Shiva Mahimna Stotram — InfoLyter.in

ॐ

ശിവ മഹിമ്നാ സ്തോത്രമ്

Shiva Mahimna Stotram

Shiva Stotram Adi Shankaracharya Malayalam

അഥ ശ്രീ ശിവമഹിമ്നസ്തോത്രമ് ॥

മഹിമ്നഃ പാരം തേ പരമവിദുഷോ യദ്യസദൃശീ

സ്തുതിര്ബ്രഹ്മാദീനാമപി തദവസന്നാസ്ത്വയി ഗിരഃ ।

അഥാഽവാച്യഃ സര്വഃ സ്വമതിപരിണാമാവധി ഗൃണന്

മമാപ്യേഷ സ്തോത്രേ ഹര നിരപവാദഃ പരികരഃ ॥ 1 ॥

അതീതഃ പന്ഥാനം തവ ച മഹിമാ വാങ്മനസയോഃ

അതദ്വ്യാവൃത്ത്യാ യം ചകിതമഭിധത്തേ ശ്രുതിരപി ।

സ കസ്യ സ്തോതവ്യഃ കതിവിധഗുണഃ കസ്യ വിഷയഃ

പദേ ത്വര്വാചീനേ പതതി ന മനഃ കസ്യ ന വചഃ ॥ 2 ॥

മധുസ്ഫീതാ വാചഃ പരമമമൃതം നിര്മിതവതഃ

തവ ബ്രഹ്മന് കിം വാഗപി സുരഗുരോര്വിസ്മയപദമ് ।

മമ ത്വേതാം വാണീം ഗുണകഥനപുണ്യേന ഭവതഃ

പുനാമീത്യര്ഥേഽസ്മിന് പുരമഥന ബുദ്ധിര്വ്യവസിതാ ॥ 3 ॥

തവൈശ്വര്യം യത്തജ്ജഗദുദയരക്ഷാപ്രലയകൃത്

ത്രയീവസ്തു വ്യസ്തം തിസ്രുഷു ഗുണഭിന്നാസു തനുഷു ।

അഭവ്യാനാമസ്മിന് വരദ രമണീയാമരമണീം

വിഹന്തും വ്യാക്രോശീം വിദധത ഇഹൈകേ ജഡധിയഃ ॥ 4 ॥

കിമീഹഃ കിങ്കായഃ സ ഖലു കിമുപായസ്ത്രിഭുവനം

കിമാധാരോ ധാതാ സൃജതി കിമുപാദാന ഇതി ച ।

അതര്ക്യൈശ്വര്യേ ത്വയ്യനവസര ദുഃസ്ഥോ ഹതധിയഃ

കുതര്കോഽയം കാംശ്ചിത് മുഖരയതി മോഹായ ജഗതഃ ॥ 5 ॥

അജന്മാനോ ലോകാഃ കിമവയവവന്തോഽപി ജഗതാം

അധിഷ്ഠാതാരം കിം ഭവവിധിരനാദൃത്യ ഭവതി ।

അനീശോ വാ കുര്യാദ് ഭുവനജനനേ കഃ പരികരോ

യതോ മന്ദാസ്ത്വാം പ്രത്യമരവര സംശേരത ഇമേ ॥ 6 ॥

ത്രയീ സാങ്ഖ്യം യോഗഃ പശുപതിമതം വൈഷ്ണവമിതി

പ്രഭിന്നേ പ്രസ്ഥാനേ പരമിദമദഃ പഥ്യമിതി ച ।

രുചീനാം വൈചിത്ര്യാദൃജുകുടില നാനാപഥജുഷാം

നൃണാമേകോ ഗമ്യസ്ത്വമസി പയസാമര്ണവ ഇവ ॥ 7 ॥

മഹോക്ഷഃ ഖട്വാങ്ഗം പരശുരജിനം ഭസ്മ ഫണിനഃ

കപാലം ചേതീയത്തവ വരദ തന്ത്രോപകരണമ് ।

സുരാസ്താം താമൃദ്ധിം ദധതി തു ഭവദ്ഭൂപ്രണിഹിതാം

ന ഹി സ്വാത്മാരാമം വിഷയമൃഗതൃഷ്ണാ ഭ്രമയതി ॥ 8 ॥

ധ്രുവം കശ്ചിത് സര്വം സകലമപരസ്ത്വധ്രുവമിദം

പരോ ധ്രൌവ്യാഽധ്രൌവ്യേ ജഗതി ഗദതി വ്യസ്തവിഷയേ ।

