Mahendra Krita Mahalakshmi Stotram

ॐ

മഹേന്ദ്ര കൃത മഹാലക്ഷ്മീ സ്തോത്രം

Lakshmi Stotram Malayalam

മഹേന്ദ്ര ഉവാച

നമഃ കമലവാസിന്യൈ നാരായണ്യൈ നമോ നമഃ ।

കൃഷ്ണപ്രിയായൈ സാരായൈ പദ്മായൈ ച നമോ നമഃ ॥ 1 ॥

പദ്മപത്രേക്ഷണായൈ ച പദ്മാസ്യായൈ നമോ നമഃ ।

പദ്മാസനായൈ പദ്മിന്യൈ വൈഷ്ണവ്യൈ ച നമോ നമഃ ॥ 2 ॥

സര്വസമ്പത്സ്വരൂപായൈ സര്വദാത്ര്യൈ നമോ നമഃ ।

സുഖദായൈ മോക്ഷദായൈ സിദ്ധിദായൈ നമോ നമഃ ॥ 3 ॥

ഹരിഭക്തിപ്രദാത്ര്യൈ ച ഹര്ഷദാത്ര്യൈ നമോ നമഃ ।

കൃഷ്ണവക്ഷഃസ്ഥിതായൈ ച കൃഷ്ണേശായൈ നമോ നമഃ ॥ 4 ॥

കൃഷ്ണശോഭാസ്വരൂപായൈ രത്നാഢ്യായൈ നമോ നമഃ ।

സമ്പത്യധിഷ്ഠാതൃദേവ്യൈ മഹാദേവ്യൈ നമോ നമഃ ॥ 5 ॥

സസ്യാധിഷ്ഠാതൃദേവ്യൈ ച സസ്യലക്ഷ്മ്യൈ നമോ നമഃ ।

നമോ ബുദ്ധിസ്വരൂപായൈ ബുദ്ധിദായൈ നമോ നമഃ ॥ 6 ॥

വൈകുണ്ഠേ ച മഹാലക്ഷ്മീര്ലക്ഷ്മീഃ ക്ഷീരോദസാഗരേ ।

സ്വര്ഗലക്ഷ്മീരിന്ദ്രഗേഹേ രാജലക്ഷ്മീര്നൃപാലയേ ॥ 7 ॥

ഗൃഹലക്ഷ്മീശ്ച ഗൃഹിണാം ഗേഹേ ച ഗൃഹദേവതാ ।

സുരഭിഃ സാ ഗവാം മാതാ ദക്ഷിണാ യജ്ഞകാമിനീ ॥ 8 ॥

അദിതിര്ദേവമാതാ ത്വം കമലാ കമലാലയേ ।

സ്വാഹാ ത്വം ച ഹവിര്ദാനേ കവ്യദാനേ സ്വധാ സ്മൃതാ ॥ 9 ॥

ത്വം ഹി വിഷ്ണുസ്വരൂപാ ച സര്വാധാരാ വസുന്ധരാ ।

ശുദ്ധസത്ത്വസ്വരൂപാ ത്വം നാരായണപരായാണാ ॥ 10 ॥

ക്രോധഹിംസാവര്ജിതാ ച വരദാ ച ശുഭാനനാ ।

പരമാര്ഥപ്രദാ ത്വം ച ഹരിദാസ്യപ്രദാ പരാ ॥ 11 ॥

യയാ വിനാ ജഗത്സര്വം ഭസ്മീഭൂതമസാരകമ് ।

ജീവന്മൃതം ച വിശ്വം ച ശവതുല്യം യയാ വിനാ ॥ 12 ॥

സര്വേഷാം ച പരാ ത്വം ഹി സര്വബാന്ധവരൂപിണീ ।

യയാ വിനാ ന സമ്ഭാഷ്യോ ബാന്ധവൈര്ബാന്ധവഃ സദാ ॥ 13 ॥

ത്വയാ ഹീനോ ബന്ധുഹീനസ്ത്വയാ യുക്തഃ സബാന്ധവഃ ।

ധര്മാര്ഥകാമമോക്ഷാണാം ത്വം ച കാരണരൂപിണീ ॥ 14 ॥

സ്തനന്ധയാനാം ത്വം മാതാ ശിശൂനാം ശൈശവേ യഥാ ।

തഥാ ത്വം സര്വദാ മാതാ സര്വേഷാം സര്വവിശ്വതഃ ॥ 15 ॥

