Narayaniyam Dashaka 2 - Bhagavatah Svarupamadhuryam Tatha Bhaktimahattvam

ॐ

നാരായണീയം ദശക 2 - ഭഗവതഃ സ്വരൂപമാധുര്യം തഥാ ഭക്തിമഹത്ത്വമ്

Vishnu Narayana Bhattathiri Malayalam

സൂര്യസ്പര്ധികിരീടമൂര്ധ്വതിലകപ്രോദ്ഭാസിഫാലാന്തരം

കാരുണ്യാകുലനേത്രമാര്ദ്രഹസിതോല്ലാസം സുനാസാപുടമ്।

ഗണ്ഡോദ്യന്മകരാഭകുണ്ഡലയുഗം കണ്ഠോജ്വലത്കൌസ്തുഭം

ത്വദ്രൂപം വനമാല്യഹാരപടലശ്രീവത്സദീപ്രം ഭജേ॥1॥

കേയൂരാങ്ഗദകങ്കണോത്തമമഹാരത്നാങ്ഗുലീയാങ്കിത-

ശ്രീമദ്ബാഹുചതുഷ്കസങ്ഗതഗദാശങ്ഖാരിപങ്കേരുഹാമ് ।

കാഞ്ചിത് കാഞ്ചനകാഞ്ചിലാഞ്ച്ഛിതലസത്പീതാമ്ബരാലമ്ബിനീ-

മാലമ്ബേ വിമലാമ്ബുജദ്യുതിപദാം മൂര്തിം തവാര്തിച്ഛിദമ് ॥2॥

യത്ത്ത്രൈലോക്യമഹീയസോഽപി മഹിതം സമ്മോഹനം മോഹനാത്

കാന്തം കാന്തിനിധാനതോഽപി മധുരം മാധുര്യധുര്യാദപി ।

സൌന്ദര്യോത്തരതോഽപി സുന്ദരതരം ത്വദ്രൂപമാശ്ചര്യതോഽ-

പ്യാശ്ചര്യം ഭുവനേ ന കസ്യ കുതുകം പുഷ്ണാതി വിഷ്ണോ വിഭോ ॥3॥

തത്താദൃങ്മധുരാത്മകം തവ വപുഃ സമ്പ്രാപ്യ സമ്പന്മയീ

സാ ദേവീ പരമോത്സുകാ ചിരതരം നാസ്തേ സ്വഭക്തേഷ്വപി ।

തേനാസ്യാ ബത കഷ്ടമച്യുത വിഭോ ത്വദ്രൂപമാനോജ്ഞക -

പ്രേമസ്ഥൈര്യമയാദചാപലബലാച്ചാപല്യവാര്തോദഭൂത് ॥4॥

ലക്ഷ്മീസ്താവകരാമണീയകഹൃതൈവേയം പരേഷ്വസ്ഥിരേ-

ത്യസ്മിന്നന്യദപി പ്രമാണമധുനാ വക്ഷ്യാമി ലക്ഷ്മീപതേ ।

യേ ത്വദ്ധ്യാനഗുണാനുകീര്തനരസാസക്താ ഹി ഭക്താ ജനാ-

സ്തേഷ്വേഷാ വസതി സ്ഥിരൈവ ദയിതപ്രസ്താവദത്താദരാ ॥5॥

ഏവമ്ഭൂതമനോജ്ഞതാനവസുധാനിഷ്യന്ദസന്ദോഹനം

ത്വദ്രൂപം പരചിദ്രസായനമയം ചേതോഹരം ശൃണ്വതാമ് ।

സദ്യഃ പ്രേരയതേ മതിം മദയതേ രോമാഞ്ചയത്യങ്ഗകം

വ്യാസിഞ്ചത്യപി ശീതവാഷ്പവിസരൈരാനന്ദമൂര്ഛോദ്ഭവൈഃ ॥6॥

ഏവമ്ഭൂതതയാ ഹി ഭക്ത്യഭിഹിതോ യോഗസ്സ യോഗദ്വയാത്

കര്മജ്ഞാനമയാത് ഭൃശോത്തമതരോ യോഗീശ്വരൈര്ഗീയതേ ।

സൌന്ദര്യൈകരസാത്മകേ ത്വയി ഖലു പ്രേമപ്രകര്ഷാത്മികാ

ഭക്തിര്നിശ്രമമേവ വിശ്വപുരുഷൈര്ലഭ്യാ രമാവല്ലഭ ॥7॥

നിഷ്കാമം നിയതസ്വധര്മചരണം യത് കര്മയോഗാഭിധം

തദ്ദൂരേത്യഫലം യദൌപനിഷദജ്ഞാനോപലഭ്യം പുനഃ ।

തത്ത്വവ്യക്തതയാ സുദുര്ഗമതരം ചിത്തസ്യ തസ്മാദ്വിഭോ

ത്വത്പ്രേമാത്മകഭക്തിരേവ സതതം സ്വാദീയസീ ശ്രേയസീ ॥8॥

അത്യായാസകരാണി കര്മപടലാന്യാചര്യ നിര്യന്മലാ

ബോധേ ഭക്തിപഥേഽഥവാഽപ്യുചിതതാമായാന്തി കിം താവതാ ।

ക്ലിഷ്ട്വാ തര്കപഥേ പരം തവ വപുര്ബ്രഹ്മാഖ്യമന്യേ പുന-

ശ്ചിത്താര്ദ്രത്വമൃതേ വിചിന്ത്യ ബഹുഭിസ്സിദ്ധ്യന്തി ജന്മാന്തരൈഃ ॥9॥

ത്വദ്ഭക്തിസ്തു കഥാരസാമൃതഝരീനിര്മജ്ജനേന സ്വയം

സിദ്ധ്യന്തീ വിമലപ്രബോധപദവീമക്ലേശതസ്തന്വതീ ।

സദ്യസ്സിദ്ധികരീ ജയത്യയി വിഭോ സൈവാസ്തു മേ ത്വത്പദ-

പ്രേമപ്രൌഢിരസാര്ദ്രതാ ദ്രുതതരം വാതാലയാധീശ്വര ॥10॥

Roman (IAST) Transliteration