സമസ്തേഽപ്യേതസ്മിന് പുരമഥന തൈര്വിസ്മിത ഇവ

സ്തുവന് ജിഹ്രേമി ത്വാം ന ഖലു നനു ധൃഷ്ടാ മുഖരതാ ॥ 9 ॥

തവൈശ്വര്യം യത്നാദ് യദുപരി വിരിഞ്ചിര്ഹരിരധഃ

പരിച്ഛേതും യാതാവനലമനലസ്കന്ധവപുഷഃ ।

തതോ ഭക്തിശ്രദ്ധാ-ഭരഗുരു-ഗൃണദ്ഭ്യാം ഗിരിശ യത്

സ്വയം തസ്ഥേ താഭ്യാം തവ കിമനുവൃത്തിര്ന ഫലതി ॥ 10 ॥

അയത്നാദാസാദ്യ ത്രിഭുവനമവൈരവ്യതികരം

ദശാസ്യോ യദ്ബാഹൂനഭൃത രണകണ്ഡൂ-പരവശാന് ।

ശിരഃപദ്മശ്രേണീ-രചിതചരണാമ്ഭോരുഹ-ബലേഃ

സ്ഥിരായാസ്ത്വദ്ഭക്തേസ്ത്രിപുരഹര വിസ്ഫൂര്ജിതമിദമ് ॥ 11 ॥

അമുഷ്യ ത്വത്സേവാ-സമധിഗതസാരം ഭുജവനം

ബലാത് കൈലാസേഽപി ത്വദധിവസതൌ വിക്രമയതഃ ।

അലഭ്യാ പാതാലേഽപ്യലസചലിതാങ്ഗുഷ്ഠശിരസി

പ്രതിഷ്ഠാ ത്വയ്യാസീദ് ധ്രുവമുപചിതോ മുഹ്യതി ഖലഃ ॥ 12 ॥

യദൃദ്ധിം സുത്രാമ്ണോ വരദ പരമോച്ചൈരപി സതീം

അധശ്ചക്രേ ബാണഃ പരിജനവിധേയത്രിഭുവനഃ ।

ന തച്ചിത്രം തസ്മിന് വരിവസിതരി ത്വച്ചരണയോഃ

ന കസ്യാപ്യുന്നത്യൈ ഭവതി ശിരസസ്ത്വയ്യവനതിഃ ॥ 13 ॥

അകാണ്ഡ-ബ്രഹ്മാണ്ഡ-ക്ഷയചകിത-ദേവാസുരകൃപാ

വിധേയസ്യാഽഽസീദ് യസ്ത്രിനയന വിഷം സംഹൃതവതഃ ।

സ കല്മാഷഃ കണ്ഠേ തവ ന കുരുതേ ന ശ്രിയമഹോ

വികാരോഽപി ശ്ലാഘ്യോ ഭുവന-ഭയ- ഭങ്ഗ- വ്യസനിനഃ ॥ 14 ॥

അസിദ്ധാര്ഥാ നൈവ ക്വചിദപി സദേവാസുരനരേ

നിവര്തന്തേ നിത്യം ജഗതി ജയിനോ യസ്യ വിശിഖാഃ ।

സ പശ്യന്നീശ ത്വാമിതരസുരസാധാരണമഭൂത്

സ്മരഃ സ്മര്തവ്യാത്മാ ന ഹി വശിഷു പഥ്യഃ പരിഭവഃ ॥ 15 ॥

മഹീ പാദാഘാതാദ് വ്രജതി സഹസാ സംശയപദം

പദം വിഷ്ണോര്ഭ്രാമ്യദ് ഭുജ-പരിഘ-രുഗ്ണ-ഗ്രഹ- ഗണമ് ।

മുഹുര്ദ്യൌര്ദൌസ്ഥ്യം യാത്യനിഭൃത-ജടാ-താഡിത-തടാ

ജഗദ്രക്ഷായൈ ത്വം നടസി നനു വാമൈവ വിഭുതാ ॥ 16 ॥

വിയദ്വ്യാപീ താരാ-ഗണ-ഗുണിത-ഫേനോദ്ഗമ-രുചിഃ

പ്രവാഹോ വാരാം യഃ പൃഷതലഘുദൃഷ്ടഃ ശിരസി തേ ।

ജഗദ്ദ്വീപാകാരം ജലധിവലയം തേന കൃതമിതി

അനേനൈവോന്നേയം ധൃതമഹിമ ദിവ്യം തവ വപുഃ ॥ 17 ॥

രഥഃ ക്ഷോണീ യന്താ ശതധൃതിരഗേന്ദ്രോ ധനുരഥോ

രഥാങ്ഗേ ചന്ദ്രാര്കൌ രഥ-ചരണ-പാണിഃ ശര ഇതി ।

ദിധക്ഷോസ്തേ കോഽയം ത്രിപുരതൃണമാഡമ്ബര-വിധിഃ

