Mukundamala Stotram — InfoLyter.in

ॐ

മുകുന്ദമാലാ സ്തോത്രമ്

Mukundamala Stotram

Stotram Kulasekhara Alvar Malayalam

ഘുഷ്യതേ യസ്യ നഗരേ രങ്ഗയാത്രാ ദിനേ ദിനേ ।

തമഹം ശിരസാ വന്ദേ രാജാനം കുലശേഖരമ് ॥

ശ്രീവല്ലഭേതി വരദേതി ദയാപരേതി

ഭക്തപ്രിയേതി ഭവലുണ്ഠനകോവിദേതി ।

നാഥേതി നാഗശയനേതി ജഗന്നിവാസേ-

-ത്യാലാപനം പ്രതിപദം കുരു മേ മുകുന്ദ ॥ 1 ॥

ജയതു ജയതു ദേവോ ദേവകീനന്ദനോഽയം

ജയതു ജയതു കൃഷ്ണോ വൃഷ്ണിവംശപ്രദീപഃ ।

ജയതു ജയതു മേഘശ്യാമലഃ കോമലാങ്ഗോ

ജയതു ജയതു പൃഥ്വീഭാരനാശോ മുകുന്ദഃ ॥ 2 ॥

മുകുന്ദ മൂര്ധ്നാ പ്രണിപത്യ യാചേ

ഭവന്തമേകാന്തമിയന്തമര്ഥമ് ।

അവിസ്മൃതിസ്ത്വച്ചരണാരവിന്ദേ

ഭവേ ഭവേ മേഽസ്തു ഭവത്പ്രസാദാത് ॥ 3 ॥

നാഹം വന്ദേ തവ ചരണയോര്ദ്വന്ദ്വമദ്വന്ദ്വഹേതോഃ

കുമ്ഭീപാകം ഗുരുമപി ഹരേ നാരകം നാപനേതുമ് ।

രമ്യാരാമാമൃദുതനുലതാ നന്ദനേ നാപി രന്തും

ഭാവേ ഭാവേ ഹൃദയഭവനേ ഭാവയേയം ഭവന്തമ് ॥ 4 ॥

നാസ്ഥാ ധര്മേ ന വസുനിചയേ നൈവ കാമോപഭോഗേ

യദ്യദ്ഭവ്യം ഭവതു ഭഗവന് പൂര്വകര്മാനുരൂപമ് ।

ഏതത്പ്രാര്ഥ്യം മമ ബഹുമതം ജന്മജന്മാന്തരേഽപി

ത്വത്പാദാമ്ഭോരുഹയുഗഗതാ നിശ്ചലാ ഭക്തിരസ്തു ॥ 5 ॥

ദിവി വാ ഭുവി വാ മമാസ്തു വാസോ

നരകേ വാ നരകാന്തക പ്രകാമമ് ।

അവധീരിത ശാരദാരവിന്ദൌ

ചരണൌ തേ മരണേഽപി ചിന്തയാമി ॥ 6 ॥

കൃഷ്ണ ത്വദീയ പദപങ്കജപഞ്ജരാന്ത-

-മദ്യൈവ മേ വിശതു മാനസരാജഹംസഃ ।

പ്രാണപ്രയാണസമയേ കഫവാതപിത്തൈഃ

കണ്ഠാവരോധനവിധൌ സ്മരണം കുതസ്തേ ॥ 7 ॥

ചിന്തയാമി ഹരിമേവ സന്തതം

മന്ദമന്ദ ഹസിതാനനാമ്ബുജം

നന്ദഗോപതനയം പരാത്പരം

നാരദാദിമുനിബൃന്ദവന്ദിതമ് ॥ 8 ॥

കരചരണസരോജേ കാന്തിമന്നേത്രമീനേ

ശ്രമമുഷി ഭുജവീചിവ്യാകുലേഽഗാധമാര്ഗേ ।

ഹരിസരസി വിഗാഹ്യാപീയ തേജോജലൌഘം

ഭവമരുപരിഖിന്നഃ ഖേദമദ്യ ത്യജാമി ॥ 9 ॥

സരസിജനയനേ സശങ്ഖചക്രേ

മുരഭിദി മാ വിരമ സ്വചിത്ത രന്തുമ് ।

സുഖതരമപരം ന ജാതു ജാനേ

ഹരിചരണസ്മരണാമൃതേന തുല്യമ് ॥ 10 ॥

മാ ഭീര്മന്ദമനോ വിചിന്ത്യ ബഹുധാ യാമീശ്ചിരം യാതനാഃ

നാമീ നഃ പ്രഭവന്തി പാപരിപവഃ സ്വാമീ നനു ശ്രീധരഃ ।

ആലസ്യം വ്യപനീയ ഭക്തിസുലഭം ധ്യായസ്വ നാരായണം

ലോകസ്യ വ്യസനാപനോദനകരോ ദാസസ്യ കിം ന ക്ഷമഃ ॥ 11 ॥

