Muka Pancha Shati 2 - Padaravinda Shatakam

ॐ

മൂക പഞ്ച ശതി 2 - പാദാരവിന്ദ ശതകമ്

Shatakam Mooka Kavi Malayalam

മഹിമ്നഃ പന്ഥാനം മദനപരിപന്ഥിപ്രണയിനി

പ്രഭുര്നിര്ണേതും തേ ഭവതി യതമാനോഽപി കതമഃ ।

തഥാപി ശ്രീകാഞ്ചീവിഹൃതിരസികേ കോഽപി മനസോ

വിപാകസ്ത്വത്പാദസ്തുതിവിധിഷു ജല്പാകയതി മാമ് ॥1॥

ഗലഗ്രാഹീ പൌരന്ദരപുരവനീപല്ലവരുചാം

ധൃതപാഥമ്യാനാമരുണമഹസാമാദിമഗുരുഃ ।

സമിന്ധേ ബന്ധൂകസ്തബകസഹയുധ്വാ ദിശി ദിശി

പ്രസര്പന്കാമാക്ഷ്യാശ്ചരണകിരണാനാമരുണിമാ ॥2॥

മരാലീനാം യാനാഭ്യസനകലനാമൂലഗുരവേ

ദരിദ്രാണാം ത്രാണവ്യതികരസുരോദ്യാനതരവേ ।

തമസ്കാണ്ഡപ്രൌഢിപ്രകടനതിരസ്കാരപടവേ

ജനോഽയം കാമാക്ഷ്യാശ്ചരണനലിനായ സ്പൃഹയതേ ॥3॥

വഹന്തീ സൈന്ദൂരീം സരണിമവനമ്രാമരപുറീ-

പുരന്ധ്രീസീമന്തേ കവികമലബാലാര്കസുഷമാ ।

ത്രയീസീമന്തിന്യാഃ സ്തനതടനിചോലാരുണപടീ

വിഭാന്തീ കാമാക്ഷ്യാഃ പദനലിനകാന്തിര്വിജയതേ ॥4॥

പ്രണമ്രീഭൂതസ്യ പ്രണയകലഹത്രസ്തമനസഃ

സ്മരാരാതേശ്ചൂഡാവിയതി ഗൃഹമേധീ ഹിമകരഃ ।

യയോഃ സാന്ധ്യാം കാന്തിം വഹതി സുഷമാഭിശ്ചരണയോഃ

തയോര്മേ കാമാക്ഷ്യാ ഹൃദയമപതന്ദ്രം വിഹരതാമ് ॥5॥

യയോഃ പീഠായന്തേ വിബുധമുകുടീനാം പടലികാ

യയോഃ സൌധായന്തേ സ്വയമുദയഭാജോ ഭണിതയഃ ।

യയോഃ ദാസായന്തേ സരസിജഭവാദ്യാശ്ചരണയോഃ

തയോര്മേ കാമാക്ഷ്യാ ദിനമനു വരീവര്തു ഹൃദയമ് ॥6॥

നയന്തീ സങ്കോചം സരസിജരുചം ദിക്പരിസരേ

സൃജന്തീ ലൌഹിത്യം നഖകിരണചന്ദ്രാര്ധഖചിതാ ।

കവീന്ദ്രാണാം ഹൃത്കൈരവവികസനോദ്യോഗജനനീ

സ്ഫുരന്തീ കാമാക്ഷ്യാഃ ചരണരുചിസന്ധ്യാ വിജയതേ ॥7॥

വിരാവൈര്മാഞ്ജീരൈഃ കിമപി കഥയന്തീവ മധുരം

പുരസ്താദാനമ്രേ പുരവിജയിനി സ്മേരവദനേ ।

വയസ്യേവ പ്രൌഢാ ശിഥിലയതി യാ പ്രേമകലഹ-

പ്രരോഹം കാമാക്ഷ്യാഃ ചരണയുഗലീ സാ വിജയതേ ॥8॥

സുപര്വസ്ത്രീലോലാലകപരിചിതം ഷട്പദകുലൈഃ

സ്ഫുരല്ലാക്ഷാരാഗം തരുണതരണിജ്യോതിരരുണൈഃ ।

ഭൃതം കാന്ത്യമ്ഭോഭിഃ വിസൃമരമരന്ദൈഃ സരസിജൈഃ

വിധത്തേ കാമാക്ഷ്യാഃ ചരണയുഗലം ബന്ധുപദവീമ് ॥9॥

രജഃസംസര്ഗേഽപി സ്ഥിതമരജസാമേവ ഹൃദയേ

പരം രക്തത്വേന സ്ഥിതമപി വിരക്തൈകശരണമ് ।

അലഭ്യം മന്ദാനാം ദധദപി സദാ മന്ദഗതിതാം

വിധത്തേ കാമാക്ഷ്യാഃ ചരണയുഗമാശ്ചര്യലഹരീമ് ॥10॥

ജടാലാ മഞ്ജീരസ്ഫുരദരുണരത്നാംശുനികരൈഃ

നിഷിദന്തീ മധ്യേ നഖരുചിഝരീഗാങ്ഗപയസാമ് ।

ജഗത്ത്രാണം കര്തും ജനനി മമ കാമാക്ഷി നിയതം

തപശ്ചര്യാം ധത്തേ തവ ചരണപാഥോജയുഗലീ ॥11॥

തുലാകോടിദ്വന്ദ്വക്കണിതഭണിതാഭീതിവചസോഃ

വിനമ്രം കാമാക്ഷീ വിസൃമരമഹഃപാടലിതയോഃ ।

ക്ഷണം വിന്യാസേന ക്ഷപിതതമസോര്മേ ലലിതയോഃ

പുനീയാന്മൂര്ധാനം പുരഹരപുരന്ധ്രീ ചരണയോഃ ॥12॥

ഭവാനി ദ്രുഹ്യേതാം ഭവനിബിഡിതേഭ്യോ മമ മുഹു-

സ്തമോവ്യാമോഹേഭ്യസ്തവ ജനനി കാമാക്ഷി ചരണൌ ।

യയോര്ലാക്ഷാബിന്ദുസ്ഫുരണധരണാദ്ധ്വര്ജടിജടാ-

കുടീരാ ശോണാങ്കം വഹതി വപുരേണാങ്കകലികാ ॥13॥

പവിത്രീകുര്യുര്നുഃ പദതലഭുവഃ പാടലരുചഃ

പരാഗാസ്തേ പാപപ്രശമനധുരീണാഃ പരശിവേ ।

കണം ലബ്ധും യേഷാം നിജശിരസി കാമാക്ഷി വിവശാ

വലന്തോ വ്യാതന്വന്ത്യഹമഹമികാം മാധവമുഖാഃ ॥14॥

ബലാകാമാലാഭിര്നഖരുചിമയീഭിഃ പരിവൃതേ

വിനമ്രസ്വര്നാരീവികചകചകാലാമ്ബുദകുലേ ।

സ്ഫുരന്തഃ കാമാക്ഷി സ്ഫുടദലിതബന്ധൂകസുഹൃദ-

സ്തടില്ലേഖായന്തേ തവ ചരണപാഥോജകിരണാഃ ॥15॥

സരാഗഃ സദ്വേഷഃ പ്രസൃമരസരോജേ പ്രതിദിനം

നിസര്ഗാദാക്രാമന്വിബുധജനമൂര്ധാനമധികമ് ।

കഥങ്കാരം മാതഃ കഥയ പദപദ്മസ്തവ സതാം

നതാനാം കാമാക്ഷി പ്രകടയതി കൈവല്യസരണിമ് ॥16॥

ജപാലക്ഷ്മീശോണോ ജനിതപരമജ്ഞാനനലിനീ-

വികാസവ്യാസങ്ഗോ വിഫലിതജഗജ്ജാഡ്യഗരിമാ ।

മനഃപൂര്വാദ്രിം മേ തിലകയതു കാമാക്ഷി തരസാ

തമസ്കാണ്ഡദ്രോഹീ തവ ചരണപാഥോജരമണഃ ॥17॥

നമസ്കുര്മഃ പ്രേങ്ഖന്മണികടകനീലോത്പലമഹഃ-

പയോധൌ രിങ്ഖദ്ഭിര്നഖകിരണഫേനൈര്ധവലിതേ ।

സ്ഫുടം കുര്വാണായ പ്രബലചലദൌര്വാനലശിഖാ-

വിതര്കം കാമാക്ഷ്യാഃ സതതമരുണിമ്നേ ചരണയോഃ ॥18॥

ശിവേ പാശായേതാമലഘുനി തമഃകൂപകുഹരേ

ദിനാധീശായേതാം മമ ഹൃദയപാഥോജവിപിനേ ।

നഭോമാസായേതാം സരസകവിതാരീതിസരിതി

ത്വദീയൌ കാമാക്ഷി പ്രസൃതകിരണൌ ദേവി ചരണൌ ॥19॥

നിഷക്തം ശ്രുത്യന്തേ നയനമിവ സദ്വൃത്തരുചിരൈഃ

സമൈര്ജുഷ്ടം ശുദ്ധൈരധരമിവ രമ്യൈര്ദ്വിജഗണൈഃ ।

ശിവേ വക്ഷോജന്മദ്വിതയമിവ മുക്താശ്രിതമുമേ

ത്വദീയം കാമാക്ഷി പ്രണതശരണം നൌമി ചരണമ് ॥20॥

നമസ്യാസംസജ്ജന്നമുചിപരിപന്ഥിപ്രണയിനീ-

നിസര്ഗപ്രേങ്ഖോലത്കുരലകുലകാലാഹിശബലേ ।

നഖച്ഛായാദുഗ്ധോദധിപയസി തേ വൈദ്രുമരുചാം

പ്രചാരം കാമാക്ഷി പ്രചുരയതി പാദാബ്ജസുഷമാ ॥21॥

കദാ ദൂരീകര്തും കടുദുരിതകാകോലജനിതം

മഹാന്തം സന്താപം മദനപരിപന്ഥിപ്രിയതമേ ।

ക്ഷണാത്തേ കാമാക്ഷി ത്രിഭുവനപരീതാപഹരണേ

പടീയാംസം ലപ്സ്യേ പദകമലസേവാമൃതരസമ് ॥22॥

യയോഃ സാന്ധ്യം രോചിഃ സതതമരുണിമ്നേ സ്പൃഹയതേ

യയോശ്ചാന്ദ്രീ കാന്തിഃ പരിപതതി ദൃഷ്ട്വാ നഖരുചിമ് ।

യയോഃ പാകോദ്രേകം പിപഠിഷതി ഭക്ത്യാ കിസലയം

മ്രദിമ്നഃ കാമാക്ഷ്യാ മനസി ചരണൌ തൌ തനുമഹേ ॥23॥

ജഗന്നേദം നേദം പരമിതി പരിത്യജ്യ യതിഭിഃ

കുശാഗ്രീയസ്വാന്തൈഃ കുശലധിഷണൈഃ ശാസ്ത്രസരണൌ ।

ഗവേഷ്യം കാമാക്ഷി ധ്രുവമകൃതകാനാം ഗിരിസുതേ

ഗിരാമൈദമ്പര്യം തവ ചരണപദ്മം വിജയതേ ॥24॥

കൃതസ്നാനം ശാസ്ത്രാമൃതസരസി കാമാക്ഷി നിതരാം

ദധാനം വൈശദ്യം കലിതരസമാനന്ദസുധയാ ।

അലങ്കാരം ഭൂമേര്മുനിജനമനശ്ചിന്മയമഹാ-

പയോധേരന്തസ്സ്ഥം തവ ചരണരത്നം മൃഗയതേ ॥25॥

മനോഗേഹേ മോഹോദ്ഭവതിമിരപൂര്ണേ മമ മുഹുഃ

ദരിദ്രാണീകുര്വന്ദിനകരസഹസ്രാണി കിരണൈഃ ।

വിധത്താം കാമാക്ഷി പ്രസൃമരതമോവഞ്ചനചണഃ

ക്ഷണാര്ധം സാന്നിധ്യം ചരണമണിദീപോ ജനനി തേ ॥26॥

കവീനാം ചേതോവന്നഖരരുചിസമ്പര്കി വിബുധ-

സ്രവന്തീസ്രോതോവത്പടുമുഖരിതം ഹംസകരവൈഃ ।

ദിനാരമ്ഭശ്രീവന്നിയതമരുണച്ഛായസുഭഗം

മദന്തഃ കാമാക്ഷ്യാഃ സ്ഫുരതു പദപങ്കേരുഹയുഗമ് ॥27॥

സദാ കിം സമ്പര്കാത്പ്രകൃതികഠിനൈര്നാകിമുകുടൈഃ

തടൈര്നീഹാരാദ്രേരധികമണുനാ യോഗിമനസാ ।