വിധേയൈഃ ക്രീഡന്ത്യോ ന ഖലു പരതന്ത്രാഃ പ്രഭുധിയഃ ॥ 18 ॥

ഹരിസ്തേ സാഹസ്രം കമല ബലിമാധായ പദയോഃ

യദേകോനേ തസ്മിന് നിജമുദഹരന്നേത്രകമലമ് ।

ഗതോ ഭക്ത്യുദ്രേകഃ പരിണതിമസൌ ചക്രവപുഷഃ

ത്രയാണാം രക്ഷായൈ ത്രിപുരഹര ജാഗര്തി ജഗതാമ് ॥ 19 ॥

ക്രതൌ സുപ്തേ ജാഗ്രത് ത്വമസി ഫലയോഗേ ക്രതുമതാം

ക്വ കര്മ പ്രധ്വസ്തം ഫലതി പുരുഷാരാധനമൃതേ ।

അതസ്ത്വാം സമ്പ്രേക്ഷ്യ ക്രതുഷു ഫലദാന-പ്രതിഭുവം

ശ്രുതൌ ശ്രദ്ധാം ബധ്വാ ദൃഢപരികരഃ കര്മസു ജനഃ ॥ 20 ॥

ക്രിയാദക്ഷോ ദക്ഷഃ ക്രതുപതിരധീശസ്തനുഭൃതാം

ഋഷീണാമാര്ത്വിജ്യം ശരണദ സദസ്യാഃ സുര-ഗണാഃ ।

ക്രതുഭ്രംശസ്ത്വത്തഃ ക്രതുഫല-വിധാന-വ്യസനിനഃ

ധ്രുവം കര്തുഃ ശ്രദ്ധാ-വിധുരമഭിചാരായ ഹി മഖാഃ ॥ 21 ॥

പ്രജാനാഥം നാഥ പ്രസഭമഭികം സ്വാം ദുഹിതരം

ഗതം രോഹിദ് ഭൂതാം രിരമയിഷുമൃഷ്യസ്യ വപുഷാ ।

ധനുഷ്പാണേര്യാതം ദിവമപി സപത്രാകൃതമമും

ത്രസന്തം തേഽദ്യാപി ത്യജതി ന മൃഗവ്യാധരഭസഃ ॥ 22 ॥

സ്വലാവണ്യാശംസാ ധൃതധനുഷമഹ്നായ തൃണവത്

പുരഃ പ്ലുഷ്ടം ദൃഷ്ട്വാ പുരമഥന പുഷ്പായുധമപി ।

യദി സ്ത്രൈണം ദേവീ യമനിരത-ദേഹാര്ധ-ഘടനാത്

അവൈതി ത്വാമദ്ധാ ബത വരദ മുഗ്ധാ യുവതയഃ ॥ 23 ॥

ശ്മശാനേഷ്വാക്രീഡാ സ്മരഹര പിശാചാഃ സഹചരാഃ

ചിതാ-ഭസ്മാലേപഃ സ്രഗപി നൃകരോടീ-പരികരഃ ।

അമങ്ഗല്യം ശീലം തവ ഭവതു നാമൈവമഖിലം

തഥാപി സ്മര്തൄണാം വരദ പരമം മങ്ഗലമസി ॥ 24 ॥

മനഃ പ്രത്യക്ചിത്തേ സവിധമവിധായാത്ത-മരുതഃ

പ്രഹൃഷ്യദ്രോമാണഃ പ്രമദ-സലിലോത്സങ്ഗതി-ദൃശഃ ।

യദാലോക്യാഹ്ലാദം ഹ്രദ ഇവ നിമജ്യാമൃതമയേ

ദധത്യന്തസ്തത്ത്വം കിമപി യമിനസ്തത് കില ഭവാന് ॥ 25 ॥

ത്വമര്കസ്ത്വം സോമസ്ത്വമസി പവനസ്ത്വം ഹുതവഹഃ

ത്വമാപസ്ത്വം വ്യോമ ത്വമു ധരണിരാത്മാ ത്വമിതി ച ।

പരിച്ഛിന്നാമേവം ത്വയി പരിണതാ ബിഭ്രതി ഗിരം

ന വിദ്മസ്തത്തത്ത്വം വയമിഹ തു യത് ത്വം ന ഭവസി ॥ 26 ॥

ത്രയീം തിസ്രോ വൃത്തീസ്ത്രിഭുവനമഥോ ത്രീനപി സുരാന്

അകാരാദ്യൈര്വര്ണൈസ്ത്രിഭിരഭിദധത് തീര്ണവികൃതി ।

തുരീയം തേ ധാമ ധ്വനിഭിരവരുന്ധാനമണുഭിഃ