ഭവജലധിഗതാനാം ദ്വന്ദ്വവാതാഹതാനാം

സുതദുഹിതൃകലത്രത്രാണഭാരാര്ദിതാനാമ് ।

വിഷമവിഷയതോയേ മജ്ജതാമപ്ലവാനാം

ഭവതു ശരണമേകോ വിഷ്ണുപോതോ നരാണാമ് ॥ 12 ॥

ഭവജലധിമഗാധം ദുസ്തരം നിസ്തരേയം

കഥമഹമിതി ചേതോ മാ സ്മ ഗാഃ കാതരത്വമ് ।

സരസിജദൃശി ദേവേ താവകീ ഭക്തിരേകാ

നരകഭിദി നിഷണ്ണാ താരയിഷ്യത്യവശ്യമ് ॥ 13 ॥

തൃഷ്ണാതോയേ മദനപവനോദ്ധൂത മോഹോര്മിമാലേ

ദാരാവര്തേ തനയസഹജഗ്രാഹസങ്ഘാകുലേ ച ।

സംസാരാഖ്യേ മഹതി ജലധൌ മജ്ജതാം നസ്ത്രിധാമന്

പാദാമ്ഭോജേ വരദ ഭവതോ ഭക്തിനാവം പ്രയച്ഛ ॥ 14 ॥

മാദ്രാക്ഷം ക്ഷീണപുണ്യാന് ക്ഷണമപി ഭവതോ ഭക്തിഹീനാന്പദാബ്ജേ

മാശ്രൌഷം ശ്രാവ്യബന്ധം തവ ചരിതമപാസ്യാന്യദാഖ്യാനജാതമ് ।

മാസ്മാര്ഷം മാധവ ത്വാമപി ഭുവനപതേ ചേതസാപഹ്നുവാനാ-

-ന്മാഭൂവം ത്വത്സപര്യാവ്യതികരരഹിതോ ജന്മജന്മാന്തരേഽപി ॥ 15 ॥

ജിഹ്വേ കീര്തയ കേശവം മുരരിപും ചേതോ ഭജ ശ്രീധരം

പാണിദ്വന്ദ്വ സമര്ചയാച്യുതകഥാഃ ശ്രോത്രദ്വയ ത്വം ശൃണു ।

കൃഷ്ണം ലോകയ ലോചനദ്വയ ഹരേര്ഗച്ഛാങ്ഘ്രിയുഗ്മാലയം

ജിഘ്ര ഘ്രാണ മുകുന്ദപാദതുലസീം മൂര്ധന്നമാധോക്ഷജമ് ॥ 16 ॥

ഹേ ലോകാഃ ശൃണുത പ്രസൂതിമരണവ്യാധേശ്ചികിത്സാമിമാം

യോഗജ്ഞാഃ സമുദാഹരന്തി മുനയോ യാം യാജ്ഞവല്ക്യാദയഃ ।

അന്തര്ജ്യോതിരമേയമേകമമൃതം കൃഷ്ണാഖ്യമാപീയതാം

തത്പീതം പരമൌഷധം വിതനുതേ നിര്വാണമാത്യന്തികമ് ॥ 17 ।

ഹേ മര്ത്യാഃ പരമം ഹിതം ശൃണുത വോ വക്ഷ്യാമി സങ്ക്ഷേപതഃ

സംസാരാര്ണവമാപദൂര്മിബഹുലം സമ്യക്പ്രവിശ്യ സ്ഥിതാഃ ।

നാനാജ്ഞാനമപാസ്യ ചേതസി നമോ നാരായണായേത്യമും

മന്ത്രം സപ്രണവം പ്രണാമസഹിതം പ്രാവര്തയധ്വം മുഹുഃ ॥ 18 ॥

പൃഥ്വീരേണുരണുഃ പയാംസി കണികാഃ ഫല്ഗുഃ സ്ഫുലിങ്ഗോഽലഘു-

-സ്തേജോ നിഃശ്വസനം മരുത്തനുതരം രന്ധ്രം സുസൂക്ഷ്മം നഭഃ ।

ക്ഷുദ്രാ രുദ്രപിതാമഹപ്രഭൃതയഃ കീടാഃ സമസ്താഃ സുരാഃ

ദൃഷ്ടേ യത്ര സ താവകോ വിജയതേ ഭൂമാവധൂതാവധിഃ ॥ 19 ॥

ബദ്ധേനാഞ്ജലിനാ നതേന ശിരസാ ഗാത്രൈഃ സരോമോദ്ഗമൈഃ

കണ്ഠേന സ്വരഗദ്ഗദേന നയനേനോദ്ഗീര്ണബാഷ്പാമ്ബുനാ ।

നിത്യം ത്വച്ചരണാരവിന്ദയുഗല ധ്യാനാമൃതാസ്വാദിനാ-

-മസ്മാകം സരസീരുഹാക്ഷ സതതം സമ്പദ്യതാം ജീവിതമ് ॥ 20 ॥

ഹേ ഗോപാലക ഹേ കൃപാജലനിധേ ഹേ സിന്ധുകന്യാപതേ

