Sakala Janani Stavah — InfoLyter.in

ॐ

സകല ജനനീ സ്തവഃ

Sakala Janani Stavah

Malayalam

അജാനന്തോ യാന്തി ക്ഷയമവശമന്യോന്യകലഹൈ-

-രമീ മായാഗ്രന്ഥൌ തവ പരിലുഠന്തഃ സമയിനഃ ।

ജഗന്മാതര്ജന്മജ്വരഭയതമഃ കൌമുദി വയം

നമസ്തേ കുര്വാണാഃ ശരണമുപയാമോ ഭഗവതീമ് ॥ 1 ॥

വചസ്തര്കാഗമ്യസ്വരസപരമാനന്ദവിഭവ-

-പ്രബോധാകാരായ ദ്യുതിതുലിതനീലോത്പലരുചേ ।

ശിവാദ്യാരാധ്യായ സ്തനഭരവിനമ്രായ സതതം

നമസ്തസ്മൈ കസ്മൈചന ഭവതു മുഗ്ധായ മഹസേ ॥ 2 ॥

അനാദ്യന്താഭേദപ്രണയരസികാപി പ്രണയിനീ

ശിവസ്യാസീര്യത്ത്വം പരിണയവിധൌ ദേവി ഗൃഹിണീ ।

സവിത്രീ ഭൂതാനാമപി യദുദഭൂഃ ശൈലതനയാ

തദേതത്സംസാരപ്രണയനമഹാനാടകമുഖമ് ॥ 3 ॥

ബ്രുവന്ത്യേകേ തത്ത്വം ഭഗവതി സദന്യേ വിദുരസ-

-ത്പരേ മാതഃ പ്രാഹുസ്തവ സദസദന്യേ സുകവയഃ ।

പരേ നൈതത്സര്വം സമഭിദധതേ ദേവി സുധിയ-

-സ്തദേതത്ത്വന്മായാവിലസിതമശേഷം നനു ശിവേ ॥ 4 ॥

ലുഠദ്ഗുഞ്ജാഹാരസ്തനഭരനമന്മധ്യലതികാ-

-മുദഞ്ചദ്ധര്മാമ്ഭഃ കണഗുണിതവക്ത്രാമ്ബുജരുചമ് ।

ശിവം പാര്ഥത്രാണപ്രവണമൃഗയാകാരഗുണിതം

ശിവാമന്വഗ്യാന്തീം ശരണമഹമന്വേമി ശബരീമ് ॥ 5 ॥

മിഥഃ കേശാകേശിപ്രഥനനിധനാസ്തര്കഘടനാഃ

ബഹുശ്രദ്ധാഭക്തിപ്രണതിവിഷയാഃ ശാസ്ത്രവിധയഃ ।

പ്രസീദ പ്രത്യക്ഷീഭവ ഗിരിസുതേ ദേഹി ശരണം

നിരാലമ്ബം ചേതഃ പരിലുഠതി പാരിപ്ലവമിദമ് ॥ 6 ॥

ശുനാം വാ വഹ്നേര്വാ ഖഗപരിഷദോ വാ യദശനം

കദാ കേന ക്വേതി ക്വചിദപി ന കശ്ചിത്കലയതി ।

അമുഷ്മിന്വിശ്വാസം വിജഹിഹി മമാഹ്നായ വപുഷി

പ്രപദ്യേഥാശ്ചേതഃ സകലജനനീമേവ ശരണമ് ॥ 7 ॥

തടിത്കോടിജ്യോതിര്ദ്യുതിദലിതഷഡ്ഗ്രന്ഥിഗഹനം

പ്രവിഷ്ടം സ്വാധാരം പുനരപി സുധാവൃഷ്ടിവപുഷാ ।

കിമപ്യഷ്ടാവിംശത്കിരണസകലീഭൂതമനിശം

ഭജേ ധാമ ശ്യാമം കുചഭരനതം ബര്ബരകചമ് ॥ 8 ॥

ചതുഷ്പത്രാന്തഃ ഷഡ്ദലപുടഭഗാന്തസ്ത്രിവലയ-

-സ്ഫുരദ്വിദ്യുദ്വഹ്നിദ്യുമണിനിയുതാഭദ്യുതിലതേ ।

ഷഡശ്രം ഭിത്ത്വാദൌ ദശദലമഥ ദ്വാദശദലം

കലാശ്രം ച ദ്വ്യശ്രം ഗതവതി നമസ്തേ ഗിരിസുതേ ॥ 9 ॥

കുലം കേചിത്പ്രാഹുര്വപുരകുലമന്യേ തവ ബുധാഃ

പരേ തത്സമ്ഭേദം സമഭിദധതേ കൌലമപരേ ।

ചതുര്ണാമപ്യേഷാമുപരി കിമപി പ്രാഹുരപരേ

മഹാമായേ തത്ത്വം തവ കഥമമീ നിശ്ചിനുമഹേ ॥ 10 ॥

ഷഡധ്വാരണ്യാനീം പ്രലയരവികോടിപ്രതിരുചാ

