Narayaniyam Dashaka 25 - Narasimhavataram

ॐ

നാരായണീയം ദശക 25 - നരസിംഹാവതാരമ്

Vishnu Narayana Bhattathiri Malayalam

സ്തമ്ഭേ ഘട്ടയതോ ഹിരണ്യകശിപോഃ കര്ണൌ സമാചൂര്ണയ-

ന്നാഘൂര്ണജ്ജഗദണ്ഡകുണ്ഡകുഹരോ ഘോരസ്തവാഭൂദ്രവഃ ।

ശ്രുത്വാ യം കില ദൈത്യരാജഹൃദയേ പൂര്വം കദാപ്യശ്രുതം

കമ്പഃ കശ്ചന സമ്പപാത ചലിതോഽപ്യമ്ഭോജഭൂര്വിഷ്ടരാത് ॥1॥

ദൈത്യേ ദിക്ഷു വിസൃഷ്ടചക്ഷുഷി മഹാസംരമ്ഭിണി സ്തമ്ഭതഃ

സമ്ഭൂതം ന മൃഗാത്മകം ന മനുജാകാരം വപുസ്തേ വിഭോ ।

കിം കിം ഭീഷണമേതദദ്ഭുതമിതി വ്യുദ്ഭ്രാന്തചിത്തേഽസുരേ

വിസ്ഫൂര്ജ്ജദ്ധവലോഗ്രരോമവികസദ്വര്ഷ്മാ സമാജൃമ്ഭഥാഃ ॥2॥

തപ്തസ്വര്ണസവര്ണഘൂര്ണദതിരൂക്ഷാക്ഷം സടാകേസര-

പ്രോത്കമ്പപ്രനികുമ്ബിതാമ്ബരമഹോ ജീയാത്തവേദം വപുഃ ।

വ്യാത്തവ്യാപ്തമഹാദരീസഖമുഖം ഖഡ്ഗോഗ്രവല്ഗന്മഹാ-

ജിഹ്വാനിര്ഗമദൃശ്യമാനസുമഹാദംഷ്ട്രായുഗോഡ്ഡാമരമ് ॥3॥

ഉത്സര്പദ്വലിഭങ്ഗഭീഷണഹനു ഹ്രസ്വസ്ഥവീയസ്തര-

ഗ്രീവം പീവരദോശ്ശതോദ്ഗതനഖക്രൂരാംശുദൂരോല്ബണമ് ।

വ്യോമോല്ലങ്ഘി ഘനാഘനോപമഘനപ്രധ്വാനനിര്ധാവിത-

സ്പര്ധാലുപ്രകരം നമാമി ഭവതസ്തന്നാരസിംഹം വപുഃ ॥4॥

നൂനം വിഷ്ണുരയം നിഹന്മ്യമുമിതി ഭ്രാമ്യദ്ഗദാഭീഷണം

ദൈത്യേന്ദ്രം സമുപാദ്രവന്തമധൃഥാ ദോര്ഭ്യാം പൃഥുഭ്യാമമുമ് ।

വീരോ നിര്ഗലിതോഽഥ ഖഡ്ഗഫലകൌ ഗൃഹ്ണന്വിചിത്രശ്രമാന്

വ്യാവൃണ്വന് പുനരാപപാത ഭുവനഗ്രാസോദ്യതം ത്വാമഹോ ॥5॥

ഭ്രാമ്യന്തം ദിതിജാധമം പുനരപി പ്രോദ്ഗൃഹ്യ ദോര്ഭ്യാം ജവാത്

ദ്വാരേഽഥോരുയുഗേ നിപാത്യ നഖരാന് വ്യുത്ഖായ വക്ഷോഭുവി ।

നിര്ഭിന്ദന്നധിഗര്ഭനിര്ഭരഗലദ്രക്താമ്ബു ബദ്ധോത്സവം

പായം പായമുദൈരയോ ബഹു ജഗത്സംഹാരിസിംഹാരവാന് ॥6॥

ത്യക്ത്വാ തം ഹതമാശു രക്തലഹരീസിക്തോന്നമദ്വര്ഷ്മണി

പ്രത്യുത്പത്യ സമസ്തദൈത്യപടലീം ചാഖാദ്യമാനേ ത്വയി ।

ഭ്രാമ്യദ്ഭൂമി വികമ്പിതാമ്ബുധികുലം വ്യാലോലശൈലോത്കരം

പ്രോത്സര്പത്ഖചരം ചരാചരമഹോ ദുഃസ്ഥാമവസ്ഥാം ദധൌ ॥7॥

താവന്മാംസവപാകരാലവപുഷം ഘോരാന്ത്രമാലാധരം

ത്വാം മധ്യേസഭമിദ്ധകോപമുഷിതം ദുര്വാരഗുര്വാരവമ് ।

അഭ്യേതും ന ശശാക കോപി ഭുവനേ ദൂരേ സ്ഥിതാ ഭീരവഃ

സര്വേ ശര്വവിരിഞ്ചവാസവമുഖാഃ പ്രത്യേകമസ്തോഷത ॥8॥

ഭൂയോഽപ്യക്ഷതരോഷധാമ്നി ഭവതി ബ്രഹ്മാജ്ഞയാ ബാലകേ

പ്രഹ്ലാദേ പദയോര്നമത്യപഭയേ കാരുണ്യഭാരാകുലഃ ।

ശാന്തസ്ത്വം കരമസ്യ മൂര്ധ്നി സമധാഃ സ്തോത്രൈരഥോദ്ഗായത-

സ്തസ്യാകാമധിയോഽപി തേനിഥ വരം ലോകായ ചാനുഗ്രഹമ് ॥9॥

ഏവം നാടിതരൌദ്രചേഷ്ടിത വിഭോ ശ്രീതാപനീയാഭിധ-

ശ്രുത്യന്തസ്ഫ़ഉടഗീതസര്വമഹിമന്നത്യന്തശുദ്ധാകൃതേ ।

തത്താദൃങ്നിഖിലോത്തരം പുനരഹോ കസ്ത്വാം പരോ ലങ്ഘയേത്

പ്രഹ്ലാദപ്രിയ ഹേ മരുത്പുരപതേ സര്വാമയാത്പാഹി മാമ് ॥10॥

Roman (IAST) Transliteration

stambhe ghaṭṭayato hiraṇyakaśipoḥ karṇau samācūrṇaya-