വിഭിന്തേ സമ്മോഹം ശിശിരയതി ഭക്താനപി ദൃശാമ്

അദൃശ്യം കാമാക്ഷി പ്രകടയതി തേ പാദയുഗലമ് ॥28॥

പവിത്രാഭ്യാമമ്ബ പ്രകൃതിമൃദുലാഭ്യാം തവ ശിവേ

പദാഭ്യാം കാമാക്ഷി പ്രസഭമഭിഭൂതൈഃ സചകിതൈഃ ।

പ്രവാലൈരമ്ഭോജൈരപി ച വനവാസവ്രതദശാഃ

സദൈവാരഭ്യന്തേ പരിചരിതനാനാദ്വിജഗണൈഃ ॥29॥

ചിരാദ്ദൃശ്യാ ഹംസൈഃ കഥമപി സദാ ഹംസസുലഭം

നിരസ്യന്തീ ജാഡ്യം നിയതജഡമധ്യൈകശരണമ് ।

അദോഷവ്യാസങ്ഗാ സതതമപി ദോഷാപ്തിമലിനം

പയോജം കാമാക്ഷ്യാഃ പരിഹസതി പാദാബ്ജയുഗലീ ॥30॥

സുരാണാമാനന്ദപ്രബലനതയാ മണ്ഡനതയാ

നഖേന്ദുജ്യോത്സ്നാഭിര്വിസൃമരതമഃഖണ്ഡനതയാ ।

പയോജശ്രീദ്വേഷവ്രതരതതയാ ത്വച്ചരണയോഃ

വിലാസഃ കാമാക്ഷി പ്രകടയതി നൈശാകരദശാമ് ॥31॥

സിതിമ്നാ കാന്തീനാം നഖരജനുഷാം പാദനലിന-

ച്ഛവീനാം ശോണിമ്നാ തവ ജനനി കാമാക്ഷി നമനേ ।

ലഭന്തേ മന്ദാരഗ്രഥിതനവബന്ധൂകകുസുമ-

സ്രജാം സാമീചീന്യം സുരപുരപുരന്ധ്രീകചഭരാഃ ॥32॥

സ്ഫുരന്മധ്യേ ശുദ്ധേ നഖകിരണദുഗ്ധാബ്ധിപയസാം

വഹന്നബ്ജം ചക്രം ദരമപി ച ലേഖാത്മകതയാ ।

ശ്രിതോ മാത്സ്യം രൂപം ശ്രിയമപി ദധാനോ നിരുപമാം

ത്രിധാമാ കാമാക്ഷ്യാഃ പദനലിനനാമാ വിജയതേ ॥33॥

നഖശ്രീസന്നദ്ധസ്തബകനിചിതഃ സ്വൈശ്ച കിരണൈഃ

പിശങ്ഗൈഃ കാമാക്ഷി പ്രകടിതലസത്പല്ലവരുചിഃ ।

സതാം ഗമ്യഃ ശങ്കേ സകലഫലദാതാ സുരതരുഃ

ത്വദീയഃ പാദോഽയം തുഹിനഗിരിരാജന്യതനയേ ॥34॥

വഷട്കുര്വന്മാഞ്ജീരകലകലൈഃ കര്മലഹരീ-

ഹവീംഷി പ്രൌദ്ദണ്ഡം ജ്വലതി പരമജ്ഞാനദഹനേ ।

മഹീയാന്കാമാക്ഷി സ്ഫുടമഹസി ജോഹോതി സുധിയാം

മനോവേദ്യാം മാതസ്തവ ചരണയജ്വാ ഗിരിസുതേ ॥35॥

മഹാമന്ത്രം കിഞ്ചിന്മണികടകനാദൈര്മൃദു ജപന്

ക്ഷിപന്ദിക്ഷു സ്വച്ഛം നഖരുചിമയം ഭാസ്മനരജഃ ।

നതാനാം കാമാക്ഷി പ്രകൃതിപടുരച്ചാട്യ മമതാ-

പിശാചീം പാദോഽയം പ്രകടയതി തേ മാന്ത്രികദശാമ് ॥36॥

ഉദീതേ ബോധേന്ദൌ തമസി നിതരാം ജഗ്മുഷി ദശാം

ദരിദ്രാം കാമാക്ഷി പ്രകടമനുരാഗം വിദധതീ ।

സിതേനാച്ഛാദ്യാങ്ഗം നഖരുചിപടേനാങ്ഘ്രിയുഗലീ-

പുരന്ധ്രീ തേ മാതഃ സ്വയമഭിസരത്യേവ ഹൃദയമ് ॥37॥

ദിനാരമ്ഭഃ സമ്പന്നലിനവിപിനാനാമഭിനവോ

വികാസോ വാസന്തഃ സുകവിപികലോകസ്യ നിയതഃ ।

പ്രദോഷഃ കാമാക്ഷി പ്രകടപരമജ്ഞാനശശിന-

ശ്ചകാസ്തി ത്വത്പാദസ്മരണമഹിമാ ശൈലതനയേ ॥38॥

ധൃതച്ഛായം നിത്യം സരസിരുഹമൈത്രീപരിചിതം

നിധാനം ദീപ്തീനാം നിഖിലജഗതാം ബോധജനകമ് ।

മുമുക്ഷൂണാം മാര്ഗപ്രഥനപടു കാമാക്ഷി പദവീം

പദം തേ പാതങ്ഗീം പരികലയതേ പര്വതസുതേ ॥39॥

ശനൈസ്തീര്ത്വാ മോഹാമ്ബുധിമഥ സമാരോഢുമനസഃ

ക്രമാത്കൈവല്യാഖ്യാം സുകൃതിസുലഭാം സൌധവലഭീമ് ।

ലഭന്തേ നിഃശ്രേണീമിവ ഝടിതി കാമാക്ഷി ചരണം

പുരശ്ചര്യാഭിസ്തേ പുരമഥനസീമന്തിനി ജനാഃ ॥40॥

പ്രചണ്ഡാര്തിക്ഷോഭപ്രമഥനകൃതേ പ്രാതിഭസരി-

ത്പ്രവാഹപ്രോദ്ദണ്ഡീകരണജലദായ പ്രണമതാമ് ।

പ്രദീപായ പ്രൌഢേ ഭവതമസി കാമാക്ഷി ചരണ-

പ്രസാദൌന്മുഖ്യായ സ്പൃഹയതി ജനോഽയം ജനനി തേ ॥41॥

മരുദ്ഭിഃ സംസേവ്യാ സതതമപി ചാഞ്ചല്യരഹിതാ

സദാരുണ്യം യാന്തീ പരിണതിദരിദ്രാണസുഷമാ ।

ഗുണോത്കര്ഷാന്മാഞ്ജീരകകലകലൈസ്തര്ജനപടുഃ

പ്രവാലം കാമാക്ഷ്യാഃ പരിഹസതി പാദാബ്ജയുഗലീ ॥42॥

ജഗദ്രക്ഷാദക്ഷാ ജലജരുചിശിക്ഷാപടുതരാ

സമൈര്നമ്യാ രമ്യാ സതതമഭിഗമ്യാ ബുധജനൈഃ ।

ദ്വയീ ലീലാലോലാ ശ്രുതിഷു സുരപാലാദിമുകുടീ-

തടീസീമാധാമാ തവ ജനനി കാമാക്ഷി പദയോഃ ॥43॥

ഗിരാം ദൂരൌ ചോരൌ ജഡിമതിമിരാണാം കൃതജഗ-

ത്പരിത്രാണൌ ശോണൌ മുനിഹൃദയലീലൈകനിപുണൌ ।

നഖൈഃ സ്മേരൌ സാരൌ നിഗമവചസാം ഖണ്ഡിതഭവ-

ഗ്രഹോന്മാദൌ പാദൌ തവ ജനനി കാമാക്ഷി കലയേ ॥44॥

അവിശ്രാന്തം പങ്കം യദപി കലയന്യാവകമയം

നിരസ്യന്കാമാക്ഷി പ്രണമനജുഷാം പങ്കമഖിലമ് ।

തുലാകോടിദ്വന്ദം ദധദപി ച ഗച്ഛന്നതുലതാം

ഗിരാം മാര്ഗം പാദോ ഗിരിവരസുതേ ലങ്ഘയതി തേ ॥45॥

പ്രവാലം സവ്രീലം വിപിനവിവരേ വേപയതി യാ

സ്ഫുരല്ലീലം ബാലാതപമധികബാലം വദതി യാ ।

രുചിം സാന്ധ്യാം വന്ധ്യാം വിരചയതി യാ വര്ധയതു സാ

ശിവം മേ കാമാക്ഷ്യാഃ പദനലിനപാടല്യലഹരീ ॥46॥

കിരഞ്ജ്യോത്സ്നാരീതിം നഖമുഖരുചാ ഹംസമനസാം

വിതന്വാനഃ പ്രീതിം വികചതരുണാമ്ഭോരുഹരുചിഃ ।

പ്രകാശഃ ശ്രീപാദസ്തവ ജനനി കാമാക്ഷി തനുതേ

ശരത്കാലപ്രൌഢിം ശശിശകലചൂഡപ്രിയതമേ ॥47॥

നഖാങ്കൂരസ്മേരദ്യുതിവിമലഗങ്ഗാമ്ഭസി സുഖം

കൃതസ്നാനം ജ്ഞാനാമൃതമമലമാസ്വാദ്യ നിയതമ് ।

ഉദഞ്ചന്മഞ്ജീരസ്ഫുരണമണിദീപേ മമ മനോ

മനോജ്ഞേ കാമാക്ഷ്യാശ്ചരണമണിഹര്മ്യേ വിഹരതാമ് ॥48॥

ഭവാമ്ഭോധൌ നൌകാം ജഡിമവിപിനേ പാവകശിഖാ-

മമര്ത്യേന്ദ്രാദീനാമധിമുകുടമുത്തംസകലികാമ് ।

ജഗത്താപേ ജ്യോത്സ്നാമകൃതകവചഃപഞ്ജരപുടേ

ശുകസ്ത്രീം കാമാക്ഷ്യാ മനസി കലയേ പാദയുഗലീമ് ॥49॥

പരത്മപ്രാകാശ്യപ്രതിഫലനചുഞ്ചുഃ പ്രണമതാം

മനോജ്ഞസ്ത്വത്പാദോ മണിമുകുരമുദ്രാം കലയതേ ।

യദീയാം കാമാക്ഷി പ്രകൃതിമസൃണാഃ ശോധകദശാം

വിധാതും ചേഷ്ഠന്തേ ബലരിപുവധൂടീകചഭരാഃ ॥50॥

അവിശ്രാന്തം തിഷ്ഠന്നകൃതകവചഃകന്ദരപുടീ-

കുടീരാന്തഃ പ്രൌഢം നഖരുചിസടാലീം പ്രകടയന് ।

പ്രചണ്ഡം ഖണ്ഡത്വം നയതു മമ കാമാക്ഷി തരസാ

തമോവേതണ്ഡേന്ദ്രം തവ ചരണകണ്ഠീരവപതിഃ ॥51॥

പുരസ്താത്കാമാക്ഷി പ്രചുരരസമാഖണ്ഡലപുരീ-

പുരന്ധ്രീണാം ലാസ്യം തവ ലലിതമാലോക്യ ശനകൈഃ ।

നഖശ്രീഭിഃ സ്മേരാ ബഹു വിതനുതേ നൂപുരരവൈ-

ശ്ചമത്കൃത്യാ ശങ്കേ ചരണയുഗലീ ചാടുരചനാഃ ॥52॥

സരോജം നിന്ദന്തീ നഖകിരണകര്പൂരശിശിരാ

നിഷിക്താ മാരാരേര്മുകുടശശിരേഖാഹിമജലൈഃ ।

സ്ഫുരന്തീ കാമാക്ഷി സ്ഫുടരുചിമയേ പല്ലവചയേ

തവാധത്തേ മൈത്രീം പഥികസുദൃശാ പാദയുഗലീ ॥53॥

നതാനാം സമ്പത്തേരനവരതമാകര്ഷണജപഃ

പ്രരോഹത്സംസാരപ്രസരഗരിമസ്തമ്ഭനജപഃ ।

ത്വദീയഃ കാമാക്ഷി സ്മരഹരമനോമോഹനജപഃ

പടീയാന്നഃ പായാത്പദനലിനമഞ്ജീരനിനദഃ ॥54॥

വിതന്വീഥാ നാഥേ മമ ശിരസി കാമാക്ഷി കൃപയാ

പദാമ്ഭോജന്യാസം പശുപരിബൃഢപ്രാണദയിതേ ।

പിബന്തോ യന്മുദ്രാം പ്രകടമുപകമ്പാപരിസരം

ദൃശാ നാനന്ദ്യന്തേ നലിനഭവനാരായണമുഖാഃ ॥55॥

പ്രണാമോദ്യദ്ബൃന്ദാരമുകുടമന്ദാരകലികാ-

വിലോലല്ലോലമ്ബപ്രകരമയധൂമപ്രചുരിമാ ।