രുചാ ഭസ്മീകൃത്യ സ്വപദകമലപ്രഹ്വശിരസാമ് ।

വിതന്വാനഃ ശൈവം കിമപി വപുരിന്ദീവരരുചിഃ

കുചാഭ്യാമാനമ്രസ്തവ പുരുഷകാരോ വിജയതേ ॥ 11 ॥

പ്രകാശാനന്ദാഭ്യാമവിദിതചരീം മധ്യപദവീം

പ്രവിശ്യൈതദ്ദ്വന്ദ്വം രവിശശിസമാഖ്യം കബലയന് ।

പ്രപദ്യോര്ധ്വം നാദം ലയദഹനഭസ്മീകൃതകുലഃ

പ്രസാദാത്തേ ജന്തുഃ ശിവമകുലമമ്ബ പ്രവിശതി ॥ 12 ॥

മനുഷ്യാസ്തിര്യഞ്ചോ മരുത ഇതി ലോകത്രയമിദം

ഭവാമ്ഭോധൌ മഗ്നം ത്രിഗുണലഹരീകോടിലുഠിതമ് ।

കടാക്ഷശ്ചേദ്യത്ര ക്വചന തവ മാതഃ കരുണയാ

ശരീരീ സദ്യോഽയം വ്രജതി പരമാനന്ദതനുതാമ് ॥ 13 ॥

പ്രിയങ്ഗുശ്യാമാങ്ഗീമരുണതരവാസം കിസലയാം

സമുന്മീലന്മുക്താഫലവഹലനേപഥ്യസുഭഗാമ് ।

സ്തനദ്വന്ദ്വസ്ഫാരസ്തബകനമിതാം കല്പലതികാം

സകൃദ്ധ്യായന്തസ്ത്വാം ദധതി ശിവചിന്താമണിപദമ് ॥ 14 ॥

ഷഡാധാരാവര്തൈരപരിമിതമന്ത്രോര്മിപടലൈഃ

ലസന്മുദ്രാഫേനൈര്ബഹുവിധലസദ്ദൈവതഝഷൈഃ ।

ക്രമസ്രോതോഭിസ്ത്വം വഹസി പരനാദാമൃതനദീ

ഭവാനി പ്രത്യഗ്രാ ശിവചിദമൃതാബ്ധിപ്രണയിനീ ॥ 15 ॥

മഹീപാഥോവഹ്നിശ്വസനവിയദാത്മേന്ദുരവിഭി-

-ര്വപുര്ഭിഗ്രസ്താശൈരപി തവ കിയാനമ്ബ മഹിമാ ।

അമൂന്യാലോക്യന്തേ ഭഗവതി ന കുത്രാപ്യണുതമാ-

-മവസ്ഥാം പ്രാപ്താനി ത്വയി തു പരമവ്യോമവപുഷി ॥ 16 ॥

കലാമാജ്ഞാം പ്രജ്ഞാം സമയമനുഭൂതിം സമരസം

ഗുരും പാരമ്പര്യം വിനയമുപദേശം ശിവപദമ് ।

പ്രമാണം നിര്വാണം പ്രകൃതിമഭിഭൂതിം പരഗുഹാം

വിധിം വിദ്യാമാഹുഃ സകലജനനീമേവ മുനയഃ ॥ 17 ॥

പ്രലീനേ ശബ്ദൌഘേ തദനു വിരതേ ബിന്ദുവിഭവേ

തതസ്തത്ത്വേ ചാഷ്ടധ്വനിഭിരനപായിന്യധിഗതേ ।

ശ്രിതേ ശാക്തേ പര്വണ്യനുകലിതചിന്മാത്ര ഗഹനാം

സ്വസംവിത്തിം യോഗീ രസയതി ശിവാഖ്യാം ഭഗവതീമ് ॥ 18 ॥

പരാനന്ദാകാരാം നിരവധിശിവൈശ്വര്യവപുഷം

നിരാകാരാം ജ്ഞാനപ്രകൃതിമപരിച്ഛിന്നകരുണാമ് ।

സവിത്രീം ലോകാനാം നിരതിശയധാമാസ്പദപദാം

ഭവോ വാ മോക്ഷോ വാ ഭവതു ഭവതീമേവ ഭജതാമ് ॥ 19 ॥

ജഗത്കായേ കൃത്വാ തദപി ഹൃദയേ തച്ച പുരുഷേ

പുമാംസം ബിന്ദുസ്ഥം തദപി വിയദാഖ്യേ ച ഗഹനേ ।

തദേതദ്ജ്ഞാനാഖ്യേ തദപി പരമാനന്ദഗഹനേ

മഹാവ്യോമാകാരേ ത്വദനുഭവശീലോ വിജയതേ ॥ 20 ॥

വിധേ വേദ്യേ വിദ്യേ വിവിധസമയേ വേദഗുലികേ

വിചിത്രേ വിശ്വാദ്യേ വിനയസുലഭേ വേദജനനി ।

ശിവജ്ഞേ ശൂലസ്ഥേ ശിവപദവദാന്യേ ശിവനിധേ