സമസ്തം വ്യസ്തം ത്വാം ശരണദ ഗൃണാത്യോമിതി പദമ് ॥ 27 ॥

ഭവഃ ശര്വോ രുദ്രഃ പശുപതിരഥോഗ്രഃ സഹമഹാന്

തഥാ ഭീമേശാനാവിതി യദഭിധാനാഷ്ടകമിദമ് ।

അമുഷ്മിന് പ്രത്യേകം പ്രവിചരതി ദേവ ശ്രുതിരപി

പ്രിയായാസ്മൈധാമ്നേ പ്രണിഹിത-നമസ്യോഽസ്മി ഭവതേ ॥ 28 ॥

നമോ നേദിഷ്ഠായ പ്രിയദവ ദവിഷ്ഠായ ച നമഃ

നമഃ ക്ഷോദിഷ്ഠായ സ്മരഹര മഹിഷ്ഠായ ച നമഃ ।

നമോ വര്ഷിഷ്ഠായ ത്രിനയന യവിഷ്ഠായ ച നമഃ

നമഃ സര്വസ്മൈ തേ തദിദമിതിസര്വായ ച നമഃ ॥ 29 ॥

ബഹുല-രജസേ വിശ്വോത്പത്തൌ ഭവായ നമോ നമഃ

പ്രബല-തമസേ തത് സംഹാരേ ഹരായ നമോ നമഃ ।

ജന-സുഖകൃതേ സത്ത്വോദ്രിക്തൌ മൃഡായ നമോ നമഃ

പ്രമഹസി പദേ നിസ്ത്രൈഗുണ്യേ ശിവായ നമോ നമഃ ॥ 30 ॥

കൃശ-പരിണതി-ചേതഃ ക്ലേശവശ്യം ക്വ ചേദം

ക്വ ച തവ ഗുണ-സീമോല്ലങ്ഘിനീ ശശ്വദൃദ്ധിഃ ।

ഇതി ചകിതമമന്ദീകൃത്യ മാം ഭക്തിരാധാദ്

വരദ ചരണയോസ്തേ വാക്യ-പുഷ്പോപഹാരമ് ॥ 31 ॥

അസിത-ഗിരി-സമം സ്യാത് കജ്ജലം സിന്ധു-പാത്രേ

സുര-തരുവര-ശാഖാ ലേഖനീ പത്രമുര്വീ ।

ലിഖതി യദി ഗൃഹീത്വാ ശാരദാ സര്വകാലം

തദപി തവ ഗുണാനാമീശ പാരം ന യാതി ॥ 32 ॥

അസുര-സുര-മുനീന്ദ്രൈരര്ചിതസ്യേന്ദു-മൌലേഃ

ഗ്രഥിത-ഗുണമഹിമ്നോ നിര്ഗുണസ്യേശ്വരസ്യ ।

സകല-ഗണ-വരിഷ്ഠഃ പുഷ്പദന്താഭിധാനഃ

രുചിരമലഘുവൃത്തൈഃ സ്തോത്രമേതച്ചകാര ॥ 33 ॥

അഹരഹരനവദ്യം ധൂര്ജടേഃ സ്തോത്രമേതത്

പഠതി പരമഭക്ത്യാ ശുദ്ധ-ചിത്തഃ പുമാന് യഃ ।

സ ഭവതി ശിവലോകേ രുദ്രതുല്യസ്തഥാഽത്ര

പ്രചുരതര-ധനായുഃ പുത്രവാന് കീര്തിമാംശ്ച ॥ 34 ॥

മഹേശാന്നാപരോ ദേവോ മഹിമ്നോ നാപരാ സ്തുതിഃ ।

അഘോരാന്നാപരോ മന്ത്രോ നാസ്തി തത്ത്വം ഗുരോഃ പരമ് ॥ 35 ॥

ദീക്ഷാ ദാനം തപസ്തീര്ഥം ജ്ഞാനം യാഗാദികാഃ ക്രിയാഃ ।

മഹിമ്നസ്തവ പാഠസ്യ കലാം നാര്ഹന്തി ഷോഡശീമ് ॥ 36 ॥

കുസുമദശന-നാമാ സര്വ-ഗന്ധര്വ-രാജഃ

ശശിധരവര-മൌലേര്ദേവദേവസ്യ ദാസഃ ।

സ ഖലു നിജ-മഹിമ്നോ ഭ്രഷ്ട ഏവാസ്യ രോഷാത്

സ്തവനമിദമകാര്ഷീദ് ദിവ്യ-ദിവ്യം മഹിമ്നഃ ॥ 37 ॥

സുരഗുരുമഭിപൂജ്യ സ്വര്ഗ-മോക്ഷൈക-ഹേതും [സുരവരമുനിപൂജ്യം]