പ്രദീപ്തഃ പാദാബ്ജദ്യുതിവിതതിപാടല്യലഹരീ-

കൃശാനുഃ കാമാക്ഷ്യാ മമ ദഹതു സംസാരവിപിനമ് ॥56॥

വലക്ഷശ്രീരൃക്ഷാധിപശിശുസദൃക്ഷൈസ്തവ നഖൈഃ

ജിഘൃക്ഷുര്ദക്ഷത്വം സരസിരുഹഭിക്ഷുത്വകരണേ ।

ക്ഷണാന്മേ കാമാക്ഷി ക്ഷപിതഭവസങ്ക്ഷോഭഗരിമാ

വചോവൈചക്ഷന്യം ചരണയുഗലീ പക്ഷ്മലയതാത് ॥57॥

സമന്താത്കാമാക്ഷി ക്ഷതതിമിരസന്താനസുഭഗാന്

അനന്താഭിര്ഭാഭിര്ദിനമനു ദിഗന്താന്വിരചയന് ।

അഹന്തായാ ഹന്താ മമ ജഡിമദന്താവലഹരിഃ

വിഭിന്താം സന്താപം തവ ചരണചിന്താമണിരസൌ ॥58॥

ദധാനോ ഭാസ്വത്താമമൃതനിലയോ ലോഹിതവപുഃ

വിനമ്രാണാം സൌമ്യോ ഗുരുരപി കവിത്വം ച കലയന് ।

ഗതൌ മന്ദോ ഗങ്ഗാധരമഹിഷി കാമാക്ഷി ഭജതാം

തമഃകേതുര്മാതസ്തവ ചരണപദ്മോ വിജയതേ ॥59॥

നയന്തീം ദാസത്വം നലിനഭവമുഖ്യാനസുലഭ-

പ്രദാനാദ്ദീനാനാമമരതരുദൌര്ഭാഗ്യജനനീമ് ।

ജഗജ്ജന്മക്ഷേമക്ഷയവിധിഷു കാമാക്ഷി പദയോ-

ര്ധുരീണാമീഷ്ടേ കരസ്തവ ഭണിതുമാഹോപുരുഷികാമ് ॥60॥

ജനോഽയം സന്തപ്തോ ജനനി ഭവചണ്ഡാംശുകിരണൈഃ

അലബ്ധവൈകം ശീതം കണമപി പരജ്ഞാനപയസഃ ।

തമോമാര്ഗേ പാന്ഥസ്തവ ഝടിതി കാമാക്ഷി ശിശിരാം

പദാമ്ഭോജച്ഛായാം പരമശിവജായേ മൃഗയതേ ॥61॥

ജയത്യമ്ബ ശ്രീമന്നഖകിരണചീനാംശുകമയം

വിതാനം ബിഭ്രാണേ സുരമുകുടസങ്ഘട്ടമസൃണേ ।

നിജാരുണ്യക്ഷൌമാസ്തരണവതി കാമാക്ഷി സുലഭാ

ബുധൈഃ സംവിന്നാരീ തവ ചരണമാണിക്യഭവനേ ॥62॥

പ്രതീമഃ കാമാക്ഷി സ്ഫുരിതതരുണാദിത്യകിരണ-

ശ്രിയോ മൂലദ്രവ്യം തവ ചരണമദ്രീന്ദ്രതനയേ ।

സുരേന്ദ്രാശാമാപൂരയതി യദസൌ ധ്വാന്തമഖിലം

ധുനീതേ ദിഗ്ഭാഗാനപി ച മഹസാ പാടലയതേ ॥63॥

മഹാഭാഷ്യവ്യാഖ്യാപടുശയനമാരോപയതി വാ

സ്മരവ്യാപാരേര്ഷ്യാപിശുനനിടിലം കാരയതി വാ ।

ദ്വിരേഫാണാമധ്യാസയതി സതതം വാധിവസതിം

പ്രണമ്രാന്കാമാക്ഷ്യാഃ പദനലിനമാഹാത്മ്യഗരിമാ ॥64॥

വിവേകാമ്ഭസ്സ്രോതസ്സ്നപനപരിപാടീശിശിരിതേ

സമീഭൂതേ ശാസ്ത്രസ്മരണഹലസങ്കര്ഷണവശാത് ।

സതാം ചേതഃക്ഷേത്രേ വപതി തവ കാമാക്ഷി ചരണോ

മഹാസംവിത്സസ്യപ്രകരവരബീജം ഗിരിസുതേ ॥65॥

ദധാനോ മന്ദാരസ്തബകപരിപാടീം നഖരുചാ

വഹന്ദീപ്താം ശോണാങ്ഗുലിപടലചാമ്പേയകലികാമ് ।

അശോകോല്ലാസം നഃ പ്രചുരയതു കാമാക്ഷി ചരണോ

വികാസീ വാസന്തഃ സമയ ഇവ തേ ശര്വദയിതേ ॥66॥

നഖാംശുപ്രാചുര്യപ്രസൃമരമരാലാലിധവലഃ

സ്ഫുരന്മഞ്ജീരോദ്യന്മരകതമഹശ്ശൈവലയുതഃ ।

ഭവത്യാഃ കാമാക്ഷി സ്ഫുടചരണപാടല്യകപടോ

നദഃ ശോണാഭിഖ്യോ നഗപതിതനൂജേ വിജയതേ ॥67॥

ധുനാനം പങ്കൌഘം പരമസുലഭം കണ്ടകകുലൈഃ

വികാസവ്യാസങ്ഗം വിദധദപരാധീനമനിശമ് ।

നഖേന്ദുജ്യോത്സ്നാഭിര്വിശദരുചി കാമാക്ഷി നിതരാമ്

അസാമാന്യം മന്യേ സരസിജമിദം തേ പദയുഗമ് ॥68॥

കരീന്ദ്രായ ദ്രുഹ്യത്യലസഗതിലീലാസു വിമലൈഃ

പയോജൈര്മാത്സര്യം പ്രകടയതി കാമം കലയതേ ।

പദാമ്ഭോജദ്വന്ദ്വം തവ തദപി കാമാക്ഷി ഹൃദയം

മുനീനാം ശാന്താനാം കഥമനിശമസ്മൈ സ്പൃഹയതേ ॥69॥

നിരസ്താ ശോണിമ്നാ ചരണകിരണാനാം തവ ശിവേ

സമിന്ധാനാ സന്ധ്യാരുചിരചലരാജന്യതനയേ ।

അസാമര്ഥ്യാദേനം പരിഭവിതുമേതത്സമരുചാം

സരോജാനാം ജാനേ മുകുലയതി ശോഭാം പ്രതിദിനമ് ॥70॥

ഉപാദിക്ഷദ്ദാക്ഷ്യം തവ ചരണനാമാ ഗുരുരസൌ

മരാലാനാം ശങ്കേ മസൃണഗതിലാലിത്യസരണൌ ।

അതസ്തേ നിസ്തന്ദ്രം നിയതമമുനാ സഖ്യപദവീം

പ്രപന്നം പാഥോജം പ്രതി ദധതി കാമാക്ഷി കുതുകമ് ॥71॥

ദധാനൈഃ സംസര്ഗം പ്രകൃതിമലിനൈഃ ഷട്പദകുലൈഃ

ദ്വിജാധീശശ്ലാഘാവിധിഷു വിദധദ്ഭിര്മുകുലതാമ് ।

രജോമിശ്രൈഃ പദ്മൈര്നിയതമപി കാമാക്ഷി പദയോഃ

വിരോധസ്തേ യുക്തോ വിഷമശരവൈരിപ്രിയതമേ ॥72॥

കവിത്വശ്രീമിശ്രീകരണനിപുണൌ രക്ഷണചണൌ

വിപന്നാനാം ശ്രീമന്നലിനമസൃണൌ ശോണകിരണൌ ।

മുനീന്ദ്രാണാമന്തഃകരണശരണൌ മന്ദസരണൌ

മനോജ്ഞൌ കാമാക്ഷ്യാ ദുരിതഹരണൌ നൌമി ചരണൌ ॥73॥

പരസ്മാത്സര്വസ്മാദപി ച പരയോര്മുക്തികരയോഃ

നഖശ്രീഭിര്ജ്യോത്സ്നാകലിതതുലയോസ്താമ്രതലയോഃ ।

നിലീയേ കാമാക്ഷ്യാ നിഗമനുതയോര്നാകിനതയോഃ

നിരസ്തപ്രോന്മീലന്നലിനമദയോരേവ പദയോഃ ॥74॥

സ്വഭാവാദന്യോന്യം കിസലയമപീദം തവ പദം

മ്രദിമ്നാ ശോണിമ്നാ ഭഗവതി ദധാതേ സദൃശതാമ് ।

വനേ പൂര്വസ്യേച്ഛാ സതതമവനേ കിം തു ജഗതാം

പരസ്യേത്ഥം ഭേദഃ സ്ഫുരതി ഹൃദി കാമാക്ഷി സുധിയാമ് ॥75॥

കഥം വാചാലോഽപി പ്രകടമണിമഞ്ജീരനിനദൈഃ

സദൈവാനന്ദാര്ദ്രാന്വിരചയതി വാചംയമജനാന് ।

പ്രകൃത്യാ തേ ശോണച്ഛവിരപി ച കാമാക്ഷി ചരണോ

മനീഷാനൈര്മല്യം കഥമിവ നൃണാം മാംസലയതേ ॥76॥

ചലത്തൃഷ്ണാവീചീപരിചലനപര്യാകുലതയാ

മുഹുര്ഭ്രാന്തസ്താന്തഃ പരമശിവവാമാക്ഷി പരവാന് ।

തിതീര്ഷുഃ കാമാക്ഷി പ്രചുരതരകര്മാമ്ബുധിമമും

കദാഹം ലപ്സ്യേ തേ ചരണമണിസേതും ഗിരിസുതേ ॥77॥

വിശുഷ്യന്ത്യാം പ്രജ്ഞാസരിതി ദുരിതഗ്രീഷ്മസമയ-

പ്രഭാവേണ ക്ഷീണേ സതി മമ മനഃകേകിനി ശുചാ ।

ത്വദീയഃ കാമാക്ഷി സ്ഫുരിതചരണാമ്ഭോദമഹിമാ

നഭോമാസാടോപം നഗപതിസുതേ കിം ന കുരുതേ ॥78॥

വിനമ്രാണാം ചേതോഭവനവലഭീസീമ്നി ചരണ-

പ്രദീപേ പ്രാകാശ്യം ദധതി തവ നിര്ധൂതതമസി ।

അസീമാ കാമാക്ഷി സ്വയമലഘുദുഷ്കര്മലഹരീ

വിഘൂര്ണന്തീ ശാന്തിം ശലഭപരിപാടീവ ഭജതേ ॥79॥

വിരാജന്തീ ശുക്തിര്നഖകിരണമുക്താമണിതതേഃ

വിപത്പാഥോരാശൌ തരിരപി നരാണാം പ്രണമതാമ് ।

ത്വദീയഃ കാമാക്ഷി ധ്രുവമലഘുവഹ്നിര്ഭവവനേ

മുനീനാം ജ്ഞാനാഗ്നേരരണിരയമങ്ഘിര്വിജയതേ ॥80॥

സമസ്തൈഃ സംസേവ്യഃ സതതമപി കാമാക്ഷി വിബുധൈഃ

സ്തുതോ ഗന്ധര്വസ്ത്രീസുലലിതവിപഞ്ചീകലരവൈഃ ।

ഭവത്യാ ഭിന്ദാനോ ഭവഗിരികുലം ജൃമ്ഭിതതമോ-

ബലദ്രോഹീ മാതശ്ചരണപുരുഹൂതോ വിജയതേ ॥81॥

വസന്തം ഭക്താനാമപി മനസി നിത്യം പരിലസദ്-

ഘനച്ഛായാപൂര്ണം ശുചിമപി നൃണാം താപശമനമ് ।

നഖേന്ദുജ്യോത്സ്നാഭിഃ ശിശിരമപി പദ്മോദയകരം

നമാമഃ കാമാക്ഷ്യാശ്ചരണമധികാശ്ചര്യകരണമ് ॥82॥

കവീന്ദ്രാണാം നാനാഭണിതിഗുണചിത്രീകൃതവചഃ-

പ്രപഞ്ചവ്യാപാരപ്രകടനകലാകൌശലനിധിഃ ।

അധഃകുര്വന്നബ്ജം സനകഭൃഗുമുഖ്യൈര്മുനിജനൈഃ

നമസ്യഃ കാമാക്ഷ്യാശ്ചരണപരമേഷ്ഠീ വിജയതേ ॥83॥

ഭവത്യാഃ കാമാക്ഷി സ്ഫുരിതപദപങ്കേരുഹഭുവാം

പരാഗാണാം പൂരൈഃ പരിഹൃതകലങ്കവ്യതികരൈഃ ।