ഹേ കംസാന്തക ഹേ ഗജേന്ദ്രകരുണാപാരീണ ഹേ മാധവ ।

ഹേ രാമാനുജ ഹേ ജഗത്ത്രയഗുരോ ഹേ പുണ്ഡരീകാക്ഷ മാം

ഹേ ഗോപീജനനാഥ പാലയ പരം ജാനാമി ന ത്വാം വിനാ ॥ 21 ॥

ഭക്താപായഭുജങ്ഗഗാരുഡമണിസ്ത്രൈലോക്യരക്ഷാമണിഃ

ഗോപീലോചനചാതകാമ്ബുദമണിഃ സൌന്ദര്യമുദ്രാമണിഃ ।

യഃ കാന്താമണി രുക്മിണീ ഘനകുചദ്വന്ദ്വൈകഭൂഷാമണിഃ

ശ്രേയോ ദേവശിഖാമണിര്ദിശതു നോ ഗോപാലചൂഡാമണിഃ ॥ 22 ॥

ശത്രുച്ഛേദൈകമന്ത്രം സകലമുപനിഷദ്വാക്യസമ്പൂജ്യമന്ത്രം

സംസാരോത്താരമന്ത്രം സമുപചിതതമഃ സങ്ഘനിര്യാണമന്ത്രമ് ।

സര്വൈശ്വര്യൈകമന്ത്രം വ്യസനഭുജഗസന്ദഷ്ടസന്ത്രാണമന്ത്രം

ജിഹ്വേ ശ്രീകൃഷ്ണമന്ത്രം ജപ ജപ സതതം ജന്മസാഫല്യമന്ത്രമ് ॥ 23 ॥

വ്യാമോഹ പ്രശമൌഷധം മുനിമനോവൃത്തി പ്രവൃത്ത്യൌഷധം

ദൈത്യേന്ദ്രാര്തികരൌഷധം ത്രിഭുവനീ സഞ്ജീവനൈകൌഷധമ് ।

ഭക്താത്യന്തഹിതൌഷധം ഭവഭയപ്രധ്വംസനൈകൌഷധം

ശ്രേയഃപ്രാപ്തികരൌഷധം പിബ മനഃ ശ്രീകൃഷ്ണദിവ്യൌഷധമ് ॥ 24 ॥

ആമ്നായാഭ്യസനാന്യരണ്യരുദിതം വേദവ്രതാന്യന്വഹം

മേദശ്ഛേദഫലാനി പൂര്തവിധയഃ സര്വേ ഹുതം ഭസ്മനി ।

തീര്ഥാനാമവഗാഹനാനി ച ഗജസ്നാനം വിനാ യത്പദ-

-ദ്വന്ദ്വാമ്ഭോരുഹസംസ്മൃതിര്വിജയതേ ദേവഃ സ നാരായണഃ ॥ 25 ॥

ശ്രീമന്നാമ പ്രോച്യ നാരായണാഖ്യം

കേ ന പ്രാപുര്വാഞ്ഛിതം പാപിനോഽപി ।

ഹാ നഃ പൂര്വം വാക്പ്രവൃത്താ ന തസ്മിന്

തേന പ്രാപ്തം ഗര്ഭവാസാദിദുഃഖമ് ॥ 26 ॥

മജ്ജന്മനഃ ഫലമിദം മധുകൈടഭാരേ

മത്പ്രാര്ഥനീയ മദനുഗ്രഹ ഏഷ ഏവ ।

ത്വദ്ഭൃത്യഭൃത്യ പരിചാരക ഭൃത്യഭൃത്യ

ഭൃത്യസ്യ ഭൃത്യ ഇതി മാം സ്മര ലോകനാഥ ॥ 27 ॥

നാഥേ നഃ പുരുഷോത്തമേ ത്രിജഗതാമേകാധിപേ ചേതസാ

സേവ്യേ സ്വസ്യ പദസ്യ ദാതരി സുരേ നാരായണേ തിഷ്ഠതി ।

യം കഞ്ചിത്പുരുഷാധമം കതിപയഗ്രാമേശമല്പാര്ഥദം

സേവായൈ മൃഗയാമഹേ നരമഹോ മൂകാ വരാകാ വയമ് ॥ 28 ॥

മദന പരിഹര സ്ഥിതിം മദീയേ

മനസി മുകുന്ദപദാരവിന്ദധാമ്നി ।

ഹരനയനകൃശാനുനാ കൃശോഽസി

സ്മരസി ന ചക്രപരാക്രമം മുരാരേഃ ॥ 29 ॥

തത്ത്വം ബ്രുവാണാനി പരം പരസ്മാ-

-ന്മധു ക്ഷരന്തീവ സതാം ഫലാനി ।

പ്രാവര്തയ പ്രാഞ്ജലിരസ്മി ജിഹ്വേ

നാമാനി നാരായണ ഗോചരാണി ॥ 30 ॥

ഇദം ശരീരം പരിണാമപേശലം

പതത്യവശ്യം ശ്ലഥസന്ധിജര്ജരമ് ।

കിമൌഷധൈഃ ക്ലിശ്യസി മൂഢ ദുര്മതേ