ശിവേ മാതര്മഹ്യം ത്വയി വിതര ഭക്തിം നിരുപമാമ് ॥ 21 ॥

വിധേര്മുണ്ഡം ഹൃത്വാ യദകുരുത പാത്രം കരതലേ

ഹരിം ശൂലപ്രോതം യദഗമയദംസാഭരണതാമ് ।

അലഞ്ചക്രേ കണ്ഠം യദപി ഗരലേനാമ്ബ ഗിരിശഃ

ശിവസ്ഥായാഃ ശക്തേസ്തദിദമഖിലം തേ വിലസിതമ് ॥ 22 ॥

വിരിഞ്ച്യാഖ്യാ മാതഃ സൃജസി ഹരിസഞ്ജ്ഞാ ത്വമവസി

ത്രിലോകീം രുദ്രാഖ്യാ ഹരസി വിദധാസീശ്വരദശാമ് ।

ഭവന്തീ നാദാഖ്യാ വിഹരസി ച പാശൌഘദലനീ

ത്വമേവൈകാഽനേകാ ഭവസി കൃതിഭേദൈര്ഗിരിസുതേ ॥ 23 ॥

മുനീനാം ചേതോഭിഃ പ്രമൃദിതകഷായൈരപി മനാ-

-ഗശക്യം സംസ്പ്രഷ്ടും ചകിതചകിതൈരമ്ബ സതതമ് ।

ശ്രുതീനാം മൂര്ധാനഃ പ്രകൃതികഠിനാഃ കോമലതരേ

കഥം തേ വിന്ദന്തേ പദകിസലയേ പാര്വതി പദമ് ॥ 24 ॥

തടിദ്വല്ലീം നിത്യാമമൃതസരിതം പാരരഹിതാം

മലോത്തീര്ണാം ജ്യോത്സ്നാം പ്രകൃതിമഗുണഗ്രന്ഥിഗഹനാമ് ।

ഗിരാം ദൂരാം വിദ്യാമവിനതകുചാം വിശ്വജനനീ-

-മപര്യന്താം ലക്ഷ്മീമഭിദധതി സന്തോ ഭഗവതീമ് ॥ 25 ॥

ശരീരം ക്ഷിത്യമ്ഭഃ പ്രഭൃതിരചിതം കേവലമചിത്

സുഖം ദുഃഖം ചായം കലയതി പുമാംശ്ചേതന ഇതി ।

സ്ഫുടം ജാനാനോഽപി പ്രഭവതി ന ദേഹീ രഹയിതും

ശരീരാഹങ്കാരം തവ സമയബാഹ്യോ ഗിരിസുതേ ॥ 26 ॥

പിതാ മാതാ ഭ്രാതാ സുഹൃദനുചരഃ സദ്മ ഗൃഹിണീ

വപുഃ ക്ഷേത്രം മിത്രം ധനമപി യദാ മാം വിജഹതി ।

തദാ മേ ഭിന്ദാനാ സപദി ഭയമോഹാന്ധതമസം

മഹാജ്യോത്സ്നേ മാതര്ഭവ കരുണയാ സന്നിധികരീ ॥ 27 ॥

സുതാ ദക്ഷസ്യാദൌ കില സകലമാതസ്ത്വമുദഭൂഃ

സദോഷം തം ഹിത്വാ തദനു ഗിരിരാജസ്യ ദുഹിതാ ।

അനാദ്യന്താ ശമ്ഭോരപൃഥഗപി ശക്തിര്ഭഗവതീ

വിവാഹാജ്ജായാസീത്യഹഹ ചരിതം വേത്തി തവ കഃ ॥ 28 ॥

കണാസ്ത്വദ്ദീപ്തീനാം രവിശശികൃശാനുപ്രഭൃതയഃ

പരം ബ്രഹ്മ ക്ഷുദ്രം തവ നിയതമാനന്ദകണികാ ।

ശിവാദി ക്ഷിത്യന്തം ത്രിവലയതനോഃ സര്വമുദരേ

തവാസ്തേ ഭക്തസ്യ സ്ഫുരസി ഹൃദി ചിത്രം ഭഗവതി ॥ 29 ॥

പുരഃ പശ്ചാദന്തര്ബഹിരപരിമേയം പരിമിതം

പരം സ്ഥൂലം സൂക്ഷ്മം സകലമകുലം ഗുഹ്യമഗുഹമ് ।

ദവീയോ നേദീയഃ സദസദിതി വിശ്വം ഭഗവതീ

സദാ പശ്യന്ത്യാഖ്യാം വഹസി ഭുവനക്ഷോഭജനനീമ് ॥ 30 ॥

പ്രവിശ്യ ത്വന്മാര്ഗം സഹജദയയാ ദേശികദൃശാ

ഷഡധ്വധ്വാന്തൌഘച്ഛിദുരഗണനാതീതകരുണാമ് ।

പരാമാജ്ഞാകാരാം സപദി ശിവയന്തീം ശിവതനും

സ്വമാത്മാനം ധന്യാശ്ചിരമുപലഭന്തേ ഭഗവതീമ് ॥ 31 ॥