നതാനാമാമൃഷ്ടേ ഹൃദയമുകുരേ നിര്മലരുചി

പ്രസന്നേ നിശ്ശേഷം പ്രതിഫലതി വിശ്വം ഗിരിസുതേ ॥84॥

തവ ത്രസ്തം പാദാത്കിസലയമരണ്യാന്തരമഗാത്

പരം രേഖാരൂപം കമലമമുമേവാശ്രിതമഭൂത് ।

ജിതാനാം കാമാക്ഷി ദ്വിതയമപി യുക്തം പരിഭവേ

വിദേശേ വാസോ വാ ശരണഗമനം വാ നിജരിപോഃ ॥85॥

ഗൃഹീത്വാ യാഥാര്ഥ്യം നിഗമവചസാം ദേശികകൃപാ-

കടാക്ഷര്കജ്യോതിശ്ശമിതമമതാബന്ധതമസഃ ।

യതന്തേ കാമാക്ഷി പ്രതിദിവസമന്തര്ദ്രഢയിതും

ത്വദീയം പാദാബ്ജം സുകൃതപരിപാകേന സുജനാഃ ॥86॥

ജഡാനാമപ്യമ്ബ സ്മരണസമയേ തവച്ചരണയോഃ

ഭ്രമന്മന്ഥക്ഷ്മാഭൃദ്ധുമുഘുമിതസിന്ധുപ്രതിഭടാഃ ।

പ്രസന്നാഃ കാമാക്ഷി പ്രസഭമധരസ്പന്ദനകരാ

ഭവന്തി സ്വച്ഛന്ദം പ്രകൃതിപരിപക്കാ ഭണിതയഃ ॥87॥

വഹന്നപ്യശ്രാന്തം മധുരനിനദം ഹംസകമസൌ

തമേവാധഃ കര്തും കിമിവ യതതേ കേലിഗമനേ ।

ഭവസ്യൈവാനന്ദം വിദധദപി കാമാക്ഷി ചരണോ

ഭവത്യാസ്തദ്ദ്രോഹം ഭഗവതി കിമേവം വിതനുതേ ॥88॥

യദത്യന്തം താമ്യത്യലസഗതിവാര്താസ്വപി ശിവേ

തദേതത്കാമാക്ഷി പ്രകൃതിമൃദുലം തേ പദയുഗമ് ।

കിരീടൈഃ സങ്ഘട്ടം കഥമിവ സുരൌഘസ്യ സഹതേ

മുനീന്ദ്രാണാമാസ്തേ മനസി ച കഥം സൂചിനിശിതേ ॥89॥

മനോരങ്ഗേ മത്കേ വിബുധജനസമ്മോദജനനീ

സരാഗവ്യാസങ്ഗം സരസമൃദുസഞ്ചാരസുഭഗാ ।

മനോജ്ഞാ കാമാക്ഷി പ്രകടയതു ലാസ്യപ്രകരണം

രണന്മഞ്ജീരാ തേ ചരണയുഗലീനര്തകവധൂഃ ॥90॥

പരിഷ്കുര്വന്മാതഃ പശുപതികപര്ദം ചരണരാട്

പരാചാം ഹൃത്പദ്മം പരമഭണിതീനാം ച മകുടമ് ।

ഭവാഖ്യേ പാഥോധൌ പരിഹരതു കാമാക്ഷി മമതാ-

പരാധീനത്വം മേ പരിമുഷിതപാഥോജമഹിമാ ॥91॥

പ്രസൂനൈഃ സമ്പര്കാദമരതരുണീകുന്തലഭവൈഃ

അഭീഷ്ടാനാം ദാനാദനിശമപി കാമാക്ഷി നമതാമ് ।

സ്വസങ്ഗാത്കങ്കേലിപ്രസവജനകത്വേന ച ശിവേ

ത്രിധാ ധത്തേ വാര്താം സുരഭിരിതി പാദോ ഗിരിസുതേ ॥92॥

മഹാമോഹസ്തേനവ്യതികരഭയാത്പാലയതി യോ

വിനിക്ഷിപ്തം സ്വസ്മിന്നിജജനമനോരത്നമനിശമ് ।

സ രാഗസ്യോദ്രേകാത്സതതമപി കാമാക്ഷി തരസാ

കിമേവം പാദോഽസൌ കിസലയരുചിം ചോരയതി തേ ॥93॥

സദാ സ്വാദുങ്കാരം വിഷയലഹരീശാലികണികാം

സമാസ്വാദ്യ ശ്രാന്തം ഹൃദയശുകപോതം ജനനി മേ ।

കൃപാജാലേ ഫാലേക്ഷണമഹിഷി കാമാക്ഷി രഭസാത്

ഗൃഹീത്വാ രുന്ധീഥാരസ്തവ പദയുഗീപഞ്ജരപുടേ ॥94॥

ധുനാനം കാമാക്ഷി സ്മരണലവമാത്രേണ ജഡിമ-

ജ്വരപ്രൌഢിം ഗൂഢസ്ഥിതി നിഗമനൈകുഞ്ജകുഹരേ ।

അലഭ്യം സര്വേഷാം കതിചന ലഭന്തേ സുകൃതിനഃ

ചിരാദന്വിഷ്യന്തസ്തവ ചരണസിദ്ധൌഷധമിദമ് ॥95॥

രണന്മഞ്ജീരാഭ്യാം ലലിതഗമനാഭ്യാം സുകൃതിനാം

മനോവാസ്തവ്യാഭ്യാം മഥിതതിമിരാഭ്യാം നഖരുചാ ।

നിധേയാഭ്യാം പത്യാ നിജശിരസി കാമാക്ഷി സതതം

നമസ്തേ പാദാഭ്യാം നലിനമൃദുലാഭ്യാം ഗിരിസുതേ ॥96॥

സുരാഗേ രാകേന്ദുപ്രതിനിധിമുഖേ പര്വതസുതേ

ചിരാല്ലഭ്യേ ഭക്ത്യാ ശമധനജനാനാം പരിഷദാ ।

മനോഭൃങ്ഗോ മത്കഃ പദകമലയുഗ്മേ ജനനി തേ

പ്രകാമം കാമാക്ഷി ത്രിപുരഹരവാമാക്ഷി രമതാമ് ॥97॥

ശിവേ സംവിദ്രൂപേ ശശിശകലചൂഡപ്രിയതമേ

ശനൈര്ഗത്യാഗത്യാ ജിതസുരവരേഭേ ഗിരിസുതേ ।

യതന്തേ സന്തസ്തേ ചരണനലിനാലാനയുഗലേ

സദാ ബദ്ധം ചിത്തപ്രമദകരിയൂഥം ദൃഢതരമ് ॥98॥

യശഃ സൂതേ മാതര്മധുരകവിതാം പക്ഷ്മലയതേ

ശ്രിയം ദത്തേ ചിത്തേ കമപി പരിപാകം പ്രഥയതേ ।

സതാം പാശഗ്രന്ഥിം ശിഥിലയതി കിം കിം ന കുരുതേ

പ്രപന്നേ കാമാക്ഷ്യാഃ പ്രണതിപരിപാടീ ചരണയോഃ ॥99॥

മനീഷാം മാഹേന്ദ്രീം കകുഭമിവ തേ കാമപി ദശാം

പ്രധത്തേ കാമാക്ഷ്യാശ്ചരണതരുണാദിത്യകിരണഃ ।

യദീയേ സമ്പര്കേ ധൃതരസമരന്ദാ കവയതാം

പരീപാകം ധത്തേ പരിമലവതീ സൂക്തിനലിനീ ॥100॥

പുരാ മാരാരാതിഃ പുരമജയദമ്ബ സ്തവശതൈഃ

പ്രസന്നായാം സത്യാം ത്വയി തുഹിനശൈലേന്ദ്രതനയേ ।

അതസ്തേ കാമാക്ഷി സ്ഫുരതു തരസാ കാലസമയേ

സമായാതേ മാതര്മമ മനസി പാദാബ്ജയുഗലമ് ॥101॥

പദദ്വന്ദ്വം മന്ദം ഗതിഷു നിവസന്തം ഹൃദി സതാം

ഗിരാമന്തേ ഭ്രാന്തം കൃതകരഹിതാനാം പരിബൃഢേ ।

ജനാനാമാനന്ദം ജനനി ജനയന്തം പ്രണമതാം

ത്വദീയം കാമാക്ഷി പ്രതിദിനമഹം നൌമി വിമലമ് ॥102॥

ഇദം യഃ കാമാക്ഷ്യാശ്ചരണനലിനസ്തോത്രശതകം

ജപേന്നിത്യം ഭക്ത്യാ നിഖിലജഗദാഹ്ലാദജനകമ് ।

സ വിശ്വേഷാം വന്ദ്യഃ സകലകവിലോകൈകതിലകഃ

ചിരം ഭുക്ത്വാ ഭോഗാന്പരിണമതി ചിദ്രൂപകലയാ ॥103॥

॥ ഇതി പാദാരവിന്ദശതകം സമ്പൂര്ണമ് ॥

Roman (IAST) Transliteration

mahimnaḥ panthānaṃ madanaparipanthipraṇayini

prabhurnirṇetuṃ te bhavati yatamāno'pi katamaḥ |

tathāpi śrīkāñcīvihṛtirasike ko'pi manaso

vipākastvatpādastutividhiṣu jalpākayati mām ||1||

galagrāhī paurandarapuravanīpallavarucāṃ

dhṛtapāthamyānāmaruṇamahasāmādimaguruḥ |

samindhe bandhūkastabakasahayudhvā diśi diśi

prasarpankāmākṣyāścaraṇakiraṇānāmaruṇimā ||2||

marālīnāṃ yānābhyasanakalanāmūlagurave

daridrāṇāṃ trāṇavyatikarasurodyānatarave |

tamaskāṇḍaprauḍhiprakaṭanatiraskārapaṭave

jano'yaṃ kāmākṣyāścaraṇanalināya spṛhayate ||3||

vahantī saindūrīṃ saraṇimavanamrāmarapuṟī-

purandhrīsīmante kavikamalabālārkasuṣamā |

trayīsīmantinyāḥ stanataṭanicolāruṇapaṭī

vibhāntī kāmākṣyāḥ padanalinakāntirvijayate ||4||

praṇamrībhūtasya praṇayakalahatrastamanasaḥ

smarārāteścūḍāviyati gṛhamedhī himakaraḥ |

yayoḥ sāndhyāṃ kāntiṃ vahati suṣamābhiścaraṇayoḥ

tayorme kāmākṣyā hṛdayamapatandraṃ viharatām ||5||

yayoḥ pīṭhāyante vibudhamukuṭīnāṃ paṭalikā

yayoḥ saudhāyante svayamudayabhājo bhaṇitayaḥ |

yayoḥ dāsāyante sarasijabhavādyāścaraṇayoḥ

tayorme kāmākṣyā dinamanu varīvartu hṛdayam ||6||

nayantī saṅkocaṃ sarasijarucaṃ dikparisare

sṛjantī lauhityaṃ nakhakiraṇacandrārdhakhacitā |

kavīndrāṇāṃ hṛtkairavavikasanodyogajananī

sphurantī kāmākṣyāḥ caraṇarucisandhyā vijayate ||7||