നിരാമയം കൃഷ്ണരസായനം പിബ ॥ 31 ॥

ദാരാ വാരാകരവരസുതാ തേ തനൂജോ വിരിഞ്ചിഃ

സ്തോതാ വേദസ്തവ സുരഗണോ ഭൃത്യവര്ഗഃ പ്രസാദഃ ।

മുക്തിര്മായാ ജഗദവികലം താവകീ ദേവകീ തേ

മാതാ മിത്രം ബലരിപുസുതസ്ത്വയ്യതോഽന്യന്ന ജാനേ ॥ 32 ॥

കൃഷ്ണോ രക്ഷതു നോ ജഗത്ത്രയഗുരുഃ കൃഷ്ണം നമസ്യാമ്യഹം

കൃഷ്ണേനാമരശത്രവോ വിനിഹതാഃ കൃഷ്ണായ തസ്മൈ നമഃ ।

കൃഷ്ണാദേവ സമുത്ഥിതം ജഗദിദം കൃഷ്ണസ്യ ദാസോഽസ്മ്യഹം

കൃഷ്ണേ തിഷ്ഠതി സര്വമേതദഖിലം ഹേ കൃഷ്ണ രക്ഷസ്വ മാമ് ॥ 33 ॥

തത്ത്വം പ്രസീദ ഭഗവന് കുരു മയ്യനാഥേ

വിഷ്ണോ കൃപാം പരമകാരുണികഃ കില ത്വമ് ।

സംസാരസാഗരനിമഗ്നമനന്തദീന-

-മുദ്ധര്തുമര്ഹസി ഹരേ പുരുഷോത്തമോഽസി ॥ 34 ॥

നമാമി നാരായണപാദപങ്കജം

കരോമി നാരായണപൂജനം സദാ ।

വദാമി നാരായണനാമ നിര്മലം

സ്മരാമി നാരായണതത്ത്വമവ്യയമ് ॥ 35 ॥

ശ്രീനാഥ നാരായണ വാസുദേവ

ശ്രീകൃഷ്ണ ഭക്തപ്രിയ ചക്രപാണേ ।

ശ്രീപദ്മനാഭാച്യുത കൈടഭാരേ

ശ്രീരാമ പദ്മാക്ഷ ഹരേ മുരാരേ ॥ 36 ॥

അനന്ത വൈകുണ്ഠ മുകുന്ദ കൃഷ്ണ

ഗോവിന്ദ ദാമോദര മാധവേതി ।

വക്തും സമര്ഥോഽപി ന വക്തി കശ്ചി-

-ദഹോ ജനാനാം വ്യസനാഭിമുഖ്യമ് ॥ 37 ॥

ധ്യായന്തി യേ വിഷ്ണുമനന്തമവ്യയം

ഹൃത്പദ്മമധ്യേ സതതം വ്യവസ്ഥിതമ് ।

സമാഹിതാനാം സതതാഭയപ്രദം

തേ യാന്തി സിദ്ധിം പരമാം ച വൈഷ്ണവീമ് ॥ 38 ॥

ക്ഷീരസാഗരതരങ്ഗശീകരാ-

-ഽഽസാരതാരകിതചാരുമൂര്തയേ ।

ഭോഗിഭോഗശയനീയശായിനേ

മാധവായ മധുവിദ്വിഷേ നമഃ ॥ 39 ॥

യസ്യ പ്രിയൌ ശ്രുതിധരൌ കവിലോകവീരൌ

മിത്രേ ദ്വിജന്മവരപദ്മശരാവഭൂതാമ് ।

തേനാമ്ബുജാക്ഷചരണാമ്ബുജഷട്പദേന

രാജ്ഞാ കൃതാ കൃതിരിയം കുലശേഖരേണ ॥ 40 ॥

ഇതി കുലശേഖര പ്രണീതം മുകുന്ദമാലാ ।

Roman (IAST) Transliteration

ghuṣyate yasya nagare raṅgayātrā dine dine |

tamahaṃ śirasā vande rājānaṃ kulaśekharam ||

śrīvallabheti varadeti dayāpareti

bhaktapriyeti bhavaluṇṭhanakovideti |

nātheti nāgaśayaneti jagannivāse-

-tyālāpanaṃ pratipadaṃ kuru me mukunda || 1 ||

jayatu jayatu devo devakīnandano'yaṃ

jayatu jayatu kṛṣṇo vṛṣṇivaṃśapradīpaḥ |

jayatu jayatu meghaśyāmalaḥ komalāṅgo

jayatu jayatu pṛthvībhāranāśo mukundaḥ || 2 ||