മയൂഖാഃ പൂഷ്ണീവ ജ്വലന ഇവ തദ്ദീപ്തികണികാഃ

പയോധൌ കല്ലോലാഃ പ്രതിഹതമഹിമ്നീവ പൃഷതഃ ।

ഉദേത്യോദേത്യാമ്ബ ത്വയി സഹ നിജൈഃ സാത്ത്വികഗുണൈ-

-ര്ഭജന്തേ തത്ത്വൌഘാഃ പ്രശമമനുകല്പം പരവശാഃ ॥ 32 ॥

വിധുര്വിഷ്ണുര്ബ്രഹ്മാ പ്രകൃതിരണുരാത്മാ ദിനകരഃ

സ്വഭാവോ ജൈനേന്ദ്രഃ സുഗതമുനിരാകാശമലിനഃ ।

ശിവഃ ശക്തിശ്ചേതി ശ്രുതിവിഷയതാം താമുപഗതാം

വികല്പൈരേഭിസ്ത്വാമഭിദധതി സന്തോ ഭഗവതീമ് ॥ 33 ॥

ശിവസ്ത്വം ശക്തിസ്ത്വം ത്വമസി സമയാ ത്വം സമയിനീ

ത്വമാത്മാ ത്വം ദീക്ഷാ ത്വമയമണിമാദിര്ഗുണഗണഃ ।

അവിദ്യാ ത്വം വിദ്യാ ത്വമസി നിഖിലം ത്വം കിമപരം

പൃഥക്തത്ത്വം ത്വത്തോ ഭഗവതി ന വീക്ഷാമഹ ഇമേ ॥ 34 ॥

ത്വയാസൌ ജാനീതേ രചയതി ഭവത്യൈവ സതതം

ത്വയൈവേച്ഛത്യമ്ബ ത്വമസി നിഖിലാ യസ്യ തനവഃ ।

ജഗത്സാമ്യം ശമ്ഭോര്വഹസി പരമവ്യോമവപുഷഃ

തഥാപ്യര്ധം ഭൂത്വാ വിഹരസി ശിവസ്യേതി കിമിദമ് ॥ 35 ॥

അസങ്ഖ്യൈഃ പ്രാചീനൈര്ജനനി ജനനൈഃ കര്മവിലയാ-

-ത്സകൃജ്ജന്മന്യന്തേ ഗുരുവപുഷമാസാദ്യ ഗിരിശമ് ।

അവാപ്യാജ്ഞാം ശൈവീം ശിവതനുമപി ത്വാം വിദിതവാ-

-ന്നയേയം ത്വത്പൂജാസ്തുതിവിരചനേനൈവ ദിവസാന് ॥ 36 ॥

യത്ഷട്പത്രം കമലമുദിതം തസ്യ യാ കര്ണികാഖ്യാ

യോനിസ്തസ്യാഃ പ്രഥിതമുദരേ യത്തദോങ്കാരപീഠമ് ।

തസ്യാപ്യന്തഃ കുചഭരനതാം കുണ്ഡലീതി പ്രസിദ്ധാം

ശ്യാമാകാരാം സകലജനനീം സന്തതം ഭാവയാമി ॥ 37 ॥

ഭുവി പയസി കൃശാനൌ മാരുതേ ഖേ ശശാങ്കേ

സവിതരി യജമാനേഽപ്യഷ്ടധാ ശക്തിരേകാ ।

വഹസി കുചഭരാഭ്യാം യാവനമ്രാപി വിശ്വം

സകലജനനി സാ ത്വം പാഹി മാമിത്യവാച്യമ് ॥ 38 ॥

ഇതി ശ്രീകാലിദാസ വിരചിത പഞ്ചസ്തവ്യാം പഞ്ചമഃ സകലജനനീസ്തവഃ ।

Roman (IAST) Transliteration

ajānanto yānti kṣayamavaśamanyonyakalahai-

-ramī māyāgranthau tava pariluṭhantaḥ samayinaḥ |

jaganmātarjanmajvarabhayatamaḥ kaumudi vayaṃ

namaste kurvāṇāḥ śaraṇamupayāmo bhagavatīm || 1 ||

vacastarkāgamyasvarasaparamānandavibhava-

-prabodhākārāya dyutitulitanīlotpalaruce |

śivādyārādhyāya stanabharavinamrāya satataṃ

namastasmai kasmaicana bhavatu mugdhāya mahase || 2 ||

anādyantābhedapraṇayarasikāpi praṇayinī