virāvairmāñjīraiḥ kimapi kathayantīva madhuraṃ

purastādānamre puravijayini smeravadane |

vayasyeva prauḍhā śithilayati yā premakalaha-

prarohaṃ kāmākṣyāḥ caraṇayugalī sā vijayate ||8||

suparvastrīlolālakaparicitaṃ ṣaṭpadakulaiḥ

sphurallākṣārāgaṃ taruṇataraṇijyotiraruṇaiḥ |

bhṛtaṃ kāntyambhobhiḥ visṛmaramarandaiḥ sarasijaiḥ

vidhatte kāmākṣyāḥ caraṇayugalaṃ bandhupadavīm ||9||

rajaḥsaṃsarge'pi sthitamarajasāmeva hṛdaye

paraṃ raktatvena sthitamapi viraktaikaśaraṇam |

alabhyaṃ mandānāṃ dadhadapi sadā mandagatitāṃ

vidhatte kāmākṣyāḥ caraṇayugamāścaryalaharīm ||10||

jaṭālā mañjīrasphuradaruṇaratnāṃśunikaraiḥ

niṣidantī madhye nakharucijharīgāṅgapayasām |

jagattrāṇaṃ kartuṃ janani mama kāmākṣi niyataṃ

tapaścaryāṃ dhatte tava caraṇapāthojayugalī ||11||

tulākoṭidvandvakkaṇitabhaṇitābhītivacasoḥ

vinamraṃ kāmākṣī visṛmaramahaḥpāṭalitayoḥ |

kṣaṇaṃ vinyāsena kṣapitatamasorme lalitayoḥ

punīyānmūrdhānaṃ puraharapurandhrī caraṇayoḥ ||12||

bhavāni druhyetāṃ bhavanibiḍitebhyo mama muhu-

stamovyāmohebhyastava janani kāmākṣi caraṇau |

yayorlākṣābindusphuraṇadharaṇāddhvarjaṭijaṭā-

kuṭīrā śoṇāṅkaṃ vahati vapureṇāṅkakalikā ||13||

pavitrīkuryurnuḥ padatalabhuvaḥ pāṭalarucaḥ

parāgāste pāpapraśamanadhurīṇāḥ paraśive |

kaṇaṃ labdhuṃ yeṣāṃ nijaśirasi kāmākṣi vivaśā

valanto vyātanvantyahamahamikāṃ mādhavamukhāḥ ||14||

balākāmālābhirnakharucimayībhiḥ parivṛte

vinamrasvarnārīvikacakacakālāmbudakule |

sphurantaḥ kāmākṣi sphuṭadalitabandhūkasuhṛda-

staṭillekhāyante tava caraṇapāthojakiraṇāḥ ||15||

sarāgaḥ sadveṣaḥ prasṛmarasaroje pratidinaṃ

nisargādākrāmanvibudhajanamūrdhānamadhikam |

kathaṅkāraṃ mātaḥ kathaya padapadmastava satāṃ

natānāṃ kāmākṣi prakaṭayati kaivalyasaraṇim ||16||

japālakṣmīśoṇo janitaparamajñānanalinī-

vikāsavyāsaṅgo viphalitajagajjāḍyagarimā |

manaḥpūrvādriṃ me tilakayatu kāmākṣi tarasā

tamaskāṇḍadrohī tava caraṇapāthojaramaṇaḥ ||17||

namaskurmaḥ preṅkhanmaṇikaṭakanīlotpalamahaḥ-

payodhau riṅkhadbhirnakhakiraṇaphenairdhavalite |

sphuṭaṃ kurvāṇāya prabalacaladaurvānalaśikhā-

vitarkaṃ kāmākṣyāḥ satatamaruṇimne caraṇayoḥ ||18||

śive pāśāyetāmalaghuni tamaḥkūpakuhare

dinādhīśāyetāṃ mama hṛdayapāthojavipine |

nabhomāsāyetāṃ sarasakavitārītisariti

tvadīyau kāmākṣi prasṛtakiraṇau devi caraṇau ||19||

niṣaktaṃ śrutyante nayanamiva sadvṛttaruciraiḥ

samairjuṣṭaṃ śuddhairadharamiva ramyairdvijagaṇaiḥ |

śive vakṣojanmadvitayamiva muktāśritamume

tvadīyaṃ kāmākṣi praṇataśaraṇaṃ naumi caraṇam ||20||

namasyāsaṃsajjannamuciparipanthipraṇayinī-

nisargapreṅkholatkuralakulakālāhiśabale |

nakhacchāyādugdhodadhipayasi te vaidrumarucāṃ

pracāraṃ kāmākṣi pracurayati pādābjasuṣamā ||21||

kadā dūrīkartuṃ kaṭuduritakākolajanitaṃ

mahāntaṃ santāpaṃ madanaparipanthipriyatame |

kṣaṇātte kāmākṣi tribhuvanaparītāpaharaṇe

paṭīyāṃsaṃ lapsye padakamalasevāmṛtarasam ||22||

yayoḥ sāndhyaṃ rociḥ satatamaruṇimne spṛhayate

yayoścāndrī kāntiḥ paripatati dṛṣṭvā nakharucim |

yayoḥ pākodrekaṃ pipaṭhiṣati bhaktyā kisalayaṃ

mradimnaḥ kāmākṣyā manasi caraṇau tau tanumahe ||23||

jagannedaṃ nedaṃ paramiti parityajya yatibhiḥ

kuśāgrīyasvāntaiḥ kuśaladhiṣaṇaiḥ śāstrasaraṇau |

gaveṣyaṃ kāmākṣi dhruvamakṛtakānāṃ girisute

girāmaidamparyaṃ tava caraṇapadmaṃ vijayate ||24||

kṛtasnānaṃ śāstrāmṛtasarasi kāmākṣi nitarāṃ

dadhānaṃ vaiśadyaṃ kalitarasamānandasudhayā |

alaṅkāraṃ bhūmermunijanamanaścinmayamahā-

payodherantassthaṃ tava caraṇaratnaṃ mṛgayate ||25||

manogehe mohodbhavatimirapūrṇe mama muhuḥ

daridrāṇīkurvandinakarasahasrāṇi kiraṇaiḥ |

vidhattāṃ kāmākṣi prasṛmaratamovañcanacaṇaḥ

kṣaṇārdhaṃ sānnidhyaṃ caraṇamaṇidīpo janani te ||26||

kavīnāṃ cetovannakhararucisamparki vibudha-

sravantīsrotovatpaṭumukharitaṃ haṃsakaravaiḥ |

dinārambhaśrīvanniyatamaruṇacchāyasubhagaṃ

madantaḥ kāmākṣyāḥ sphuratu padapaṅkeruhayugam ||27||

sadā kiṃ samparkātprakṛtikaṭhinairnākimukuṭaiḥ

taṭairnīhārādreradhikamaṇunā yogimanasā |

vibhinte sammohaṃ śiśirayati bhaktānapi dṛśām

adṛśyaṃ kāmākṣi prakaṭayati te pādayugalam ||28||

pavitrābhyāmamba prakṛtimṛdulābhyāṃ tava śive

padābhyāṃ kāmākṣi prasabhamabhibhūtaiḥ sacakitaiḥ |

pravālairambhojairapi ca vanavāsavratadaśāḥ

sadaivārabhyante paricaritanānādvijagaṇaiḥ ||29||

cirāddṛśyā haṃsaiḥ kathamapi sadā haṃsasulabhaṃ

nirasyantī jāḍyaṃ niyatajaḍamadhyaikaśaraṇam |

adoṣavyāsaṅgā satatamapi doṣāptimalinaṃ

payojaṃ kāmākṣyāḥ parihasati pādābjayugalī ||30||

surāṇāmānandaprabalanatayā maṇḍanatayā

nakhendujyotsnābhirvisṛmaratamaḥkhaṇḍanatayā |

payojaśrīdveṣavrataratatayā tvaccaraṇayoḥ

vilāsaḥ kāmākṣi prakaṭayati naiśākaradaśām ||31||

sitimnā kāntīnāṃ nakharajanuṣāṃ pādanalina-