mukunda mūrdhnā praṇipatya yāce

bhavantamekāntamiyantamartham |

avismṛtistvaccaraṇāravinde

bhave bhave me'stu bhavatprasādāt || 3 ||

nāhaṃ vande tava caraṇayordvandvamadvandvahetoḥ

kumbhīpākaṃ gurumapi hare nārakaṃ nāpanetum |

ramyārāmāmṛdutanulatā nandane nāpi rantuṃ

bhāve bhāve hṛdayabhavane bhāvayeyaṃ bhavantam || 4 ||

nāsthā dharme na vasunicaye naiva kāmopabhoge

yadyadbhavyaṃ bhavatu bhagavan pūrvakarmānurūpam |

etatprārthyaṃ mama bahumataṃ janmajanmāntare'pi

tvatpādāmbhoruhayugagatā niścalā bhaktirastu || 5 ||

divi vā bhuvi vā mamāstu vāso

narake vā narakāntaka prakāmam |

avadhīrita śāradāravindau

caraṇau te maraṇe'pi cintayāmi || 6 ||

kṛṣṇa tvadīya padapaṅkajapañjarānta-

-madyaiva me viśatu mānasarājahaṃsaḥ |

prāṇaprayāṇasamaye kaphavātapittaiḥ

kaṇṭhāvarodhanavidhau smaraṇaṃ kutaste || 7 ||

cintayāmi harimeva santataṃ

mandamanda hasitānanāmbujaṃ

nandagopatanayaṃ parātparaṃ

nāradādimunibṛndavanditam || 8 ||

karacaraṇasaroje kāntimannetramīne

śramamuṣi bhujavīcivyākule'gādhamārge |

harisarasi vigāhyāpīya tejojalaughaṃ

bhavamaruparikhinnaḥ khedamadya tyajāmi || 9 ||

sarasijanayane saśaṅkhacakre

murabhidi mā virama svacitta rantum |

sukhataramaparaṃ na jātu jāne

haricaraṇasmaraṇāmṛtena tulyam || 10 ||

mā bhīrmandamano vicintya bahudhā yāmīściraṃ yātanāḥ

nāmī naḥ prabhavanti pāparipavaḥ svāmī nanu śrīdharaḥ |

ālasyaṃ vyapanīya bhaktisulabhaṃ dhyāyasva nārāyaṇaṃ

lokasya vyasanāpanodanakaro dāsasya kiṃ na kṣamaḥ || 11 ||

bhavajaladhigatānāṃ dvandvavātāhatānāṃ

sutaduhitṛkalatratrāṇabhārārditānām |

viṣamaviṣayatoye majjatāmaplavānāṃ

bhavatu śaraṇameko viṣṇupoto narāṇām || 12 ||

bhavajaladhimagādhaṃ dustaraṃ nistareyaṃ

kathamahamiti ceto mā sma gāḥ kātaratvam |

