Narayaniyam Dashaka 82 - Banasurayuddham Tatha Nrigashapamoksham

ॐ

നാരായണീയം ദശക 82 - ബാണാസുരയുദ്ധം തഥാ നൃഗശാപമോക്ഷമ്

Vishnu Malayalam

പ്രദ്യുമ്നോ രൌക്മിണേയഃ സ ഖലു തവ കലാ ശമ്ബരേണാഹൃതസ്തം

ഹത്വാ രത്യാ സഹാപ്തോ നിജപുരമഹരദ്രുക്മികന്യാം ച ധന്യാമ് ।

തത്പുത്രോഽഥാനിരുദ്ധോ ഗുണനിധിരവഹദ്രോചനാം രുക്മിപൌത്രീം

തത്രോദ്വാഹേ ഗതസ്ത്വം ന്യവധി മുസലിനാ രുക്മ്യപി ദ്യൂതവൈരാത് ॥1॥

ബാണസ്യ സാ ബലിസുതസ്യ സഹസ്രബാഹോ-

ര്മാഹേശ്വരസ്യ മഹിതാ ദുഹിതാ കിലോഷാ ।

ത്വത്പൌത്രമേനമനിരുദ്ധമദൃഷ്ടപൂര്വം

സ്വപ്നേഽനുഭൂയ ഭഗവന് വിരഹാതുരാഽഭൂത് ॥2॥

യോഗിന്യതീവ കുശലാ ഖലു ചിത്രലേഖാ

തസ്യാഃ സഖീ വിലിഖതീ തരുണാനശേഷാന് ।

തത്രാനിരുദ്ധമുഷയാ വിദിതം നിശായാ-

മാനേഷ്ട യോഗബലതോ ഭവതോ നികേതാത് ॥3॥

കന്യാപുരേ ദയിതയാ സുഖമാരമന്തം

ചൈനം കഥഞ്ചന ബബന്ധുഷി ശര്വബന്ധൌ ।

ശ്രീനാരദോക്തതദുദന്തദുരന്തരോഷൈ-

സ്ത്വം തസ്യ ശോണിതപുരം യദുഭിര്ന്യരുന്ധാഃ ॥4॥

പുരീപാലശ്ശൈലപ്രിയദുഹിതൃനാഥോഽസ്യ ഭഗവാന്

സമം ഭൂതവ്രാതൈര്യദുബലമശങ്കം നിരുരുധേ ।

മഹാപ്രാണോ ബാണോ ഝടിതി യുയുധാനേനയുയുധേ

ഗുഹഃ പ്രദ്യുമ്നേന ത്വമപി പുരഹന്ത്രാ ജഘടിഷേ ॥5॥

നിരുദ്ധാശേഷാസ്ത്രേ മുമുഹുഷി തവാസ്ത്രേണ ഗിരിശേ

ദ്രുതാ ഭൂതാ ഭീതാഃ പ്രമഥകുലവീരാഃ പ്രമഥിതാഃ ।

പരാസ്കന്ദ്ത് സ്കന്ദഃ കുസുമശരബാണൈശ്ച സചിവഃ

സ കുമ്ഭാണ്ഡോ ഭാണ്ഡം നവമിവ ബലേനാശു ബിഭിദേ ॥6॥

ചാപാനാം പഞ്ചശത്യാ പ്രസഭമുപഗതേ ഛിന്നചാപേഽഥ ബാണേ

വ്യര്ഥേ യാതേ സമേതോ ജ്വരപതിരശനൈരജ്വരി ത്വജ്ജ്വരേണ ।

ജ്ഞാനീ സ്തുത്വാഽഥ ദത്വാ തവ ചരിതജുഷാം വിജ്വരം സ ജ്വരോഽഗാത്

പ്രായോഽന്തര്ജ്ഞാനവന്തോഽപി ച ബഹുതമസാ രൌദ്രചേഷ്ടാ ഹി രൌദ്രാഃ ॥7॥

ബാണം നാനായുധോഗ്രം പുനരഭിപതിതം ദര്പദോഷാദ്വിതന്വന്

നിര്ലൂനാശേഷദോഷം സപദി ബുബുധുഷാ ശങ്കരേണോപഗീതഃ ।

തദ്വാചാ ശിഷ്ടബാഹുദ്വിതയമുഭയതോ നിര്ഭയം തത്പ്രിയം തം

മുക്ത്വാ തദ്ദത്തമാനോ നിജപുരമഗമഃ സാനിരുദ്ധഃ സഹോഷഃ ॥8॥

മുഹുസ്താവച്ഛക്രം വരുണമജയോ നന്ദഹരണേ

യമം ബാലാനീതൌ ദവദഹനപാനേഽനിലസഖമ് ।

വിധിം വത്സസ്തേയേ ഗിരിശമിഹ ബാണസ്യ സമരേ

വിഭോ വിശ്വോത്കര്ഷീ തദയമവതാരോ ജയതി തേ ॥9॥

ദ്വിജരുഷാ കൃകലാസവപുര്ധരം നൃഗനൃപം ത്രിദിവാലയമാപയന് ।

നിജജനേ ദ്വിജഭക്തിമനുത്തമാമുപദിശന് പവനേശ്വര് പാഹി മാമ് ॥10॥

Roman (IAST) Transliteration