cchavīnāṃ śoṇimnā tava janani kāmākṣi namane |

labhante mandāragrathitanavabandhūkakusuma-

srajāṃ sāmīcīnyaṃ surapurapurandhrīkacabharāḥ ||32||

sphuranmadhye śuddhe nakhakiraṇadugdhābdhipayasāṃ

vahannabjaṃ cakraṃ daramapi ca lekhātmakatayā |

śrito mātsyaṃ rūpaṃ śriyamapi dadhāno nirupamāṃ

tridhāmā kāmākṣyāḥ padanalinanāmā vijayate ||33||

nakhaśrīsannaddhastabakanicitaḥ svaiśca kiraṇaiḥ

piśaṅgaiḥ kāmākṣi prakaṭitalasatpallavaruciḥ |

satāṃ gamyaḥ śaṅke sakalaphaladātā surataruḥ

tvadīyaḥ pādo'yaṃ tuhinagirirājanyatanaye ||34||

vaṣaṭkurvanmāñjīrakalakalaiḥ karmalaharī-

havīṃṣi prauddaṇḍaṃ jvalati paramajñānadahane |

mahīyānkāmākṣi sphuṭamahasi johoti sudhiyāṃ

manovedyāṃ mātastava caraṇayajvā girisute ||35||

mahāmantraṃ kiñcinmaṇikaṭakanādairmṛdu japan

kṣipandikṣu svacchaṃ nakharucimayaṃ bhāsmanarajaḥ |

natānāṃ kāmākṣi prakṛtipaṭuraccāṭya mamatā-

piśācīṃ pādo'yaṃ prakaṭayati te māntrikadaśām ||36||

udīte bodhendau tamasi nitarāṃ jagmuṣi daśāṃ

daridrāṃ kāmākṣi prakaṭamanurāgaṃ vidadhatī |

sitenācchādyāṅgaṃ nakharucipaṭenāṅghriyugalī-

purandhrī te mātaḥ svayamabhisaratyeva hṛdayam ||37||

dinārambhaḥ sampannalinavipinānāmabhinavo

vikāso vāsantaḥ sukavipikalokasya niyataḥ |

pradoṣaḥ kāmākṣi prakaṭaparamajñānaśaśina-

ścakāsti tvatpādasmaraṇamahimā śailatanaye ||38||

dhṛtacchāyaṃ nityaṃ sarasiruhamaitrīparicitaṃ

nidhānaṃ dīptīnāṃ nikhilajagatāṃ bodhajanakam |

mumukṣūṇāṃ mārgaprathanapaṭu kāmākṣi padavīṃ

padaṃ te pātaṅgīṃ parikalayate parvatasute ||39||

śanaistīrtvā mohāmbudhimatha samāroḍhumanasaḥ

kramātkaivalyākhyāṃ sukṛtisulabhāṃ saudhavalabhīm |

labhante niḥśreṇīmiva jhaṭiti kāmākṣi caraṇaṃ

puraścaryābhiste puramathanasīmantini janāḥ ||40||

pracaṇḍārtikṣobhapramathanakṛte prātibhasari-

tpravāhaproddaṇḍīkaraṇajaladāya praṇamatām |

pradīpāya prauḍhe bhavatamasi kāmākṣi caraṇa-

prasādaunmukhyāya spṛhayati jano'yaṃ janani te ||41||

marudbhiḥ saṃsevyā satatamapi cāñcalyarahitā

sadāruṇyaṃ yāntī pariṇatidaridrāṇasuṣamā |

guṇotkarṣānmāñjīrakakalakalaistarjanapaṭuḥ

pravālaṃ kāmākṣyāḥ parihasati pādābjayugalī ||42||

jagadrakṣādakṣā jalajaruciśikṣāpaṭutarā

samairnamyā ramyā satatamabhigamyā budhajanaiḥ |

dvayī līlālolā śrutiṣu surapālādimukuṭī-

taṭīsīmādhāmā tava janani kāmākṣi padayoḥ ||43||

girāṃ dūrau corau jaḍimatimirāṇāṃ kṛtajaga-

tparitrāṇau śoṇau munihṛdayalīlaikanipuṇau |

nakhaiḥ smerau sārau nigamavacasāṃ khaṇḍitabhava-

grahonmādau pādau tava janani kāmākṣi kalaye ||44||

aviśrāntaṃ paṅkaṃ yadapi kalayanyāvakamayaṃ

nirasyankāmākṣi praṇamanajuṣāṃ paṅkamakhilam |

tulākoṭidvandaṃ dadhadapi ca gacchannatulatāṃ

girāṃ mārgaṃ pādo girivarasute laṅghayati te ||45||

pravālaṃ savrīlaṃ vipinavivare vepayati yā

sphurallīlaṃ bālātapamadhikabālaṃ vadati yā |

ruciṃ sāndhyāṃ vandhyāṃ viracayati yā vardhayatu sā

śivaṃ me kāmākṣyāḥ padanalinapāṭalyalaharī ||46||

kirañjyotsnārītiṃ nakhamukharucā haṃsamanasāṃ

vitanvānaḥ prītiṃ vikacataruṇāmbhoruharuciḥ |

prakāśaḥ śrīpādastava janani kāmākṣi tanute

śaratkālaprauḍhiṃ śaśiśakalacūḍapriyatame ||47||

nakhāṅkūrasmeradyutivimalagaṅgāmbhasi sukhaṃ

kṛtasnānaṃ jñānāmṛtamamalamāsvādya niyatam |

udañcanmañjīrasphuraṇamaṇidīpe mama mano

manojñe kāmākṣyāścaraṇamaṇiharmye viharatām ||48||

bhavāmbhodhau naukāṃ jaḍimavipine pāvakaśikhā-

mamartyendrādīnāmadhimukuṭamuttaṃsakalikām |

jagattāpe jyotsnāmakṛtakavacaḥpañjarapuṭe

śukastrīṃ kāmākṣyā manasi kalaye pādayugalīm ||49||

paratmaprākāśyapratiphalanacuñcuḥ praṇamatāṃ

manojñastvatpādo maṇimukuramudrāṃ kalayate |

yadīyāṃ kāmākṣi prakṛtimasṛṇāḥ śodhakadaśāṃ

vidhātuṃ ceṣṭhante balaripuvadhūṭīkacabharāḥ ||50||

aviśrāntaṃ tiṣṭhannakṛtakavacaḥkandarapuṭī-

kuṭīrāntaḥ prauḍhaṃ nakharucisaṭālīṃ prakaṭayan |

pracaṇḍaṃ khaṇḍatvaṃ nayatu mama kāmākṣi tarasā

tamovetaṇḍendraṃ tava caraṇakaṇṭhīravapatiḥ ||51||

purastātkāmākṣi pracurarasamākhaṇḍalapurī-

purandhrīṇāṃ lāsyaṃ tava lalitamālokya śanakaiḥ |

nakhaśrībhiḥ smerā bahu vitanute nūpuraravai-

ścamatkṛtyā śaṅke caraṇayugalī cāṭuracanāḥ ||52||

sarojaṃ nindantī nakhakiraṇakarpūraśiśirā

niṣiktā mārārermukuṭaśaśirekhāhimajalaiḥ |

sphurantī kāmākṣi sphuṭarucimaye pallavacaye

tavādhatte maitrīṃ pathikasudṛśā pādayugalī ||53||

natānāṃ sampatteranavaratamākarṣaṇajapaḥ

prarohatsaṃsāraprasaragarimastambhanajapaḥ |

tvadīyaḥ kāmākṣi smaraharamanomohanajapaḥ

paṭīyānnaḥ pāyātpadanalinamañjīraninadaḥ ||54||

vitanvīthā nāthe mama śirasi kāmākṣi kṛpayā

padāmbhojanyāsaṃ paśuparibṛḍhaprāṇadayite |

pibanto yanmudrāṃ prakaṭamupakampāparisaraṃ

dṛśā nānandyante nalinabhavanārāyaṇamukhāḥ ||55||