sarasijadṛśi deve tāvakī bhaktirekā

narakabhidi niṣaṇṇā tārayiṣyatyavaśyam || 13 ||

tṛṣṇātoye madanapavanoddhūta mohormimāle

dārāvarte tanayasahajagrāhasaṅghākule ca |

saṃsārākhye mahati jaladhau majjatāṃ nastridhāman

pādāmbhoje varada bhavato bhaktināvaṃ prayaccha || 14 ||

mādrākṣaṃ kṣīṇapuṇyān kṣaṇamapi bhavato bhaktihīnānpadābje

māśrauṣaṃ śrāvyabandhaṃ tava caritamapāsyānyadākhyānajātam |

māsmārṣaṃ mādhava tvāmapi bhuvanapate cetasāpahnuvānā-

-nmābhūvaṃ tvatsaparyāvyatikararahito janmajanmāntare'pi || 15 ||

jihve kīrtaya keśavaṃ muraripuṃ ceto bhaja śrīdharaṃ

pāṇidvandva samarcayācyutakathāḥ śrotradvaya tvaṃ śṛṇu |

kṛṣṇaṃ lokaya locanadvaya harergacchāṅghriyugmālayaṃ

jighra ghrāṇa mukundapādatulasīṃ mūrdhannamādhokṣajam || 16 ||

he lokāḥ śṛṇuta prasūtimaraṇavyādheścikitsāmimāṃ

yogajñāḥ samudāharanti munayo yāṃ yājñavalkyādayaḥ |

antarjyotirameyamekamamṛtaṃ kṛṣṇākhyamāpīyatāṃ

tatpītaṃ paramauṣadhaṃ vitanute nirvāṇamātyantikam || 17 |

he martyāḥ paramaṃ hitaṃ śṛṇuta vo vakṣyāmi saṅkṣepataḥ

saṃsārārṇavamāpadūrmibahulaṃ samyakpraviśya sthitāḥ |

nānājñānamapāsya cetasi namo nārāyaṇāyetyamuṃ

mantraṃ sapraṇavaṃ praṇāmasahitaṃ prāvartayadhvaṃ muhuḥ || 18 ||

pṛthvīreṇuraṇuḥ payāṃsi kaṇikāḥ phalguḥ sphuliṅgo'laghu-

-stejo niḥśvasanaṃ maruttanutaraṃ randhraṃ susūkṣmaṃ nabhaḥ |

kṣudrā rudrapitāmahaprabhṛtayaḥ kīṭāḥ samastāḥ surāḥ

dṛṣṭe yatra sa tāvako vijayate bhūmāvadhūtāvadhiḥ || 19 ||

baddhenāñjalinā natena śirasā gātraiḥ saromodgamaiḥ

kaṇṭhena svaragadgadena nayanenodgīrṇabāṣpāmbunā |

nityaṃ tvaccaraṇāravindayugala dhyānāmṛtāsvādinā-

-masmākaṃ sarasīruhākṣa satataṃ sampadyatāṃ jīvitam || 20 ||

he gopālaka he kṛpājalanidhe he sindhukanyāpate