ത്യക്തസ്തനോ മാതൃഹീനഃ സ ചേജ്ജീവതി ദൈവതഃ ।

ത്വയാ ഹീനോ ജനഃ കോഽപി ന ജീവത്യേവ നിശ്ചിതമ് ॥ 16 ॥

സുപ്രസന്നസ്വരൂപാ ത്വം മേ പ്രസന്നാ ഭവാമ്ബികേ ।

വൈരിഗ്രസ്തം ച വിഷയം ദേഹി മഹ്യം സനാതനി ॥ 17 ॥

വയം യാവത്ത്വയാ ഹീനാ ബന്ധുഹീനാശ്ച ഭിക്ഷുകാഃ ।

സര്വസമ്പദ്വിഹീനാശ്ച താവദേവ ഹരിപ്രിയേ ॥ 18 ॥

രാജ്യം ദേഹി ശ്രിയം ദേഹി ബലം ദേഹി സുരേശ്വരി ।

കീര്തിം ദേഹി ധനം ദേഹി പുത്രാന്മഹ്യം ച ദേഹി വൈ ॥ 19 ॥

കാമം ദേഹി മതിം ദേഹി ഭോഗാന് ദേഹി ഹരിപ്രിയേ ।

ജ്ഞാനം ദേഹി ച ധര്മം ച സര്വസൌഭാഗ്യമീപ്സിതമ് ॥ 20 ॥

സര്വാധികാരമേവം വൈ പ്രഭാവാം ച പ്രതാപകമ് ।

ജയം പരാക്രമം യുദ്ധേ പരമൈശ്വര്യമൈവ ച ॥ 21 ॥

ഇത്യുക്ത്വാ തു മഹേന്ദ്രശ്ച സര്വൈഃ സുരഗണൈഃ സഹ ।

നനാമ സാശ്രുനേത്രോഽയം മൂര്ധ്നാ ചൈവ പുനഃ പുനഃ ॥ 22 ॥

ബ്രഹ്മാ ച ശങ്കരശ്ചൈവ ശേഷോ ധര്മശ്ച കേശവഃ ।

സര്വേ ചക്രുഃ പരീഹാരം സുരാര്ഥേ ച പുനഃ പുനഃ ॥ 23 ॥

ദേവേഭ്യശ്ച വരം ദത്ത്വാ പുഷ്പമാലാം മനോഹരാമ് ।

കേശവായ ദദൌ ലക്ഷ്മീഃ സന്തുഷ്ടാ സുരസംസദി ॥ 24 ॥

യയുര്ദൈവാശ്ച സന്തുഷ്ടാഃ സ്വം സ്വം സ്ഥാനം ച നാരദ ।

ദേവീ യയൌ ഹരേഃ ക്രോഡം ഹൃഷ്ടാ ക്ഷീരോദശായിനഃ ॥ 25 ॥

യയതുസ്തൌ സ്വസ്വഗൃഹം ബ്രഹ്മേശാനൌ ച നാരദ ।

ദത്ത്വാ ശുഭാശിഷം തൌ ച ദേവേഭ്യഃ പ്രീതിപൂര്വകമ് ॥ 26 ॥

ഇദം സ്തോത്രം മഹാപുണ്യം ത്രിസന്ധ്യം യഃ പഠേന്നരഃ ।

കുബേരതുല്യഃ സ ഭവേദ്രാജരാജേശ്വരോ മഹാന് ॥ 27 ॥

സിദ്ധസ്തോത്രം യദി പഠേത് സോഽപി കല്പതരുര്നരഃ ।

പഞ്ചലക്ഷജപേനൈവ സ്തോത്രസിദ്ധിര്ഭവേന്നൃണാമ് ॥ 28 ॥

സിദ്ധസ്തോത്രം യദി പഠേന്മാസമേകം ച സംയതഃ ।

മഹാസുഖീ ച രാജേന്ദ്രോ ഭവിഷ്യതി ന സംശയഃ ॥ 29 ॥

ഇതി ശ്രീബ്രഹ്മവൈവര്തേ മഹാപുരാണേ ദ്വിതീയേ പ്രകൃതിഖണ്ഡേ നാരദനാരായണസംവാദേ ഏകോനചത്വാരിംശത്തമോഽധ്യായേ മഹേന്ദ്ര കൃത ശ്രീ മഹാലക്ഷ്മീ സ്തോത്രമ് ।