nnāghūrṇajjagadaṇḍakuṇḍakuharo ghorastavābhūdravaḥ |

śrutvā yaṃ kila daityarājahṛdaye pūrvaṃ kadāpyaśrutaṃ

kampaḥ kaścana sampapāta calito'pyambhojabhūrviṣṭarāt ||1||

daitye dikṣu visṛṣṭacakṣuṣi mahāsaṃrambhiṇi stambhataḥ

sambhūtaṃ na mṛgātmakaṃ na manujākāraṃ vapuste vibho |

kiṃ kiṃ bhīṣaṇametadadbhutamiti vyudbhrāntacitte'sure

visphūrjjaddhavalograromavikasadvarṣmā samājṛmbhathāḥ ||2||

taptasvarṇasavarṇaghūrṇadatirūkṣākṣaṃ saṭākesara-

protkampapranikumbitāmbaramaho jīyāttavedaṃ vapuḥ |

vyāttavyāptamahādarīsakhamukhaṃ khaḍgogravalganmahā-

jihvānirgamadṛśyamānasumahādaṃṣṭrāyugoḍḍāmaram ||3||

utsarpadvalibhaṅgabhīṣaṇahanu hrasvasthavīyastara-

grīvaṃ pīvaradośśatodgatanakhakrūrāṃśudūrolbaṇam |

vyomollaṅghi ghanāghanopamaghanapradhvānanirdhāvita-

spardhāluprakaraṃ namāmi bhavatastannārasiṃhaṃ vapuḥ ||4||

nūnaṃ viṣṇurayaṃ nihanmyamumiti bhrāmyadgadābhīṣaṇaṃ

daityendraṃ samupādravantamadhṛthā dorbhyāṃ pṛthubhyāmamum |

vīro nirgalito'tha khaḍgaphalakau gṛhṇanvicitraśramān

vyāvṛṇvan punarāpapāta bhuvanagrāsodyataṃ tvāmaho ||5||

bhrāmyantaṃ ditijādhamaṃ punarapi prodgṛhya dorbhyāṃ javāt

dvāre'thoruyuge nipātya nakharān vyutkhāya vakṣobhuvi |

nirbhindannadhigarbhanirbharagaladraktāmbu baddhotsavaṃ

pāyaṃ pāyamudairayo bahu jagatsaṃhārisiṃhāravān ||6||

tyaktvā taṃ hatamāśu raktalaharīsiktonnamadvarṣmaṇi

pratyutpatya samastadaityapaṭalīṃ cākhādyamāne tvayi |

bhrāmyadbhūmi vikampitāmbudhikulaṃ vyālolaśailotkaraṃ

protsarpatkhacaraṃ carācaramaho duḥsthāmavasthāṃ dadhau ||7||

tāvanmāṃsavapākarālavapuṣaṃ ghorāntramālādharaṃ

tvāṃ madhyesabhamiddhakopamuṣitaṃ durvāragurvāravam |

abhyetuṃ na śaśāka kopi bhuvane dūre sthitā bhīravaḥ

sarve śarvaviriñcavāsavamukhāḥ pratyekamastoṣata ||8||

bhūyo'pyakṣataroṣadhāmni bhavati brahmājñayā bālake

prahlāde padayornamatyapabhaye kāruṇyabhārākulaḥ |

śāntastvaṃ karamasya mūrdhni samadhāḥ stotrairathodgāyata-

stasyākāmadhiyo'pi tenitha varaṃ lokāya cānugraham ||9||

evaṃ nāṭitaraudraceṣṭita vibho śrītāpanīyābhidha-

śrutyantaspha़uṭagītasarvamahimannatyantaśuddhākṛte |

tattādṛṅnikhilottaraṃ punaraho kastvāṃ paro laṅghayet

prahlādapriya he marutpurapate sarvāmayātpāhi mām ||10||