1.25 Balakanda - Panchavimsha Sargah

ॐ

1.25 ബാലകാണ്ഡ - പഞ്ചവിംശ സര്ഗഃ

Valmiki Malayalam

ശ്രീമദ്വാല്മീകീയ രാമായണേ ബാലകാണ്ഡമ് ।

അഥ പഞ്ചവിംശസ്സര്ഗഃ ।

അഥ തസ്യാപ്രമേയസ്യ മുനേര്വചനമുത്തമമ് ।

ശ്രുത്വാ പുരുഷശാര്ദൂലഃ പ്രത്യുവാച ശുഭാം ഗിരമ് ॥ 1 ॥

അല്പവീര്യാ യദാ യക്ഷാ ശ്ശ്രൂയന്തേ മുനിപുങ്ഗവ ।

കഥന്നാഗസഹസ്രസ്യ ധാരയത്യബലാ ബലമ് ॥ 2 ॥

വിശ്വാമിത്രോഽബ്രവീദ്വാക്യം ശൃണ യേന ബലോത്തരാ ।

വരദാനകൃതം വീര്യം ധാരയത്യബലാ ബലമ് ॥ 3 ॥

പൂര്വമാസീന്മഹായക്ഷസ്സുകേതുര്നാമ വീര്യവാന് ।

അനപത്യശ്ശുഭാചാരസ്സ ച തേപേ മഹത്തപഃ ॥ 4 ॥

പിതാമഹസ്തു സുപ്രീതസ്തസ്യ യക്ഷപതേ സ്തദാ ।

കന്യാരത്നം ദദൌ രാമ താടകാം നാമ നാമതഃ ॥ 5 ॥

ദദൌ നാഗസഹസ്രസ്യ ബലം ചാസ്യാഃ പിതാമഹഃ ।

നത്വേവ പുത്രം യക്ഷായ ദദൌ ബ്രഹ്മാ മഹായശാഃ ॥ 6 ॥

താം തു ജാതാം വിവര്ധന്തീം രൂപയൌവനശാലിനീമ് ।

ഝര്ഝപുത്രായ സുന്ദായ ദദൌ ഭാര്യാം യശസ്വിനീമ് ॥ 7 ॥

കസ്യചിത്ത്വഥ കാലസ്യ യക്ഷീ പുത്രമജായത ।

മാരീചം നാമ ദുര്ധര്ഷം യശ്ശാപാദ്രാക്ഷസോഽഭവത് ॥ 8 ॥

സുന്ദേ തു നിഹതേ രാമ സാഗസ്ത്യമൃഷിസത്തമമ് ।

താടകാ സഹ പുത്രേണ പ്രധര്ഷയിതുമിച്ഛതി ॥ 9 ॥

ഭക്ഷാര്ഥം ജാതസംരമ്ഭാ ഗര്ജന്തീ സാഭ്യധാവത ।

0 ആപതന്തീം തു താം ദൃഷ്ട്വാ അഗസ്ത്യോ ഭഗവാനൃഷിഃ ॥ 10 ॥

രാക്ഷസത്വം ഭജസ്വേതി മാരീചം വ്യാജഹാര സഃ ।

1 അഗസ്ത്യഃ പരമക്രുദ്ധസ്താടകാമപി ശപ്തവാന് ॥ 11 ॥

പുരുഷാദീ മഹായക്ഷീ വിരൂപാ വികൃതാനനാ ।

ഇദം രൂപം വിഹായാഥ ദാരുണം രൂപമസ്തു തേ ॥ 12 ॥

സൈഷാ ശാപകൃതാമര്ഷാ താടകാ ക്രോധമൂര്ഛിതാ ।

ദേശമുത്സാദയത്യേനമഗസ്ത്യചരിതം ശുഭമ് ॥ 13 ॥

ഏനാം രാഘവ ദുര്വൃത്താം യക്ഷീം പരമദാരുണാമ് ।

ഗോബ്രാഹ്മണഹിതാര്ഥായ ജഹി ദുഷ്ടപരാക്രമാമ് ॥ 14 ॥

ന ഹ്യേനാം ശാപസമ്സ്പൃഷ്ടാം കശ്ചിദുത്സഹതേ പുമാന് ।

നിഹന്തും ത്രിഷു ലോകേഷു ത്വാമൃതേ രഘുനന്ദന ॥ 15 ॥

ന ഹി തേ സ്ത്രീവധകൃതേ ഘൃണാ കാര്യാ നരോത്തമ ।

ചാതുര്വണ്യഹിതാര്ഥായ കര്തവ്യം രാജസൂനുനാ ॥ 16 ॥

നൃശംസമനൃശംസം വാ പ്രജാരക്ഷണകാരണാത് ।

പാതകം വാ സദോഷം വാ കര്തവ്യം രക്ഷതാ സതാ ॥ 17 ॥

രാജ്യഭാരനിയുക്താനാമേഷ ധര്മസ്സനാതനഃ ।

അധര്മ്യാം ജഹി കാകുത്സ്ഥ ധര്മോഹ്യസ്യാ ന വിദ്യതേ ॥ 18 ॥

ശ്രൂയതേ ഹി പുരാ ശക്രോ വിരോചനസുതാം നൃപ ।

പൃഥിവീം ഹന്തുമിച്ഛന്തീം മന്ഥരാമഭ്യസൂദയത് ॥ 19 ॥

വിഷ്ണുനാപി പുരാ രാമ ഭൃഗുപത്നീ ദൃഢവ്രതാ ।

അനിന്ദ്രം ലോകമിച്ഛന്തീ കാവ്യമാതാ നിഷൂദിതാ ॥ 20 ॥

ഏതൈശ്ചാന്യൈശ്ച ബഹുഭീ രാജപുത്ര മഹാത്മഭിഃ ।

അധര്മസഹിതാ നാര്യോ ഹതാഃ പുരുഷസത്തമൈഃ ॥ 21 ॥

ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാണ്ഡേ പഞ്ചവിംശസ്സര്ഗഃ ॥

Roman (IAST) Transliteration

śrīmadvālmīkīya rāmāyaṇe bālakāṇḍam |