പഠതി യദി മനുഷ്യഃ പ്രാഞ്ജലിര്നാന്യ-ചേതാഃ ।

വ്രജതി ശിവ-സമീപം കിന്നരൈഃ സ്തൂയമാനഃ

സ്തവനമിദമമോഘം പുഷ്പദന്തപ്രണീതമ് ॥ 38 ॥

ശ്രീ പുഷ്പദന്ത-മുഖ-പങ്കജ-നിര്ഗതേന

സ്തോത്രേണ കില്ബിഷ-ഹരേണ ഹര-പ്രിയേണ ।

കണ്ഠസ്ഥിതേന പഠിതേന സമാഹിതേന

സുപ്രീണിതോ ഭവതി ഭൂതപതിര്മഹേശഃ ॥ 43 ॥

ആസമാപ്തമിദം സ്തോത്രം പുണ്യം ഗന്ധര്വ-ഭാഷിതമ് ।

അനൌപമ്യം മനോഹാരി സര്വമീശ്വരവര്ണനമ് ॥ 39 ॥

തവ തത്ത്വം ന ജാനാമി കീദൃശോഽസി മഹേശ്വര ।

യാദൃശോഽസി മഹാദേവ താദൃശായ നമോ നമഃ ॥ 41 ॥

ഏകകാലം ദ്വികാലം വാ ത്രികാലം യഃ പഠേന്നരഃ ।

സര്വപാപ-വിനിര്മുക്തഃ ശിവ ലോകേ മഹീയതേ ॥ 42 ॥

ഇത്യേഷാ വാങ്മയീ പൂജാ ശ്രീമച്ഛങ്കര-പാദയോഃ ।

അര്പിതാ തേന ദേവേശഃ പ്രീയതാം മേ സദാശിവഃ ॥ 40 ॥

॥ ഇതി ശ്രീ പുഷ്പദന്ത വിരചിതം ശിവമഹിമ്ന-സ്തോത്രം സമാപ്തമ് ॥

Roman (IAST) Transliteration

atha śrī śivamahimnastotram ||

mahimnaḥ pāraṃ te paramaviduṣo yadyasadṛśī

stutirbrahmādīnāmapi tadavasannāstvayi giraḥ |

athā'vācyaḥ sarvaḥ svamatipariṇāmāvadhi gṛṇan

mamāpyeṣa stotre hara nirapavādaḥ parikaraḥ || 1 ||

atītaḥ panthānaṃ tava ca mahimā vāṅmanasayoḥ

atadvyāvṛttyā yaṃ cakitamabhidhatte śrutirapi |

sa kasya stotavyaḥ katividhaguṇaḥ kasya viṣayaḥ

pade tvarvācīne patati na manaḥ kasya na vacaḥ || 2 ||

madhusphītā vācaḥ paramamamṛtaṃ nirmitavataḥ

tava brahman kiṃ vāgapi suragurorvismayapadam |

mama tvetāṃ vāṇīṃ guṇakathanapuṇyena bhavataḥ

punāmītyarthe'smin puramathana buddhirvyavasitā || 3 ||

tavaiśvaryaṃ yattajjagadudayarakṣāpralayakṛt

trayīvastu vyastaṃ tisruṣu guṇabhinnāsu tanuṣu |

abhavyānāmasmin varada ramaṇīyāmaramaṇīṃ

vihantuṃ vyākrośīṃ vidadhata ihaike jaḍadhiyaḥ || 4 ||

kimīhaḥ kiṅkāyaḥ sa khalu kimupāyastribhuvanaṃ

kimādhāro dhātā sṛjati kimupādāna iti ca |

atarkyaiśvarye tvayyanavasara duḥstho hatadhiyaḥ

kutarko'yaṃ kāṃścit mukharayati mohāya jagataḥ || 5 ||

ajanmāno lokāḥ kimavayavavanto'pi jagatāṃ

adhiṣṭhātāraṃ kiṃ bhavavidhiranādṛtya bhavati |

anīśo vā kuryād bhuvanajanane kaḥ parikaro

yato mandāstvāṃ pratyamaravara saṃśerata ime || 6 ||

trayī sāṅkhyaṃ yogaḥ paśupatimataṃ vaiṣṇavamiti

prabhinne prasthāne paramidamadaḥ pathyamiti ca |

rucīnāṃ vaicitryādṛjukuṭila nānāpathajuṣāṃ

nṛṇāmeko gamyastvamasi payasāmarṇava iva || 7 ||

mahokṣaḥ khaṭvāṅgaṃ paraśurajinaṃ bhasma phaṇinaḥ