śivasyāsīryattvaṃ pariṇayavidhau devi gṛhiṇī |

savitrī bhūtānāmapi yadudabhūḥ śailatanayā

tadetatsaṃsārapraṇayanamahānāṭakamukham || 3 ||

bruvantyeke tattvaṃ bhagavati sadanye vidurasa-

-tpare mātaḥ prāhustava sadasadanye sukavayaḥ |

pare naitatsarvaṃ samabhidadhate devi sudhiya-

-stadetattvanmāyāvilasitamaśeṣaṃ nanu śive || 4 ||

luṭhadguñjāhārastanabharanamanmadhyalatikā-

-mudañcaddharmāmbhaḥ kaṇaguṇitavaktrāmbujarucam |

śivaṃ pārthatrāṇapravaṇamṛgayākāraguṇitaṃ

śivāmanvagyāntīṃ śaraṇamahamanvemi śabarīm || 5 ||

mithaḥ keśākeśiprathananidhanāstarkaghaṭanāḥ

bahuśraddhābhaktipraṇativiṣayāḥ śāstravidhayaḥ |

prasīda pratyakṣībhava girisute dehi śaraṇaṃ

nirālambaṃ cetaḥ pariluṭhati pāriplavamidam || 6 ||

śunāṃ vā vahnervā khagapariṣado vā yadaśanaṃ

kadā kena kveti kvacidapi na kaścitkalayati |

amuṣminviśvāsaṃ vijahihi mamāhnāya vapuṣi

prapadyethāścetaḥ sakalajananīmeva śaraṇam || 7 ||

taṭitkoṭijyotirdyutidalitaṣaḍgranthigahanaṃ

praviṣṭaṃ svādhāraṃ punarapi sudhāvṛṣṭivapuṣā |

kimapyaṣṭāviṃśatkiraṇasakalībhūtamaniśaṃ

bhaje dhāma śyāmaṃ kucabharanataṃ barbarakacam || 8 ||

catuṣpatrāntaḥ ṣaḍdalapuṭabhagāntastrivalaya-

-sphuradvidyudvahnidyumaṇiniyutābhadyutilate |

ṣaḍaśraṃ bhittvādau daśadalamatha dvādaśadalaṃ

kalāśraṃ ca dvyaśraṃ gatavati namaste girisute || 9 ||

kulaṃ kecitprāhurvapurakulamanye tava budhāḥ

pare tatsambhedaṃ samabhidadhate kaulamapare |

caturṇāmapyeṣāmupari kimapi prāhurapare

mahāmāye tattvaṃ tava kathamamī niścinumahe || 10 ||

ṣaḍadhvāraṇyānīṃ pralayaravikoṭipratirucā

rucā bhasmīkṛtya svapadakamalaprahvaśirasām |

vitanvānaḥ śaivaṃ kimapi vapurindīvararuciḥ

kucābhyāmānamrastava puruṣakāro vijayate || 11 ||

prakāśānandābhyāmaviditacarīṃ madhyapadavīṃ

praviśyaitaddvandvaṃ raviśaśisamākhyaṃ kabalayan |