pradyumno raukmiṇeyaḥ sa khalu tava kalā śambareṇāhṛtastaṃ

hatvā ratyā sahāpto nijapuramaharadrukmikanyāṃ ca dhanyām |

tatputro'thāniruddho guṇanidhiravahadrocanāṃ rukmipautrīṃ

tatrodvāhe gatastvaṃ nyavadhi musalinā rukmyapi dyūtavairāt ||1||

bāṇasya sā balisutasya sahasrabāho-

rmāheśvarasya mahitā duhitā kiloṣā |

tvatpautramenamaniruddhamadṛṣṭapūrvaṃ

svapne'nubhūya bhagavan virahāturā'bhūt ||2||

yoginyatīva kuśalā khalu citralekhā

tasyāḥ sakhī vilikhatī taruṇānaśeṣān |

tatrāniruddhamuṣayā viditaṃ niśāyā-

māneṣṭa yogabalato bhavato niketāt ||3||

kanyāpure dayitayā sukhamāramantaṃ

cainaṃ kathañcana babandhuṣi śarvabandhau |

śrīnāradoktatadudantadurantaroṣai-

stvaṃ tasya śoṇitapuraṃ yadubhirnyarundhāḥ ||4||

purīpālaśśailapriyaduhitṛnātho'sya bhagavān

samaṃ bhūtavrātairyadubalamaśaṅkaṃ nirurudhe |

mahāprāṇo bāṇo jhaṭiti yuyudhānenayuyudhe

guhaḥ pradyumnena tvamapi purahantrā jaghaṭiṣe ||5||

niruddhāśeṣāstre mumuhuṣi tavāstreṇa giriśe

drutā bhūtā bhītāḥ pramathakulavīrāḥ pramathitāḥ |

parāskandt skandaḥ kusumaśarabāṇaiśca sacivaḥ

sa kumbhāṇḍo bhāṇḍaṃ navamiva balenāśu bibhide ||6||

cāpānāṃ pañcaśatyā prasabhamupagate chinnacāpe'tha bāṇe

vyarthe yāte sameto jvarapatiraśanairajvari tvajjvareṇa |

jñānī stutvā'tha datvā tava caritajuṣāṃ vijvaraṃ sa jvaro'gāt

prāyo'ntarjñānavanto'pi ca bahutamasā raudraceṣṭā hi raudrāḥ ||7||

bāṇaṃ nānāyudhograṃ punarabhipatitaṃ darpadoṣādvitanvan

nirlūnāśeṣadoṣaṃ sapadi bubudhuṣā śaṅkareṇopagītaḥ |

tadvācā śiṣṭabāhudvitayamubhayato nirbhayaṃ tatpriyaṃ taṃ

muktvā taddattamāno nijapuramagamaḥ sāniruddhaḥ sahoṣaḥ ||8||

muhustāvacchakraṃ varuṇamajayo nandaharaṇe

yamaṃ bālānītau davadahanapāne'nilasakham |

vidhiṃ vatsasteye giriśamiha bāṇasya samare

vibho viśvotkarṣī tadayamavatāro jayati te ||9||

dvijaruṣā kṛkalāsavapurdharaṃ nṛganṛpaṃ tridivālayamāpayan |

nijajane dvijabhaktimanuttamāmupadiśan pavaneśvar pāhi mām ||10||