kapālaṃ cetīyattava varada tantropakaraṇam |

surāstāṃ tāmṛddhiṃ dadhati tu bhavadbhūpraṇihitāṃ

na hi svātmārāmaṃ viṣayamṛgatṛṣṇā bhramayati || 8 ||

dhruvaṃ kaścit sarvaṃ sakalamaparastvadhruvamidaṃ

paro dhrauvyā'dhrauvye jagati gadati vyastaviṣaye |

samaste'pyetasmin puramathana tairvismita iva

stuvan jihremi tvāṃ na khalu nanu dhṛṣṭā mukharatā || 9 ||

tavaiśvaryaṃ yatnād yadupari viriñcirhariradhaḥ

paricchetuṃ yātāvanalamanalaskandhavapuṣaḥ |

tato bhaktiśraddhā-bharaguru-gṛṇadbhyāṃ giriśa yat

svayaṃ tasthe tābhyāṃ tava kimanuvṛttirna phalati || 10 ||

ayatnādāsādya tribhuvanamavairavyatikaraṃ

daśāsyo yadbāhūnabhṛta raṇakaṇḍū-paravaśān |

śiraḥpadmaśreṇī-racitacaraṇāmbhoruha-baleḥ

sthirāyāstvadbhaktestripurahara visphūrjitamidam || 11 ||

amuṣya tvatsevā-samadhigatasāraṃ bhujavanaṃ

balāt kailāse'pi tvadadhivasatau vikramayataḥ |

alabhyā pātāle'pyalasacalitāṅguṣṭhaśirasi

pratiṣṭhā tvayyāsīd dhruvamupacito muhyati khalaḥ || 12 ||

yadṛddhiṃ sutrāmṇo varada paramoccairapi satīṃ

adhaścakre bāṇaḥ parijanavidheyatribhuvanaḥ |

na taccitraṃ tasmin varivasitari tvaccaraṇayoḥ

na kasyāpyunnatyai bhavati śirasastvayyavanatiḥ || 13 ||

akāṇḍa-brahmāṇḍa-kṣayacakita-devāsurakṛpā

vidheyasyā''sīd yastrinayana viṣaṃ saṃhṛtavataḥ |

sa kalmāṣaḥ kaṇṭhe tava na kurute na śriyamaho

vikāro'pi ślāghyo bhuvana-bhaya- bhaṅga- vyasaninaḥ || 14 ||

asiddhārthā naiva kvacidapi sadevāsuranare

nivartante nityaṃ jagati jayino yasya viśikhāḥ |

sa paśyannīśa tvāmitarasurasādhāraṇamabhūt

smaraḥ smartavyātmā na hi vaśiṣu pathyaḥ paribhavaḥ || 15 ||

mahī pādāghātād vrajati sahasā saṃśayapadaṃ

padaṃ viṣṇorbhrāmyad bhuja-parigha-rugṇa-graha- gaṇam |

muhurdyaurdausthyaṃ yātyanibhṛta-jaṭā-tāḍita-taṭā

jagadrakṣāyai tvaṃ naṭasi nanu vāmaiva vibhutā || 16 ||

viyadvyāpī tārā-gaṇa-guṇita-phenodgama-ruciḥ

pravāho vārāṃ yaḥ pṛṣatalaghudṛṣṭaḥ śirasi te |

jagaddvīpākāraṃ jaladhivalayaṃ tena kṛtamiti

anenaivonneyaṃ dhṛtamahima divyaṃ tava vapuḥ || 17 ||

rathaḥ kṣoṇī yantā śatadhṛtiragendro dhanuratho

rathāṅge candrārkau ratha-caraṇa-pāṇiḥ śara iti |

didhakṣoste ko'yaṃ tripuratṛṇamāḍambara-vidhiḥ

vidheyaiḥ krīḍantyo na khalu paratantrāḥ prabhudhiyaḥ || 18 ||

