിതം തഥാ ॥ 15 ॥
പൈശാചമസ്ത്രം ദയിതം മോഹനം നാമ നാമതഃ ।
പ്രതീച്ഛ നരശാര്ദൂല രാജപുത്ര മഹായശഃ ॥ 16 ॥
താമസം നരശാര്ദൂല സൌമനം ച മഹാബല ।
സംവര്ധം ചൈവ ദുര്ധര്ഷം മൌസലം ച നൃപാത്മജ ॥ 17 ॥
സത്യമസ്ത്രം മഹാബാഹോ തഥാ മായാധരം പരമ് ।
ഘോരം തേജഃ പ്രഭം നാമ പരതേജോഽപകര്ഷണമ് ॥ 18 ॥
സൌമ്യാസ്ത്രം ശിശിരം നാമ ത്വഷ്ടുരസ്ത്രം സുദാമനമ് ।
ദാരുണം ച ഭഗസ്യാപി ശിതേഷു മഥ മാനവമ് ॥ 19 ॥
ഏതാന് രാമ മഹാബാഹോ കാമരൂപാന് മഹാബലാന് ।
ഗൃഹാണ പരമോദാരാന് ക്ഷിപ്രമേവ നൃപാത്മജ ॥ 20 ॥
സ്ഥിതസ്തു പ്രാങ്മുഖോ ഭൂത്വാ ശുചിര്മുനിവരസ്തദാ ।
ദദൌ രാമായ സുപ്രീതോ മന്ത്രഗ്രാമമനുത്തമമ് ॥ 21 ॥
സര്വസങ്ഗ്രഹണം യേഷാം ദൈവതൈരപി ദുര്ലഭമ് ।
താന്യസ്ത്രാണി തദാ വിപ്രോ രാഘവായ ന്യവേദയത് ॥ 22 ॥
ജപതസ്തു മുനേസ്തസ്യ വിശ്വാമിത്രസ്യ ധീമതഃ ।
ഉപതസ്ഥുര്മഹാര്ഹാണി സര്വാണ്യസ്ത്രാണി രാഘവമ് ॥ 23 ॥
ഊചുശ്ച മുദിതാസ്സര്വേ രാമം പ്രാഞ്ജലയസ്തദാ ।
ഇമേ സ്മ പരമോദാരാഃ കിങ്കരാസ്തവ രാഘവ ॥ 24 ॥
പ്രതിഗൃഹ്യ ച കാകുത്സ്ഥഃ സമാലഭ്യ ച പാണിനാ ।
മാനസാ മേ ഭവിഷ്യധ്വമിതി താനഭ്യചോദയത് ॥ 25 ॥
തതഃ പ്രീതമനാ രാമോ വിശ്വാമിത്രം മഹാമുനിമ് ।
അഭിവാദ്യ മഹാതേജാ ഗമനായോപചക്രമേ ॥ 26 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാണ്ഡേ സപ്തവിംശസ്സര്ഗഃ ॥
Roman (IAST) Transliteration
śrīmadvālmīkīya rāmāyaṇe bālakāṇḍam |
atha saptaviṃśassargaḥ |
atha tāṃ rajanīmuṣya viśvāmitro mahāyaśāḥ |
prahasya rāghavaṃ vākyamuvāca madhurākṣaram || 1 ||
parituṣṭo'smi bhadraṃ te rājaputra mahāyaśaḥ |
prītyā paramayā yukto dadāmyastrāṇi sarvaśaḥ || 2 ||
devāsuragaṇānvāpi sagandharvoragānapi |
yairamitrān prasahyājau vaśīkṛtya jayiṣyasi || 3 ||
tāni divyāni bhadraṃ te dadāmyastrāṇi sarvaśaḥ |
daṇḍacakraṃ mahaddivyaṃ tava dāsyāmi rāghava || 4 ||
dharmacakraṃ tato vīra kālacakraṃ tathaiva ca |
viṣṇucakraṃ tathātyugramaindramastraṃ tathaiva ca || 5 ||
vajramastraṃ naraśreṣṭha śaivaṃ śūlavaraṃ tathā |
astraṃ brahmaśiraścaiva aiṣīkamapi rāghava || 6 ||
dadāmi te mahābāho brāhmamastramanuttamam |
gade dve caiva kākutstha modakī śikharī ubhe || 7 ||
pradīpte naraśārdūla prayacchāmi nṛpātmaja |
dharmapāśamahaṃ rāma kālapāśaṃ tathaiva ca || 8 ||