prapadyordhvaṃ nādaṃ layadahanabhasmīkṛtakulaḥ

prasādātte jantuḥ śivamakulamamba praviśati || 12 ||

manuṣyāstiryañco maruta iti lokatrayamidaṃ

bhavāmbhodhau magnaṃ triguṇalaharīkoṭiluṭhitam |

kaṭākṣaścedyatra kvacana tava mātaḥ karuṇayā

śarīrī sadyo'yaṃ vrajati paramānandatanutām || 13 ||

priyaṅguśyāmāṅgīmaruṇataravāsaṃ kisalayāṃ

samunmīlanmuktāphalavahalanepathyasubhagām |

stanadvandvasphārastabakanamitāṃ kalpalatikāṃ

sakṛddhyāyantastvāṃ dadhati śivacintāmaṇipadam || 14 ||

ṣaḍādhārāvartairaparimitamantrormipaṭalaiḥ

lasanmudrāphenairbahuvidhalasaddaivatajhaṣaiḥ |

kramasrotobhistvaṃ vahasi paranādāmṛtanadī

bhavāni pratyagrā śivacidamṛtābdhipraṇayinī || 15 ||

mahīpāthovahniśvasanaviyadātmenduravibhi-

-rvapurbhigrastāśairapi tava kiyānamba mahimā |

amūnyālokyante bhagavati na kutrāpyaṇutamā-

-mavasthāṃ prāptāni tvayi tu paramavyomavapuṣi || 16 ||

kalāmājñāṃ prajñāṃ samayamanubhūtiṃ samarasaṃ

guruṃ pāramparyaṃ vinayamupadeśaṃ śivapadam |

pramāṇaṃ nirvāṇaṃ prakṛtimabhibhūtiṃ paraguhāṃ

vidhiṃ vidyāmāhuḥ sakalajananīmeva munayaḥ || 17 ||

pralīne śabdaughe tadanu virate binduvibhave

tatastattve cāṣṭadhvanibhiranapāyinyadhigate |

śrite śākte parvaṇyanukalitacinmātra gahanāṃ

svasaṃvittiṃ yogī rasayati śivākhyāṃ bhagavatīm || 18 ||

parānandākārāṃ niravadhiśivaiśvaryavapuṣaṃ

nirākārāṃ jñānaprakṛtimaparicchinnakaruṇām |

savitrīṃ lokānāṃ niratiśayadhāmāspadapadāṃ

bhavo vā mokṣo vā bhavatu bhavatīmeva bhajatām || 19 ||

jagatkāye kṛtvā tadapi hṛdaye tacca puruṣe

pumāṃsaṃ bindusthaṃ tadapi viyadākhye ca gahane |

tadetadjñānākhye tadapi paramānandagahane

mahāvyomākāre tvadanubhavaśīlo vijayate || 20 ||

vidhe vedye vidye vividhasamaye vedagulike

vicitre viśvādye vinayasulabhe vedajanani |