atha pañcaviṃśassargaḥ |

atha tasyāprameyasya munervacanamuttamam |

śrutvā puruṣaśārdūlaḥ pratyuvāca śubhāṃ giram || 1 ||

alpavīryā yadā yakṣā śśrūyante munipuṅgava |

kathannāgasahasrasya dhārayatyabalā balam || 2 ||

viśvāmitro'bravīdvākyaṃ śṛṇa yena balottarā |

varadānakṛtaṃ vīryaṃ dhārayatyabalā balam || 3 ||

pūrvamāsīnmahāyakṣassuketurnāma vīryavān |

anapatyaśśubhācārassa ca tepe mahattapaḥ || 4 ||

pitāmahastu suprītastasya yakṣapate stadā |

kanyāratnaṃ dadau rāma tāṭakāṃ nāma nāmataḥ || 5 ||

dadau nāgasahasrasya balaṃ cāsyāḥ pitāmahaḥ |

natveva putraṃ yakṣāya dadau brahmā mahāyaśāḥ || 6 ||

tāṃ tu jātāṃ vivardhantīṃ rūpayauvanaśālinīm |

jharjhaputrāya sundāya dadau bhāryāṃ yaśasvinīm || 7 ||

kasyacittvatha kālasya yakṣī putramajāyata |

mārīcaṃ nāma durdharṣaṃ yaśśāpādrākṣaso'bhavat || 8 ||

sunde tu nihate rāma sāgastyamṛṣisattamam |

tāṭakā saha putreṇa pradharṣayitumicchati || 9 ||

bhakṣārthaṃ jātasaṃrambhā garjantī sābhyadhāvata |

0 āpatantīṃ tu tāṃ dṛṣṭvā agastyo bhagavānṛṣiḥ || 10 ||

rākṣasatvaṃ bhajasveti mārīcaṃ vyājahāra saḥ |

1 agastyaḥ paramakruddhastāṭakāmapi śaptavān || 11 ||

puruṣādī mahāyakṣī virūpā vikṛtānanā |

idaṃ rūpaṃ vihāyātha dāruṇaṃ rūpamastu te || 12 ||

saiṣā śāpakṛtāmarṣā tāṭakā krodhamūrchitā |

deśamutsādayatyenamagastyacaritaṃ śubham || 13 ||

enāṃ rāghava durvṛttāṃ yakṣīṃ paramadāruṇām |

gobrāhmaṇahitārthāya jahi duṣṭaparākramām || 14 ||

na hyenāṃ śāpasamspṛṣṭāṃ kaścidutsahate pumān |

nihantuṃ triṣu lokeṣu tvāmṛte raghunandana || 15 ||

na hi te strīvadhakṛte ghṛṇā kāryā narottama |

cāturvaṇyahitārthāya kartavyaṃ rājasūnunā || 16 ||

nṛśaṃsamanṛśaṃsaṃ vā prajārakṣaṇakāraṇāt |

pātakaṃ vā sadoṣaṃ vā kartavyaṃ rakṣatā satā || 17 ||

rājyabhāraniyuktānāmeṣa dharmassanātanaḥ |

adharmyāṃ jahi kākutstha dharmohyasyā na vidyate || 18 ||

śrūyate hi purā śakro virocanasutāṃ nṛpa |

pṛthivīṃ hantumicchantīṃ mantharāmabhyasūdayat || 19 ||

viṣṇunāpi purā rāma bhṛgupatnī dṛḍhavratā |

anindraṃ lokamicchantī kāvyamātā niṣūditā || 20 ||

etaiścānyaiśca bahubhī rājaputra mahātmabhiḥ |

adharmasahitā nāryo hatāḥ puruṣasattamaiḥ || 21 ||

ityārṣe śrīmadrāmāyaṇe vālmīkīya ādikāvye bālakāṇḍe pañcaviṃśassargaḥ ||