praṇāmodyadbṛndāramukuṭamandārakalikā-

vilolallolambaprakaramayadhūmapracurimā |

pradīptaḥ pādābjadyutivitatipāṭalyalaharī-

kṛśānuḥ kāmākṣyā mama dahatu saṃsāravipinam ||56||

valakṣaśrīrṛkṣādhipaśiśusadṛkṣaistava nakhaiḥ

jighṛkṣurdakṣatvaṃ sarasiruhabhikṣutvakaraṇe |

kṣaṇānme kāmākṣi kṣapitabhavasaṅkṣobhagarimā

vacovaicakṣanyaṃ caraṇayugalī pakṣmalayatāt ||57||

samantātkāmākṣi kṣatatimirasantānasubhagān

anantābhirbhābhirdinamanu digantānviracayan |

ahantāyā hantā mama jaḍimadantāvalahariḥ

vibhintāṃ santāpaṃ tava caraṇacintāmaṇirasau ||58||

dadhāno bhāsvattāmamṛtanilayo lohitavapuḥ

vinamrāṇāṃ saumyo gururapi kavitvaṃ ca kalayan |

gatau mando gaṅgādharamahiṣi kāmākṣi bhajatāṃ

tamaḥketurmātastava caraṇapadmo vijayate ||59||

nayantīṃ dāsatvaṃ nalinabhavamukhyānasulabha-

pradānāddīnānāmamaratarudaurbhāgyajananīm |

jagajjanmakṣemakṣayavidhiṣu kāmākṣi padayo-

rdhurīṇāmīṣṭe karastava bhaṇitumāhopuruṣikām ||60||

jano'yaṃ santapto janani bhavacaṇḍāṃśukiraṇaiḥ

alabdhavaikaṃ śītaṃ kaṇamapi parajñānapayasaḥ |

tamomārge pānthastava jhaṭiti kāmākṣi śiśirāṃ

padāmbhojacchāyāṃ paramaśivajāye mṛgayate ||61||

jayatyamba śrīmannakhakiraṇacīnāṃśukamayaṃ

vitānaṃ bibhrāṇe suramukuṭasaṅghaṭṭamasṛṇe |

nijāruṇyakṣaumāstaraṇavati kāmākṣi sulabhā

budhaiḥ saṃvinnārī tava caraṇamāṇikyabhavane ||62||

pratīmaḥ kāmākṣi sphuritataruṇādityakiraṇa-

śriyo mūladravyaṃ tava caraṇamadrīndratanaye |

surendrāśāmāpūrayati yadasau dhvāntamakhilaṃ

dhunīte digbhāgānapi ca mahasā pāṭalayate ||63||

mahābhāṣyavyākhyāpaṭuśayanamāropayati vā

smaravyāpārerṣyāpiśunaniṭilaṃ kārayati vā |

dvirephāṇāmadhyāsayati satataṃ vādhivasatiṃ

praṇamrānkāmākṣyāḥ padanalinamāhātmyagarimā ||64||

vivekāmbhassrotassnapanaparipāṭīśiśirite

samībhūte śāstrasmaraṇahalasaṅkarṣaṇavaśāt |

satāṃ cetaḥkṣetre vapati tava kāmākṣi caraṇo

mahāsaṃvitsasyaprakaravarabījaṃ girisute ||65||

dadhāno mandārastabakaparipāṭīṃ nakharucā

vahandīptāṃ śoṇāṅgulipaṭalacāmpeyakalikām |

aśokollāsaṃ naḥ pracurayatu kāmākṣi caraṇo

vikāsī vāsantaḥ samaya iva te śarvadayite ||66||

nakhāṃśuprācuryaprasṛmaramarālālidhavalaḥ

sphuranmañjīrodyanmarakatamahaśśaivalayutaḥ |

bhavatyāḥ kāmākṣi sphuṭacaraṇapāṭalyakapaṭo

nadaḥ śoṇābhikhyo nagapatitanūje vijayate ||67||

dhunānaṃ paṅkaughaṃ paramasulabhaṃ kaṇṭakakulaiḥ

vikāsavyāsaṅgaṃ vidadhadaparādhīnamaniśam |

nakhendujyotsnābhirviśadaruci kāmākṣi nitarām

asāmānyaṃ manye sarasijamidaṃ te padayugam ||68||

karīndrāya druhyatyalasagatilīlāsu vimalaiḥ

payojairmātsaryaṃ prakaṭayati kāmaṃ kalayate |

padāmbhojadvandvaṃ tava tadapi kāmākṣi hṛdayaṃ

munīnāṃ śāntānāṃ kathamaniśamasmai spṛhayate ||69||

nirastā śoṇimnā caraṇakiraṇānāṃ tava śive

samindhānā sandhyāruciracalarājanyatanaye |

asāmarthyādenaṃ paribhavitumetatsamarucāṃ

sarojānāṃ jāne mukulayati śobhāṃ pratidinam ||70||

upādikṣaddākṣyaṃ tava caraṇanāmā gururasau

marālānāṃ śaṅke masṛṇagatilālityasaraṇau |

ataste nistandraṃ niyatamamunā sakhyapadavīṃ

prapannaṃ pāthojaṃ prati dadhati kāmākṣi kutukam ||71||

dadhānaiḥ saṃsargaṃ prakṛtimalinaiḥ ṣaṭpadakulaiḥ

dvijādhīśaślāghāvidhiṣu vidadhadbhirmukulatām |

rajomiśraiḥ padmairniyatamapi kāmākṣi padayoḥ

virodhaste yukto viṣamaśaravairipriyatame ||72||

kavitvaśrīmiśrīkaraṇanipuṇau rakṣaṇacaṇau

vipannānāṃ śrīmannalinamasṛṇau śoṇakiraṇau |

munīndrāṇāmantaḥkaraṇaśaraṇau mandasaraṇau

manojñau kāmākṣyā duritaharaṇau naumi caraṇau ||73||

parasmātsarvasmādapi ca parayormuktikarayoḥ

nakhaśrībhirjyotsnākalitatulayostāmratalayoḥ |

nilīye kāmākṣyā nigamanutayornākinatayoḥ

nirastapronmīlannalinamadayoreva padayoḥ ||74||

svabhāvādanyonyaṃ kisalayamapīdaṃ tava padaṃ

mradimnā śoṇimnā bhagavati dadhāte sadṛśatām |

vane pūrvasyecchā satatamavane kiṃ tu jagatāṃ

parasyetthaṃ bhedaḥ sphurati hṛdi kāmākṣi sudhiyām ||75||

kathaṃ vācālo'pi prakaṭamaṇimañjīraninadaiḥ

sadaivānandārdrānviracayati vācaṃyamajanān |

prakṛtyā te śoṇacchavirapi ca kāmākṣi caraṇo

manīṣānairmalyaṃ kathamiva nṛṇāṃ māṃsalayate ||76||

calattṛṣṇāvīcīparicalanaparyākulatayā

muhurbhrāntastāntaḥ paramaśivavāmākṣi paravān |

titīrṣuḥ kāmākṣi pracuratarakarmāmbudhimamuṃ

kadāhaṃ lapsye te caraṇamaṇisetuṃ girisute ||77||

viśuṣyantyāṃ prajñāsariti duritagrīṣmasamaya-

prabhāveṇa kṣīṇe sati mama manaḥkekini śucā |

tvadīyaḥ kāmākṣi sphuritacaraṇāmbhodamahimā

nabhomāsāṭopaṃ nagapatisute kiṃ na kurute ||78||

vinamrāṇāṃ cetobhavanavalabhīsīmni caraṇa-

pradīpe prākāśyaṃ dadhati tava nirdhūtatamasi |

asīmā kāmākṣi svayamalaghuduṣkarmalaharī

vighūrṇantī śāntiṃ śalabhaparipāṭīva bhajate ||79||

virājantī śuktirnakhakiraṇamuktāmaṇitateḥ