sūryaspardhikirīṭamūrdhvatilakaprodbhāsiphālāntaraṃ

kāruṇyākulanetramārdrahasitollāsaṃ sunāsāpuṭam|

gaṇḍodyanmakarābhakuṇḍalayugaṃ kaṇṭhojvalatkaustubhaṃ

tvadrūpaṃ vanamālyahārapaṭalaśrīvatsadīpraṃ bhaje||1||

keyūrāṅgadakaṅkaṇottamamahāratnāṅgulīyāṅkita-

śrīmadbāhucatuṣkasaṅgatagadāśaṅkhāripaṅkeruhām |

kāñcit kāñcanakāñcilāñcchitalasatpītāmbarālambinī-

mālambe vimalāmbujadyutipadāṃ mūrtiṃ tavārticchidam ||2||

yatttrailokyamahīyaso'pi mahitaṃ sammohanaṃ mohanāt

kāntaṃ kāntinidhānato'pi madhuraṃ mādhuryadhuryādapi |

saundaryottarato'pi sundarataraṃ tvadrūpamāścaryato'-

pyāścaryaṃ bhuvane na kasya kutukaṃ puṣṇāti viṣṇo vibho ||3||

tattādṛṅmadhurātmakaṃ tava vapuḥ samprāpya sampanmayī

sā devī paramotsukā cirataraṃ nāste svabhakteṣvapi |

tenāsyā bata kaṣṭamacyuta vibho tvadrūpamānojñaka -

premasthairyamayādacāpalabalāccāpalyavārtodabhūt ||4||

lakṣmīstāvakarāmaṇīyakahṛtaiveyaṃ pareṣvasthire-

tyasminnanyadapi pramāṇamadhunā vakṣyāmi lakṣmīpate |

ye tvaddhyānaguṇānukīrtanarasāsaktā hi bhaktā janā-

steṣveṣā vasati sthiraiva dayitaprastāvadattādarā ||5||

evambhūtamanojñatānavasudhāniṣyandasandohanaṃ

tvadrūpaṃ paracidrasāyanamayaṃ cetoharaṃ śṛṇvatām |

sadyaḥ prerayate matiṃ madayate romāñcayatyaṅgakaṃ

vyāsiñcatyapi śītavāṣpavisarairānandamūrchodbhavaiḥ ||6||

evambhūtatayā hi bhaktyabhihito yogassa yogadvayāt

karmajñānamayāt bhṛśottamataro yogīśvarairgīyate |

saundaryaikarasātmake tvayi khalu premaprakarṣātmikā

bhaktirniśramameva viśvapuruṣairlabhyā ramāvallabha ||7||

niṣkāmaṃ niyatasvadharmacaraṇaṃ yat karmayogābhidhaṃ

taddūretyaphalaṃ yadaupaniṣadajñānopalabhyaṃ punaḥ |

tattvavyaktatayā sudurgamataraṃ cittasya tasmādvibho

tvatpremātmakabhaktireva satataṃ svādīyasī śreyasī ||8||

atyāyāsakarāṇi karmapaṭalānyācarya niryanmalā

bodhe bhaktipathe'thavā'pyucitatāmāyānti kiṃ tāvatā |

kliṣṭvā tarkapathe paraṃ tava vapurbrahmākhyamanye puna-

ścittārdratvamṛte vicintya bahubhissiddhyanti janmāntaraiḥ ||9||

tvadbhaktistu kathārasāmṛtajharīnirmajjanena svayaṃ

siddhyantī vimalaprabodhapadavīmakleśatastanvatī |

sadyassiddhikarī jayatyayi vibho saivāstu me tvatpada-

premaprauḍhirasārdratā drutataraṃ vātālayādhīśvara ||10||