he kaṃsāntaka he gajendrakaruṇāpārīṇa he mādhava |

he rāmānuja he jagattrayaguro he puṇḍarīkākṣa māṃ

he gopījananātha pālaya paraṃ jānāmi na tvāṃ vinā || 21 ||

bhaktāpāyabhujaṅgagāruḍamaṇistrailokyarakṣāmaṇiḥ

gopīlocanacātakāmbudamaṇiḥ saundaryamudrāmaṇiḥ |

yaḥ kāntāmaṇi rukmiṇī ghanakucadvandvaikabhūṣāmaṇiḥ

śreyo devaśikhāmaṇirdiśatu no gopālacūḍāmaṇiḥ || 22 ||

śatrucchedaikamantraṃ sakalamupaniṣadvākyasampūjyamantraṃ

saṃsārottāramantraṃ samupacitatamaḥ saṅghaniryāṇamantram |

sarvaiśvaryaikamantraṃ vyasanabhujagasandaṣṭasantrāṇamantraṃ

jihve śrīkṛṣṇamantraṃ japa japa satataṃ janmasāphalyamantram || 23 ||

vyāmoha praśamauṣadhaṃ munimanovṛtti pravṛttyauṣadhaṃ

daityendrārtikarauṣadhaṃ tribhuvanī sañjīvanaikauṣadham |

bhaktātyantahitauṣadhaṃ bhavabhayapradhvaṃsanaikauṣadhaṃ

śreyaḥprāptikarauṣadhaṃ piba manaḥ śrīkṛṣṇadivyauṣadham || 24 ||

āmnāyābhyasanānyaraṇyaruditaṃ vedavratānyanvahaṃ

medaśchedaphalāni pūrtavidhayaḥ sarve hutaṃ bhasmani |

tīrthānāmavagāhanāni ca gajasnānaṃ vinā yatpada-

-dvandvāmbhoruhasaṃsmṛtirvijayate devaḥ sa nārāyaṇaḥ || 25 ||

śrīmannāma procya nārāyaṇākhyaṃ

ke na prāpurvāñchitaṃ pāpino'pi |

hā naḥ pūrvaṃ vākpravṛttā na tasmin

tena prāptaṃ garbhavāsādiduḥkham || 26 ||

majjanmanaḥ phalamidaṃ madhukaiṭabhāre

matprārthanīya madanugraha eṣa eva |

tvadbhṛtyabhṛtya paricāraka bhṛtyabhṛtya

bhṛtyasya bhṛtya iti māṃ smara lokanātha || 27 ||

nāthe naḥ puruṣottame trijagatāmekādhipe cetasā

sevye svasya padasya dātari sure nārāyaṇe tiṣṭhati |

yaṃ kañcitpuruṣādhamaṃ katipayagrāmeśamalpārthadaṃ

sevāyai mṛgayāmahe naramaho mūkā varākā vayam || 28 ||

madana parihara sthitiṃ madīye

manasi mukundapadāravindadhāmni |

haranayanakṛśānunā kṛśo'si

smarasi na cakraparākramaṃ murāreḥ || 29 ||