pāśaṃ vāruṇamastraṃ ca dadāmyahamanuttamam |
aśanī dve prayacchāmi śuṣkārdre raghunandana || 9 ||
dadāmi cāstraṃ painākamastraṃ nārāyaṇaṃ tathā |
āgneyamastraṃ dayitaṃ śikharaṃ nāma nāmataḥ || 10 ||
vāyavyaṃ prathanaṃ nāma dadāmi ca tavānagha |
astraṃ hayaśiro nāma krauñcamastraṃ tathaiva ca |
śaktidvayaṃ ca kākutstha dadāmi tava rāghava || 11 ||
kaṅkālaṃ musalaṃ ghoraṃ kāpālamatha kaṅkaṇam |
dhārayantyasurā yāni dadāmyetāni sarvaśaḥ || 12 ||
vaidyādharaṃ mahāstraṃ ca nandanaṃ nāma nāmataḥ |
asiratnaṃ mahābāho dadāmi ca nṛpātmaja || 13 ||
gāndharvamastraṃ dayitaṃ mānavaṃ nāma nāmataḥ |
prasvāpanapraśamane dadmi sauraṃ ca rāghava || 14 ||
darpaṇaṃ śoṣaṇaṃ caiva santāpanavilāpane |
madanaṃ caiva durdharṣaṃ kandarpadayitaṃ tathā || 15 ||
paiśācamastraṃ dayitaṃ mohanaṃ nāma nāmataḥ |
pratīccha naraśārdūla rājaputra mahāyaśaḥ || 16 ||
tāmasaṃ naraśārdūla saumanaṃ ca mahābala |
saṃvardhaṃ caiva durdharṣaṃ mausalaṃ ca nṛpātmaja || 17 ||
satyamastraṃ mahābāho tathā māyādharaṃ param |
ghoraṃ tejaḥ prabhaṃ nāma paratejo'pakarṣaṇam || 18 ||
saumyāstraṃ śiśiraṃ nāma tvaṣṭurastraṃ sudāmanam |
dāruṇaṃ ca bhagasyāpi śiteṣu matha mānavam || 19 ||
etān rāma mahābāho kāmarūpān mahābalān |
gṛhāṇa paramodārān kṣiprameva nṛpātmaja || 20 ||
sthitastu prāṅmukho bhūtvā śucirmunivarastadā |
dadau rāmāya suprīto mantragrāmamanuttamam || 21 ||
sarvasaṅgrahaṇaṃ yeṣāṃ daivatairapi durlabham |
tānyastrāṇi tadā vipro rāghavāya nyavedayat || 22 ||
japatastu munestasya viśvāmitrasya dhīmataḥ |
upatasthurmahārhāṇi sarvāṇyastrāṇi rāghavam || 23 ||
ūcuśca muditāssarve rāmaṃ prāñjalayastadā |
ime sma paramodārāḥ kiṅkarāstava rāghava || 24 ||
pratigṛhya ca kākutsthaḥ samālabhya ca pāṇinā |
mānasā me bhaviṣyadhvamiti tānabhyacodayat || 25 ||
tataḥ prītamanā rāmo viśvāmitraṃ mahāmunim |
abhivādya mahātejā gamanāyopacakrame || 26 ||
ityārṣe śrīmadrāmāyaṇe vālmīkīya ādikāvye bālakāṇḍe saptaviṃśassargaḥ ||
InfoLyter.in — Sacred Vedic Knowledge Portal · Free forever