śivajñe śūlasthe śivapadavadānye śivanidhe

śive mātarmahyaṃ tvayi vitara bhaktiṃ nirupamām || 21 ||

vidhermuṇḍaṃ hṛtvā yadakuruta pātraṃ karatale

hariṃ śūlaprotaṃ yadagamayadaṃsābharaṇatām |

alañcakre kaṇṭhaṃ yadapi garalenāmba giriśaḥ

śivasthāyāḥ śaktestadidamakhilaṃ te vilasitam || 22 ||

viriñcyākhyā mātaḥ sṛjasi harisañjñā tvamavasi

trilokīṃ rudrākhyā harasi vidadhāsīśvaradaśām |

bhavantī nādākhyā viharasi ca pāśaughadalanī

tvamevaikā'nekā bhavasi kṛtibhedairgirisute || 23 ||

munīnāṃ cetobhiḥ pramṛditakaṣāyairapi manā-

-gaśakyaṃ saṃspraṣṭuṃ cakitacakitairamba satatam |

śrutīnāṃ mūrdhānaḥ prakṛtikaṭhināḥ komalatare

kathaṃ te vindante padakisalaye pārvati padam || 24 ||

taṭidvallīṃ nityāmamṛtasaritaṃ pārarahitāṃ

malottīrṇāṃ jyotsnāṃ prakṛtimaguṇagranthigahanām |

girāṃ dūrāṃ vidyāmavinatakucāṃ viśvajananī-

-maparyantāṃ lakṣmīmabhidadhati santo bhagavatīm || 25 ||

śarīraṃ kṣityambhaḥ prabhṛtiracitaṃ kevalamacit

sukhaṃ duḥkhaṃ cāyaṃ kalayati pumāṃścetana iti |

sphuṭaṃ jānāno'pi prabhavati na dehī rahayituṃ

śarīrāhaṅkāraṃ tava samayabāhyo girisute || 26 ||

pitā mātā bhrātā suhṛdanucaraḥ sadma gṛhiṇī

vapuḥ kṣetraṃ mitraṃ dhanamapi yadā māṃ vijahati |

tadā me bhindānā sapadi bhayamohāndhatamasaṃ

mahājyotsne mātarbhava karuṇayā sannidhikarī || 27 ||

sutā dakṣasyādau kila sakalamātastvamudabhūḥ

sadoṣaṃ taṃ hitvā tadanu girirājasya duhitā |

anādyantā śambhorapṛthagapi śaktirbhagavatī

vivāhājjāyāsītyahaha caritaṃ vetti tava kaḥ || 28 ||

kaṇāstvaddīptīnāṃ raviśaśikṛśānuprabhṛtayaḥ

paraṃ brahma kṣudraṃ tava niyatamānandakaṇikā |

śivādi kṣityantaṃ trivalayatanoḥ sarvamudare

tavāste bhaktasya sphurasi hṛdi citraṃ bhagavati || 29 ||

puraḥ paścādantarbahiraparimeyaṃ parimitaṃ

paraṃ sthūlaṃ sūkṣmaṃ sakalamakulaṃ guhyamaguham |