hariste sāhasraṃ kamala balimādhāya padayoḥ

yadekone tasmin nijamudaharannetrakamalam |

gato bhaktyudrekaḥ pariṇatimasau cakravapuṣaḥ

trayāṇāṃ rakṣāyai tripurahara jāgarti jagatām || 19 ||

kratau supte jāgrat tvamasi phalayoge kratumatāṃ

kva karma pradhvastaṃ phalati puruṣārādhanamṛte |

atastvāṃ samprekṣya kratuṣu phaladāna-pratibhuvaṃ

śrutau śraddhāṃ badhvā dṛḍhaparikaraḥ karmasu janaḥ || 20 ||

kriyādakṣo dakṣaḥ kratupatiradhīśastanubhṛtāṃ

ṛṣīṇāmārtvijyaṃ śaraṇada sadasyāḥ sura-gaṇāḥ |

kratubhraṃśastvattaḥ kratuphala-vidhāna-vyasaninaḥ

dhruvaṃ kartuḥ śraddhā-vidhuramabhicārāya hi makhāḥ || 21 ||

prajānāthaṃ nātha prasabhamabhikaṃ svāṃ duhitaraṃ

gataṃ rohid bhūtāṃ riramayiṣumṛṣyasya vapuṣā |

dhanuṣpāṇeryātaṃ divamapi sapatrākṛtamamuṃ

trasantaṃ te'dyāpi tyajati na mṛgavyādharabhasaḥ || 22 ||

svalāvaṇyāśaṃsā dhṛtadhanuṣamahnāya tṛṇavat

puraḥ pluṣṭaṃ dṛṣṭvā puramathana puṣpāyudhamapi |

yadi straiṇaṃ devī yamanirata-dehārdha-ghaṭanāt

avaiti tvāmaddhā bata varada mugdhā yuvatayaḥ || 23 ||

śmaśāneṣvākrīḍā smarahara piśācāḥ sahacarāḥ

citā-bhasmālepaḥ sragapi nṛkaroṭī-parikaraḥ |

amaṅgalyaṃ śīlaṃ tava bhavatu nāmaivamakhilaṃ

tathāpi smartṝṇāṃ varada paramaṃ maṅgalamasi || 24 ||

manaḥ pratyakcitte savidhamavidhāyātta-marutaḥ

prahṛṣyadromāṇaḥ pramada-salilotsaṅgati-dṛśaḥ |

yadālokyāhlādaṃ hrada iva nimajyāmṛtamaye

dadhatyantastattvaṃ kimapi yaminastat kila bhavān || 25 ||

tvamarkastvaṃ somastvamasi pavanastvaṃ hutavahaḥ

tvamāpastvaṃ vyoma tvamu dharaṇirātmā tvamiti ca |

paricchinnāmevaṃ tvayi pariṇatā bibhrati giraṃ

na vidmastattattvaṃ vayamiha tu yat tvaṃ na bhavasi || 26 ||

trayīṃ tisro vṛttīstribhuvanamatho trīnapi surān

akārādyairvarṇaistribhirabhidadhat tīrṇavikṛti |

turīyaṃ te dhāma dhvanibhiravarundhānamaṇubhiḥ

samastaṃ vyastaṃ tvāṃ śaraṇada gṛṇātyomiti padam || 27 ||

bhavaḥ śarvo rudraḥ paśupatirathograḥ sahamahān

tathā bhīmeśānāviti yadabhidhānāṣṭakamidam |

amuṣmin pratyekaṃ pravicarati deva śrutirapi

priyāyāsmaidhāmne praṇihita-namasyo'smi bhavate || 28 ||

namo nediṣṭhāya priyadava daviṣṭhāya ca namaḥ

namaḥ kṣodiṣṭhāya smarahara mahiṣṭhāya ca namaḥ |

namo varṣiṣṭhāya trinayana yaviṣṭhāya ca namaḥ