vipatpāthorāśau tarirapi narāṇāṃ praṇamatām |

tvadīyaḥ kāmākṣi dhruvamalaghuvahnirbhavavane

munīnāṃ jñānāgneraraṇirayamaṅghirvijayate ||80||

samastaiḥ saṃsevyaḥ satatamapi kāmākṣi vibudhaiḥ

stuto gandharvastrīsulalitavipañcīkalaravaiḥ |

bhavatyā bhindāno bhavagirikulaṃ jṛmbhitatamo-

baladrohī mātaścaraṇapuruhūto vijayate ||81||

vasantaṃ bhaktānāmapi manasi nityaṃ parilasad-

ghanacchāyāpūrṇaṃ śucimapi nṛṇāṃ tāpaśamanam |

nakhendujyotsnābhiḥ śiśiramapi padmodayakaraṃ

namāmaḥ kāmākṣyāścaraṇamadhikāścaryakaraṇam ||82||

kavīndrāṇāṃ nānābhaṇitiguṇacitrīkṛtavacaḥ-

prapañcavyāpāraprakaṭanakalākauśalanidhiḥ |

adhaḥkurvannabjaṃ sanakabhṛgumukhyairmunijanaiḥ

namasyaḥ kāmākṣyāścaraṇaparameṣṭhī vijayate ||83||

bhavatyāḥ kāmākṣi sphuritapadapaṅkeruhabhuvāṃ

parāgāṇāṃ pūraiḥ parihṛtakalaṅkavyatikaraiḥ |

natānāmāmṛṣṭe hṛdayamukure nirmalaruci

prasanne niśśeṣaṃ pratiphalati viśvaṃ girisute ||84||

tava trastaṃ pādātkisalayamaraṇyāntaramagāt

paraṃ rekhārūpaṃ kamalamamumevāśritamabhūt |

jitānāṃ kāmākṣi dvitayamapi yuktaṃ paribhave

videśe vāso vā śaraṇagamanaṃ vā nijaripoḥ ||85||

gṛhītvā yāthārthyaṃ nigamavacasāṃ deśikakṛpā-

kaṭākṣarkajyotiśśamitamamatābandhatamasaḥ |

yatante kāmākṣi pratidivasamantardraḍhayituṃ

tvadīyaṃ pādābjaṃ sukṛtaparipākena sujanāḥ ||86||

jaḍānāmapyamba smaraṇasamaye tavaccaraṇayoḥ

bhramanmanthakṣmābhṛddhumughumitasindhupratibhaṭāḥ |

prasannāḥ kāmākṣi prasabhamadharaspandanakarā

bhavanti svacchandaṃ prakṛtiparipakkā bhaṇitayaḥ ||87||

vahannapyaśrāntaṃ madhuraninadaṃ haṃsakamasau

tamevādhaḥ kartuṃ kimiva yatate keligamane |

bhavasyaivānandaṃ vidadhadapi kāmākṣi caraṇo

bhavatyāstaddrohaṃ bhagavati kimevaṃ vitanute ||88||

yadatyantaṃ tāmyatyalasagativārtāsvapi śive

tadetatkāmākṣi prakṛtimṛdulaṃ te padayugam |

kirīṭaiḥ saṅghaṭṭaṃ kathamiva suraughasya sahate

munīndrāṇāmāste manasi ca kathaṃ sūciniśite ||89||

manoraṅge matke vibudhajanasammodajananī

sarāgavyāsaṅgaṃ sarasamṛdusañcārasubhagā |

manojñā kāmākṣi prakaṭayatu lāsyaprakaraṇaṃ

raṇanmañjīrā te caraṇayugalīnartakavadhūḥ ||90||

pariṣkurvanmātaḥ paśupatikapardaṃ caraṇarāṭ

parācāṃ hṛtpadmaṃ paramabhaṇitīnāṃ ca makuṭam |

bhavākhye pāthodhau pariharatu kāmākṣi mamatā-

parādhīnatvaṃ me parimuṣitapāthojamahimā ||91||

prasūnaiḥ samparkādamarataruṇīkuntalabhavaiḥ

abhīṣṭānāṃ dānādaniśamapi kāmākṣi namatām |

svasaṅgātkaṅkeliprasavajanakatvena ca śive

tridhā dhatte vārtāṃ surabhiriti pādo girisute ||92||

mahāmohastenavyatikarabhayātpālayati yo

vinikṣiptaṃ svasminnijajanamanoratnamaniśam |

sa rāgasyodrekātsatatamapi kāmākṣi tarasā

kimevaṃ pādo'sau kisalayaruciṃ corayati te ||93||

sadā svāduṅkāraṃ viṣayalaharīśālikaṇikāṃ

samāsvādya śrāntaṃ hṛdayaśukapotaṃ janani me |

kṛpājāle phālekṣaṇamahiṣi kāmākṣi rabhasāt

gṛhītvā rundhīthārastava padayugīpañjarapuṭe ||94||

dhunānaṃ kāmākṣi smaraṇalavamātreṇa jaḍima-

jvaraprauḍhiṃ gūḍhasthiti nigamanaikuñjakuhare |

alabhyaṃ sarveṣāṃ katicana labhante sukṛtinaḥ

cirādanviṣyantastava caraṇasiddhauṣadhamidam ||95||

raṇanmañjīrābhyāṃ lalitagamanābhyāṃ sukṛtināṃ

manovāstavyābhyāṃ mathitatimirābhyāṃ nakharucā |

nidheyābhyāṃ patyā nijaśirasi kāmākṣi satataṃ

namaste pādābhyāṃ nalinamṛdulābhyāṃ girisute ||96||

surāge rākendupratinidhimukhe parvatasute

cirāllabhye bhaktyā śamadhanajanānāṃ pariṣadā |

manobhṛṅgo matkaḥ padakamalayugme janani te

prakāmaṃ kāmākṣi tripuraharavāmākṣi ramatām ||97||

śive saṃvidrūpe śaśiśakalacūḍapriyatame

śanairgatyāgatyā jitasuravarebhe girisute |

yatante santaste caraṇanalinālānayugale

sadā baddhaṃ cittapramadakariyūthaṃ dṛḍhataram ||98||

yaśaḥ sūte mātarmadhurakavitāṃ pakṣmalayate

śriyaṃ datte citte kamapi paripākaṃ prathayate |

satāṃ pāśagranthiṃ śithilayati kiṃ kiṃ na kurute

prapanne kāmākṣyāḥ praṇatiparipāṭī caraṇayoḥ ||99||

manīṣāṃ māhendrīṃ kakubhamiva te kāmapi daśāṃ

pradhatte kāmākṣyāścaraṇataruṇādityakiraṇaḥ |

yadīye samparke dhṛtarasamarandā kavayatāṃ

parīpākaṃ dhatte parimalavatī sūktinalinī ||100||

purā mārārātiḥ puramajayadamba stavaśataiḥ

prasannāyāṃ satyāṃ tvayi tuhinaśailendratanaye |

ataste kāmākṣi sphuratu tarasā kālasamaye

samāyāte mātarmama manasi pādābjayugalam ||101||

padadvandvaṃ mandaṃ gatiṣu nivasantaṃ hṛdi satāṃ

girāmante bhrāntaṃ kṛtakarahitānāṃ paribṛḍhe |

janānāmānandaṃ janani janayantaṃ praṇamatāṃ

tvadīyaṃ kāmākṣi pratidinamahaṃ naumi vimalam ||102||

idaṃ yaḥ kāmākṣyāścaraṇanalinastotraśatakaṃ

japennityaṃ bhaktyā nikhilajagadāhlādajanakam |

sa viśveṣāṃ vandyaḥ sakalakavilokaikatilakaḥ

ciraṃ bhuktvā bhogānpariṇamati cidrūpakalayā ||103||

|| iti pādāravindaśatakaṃ sampūrṇam ||