davīyo nedīyaḥ sadasaditi viśvaṃ bhagavatī

sadā paśyantyākhyāṃ vahasi bhuvanakṣobhajananīm || 30 ||

praviśya tvanmārgaṃ sahajadayayā deśikadṛśā

ṣaḍadhvadhvāntaughacchiduragaṇanātītakaruṇām |

parāmājñākārāṃ sapadi śivayantīṃ śivatanuṃ

svamātmānaṃ dhanyāściramupalabhante bhagavatīm || 31 ||

mayūkhāḥ pūṣṇīva jvalana iva taddīptikaṇikāḥ

payodhau kallolāḥ pratihatamahimnīva pṛṣataḥ |

udetyodetyāmba tvayi saha nijaiḥ sāttvikaguṇai-

-rbhajante tattvaughāḥ praśamamanukalpaṃ paravaśāḥ || 32 ||

vidhurviṣṇurbrahmā prakṛtiraṇurātmā dinakaraḥ

svabhāvo jainendraḥ sugatamunirākāśamalinaḥ |

śivaḥ śaktiśceti śrutiviṣayatāṃ tāmupagatāṃ

vikalpairebhistvāmabhidadhati santo bhagavatīm || 33 ||

śivastvaṃ śaktistvaṃ tvamasi samayā tvaṃ samayinī

tvamātmā tvaṃ dīkṣā tvamayamaṇimādirguṇagaṇaḥ |

avidyā tvaṃ vidyā tvamasi nikhilaṃ tvaṃ kimaparaṃ

pṛthaktattvaṃ tvatto bhagavati na vīkṣāmaha ime || 34 ||

tvayāsau jānīte racayati bhavatyaiva satataṃ

tvayaivecchatyamba tvamasi nikhilā yasya tanavaḥ |

jagatsāmyaṃ śambhorvahasi paramavyomavapuṣaḥ

tathāpyardhaṃ bhūtvā viharasi śivasyeti kimidam || 35 ||

asaṅkhyaiḥ prācīnairjanani jananaiḥ karmavilayā-

-tsakṛjjanmanyante guruvapuṣamāsādya giriśam |

avāpyājñāṃ śaivīṃ śivatanumapi tvāṃ viditavā-

-nnayeyaṃ tvatpūjāstutiviracanenaiva divasān || 36 ||

yatṣaṭpatraṃ kamalamuditaṃ tasya yā karṇikākhyā

yonistasyāḥ prathitamudare yattadoṅkārapīṭham |

tasyāpyantaḥ kucabharanatāṃ kuṇḍalīti prasiddhāṃ

śyāmākārāṃ sakalajananīṃ santataṃ bhāvayāmi || 37 ||

bhuvi payasi kṛśānau mārute khe śaśāṅke

savitari yajamāne'pyaṣṭadhā śaktirekā |

vahasi kucabharābhyāṃ yāvanamrāpi viśvaṃ

sakalajanani sā tvaṃ pāhi māmityavācyam || 38 ||

iti śrīkālidāsa viracita pañcastavyāṃ pañcamaḥ sakalajananīstavaḥ |