tattvaṃ bruvāṇāni paraṃ parasmā-

-nmadhu kṣarantīva satāṃ phalāni |

prāvartaya prāñjalirasmi jihve

nāmāni nārāyaṇa gocarāṇi || 30 ||

idaṃ śarīraṃ pariṇāmapeśalaṃ

patatyavaśyaṃ ślathasandhijarjaram |

kimauṣadhaiḥ kliśyasi mūḍha durmate

nirāmayaṃ kṛṣṇarasāyanaṃ piba || 31 ||

dārā vārākaravarasutā te tanūjo viriñciḥ

stotā vedastava suragaṇo bhṛtyavargaḥ prasādaḥ |

muktirmāyā jagadavikalaṃ tāvakī devakī te

mātā mitraṃ balaripusutastvayyato'nyanna jāne || 32 ||

kṛṣṇo rakṣatu no jagattrayaguruḥ kṛṣṇaṃ namasyāmyahaṃ

kṛṣṇenāmaraśatravo vinihatāḥ kṛṣṇāya tasmai namaḥ |

kṛṣṇādeva samutthitaṃ jagadidaṃ kṛṣṇasya dāso'smyahaṃ

kṛṣṇe tiṣṭhati sarvametadakhilaṃ he kṛṣṇa rakṣasva mām || 33 ||

tattvaṃ prasīda bhagavan kuru mayyanāthe

viṣṇo kṛpāṃ paramakāruṇikaḥ kila tvam |

saṃsārasāgaranimagnamanantadīna-

-muddhartumarhasi hare puruṣottamo'si || 34 ||

namāmi nārāyaṇapādapaṅkajaṃ

karomi nārāyaṇapūjanaṃ sadā |

vadāmi nārāyaṇanāma nirmalaṃ

smarāmi nārāyaṇatattvamavyayam || 35 ||

śrīnātha nārāyaṇa vāsudeva

śrīkṛṣṇa bhaktapriya cakrapāṇe |

śrīpadmanābhācyuta kaiṭabhāre

śrīrāma padmākṣa hare murāre || 36 ||

ananta vaikuṇṭha mukunda kṛṣṇa

govinda dāmodara mādhaveti |

vaktuṃ samartho'pi na vakti kaści-

-daho janānāṃ vyasanābhimukhyam || 37 ||

dhyāyanti ye viṣṇumanantamavyayaṃ

hṛtpadmamadhye satataṃ vyavasthitam |

samāhitānāṃ satatābhayapradaṃ

te yānti siddhiṃ paramāṃ ca vaiṣṇavīm || 38 ||

kṣīrasāgarataraṅgaśīkarā-

-''sāratārakitacārumūrtaye |

bhogibhogaśayanīyaśāyine

mādhavāya madhuvidviṣe namaḥ || 39 ||

yasya priyau śrutidharau kavilokavīrau

mitre dvijanmavarapadmaśarāvabhūtām |

tenāmbujākṣacaraṇāmbujaṣaṭpadena

rājñā kṛtā kṛtiriyaṃ kulaśekhareṇa || 40 ||

iti kulaśekhara praṇītaṃ mukundamālā |