namaḥ sarvasmai te tadidamitisarvāya ca namaḥ || 29 ||

bahula-rajase viśvotpattau bhavāya namo namaḥ

prabala-tamase tat saṃhāre harāya namo namaḥ |

jana-sukhakṛte sattvodriktau mṛḍāya namo namaḥ

pramahasi pade nistraiguṇye śivāya namo namaḥ || 30 ||

kṛśa-pariṇati-cetaḥ kleśavaśyaṃ kva cedaṃ

kva ca tava guṇa-sīmollaṅghinī śaśvadṛddhiḥ |

iti cakitamamandīkṛtya māṃ bhaktirādhād

varada caraṇayoste vākya-puṣpopahāram || 31 ||

asita-giri-samaṃ syāt kajjalaṃ sindhu-pātre

sura-taruvara-śākhā lekhanī patramurvī |

likhati yadi gṛhītvā śāradā sarvakālaṃ

tadapi tava guṇānāmīśa pāraṃ na yāti || 32 ||

asura-sura-munīndrairarcitasyendu-mauleḥ

grathita-guṇamahimno nirguṇasyeśvarasya |

sakala-gaṇa-variṣṭhaḥ puṣpadantābhidhānaḥ

ruciramalaghuvṛttaiḥ stotrametaccakāra || 33 ||

aharaharanavadyaṃ dhūrjaṭeḥ stotrametat

paṭhati paramabhaktyā śuddha-cittaḥ pumān yaḥ |

sa bhavati śivaloke rudratulyastathā'tra

pracuratara-dhanāyuḥ putravān kīrtimāṃśca || 34 ||

maheśānnāparo devo mahimno nāparā stutiḥ |

aghorānnāparo mantro nāsti tattvaṃ guroḥ param || 35 ||

dīkṣā dānaṃ tapastīrthaṃ jñānaṃ yāgādikāḥ kriyāḥ |

mahimnastava pāṭhasya kalāṃ nārhanti ṣoḍaśīm || 36 ||

kusumadaśana-nāmā sarva-gandharva-rājaḥ

śaśidharavara-maulerdevadevasya dāsaḥ |

sa khalu nija-mahimno bhraṣṭa evāsya roṣāt

stavanamidamakārṣīd divya-divyaṃ mahimnaḥ || 37 ||

suragurumabhipūjya svarga-mokṣaika-hetuṃ [suravaramunipūjyaṃ]

paṭhati yadi manuṣyaḥ prāñjalirnānya-cetāḥ |

vrajati śiva-samīpaṃ kinnaraiḥ stūyamānaḥ

stavanamidamamoghaṃ puṣpadantapraṇītam || 38 ||

śrī puṣpadanta-mukha-paṅkaja-nirgatena

stotreṇa kilbiṣa-hareṇa hara-priyeṇa |

kaṇṭhasthitena paṭhitena samāhitena

suprīṇito bhavati bhūtapatirmaheśaḥ || 43 ||

āsamāptamidaṃ stotraṃ puṇyaṃ gandharva-bhāṣitam |

anaupamyaṃ manohāri sarvamīśvaravarṇanam || 39 ||

tava tattvaṃ na jānāmi kīdṛśo'si maheśvara |

yādṛśo'si mahādeva tādṛśāya namo namaḥ || 41 ||

ekakālaṃ dvikālaṃ vā trikālaṃ yaḥ paṭhennaraḥ |

sarvapāpa-vinirmuktaḥ śiva loke mahīyate || 42 ||

ityeṣā vāṅmayī pūjā śrīmacchaṅkara-pādayoḥ |

arpitā tena deveśaḥ prīyatāṃ me sadāśivaḥ || 40 ||

|| iti śrī puṣpadanta viracitaṃ śivamahimna-stotraṃ samāptam ||