Roman (IAST) Transliteration

mahendra uvāca

namaḥ kamalavāsinyai nārāyaṇyai namo namaḥ |

kṛṣṇapriyāyai sārāyai padmāyai ca namo namaḥ || 1 ||

padmapatrekṣaṇāyai ca padmāsyāyai namo namaḥ |

padmāsanāyai padminyai vaiṣṇavyai ca namo namaḥ || 2 ||

sarvasampatsvarūpāyai sarvadātryai namo namaḥ |

sukhadāyai mokṣadāyai siddhidāyai namo namaḥ || 3 ||

haribhaktipradātryai ca harṣadātryai namo namaḥ |

kṛṣṇavakṣaḥsthitāyai ca kṛṣṇeśāyai namo namaḥ || 4 ||

kṛṣṇaśobhāsvarūpāyai ratnāḍhyāyai namo namaḥ |

sampatyadhiṣṭhātṛdevyai mahādevyai namo namaḥ || 5 ||

sasyādhiṣṭhātṛdevyai ca sasyalakṣmyai namo namaḥ |

namo buddhisvarūpāyai buddhidāyai namo namaḥ || 6 ||

vaikuṇṭhe ca mahālakṣmīrlakṣmīḥ kṣīrodasāgare |

svargalakṣmīrindragehe rājalakṣmīrnṛpālaye || 7 ||

gṛhalakṣmīśca gṛhiṇāṃ gehe ca gṛhadevatā |

surabhiḥ sā gavāṃ mātā dakṣiṇā yajñakāminī || 8 ||

aditirdevamātā tvaṃ kamalā kamalālaye |

svāhā tvaṃ ca havirdāne kavyadāne svadhā smṛtā || 9 ||

tvaṃ hi viṣṇusvarūpā ca sarvādhārā vasundharā |

śuddhasattvasvarūpā tvaṃ nārāyaṇaparāyāṇā || 10 ||

krodhahiṃsāvarjitā ca varadā ca śubhānanā |

paramārthapradā tvaṃ ca haridāsyapradā parā || 11 ||

yayā vinā jagatsarvaṃ bhasmībhūtamasārakam |

jīvanmṛtaṃ ca viśvaṃ ca śavatulyaṃ yayā vinā || 12 ||

sarveṣāṃ ca parā tvaṃ hi sarvabāndhavarūpiṇī |

yayā vinā na sambhāṣyo bāndhavairbāndhavaḥ sadā || 13 ||

tvayā hīno bandhuhīnastvayā yuktaḥ sabāndhavaḥ |

dharmārthakāmamokṣāṇāṃ tvaṃ ca kāraṇarūpiṇī || 14 ||

stanandhayānāṃ tvaṃ mātā śiśūnāṃ śaiśave yathā |

tathā tvaṃ sarvadā mātā sarveṣāṃ sarvaviśvataḥ || 15 ||

tyaktastano mātṛhīnaḥ sa cejjīvati daivataḥ |

tvayā hīno janaḥ ko'pi na jīvatyeva niścitam || 16 ||

suprasannasvarūpā tvaṃ me prasannā bhavāmbike |

vairigrastaṃ ca viṣayaṃ dehi mahyaṃ sanātani || 17 ||

vayaṃ yāvattvayā hīnā bandhuhīnāśca bhikṣukāḥ |

sarvasampadvihīnāśca tāvadeva haripriye || 18 ||

rājyaṃ dehi śriyaṃ dehi balaṃ dehi sureśvari |

kīrtiṃ dehi dhanaṃ dehi putrānmahyaṃ ca dehi vai || 19 ||

kāmaṃ dehi matiṃ dehi bhogān dehi haripriye |

jñānaṃ dehi ca dharmaṃ ca sarvasaubhāgyamīpsitam || 20 ||

sarvādhikāramevaṃ vai prabhāvāṃ ca pratāpakam |

jayaṃ parākramaṃ yuddhe paramaiśvaryamaiva ca || 21 ||

ityuktvā tu mahendraśca sarvaiḥ suragaṇaiḥ saha |

nanāma sāśrunetro'yaṃ mūrdhnā caiva punaḥ punaḥ || 22 ||

brahmā ca śaṅkaraścaiva śeṣo dharmaśca keśavaḥ |

sarve cakruḥ parīhāraṃ surārthe ca punaḥ punaḥ || 23 ||

devebhyaśca varaṃ dattvā puṣpamālāṃ manoharām |

keśavāya dadau lakṣmīḥ santuṣṭā surasaṃsadi || 24 ||

yayurdaivāśca santuṣṭāḥ svaṃ svaṃ sthānaṃ ca nārada |

devī yayau hareḥ kroḍaṃ hṛṣṭā kṣīrodaśāyinaḥ || 25 ||

yayatustau svasvagṛhaṃ brahmeśānau ca nārada |

dattvā śubhāśiṣaṃ tau ca devebhyaḥ prītipūrvakam || 26 ||

idaṃ stotraṃ mahāpuṇyaṃ trisandhyaṃ yaḥ paṭhennaraḥ |

kuberatulyaḥ sa bhavedrājarājeśvaro mahān || 27 ||

siddhastotraṃ yadi paṭhet so'pi kalpatarurnaraḥ |

pañcalakṣajapenaiva stotrasiddhirbhavennṛṇām || 28 ||

siddhastotraṃ yadi paṭhenmāsamekaṃ ca saṃyataḥ |

mahāsukhī ca rājendro bhaviṣyati na saṃśayaḥ || 29 ||

iti śrībrahmavaivarte mahāpurāṇe dvitīye prakṛtikhaṇḍe nāradanārāyaṇasaṃvāde ekonacatvāriṃśattamo'dhyāye mahendra kṛta śrī mahālakṣmī stotram |